كيف تعرف تـ حاور / ناقش / تـكلم

[المزوحي]

تختلف الثقافات بين البلدان والمجتمعات .. كما تختلف الثقافات بين الكثير من البيوت ..

من أي بيئة تكون فيها .. شاب/ه تجاوز الــ 25 من العمر .. لا يعرف كيف يناقش / يحاور / يتكلم

فــي رايكم شو السبب ؟؟

هل يعتمد على الشخصية ؟؟

كيف يتعلم الواحد منا حرية النقاش وسط مجموعة ..

باختصار مايعرف يحط كلمتين على بعض ..

يعني واحد من الشباب يالس ويانا ( مجموعة ما تقل عن 6 ) يبغي يرد على كلامنا ..

مش لأنه ماعنده خلفية عن موضوع معين، لكن بشكل عام ..

كيف الواحد يتعلم ؟؟؟

[مجموعة إنسان]

هلا والله اخوي المزوحي ..

الكلام الواحد ما يتعلمه بيوم وليله ,,
قصدي النقاش ,,

مثلا نحن في بيتنا في كل شي نتناقش
تقول الإتجاه المعاكس
ضرابه وهزاب ومناقشات ووجهات نظر
تقدر تقول ان الشخصية سبب في عدم القدرة على الكلام والنقاش

في حكمه قالها أبوي : خلك راس ولا تكون ذيل

هيه مش بس بين الربع ,,
حتى في المجالس تقدر اطبق هذا الشي

اذكر مره قاعدين في ميلس ..
وفي واحد ماخذ الجو كله ,, يتفلسف ومادري كييف
انا عرفت ان الريال ما يودي ,,
وكلامه كله خرط
يتكلم عن التجارة وهو كافل حلاق صغير ومسوي فيها تاجر

المهم هالأشكال لازم توقفهم عند حدهم ..
انا رديت عليه رد قوي شوي
بس باسلوب ان اللي في الميلس عرفوا ان ما يعرف شي
وان بس كلام
وان طلع طول القعده خرط
وبعدها انا اللي كنت ماسك الميلس
وانا اللي اتكلم


شوووف
مرات لو انت مثلا لو يتكلمون عن شي
وانت ماعندك خبره فيه
بس انت عندك اسلوب في الأقناع مب طبيعي
يعني تخلي اللي جدامك يقتنع غصب طيب
جذي انت تقدر تتكلم ولو انك ماتعرف في الموضوع
..



ماعرف اذا فهمت كلامي وللا لا
بس اضن وصلت المعلومه !!

[مــهــابه]

أنـا أعـتقد البيئة والنشئـة تسـاهم بشـكل كبيـر فـ شخصية الفـرد

وفـ حواره ومناقشـته . .

يـعني لـو أن الشخص عايش فـ بيئه تعود انه يبدي رأيه ويقول وجهة نـظر ، فـ بيكون هالشي طبيعي فـيه ..


اما لـو كان العكس ! . .


احس صعب انه يتعامل ويتناقش ويحاور بكل " ثقـه " مع المحيط الخارجي . .


وشي ثـاني


[ ثقـافه الفرد ]
عـامل مهم إذا ماكان أساسي . .

يـعني الشخص لما يكون ملم بالموضوع وعنده خلفيه ، راح يرمس ويحاول يوصل وجهة نظر للغير

اما لو كان العكس فـ هالشي راح يكون صـعـب . .

[المزوحي]

لي عودة

[بنت الدلع]

أتفق مع مهابه في هالنقطه

اذا انته ماكانت عندك خلفيه عن الموضوع فمن الصعب انك تساااهم وتنااقش
يمكن تبدي رايك بجمل قليله

الثقافه شي مهم ومطلوب
ومب شرط يكون الانسان مثقف عشان يبدي رايه
ممكن تكون له تجارب فـ بيتكلم من هالمنظور

وغير هذا

التربيه واايد تؤثر
البيت من اهم العوامل لانتاج افراد ذو شخصيات قويه
اذا الولد من صغره تعود انه يبدي رايه وكان فيه اهتمام من ناحية اهله وان فيه حد ينتبه له ومايقوله اسكت انته ماتعرف شي
او يحاول يقفطه
فهالولد مابيواجه اي مشكله في التعامل مع البيئه الخارجيه له

وغير عن جيه
احيانا الواحد تكون عنده خلفيه عن الموضوع وفاهم شو الي يبا يقوله
بس مايقدر يوصل معلومته بالشكل الصحيح
او بمعنى اخر
ماعنده سيوله في اختيار المفردات

[المزوحي]

مجموعة انسان، صح إنك اكتشفت بإنه الريال كلامك كان خريط، لكن مب شرط إنك تاخذ دوره كونك انته تتكلم

طول الوقت، حتى لو انسان صادق وكلامك صحيح وتعرف تتكلم ..

لنفرض إنك تتكلم، وأنا ييت بغيت أرد عليك، لكن ما أعرف كيف وشو أقول .. هنيه المشكلة ..

[المزوحي]

مهابه ...

لو تشوفين إنه البيئة لها دور ...

لنفرض إنه ( فلان ) ماعنده ثقافه، ويلس بين مجموعه، وخلنا نقول حتى انت لاحظت هالشي، في احتمال

إنه الشخص يغمضج، لأنه دايما يكون ساكت، مب لأنه شخص ذوق ويحب يسمع الغير، لكن ماعنده

الجرأة أو ينقصه أسلوب الحوار ..

وإذا ثقفاة الفرد لها دور، مب شرط هو ياخذ المايكرفون كل مره ..

لنفرض إني أنا كنت يالس مع شلة وتكلموا في موضوع أنا ما عندي خلفية عنه، اتم ساكت طول الوقت

( كون إنه ماعرف شي ) أو على الأقل أسأل سؤال سؤالين ، عسب أكون وياهم في الموضوع ؟؟

[المزوحي]

بنت الدلع ...

تدرين .. كلامكم صحيح يوم تقولون إنه الثقافه لها دور، بحيث يوم عندك كمية معلومات تقدر تعطي

تتكلم باللي عندك ..

بس في شي خطر على بالي ... ،

لنفرض إنه أنا عندي معلومات، ثقافه عن جانب معين، لكن وقت النقاش، ماقدرت أو ماعرفت كيف اتكلم باللي

عندي، بمعنى أصح، أقول كلمتين ومب واضحات بعد ... مع إنه أعرف الكثير ..

هنيه شو تسمين هذا ؟؟؟

[بنت الدلع]

سميته بعدم وجود مفردات كافيه للتعبير عن نفسك

او ممكن تسميه تلعثم في اللسان

او يمكن تخاف اذا رمست تغلط و حد يخالفك الراي
او انك تستحي تنقع وحد يضحك عليك

[المزوحي]

بنت الدلع .. أحيانا تلقين واحد من ضمن المجموعة هو يتكلم بزيادة، مع إنه ما عنده ثقافة زايده عنا ..

لكن هو جيه، هذا الشي سبب تردد لغيره ...

من يسلم ينطلق بالرمسه ..

[الهيثــم]

بسم الله الرحمن الرحيم

الحمدلله والصلاة والسلام على أشرف المرسلين ، أما بعد :

الحوار والنقاش من أهم لغات التعامل مع الغير سواء ف المجالس أو نطااق العمل أو قاعة المحاضرات

لكن يختلف النقاش من مكان لمكان

ومن الأامور الي تساعد على النقاش مثل ما ذكروا العضوات
ان الشخص يكون ملم بالموضوع الي بيتكلم فيه أو الي يرمسون عنه الجماعة
على اساس اتكون عنده القدرة على التحاور والاقناع إذا تتطلب الأمر

ولكن إذا كان الشخص غير ملم بالموضوع وما عنده ثقافة كافية عنه ، فـ السكوت غير وقار له وغير احترام لمكانته
والسكـوت مب عيب ، وكثرة الكلام إتيب لك المشاكل وانت مب حااس لأن الي يرمس واايد يخطأ وايد

ومن طبع العلماء إذا كان عندهم شك ف موضوع معين لو ان شاء الله بنسبة وااحد بالمية .. يرد عليك ويقولك لا أعلم .. اسأل غيري .. وهذا طبعا من طبع العلامة محمد بن صالح العثيمين رحمه الله ..

خلاصة الكلام
إنك إذا ما كنت متأكد من المعلومات إلي عندك ... لا اتعب نفسك وتتحااور .. اسمع واستفيد من غيرك ...

والسموحة ...

[المزوحي]

مرحبا أخويه خطّاب ...

مشكور على المشاركة ...

أنا وياكم إنه اللي ماعنده فكره عن شي يسكت، بالمختصر ما يتفلسف ...

لكن أحيانا يكون ويانا واحد في الشلة عنده معلومه، ويتكلم عنها، فيدخل عارضه واحد ثاني

( كون إنه عمره ما سمع شي عن المعلومه ) فيقول أنا مب وياك، وطبعا هالشي مب حلو ..

الأفضل إنه يتاكد عن طريج حج ثاني أو من أي مصدر ..

وأحيانا العكس، يعني ممكن أنا عندي معلومات، لكن ما عندي القدرة على الكلام ...

[مجموعة إنسان]

المزوحي
انا ما احب الواحد اللي يتفلسف على ناس ما يفهمون

بس هي الثقافه العامه وايد مفيده في هذي الأمور ..
يعني اقرأ في كل الأمور ,,

انا عن نفسي لو يتكلمون بشي انا ما اعرفه ما ادخل .. او ادخل بالأشياء اللي سامعه


انا بقولك عن خالي
هذي متكلم من الدرجه الألى .. وعنده قدرة على الإقناع عجيبه ..
( لو كنت لابس كندوره سودا ,, وهو قالك انت لابس كندوره بيضا .. وانت مقتنع انك لابس كندوره سودا ,, بس هو مستعد يقنعك ان كندورتك بيضا )

هذا اذا موضوع ما يعرفه ما يدخل
بس بعد فتره تشوفه يتكلم عن الموضع
سألته في يوم : كيف انت عندك هذي القدرة على الكلام .. من وين عندك هذي المعلومات ..
قال: انا في اليوم اقرأ 4 جرايد ,, وعقب اشوف الاخبار ومن خلال ثقافتي في التاريخ .. اجمع بين هذي المصادر
وعلى حسب اقتناعي بالصواب اجمع افكاري واقدر اجادل في المواضيع

بتااااع كلو مثل ما يقولون
في كل شي بيناقشك ,,
عادي
اللا الرياضه ,,

[مــهــابه]

المزوحي :

~ هب كل شي ينقال يدامنـا ، لازم نعلق عليه ، أو حتى أناقش فـيها ، لأن جـداً أمور اتكون مش مهمه بالنسبة لنا ، وناقشنا فيها أو لا ماتغير من ثقافتي وطريقة تعاملي ومناقشـتي ~ . .

وبـعدين مثلاً لو كنت يالسه وسط يماعه وانا مالي حايه فـ موضوعهم اكييد بسكت من باب

" من تدخل في مالا يعنيه لاقى مالا يرضيـه " . .

شي ثـاني ~ . .

يـكون عـنديه أفـضل وأحسن انه الشخص يكون ساكت ، فـ موضوع هو مش مفتهم فيه شي ولا انه يرمس فـ موضوع مايعرف عنه شي خير شـر ~ . .

[المزوحي]

مجموعة انسان، صح الثقافة لها دور، وتحس بعمرك عندك ثقة، موول مب حلو الجهل ...

يعني أحيانا انا يوم عندي شي معين أحبه وآخذ فكره عنه يوم اتكلم فيه، يحسون إنه يلجأون لي من هالناحيه ..

[المزوحي]

مهابه ... هممم انا وياج ..

ماعرف شي عن الموضوع، واتدخل وأحاول أسأل بطريقة أوني أفهم ، عسب أبين لهم أعرف كل شي

ومن هناك ( اخرطي ) اش حقه ؟؟؟

بنسوي مثل خال مجموعة انسان بنقرأ كم من جريدة ونجلب كم قناة ...

[تحفه]

اعتقد انه كله يعتمد على اكسبيرينس الانسان نفسه! اذا هو اجتماعي ولا نصنص ولا موول

اذا يبنا ولد ومتربي بين اهله وكلمره يشوف ناس يداد بيتعلم اكيد يوم يكبر وتجاوبه مع الناس بيكون احسن من الي منعزل من الناس!

عن نفسي اعترف اني ما احب ايلس الا وي الي احسهم يفهموني عشان جي في معظم الحالات احس ارائي تتعارض مع غيري .. لان بالنسبالي ماعندي شي مستحيل ولا شي ما اقدر اسويه :S فما ادري اكيد شخصية الانسان تلعب دور اكثر من بيئة الانسان! نحن بيتنا وايد يحبون الناس ودايما اجتماعيين بس انا مثل ماقلت مب كوول وي كل الناس :S

الله يعين لول

[أنامل قلب]

:
.

السلام عليكم والرحمه ..
طرح طيب ومقصد أطيب من شخصك أخوي المزوحي ^_^ ,،
واللي قبلي ما قصرو .. بس أحب أنبه لشغله ..

اللي فهمته من طرحك هو الاستفسار عن البنية النفسية اللي تمكن المرء كـ شخصية من تناول المواضيع بالمناقشة والتحاور مع الغير .. !

برأي والله أعلم مش الثقافه إهي المقصوده هنا .. اذا واجهنا فعل النقاش بحد ذاته .. !

مثال :
ممكن الواحد يناقش الغير باسئلة يطرحها لكونه باختصار جاهل لما يتطرقون اليه من مواضيع ..
ممكن الواحد يكون عنده حب التحليل والتحوير وممكن يعارض الآخرين بآراء وان كانت بالنهاية مبنية على أساس ركيك ..
ممكن الواحد يكون صاعب فكر واعي وادراك عالي بحيث ان طرح النظريات المجرده عليه لا تسد حاجة شخصه فيبدأ بالاستفسار والاقناع او الاقتناع تاليا ..

لكنهم بالنهاية يناقشون ويلفتون انظار هؤلاء الغير اليهم دوما .. وان كانو قليلي الثقافة وما شابه ذلك .. !!

:

البيئة المحيطة بالانسان تأثر بشكل كبيييـــــر بنظري على اقدام الفرد لمناقشة الغير ..
خاصه لمن يكون المرء معتاد عـ اسلوب معين من الصغر والتفاصيل هذي معلومه لدى الجميع ..

بتكلم عن نفسي كـ ذم مش مدح طبعا .. :fa55:

اهني عدنا بالواحات ..
ممكن يشوفني البعض بشكل عام عادي ممكن ادخل بنقاشات وممكن اكون اجتماعية ظاهريا ..
لكني العكس تماما بالواقع حيث اني من سابع المستحيلات اني اناقش بأي جلسة ..
الا ان كان الحضور ناس استسيغ الحوار معهم بسلاسة لكونهم مقربين لأنامل قلب .. !

لكن المواجهة بحد ذاتها " عيني عينك"..
بمعنى اني اناقش الناس بشكل عام فهي احد المشاكل لدي اللي ان شاء الله تنحل بيوم ما ..
الا اني ممكن اكون العكس في حال كان التواصل كتابي او هاتفي او الخ وفاهمين علي اكيد ..:a018: !

بالنسبة لي كـ مجربة فهو لسبب كوني من الصغر قليلة الاختلاط بالغير ..
خجوله والجراة سمة لا أمتلكها أبدا .. دون غض النظر من كوني غير اجتماعية ابدا ..
خاصة لمن أكون مع عدد من الاشخاص .. تلاقوني ابتعد مباشره ..
وفي سبب فرعي آخر ما بذكره ولا بتضحكون علي .. بتقولون امبيه اشفيها هذي عبالها .... ... :fa46:

بالكفة الثانيه وهي كلمة وجهتها لي وحده من زميلاتي بالكلاس لمن كنا نتناقش حول موضوعنا المشترك "4 بنات" بروحنا ..
لقيتها تقولي انامل قلب طلعتي مب هينه وتعرفين تناقشين .. تعالي قعدي عندي باخذ افكارج حول الموضوع .. :shutup:
^ رفعت راسكم لول ههه

ليش لأنهم اعتادو يشوفوني مستمعه اكثر من كوني متحدثه بجلسات النقاش بالكلاس .. !

:

ان شاء الله تكون فكرتي حول الموضوع وصلت لكم بالشكل المقصود ..
واسمحولنا عالاطاله الدايمه بالمواضيع ..

احترامي ..
ولا هان الرحمن قدر أحدكم ..

اختكم انامل قلب ^_^ ..

:.

[المزوحي]

تحفه، أحيانا الأهل نفسهم مايعطون عيالهم الفرصة للحوار، او كل مايبغي يتكلم يسكتونه، وهذ شي غلط طبعا .

في ناس اجتماعيين، لكن في نفس الوقت مايعرفون يتكلمون أو يناقشون ..

[تحفه]

أنا احب سياسه بيتنا . . يسمعونا ويقولولنا الصح من الغلط وسبحان الله كلامهم كله يطلع صح بالنهايه حتى يوم ما اسمع كلامهم XP

تصدق يالمزوحي في اشيا بسيييييييطه جدا ما تخطر علبال و كلامهم يصدق...... مثلا يوم اختار نظاره شمسيه .. وبابا مب مقتنع بس انا اخذها عن خاطري .. اشوف عمري بعد فتره صدق ندمانه لاني ماشتريت النظاره الي بابا عيبته! او انهاا تنكسر ولا شي يستويبها المهم ان كلام الاهل في النهايه هو الصح حتى في الاشيا هاي عشان جي الحين كل ما اخذ رايهم في شي ويايقنعهم ما اسوي/ اشتريه ....

[المزوحي]

حتى لو لج رايج الخاص حلو، لكن الأحلى تاخذين راي أي حد وياج من ربعج وإلا أهلج، وعقب تقررين شو تبين ..

مب شرط العناد والاصرار على رايج، ولكن ممكن بكون القرار الاخير لج ..

[تحفه]

صح .. على قولت القايل.. ما خاب من استشار ;>