ميلسنا وسوالفكمـ ـ // [الأرشيف] - الصفحة 6

أنامل قلب

19-09-08 ||, 06:24 AM

السلام عليكم .. . !

/

هممم ،، سؤال ؟
أحد منكم مر ابـ هالموقف ..

إن ينحط بين رغبته الـ خاصه حول موضوع معين ،،
وبين رغبة اهله حول نفس الموضوع .. . !

انتو تبون شي مقتنعين به ،،
وأهلكم يبغون اللي يعاكس رغبتك الخاصه واللي مب مقتنع به .. . !

هممم ،، تبدأ تمشي بالدرب اللي حابينه لك ،، بس عشان لا تزعلهم ..

لكن تلاقي نفسك بالكفه الثانيه مب قادر تفلح ،،
+ تبدي كل اللي تقدر عليه عشان تبين إنك ما تبي هالشغله ،، لا إراديا .. . !

ليــش ؟ // لانك باختصار مب مستوعب الدرب ولا قادر تحبــه =(

/

ماحب الجامعه يا ناس ..

هالكثــر ( ................... :frown: .....................) ،،

.. .

أنامل قلب

19-09-08 ||, 06:37 AM

أحس آنا مو مال سوالف الجامعه ،،
ماحب اسلوب الجامعه ولا أحب فكرة الناس ابـ مفهوم الشهاده .. .

وأبد أبد أبد ماني مرتاحه !

/

مادري هل أنا اللي غلط ولا الناس ..

ولا حتى إن كان العيب بـ شخصي
لكوني ما أقدر أستوعب هذي الحياة الجامعيه
بـ تفاصيلها // بالساهل !

مابـــي ،، ومليت :smile2: ..

.. .

دموع قلم

19-09-08 ||, 11:23 AM

,

أفــــااا ..

تمليـن منها .. وأنا فيهــا ..؟!!!

:smile2:

,

وحي القلم

19-09-08 ||, 02:33 PM

سكون

كل الناس اللى صادفتهم و كانوا مب امكملين الجامعه متندمين أحينه و يقولون يا ليتنا كملنا

خصوصا أنه اللى فجيلهم أغلبهم دارسين

انتي لا تفكرين في وضعج أحينه

فكري فيه عقب كمن سنه شقايل بيكون

ما تعرفين ظروفج كيف بتكون.. يمكن تضطرين انج تشتغلين

و عاده حزتها بتتندمين لانه معاشات اللى بس عندهم ثانويه عامه >> ......... :fa52:

و بعدين شقايل تملين منها و دموع قلم فيها ها؟؟ :4:

.
.

اممم عندي سؤال للى يدفعون فواتير التيلفون من المكينه :tongue:

شقايل تشغلونها إذا كانت امبنده؟؟

هاذيج المره يوم سرت كانت الشاشه زرقا و هوست عليها عشان تشتغل بس ما اشتغلت

لكني و أنا ظاهره عقب 10 دقايق تقريبا شفت واحد واقف يدفع :10:

المزوحي

19-09-08 ||, 02:46 PM

اختي شي عادي اللي تحسين به، لأنه تفكرين في حاضرج وبس، فتحسين ماتبين !!

يعني الرضيعه سارت الجامعه، وردت تصيح تقول حق الوالده مابغي الجامعه، فالوالده قالت لا .. لازم تدخلين الجامعه

والحين تخرجت من سنين طويلة، ودوم تقول حق الوالده احمد ربي إنج خليتيني اكمل ...

يعني الواحد ملبيخلي عياله دوم ع كيفهم ..

وعندج أخويه يوم كان في الثانوية قال: مابدخل التقنيه انا ابغي اشتغل أكد على نفسي، انا ابغي راتب ومن هالخرابيط

الوالدة قالت له على الاقل لو تدرس سنتين في التقنيه المهم تكمل ...

خلص التقنيه أكثر من 6 سنوات بس من ايام كان يكلمني يحس شهادته مب شي ويغي يكمل دراسه بس ماعنده وقت ..

شو رايج سكون تصلين استخاره وتودرين هذا كله ... وشوفي شو اللي بيصير ..

جمعه مباركه

مــهــابه

19-09-08 ||, 02:48 PM

أنـامل :

انـا كل سنه عـ هالمنـوال
كل بدايه كورس اقول لهم خلاص بظهر من الجامعه ومايحتاي اكمل ..

بس اهليه يقولون لا ..

بس الحين يوم وصلت فـ نص الدرب ، انا من نفسي حابه اكمل ..

وحي :

للأسف ماعنديه عـلم فهالسوالف

أنامل قلب

19-09-08 ||, 07:12 PM

ماعرف شو أقول .. . !

شكرا ،،وصدق يزاكم الله خير عالاهتمام ..

بس بعد ،، مـــــــــــــااااحبكم XP

/
\

/

.. :smile2: !

مــهــابه

20-09-08 ||, 01:21 AM

وجـآن يفوز [ العـين ] اليوم :fa34:

قـويه عـين ، فـايز عـ الشـآرجه ومستانسه بعد ماشي وطنيه :4:

حلم الطفوله

20-09-08 ||, 01:37 AM

اونه !!! عاشت العين وعاشت أهلها

وهارد لك للشارجه وأهلها الغاطين :)

مهابه .... موووووووووول ما يخصني بالتشجيع

ليش شيء مباريات برمضان !!!

مــهــابه

20-09-08 ||, 01:42 AM

^
اليوم بـدأ دوري المحـترفين

فـازت العين عـ الشارجه
والأهلــي فـاز عـلى مادري منوه ( اتوقع النصر )
وعـيمان غـَلب الوصل . .

هاللي أعـرفه

رمــش الغـــلا

20-09-08 ||, 02:57 AM

^ متااابعه ماشالله ...~

[ لوووول ] ..!

أبا أتسحر ... وفخاطري كشري [ لووول ] ..~

بس من ايد حرمه مصريه هع هع..!!

المزوحي

20-09-08 ||, 11:02 PM

السلام عليكم

كيف الحال ؟؟؟

اليوم راقد الصبح الوالد مب صاحي ووديناه المستشفى، وبعده هناك ...

شو اخباركم ؟؟

مايهزك ريح

21-09-08 ||, 09:15 AM

المزوحي ..
البارحه سويت لفه على دبي ..
عشان اتذكر الشوارع كلها اللي ناسنها ..
وخصوصا انه في شوارع يديده.. :fa46:
وشوراع مكسره .. كسرن موتري :bash:
آخر مره ظيعت وصلت الشارجه .. ما اعرف شو استوابي :6:

وسلامات للوالد ما اشوف شر .. !

أنامل قلب

21-09-08 ||, 09:51 AM

ما يشوف شر ،، وربي يعافيه باذنه ..

مــهــابه

21-09-08 ||, 11:19 AM

~ صـــــباح الخيـــر . .

المزوحي

21-09-08 ||, 01:43 PM

زين سويت يوم خذت لفه، صدق ستوينا مانعرف الشوارع،

الشر ما إييك ، بس أمس حلمتك .... مادري كنت ازقرك وانته مشغول .... لابس كندوره بيضاء وبدون غتره ...

وشويه شعرك خفيف ...

سكون شكرا ويعافيج ...

اليوم سرت الدوام متأخر ... والله تعب ...

رمــش الغـــلا

21-09-08 ||, 01:50 PM

مرحبااا ؟..~

شحالكـــم ؟!

مقهوووورة .., خلصت دواام واتريا حد يمرني >_<!!

.
.

وباجر عدنا إفطاار .. وبتم لي فليل فالكلية .. عاد مخلينا نسوي فعاليات والعاب حق عيال الاساتذة وصغاريتنا اللي بنيبهم ..~

شو يومكم اليوم ؟؟

المزوحي

21-09-08 ||, 01:57 PM

مب حلو الانتظار، الله يعينج رمش الغلا ...

الاجازة تبتدي من يوم 29 والدوام 5 / 10

والخاص يومين إجازة بس . الثلاثا والاربعا

رمــش الغـــلا

21-09-08 ||, 02:00 PM

هي واللهـ .. شو أسوي غصباً عني ..!!

,..

انا اجازتي من 25 ان شاء الله بتبدا لين 5-10 ...~

طبعا بعطي عمري اجازة الاحد ..
.
.
يحليله أخوي بس يومين [ لوووول ] ...~

المزوحي

21-09-08 ||, 02:07 PM

زين يعني قبلنا ...

تحفه

21-09-08 ||, 06:29 PM

مارمت انش اليوم حق الدوام وغبت >.<

المزوحي

21-09-08 ||, 06:32 PM

كنت بغيب تحفه، بس مابغي رصيد الاجازة ينقص عندي، فسرت متأخر ...

محد ناوي يسافر إجازة العيد ؟؟؟

عهد الوداع

21-09-08 ||, 07:46 PM

مساء الخير ,,,

شو اخباركم .....

مــهــابه

22-09-08 ||, 07:47 AM

صبــــاح الخيــر ~ !* . .

كيفــكوووون ؟

رمــش الغـــلا

22-09-08 ||, 08:49 AM

صبـــاح الورد ..~

الحمدللهـ بخييير ...، أنتي شحالج ؟؟

ا ل غ ل ا

22-09-08 ||, 09:31 AM

صباح الجوري وألوان قوس قزح

^_^

مــهــابه

22-09-08 ||, 10:32 AM

انـآ بخير الحمــداللـه ..

عندي برزنتيشن الحين وانا مب محضره شي لوول

وهالدكتور حاط دوبه بدوبي ، ( هو نفسه اللي يخليني اعيد اسمي ألف مره ) ..

غللللللللللللللس :(

رمــش الغـــلا

22-09-08 ||, 10:37 AM

^
lOOL

اسميج سوالف ويا هالدكتور ..!!*

يلا يلا بالتوفيق وان شاء الله كل شي اوووكي ^_^

خبرينا عاد عقب ما تخلصين ..~

مــهــابه

22-09-08 ||, 10:43 AM

^
الله يعـين والله ..

كريـه لوول ..

بشرح سلايدين وبخلي الباجي عـ القروب ..

يـاآرب مايسأل وايد ، مب متفيجـه والله

مايهزك ريح

22-09-08 ||, 10:47 AM

المزوحي .. صح انا مب دايما البس غتره واذا لبست اتعصم ..
غتره وعقال للدوام .. وصح شعري خفيف .. بس ابيض واسود خخخخخ!

كنت اخطط لإجازه العيد .. بس لين الحين ما اتفيجت اسوي الويزه ..
دوام وملل .. وين بيواحيلي اسير اسوي شي .. >_<
بس بحاول ارتب من الحين لعيد الأضحى !

مــهــابه

22-09-08 ||, 12:21 PM

:4:

ماشرحت ، خلص الوقـت ، وعَنـاد جان :4: يدخلنا الجزئيه فـ امتحان الأربعـا :a058:

يعـني مب مشروحه شقآ بندرسها:a046:

~ بروح أرقـد ، بنش وعنديه 600 شغله:fa43:

دعـواتكم :fa41:

دمعة عين

22-09-08 ||, 12:43 PM

^
الله يعيـَــنج . .

آنآ توه البنـَآت صدموني ، محطيني ليدر ع القروب :fa44: . .
يعنـَـي كل شي ع رآسي ، . .
بس بيني وبينكم ، آحـَـسن عشـَـآن يخووز عني البرود شوي ،
:fa38:
،
.
.

أنامل قلب

22-09-08 ||, 01:02 PM

أنقذوني من الكلاس !

أنامل قلب

22-09-08 ||, 01:02 PM

عطتنا امتحان مفاجئ =$

المزوحي

22-09-08 ||, 01:16 PM

مايهزك ريح

عيل كنت من عشر ايام في الفستفال الظهر ؟؟؟

اخويه امس يقول بسافر، قلت له سير سويسرا، قال : ايوه بس ماشي حجز حق الرده، احتمال اسير ايطاليا، يعني

مابيطول بس إجازة العيد ....

زين رتب حق عيد الاضحى

انا اليوم كنت بصيح يوم سرت الدوام، فيّه رقاد ....

بنت ناس و عرب

22-09-08 ||, 01:43 PM

ناس فكلاسات و ناس فدوام يتهازبون و يا عملاء سبحان الله

مجموعة إنسان

22-09-08 ||, 01:51 PM

وناااس الحين بينامون
يوووووعاااااااااااااااااا ااااااان

المزوحي
اخواني بيروحون لبنان
من لبنان بيروحون مصر

طيارتهم ثاني يوم العيد
صدق بخاطري اروح
بس دواااااام

مايهزك ريح

22-09-08 ||, 01:59 PM

المزوحي من زمان ما سرت الفيستيفال .. انا الحين يالس ادور سيراميك ورخام .. واثاث .. بعد !
مريت المتحده مال السيراميك .. ولقيته مبند وقتهم غلط .. في رمضان >_<

معقولة ماشي حجز رده سويسرا .. دور في اكثر من طيران ولا بس طيران الإمارات !

محمد .. انته مب في الجامعه ( العين ) .. وحده من الأهل تشتغل هناك واتقول انه عاطينهم اجازه تقريبا 10 ايام تبدأ يوم 28 !

عهد الوداع

22-09-08 ||, 03:06 PM

:rolleyes:مســــــــــاء الخير :rolleyes:

مزن هتان

22-09-08 ||, 03:32 PM

مسا النور عهوده

أهلاً بزين وجهٍ حلى اللياليه . .
و أنار في الظلماء سود الدياجيَ
والناس حولي بين لاهٍ و غائبٍ . .
وبين المنتظرٍ يعد الثوانيَ
رمضان قد زنت السماء برحمة . .
فتحت بمقدمك الجنان الثمانيه
صومٌ و صدقٌ و إبتهالٌ و دعوةٌ . .
عاليت بالأجر الجبال الرواسيَ
لك الحمد ربي ان رددت مداره . .
لكن رجائي لا ترد دعائيه

^^ حلو صوت الياهل، حلوه الدعايه

مــهــابه

22-09-08 ||, 04:01 PM

~ صبـايا :
كلـ(ن) يغـني عـلى ليــلاه :4:

~ مزن :
أحب هالأعــلان انـا ..:inlove:

~ خلصـتوا أغراض العـيد ؟ ( انا للحين مب مسويه شي ):fa46:

مخـورتي وعبـآتي هينه فالعين ومب محصل حد يوديني آخذهم :3:

شكلي بستوي زلمه ومابلبس مخور صباح العـيد :fa56: . .

مزن هتان

22-09-08 ||, 04:08 PM

أنا خلصت أغراض العيد بس باجيه عباتي
للحين ما اجهزت

مهابه
حاولي وياهم حلاة صباح العيد و انتي لابسه مخوره
و الا دراعه، أنا خليت الخوار حق ثاني صباح أول يوم
بلبس دراعه !!

مــهــابه

22-09-08 ||, 04:39 PM

^
تـوني كنـت أكلم أمـايه ، قـالـت لي : مخـورتي وصلـت عن طريق ( الأمبـوست ) . .
بس بـاجتـلي العـباه ( مفصلـتنها من شهر 8 ) وقـال بيخلصهـا هالأسـبوع . . .

أمـا باجي الأشيـا للحين ماسويـتهـا ( نحـن لو مانخلص أغـراضنا فـ ليله العـيد )مابنــرتاح لوول

مزن هتان

22-09-08 ||, 04:53 PM

^^زين الحمدلله

آخر يوم برمضان !! دبي ما تنطاق، نخلص امورنا قبل أحسن
آخر يوم راح تجينا الحنايه في بيت هل أمي

المزوحي

22-09-08 ||, 05:08 PM

مجموعة انسان .... حاول تسير وترتب ولو 5 ايام

مايهزك ريح .. الله يعينك على التدّوير في المحلات ...

صدق ماشي حجوزات دام كل الناس تسوي هالحركه في العيد .. سلمك الله عندنا واحد هندي في الدوام

في السنة يظهر 10 مرات ... ونحن مره ويحشرونا بعد ..

يعني يظهر إجازته السنويه بالإضافه للإجازات اللي تكون فيها مناسبات .. ومن يومين ظهر وبيتم لإجازة العيد وبيرد ...

وفي كرسمس بيظهر .... وعندنا واحد يشتغل ويايه قبل رمضان سوا هالحركه ... عينه كانت تعوره ...

عطوه إجازة 3 أيام وضبطهم مع الجمعه والسبت وخذ من رصيده يومين ...

وماشي حجوزات بعد، اقول حق المسؤول لـ هالدرجه ماشي حجوزات، قال اكيد إذا كل حد بيسوي مثل فلان

لازم ماشي حجوزات ... شوف كم اللي عندنا في البلاد ومن غير اللي يدخل سياحه ويظهر ...

مــهــابه

22-09-08 ||, 05:11 PM

مـزن :

هـو فعـلاً يكون زحمه وجيه ، بس شو نسوي ~ !* ..

وهالعـيد ماراح اتحـنى ، لأن عقبها بأسبوعين بتحنى ان شاء الله :)

مزن هتان

22-09-08 ||, 05:14 PM

على طاري السفر خالاتي بيروحن ثاني العيد لبنان
و بعدها بيروحن مصر (الغردقه)

أنامل قلب

22-09-08 ||, 07:05 PM

^ مززززززن // عندج لنك لهالدعايه أو الانشوده ابـ معنى أصح ..

لأن صدق :fa41: ~

المزوحي

22-09-08 ||, 07:18 PM

ماشاء الله مزن زين زين،

انا بسير بن بطوطه حد حاب يسير ؟؟؟

صريح

22-09-08 ||, 09:03 PM

بليله بلبلوكي و بليل سلئوكي

:k_harhar1:

مايهزك ريح

22-09-08 ||, 09:37 PM

صريح بسم الله عليك .. شو يالس اتخرف ما فمهت شي !

شوق القلوب

22-09-08 ||, 10:15 PM

اوووه.. منو هنيـــه..!

صــريــــــــــــــــــــ ــــــح....

..

يا اخي زعلانين منـــــك.. :3:

حلم الطفوله

22-09-08 ||, 10:52 PM

منوووووووووووووووو صريح !!

شكله الأخ يتابع مسلسل باب الحاره عشان أبو غالب ...

مساء الخير صريح

وعيدك امبارك من الحين ....:)

مزن هتان

23-09-08 ||, 12:01 AM

سكون
اي عندي و حاطتها رنتي
بحط لج اللنك، صبرج عليه شوي :blush:

صريح
مرحبا بعودتك !!

مزن هتان

23-09-08 ||, 12:13 AM

دعاية زين - رمضان (http://www.4shared.com/file/61910733/9ce6ecc2/__-_.html)

أنامل قلب

23-09-08 ||, 12:38 AM

^ يزاج الله خير مزن =)

صريح

23-09-08 ||, 01:44 AM

[ مايهزك ريح ]
مرحباا بو سلطاان
بتعرف السالفه في رد حلم
:m_9afgah:
::
:

[ شوووق ]
عاارف والله و السمووحه منج ..
بس صدق الفتره اللي طافت كنت مشغوول
الدواام و البيت و العيال ماخذين كل وقتي لول
:whistling:
::
:

[ حلم الطفوله ]
صبحج الله بالخيير عيوزنا
افاا علييج لعيوون ابوو العز و شورااب ابوو شهااب لازم نتابعه
:a018:
علينا و علييج و عساج من عواده
و ينعااد على اليمييع ان شاء الله كل سنه و كل حول
::
:

[ مزن هتان ]
لمرحب بااجي
:laugh:
:::
::

شو هالاشاعه اللي طالعه على صريح
يقولون اختفى صرييح لانه عرس و السلطات العليا
مانعتنه من النت لاسباب امنيه و سياسه
صدق ولا اشاعه ؟
:4:

شوق القلوب

23-09-08 ||, 03:44 AM

شو هالاشاعه اللي طالعه على صريح
يقولون اختفى صرييح لانه عرس و السلطات العليا
مانعتنه من النت لاسباب امنيه و سياسه
صدق ولا اشاعه ؟
:4:

دامك صريـــح.. و يالس اتصرح بهالشي..

بديت أشك في السالفه .. انها صدق :k_icon9:

جيز كيك سنيكرز

23-09-08 ||, 03:54 AM

السلام عليكم والرحمه ...

شخبــاااااااااااركم ان شاء الله بخيييييييير ^ـ^

شوق القلوب

23-09-08 ||, 03:58 AM

لالالا... ما اصدق عيـــوني..!!

انت وييييييييــن... يالقاطعه..

..

صدق صدق.. استانست بشوفه اسمج .. ^_^

خيال الحب

23-09-08 ||, 04:35 AM

السلام عليكم

صباح الخير ^__^

جيز كيك سنيكيرز انتي من وين طلعتي .. الحمدلله على السلامه

شوق بنت القلوب كيفك خيتو

المزوحي

23-09-08 ||, 01:40 PM

اهلا للجميع

ربيعي يقول حلمني آكل عنب خضر

هل من مفسر ؟؟؟؟

المزوحي

23-09-08 ||, 07:51 PM

اعلان في جــريدة اليوم ( كل عام وانتوا بخير )

http://oasis.bindubai.com/bin/uploaded/3336_11222184808.jpg (http://oasis.bindubai.com/bin)

و

http://oasis.bindubai.com/bin/uploaded/3336_01222184808.jpg (http://oasis.bindubai.com/bin)

مايهزك ريح، على فكره البارحه واحد ويانا في الدوام يقول خذ a.testoni نفس اللون ... انا من رمسة العام، خذ له 3 نعول :k_shock_1:

وأنا شفت اللون الكحلي مع الاحمر ماعيبني :a0360:

صدق مايهزك ريح شو صحة ( خالك ) * :look:

مايهزك ريح

23-09-08 ||, 08:17 PM

خالي الحمدلله طلعوه من العنايه .. والحين هو في البيت ... بنسير له باجر ان شاء الله ..
بس توني ارمس ولد خالي قالي انه وايد تعبان مادري ليش طلعوه !

وعلى طاري النعول ..
امسات كنت في وافي ودشت خاطري هالنعال مع اني شاري للعيد بس قلت ما بخليها في خاطري ..
ما عندي نعال ابيض .. كله بني واسود .. جان اغير .. ^_^

http://oasis.bindubai.com/bin/uploaded/558_11222186440.jpg (http://oasis.bindubai.com/bin)

المزوحي

23-09-08 ||, 08:36 PM

مايشوف شر خالك

وغاوي النعال بالبركة ^_^

مايهزك ريح

23-09-08 ||, 08:39 PM

الشر ما اييك يا المزوحي ..
والله يبارك في حياتك .. انته شو خذت ولا بعدك تتشاور ..
على فكره عقب ما اشتريتها سرت روديو درايف جان القى نعال جيفنشي بيضاء رووعه في اللبس توها نازله ..
اسميني انقهرت .. لو شفتها قبل جان ما خذت سيزاري .. !

المزوحي

23-09-08 ||, 08:46 PM

انا من a.testoni

من ايام سرت وافي زحمممممممممه

مايهزك ريح

23-09-08 ||, 08:50 PM

انا سرت يوم السبت الظهر .. كان خاااااااااااااااالي ..
استانست ..
اتكشت فيه كله .. محد يمشي فيه غير كمن واحد ^_^

حلم الطفوله

23-09-08 ||, 10:13 PM

صريح !!!

الله يعينك :)

رمــش الغـــلا

23-09-08 ||, 10:47 PM

ولكم باااك ...~

صريح [ ^_^ ] ..!!!*

.
.

مزن ... ثااااااااانكس انا وايد يعيبني الولد ... نزلته ع لابتوبي ..~

المزوحي

23-09-08 ||, 11:53 PM

انا سرت بالخميس في الليل، يالله كنه العيد، كل 3 - 4 مع بعض واللي يسلم على هالشله واللي يسلم على هالجماعه

ويالله عاده ...

المزوحي

24-09-08 ||, 12:28 AM

لالا الصراحه استويت ما استغنى عن الواحات، بس حالوا تجددون عسب مانمل ...

اللي بيعرف معنى هالكلمه ... له جائزة عشرة آلاف درهم ... (寿司) لوووول

الكلمه سهله والذكي بيعرف يطلعها ....

مزن هتان

24-09-08 ||, 01:53 AM

اهلا للجميع
ربيعي يقول حلمني آكل عنب خضر
هل من مفسر ؟؟؟؟

العنب بالحلم معناه راح يجيك خير
في كل الاحوال، ان جان حلمت بشي زين و الا شين
لا سمح الله لا تقوله ثلاث أيام، و أهم شي انك تتفاءل خير.
مش شرط لين قلت هالشي تفسيره شين يعني خلاص شين !!

أعطيك مثال الكل يقول انه الحنا بالحلم يعني أحد قريب بيتوفى
أنا حلمت انيه متحنيه ياني خير
بنت خالتيه أحلمت انها متحنيه توفت خالة امهاتنا

أنا مستحيل أتحجى جان حلمت، و مافكر فيه كلش
أفوض أمري إلى الله و أتوكل عليه.

المزوحي

24-09-08 ||, 02:20 AM

شكرا مزن، وخلني انسى الحلم احسن

زين محد جاوب على سؤالي !!

تعالوا وين شمعة امل مختفيه ؟؟

شوق القلوب

24-09-08 ||, 02:46 AM

السلام عليكم

صباح الخير ^__^

جيز كيك سنيكيرز انتي من وين طلعتي .. الحمدلله على السلامه

شوق بنت القلوب كيفك خيتو

الحمد الله ... ربي يسلم خيوووووو... :fa42:

انت كيــــفك ..؟؟

شوق القلوب

24-09-08 ||, 02:49 AM

حتى انا ملاحظه انها مختفيه... عسى خير ان شاء الله ..!

عهد الوداع

24-09-08 ||, 03:50 AM

الميلس فاضي ....حد اهني ...

تحفه

24-09-08 ||, 03:57 AM

اتحجبي انا "هنه" لوووول

عهد الوداع

24-09-08 ||, 04:07 AM

ههههه ....تكحكح انزين ...:fa56:

شو تسحرتوا ....

تحفه

24-09-08 ||, 04:26 AM

سينابون وماي :)

وانتي؟

مــهــابه

24-09-08 ||, 07:43 AM

صبـــآحكم ورد وجــوري

~ دعواتكم عنديه امتحان آخر كلاس ، مب راقده غير ساعـــتين بس ..

آخر جابـترين ( قـريتهم ولا اعرف شو سالفـتهم ) ضعـت من بين البيلوجي والفيزيكل لوول

وفـاطره لبـن وتمر بس ، ومتسحره ، جبن وعسل :P

أنـتوا شحـآلكم ؟ وكيــف يومــكم ؟

مــهــابه

24-09-08 ||, 08:18 AM

المزوحي :

معـناها Sushi

اتـريـا 1000 آلاف:4:

عهد الوداع

24-09-08 ||, 02:24 PM

مساء الورد مهابه

الله يوفقج ان شاء الله ....

يسرج الحال ختيه ,,,,, واخباركم ,,,,

عهد الوداع

24-09-08 ||, 02:32 PM

تحفه

انا تسحرت برياني دياي :4:

مــهــابه

24-09-08 ||, 03:07 PM

^
عـهد :

من دعاويـنا عليه امس ، مرض الريـآل وتأجل الأمتحان لوول

المزوحي

24-09-08 ||, 03:57 PM

مرحبتين مهابه ماشاء الله عليج مايبالها شي .... لو سويتي كوبي على الكلمة وحطيتها في الجوجل وعلى الصور بتشوفين

انواع السوشي لووووووووووووووول

البيزات بتحصلينها ....

مــهــابه

24-09-08 ||, 04:29 PM

^
لوول صـدق صــادووووه

المزوحي

24-09-08 ||, 04:31 PM

عيل !

ايه احبك

24-09-08 ||, 05:38 PM

مااااااااااااااات فهد ماااااااااااااااااات اولي ولياه الحين ليش بشوف المسلسل =(

مزن هتان

24-09-08 ||, 06:46 PM

^^ يعني صج مات !!
أختي اللي بـ gـريد 8 اتابعه و من البارحه صاجتنا فهد مات

عانكم ربي :look:

صريح

24-09-08 ||, 06:47 PM

ماات ابو عصاام من اول الحلقة بس بعدنا نشوف المسلسل
:k_harhar1:

مزن هتان

24-09-08 ||, 07:17 PM

مادلهن عاد متصروعات على فهد البنيات
خلهن يتقبلن شرات العام يوم ماتت وضحه ذيج مرت نمر

ايه احبك

24-09-08 ||, 07:32 PM

لااااااااااء مش معأوول
صريخ بشحمه ولحمة رد للوسط الفني XD
يا فرحتك يام زغلووول
لوووول
صريخ حمدلله على السلامه
تو ما ظلمت الواحااات
اقصد نورت الواحات XP
---
مزن حبيبتي توها تحفه بشرتني ما مات الله يشافيه ويعافيه ويرده للهنوف سالم غانم

تحفه

24-09-08 ||, 07:38 PM

تحفه
انا تسحرت برياني دياي :4:

هني وعافيه حبيبتي 3> لول

وبالعافيه بعد علفطور

:redface:

تحفه

24-09-08 ||, 07:40 PM

فهد ما مات .. الهنوف بتعالجه

انا احس جي :icecream:

ايه احبك

24-09-08 ||, 07:54 PM

الله يسمع منج يا رب ويجمع بينه وبين الهنوف طيبين ويستاهلون بعض :heart:

تحفه

24-09-08 ||, 07:58 PM

LOOOL! XD

ايه احبك

24-09-08 ||, 08:00 PM

لووول على قلبج فديت قلبج XD
قووومي انسوي سوشي

حلم الطفوله

24-09-08 ||, 09:12 PM

أصلا الأبطال ما يموتون بالمسلسلات بسرعه !!! باجي 5 حلقات على النهايه

حروبهم اتضحكني !!! موووول مب راكبه عليهم سالفة الحرب !!!

المزوحي

24-09-08 ||, 09:19 PM

مرحبا

وش حالهم هل الواحات ؟؟؟؟ إلا ماقلتوا لي وين مخططين على إجازة العيد بإذن الله ؟

أنامل قلب

24-09-08 ||, 09:54 PM

نحن عساس اجازتنا تبدأ من الاسبوع الياي "الاحد" ..
بس انا عطيت نفسي إجازة بتمام الساعه العاشرة والربع بتوقيت الامارات من صباح هذا اليوم !
طنشت الكلاس الثاني "كلنا طنشناه لول" // وعني فمو ناويه أداوم باجر =)

وناسه !

/

إي صح أخوي المزوحي ،،
باذن الرحمن نحن ابـ خيـــر // وعن الاجازه فلا فكره !

.. .

وانتــو جميعا ،، كيف الحال ؟
عساكم مرتاحيــــن !

.. .

رمــش الغـــلا

24-09-08 ||, 11:30 PM

والله أحلى شي إني أنا عطيت عمري إجازة من اليوم وماداومت

وان شاء الله لي عقب العيد ^_^

.
.

وعن العيد والله ما نخطط يعني اول يوم نتيمع لازم بيت يدي

وعقب نخطط هناك لايام العيد ... يعني مانخطط من قبل [ لوووول ] ..!!*

المزوحي

25-09-08 ||, 01:21 AM

هلا سكون بارك الله فيج، كيف جيه تعطين عمرج إجازة وتنسينا اختي، يالله عاد .... لازم تعطين الجميع

نحن من يوم الاثنين الاجازة

ايه احبك

25-09-08 ||, 02:01 AM

أصلا الأبطال ما يموتون بالمسلسلات بسرعه !!! باجي 5 حلقات على النهايه

حروبهم اتضحكني !!! موووول مب راكبه عليهم سالفة الحرب !!!
يا حلم هذي حروب صدق كانت اتصير بين العرب او لين الحين لاتفه الاسباب او لعدم الاسباب
مبدء الثائر حتى لو الاسلام حرمه ظل من بين القبائل اتشوفينه يالس ويا ربيعه وشحليله و اليوم الثاني على دلة يضاربون
---
واهم شي فــــــــــــــــــــــــ ــــهــــــــــــــــد حي حي حي ورد للهنوف وياحلاتها من قصة :fa35:

مزن هتان

25-09-08 ||, 02:04 AM

فهد حي يالربع P:

تذكار شو استانست :k_nono:

قصايد غلا

25-09-08 ||, 02:06 AM

منو يكون هالــ فهد ؟؟؟
من ولده ؟

عقب حظ يا نصيب ما شي يستاهل المتابعة :hysterical:

تحفه

25-09-08 ||, 02:09 AM

يوم قلت لكم ما مات و الهنوف بداويه لووول شوفو انا خطيره احس بالحبايب XP

مزن هتان

25-09-08 ||, 02:10 AM

فهد من قبيلة الحماااااد

P:

قصايد غلا

25-09-08 ||, 02:17 AM

هيه زين ماشا الله ، لا تنسجمووون وااايد ويا المسلسلات عن تكون العواقب وخيييمة

المهم

تسحرتوا ولا بعدكم :k_special2: ؟

ايه احبك

25-09-08 ||, 02:26 AM

لوووول يا قصيد اصلا هذا حظ يا نصيب ايلوع بجبدي اخر شي افكر اتابعه
واحلى شي ظل الياسمين 3> قصة حب لا تنتهي حتى لو انتهى العمر ما اروعه من مسلسل ابدعت الكواري الصراحة ومت مت على لطوف صح انها وغده بس لسنها في الشتيمة يخبل XD
وبعده ابله نوره صدق مجتمعنا الاماراتي
وبعد ريح الشمال الكاتب ابدع في القصه يعني هذي الممثلة شهد مخلنها مارلين منرو كل واحد في الفر يج حبها وغير جي يحمسنا على القصه
واخير محبوب القلوب صراع على الرمال اه ه ه ه ه

مزن هتان

25-09-08 ||, 02:30 AM

لسه ما تسحرنا

===

ايه أحبك
لقاء مع أم جاسم هاي اللي في ظل الياسمين على العربيه الحين

ايه احبك

25-09-08 ||, 02:38 AM

وااايد حلوه بس زايده المكياج

مزن هتان

25-09-08 ||, 02:47 AM

اي صح و لا مسلسل يستاهل نضيع وقتنا عليه
قصص ماصخه !

ابله نوره: وايد مبالغين، مستحيل بنت صبيّك بالثانويه ترفع نفنوفها الين فوق
كفو ادارة تسكت عنها، و متى صارت مره متزوجه تدرسه ابمدرسه عاديه !
و كل كلمه و الثانيه حبيبي و فديتج تغربلوا جان الا يفتحون عيون الصغاريه
وهم مو ناقصين

نص درزن: مو كل شاب درس برع تزوج أجنبيه، الكاتب يوسف بالغ فالموضوع
و بعد أكو وحده من الحوارات كانت ماصخه أنا استحيت !

فضه قلبها أبيض: وين تبى سعاد !!

حظ يا نصيب: تافه

ريح الشمال: مادري عنه

ظل الياسمين: يالفضيحه جان الا الولد قاري غراميات أمه !!
و هذي اليد النحس، و مرت مهنا لسانها متبري منها (سيبااااله)، الشلقا و البلقا !!
أكل مال حرام، عيال يتطاولون على أهاليهم

لعنة إمراءة: قاصه على نفسها هالانسانه اونه غرور، ودي ازغدها

كفوا مسلسلات، تهدم أفكار نحن نحاول نرسخها في عقول عيالنا
الحجي كله عن المسلسلات الخليجيه

و اكو حاير طاير: هذي نقدر انقول انه يناقش قضايا مجتمعيه

ايدي تعورني :fa46:

ايه احبك

25-09-08 ||, 02:52 AM

ماععكم الحللة التلفزيونيه مزن هتان XD

مزن هتان

25-09-08 ||, 02:58 AM

هههههه
تدرين ما اتابع و لا مسلسل
من كل مسلسل شايفه بين 5 الا 10 حلقات
كنت اتابع فريج و احيان شعبية الكرتون بس

أنامل قلب

25-09-08 ||, 06:14 AM

^ اختي مزن // إي صح وااااايد يبالغون بالمسلسلات الكويتيه ..
ماشوف غير مسلسل أبله نوره + فضه قلبها أبيض ..
لأني ابـ هالأوقات أكون قاعده بالصاله ><" !

+ ابـ نفس الوقت ما أتابعهم وايد !
يعني أحضر حلقه واطوف 3 وهكذا ^^"

بس انا عكسج مادري ليش يعيبني مسلسل فضه قلبها أبيض ..
مادري كيف أحسبه ،، يحسني بشغلات .. . !

بغض النظر عن المسلسل ككل ،، لكن لمن أفكر بالواقع ..
كمن فضة عدنا ،، وكمن قلب أبيض نطمع له !

.. .

شوق القلوب

25-09-08 ||, 06:44 AM

ع فكره ..

سالفه فضه .. اتفاجأت انها صدق موجوده..

ربي يعافي الجميع... في ناس عندهم عيال.. اعمارهم كبيره .. بس عقولهم عقل يهال..

يعني هم ما يابوا هالشخصيه من فراغ..

أنامل قلب

25-09-08 ||, 07:20 AM

^ صح كلامج ،، واللي يعور القلب ،، لمن تلاقين أهاليهم يفتشلون منهم ..
ولا يعاملونهم ابـ شكل يزيد من سوء حالتهم واهمه ولا دارين .. . !؟

ولا شرات ما يعرضون بالمسلسل ،،
لمن يعاملونها عساس إنها ما تفتهم لكنها فاهمه ولو كان بطريقتها !

/

همم ،، الانتقاد الوحيد واللي دوم أسمعه عن المسلسل ،،
هي عـ شغلة إن الاخت سعاد عبدالله فنانه ابـ هالعمر وهالمكانه بـ مجال التمثيل ،،
فـ كيف تلعب هالدور وابـ هذا الشكل !

لكن العجيب إن الدور اللي مستهينين فيه ،،
بالنسبه لي هي من أطيب الادوار اللي تمس النفس !

وللعلم ،، لاعبه الدور عدل .. . !؟

/

مجرد وجهة نظر ^^ ..

.. .

أنامل قلب

25-09-08 ||, 07:22 AM

إي صح ،، حابة فكرة السرد بين كل حدث والثاني ،،
يحسسونج ابـ مدى واقعية الأحداث !

.. .

شوق القلوب

25-09-08 ||, 07:25 AM

السرد حلو... بس لو حاطين حد ثاني غير زينات.. جي جنه مسلسل مصري..!

بس اتوقع انهم مختارينها لسبب بيبين في الحلقه الاخيره ..

أنامل قلب

25-09-08 ||, 08:08 AM

اللي تتكلم زينات O.o !

توني أدري ^^"

دمعة عين

25-09-08 ||, 08:52 AM

~ صبـآح الخيـَـر =)

يقـَـولكم هذآ آخر يوم دوآم لي فـ هالكليه !
<-- قبل العيد طبعـآآ هع هع . .

آخيـَـرآآ ويكند http://suae.net/vb/images/suaeae/eh_s(6).gif . .

،
.
.

مــهــابه

25-09-08 ||, 11:56 AM

^
صـرنا فـ المســا
ومـســاج جــوري:fa41: ~ !* ..

وفـي ناس بـاديـه إجازتــهم من البـــارحه:k_harhar1:

أن شـاء الله تكـون الاجازه حلـوه وتسـتانسون بـهـا وبالعــيد بعــد:inlove:

مايهزك ريح

25-09-08 ||, 12:13 PM

انا عندي اجازه العيد يومين بس >_<"
تبدأ من اول يوم العيد !
قهر والله قهرر .. كل الإجازات ... قهرررررررررررر ( على وزن وهم والله وهم خخخخخخخخخ )

مزن هتان

25-09-08 ||, 12:46 PM

^^ و أنا لايعه جبدي جيه، الجهات الحكوميه
اجازتهم طويله، خواتي من البارح مأجزات :whistling:

المزوحي

25-09-08 ||, 01:10 PM

ليش مايهزك ريح يومين، قطاع خاص ؟

مايهزك ريح

25-09-08 ||, 01:52 PM

لا نحنا دبي العالميه .. :boxed:
لا نحنا خاص ولا عام .. ما اعرف نحنا شو بالظبط .. كل مره يعطونا اجازه شكل .. :bash:
آخر مره كانت في اجازه للقطاع العام 4 ايام والخاص 2 نحنا عطونا 3 ايام :biggrin:

المفتاح

25-09-08 ||, 02:22 PM

بسم الله الرحمن الرحيم
اللهم صل على محمد و اله الطاهرين
السلام عليكم ورحمة الله وبركاته

هلا بالشباب شو الاخبار مرتاحين ان شاءالله

لا تنسون ذكري رحيل والدنا الشيخ زايد رحمة الله
فى اواخر شهر رمضان المبارك
ورحم الله من يقراء له الفاتحة والدعاء له

والله الموفق
اخوكم المفتاح

الاسطوري

25-09-08 ||, 02:49 PM

انا عندي اجازه العيد يومين بس >_<"
تبدأ من اول يوم العيد !
قهر والله قهرر .. كل الإجازات ... قهرررررررررررر ( على وزن وهم والله وهم خخخخخخخخخ )

نحن إجازتنا 3 أيام ولكن لو صار العيد بالاربعا بنحصل بس
يومين لأن يوم الجمعه إجازه ومابيكون له
تعويض شو هالقرارات!
:a052:

مايهزك ريح

25-09-08 ||, 04:59 PM

^
نحنا اذا العيد بالثلاثاء لازم انداوم بالخميس .. هالقهر !

مــهــابه

25-09-08 ||, 05:16 PM

مســاكم ورد ..
شحـالكم ؟
~ مسـتانسه انا اليوم ، جـان أسوي خبــز رقـــاق :a049:

أول وحده لو شفتوها شقـآ بتضحكون ، بس الباجيات طلعـوا:fa42:

ولد اخويه يحاول يتهجم عـ اللاب:4: مب قـادر حليله

المزوحي

25-09-08 ||, 05:33 PM

ها يعني يومين بعد، ولو الاربعاء بتحصلون جمعه وسبت ....

ايه احبك

25-09-08 ||, 05:44 PM

انا ماجزه من يوم استويت لووول ما عندي نشه محدده ولا وقت محدد اسير الكلية متى ما قدرت وبغيت >_< شو بدي اعمل بتم جي لين 8 عشره وبعدها الله يعين
====
ما يهزك ريح انتو سيمي قفرنمت شركه مشتركه بين الخاص والحكومه بس غالب القطاع الخاص ينطبق اكثر عسب جي اجازتكم اقل

صريح

25-09-08 ||, 07:03 PM

الله يخليلنا الهيئات الاتحادية
:4:

و غيير يوم تقدم ع اجازه حق يوم الاحد و المدير يوافق ع طول
:fa34:

مزن هتان

25-09-08 ||, 09:12 PM

مـلـل !!
هدوووووء، ماكو حد.
أين أنتم ؟
:smile2:

برررررد، أبي أدلغ
:boxed:

رمــش الغـــلا

25-09-08 ||, 09:53 PM

برد ودلاغ مرة وحدة !!!

[ لوووول ]

شو السالفة مزن !!|<

مزن هتان

25-09-08 ||, 10:39 PM

شفتي شلون عاد :k_special2:

ختيه تقولي جان الا بتشردين البرد و هو بعده ما جانا
اترجاها بالليل تخف عـ التكييف :k_no:

دموع قلم

25-09-08 ||, 11:08 PM

,

مزن هتان ..

سالفة البــررد هذي وااايـــد اعاني منها ..
حتى أسألي سكـون ..!

انا واختي بنفس الحجرة .. هي تحب البرد وانا بسرررعة استبرد ..
فـ يعني أيلس بالبيت وانا لابسة دلاغ وجاكيت وحااالة !

يقولون لي .. يمكن فيج فقر الدم ..!
بس سويت تحاليل والحمدلله مافيني شي .. بسم الله علي !

ماعرف انا ليش جيه :smile2: ..!؟

,

مزن هتان

26-09-08 ||, 02:53 AM

مو هذي هي يا دموع، فيّه فقر دم
و الدم نازل عنديه بزياده عشان الصيام، ما أعوض بشي مفيد
طول اليوم و انا مدوّخه

تقولي الدكتوره دمج نازل صاير 11 جان استانس
أقولها الحمدلله :yes:، أمي 7
اذا 11 نازل 7 وشو ؟

//

سكون اليوم مالها حس

بنت الدلع

26-09-08 ||, 03:01 AM

الللللللللللللللللللللللل لللللللللللله
شعووووووووووور جميييييل
اجاااااازه
ورقاااااااااااد

المزوحي

26-09-08 ||, 07:17 PM

بسررررررررررررررررررررررر ررعه طلعوا في الحوي وشوفوا شي في السماء

نفس النجمه لونها برتقالي تمت اتطير على فوق واختفت والحينه ظهرت وحده غيرها

مب طياره

مــهــابه

26-09-08 ||, 08:05 PM

مــزن :

أنـا اعــاني شــراتج ، دمــي 9
والدوخه ماتهــدني

وايـد اتعــب لـو تحركت وايد ، خاصه فـ المطبخ

أنامل قلب

26-09-08 ||, 10:43 PM

أخوي المزوحي =$
شو شفت بسم الله ... . !

/

خواتي مزن + مهابه ،،
ربي يعافيكم ويسلمكم من الشر كله
وإيانا جميعا يـــارب ~ !

.. .

حلم الطفوله

26-09-08 ||, 10:46 PM

مهابه تصدقين !!! حتى أنا الدوخه ما تفارقني هالفتره واتزيد من أدش المطبخ

كله أحس بهبوووووط

ليكون عندي فقر دم وأنا ما أدري !!!

أنامل قلب

26-09-08 ||, 10:49 PM

^^ نفس الحاله ،،
بس أنا ماحبيت أفاول على روحي لول خخخ

/

لا صدق لا تحاتين ،، ان شاء الله ما بج شي ..
أصلا مادري ،، أحس هالحاله طبيعيه ابـ رمضان ^^"

.. .

حلم الطفوله

26-09-08 ||, 11:06 PM

ما أدري سكون !!! بس تقبضني دوخه غير طبيعيه لدرجة إني ما أقدر أركز بشيء جدامي إلا ويصيبني صداع

بس إن شاء الله خير

ربي يعافي الجميع ويبعد عنا كل عوق وما نشوف باس :)

مــهــابه

26-09-08 ||, 11:12 PM

سكـون :

آميــن يــارب

تـسلمين

حــلم :

انـزين روحي سـوي فـحص دم
تـرآني انا ماكنـت أدري أنـه فيَـه فقـر دم ، يلين ما اغـمى عليه مره
ويـوم سـوو الفحص أكتشفـت ، هالكلام قبل 3 سنـين
وأحـاول أرفـعه يوصل لـ 11 ويرد ينزل لــ 9

روحي لاتهملين عــمرج ، وجيـكي
وان شاء الله مافيج الا العــافيه

مزن هتان

26-09-08 ||, 11:33 PM

مهابه
هم جم يبونه يوصل عشان ما يكون فقر دم !!
أمي يعطونها فيتامينات، أحيد العام اول أسبوع من
رمضان كان كله يغمى عليها

أنا كنت مستهينه بـ فقر الدم، بس الدكتور قال حق
امي لازم تكون حريصه و تفحص بين فتره و الثانيه
لأنه أحتمال تصاب بـ أحد الامراض لا سمح الله
ربي يعافي الجميع

سكون
وينج البارحه ؟

أنامل قلب

26-09-08 ||, 11:38 PM

موجوده ^^"

مــهــابه

26-09-08 ||, 11:39 PM

الدكـتوره قـالت لـي :

لازم يكـون دمج فـوق الــ 12
11 مـب انه سيئ بس فيه نقص
والله يـا مـزن نحـاول نـرفعه ، بس في اشيا مانحبها مثل الطماط والزبيب وهالسوالف ويقولون
هالأشيـا تنفع للـدم !
عـسب جيه

لاتخـوفيني والله ، انا يوصل 9 واحس بـتعب فضيع
كيــف 7 ؟

الله يكون بـعون أمج والله ، والله يشـفيهــا ان شاء الله

مزن هتان

27-09-08 ||, 12:16 AM

آمين

امي ضعيفه مافيها قوه، ما تقهر شي
أنا الحمدلله فيّه صحه -دبه- ما يأثر فيه وايد :14:

اكو وايد أشيا ترفع الدم، تخيلي ماما لمن كانت
تحمل لازم شهر كامل يرقدونها بالمشتسفى، و اجبااااري ابوي
يشتري لها عصير طماط >.< تشربه
اي صح الفاست فود ينزل الدم واااايد
الرمان يرفع

المزوحي

27-09-08 ||, 01:24 AM

سكون مادري واله، شكله مثل نجم سهيل ( نجم كبير ولونه برتقالي ، مشتعل ) ويطير على فوق ويختفي

مخلوقات كونية غريبه وسبحان الله

أنامل قلب

27-09-08 ||, 04:04 AM

أتخيـــل المنظر ~ !

مزن هتان

27-09-08 ||, 10:52 PM

ملاااااال
:fa36:
أمي و أبوي رايحيين العين
العود مادري وين طالع، الثاني متخسبق مرت يدي عاطتنه شغله
خواتي الـ 3 الصغار عند أهل أمي
أنا و ختيه من شوي واصلين البيت ماكو حد !!

و كمان ماكو حد هني !!

مايهزك ريح

29-09-08 ||, 09:04 AM

لا حول ولا قوة إلا بالله .. الأهل سووا حادث البارحه ..!
والوالده متعوره واليوم بيدخلونها العملياااااااات ..
بنعيد السنه في المستشفى ..

الله يخليكم ادعوا للوالده انها الله يشفيها .. لا تنسونها من الدعاء .. >_<

الاسطوري

29-09-08 ||, 10:47 AM

^
لا حول ولا قوة إلا بالله

الله يقومهم بالسلامة إن شاء الله

تحملوا هذا قضاء وقدر وإن الله مع الصابرين

الله يشافيهم إن شاء الله في أقرب وقت

مجموعة إنسان

29-09-08 ||, 10:59 AM

الله يعينك ما يهزك ريح وهذا قضاء الله وقدره
ربي يعينكم ان شاء الله

مايهزك ريح

29-09-08 ||, 11:28 AM

الأسطوري .. مجموعة انسان .. الله يعينا هالعيد >_<

خالي لين اليوم ما نش من الغيبوبه..
واليوم الوالده .. بيدخلونها العمليه ..
لا حول ولا قوة إلا بالله .. ما انعرف شو نسوي ..

يالله .. قدر الله ما شاء فعل !

ذنـيـنـي

29-09-08 ||, 01:05 PM

الله يعافيهم و يقومهم بالسلامة

كثروا من الصدقات =)

وحي القلم

29-09-08 ||, 02:27 PM

الله يعافيهم =(

وحي القلم

29-09-08 ||, 02:30 PM

مهابه تصدقين !!! حتى أنا الدوخه ما تفارقني هالفتره واتزيد من أدش المطبخ
كله أحس بهبوووووط
ليكون عندي فقر دم وأنا ما أدري !!!

على طاري الهبوط

تحسون بهالشعور و انتو صيام ولا عقب الفطور؟؟

أنا عقب ما أفطر تيني هالحاله :shutup:

مزن هتان

29-09-08 ||, 03:04 PM

^^^ و نحن صيام

مايهزك ريح
يقومون بالسلامه إن شاء الله
طمنا أخوي

رمــش الغـــلا

29-09-08 ||, 03:07 PM

^ الله يعافيهمـ ما يهزك ريح ..~

والله يقومهم بـ السلامة ان شاء الله !!*

ادعووولهمـ وكثروا من الصدقاات ..|~

.
.
طمنا عليهمـ ..؟

أنامل قلب

29-09-08 ||, 05:02 PM

ربي يعافيهم ..

مثل ما وصوكم ،،
كثرو من الصدقات ..
ولازمو الدعاء ..

/

لا حول ولا قوة إلا بالله ..
وايد قمنا نسمع من هالأخبار ..

.. .

مــهــابه

29-09-08 ||, 07:13 PM

وحي القـلم :

تـوقيعـج لعـوزني كل مايشوفه ولد ختيه ، يقول هذي انتي لوول

~ مسـاكم ورد

وعــيدكم مبــارك مقـدماً ...

حلم الطفوله

29-09-08 ||, 11:23 PM

وحيوتي ...هالحاله اتزيد عقب الفطور .... الله المستعان

كل عام وإنتو بخير يا حلوين

مع إنه مووووووووول مب حاطه ببالي إنه باجر العيد !!!

صريح

29-09-08 ||, 11:43 PM

كل عام و انتو بخيير
و عسااكم من عواده

بلااكم دااقين حزن انه بااجر العيد ؟

بالعكس ونااسه انه باجر العيد
:fa34:

عذبة الروح

29-09-08 ||, 11:53 PM

^
عطنا شوي من هـ الوناسه !!

:

:

ما يهزك ريح .. طمنا على صحة الاهل // عساهم بخير

مــهــابه

30-09-08 ||, 12:20 AM

يعـني مب أنا الوحيده اللي مب متهيأه للعـيد !

مخـورتي تـوها وصلت ، وعباتي للحين فالخياط يضوجونهـا

مممم بـعد شو ؟

ماتحنيت ، كان في خاطريه اتحنـى !

احس موووول مب متزهبه لـ شي

الله يغـربل ابليس هالبشاكير مارامن يسافر إلا فـ حزة العيد

أقـول لأمايه : البنات فـ الصالون يسَـون مناكير وبداكير ، وانا فـ ايدي ديـتول ولـوكس :P

رمــش الغـــلا

30-09-08 ||, 12:46 AM

^ لوووول

ضحكتيني مهــابه هع ..~
:hysterical:

صريـح ..

بعالكس انا اكثر وحدة كنت اتمنى ان العيد يكون باجر :fa51:

ومستاااانسة وااايد ..~

شكلنا انا وانته اللي كنا نتريا العيد يكون باجر [ لووول ]
:inlove:

مــهــابه

30-09-08 ||, 12:47 AM

^
لـوول

شفـتي كييييف !

يالله نـكبر وننسـى

أنامل قلب

30-09-08 ||, 12:52 AM

^ وانا كان بخاطري اتحنى .. . !

شكلي بتفق مع دموع قلم بعد العيــد نتحنى سوى ..
بس وين وكيف ومتى وابـ أي يوم تحديدا // يعتمد كالعاده عالظروف ^^"

:

أقولكم ،، أنا مو متزهبه للعيد كلللللـــــش !
أول يوم عساس نحن الـ 4 نلبس باكستاني وتوه واصل من عند الخياط ..
بس بعدنا ما قايسنا وإن ظهر به شي فـ بنتوهق حبتين ،،
+ هذي النتايج للي اونه يبون يغيرون ^^"

+ من فتره شاريه كمن شغله + قبل العيد مووول ماحصلت شي !
فـ يعني ،، مضطره أقعد أطقم شي عـ شي واشوف شو بيظهر معاي لـ ثاني يوم =$
بس أذكر شارتلي ثوب بسيــــــــط ومريــــــح ينفع لبيت قوم عمي ^^"

الصراحه ،، احساس جميل ..
وكل عام وأنتو بخيـــر :tongue: ..

^ تو الناس // تتحرطم وتتحرطم وتذم ..
عقب يايه ترقعها ابـ هالجمله ^^"

.. .

مــهــابه

30-09-08 ||, 12:58 AM

سكـون :

انا تـدرين شو اللي مخلـني أسـكت عـن سالفه الحنى ؟

بيكـون عندنا عـرس عـقب العـيد وبتحنى ان شاء الله

بالنسبه للملابس ، قلـت لج : مخورتي طلعـت أوكي

عبـاتي مخربه من الخاطر ووسيعه ، يادوب امشي حالي فيهـا ، وديتها ورجعتها ونفس الشي

اونه مايقدر يقص من الكم شي بيخترب الموديل !

وانا الوحيده من بد خواتي مخربين لي العـباه

اشـتريـت بدلتـين قبل يومين واليوم لما قستهم اكتشفت انهم وسـاااع !

فـ عـآدي يعـني

شـر البليه مايضحك ، حلو يوم تكونين مب مخلصه لوول :P

عـ فكره انا كل عيد اضحى اكون متزهبه احسن عن العيد الفـطر

يعـني مب شي يديد

أنامل قلب

30-09-08 ||, 01:02 AM

^ لأن رمضان وجي ،، صعب تظهرين // وأصعب تلاقيلج شغله ..
بس تعالي ،، شو هالصدف // نحن عدنا بدل العرس عرسين ما شاء الله P=

وووو بالبركه ان شاء الله ^_^ ،،

مــهــابه

30-09-08 ||, 01:03 AM

^
حتى نحـن

عـندنا عـرسين والله :P

اويه لـ يكون تقربين لي وانا ما ادري

أنامل قلب

30-09-08 ||, 01:20 AM

أقربلج مستحيل ،،
بس يمكن نسايب من بعيد لول ههه ..

أبشركم توني مقايسه وظهر قدي ^______^ ..

كشخه بالاصوات اللي تظهر منه
+ يباله خلخال الصراحه !

لحظه ،، جني عشت جوهم ..
ناقصنه هالورد اللي يحطونه عـ شعورهم
جي بعقص شعري وبلبس ترجيه باكستانيه لول ..

اتخيلو انتو بس هههه // ^^" ..

.. .

مــهــابه

30-09-08 ||, 01:21 AM

^

أدري

لـوول بتـستوين بتانيه باجر

انا بكون مواطنه باجر بـالمخور ، جان اخترشـت بلبس مرتعشه امايه لوول

بسـوي لي جـو ..

يالله تصبحون عـلى خير . .

بنــروح نزهب لـ باجر

أنامل قلب

30-09-08 ||, 01:23 AM

^ صدق والله شكلي جي ههه ..
بس حلوه هاي بتستوين مواطنه P=

ونوم العوافي مقدما حبابه =)

بنت الدلع

30-09-08 ||, 01:53 AM

في حد واعي ؟

قصايد غلا

30-09-08 ||, 02:00 AM

أنا أنا واااااااعيـــــــــة :fa34:

بنت الدلع

30-09-08 ||, 02:04 AM

شو مسهرنها الحلوه؟

ما تحنيت =(

قصايد غلا

30-09-08 ||, 02:08 AM

قبل شوية تقريبًـا رادة البيت :birgits_giggle:

يا ربّييييييييه يا الزحمة ، والله والله طوابير عند الحلاليق ههههههههههههههههههههه هلكت من الضحك يوم شفتهم

و شو التسريحات في الصالووووون ، قلت لبنات عموه : هاييلا كيف بيرقدن :4:،

أنا بعد ما تحنّيت لا تزعلين ، قالت اللي بتينا أونه بتي في ثاني العيد ===> مع إني ما أحب ريحة الحنا بس قلت مب زين من كم سنة ما تحنّيت لكن ماشي فايدة دامها ما يت اليوم

قصايد غلا

30-09-08 ||, 02:15 AM

أوه صح .. عسااااااااكم من عوّاااااده

أنا قلت لأبويه و أميه يزهبون العيدية باااجر :14:

وحي القلم

30-09-08 ||, 02:44 AM

مهابه.. اعترفي انتي تشبهينها؟؟

:4:

فاهمه شعورج لانه عندي حد من نفس نوع ولد اختج تقريبا

بس المشكله أنه مب بس توقيعي اللى يلفته

حتى الابتسامات اللى فالمنتدى + صور الناس ولا الحيوانات

إذا ظهرن هالاشيا جدامه بالغلط لازم أتم فاتحه الصفحه و ما أغيرها

يستانس و يتم يسولف ويا الصوره.. بس طبعا ما ينفهم شي من كلامه :a100:

وحي القلم

30-09-08 ||, 02:45 AM

هيه صح نسيت.. امباركن عيدكم =)

المزوحي

30-09-08 ||, 02:52 AM

الله يشفيها يارب ويقومها بالسلامه وماعليها شر إن شاء الله

ويشفي خالك يارب ...

الله يلطف بهم

مزن هتان

30-09-08 ||, 03:23 AM

من قبل صلاة العشا انا طالعه وصلت البيت 1 و نص
بروحي ماكو حد معاي، مخلصه أغراضي

الا خربطان خواتي و الثانيه عباتها، و ماما و طلباتها !!
و ابوي خوّن فيّه، على أساس يجيب صياني من المحمصه
و يروح الجمعيه يقضي، قط الشغل عليه و راح العين
قلت له ماني ملحقه، اون لا كفو عليج تسدين البيت

بروح ارقد

دموع قلم

30-09-08 ||, 03:48 AM

,

كل عــااام وأنتوا بخيييــر ..
وبصحــة وسـلااااامـة ..

عيييـــدكم مبــااارك ..

ولا تنسون عيديتي :tongue:

,

أنامل قلب

30-09-08 ||, 05:08 AM

^ ياخي ذليتينا ونحن نقولج شو بخاطرج ،،
ماطيعين ترمسين P=

.. .

مزن هتان

30-09-08 ||, 10:20 AM

نعسااانه
مخدتي تناديني !! :a116:

مباركن عيدكم

مــهــابه

01-10-08 ||, 07:41 PM

مســـاكم ورد وجــوري ! . .

~ شحـالـكم ؟

وأخبـار 2 أيام العـيد ويـــاكم ؟

أبـا أركب بـــانجي ، اليوم بس اتمنيت اني اكون ولـد عسب ألعـب واستانس شراتهم :4:

اليوم كان حلو ومتعب ويخوف بنفس الوقـت

وبعـد الصـلاه طالعـين نشـوي ان شاء الله:fa42:

مزن هتان

01-10-08 ||, 09:17 PM

مسا النور مهابه
وناسه غيرتوا جو
عن البانشي، لو أنا ما خليها بخاطري X=

2 العيد ملاااااال

اهل امي محد، اهل ابوي مو وايد وياهم
العصر طلعنا أنا و خواتي و أم سيف شلينا الصغاريه
لعبناهم، تعشينا من شوي رادين (اوت ليت) زحمة عوايل + اسياويين
و الحين بنسير فستيفال، خواتي الصغار ما عرف ش يبون من هناك !!

مــهــابه

01-10-08 ||, 11:38 PM

هيـه ، غـيَرنا جـَو
بس زحممممممممممممه بشكل !

عـ طاري البانجي انـا كان بـ ودي بس فـشله ، زحمه شباب ، وكلهم مخيمين وجيه ، مافي مجـال أفـكر فـ هالشي أصـلاً ..

قصايد غلا

01-10-08 ||, 11:50 PM

السلام عليكم

شحالكم يا عرب ؟

وينكم .. حد هنه ؟!

المزوحي

02-10-08 ||, 03:23 AM

السلام عليكم وش حالكم عساكم طيبين

سؤالي شو المعتقد إنه السادة .... لهم احتراهم، وهل لهم حوبات ؟؟؟

من خلال تصفحي النت ... كنت ابحث عن شي معين ولقيت موضوع بالصدفه

اللي يبغي يعرف ممكن يشوف

http://www.yamahdinet.net/forum/index.php?showtopic=10123

خيال الحب

03-10-08 ||, 08:02 AM

السلام عليكم

صباح الخير :)

شحالكم عساكم الا بخير

دموع قلم

04-10-08 ||, 04:29 AM

,

وعليييكم السلام ورحمة الله وبركااااته,

صباااحك طيبة ..
أخوي خيال الحب ..

الحمدلله بخير ..
ربي يعافييك ..

رد حق أمس ..
ماعليه الميلس فااضي .. ^_^

,

دموع قلم

04-10-08 ||, 04:46 AM

,

الله يسلمكم ..
اختكم دموع أول مرة تسير العيين .. دار الزين << ع قولتهم!

امممم مستانسة سايرة ويا الأهل والجماعة الكريمة .. << لانهم متعودين يسيرون مناك ..
كششخــة أحب اللمة خاصة بهالأماكن اللي بنيلس فيها ..

وما تسمى بـ المبزرة .. :tongue:

امممم ..
الصراحة المكان واايد وااااايد عيبني .. ووالجو كاان رهيييب ..
وخاااصة يوم يلسنا فوق .. الجو غيييير .. أحلـــــى ..

اممم بس ليش كالعادة .. الأماكن الحلوة يشهونها الشباب ..؟! :smile2:

ما أقولكم ودروا المكان .. وخلوها حق العوايل والبنات فقط !
بس عالأقل حق الشباب اللي صدق حابين يسيرون المكان .. للمكان نفسه ..
مو ييلسون يدورون بسيارتهم .. اللي كل وحدة أحلى عن الثانية ما شاء الله..
وعيونهم بره ..ها اذا مو راسهم بكبره بره .. بسم الله ..!

استاااانس يوم أشوف لمة شباب ييلسون يسولفون بروحهم ..
بدون ما يتحرشون ولا يطالعون حد .. احس فيهم رجولة !

امممم .. ليش نرتاح أكثر يوم الأجانب بهالمكان .. رغم انهم رياييل بعد ..؟
لأنهم ماااااايخصهم في حد .. عايشين حياتهم .. ويخلونا نعيش حياتنا ..
بس شبابنا .. بسم الله الرحمن الرحيم ..
ما يخلون حد في حاله .. بروحنا .. ويا أهلنا .. ويا أخواننا .. أي شي ..
سوا كنا منثبرين .. ولا مخترشين !

لييييييش جيه ..؟
ليييييش >< ..؟!!

كل ها عشان دولتنا مو متفتحة شرات الغرب ..!!

:smile2:

,

دموع قلم

04-10-08 ||, 04:49 AM

,

كلامي غلط, خواني ..؟!!

:k_special2:

؟؟

ايه احبك

04-10-08 ||, 08:03 AM

الا ابو الصح وانا أأيييد وبقوه ايضا XD

مزن هتان

04-10-08 ||, 01:35 PM

دموع

أنا كذلك معاج، حمدت ربي السنه انه ما رحنا هالعيد
لأن المكان يصير زحمة شباب. جذه نحن البنات ما ناخذ
راحتنا، حتى ما نقدر نبتسم !!

:k_special2:

عهد الوداع

04-10-08 ||, 09:28 PM

السلام عليكم والرحمه ,,,,

رمــش الغـــلا

05-10-08 ||, 02:39 PM

وأنا أأيدج بعد ...~

ونحن لازم بين فترة وفترة أبويهـ يودينا ...

بس كـ العااادة >> زححمة & شبااب ..!!*

الواحد ما يقدر ياخذ راحته مول !!

يعني آخر مرة سرنا ما سرنا المبزرة الا عالساعة 12 كان المكان فاضي شوي ومش ويكند ..!

[ اللهـ يهديهم ] ..~

عهد الوداع

05-10-08 ||, 07:11 PM

مساء الخير ,,,,

اليوم ملل بشكل فضييييييييييييع ,,,,

مــهــابه

06-10-08 ||, 07:57 AM

صبـاحكم chemistry:fa46:

شحـآلكم ؟

مـب رآيمه أبطل عـيوني فـ الكلاس ، نودانه:fa55:

اتمـنى لكم يوم حلـو وخفــيف:inlove:

شوق القلوب

06-10-08 ||, 08:17 AM

صبااااحج Math ..

:birgits_giggle:

..

بصراحه.. حلوه نشه الصبح.. اتحسسك بالحياه.. بس مب حق اللي راقد الساعه 3 :boxed:

مــهــابه

06-10-08 ||, 08:24 AM

دخيـلج أي حلـوه !

النوم سلطان

والله ان عـيوني مستويه حمرااا من الـتعب ، مب راقـده عـدل !

دعـواتج شوق عـندي امتحان الساعه 11

صريح

06-10-08 ||, 08:52 AM

صباحكم اجتماعات ممله
:a052:

خذت لفه ع واحة التصوير توه و
شوقتني للتصوير

ا ل غ ل ا

06-10-08 ||, 10:08 AM

يالله يا صريح صوّر وراونا ..

مفتقدين طلّتك فالساحة التصويرية ^^

لو تشوفون كيف أنا ورمش الغلا
شاديين حيلنا وكل وحدة غايصة وغرقانه بين لأوراق وبرنامج الword خخخ

ا ل غ ل ا

06-10-08 ||, 10:14 AM

رموووووووووش أطلعي من الواحات ويالله

Back to Work

Focus Focus Focus

شوق القلوب

06-10-08 ||, 10:52 AM

هههه.. مهابه لو ماكان النوم سلطان.. جان ما طلعت من الواحات و خذتلي غفوه... :4:

..

الحين الساعه 11 و دقيقه...

ان شاء الله ربي يشرح صدرج و ييسر أمــــرج..

و تطلعين من الامتحان و انت مرتاااااحه...

آآآآآآآآآآآآميـــــــــــ ــــــــــــــن.... :k_smartass:

مــهــابه

06-10-08 ||, 04:38 PM

^
احلـى دعـوه والله ! ..

خبصـت شويه بس الحمدلله :)

المزوحي

06-10-08 ||, 09:34 PM

مساء السرور والسعاده

أنامل قلب

06-10-08 ||, 09:36 PM

مساء الحمد والسكون ~

المزوحي

06-10-08 ||, 09:41 PM

يا جماعه نبغي نغير جو ....

انا تعشيت وتسبحت

يالله قبل لا ارقد ندردش وياكم

شوق القلوب

07-10-08 ||, 07:37 AM

صبــــــــــــاحكم... أحلى من الجوري..

:fa41:

صريح

07-10-08 ||, 07:53 AM

صباااحج مسك يا شووق
ما شاء الله هالايام تغبشيين
ولا مواصله من البارحه
:icecream:

شوق القلوب

07-10-08 ||, 08:09 AM

هههههه... شو انسوي.. لازم انقهويكم ع الصبح..:14:

بس هو اسبوع واحد ما غيره.. :4:و بتشوفني رديت مثل قبل :icecream:

ا ل غ ل ا

07-10-08 ||, 08:48 AM

صبحكم الله بالخير ...

أنا بعد هني .. وأبا قهوة ^_^

دمعة عين

07-10-08 ||, 10:05 AM

^
صبـَـحج الله بـ النور والسـَـرور
:12:

صرآحه اليــَوم آول يوم أدآوم فيـَـه وآنآ نشيطـَه
نشيت قبل المنبه بدقيقــه هع وآنآ فرحآنه لآني مآسمعت صوته المزعـَـج . .
" نآويـَـه أغيرهآ وأحطهــآ قم قم ~ هع هع " . .
وصلت الكليه وآنآ كلي نشآط وتفآؤل وحيـَـويه وآنشط وحده فـ الكلآس
شآده حيلي آنآ إلي بقرآ وآنآ إلي بكتب وآنآ إلي بجآوب وآنآ إلي بحل . .
:fa35:
واتعلمت كلمتين بالآسبآني من المس . . :4: آبـآ أذكرهم مب قآدره لووول . .
وشمسه ~ يآرب دوووم جيـَـه يآ دمعـَـه :fa46: !*~
،
.
.

شوق القلوب

07-10-08 ||, 12:41 PM

شوووو اتعلمتي ..؟؟

أأووووولاااا

رمــش الغـــلا

07-10-08 ||, 02:51 PM

مررااااحب ...~

شحالكم يالواحاتييين ..!؟

.
.

شو مسوين

انا خلصت دوام اليوم واتريا الاخ العزيز يوصل لوووول ...!!

أنامل قلب

07-10-08 ||, 09:21 PM

^^ ربي يوفجكم جميعا اخواني وخواتي ،،

/

وانا أقلب بالايميلات عندي ،، شفت رساله تنبيه لشغلة بخصوص الكامرا اللي تكون باللاب نفسه من فوق ..
ويعني كيف ان في برامج تسمح للأطراف الأخرى بتشغيل كامك الخاص بلاب توبك عن طريق برامج المسنجر !

بس لفتتني عباره بالأخير ،، حسيتها وايد قويه // مادري !

لان الضمير أصبح مجرد كلمة نلفظها ولم يبق من أفعاله إلى القليل . فاحذروا أعزائنا .. احذروا ..
- الحمد لله نحن نواصل طرح مواضيع التوعية الهادفة وبشكل دائم , لأنه وللأسف هناك بشر يفتقرون للإنسانية

ويبيعون ضميرهم للشيطان . فلذلك احذروا دائما أعزائنا , إخوتنا وأخواتنا

هي عباره بعد ذكر موقف لـ أحدهم ،،
والله يستر علينا وعليكم جميعا ..

.. .

مــهــابه

08-10-08 ||, 07:57 AM

~ صــــباح الخيـــر . . .

دمعة عين

08-10-08 ||, 09:12 AM

:

:fa41:
~ صبــآحج جـَـوري ،

فخـآطري ورده . . :fa35: !*
،
.
.

مزن هتان

08-10-08 ||, 09:51 AM

صباحووو
زجمانه، لايعه جبدي

اليوم جاني كابوس، بن دبي مغيض عليه
و معطيني انذار :boxed: انا ما سويت شي !!
يوم نشيت من نومتي استوعبت دخل وقت صلاة الفير
و اثاري انا مسكره المنبه :fa46:

المفتاح

08-10-08 ||, 02:36 PM

بسم الله الرحمن الرحيم
اللهم صل على محمد و اله الطاهرين
السلام عليكم ورحمة الله وبركاته

:1:

مساء الخيرات والورد المحمدي الجميل
كيف الحال يا اخوانى واخواتي

لا يفوتكم موضوع السر العجيب لاخينا المزوحي

ونسالكم الدعاء

:1:

والله الموفق
اخوكم المفتاح

الا انا

08-10-08 ||, 02:42 PM

..^

وعليكم السلام والرحمه ..

نورت الصفحه المفتاح ..

وين هالغيبه ..><

مزن هتان

08-10-08 ||, 09:03 PM

ما عرف شلون يستحملون القعده للتلفزيون
:pullhair:

عهد الوداع

08-10-08 ||, 09:40 PM

السلام عليكم والرحمه ,,,

المزوحي

08-10-08 ||, 10:33 PM

شكرا المفتاح

.........

اقولكم حد سمع شي عن بنك دبي الاسلامي .... ؟؟؟؟؟؟

ربيعي بيسكر حسابه ونصحني انا بعد

شو السالفه ؟؟؟؟

مزن هتان

08-10-08 ||, 11:15 PM

المزوحي
أكيد باقوهم شرات ما باقوا اللي قبلهم !!
:fa45:

المفتاح

09-10-08 ||, 12:14 AM

بسم الله الرحمن الرحيم
اللهم صل على محمد و اله الطاهرين
السلام عليكم ورحمة الله وبركاته

اهلا اختى الكريمة الا انا
شكرا الواحات منورها باهلا الطيبين
:5:

اخى الكريم المزوحي
لاشكر على واجب
فى الخدمة

موفقين يا شباب والله الله الله فى انفسكم

والله الموفق
المفتاح

عهد الوداع

09-10-08 ||, 02:56 PM

مساء الخير يا اهل الخير ,,,^_^

الا انا

09-10-08 ||, 03:07 PM

..^

مساج كادي ..^_*

..

غيري مزاجج ..^^

احسن لج ..><
ولا تجوفين صورتي الرمزيه ...!!!< تعرفين الباجي ما يحتاي اكمل

عهد الوداع

09-10-08 ||, 03:12 PM

تعرفين مسويه له طاف ناستنه ع الاخر ,,,

بس حلو مزاجي ولا انتي شورايج ههههه,,

انا بدور لج صوره من عندي وبخليج تحطينها ,,,^_^

الا انا

09-10-08 ||, 03:23 PM

..^

لوول

لا مب حلو ...

خلج كووول ^_^

لا انا قصدت انه اذا ما غيرتيه بسوي بج شرات الي بصورتي ..

..

حرااام احبها صورتي مبغي اغيرها ...^^

عهد الوداع

09-10-08 ||, 03:25 PM

هههههههههههههه

حلوه بس تعور القلب ,,,,

شو تسوين احس اليوم ملل بشكل فضييييييييييييع ,,,,,

المزوحي

09-10-08 ||, 08:09 PM

مساء الخير

ماشوف سيارات عن المسايد، خلاص خلص رمضان !!!

الله يهدي الجميع ...

المفتاح مشكور على الاهداء اللي فوق، ماننسى الصلاة على النبي صلى الله عليه وسلم ..

باجر الجمعه نبغي ناخذ الاهل رحله ....

رمــش الغـــلا

09-10-08 ||, 10:53 PM

^

هي والله جنها المسايد بس فـ رمضان ..!!

اللهـ يهديهم الناس ..~

.
.

نحن باجر ورانا عرس [ لووول ] ، وإنشا الله بتلاقى ويا ملاكوه هنااكـ ..~

عهد الوداع

09-10-08 ||, 11:13 PM

تتلاقون ع الخير ان شاء الله

سلمي عليها واااااااااااااايد

المزوحي

10-10-08 ||, 11:01 PM

السلام عليكم

وينكم ؟؟؟؟

انا يبالي تغير جو الصراحه

مــهــابه

10-10-08 ||, 11:06 PM

عــليكم الســـلام والرحمــه ..

حـنا موجوديـن !

شـو تقول عـنا خويه المزوحي ، نـاس ويك آنـد ، ونحن بـآجر مداومين ..

يـوم مب قـد الإجازات لايعـطونا ، ماصارت اجازه وتعويض ..

المزوحي

10-10-08 ||, 11:09 PM

هيه والله .. زين لاتفكرين الحين في الدوام، ويوم بتسيرين كوني coool

مــهــابه

10-10-08 ||, 11:14 PM

هو عــادي بس ماحسينا بالويك آنــد ، بيكون اسبوع طــويل ..

يالله شو بنسوي بعـــد ..

شو الاخبار الحين؟ ان شاء الله صرتوا احسن؟

المزوحي

10-10-08 ||, 11:19 PM

مهابه يوم نحس براحه إنه خلاااص، يومين ونشوف شي غير ... الله كريم وبيفرجها علينا ...

الواحد يبغي له 4 سيارات ^_^

مــهــابه

10-10-08 ||, 11:23 PM

هيـه والله ..

الله كــريم :)

المزوحي

11-10-08 ||, 01:01 PM

السلام عليكم

كيف الحال .؟؟؟ شو راقدين ؟؟؟

تراني اليوم سرت الوكالة شفت هوندا أكورد رقم (1) بــ 116 ألف وبالمره مريت على وكالة تويوتا زحمممممممممممه

تقولون يجسمون سيارات بــبلاش .... خذت لي لفه على السريع ماكملت 5 دقايق وظهرت ...

قلت ارد البيت واتغدى ابرك لي ... والحينه اتريا الغدا يزهب ويالله