غصّــات مواطــن

[الاسطوري]

السلام عليكم ..

مب من عادتي أفضفض بس هالموضوع مايتحمل الكبت!

بتكلم بلساني ولسان كثير من الناس اللي عايشين في دبي ومصدومين بالأخبار اللي تطلع كل يوم، قبل كانت فكرة إزالة بيوت ماتصير إلا للبيوت للشعبية المتهالكه وبأن الحكومه راح تبني مكانهم بيوت يديده وترد تملك هالسكان البيوت اليديده، أوكيه للحين كل شي حلو بس في الفترة الأخيرة أحس بدت تصير هاي ظاهرة وتحدي بين الشركات العقارية أكثر من كونها فكرة للتطوير وبداية كانت الأنظار على منطقة السطوة لإزالتها كونها منطقة جديمة ومكتضه بالسكان بشكل غير حضاري وفي موقع إستراتيجي خلف أبراج شارع الشيخ زايد وتم تقبل الفكرة كونهم راح يطورون هالمنطقة ويغيرون إسمها عشان تعكس الشكل الحضاري لدبي، عقب فترة سمعنا عن خبر ثاني بأن منطقة الصفا او تحديدا شعبية الشرطة عند مركز مزايا والمنطقة اللي وراها ياينها قص كونها قريبة من أرقى كيلومتر مربع (برج دبي) وبداية كان تعويض السكان بأراضي بديلة في منطقة أم الشيف عقب تغير الوضع وصار التعويض مالي فقط ومايحق لهم المطالبة بأي أرض يعني خذ الفلوس ودورلك أرض جان حصلت في آخر الدنيا (عادي تقبلوا فكرة انهم ينتقلون لإمارات ثانيه) وإذا حصلت حاول تبنيها مع إرتفاع هالأسعار بشكل كبير وزيادة التكاليف في كل شي.

عقب قالوا راح يقصون المنطقة المقابلة لكلية الشرطة في أم الشيف وراح يعوضونهم أراضي في المنطقة المتبقية من نفس المنطقة، عقب قالوا منطقة البدع والوصل بعد ياينهم قص كونهم قراب من المنطقة اليديدة اللي راح تنبني بدال السطوة وأيضا في مناطق راح تتضرر لمشروع تمديد الخور ليصل للبحر مره ثانيه من جهة الخليج التجاري وأظن راح يهم الاوليه بأخذ أراضي في البرشا وحسب شهود عيان بان أول قص يبدأ من مدرسة دبي الوطنية في شارع الضيافة إلى المنطقة اللي فيها سبنس لنهايتها يعني لين التقاطع الثالث على شارع الشيخ زايد شامله كل شي في النص يعني منطقة الصفا وأم سقيم، وبعد في مشروع جميرا قاردن سيتي وبيكون بقص جميرا 1 و 2 بس بعدهم ماأعلنوا عنه وطبعا ماراح يكون في أراضي للتعويض يعني يامواطنين دورولكم إمارة ثانية أحسن ولا إسكنوا بالإيجار إلا من رحم ربي وعنده أملاك يدبر عمره فيهم.

ثم سمعنا بإن أيضا منطقة الجافلية راح يتم إزالتها بالكامل لإقامة مشروع يديد والحين عشان يسوون جسر الشيخ راشد بن سعيد راح يقصون منطقة ند الحمر لجهتين بإقامة شارع رئيسي في النص يخدم الجسر وأخيرا كان الإعلان عن مشروع الخور الثقافي بإزالة منطقة بردبي تقريبا كلها ومنطقة مشابهه من جهة الراس في ديرة يعني راح يغيرون شكل الإمارة بالكامل وراح يكون إستنزاف لمواد البناء وعجز في الإنتاج والأسعار راح تتضاعف مرات ومرات وعادي ايي يوم اللي بناء ملحق صغير في البيت يكلف 4 ملايين يعني الناس بيسوون لهم صنادق يسكنون فيهم، أنا مابى أكون متحيز في كلامي بس لو نظرنا لخارطة دبي من أولها لأخرها بنشوف بأن أكثر من 85% من مشاريع القص صايرة في بردبي مب برديرة ماعرف هل لأن اللي يقومون بالمشاريع من ديرة وعندهم حقد على أهل بردبي ولا لأن أراضي بردبي تناسب ان الاجانب يسكنون فيها مستقبلا في المشاريع اليديده ولا لأن ديرة ازدحامها مايتحمل اي مشروع! كلها تساؤلات مانعرف تفسيرها الحين بس بيي يوم وبيتضح كل اللي يصير الحين شو اسبابه.

بالنسبة للمناطق اللي القص مايتجرأ ايي صوبهم لا الحين ولا بعدين هم منطقتين مافي غيرهم زعبيل وند الشبا يعني اللي ساكن هناك يتطمن بأن الامور طيبه ومايخاف دامه في السليم، تدورن حادث سوق نايف أحس إنه مب صدفه مثل ماكانت حوادث بيوت سطوة الجينكو سابقا تصير ويوميا تكون الاعذار مب مقنعه وكان الهدف للتخلص منها بطريقة مايكون فيها معارضه وهذا احس اللي صار في سوق نايف بان بتنسيق تم احراقه عشان يقدرون يغيرون مكانه مثل ماتم الاعلان عنه خلال كم يوم وحطوا المخطط اليديد للسوق بسرعة البرق وهذا ان ربما يدل على ان المخطط كان جاهز والله اعلم مابحط في ذمتي بس الامور بدت تخوف بصراحه في دبي ومحد يقدر يرمس او يعترض لأن طبيعي النظام عندنا يقول كل واشرب وانت ساكت ولا ترا بتشوف شي مايسرك.

للعلم نحن مب ضد التطوير ولا ضد بناء المشاريع بس أحس كل شي يكون بقياس يعني ممكن الواحد يتقبل فكرة إزالة المباني الجديمة بس ليش يتم إزالة المناطق اليديدة والمباني اللي توها حتى ماكملت سنتين ثلاث، أحد التجار توه باني برج وياه القص وكان التعويض حتى مايساوي ربع التكلفه وسمعت انه زعل وطلع من البلاد وماوده يرد وكثير غيره بدوا يسحبون فلوسهم ويشتغلون فيها برع لأن هني محد ضامن شي والكل يخاف على أملاكه، قبل يومين واحد ماخذ المخطط اليديد لدبي أظن من مؤسسة محمد بن راشد بس قالوله شوف هذا لين الحين عادي عقب فترة يتغير يعني يقصدون عادي مناطق يديدة اييها القص في الفترة اليايه وانا احس جميرا كلها بتنشل لين برج العرب وبذكركم.

المواطن مأكول حقه اليوم يعيش تقريبا مثله مثل الاجنبي يدفع مثلهم يتحاسب على اشياء هو مب متسبب فيها وماحس في اي شي اليوم يميز المواطن عن الاجنبي غير بعض الاشياء البسيطة ومنها منح الاراضي والقروض والمستشفيات والمدارس وحتى هالاشياء بدت تقل وبدت الرسوم تدخل شوي شوي فيهم لين ماايي اليوم اللي يتحاسب فيه المواطن باسعار اكثر من الاجنبي وهالشي مب مستبعد بصراحه دام التوجهات تشير بأن المواطن هو آخر من تفكر فيه الحكومه يعني لو رمسنا عن سالك وشفنا كم عدد سيارات المواطنين اللي تستخدم هالشوارع وكم عدد سيارات الاجانب اللي تستخدم نفس الشوارع بيطلع المواطن مايخصه في الزحمه بس يتحاسب مثلهم والمشاريع اللي كل يوم تطلع واللي تغير الشكل التضاريسي للإمارة كثير علقوا عليها بأن لابد في يوم البيئة راح ترد على هالتدخل (وقالوها قبل لاتتعبثون بالطبيعة) وقوة الماي مافي شي يوفقها وهزات المناطق الشرقية والشمالية بدت تزيد يعني الله يستر بصراحه.

اللي ماسكين هالامور (ينعدون) وماراح اييهم شي بتاتا ولو كان في شي راح يكون لمصلتحهم اولا ثم لصالح الحكومه ثانيا واذا لا سمح الله صار شي ترا بيشلون قشهم وبيطلعون والشعب بياكلها، احنا مانبى اكثر من المواطن تكون له حقوق والحكومه تحسب له حساب ويخلونه يعيش في سلام ويسوون اللي يبونه في اللي يملكونه بدون مايضايقون الشعب، المشروع الاخير تكلفته 184 مليار يعني أكثر من ميزانية دول كثيرة وبدل ماينصب في خفض اسعار البترول والديزل والسلع الثانيه وتأمين الاستقرار للشعب لا يتم إزالة عمران لإنشاء عمران مع ان المساحات الخالية الباقية في دبي حسب اللي اشوفه تقريبا حدود النص بس يمكن يكون في خطه لإنشاء مدينة جديدة للمواطنين بعيدة عن دبي الجديدة.

الحمدلله على كل حال ترا في النهاية هي مجرد أمور دنيوية وراح تنتهي في يوم

سبحان الله وبحمده أشهد أن لا إله إلا أنت أستغفرك وأتوب إليك

الاســـطـــوري
أخوكم

[مايهزك ريح]

الأسطوري ..
احس انك يالس تكتب باسم كل اللي متبهدلين .. نحنا بعد على اعصابنا ..
يعني بيتنا الجديم ياينه القص .. واليديد اللي حاليا نحنا ساكنين فيه بعد احتمال اييه .. وين انسير يعني .. !
ما اعرف شو مشكلتهم بالضبط ..
يبنون شي وبعدين يردون يشلونه ..
شو يبونا انسوي انعيش في خيام مثلا .. كل يوم شالين الخيمه ومودينها مكان !

هاي لعبه يالسين يلعبونها الهوامير طبعا .. وكلها تيي في راسنا .. نحنا ..
في خاطري وايد رمسه بس ما فينا على المشاكل >_<
لا حول ولا قوة إلا بالله ..

[الاسطوري]

هــــــــــلا ..


"مايهزك ريح"


تدري حسب اللي سمعته بس مب متأكد إذا كان قانون دولي ولا بأن إذا الشخص يملك بيت بالأرض
مايحق للحكومه انه تاخذ هالبيت بأي حال من الاحوال حتى لو بتعوضه
إلا برضاه وطبعا أغلب اللي يالس يصير بدون
رضى الشعب يعني إجبار
على تقبل الأوامر، وياليت تعويض البيت مناسب جنك انت اللي تركض وراهم يثمنون البيت ويحددون
المبلغ ومايراعون بان هالمبلغ مابيسوي نفس البيت لأنك انت مابتبني بيت
مستهلك فترة مثل اللي انت فيه اكيد بتبني بيت
يديد وهالشي راح يكلف أكثر
غير الرخص وباقي الامور اللي ماحطوها في عين الاعتبار ولا فكروا انهم راح يلغونها عن هالفئـة،
غير انهم يطالبون الناس بإخلاء البيوت عشان يستلمون مبلغ التعويض
بس انزين ياجماعة الخير اللي بيطلعون وين راح
يسكنون ولا انتوا تظنون
ان البيت بيجهز خلال اسبوع! اونه عذرهم بان اللي يبى التعويض الحين يخلي بسرعه واذا بينتظر
لآخر الفترة المحددة يمكن نعطيه بدل ايجار لمدة سنه او سنتين عشان
يقدر يخلي في الوقت اللي نباه، الواحد كل
ماإنتظر هو الخسران لأن
الاسعار ترتفع واذا اليوم بيقدر يبني باجر التعويض مابيسوي له حتى ملحق وفي نفس الوقت
الايجارات مرتفعه وايد يعني اصحاب الدخل المحدود صدق بتصير لهم
مشكلة في السكن لين يقدرون يبنون البيت
اليديد الله يعينهم.


الاســـطـــوري
أخوكم

[مايهزك ريح]

اتعرف جيه بيجبرون الناس انهم يشترون البيوت الجاهزه .. :smile2:
اتصدق انه الفلل اللي عدالنا اللي للبيع .. اصغر عن فلتنا وسعرها تقريبا 10 ملايين ..
هذا وانا سائل قبل لا ترتفع الأسعار .. وين الحين تتوقع وصلن :k_special2:

لا وبعد سرت ادور فله عشان استثمر لي شي بدال اللعب بالبيزات .. :icon_rr:
توقع حصلت فلل في جميرا بارك ثلاث غرف والمساحه صغيره وااااايد .. طلعت الفله الوحده بـ 3 ملايين !
يعني انا اذا عندي ارض وابنيها ابرك لي من اني اشتري جاهز وبهالمبلغ :fa56:

و امسات ..يقولون لي ربعنا انه الفوت استوى بـ450 تقريبا .. ونحنا يوم كنا نبني الفيلا كان ب120 .. ويوم بنينا الملحق استوى بـ180 .. :k_nono:
لوين يبون يوصلون :bash:


وفيه سؤال .. يابوا خبراء عشان ايعرفون شو تأثيرات هالخرابيط اللي يسوونها ..على الأرض نفسها ..
وهل بتستحمل .. ولا يالله احفر وابني .. وما يهم شو يستوي .. :a116:

[صريح]

و يقولون لي ليش ما تحب دبي !


دبي انباعت للاجانب خلاص .. الهنوود و الانجليز مالكينه
الفلوس كلها لفلان و علان بس

دبي تطور ع حساب مواطنينها .. ماشي اراضي للمواطنين الا الـ VIP
اخر شي بيسكنونكم في شعبيات في حتا


الحمد لله بو محمد مب مقصر فينا فالشارجه .. و الله يطول بعمره


منح دراسيه للخريجين فالامريكيه و جامعه الشارجه
منح للبناء 660 الف درهم .. و الحين شي كلام بيزيدونها 900 الف في ظل الغلا في البناء
المزارع و يوزعونها علينا و مب مقصرين في حد

و يوم هل دبي يذمون الشارجه ما عندهم غير زحمتها ..


صدق الله يعينكم في دبي ..
و حاس بمعاناتكم من كثر ما اسمعها من هل دبي
نقول الله كريم بس
:laugh:

[مايهزك ريح]

صريح منو قال انه الشارجه ما عندهم هالمشكله ...شكلك ما تقرا جرايد ..
في منطقه في الشارجه نسيت اسمها ..
دافعين لهم تعويض عن بيوتهم لأنه يبون يوسعون الشارع
والناس محتشرين عليهم ..
لأنه التعويض ما يسد .. وشي منهم فللهم يديده.. !
يعني الحال من بعضه

[صريح]

مايد

صدقني اعرف كل صغيره و كبيره فالشارجه

و البيوت اللي ترمس عنهم شي ضروري انها تنشال عسب يكبرون شارع الوحده
اللي يربط دبي و الشارجه .. فهذا مشروعي حيوي و بيحل نسبه كبيره من مشكله الزحمه
و في كل دول العالم اذا مشروع بيفيد الدوله واايد .. ممكن ازاله البنايات و البيوت للمشروع
الناس اشتكت لانه التعويضات كانت اقل من قيمه البيوت .. و بعدين زادو التعويضات لهم و انتهت الازمه

في دبي مناطق بتنشال عسب يبنون عليها مشاريع
و الدخل يسير لفلان و علان و انته عارف منو اقصد


فرق بين ناس تهدم عسب المصلحه العامه و ناس تهدم عسب مصلحه خاصه و محدوده

شفت الفرق يا خويه ؟
:yes:

[مجموعة إنسان]

قرييييت الموضوع عالطاير

عقب برجع اقرأ مره ثانية
بس بقولكم من الحين ,,
بوظبي تترياكم

[مايهزك ريح]

اها اوكيه .. في هاي معاك حق !
بس اتعرف في ناس فرحانين بها المعاوضات ..
خصوصا اللي باني بيته من سنين ومأجرنه وماجد سكن فيه !
لأنهم كانوا حاطين في بالهم انهم يسوون صيانه ..
احين خذوا البيزات واشتروا فلل جاهزه من اللي ينباعن في المشاريع اليديده ..
بالنسبه لهم استوالهم دخل يديد ما فكروا فيه
كل واحد يحسبها ابطريقته ^_^

محمد .. واحد من هلنا شاري في الشليله - بوظبي .. جان ما نلحقه نحنا بعد خخخخخ

[صريح]

مايد

الشليله هيه الباهيه اليديده اللي بيت هلي فيها
الحين كلها صارت مدينه الباهيه ( الباهيه الجديمه و الشليله و الباهيه اليديده)

والله هناك رااحه و البحر حذالك و ماشي مهنده و عواار لبلاد و زحمتها
كل اللي تشوفهم مواطنين و هالشي نادر هالايام ههه

يارنا هناك ماخذ حق عياله الصغار كمن سزوكي بليا ارقام و يلعبون فيهن ع البحر
من تصبح تلقاهم يلعبون لين المغرب ههههه

[مزن هتان]

الواحد صار يخاف يبات، يصبح يلاقي عمره بالشارع.
و بعض الناس فرحانين عـ كم مليون عوضوهم فيها،
يلعبون فيها و هم ناسين ان الاسعار ضو صايره.

في مناطق بـ ديره قصوها شعبية الشرطه و شعبية
راشد عـ شارع الامارات، الراشديه (شارع المطار)
طوار (2،3) واصلنهم قص. و أنت تقول ندالحمر !!
ماخلوا شي.
الوالد يفكر جديا ياخذ له قسيمه بالعين و يبنيها.

ربي يرحمنا برحمته بس

[المزوحي]

مب مصدومين ...

انا سمعت كذلك البيوت اللي صوب الممزر بيشلونهم وبيعوضونهم في الهباب ... وحتى منطقة المنخول ..

لكن هذا الشي ضدنا نحن ... فينا قهر وتعب نفسي من السالفة ..

وكل مايعلنون شي في الجريدة قرار حلو للمواطن، تلقى نهار ثاني في المقابل شي مايسر ..

كأنهم يسكتونهم بطريقة، لكن ماتدري شو اللي يستوي !

هالمشاريع مب لنا نحن، للوافدين، اللي كل جنسية عايش فيها ماوده يرد بلاده ...

هم اللي متمتعين، وغير هذا يوم تقولون يعطونكم أرض من الحكومة، في المقابل من اللي يتبضع

ومرتاح غيرهم، مب حسد ... لكن وااااااااايد لاحظت إنه يوم يسيرون الوكالة يدفعون كاااش على المواتر

الغالية ونحن اقساط، محد جبرنا نشتري موتر بهالمبلغ، وتقولون يمكن هذا تاجر اللي اشترى ..

بس أنا أشوف معظم الفئات يوم يدخلون الجمعية يمزرون كذا عربانه، ونحن الاغراض نشلها في إيدنا

خوفنا من الأسعار ... ماعدت تفرق عندهم ... ومع هذا حاقدين علينا هم ..

الخدمات اللي تقدمها الدولة من مستفيد منها غيرهم، من حدايق وطرق ومواصلات غيرهم ..

مستهكلين الشارع وكل بقعه في البلاد .. وفوق هذا كله من موصخنها غيرهم ...

نحن ندفع للبلدية لانها نستخدم الشارع، من يستهلكها أكثر .. بتقولون كلكم ...

نسير مكان نوقف في الكيو، وحتى لو مواطن هم كذلك لهم الحق إنه تخلص معاملتهم أو كانوا شارين شي

إنهم يخلصون قبلك، كونه وقف قبلك، بنقوول طيب، مب مشكلة، هذا ما له علاقة بمواطن ووافد ..

لكن ليش يوم يكون دوري قبل، تلقاه يستهبل ويدور جدامك وعقب يقول انا ماشفتك، او بقول أنا مستعيل

أو حتى يقول عندي اغراض شويه خلني اطوووف ...

شكلي وايد رمست وخبصت بعد .. وحتى في الشارع يلفون عليك، وعقب يقولون دبي لازم تسوق فيها جيه،

عسب اتدبر عمرك من الزحمة .. اعرف دكتور يقول، يوم ألبس كندورة لاحظت محد يحترمني ويوم اكون لابس بدلة

يعطوني درب .....

مادري لو دخلت واتكلمت عن شي ما يخصه في الموضوع، لأنه هذا بعد يعبر عن غصات مواطن

السموحه

[الهيثــم]

والله ما نبااا شي .. ما نبا مشاريعهم .. ما نبا تطورهم على حساب المواطنين

شو استفدنا من المشاريع !شو خذنا منها ! مجرد اسم ، عندنا في الإمارات المشروع الفلاني ولا المدينة الفلانية اليديدة

مااا نبا هالسواالف دام بتخربون عييشة الاوادم ، الاسعار ارتفعت ، الشوارع امتزررت وشوي بتنفجر من كثرة الزحمـة

المراكز ما قمنا نشوف فيها غير الاجاانب ، والله إذا شفت واحد متعصم ولا لابس غترة وعقال استاانس ،
بس صااروا قلـة والسبة كثرة الاجانب ف البلاد

لييــن متــى !

متأكد إنه المواطنين يحبـون عييشة قبل ، يوم الناس كانوا قراب من بعض ، أهل الفريج كل واحد يعرف الثاني
مب الحين إلا إنت ساكن وعندك اجنبي ووافد وياك ف نفس الفريج

وين فرجان قبل ، عنبو ما خلوا حتى بر شراا الاواادم عسب الناس تتيلس وتخييم وترتااح

والله إذا يلست ف البر ف دبي ما احس إني ف البر ، أشوف الشارع زحمة سياايير وريييحة والجو وصخ ومب نظيف

غير يوم اسير جداا الذيد ولا ف التقاطعات نيلس مكاان نظييف ... تحس انه الجو نظيف وخط الجامعة

هالتطور السريع ما نبااه .. !

المواطن ما قام يحس انه مواطن ف دبي ،، مخلوق غريب يتمشى .. ها شو لابس !! كندورة وغترة !! من أي عصر ياي !! أحس جي قاموا يرمسون عنا الحين

ما اقول غير الله المستعااان .. والله يعينا ويرحمنا برحمته

[المزوحي]

خــّطاب


تعليق بسيط

لاحظت وايد يوم أسير مكان، يتمون يتطالعون، كأنهم مستغربين، أو يبون يقولون ليش تام هنيه وعايش

في البلاد ...


تحفه

تعليق بسيط

على طاري الزيادة، قبل كل شي احمد الله على النعمة، ولكن قبل الزيادات، الانجليزي راتبه 5 وأكثر بعد

راتب المواطن واللي يوصل راتبه 200 ألف شهريا، مع سيارة فخمة ...

وبعدين يزيدون المواطن، ويرفعون عليه في شغلات ثانية

[فرح ناز]

كل ساعة ينقلون خلق الله .. شوي شوي علشان يودنا المتحف :a108: لول

:wacko: انا دار راسي من العمارات الي تنبنى والشوارع المزحومة والمعاملة الزفته .. وهذا كله علشان منوه .. علشان الوافدين :fa36:

[الاسطوري]

هـــــــــلا ..

بسم الله قبل مانبدأ .. الحين تأكدت بأن مب بس أنا اللي حاس بالشي هذا في غيري وايدين
حاسين بالظلم أو بإنهم مب ماخذين حقهم إن صح التعبير ومالنا
غير لسانا اللي نتكلم فيه عل وعسى
نلقى من يسمعنا

"صريح"

مابنختلف وياك على النقطـة اللي ذكرتها وصح للمصلحة العامـة مابيكون في إعتراض من الشعـب
وهالنوع من القص موجود من أيام الشيخ راشد الله يرحمه بأن يكون القص
عشان يسوعون الشوارع ويكبرون الفرجان الجديمة
اللي تكون تقريبا كلها عبارة عن
سكيك، وكلامي صح كان يخص إمارة دبي بس بعد المغزى بأن الامارات الثانيه باديه في مشاريعها
ويالسين يبيعون وأغلبهم لاحقين دبي يعني اللي نعيشه اليوم بيعيشه غيرنا
باجر وسكوت الشعب معناته رضاهم عن هالشي
وهني الطامة الكبرى

"مجموعة إنسان"

نترياك ترد تقرا الموضوع مره ثانيه وتنورنا بتعليقك
على الموضوع يعني لو كان لك
اهتمام فيه

"مزن هتان"

بصراحه ماسمعت عن هالمشاريع والقص اللي في ديره بس شو بنسوي
الحال من بعضه عندنا وعندكم والله يستر من
باجر شو يطلع لنا بعد

"المزوحي"

موضوعك حساس بصراحه يعني والله الواحد اتييه غصه يوم يوقف في طابور فيه 15 شخص وكلهم
اجانب ووافدين واحنا اعيال البلاد محد يسوي لنا سالفه يعني ليش
مايتم تخصيص مثلا كاونتر للمواطنين او على
حسب المكان (مؤسسه
او جمعيه او بنك) لأن المواطنين شويه ومااعتقد ان احنا اللي مسوين الزحمه وبصراحه مانحس ان
نحن في بلادنا دام هاي المعامله اللي نحصلها هني عيل ين بتكون
لنا الاوليه الا اذا بيسوون لنا دوله ثانيه خاصه
فينا هذا شي ثاني
عشان نترك هالمكان للغرب وهم مستانسين في بلدانهم يحصلون معامله افضل كونهم مواطنين
هناك يعني الاماراتي لا يبحصل هالشي هني ولا اي في مكان ثاني
راحت عليه في كل الحالات والله يرحمنا
برحمته ان شاء الله

لي عودة لردود
البقية

الاســـطـــوري
أخوكم

[الاسطوري]

هــــــــــلا ..

"القانون والواسطة"

في كل الدول معروف ان القانون قانون على جميع الناس ويشمل جميع الفئات من أغنى واحد إلى أفقر واحد بغض النظر عن منصبه أو عمره أو صلة قرابته بأي حد ثاني يعني زوجة بوش اللي هو يحكم امريكا اقوى دولة في العالم لو طافت اشاره حمرا تتعاقب على هالشي مثلها مثل غيرها مايتم إستثناءها ولا التجاوز عن خطأها وعادي تنسجن في حالة ارتكابها اي جريمة تستحق هالشي، إلا عندنا القانون فقط للمأمور او للي ماعندهم واسطه على قياس آخر يعني اللي يطلع القانون مايمشي عليه وهو يخالف عادي أما اللي على قد حالهم هم اللي يتطبق عليهم ويتم التشديد عليهم بعد عشان يراوون القيادة والشعب بأن القانون يمشي انزين ليش مانشوفه يمشي على الهوامير ليش مانسمع عن قضاياهم اللي ماتخلص ليش يتم التستر عليهم والتجاوز على أخطائهم، الحمدلله ماعندنا مشاكل وقضايا مثل الدول الغربية بس الامور البسيطه شوي شوي راح تزيد والواحد احيانا يتسآئل ليش القانون يمشي علي انا بس ومايمشي على غيري المفروض الي يطلع القانون يكون قدوى لي عشان اكون مثله مب هو يسوي ويمنع الناس مثل اللي يدخن ويقول لولده ياولدي لاتدخن ترا هالشي يضر بالصحه وعقب ينفخ اللي سحبه من الجقاره اللي ماسكنها وين الولد بيلتزم وانت جيه او كيف تباه يلتزم وحضرتك تنصح بشي ونسيت نفسك منه.

اييك ضابط يقولك ليش مركب مخفي 50% يخالفك ويحجز السيارة وبعد شويه يركب سيارته اللي مشملنها بسوبر دارك ويتحرك ولا حد يكلمه ولا اييك مدير يطلب من موظفيه الالتزام بساعات العمل والحضور والخروج على الوقت وحضرته ايي متأخر ساعتين ثلاث ويطلع قبل الوقت أو ايي متأخر 5 ساعات ويتم زيادة نص ساعة على نهاية العمل ويجلب الدنيا جنه كل يوم يداوم 15 ساعه مايشوف انه متأخر اكثر من نص الوقت واذا غاب لا من شاف ولا من درى لأن اصلا مافي توقيع للدخول والطلوع طبعا كل مره يطلع بحجه مره اجتماع مره مؤتمر صحفي وغيره ومن هناك رقاد للضحى وأحيانا للظهر ونادر جان بيكون عنده شي وراح يسويه لا ويتأخر عليهم بعد واذا انت الموظفين بيتأخرون شويه ولا يبون يطلعون قبل جنهم ضاربينه تقوم الدنيا والقهر انه في النهاية مب مواطن ويالس يستهتر بالمسؤولية اللي ماسكنها ومع ان الشغل اللي تحته هم اللي يسوونه بس التقريات هو بروحه يحصلها وهم يحصلون كراف اكثر.

فلان من الناس موظف مثلي مثله نشتغل في نفس المكان وشغلي احسن من شغله بشهادة الزملا واللي يعرفون الشغل بس الثاني لأن ابوه على معرفة بالمدير وايضا على معرفة بمسؤول أكبر في قسم ثاني ولأنه داش بواسطة بدون مايعرفون شو مؤهلاته ولا يتأكدون كفائته فيتم تقييم شغله على اساس انه افضل من الكل بدون مقارنه حتى والإشادة بمجهوده حتى وان كان فيه أخطاء واي شي يبغيه بيحصله في نفس الوقت من اجازه او نقل او ترقيه او تغيير في الوقت او تأجيل شي واللي يالس يكرف مهما سوا محد بينتبه له ولا بيتم مكافأته لأنه ماعنده واسطه، القانون اذا كان يمشي على الكل بدون إستثناء بيتم تقبله بصدر رحب ومحد بيتعرض ولا بيقولون شي بس لما الواحد يحس بالتفرقة هني صعب ان الواحد يرضى او يستمر وتطلع المشاكل حزتها،

قال أحدهم لو ماكان الهامور اللي ماسك منصب
سارق جان ماكان بيحتاج السارق
انه يسرق اصلا

الاســـطـــوري
أخوكم

[الاسطوري]

هــــــــلا ..

"خطاب"

والله صدقك التلوث اللي عندنا بدا يزيد بشكل كبير والغيمه السوده اللي فوق دبي واضحه وضوح
الشمس وماتروح إلا من شتا لشتا هذا لو كان في مطر اصلا وهالشي
بدا يظهر في الامراض اليديده اللي بدت تنتشر
بين الناس غير عن اللي
يمرضون ويشفون كم يوم ويردون يمرضون مره ثانيه بسبة الجو يعني جونا مب نظيف وبيتم مب
نظيف لو رحنا فوق ولا نزلنا تحت لازم نعترف بالشي هذا وهاي هي
ضريبة التطور والعمران والاسم اللامع اللي
محصلتنه دبي قمنا ندفعها
بصحتنا وراحتنا اللي هم اهم شي عند كل فرد، نحن مانبى نرمس ونكبر المشكله بس نبى نطرح
القضايا اللي عل وعسى نلقى لها حل في يوم من الايام طبعا بتعاونا
واتحادنا وسيرنا على نهج الوالد الشيخ
زايد طيب الله ثراه

الاســـطـــوري
أخوكم

[الاسطوري]

هــــــــــلا ..

"الأسعار"

سلسلة إرتفاع الأسعار بدت مع إرتفاع سعر البترول ثم مع زيادة الرواتب ثم بحجة غلاء السلع والمواد الأولية وشي طبيعي بان كل السلع مرتبطة ببعض يعني إرتفاع أساسي شي = إرتفاع كل شي تقريبا وهذا اللي حاصل بالنسبة للديزل السعر عندنا في دبي عدا الـ 15.3 درهم وفي أبوظبي مازال مستقر على 8.70 فلس يعني بفارق كبير قريب الضعف هذا ونحن عايشين في دولة وحده تحت نظام وقوانين وحده تقريبا وللعلم بأن سعر الديزل في السعودية 1.8 يعني دبي أغلى منهم بـ %840 يعني بصراحه سعر خيالي بالنسبه لدوله مصدره للنفط

يقولون بأن محطات إيبكو وإينوك والإمارات يشترون البترول من برع بالأسعار العالمية وماعندهم محطات تكرير مثل أدنوك عشان جيه السعر مرتفع انزين دام احنا في دوله وحده وتربطنا مصالح مشتركه ليش مايشترون البترول من بوظبي ليش مايشترونه من السعوديه على الأقل وحتى إن كانت في أسباب تجبرهم على شراء البترول من السوق العالمي ليش مايتم دعم الأسعار من الحكومه لأن هالإيرادارت اللي تحصلها دبي بالمليارات بل أظنها صارت بالترليونات والشعب هو يدفع ضريبتها من زحمه وخدمات تخص الاجنبي لا المواطن وغيره يعني مب من حقنا نستفيد على الأقل من جزء بسيط منها وهم ياليسن يصرفون هالفلوس على مشاريع وأشياء مكانها في المرتبة الثانية وناسين بأن المرتبة الأولى يالسه تقضي على المواطن من جذوره

سمعنا ان شركة أدنوك عرضت على محطات دبي انها تشتريهم وتحولهم كلهم لمحطات أدنوك بس طبعا محطات دبي اللي تتدعي بانها تخسر مليون درهم يوميا تقول لا نحن مانقبل بالعرض هذا انزين ياجماعة الخير اذا انا قطاع خاص ويالس اخسر مبالغ كبيرة شو اللي بيجبرني أكمل خلاص اوقف شغلي انسحب واشوف لي شغله ثانيه تناسب إمكانياتي والحكومه بتتصرف وبتشوف حل للمشكله هاي بس يوم هم يزيدون والحكومه ساكته وترفض الدعم معناته هي راضيه عن اللي يصير خاصه ان مالها أي تحرك تجاه خفض أسعار الوقود بالعكس في تطلعات لرفع أسعار البترول واللي يالسه تهدد فيه هالشركات والحكومه لا عين رأت ولا أذن سمعت

حكومتنا للأسف تظن بأن كل المواطنين ناس مقتدرين وعندهم سيوله كبيرة صح بعض الناس مايفرق وياهم الغلاء في الأسعار وبعض الناس قادرين يكيفون أعمارهم مع الوضع قدر الإمكان بس في ناس مايقدرون وهالشي فوق طاقتهم يعني رب الأسرة إذا كان موظف وعنده ماشاءالله وايد أعيال ومحد منهم يشتغل وراتبه بسيط كيف راح يدبر أموره كيف راح يوفر الأمان والراحة لأسرته في ظل هالغلاء المستمر، بتطلع نتايج وبتصير أمور ماكانت موجوده في مجتمعنا لأن حكومتنا مانظرت للجانب هذا وإكتفت بالجوانب اللي تخدم سمعة البلد والأجنبي في المرتبه الأولى والباقي في المرتبات الأخيرة

إذا اليوم في مجال للتصحيح باجر مابيكون في مجال وكل شي بيصير صعب وإذا احنا قادرين نعيش ونرضى ترا أعيالنا مابيقدرون لأنهم بيكونون هم الأجانب في هالدولة ومابيكون لهم أي حق بالعكس بيكونون أقل من الجميع وإذا كانوا يملكون القليل اللي ورثوه من أهاليهم بيتم مشاركتهم فيه عادي نص بالنص مثل مايصير في الدولة المجاورة أو إستنزافهم حتى النفاذ يعني نهاية المشهد اللي نشوفه صار شبح مخيف ينتظرنا وينتظر أعيالنا ومحد يقدر يغير أي شي بس نقول الله يستر من الياي

طرفه: قبل فترة قريت في الجريدة إعلان للراغبين في الحصول على جنسية كندا يدفعون مبلغ 120 الف دولار كندي للحصول على إقامة دايمه وهالشي يضمن لهم ان خلال 3 سنوات يحصلون على الجنسيه يعني اللي يبى يعيش مرتاح يروح يغير جنسيته ويرجع والحكومه بتحسب له حساب وبيكون صاحب الأولويه في معظم الأشياء ومتى ماساءت الأمور يرجع لبلده كندا ويكمل باقي حياته

السموحه

[مايهزك ريح]

الأسعار .. وما ادراك مالأسعار ..
نار .. نار .. يا عالم ..
مادري متى بيخفون علينا .. لو شويه .. >_<
بس ما شي فايده " كلما قطعنا سيح يانا وادي "
ما اقول إلا .. الله يعين الناس اللي رواتبهم ما تكمل وياهم لين نص الشهر !

[شوق القلوب]

السلام عليكم...


قلبي عورني و انا اقرا الموضوع..

لا حول ولا قوه الا بالله ..

..

[وحي القلم]

قريته نصه و ما قدرت أكمل الباقي.. الله يكون فالعون

شو اللى استوا ببلادنا ؟؟!!!! :sad:

...

[الاسطوري]

هــــــــــلا ..

"تحفه"

صح إنج حذفتي ردج بس أنا برد عليه كونه طالع من الخاطر ويعبر عن مابداخل مجموعة كبيرة، كلنا نبى التطور والعمران والتميز والإسم اللامع بس لو هالشي بيسلبنا راحتنا والأمان والإستقرار مانباه ونقولها بصوت عالي مانباااااااااااه كفايه اللي وصلنا له يمكن صعب نتراجع في هالمرحلة بس خلونا نكتفي ونعالج مشاكلنا ونحلها قبل ماتكبر ونشوف وضع الشعب وشو محتاي وكيف نقدر نخلي الشعب يعيش براحه لأن الأرض هي الشعب وبدونه الأرض مالها قيمه تكون لأي كان ماتفرق لأن محد بيدافع عنها لو لاسمح الله تعرضت للعدوان ولا حد بيهتم في مستقبلها ولا حد بيقدر قيمتها إلا أهلها أما الباقين في أي لحظه ممكن يتنازلون عنها مقابل اموال قليله ويتركونها للأبد نبى حد يسمعنا ويحس فينا لأن اللي اليوم نشوفه صغير باجر بيكبر وللأسف المؤشر يقول بأن أعيالنا مابيكون لهم مكان على هالأراضي الغالية

"فرح ناز"

في البداية كان الوضع مقبول والهدف واضح أما الحين صار تحدي وكل حد يبى ياخذ منطقه بغض النظر إذا كانت مسكونه أو فيها ناس أو وين بيروحون أو كيف بيتصرفون وللعلم في أخبار تقول بأن منطقة البرشا بالكامل بيتم إزالتها بعد أربع سنوات يعني أهل بر دبي بيرمونهم في الشارع أو بيودونهم سيح شعيب عشان يصفى لهم الجو والله كبير على اللي يالسين يسوون جيه في الخلق بدون داعي ولا سبب ويهدرون اموال بلادنا بإزالة مشاريع لإقامة مشاريع بدون وجه حق والله يستر من الياي وإذا في حد إنظلم ومن دعوة المظلوم

الاســـطـــوري
أخوكم