إنــقِــذ عايش من السهج

[عايش وهم]

السلام عليكم


إشتقت للسمك فانقذوني .. :frown:


أنا كنت أدح "السمك" كل يوم و كنت ما أصبر عنه .. طبعاً كنت أحب كل أنواع "السمك" باختلاف الوجبات و أنواعها .. لكن "دا كان زمان و راح" :sleepy:

اللي صار يطولي بعماركم من غايبين و حاضرين .. هاي جبيلة الحاضر الغايب جذه يسمونهم إذا ما تدرون بس بغيت أخبركم :h_terms: .. يعني سالفه تجر سالفه .. هاي "تجر" يعني "تيّر" بلهجتنا بالتشديد على الياء و فقيره هالياء متسلطين عليها من الشد مادري شو سوّت المسكينه .. و شوفوا الواو في "سوّت" بعد شدينا عليها وحليلها ... الموووهيييم .. على قولة إختنا تحفه .

في يوم من الأيام .. عاد ما أذكر .. يا في رمضان أو في يوم ثاني المهم كنت صايم .. و نازل بتفطر و ما قلت بفطر لأنه هالكلمه منقوده ع الريال :sleepy: .. المهم .. و كانوا مسوين "سمك" أذكرها يا شاويه أو مقلى .. ريحة السهج هاك اليوم أذكرها داعبت خشمي مثل ما اتداعب ريحة الجبن خشم جيري اللي متسلط عليه توم .. هو توم فقير بس مسوي عمره حمش ع الفاضي . و أذكر هاك اليوم يلست دقايق كلت السلطه و توني بهبش السمج و عينكم ما تشوف إلا عايش يركض يبى عزكم الحمام عشان أرجع :boxed: تميت أتهاوع لين اطلعت عيني و ماشي فايده .

من يومها و أنا ما أتحمل ريحة "السمك" و كنت حاط في بالي إني ما بتحمل أي شي من البحر بس مره كنت برع البلاد و انجبرت آكل مأكولات بحرية و كان الوضع جداً عادي .. و طلعت العقده بس في ريحة "السمك" .

حادثة الفطور كانت من 3 سنوات و نص و عقبها بسنه .. يتني حاله ثانيه أذكر مرن عليي ست شهور كنت فيهن نباتي مووووووول ما كنت أتحمل ريحة أي نوع من أنواع اللحوم و الحمد لله رديت لطبيعتي بس مرات ترجعلي الحالة خاصة في الصيف !!!

بس موضوع "السمك" لين اليوم معقدبي .. ويا الأضرار كذلك .. لأني من ودرت "السمك" و أنا دومي مب صاحي .. أمرض بسرعه و دوم أحس ظهري يعورني وايد وعكات صحيه مريت فيها و السبب إنقطاعي المفاجيء عن "السمك"

أدري أذيتكم ..

و القمنده .. على قولة اخوانا الكويتيين تنحصر في التالي ..

عايش محتاج وصفات أو طرق لوجبات "سمك" تكون خالية من السهج يعني يفترض إن ريحة السمك منعدمه كلياً .. عشان أقدر آكل .. و لو كانت نسبة السهج 1% يعني خلاص ما فيش فايده خاااالص .

و اللي عنده بعد علاج لهاي الحاله يفيدني فيه بكون له ممنون .. بس مب شرات علاج الشيبه الله يهديه قايل لاخواني حطوله "عنفوز" عند راسه و هو راجد (و العنفوز نوع من أنواع السمك و أكثرهم سهج) :mad: ..


و خنفروش ممنوع من الرد :mad:


عايش سهج

[خيال الحب]

دام السالفه فيهاا بحر

عيل بنحجز اول كرسي

ولنا رجعه بعدين

بس حاليا اقولك

ايلس كل يوم بسوق السمج:k_harhar1:

[عايش وهم]

خيال الحب :pullhair:

أقولك ما اتحمل ريحة السمج و تباني أنرزع في سوق السمج !؟

أترياك

شكراً ع المرور حبوب

قال سوق السمج قال :3:

[صريح]

افااا والله يا عاايش ..
و انا اقول عايش سمااج و راعي بحر
:a042:


علاجك تيلس يوم كامل في ثلاجة طرااد الشيبه
و تتمردغ ويا المسج لين تتعود ع لسهجه

http://oasis.bindubai.com/bin/uploaded/508_01209402651.jpg (http://oasis.bindubai.com/bin)



صدقه شيبتك يوم قال حطوله عنفوز عن راسه
بس انته ما يبالك عنفووز .... يبالك "خن" من الكبار عسب صدق
تتعود ع السهج
:fa56:

و صدقني كل اكلات السمج و عموما الاكلات البحريه بتم ريحه السهج فيها
و ان شاء الله تمزرها بهارات و كركم .. بتظل الريحه


جرب تاكل فلييه هامور ملقي ..
اتوقع ريحه السهج فيه اقل شي بين كل الاكلات

و شوربه السيي فوود لو تمزرها لومي ممكن الريحه تخف

جرب ابدا بهالشيئين لين ما ترد تتعود ع الريحه
:vampire:

[الشوق]

عاااااااااااايش انت عقدتك السمك ..
لوتسمع سالفتي ويا عقدتي مع الدياااااااااااااااي ..
يتني فتــــــــــره كنت اكل من ماكدونالدز على العشـــــــى ..........................وعينك ما شافت الا الليت (يعععععععع:9: )
يتني لوعه ........... لا لها اول ولا اخــــــــــــر
قلت شو السالفه ... :fa37:حسيت ان الديايه مب مطبوخه عدل وريحتها فايحه ..
بسس ماادري احساسي .. والا شو السالفه
.
.
المهم جزيت من الديايه ..
ومن عقبها كل ما يسوون دياي اب اي نوع من انواعه .. ومااقرب الاكل ...
خلاااااااااص اقولهم يسووولي سمج او لحم او ربيان او عدس .. لاكن .. حاربت الطيــــــــور وانواعه ..

:h_6abakhah:.
.
بس تبي الصراحه يتني فتره حنيت للريـــــش والطيووور :d010: وقلت ما شي يا شووق حاولي تاكلين يمكن اتغيرين ..
جربت ومحاولاتي باااااااءت بالفشل ,,,, لين فترة تقريبا 4 شهووور
قلت في نفسي يالا حاولي .. يعني معقووله مامليتي حاولت اكل .. رديت لاكل الدياي .. بس صرت ما استسيغه احس ان طعمه ما يدش مزاجي .. بس اكله خفيف .. بس تبي الصراحه ساعات اجزززز .. من ريحته ماادري ليش ........
.
.
بخصوص السمج (( اعصر لوميه مع ملح مع داقوووس )) وسولك الخلطه العجيبه
وهوووو في ألززززززززززز من السمج وربعه ..
عليك بالمالح والتونه وعقب حط عينك ع السمجه ..
.
.
بيفوووتك يا عايش اتضيع نص عمرك من دووووووون سمج القباب في نص السفره وفي بطنه الحشوو .. وفوقه دهن بقر ... وتعصر عليه لوميهههههههه ..( يمي يمي يمي ) ......يالزيز يا رااااااااايء هيهي ... اعتبرها دعايه يمكن اتخليك تشتاق له
.
.
.
وبعدين انقولك بالهنا والعافيه
بدعيلك في صلاتي علشان هاي العقده اتفج عنك
وسلامتك يااخوي ..
تحياتي / الشوق :fa41:

[حلم الطفوله]

عايش سهج

صدقه الشيبه الله يطوللنا بعمره إن شاء الله .... وداوها بالتي هي الداء :tounge:


وصهم يسوولك جشيده ويترسونها لومي يابس كفتح شهيه لوصفات السمج

بس تدري ... أنا ما اعتقد إنه السبب من سهج السمج !! أصلا محد يتفطر سمج على أول أيام رمضان ... الله يهديك بس:smile:

أصلا السمج ما ينصبر عنه يا عايش ....وخصوصا مشواي لقباب ومقلى الصافي .... وكثر الليمون وياهم وكلهم ويا عيش أبيض وسمن اعربي .... يميممي وعليك بالعافيه :yes:

وابئى أبلني جان ما تندمت على السنوات إلي مرن بدون ما تاكل فيها سمج:smile:

[أنامل قلب]

:
.

الله يكون بعونك وعون السمج ^_^ ..

حالات مثل هذي تصير عند كثر من الناس أكيد ..
منهم اللي تظل عقدته معاه للأبد ..
ومنهم اللي تفج عنه ولله الحمد بعد مدّه والدال عليها شده .. !

حاول تقابل مشكلتك من وجهة أخرى ..
وجرب تعد الوجبة اللي تحسبها ملائمة بنظرك بنفسك
كبدايه لمحاولة فك العقده ..

وتذكر دائما المذاق المميز .. كدافع مغري لشخصك .. :fa46: !!

:

اممم ..
ربي يعافيك أخوي ..
واللي سبقني + بيون عقبي بيفيدونك أكيد ..



احترامي ~

:.

[مايهزك ريح]

الله يعينك انا وصلت لمرحله اني لا آكل سمج ولا لحم ولا دياي .. عايش على الجبن واللبنه !
ما اعرف شو استوابي ..
كنت اعايب على واحد ويانا في الجامعه كان ما ياكل غير جبن .. وانا الحين استويت مثله >_<

بس اللي انا اعرفه انك لازم اتنقع السمج في لومي وملح .. وفلفل اسود يوم كامل ..في الفريزر ..
وعقب تشويه ..وصدق ما بتروح فيه سهج .. ^_^

[شمعة أمل]

بخبرك الطريقه. وويا اي سمجه.. بس لازم تتريا اسبوع:vampire:
انا بعد اعاني من نفس المشكله وماكل غير سمجه ووحده ولازم يشوونهاا.. ومول مافيها ريحه وحتى طعمها مب سمج سمج:redface:

[بنت الدلع]

بسيطه يا عايش
دش المطبخ وشوفهم كيف يقطعون السمج ويودنونه في الماي ويحشونه ويشوونه
ولازم تشارك في كل خطوه يخطونها
وانته والخير رباعه p=

[عايش وهم]

صبحكم الله بالخير


عمووو صريح

الله يسامحك تباني أتمردغ ويا السمج و أنا ما أنزاد .. ؟؟ يعني ريحة السهج و أعاني وياها تباني أكون مسهج بعد ؟؟ عز الله كملت يومي ساعتها .. أظني بتم أركض في الشوارع و أنا أكفخ راسي :mad:

المأكولات البحريه غير السمج ما عندي فيها مشكله .. آكل ربيان و نغر و محار عاااادي حتى لو مسهج بس القصه في سهج السمج ما غيره . :frown:
أما عن الفيليه .. أنا ملاحظ إنها الوجبه الوحيده اللي ممكن تنعدم فيها ريحة السهج .. بس في البيت ماعندي حد يسويه أو يضبطه فجان بتنعتني ع مطعم يرزى الواحد يمر عليه و يتساهج فيه .. ساعتها بقول صريح أجدى .. مب تنعتني على ثلاجة شيبتك :mad: يا قاسي .



خيّتو الشوق

تبين الصدق .. أنا مادري شو اللي خلاني أعادي اللحوم بأنواعها من سنتين تقريباً .. بس عانيت معاناه غريبه .. ما كنت أقدر آكل ويا حد .. بس الحمد لله عدت هاي القصه ع خير و مرات اترد لي الحاله بشكل بسيط .. و أول ما أحس إني على وشك أعاف نوع من أنواع اللحم .. أودر الأكلات البروتينية و أتم على سندويشات الجبن و الخضره و الفواكه و عقب تمام ..

و جربت آكل مالح ويا العيوز هاك اليوم و الحمد لله طلعت سليم معافى لأن المالح مول ما أشم فيه سهج عاد مادري المالح جذه و لا العيوز تعرف تعابله عدل .

و هذا ربيعكم (داقوووس) لا ربيعي و لا أعرفه ما يحبني و لا استسيغه جان ناااااااااادر من الشطات من نوع ثاني يمكن .. :whistling:



خيّتو حلم الطفوله

أشوفج إنتي و صريح وايد يعني مستانسين على اسلوب الشيبه :k_mad_argue: إنتوا متعاطفين ويايي ولا متعاونين ويا الشيبه ؟

بصراحه لين اليوم ما جربت أغامر ويا الجشيد .. لبده بيكون أوكيه :k_icon9: يبالي أجرب .. و ع طاري أتفطر سمج .. يعني هو بإيدي مثلاً .. ما أحب أأمر ع العيوز تغمضني .. لذلك اللي تسويه آكله لو كان كنكري عليه قشطه .. دامه العيوز مسوتنه أكيد بيطلع حلو :m_m7tar: .

و بعدين مافي داعي للتعذيب :frown: سمن ذوابه على عيش أبيض و عداله منسدحه قبابه حشوتها جاعده بطنها .. أعتبرها غوزي البحر ... هييييي ما تفكرنيش باللي كان . :sleepy:



خيّتو أنامل قلب

الشي الوحيد اللي استفدته من إنقطاعي عن السمج (إن تساقط الشعر وقف عندي و كثافة شعري زادت) و هاي معلومه حساسه لازم يعرفونها الشباب .. أما باجي الأمور فاعتبر نفسي مبتلي الله يبعد عنكم .. و المشكله هالسالفه مسببتلي حرج اجتماعي :frown: يعني وقت العزايم أفتشل .. يوم يكون بين الوجبات سمج .. ويهي ينعفس و أنش ما أقدرأيلس و في الأجواء ريحة سمج .

و يعافيج و يبعد عنج .



خيّو مايهزك ريح

بن عمك .. إذا اتصلبك صريح لا ترد عليه و إذا قالك تعال بنسير مكان لا تسير .. قوم عمنا أبو صريح عندهم ثلاجه في الطراد مالهم كلها سمج و سهج يدزون فيها الفقارى اللي مثلي و مثلك و يعذبونهم .. :k_special2: .. فــ سِر بعيد و تعال سالم .. تراني نصحتك .

و لازم أخبر العيوز عن سالفة الفريزر و إذا انفعت .. بنييبك عندنا تجرب :devil:



خيّتو شمعة أمل

عندج اسبووووووع واااااااااحد بسسسسس :k_icon28: و إذا ما ييتي و حطيتي الخلطه السريه :k_icon28: بكون ساعتها مضطر إني استخدم صلاحياتي كمشرف عام ضدج .. :sleepy: .. بنتريااا



خيّتو بنت الدلع

مااااا اتحمل ريحة السهج تبيني أيلس في المطبخ و هم يقطعونه ؟ :mad:





خيال الحب ،، صريح ،، حلم الطفوله ،، بنت الدلع

إعدااااااااام مع تعجيل التنفيذ
:mad:




اخواني ،، خواتي .. شكراً على اهتمامكم .. ممنوووون :rolleyes:

[مايهزك ريح]

وبعد سألتك الوالده اكدت المعلومه اللي فوق ..
وفي شي ثاني اول مره اسمع به انهم يفركون السمج بطحين .. !
وعقب يعصرون لومي خضر .. عليه .. عشان يخوزون ريحة السمج !

مادري اسأل العيوز عن هالسالفه لأني اول مره اعرف هالمعلومه ^_^

[قصايد غلا]

نحن في بيتنا يودنون السمج في لومي و ملح و فلفل أسود فترة طوييييييييييييييييييييييل ة عشان تخف الريحة و تكون شبه معدومة :yes:

أنا بالنسبة لي ماداااااااااااني سهج السمج عشان جذه ماداني آكل غير القباب "عاد هذا خبالي" و السبريم و مرّااااااااااات أكل الشعري ، بس الحمدلله ما وصلت للدرجة اللي وصلت لها يا عايـــ:m_ma9dom:ـــش سهج


و بالنسبة للربيان إذا كان برياني ربيان ، أميه تزيد الزعفران في العيش ومووووووول ما تكون فيه ريحة يمي يمي يوعتني:fa56:


أما الحل الأصعب هو إنك لازم تاكل في بيت عمة ربيعتي:fa44: لأنها ماشا الله ماشا الله ماشا الله عليها فنانة و السمج يوم تسويه يكون لذييييييييذ و اللي ما يحب السمج يعيبه :fa42:

[قصايد غلا]

معلومة إضافية:vertag:

توه حصلتها من أميه :h_ttmasha:


إنه لازم ندق الثوم و الزنجبيل الخضر و نفرك به السمج من داخل و برع ويا اللومي و الملح و الفلفل الأسود
خلاف نحط بزار عربي و كركم و نخليه فترة و عقب نسوي لي نباه جان مقلّى ولا مشواي ولا صالونة و .... إلخ .

[الاسطوري]

السلام عليكم ..

"عايش ورم"

حسب رايي باللي قريته إنك ماتعاني من ريحة السهج كثر ماتعاني من مفهـوم السمج وإنك ترفض
هالصنف من الطعام بشكل قاطع بسبب ظروف مريت بها وفي ناس أعرفهم
عز المعرفة مروا بنفس التفاصيل اللي انت عشتها
وكرهوا أصناف ثانيه كانت
حاضره نفس المراسم ومنها البيتزا والمعكرونه بس طبعا المفروض عقب فترة الواحد يشيل هالخوف
من قلبه ويحاول يرد كإنسان طبيعي وهذا اللي صار في حالتهم والحين يمكن
علاقتهم بالصنف هذا حوالي 80% بس أحسن من
لاشي، شوف إذا كانت
خطتـك الدخول لعالم الأسماج فأنا أنصحك تدخل من باب ثانـي كبداية واللي هو باب عصير السمـج
مهياوه (ميشاوه) وبالطريقة هاي بتكون إستفدت ولو بنبسه بسيطه من
مكونات السمج والفيتامينات المتوفرة هذا إذا
ماراحت أصلا مع تغير
الحالة أما موضوعك الثاني اللي هو الريحة أحس إما إنك تدور أحد الشياب يهزبك عشان تجبر نفسك
خطوة بخطوة على أكل السمج لين تتقبل الموضوع بشكل تام وبالتالي
تقتنع إنه أكل عادي وإنك كنت تتوهم أو إنك
تروح أو تتصل في دكتور
نفسي وأفضل هذا اللي يقدم في إذاعة نور دبي العصر لأنه متمكن وفاهم ويمكن يقدر يعطيك المبدأ
اللي لو مشيت عليه تعالج نفسك بنفسك من هالحالة لأن طلبك بدون تحدي
قوي منك يكون أشبه بالمستحيل جنك تقول
أبى أدوخ وأتم صايم
:fa36:

الاســـطـــوري
أخوكم

[مزن هتان]

عانك ربي أخوي عايش

أنا عكسك السمج عادي بس المأكولات البحريه
الثانيه مستحيل أقعد عـ السفره ما أقهر
ريحة الربيان و الشنيوب P: و أتحسس منه
و الجشيده ما اكلها أحس فيها سهجه
الوالده تسوي السمج أحيان زي الطريقه
اللي قال عنها مايد الطحين و لا اللومي الخضر.
السمجه المشوايه بالتنور كلش ما تشم الاسهجه فيها و الا المالح.

[تحفه]

اطلب هامور فيليه من هارديز صدقني احلى بوايد من اللحم والدياي :fa46: ماتحس انه سمج
جي تحسه فرشش مافيه لاريحة سمج ولاطعم سمج :14: ..

انا ماعندي خبره في الطبخ فسمحلي على نصيحتي المتواضعه :fa46:

بس حالتك ذكرتني مره يوم شردو بشاكيرنا يتنا فتره نيلس فالمطعم انبحلق في "المـيـنيو" ونحلم باكل البيت لول

الواحد مايقدر شي الا يوم يفتقده :mf_leia:





هاي "تجر" يعني "تيّر" بلهجتنا بالتشديد على الياء و فقيره هالياء متسلطين عليها من الشد مادري شو سوّت المسكينه .. و شوفوا الواو في "سوّت" بعد شدينا عليها وحليلها ... الموووهيييم .. على قولة إختنا تحفه .




تدري اهلي الي في بوظبي معقدتنهم الياء في كلامي لدرجة اني يوم اتكلم ويسمعوني اقول كلمه ملفظها غريب عليهم يعيدون يقولونها وراي هاها

الكلمه الي دوم نتضارب عليها منو الصح ومنو الغلط هي كلمه تيـلـيفون! هم يلفظونها تلفون :m_mar7ba: ولين اليوم مب متفقين

[مجموعة إنسان]

تبي الحل عايش وهم !!


رش عطر على ايدك اليمين وكل سمج
وقبل ما تحط اللقمه خذ شهيييييييييييييق
ولا تمضغ الأكل
على طول أبلع
واذا شوكه علقت في مسرطك ابلع موزه

واذا صارلك شي ترا انا ماعرفك ولا تعرفني !!
ههه

[الا انا]

..
الله كشخه ...
استانس يوم اجوف احد متعذب من اكله ..خخخ

.. السمج وما ادراك ماالسمج ....

تدري .. انا ماحب السمج .. بس اوقات يعيبني وآكله عادي .. خاصه اذا كان مشوي . .. وشي اوقات ماحبه ابد .. وتلوع جبدي يوم اشم الريحه .. **

يعني حاسه فيك .. لوعه وتكره حياتك كلهااا ..

بس ماعليك هذي فتره وبتعدي .
يصير فيني جذي .. بس ع الدياي اكثر ..
ويتني فتره صرت نباتيه .. وبعدين عادي ..
يعني فتره وبتعدي ..

وخلهم يتبلونه زين لك ..
ثوم و بهارات وربعهااا خخخ
وليمون وكل شي ..

اكلها مشوايه وجرب ..
يعني بالتتبيله بتفتك من الريحه ..

... جرب صدقني وبتاكل .. وبتدعيلي ..< اخاف تدعي علي ..هع
..

يعني لازم تاكل سمج ... مب لازم .. اكل مهياوه بداله .. خخخخخ

لوول عصير سمج .. هع ..

[شوق القلوب]

الســـلام عليــكم... و صبحكم الله بالخيــــر..


..


الله يهديــــــك يا عايــــش.. وصفك فضيع لدرجه بدت جبدي اتلوع من السمج على هالصبح..! و المصيبه انه غدانا اليوم بياح مشواي ..!!! "و صالونه قرع جان في خاطرك :4: "

..


ماشاء الله .. الجماعه عطوك معلومات قيمه.. ومثل ما قالت حلووووم.. على الاقل جرب القشيـــد.. هذا أبسط شي..

و خل حد ياخذلك فيليه سمج.. و خل يودنونه بليمون و ملح فتره طويله و يبهرونه عدل.. و عقب يقلوللك اياه شوي.. و يسوونه برياني.. و يحطون وياه شويه ربيان من الصغار..

..

تعاااااال.. :fa51:في شي ثاني سهل و مافيه ريحه... عليـــك ببرياني التـــونه.. اممممم يكون يمي يمي.. بصراحه انا ما اقاومه لو شو ما غرفتلي ما اشبع منه..!!:doh:

..

وشو رايك لو اتجرب السلمون..؟؟ اتوقع انه ريحته وااايد خفيفه.. جيه بتحصله مثل الفيليه يبيعونه في الجمعيه.. بعد خل يتبلونه و يشوونه..بيكون طعمه حلووو..

..

الله يشفيك و يعافيــــك.. و عقبال ما انشوفك متمرغ في طراد السمج :14:

[مجموعة إنسان]

نصيحة

حط في بالك ان السمج ديااي ..
يعني قول في مخك ان هذا دياي
واقنع نفسك بهالشي
وكل
صدقني ما بتفكر
هع

[طير الحب]

هلا والله

يحليلك حالتك حالة انا عكسك طول عمري وانا احب أكل دياي وفجأة تحولت للسمج وفعلا انا تحولت نباتية بنسبة 80%


بالنسبة للسمج عندي وايد وصفات اهم شيء عقب ما ينغسل يتم دعكه بالثوم واليمون والكزبرة...


برب

[شوق القلوب]

الحمــــــــد الله .. :14: تونا امخلصين غدا..!

و يا سلام ع البياحه المبوزه.. مسكينه.. اطلعت حااامل.. وكان الحبل عجييييييب :fa51:

و اشحلات فنـــخ اليـــح الباااااااااارد.. :fa41: يبرد على القلب..

..

بس بغيت انقلك راي الوالده.. اتعرف تحلا السوالف على يلسه الغدا.. و جان اتوافق وبشده على سالفه العنفووووز.. :4:

[ذنـيـنـي]

انا بشكل عام مب ربيع السمج
بس احب السلمون لأنه مووووووووووول مافيه سهج

[تحفه]

^انا احب شي اسمه زبيدي 3333>

يوم مايسوون لي زبيدي آكل سوشي < لاتسالني عن العلاقه p;

[الدلووووعة]

اخويه عايش وهم
انت عالاقل تحب شي من البحر
انا ابداااااااا يوم يحطون عدال السمج ولا ربيان ولا قبقوب
او اي شي ماروم اتم عالسفره انش
خلاص انا من يوم كنت صغييره يمكن كي جي عظمة سمجة علقت في رقبتي
ومن يومها خلاص كرهت السي فوود بجمييع انوااعه

يعني فالبيت يوم يبون يسون سمج لازم يسون اكله ثانيه مافيها سمج

طبعا ابويه واخوانيه حاوولوو وياي انهم يخلوني اكل سمج بس مستحييل

مرات كانو يحطون فصحن العيش مالي قطعت سمجة من دون ما احس
بس سبحان الله والله ما اكلها واحس فيها

طبعا المشكله انه اوكييه اللي فالبيت يعرفوون انا ماحب السمج
بس يوم نسير عزايم هني المشكله يعني اوكييه اذا بيت عمي
خلاص يعرفوون اني ماحب السمج

طبعا معاناتي انه دوم يقولون عني خقاقه يوم ما اكل سمج
انا هب سالفت اني خقاقه او شي بس خلاص ماحب اكل سمج
ولا احب ريحت السمج هب بيدي ^_^

ابويه احييد مره وداني وياه يوم كنت فالابتدائيه خخخ البحر تخيلوو السمج فطارد عدال كانت معاناه

ولين يومكم ها احاول الكل يقولي اكلي سمج لأنه يعالج وايد امراض
بس ماشي فايده

يعني ربي يعيينك ويعيني على السمج ^_^

[خيال الحب]

هااا اخوي عايش بن وهم .. بشررررناا ان شاء الله الامور سارت على ما يرام

ترا رمضان قرب وياويلك ان فطرت سمج خخخخخخخ

.. لي رجعه.. عشان اقولك شو تسوي

[فارس شرجاوي]

يم يم يم بطنك بيعورك اشتهيت سمج يلا بيا بيتكم اتغدى سمج <<ههههههههههههه