الصيف قرب و السفر حان طاريه

[ذنـيـنـي]

انزيييييييين

مثل ما العنوان يقول،،
الصيف قرب و السفر حان طاريه الله يعين الي بيفارق حبيبه :fa46:


يالا يا شباب يا شطار :icon_rr:
و يا بنات يا أمورات :mf_leia:

كل واحد يقولنا شو برنامجه للصيف،،
وين ناوي يسافر و ليش اختار هالدولة/الدول،، و شو اهم معالم هالدولة و الي تستحق الزيارة

و اذا ما بيسافر يقولنا وين ناوي يسير في البلاد و شو المميز في المكان الي بيسيرله

و ياريت لو تحطون صور للاماكن الي ناوين تزورونها
او تحطون خرائط اذا كانت متوفره عندكم لتعم الفائدة على الجميع
و اذا عندكم معلومات سياحية اتمنننى انكم تحطونها عشان كلنا نستفيد

[مجموعة إنسان]

صبااح الخييير


شوف لين الحين مافي اي مخططااات للسفر ,,
لأن يمكن باخذ صيفي هالكورس
عسب جذي مافي اي مشروع
بس ان شاء الله من اخلص
الأهل يبون يروحون تركيا
خل يروحون
بس بعد الصيفي ان شاء الله يمكن انا وابوي واخوي بنروح المغرب وللا نكنسل المشروع على ابوي ونكمل العدد بأخوي العود وبنروح مصر

جذي الترتييب !!
بس نتريا شوي


وانت ..
شو ترتيبك ؟!

[المزوحي]

مرحبا ذنيني .. بما إنه للحين ماشي خطط،لكن برد على موضوعك، وبقول في احتمال اسير لندن ..

ويمكن نغير الوجهه، وفي احتمال إنه كل شي يتكنسل .. على حسب الظروووف

[مايهزك ريح]

لين الحين عندي خيارين الأول ( ميلان - باريس - جنيف ) الثاني ( نيويورك للمره الألف اففف )

[المزوحي]

مايهزك ريح، لو مثلا خذت الخيار الاول، وين تسكن ؟

[مايهزك ريح]

الخيار الأول .. بسير عند الإمارات للعطلات مثل كل مره وبخليهم ايرتبون لي الرحله كامله .. ^_^
عندهم فنادق معينه يتعاملون وياها .. بختار الفندق اللي يعيبني من اللسته

والرحله بتكون اسبوع لكل منطقه .. ^_^!!

[المزوحي]

جنيف

http://www.myrtn.com/freetours/Images/Free_gallery/free_gall853.JPG

[ذنـيـنـي]

انا هالسنة ان شاء الله بسافر لأول مره ويا ربعي،، لأني كل مرة اسافر ويا اهلي بس هالمره غير
شعارنا لهذه السفرة هو الاستمتاع بأكبر قدر ممكن و بأقل تكلفة ممكنه D=
و الزين انه ربعي الي بسير وياهم شباب صددددددق نشيطين و مب مال يلسة في الفندق و الكوفيات

المهم

الله يسلمكم نحن ناوين نسافر لمدة ثلاث اسابيع

بنبدأ سفرتنا بالوصول الى فرانكفورت في المانيا و الي منها بنأجر سيارة و بننطلق الى ميونيخ و بنبات فيها ليلتين
و بعدين بننتقل الى النمسا، و على وجه التحديد مدينة سالزبورغ و بعدين بنسير فيينـّا و عقب بنسير زيلامسي

من زيلامسي الانطلاق بيكون الى فينيسيا في ايطاليا و منها بنسير ميلان و بنتم فيها كذلك ليلة وحدة و بعدين بنسير جنيف "و ملحقاتها" 3 ايام

من جنيف بنسير باريس و ايضا بنتم فيها 3 ايام و عقب بنسير عيمان قصدي بروكسل في بلجيكا و بعد بنتم فيها يومين ثلاث و عقب بنرجع فرانكفورت و بنرد لدارنا

طبعا كل التنقلات بتكون بسيارة مستأجرة و المسافة بين المدن ما تزيد عن 3-5 ساعات

بالمختصر نحن نبغي نسافر و نستمتع بدون ما نكرر طلعاتنا و نبغي نشوف الاشياء المهمه في كل مدينة نزورها
و الي بيساعدنا في الرحلة هو انه نحن بنكون اربع اشخاص و كلنا على قلب واحد و في سيارة وحده
و ما عندنا حد كسلان و هيز D=

[ذنـيـنـي]

ما يهزك ريح

تدري انه نحن حرمنا نحجز عن طريق السفريات لأنهم يقصونا قصصصصصص بالاسعار !!
ربعي سافروا السنه الي طافت و سوولهم جولة شبيهة بجولتنا هذه لكن على اقل شوي
نصهم كانوا حاجزين عن طريق السفريات و نصهم عن طريق النت

على مدة الـ 3 اسابيع طلع الفرق وياهم ما يقارب 4-5 الاف درهم

[مايهزك ريح]

ذنيني .. على حسب الفندق يفرق السعر ..
وحط في بالك اذ بتسير شهر 7 او 8 ..
هذا يعتبر الhigh Season ففكر اتسير شهر 6 وشوف فرق السعر .. صدق غيير ..
ثانيا نحنا بنكون عايله .. اذا بسوي الحجوزات بروحي بتبهدل .. وانا ما فيه على الصدعة ..
بس اتصدق يوم انسير نيويورك .. كل شي نحجزه بالنت من التذكره للفندق للموتر .. كل شي ..
بس اوروبا .. او شرق اسيا ما جد جربنا ..
كله عن طريق الإمارات للعطلات ..
مره حسبت روحي التذاكر .. ويا الفندق اذا بحجز في النت طلع عليه اغلى من الإمارات للعطلات اتصدق !

بس مره دورنا عن طريق
www.travelocity.com
و www.priceline.com >> هذا امريكي .. الأوروبي http://www.priceline-europe.com/
كان فرق وااااااايد في السعر .. بس لازم الكريديت كارد اللي عندك يكون الrate مالها عالي عشان تاخذ بالنت .. انا اللي عندي حتى ما تكفي التذاكر .. هنيه المشكله !
فعن طريق السفريات ادفع المبلغ كاش !

[شمعة أمل]

شهـر 5.. بسيـر لندن ويا امي لأسبوع عشـان ننتقل من شقتنا الحـاليه للشقه اليديده ونجهز الشقه للصيـف

نص شهر 7 بنسيـر لندن لاسبوع او عشر ايام.. بعدين ابويه بيي وبنسيـر نيويورك لاسبوع بعدين بنرد لندن وابويه بيرد دبي.. وعقبه باسبوع او عشـر ايام بنرد دبي
على أواخر الصيـف في احتمال نسافر مره ثانيـه كـ عايله يمكن ايطاليا لانه وايد نحبها
اذا لا
يمكن اسافر لندن ويا امي واختي الصغـيره أو أشتغـل

الخطه .. انه نسيـر نيويورك
بس بعد ولا شي أكيــد.. على حسب جدول أبويـه.. اذا يقدر يأجز لـ عشر ايام أو لا

[المزوحي]

شمعة أمل وين مكان شقتكم في لندن إذا مافي احراج ؟؟

[شمعة أمل]

نايتسبردج < تقريبا كلحد هناك.. لأنه أحسن لوكيشـن.. حتى الشقه اليديده في نفس الشـارع
اذا من ناحية مشي ف هو
دقيقتين من هايد بارك
على شارع هاردز ف ياخذ يمكن بعد دقيقتيـن عشان نوصل هاردز
دقيقه لـ هارفي نكلزز
دقيـقه لـ سلون سترييت
عـشرين دقيقه مشي لـ اكسفورد ستريت
نص ساعه مشـي لـ ترافالغر سكوير
ربع ساعه مشي لـ كينغز رود
45 دقيقه مشي لـ كوفنت قاردن
عشـرين دقيقه مشي لـ قصر الملكه
ربع ساعه مشي لـ سفارة الامارات

يعني كل شي قريـب وتقدر تمشـيله.. الا كم من مكان

[المزوحي]

زين ماشاء الله يوم كل شي جريب ...

همم في خاطري اسير ايطاليا .. مازرتها إلا مره، لكن يبالينا نفصصها ..

[عفاريتووو]

السلام عليكم



الصيف و متى يييي هالصيف بس


مخططاتنا دومها تتغير لين اخر لحظة
بس غالبا بيكون جي


اول شي بنسير صوب البلاك فورست في المانيا
شي مدن صغيرة هناك و قرى حلوة :fa35:
مثل تيتيسي تجمع بين مدينة صغيرة و بحيرة و غابات

http://oasis.bindubai.com/bin/uploaded/1061_01205773782.jpg

و جريب منه يويروبارك احلى ملاهي شفته :fa41:

و بعدين بنسير متجع centrparc
عندهم في واييد اماكن في اوروبا
مكان حلو و فيه وايد activities
و اللي بنسيرله ان شالله في reims في فرنسا
يديد و شكله حلو
شي فلل ع البحيرة و فلل في الغابات و فلل في جزيرة

و عقب بنسير هولندا و بلجيكا
بس اول مرة اسيرلهم فماعرف عنها

و عقب باريس :fa41:
اللي ماراح باريس انصحه يروحلها
احلى مدينة في العالم :fa41:

و عقب سويسرا و نتم في القرى
امم وايد اماكن فيها حلوة
مونتركس .. لوزينرن .. زيورخ .. بيرن .. ساس في .. زرمات .. جنيف
و شي اماكن فرنسية جريبة منها و حلوة نفس ايفيان و اننسي

و عقب ميونخ حق السوق

و ان شالله بس ما يكنسلوونه لين الصيف :fa52:

..

ما يهزك ريح

لو تحجز بروحك من النت احسن
بتلاقي واييد اماكن احلى

[مايهزك ريح]

عفاريتوو .. بحجز في حاله انه انكون 2 - 3 اشخاص .. ما عندي مشكله .. مب 10 اشخاص !

[الـيـاه]

خليتوني اتوله ع الصيف بسرعـه ..

هممم هالسنه اول شي بنسير لنـدن حق اسبوعين وعقب بسير و لأول مره *برشلونه* :inlove:اسبانيا لانه كزنتي كانت راده من فتره من هني موون
وسألتنا شو احسن مكان تسوقتو فيه قلنالها ميلانو لندن جنيف قالت عيل احسن مكان شفته حق سوق برشلونه جان نتحمس كلنا وقررنا نسير السنه :icecream: وبعد لانه اول مره اسير برشلونه ..


وعقبها بنسير *ميلانو* ايطاليا بعد حق اسبوع وبنرد لبلاد ..
بس لين الحين مب متأكده إذا اول شي بنسير لندن والا بيخلونها آخر شي !!! :k_icon9:

[مايهزك ريح]

الياه اتحملوا من الحراميه في اسبانيا .. ^_^

فيه منطقه اسمها ماربيلا في اسبانيا وايد يمدحونها وفيها منتجعات ^_^

[المزوحي]

أسبانيا يمدحونها وفي خاطري اسير لها، ههههه مب كأني وايد اماكن ابغي أزورها .. يبالي تذكرة مفتوحة حول

العالم ..

[الـيـاه]

مايهزك ريح : لول ان شاء الله .. مادري انا ماعرف اسبانيا بس متحمسه حق برشلونه 3> shopping shopping lol

المزوحي : هههه جان زين لو احصل هالتذكره

[شمعة أمل]

عفاريتوو
سنتر باركس صدق صدق صدق كشخه وونـاسه
يوم كنا صغار دوووم نســــــيررررر .. سرت لـ كمن واحد بعد.. يمكن 4
صدق استاسنا .. فييه كل شي.. سياكل.. روك كلايمينغ.. كانووو .. كل شييي < اياااااااااااااااام 3>

[شتشووته]

اتووقع مصر لاني ابا احظر دكتورااه عمتي .. :)

[بحر الموده]

انا ساير هالسنه ان شاء الله مانيلا .. الفلبين ..

[المزوحي]

بحر المودة عفوا بس (تشد) ساير لها من قبل ؟

[بحر الموده]

ياحيك اخوى المزوحى

هيه اخوى اخر مره رايح لها فى صيف 2005 بس تميت فيها اسبوع

هالمره شهر كامل بنروح جزرها الغاويه وعندك حى مكاتى الراقى فى مانيلا ومنطقة باجيو شمال الفلبين

وبالحياه لين هاك اليوم وان شاء الله عملة البيسو ماتنزل وايد واتم على مستواها العادى واى سؤال بتقوله عن الفلبين نحن حاظرين بالرد ..السموحه

[المزوحي]

تسلم على الرد بحر الموده،، مرات تحصل شخص يسافر لبلاد معينه من سنين ومايسيرون لها العرب وايد،

أو يسافرون لكن مب ذاك الزود ...

يعني مانيلا كم يبالك تيلس فيها وتشبع منها .. أسبوع - عشر أيام ؟؟

[بحر الموده]

الله يسلمك ويخليك اخوى المزوحى

سلمك الله مانيلا تكفى اسبوع هذا اذا ماطلعت برع مانيلا لانه مانيلا مافيها الا مراكز حدايق والزحمه يمدحونا وايد

وكل زاير الفلبين اول مابيوصلها مابتعيبه مثلى انا اول مازرتها شفتها مدينه عاديه كلها خناخيش لكن يوم زرت المناطق والجزر ورجعت الى مطار نينو اكينو الدولى واعلنت طيران الامارات على المغادره ..تشوقت لها وايد وقلت ياريت لو تميت اكثر فى هذا البلد الحلو وشعبهم لى يحترم شعب الامارات ...المهم حصلت صور حليوه عن مانيلا الورده..

احلى شىء يوم تسوق فى بلاد الغربه تحس صدق تسوق سياره ههههه

http://travel.maktoob.com/photo/data/500/medium/Manila_BayWalk_09.jpg

هذا الكورنيش مالهم اذكر مار عليه كشخه فى الليل عندهم ضرب غنا لين طلوع الشمس حشره ههه

http://travel.maktoob.com/photo/data/500/medium/Manila_BayWalk_13.jpg

هاى الركشه مثل لى فى مومباى وركبتها ب 200 بيسوو يعنى عشرين ربيه مالنا لووول

صور ابراج مانيلا وهالمنطقه يسمونها مانيلا A

http://travel.maktoob.com/photo/data/500/medium/Manila_BayWalk_14.jpg

الغرووووب عذااااااااااااب شوف كيف الشمس واضحه عندهم

http://travel.maktoob.com/photo/data/500/medium/PR_Manila_817.jpg

والتذكره على البزنس 9 ونص والموعد فى الصيف ان شاء الله

[ايه احبك]

والله هاي الفلبين !!
تعرف بحر دوم اتحرى الدول الأسيويه عدى اليابان وهونغ كونغ وصخين XP
بس بارك الله فيك غيرت نظرتي فيهم XD
--
عن نفسي نحن قوم بيتنا ما يسون بلانغ حق السفر الا قبل السفر بيومين عاد اذا كانا لاكي حصلنا حجز واذا لاء يلسنا في بلادنا الحلوه في ايام الصيف XD
واذا حطوا بلان قبل السفر بمكن الشهر نبصم بالعشره انه ما بيتم التنفيذ XP

[طير الحب]

ذنيني رحلتكم حلوة انا وريلي ما نحب سفر الصيف عسب كثرة العرب ولاجنك مسافر عموما فينا ما حبيتها حسيتها دبي بس حاطين ببالين احتمال نسافر قبل الصيف وتكون الوجهه زيلامسي وننطلق من خلالها تعرف ما سكنا بفدف في زيلامسي بس بشقة مفروشة وايد حبيناها مجابل مكالدونالد وتحت مطعم صيني...خبرنا عن تكاليف الرحلة والامكن الي بتسكنونها ونحن حتى ولو عدنا عيال نحبنستكشف المكان الي نحن فيها نستمتع بكل شيء مب رقاد ويلسه في الفندق ...بالنسبة للسيارة المستاجرة مب مسؤولية وفيها نافيجيشن ما اعرف كيف تنكتب وما في خطورة بالسفر

[ذنـيـنـي]

طير الحب


اسمحيلي على التأخير لأنه من يوم تحول دوامي للفترة المسائية اعتفس يومي لا صار نهاري نهار ولا ليلي ليل >> اشوفني جلبت الموضوع لفضفضة :d010:


بالنسبة لسفرتنا
عددنا تقلص الى 3 اشخاص فقط و هالشي معناته انه بناخذ غرفة وحده مع سرير اضافي بدال ما ناخذ غرفتين ،، و هالشي معناته توفير نص قيمة السكن :vertag:

و الي ناوين عليه هو انه نحجز كل شي من هناك لأنه عن تجربة الاسعار اقل بوايد من انه نحجز من هني :10:




السواقه هناك متعة ما بعدها متعه،، و سهلة لأبعد الحدود
انا سقت هناك يوم كان عمري 18 في رحلة وحده و السنه الي عقبها سقت بشكل رسمي و كنت اسوق ميني فان بو 9 اشخاص "شرات مال المخبز:doh:"

لو نزلتوا في زيلامسي بتكونون على مسافه 3 ساعات من فينيسيا و 3 ساعات من ميونيخ و 5 ساعات من فيينا،، طبعا بالسيارة

سيروا و استانسوا و اهم شي انكم تأجرون سيارة :fa42:

[طير الحب]

بس سؤال ليش ما تبدون من ميونيخ ولا عشان نهاية الرحلة في بليجكا الي هي اقرب لفرانكفورت عن ميونيخ


وبرد بعد في الاسئلة

[ذنـيـنـي]

هذا واحد من الاسباب

السبب الثاني هو انه في فرانكفورت ايجار السيارات ارخص و السيارات متوفره بكثرة
ثالث سبب هو انه نحن نبغي نشوف فرانكفورت "لأنه العرب ما يسيرونها" فـ نبغي نعرف هالمدينة شو فيها

[مايهزك ريح]

حد سار هالحديقة .. Europa-Park


موجوده في ألمانيا .. على الحدود ويا فرنسا .. يقولون انها تبعد عن ميونخ ساعتين .. مادري عاد بالسيارة ولا القطار !

http://www.europapark.de/lang-en/c51/default.html

[المزوحي]

مايهزك ريح مب هاي اللي في استراليا ؟؟؟

[مايهزك ريح]

ابصراحه ما اعرف .. هم كاتبين انها في المانيا .. مادري اذا شي منها في استراليا !

[المزوحي]

يمكن تكون نفس الفكرة وانا اتخربطت،

في استراليا عندهم دريم وورد

http://www.dreamworld.com.au/content/drw_2008_home.asp?

وهنتين من غير

[عفاريتووو]

هيه انا سرتلها
وايييد حلوة
من يوم ما سرتلها الحين كل سنة اسيرلها
بالسيارة تقريبا 5 ساعات من ميونخ
لو تسيرلها من زيورخ اقرب
و عيبتني اكثر عن يورو ديزني مليوون مرة

و المناظق اللي حوليها بعد حلوة
دووم نيلس هناك

[ذنـيـنـي]

مايد انا سايرنلها 3 مرات
وايد فنانه

حتى احيد آخر مره سرتلها كنت انا الي اسوق و ضيعت سيارة اهلي و ما عندي خريطة و تيلفوني مافيه رصيد،، يني لا ارسل ولا استقبل لول

بس الحمدلله وصلت من عقب ما وصلت لحدود سويسرا و رديت p=

[مايهزك ريح]

ناصر .. ما شاء الله عليك مول ما ضعت ..بس وصلت لين حدود سويسرا .. ^_^

انا اذا بأجر موتر في السفر .. بشل الـ GPS ويايه .. ما فيه اضيع ^_^
اتذكر مره ضعت في واشنطن .. اسميني اتخبلت >_<

[ذنـيـنـي]

ما عليك سويسرا تبعد مال ساعه تقريبا،، وصلت لحدود بازل


اشترينا جارمين حق السفرة فيه خريطة اوروبا و الشرق الاوسط
جان تبا منه خبرني،، ربيعي عنده محل معدات صيد وملاحه و اييبهن باسعار حلوة

[مايهزك ريح]

عندي هذا .. جديم ....بس وايد زين .. ^_^

Garmin Quest 2
http://www.shoptheoutdoors.com/images/garmin-quest-2.jpg


بس أي واحد .. اللي ماخذنه ..وبكم !

[شمعة أمل]

للأسف، بس بنسـير لندن ..
على قولة ربيعتي.. بنعفن ويا بعض هنـاك >_<

[قرموشة]

بنسافر بعد 3 أسابيع تقريبا
وايـد قريب سفررنا هـ المررره لول

بنسير تايلند كـ العاده .. مقطوع سرنا هنـاك ههه xD

[الـيـاه]

شمعة أمل : ان شاء الله ألتقي وياج .. بس ماعرف لو بيخلون لندن اول السفر والا آخر شي XD

[شمعة أمل]

مب مشكله.. لاني بتم فيها لـ شهر =s

[الـيـاه]

بزيد على خطتنا *سويسرا* بس مب ويا اهلي ..

لانه شي سفره حق 5 بنات من الكليه حق وورك شوب في basel - سويسرا
بيردون علينا الاسبوع الياي اذا اوكي والا ! يعني للحين مب متأكددددددددده

ولو سرت وطولنا بسافر من هناك عقب ما نخلص حق قوم امي 3> في ميلانو .. وعقب بنسير برشلونه ولندن
واذا ما طولنا ويا الكليه .. برد لبلاد وبسافر ويا اهلي

[المزوحي]

تعرفون مشاورات السفر مره بنسير هالبلد ومره يغيرون على مكان ثاني، ومره يقولون ما بنسافر ومره .....

هممم بس آخر شي استقروا على لــندن، هذا إذا مافي تغييير .. تبون الصدق صح عمري ما زرتها، لكن مادري

ليش احس بها كئيبه ....... وييييييييه وين شمعة أمل عن تعضني ...

[شمعة أمل]

لندن كئيبه يوم ماعندك حد هناك وماتعرف وين تسيـر ويوم وايد وايد يطيح مطر
بس يوم تعرف وين تسير وعندك حد هناك صدق تستاااااااانسسسسسسسسسسس

كان المفروض اسير لندن ورا باجر بس تأجللللللل :( كله من الصيفييييييي!! جدّموو كلاساتييي باسبوعييييين ;_; احتاج اسافر اففففف.. على حظي جيّكت الموقع اليوم .. لو ماجيكته جاان سرت لندن وطّوفت الصيفي

[المزوحي]

هممم، يقولج احلى شي في السفر الرفقه، يعني مب حلو تسيرون عايله وحده، اما تسيرون ضربه او تلتقون

هناك، مع إنه في ناس موتهم يسافرون مع حد، يحبون يسوون كل شي روحهم ..

[ذنـيـنـي]

المزوحي
السفر ويا العوايل احسبه مب شي
و اككككثر شي تستوي من عقبه مشاكل،، يا انه الصغارية متفاتنين
ولا مشاكل من بين الحريم
ولا انه الله يبتليك بناس بخلا و تتلعوز وياهم
أو انك تسير ويا ناس هم من بينهم اصلا مب متفاهمين !! يعني مثل هاييل كيف بتتفاهم وياهم لول

و في حالتنا في اخر سفرة كنا تقريبا25 شخص
بدون مبالغة يالمزوحي اني اذا كنت جاهز للطلعه على الساعه 9،، يخلونا نطلع الساعة 11،،، ليييش؟
لأنك لازم تتريا فلان الي يوعونه و ما نش
و نحن كلنا راكبين في السيارة و فلانه تغسل ولدها
و نحن بعدنا نتريا و فلان قرر انه يستغل وقت الانتظار و يسير يشتريله فانتا من السوبرماركت و خلال وقت الانتظار تكون فلانه و ولدها رجعوا،، عشان يستعيلون الولد الي في السوبرماركت لازم اخوه يسير يزقره
و نتفاجأ انه هاك رد و هذا ساير يدوره و ما تلاقوا

كل يوووم هالفلم مع اختلاف الابطال و اختلاف المواقف لول


=======================


اخيرا حجزنا و استلمنا التذاكر
كنا حاجزين على اللوفتانزا و خذنا التذكره بسعر حلو لكن كانوا حاطيلنا شرط خلانا نكنسل،، لو ما سافرنا ما بيرجعون لنا فلس واحد من قيمة التذكرة،، لهالسبب غيرنا الطياره الى الاتحاد و الحمدلله حصلنا سعر زين


========================


انزين عندي سؤال للياه او اي حد ساير ميلانو..

ناوين نمر على ميلانو و ما اعرف حد سار ميلانو من قبل ..؟
شو الاماكن الانترستينق هناك،، علعموم نحن بنتم فيها ليلة وحده،، يعني نبغي الاماكن المهمه بس

[المزوحي]

ذنــيني .. في حد يقولك حلو تسافر مع مجموعة مب غاوي يوم تسير روحك ...

انا يوم اسافر ما احب التأخير، أحب استقل الوقت !!

ماحب الشخص اللي يعقد الأمور، ويتنرفز على كل شي، ما يمشي !

ربيعي حاجز تذاكر على أساس يسافر 1/7 والحينه يوم غير رايه وخلاهن 5/7 الاسعار تغيرت واضطر يدفع الفرق

لانه موسم الغلا من تاريخ 5/7 إلى 15/8 تقريبا

خذ فكره عن ميلانو

http://travel.maktoob.com/vb/travel165541/

[مايهزك ريح]

اقولك .. ناصر ميلانو ..
كل شي يبند فيها من 15- 7 لين 15-8 ..
واتأكد من السفاره .. لأني انا كنت بسير اسبوع وقالوا لي انها تبند في هالوقت ^_^

[ذنـيـنـي]

المزوحي الموقع رهييييييب بصراحه
شكلي بيلس فيه يلسة محترمه لول

[ذنـيـنـي]

هاااه !!

كيف يعني كل شي يبند فيها
غيـّر بدّل يا ريال قول كلام غير هذا

شو هااا الايطاليين مصخرتهم ثجيلة لول

[المزوحي]

كلام مايهزك ريح صح، انا قريت عن هالشي ... اول بادي عندهم موسم تنزيلات ومن عقبها يبندون

[مايهزك ريح]

هذا اللي قالولي اياه عشان جيه قلت اذا بسير يمكن اسير في العيد او شهر واحد .. ^_^

يقولك لأنه الجو حار .. اهل البلاد ياخذون اجازه في هالشهر ويطلعون برا .. مثلنا .. بس هم كل المحلات اتبند عشان جيه الفنادق اتكون رخيصه في هالوقت لأنه محد في المدينه اصلا !
لازم اذا بتسير ايكون عقب 15 - 8 او قبل 15 -7 .. >_<

[ذنـيـنـي]

توه كنت يالس اقرا عن المدينة

الفتره بين 15-7 و 15-8 تعتبر اجازة الايطاليين

بس مب كللللل شي يبند،، الاسواق الرئيسية اتم مفتوحه
و غير جي

اصلا ميلانو بالنسبه لنا تعتبر محطة استراحه بنبات فيها ليلة وحده بس

[شمعة أمل]

^
المحلات في ميلانو تبند لـشهر في الصيـف بس ماعرف متى بالضبط.. ف اتوقع هو نفس التاريخ الى مايهزك ريح حطاه..
وميلانو مافيها شي انترستينغ غير السوق.. شي منطقه وحده كلها محلات وفي النص شي كنـيسه ومن هناك تأكل الحمام .. وشي مكان حلوو كله في كافييهات ومحلات بس ماعرف شو اسمه بس هو في هالسكوييــر

يعني in general سوق وأكل ورقاد

[المزوحي]

انا باخذ اسبوعين إجازة ( بالنسبة لألمانيا - بنسير ميونيخ - يمكن نأجر سيارة ونسير المناطق المجاورة )

عندكم نصايح ؟؟

[مايهزك ريح]

احجز عن طريق بن عمير للسفريات .. اسعارهم اوكيه لميونخ ^_^

[المزوحي]

مايهزك ريح، نحن مفكرين ناخذ شقق فندقية ...

[نجمة دبي]

هلا والله

بعد اسبوع ان شاء الله بسافر ماليزيا >> شهر العسل ^.^

بخصوص تغيير العمله

شي 3 طرق .. وانتوا خبروني اي طريقه هي الاحسن

1- هل احول العمله الاماراتيه الي الماليزيه داخل الدوله؟
2- هل احول العمله الاماراتيه الى الدولار داخل الدوله , وفي ماليزيا احول الدولار الى العمله الماليزيه؟
3- هل احول العمله الاماراتيه الى الماليزيه في ماليزيا؟

شو رايكم؟ ^_^

[شوق القلوب]

السلام عليكم..

نجمه دبي.. اول شي مبروووووك..^_^

ممم.. في رايي لا اتشلون وياكم كاش وايد.. لانه الحين عادي بطايق البنوك تقدرين تسحبين منها في اي ATM في العالم.. صح ما اعرف اذا تخسرين وايد من هالسالفه.. بس لانه سبحان الله .. الواحد يزيغ يشل وياه مبالغ كبيره..خصه اذا استوت سرقه.. او نسيتي البوك او يضيع..

[نجمة دبي]

الله يبارك فيج الغاليه

وعقبالج ( اذا ما كنتي معرسه ^_^ )

انا قريت في احد المنتديات ..

ان لو حولنا بالدولار وعقب سرنا هناك وصرفناهم بيطلع اكثر خخخخخ

ويقولون ان الدرهم = 1 رنقت ماليزي

يعني مافي فرق

عسب جي قالوا حولوا الى الدولار

وبخصوص الـ atm

يمكن على كل سحب ياخذون نسبه .. ومادري كم النسبه هناك

!!

[مايهزك ريح]

الشقق الفندقيه احسن للعوائل..
وانا هالسنه جيه مسوي حق سويسرا ماخذ شقه فندقيه ..
لأنه نحنا تقريبا 8 اشخاص هالمره ..
فناقسمنا على شقتين .. وحده غرفتين وصالة ووحده استوديو !

[المزوحي]

ماشاء الله احس وايد ناس بيسافروون السنة .... حتى كذا عايلة ماتشد ساروا اوروبا وبيسيرون ومنهم ماسافروا

بالمره وبيسيرون كذلك شرق اسيا ... همم حلو ^_^

[ذنـيـنـي]

ما يهزك ريح
لول ياخي كل شي تقوله ينطبق على شخص اعرفه لوول

بس الفرق انه هاك اسمه غير لول
يا خوفي تطلع هو بس مغير اسمك p=

هالسنه الاهل ماخذين 10 ستوديوهات في سويسرا
و حصلوهن عقب ضراااااااابه، لأنه يقولك ناقع البكس على السكن في سويسرا و هم "ما شاء الله عليهم" مب شوي، 30 شخص سايرين ( اربع عوايل ) و الحمدلله اني مب وياهم لول


مايد ناوي تاجر سيارة هناك, ولا بتعتمدون على القطارات ؟

اليوم حجزنا سيارة و الدفع بيكون في وقت التسليم،، حجزنا سيات ليون "أو ما شابه"
طلعت علينا بـ 5600 درهم تقريبا لمدة 24 يوم،،

[المزوحي]

ذنــيني وايدين ( ماشاء الله ) اللي بيسافرون سويسرا - ألمانيا - ايطاليا - فرنسا هالدول الاوربية بالذات

نحن يوم سرنا سويسرا أجرنا موتر من عندهم وسلمنا الموتر في فرنسا ...

أكيد تأجير الموتر أوفر عن التاكسي،،، بس ماتحس 5600 وايد وإلا زين بالنسبة لــ 24 يوم ؟؟

وبالمرة كنت ابغي استفسر عن جنوب افريقيا ( جوهانسبيرغ ) حد زار هالبلاد ؟

[مايهزك ريح]

ناصر .. ليكون بعد عنده نفس موتري .. خخخخخخخ

عيل انا حصلت الشقتين بسهوله يمكن عشان نحنا عددنا اقل .. وبعد مكانهن جريب على البانهوف

.. انا السنه ناوي ااجر موتر .. حصلت فولكس واجن توران 7 ركاب ..بـ 6500 تقريبا وبستلمها من المطار .. والمدة 3 اسابيع ..

وبعد خذت GPS يديد فيه خارطة اوروبا وامريكا .. Nuvi 770 ..حق الرحله لأنه اللي عندي اخترب >_<

[المزوحي]

من يعرف سعر التذكرة من دبي - باريس على البزنس ؟؟؟
ومن دبي - زيوريخ على البزنس

[شمعة أمل]

على حسـب أي طيـاره
يعني الأمارات رفعو أسعارهم وايد.. سمعت انه تذكرت درجه سياحيـه في الامارات تيبلك تذكرة بزنس في الاتحاد

[المزوحي]

شمعة أمل بالتقريب يعني ..

أقصد هل توصل 14 ألف

زين والشي الثاني بالنسبة لويزة لندن صدق يسون بصمة العين في بوظبي وإلا الاجراءات ممكن نخلصها في مركز

برجمان ؟؟؟

[شمعة أمل]

توني جيّكت على موقعهم.. بزنس من دبي لين مطار هيثرو في لندن 18770 درهم.. واتوقع لازم تزيّد عليه ألف وشي حق التاكسس مال مطار

وماعرف شي عن الويزه.. لكن سالفة بصمة العيـن.. أول مره اسمع عنهاا :s أنا أعرف انه حق أمريكا لازم كل هالاشيـاء بس لندن ماظن

[المزوحي]

مشكورة شمعة أمل .. يعني الاسعار فعلا ارتفعت ومع هذا الكل يسافر ...

[شمعة أمل]

تقدرون تاخذون طيارات ثانيـه.. لانه حاليا الامارات أغلى شي.. بس في نفس الوقت.. هم أحسن شي من ناحية السرفسس

[المزوحي]

المخطط لدول اوربا مرور بدول شرق آسيا .. تصدقون ولا بلاد من هاييل بنسير

خططنا فشلت .. ظروف صارت والحينه استقرينا على دول عربية .. يالله أحس مب شي ..

وويمكن البلاد تكون حاره ...

حد سافر لبنان أو سوريا يخبرنا

[الـيـاه]

فعلا ً الاسعار زادت وزادت وايد بعد! احيد ابويه قال ان التذكرة الوحده حق لندن كانت بـ 21 ألف قبل فتره .. توه اجيك الموقع اشوفها وصلت 25 ألف وشي والبزنس 18 .. وعادي تزيد

المزوحي : لا تسير لبنان سمعت ان بتيهم مادري يتهم هزات ارضيه S: شي جي
وبعدين ما بتاخذ راحتك في بلاد اجواءها السياسية تعبانه

همم اذا تفكرون بدولة عربيه سيرو مصر .. حلوه وحيّه مع اني ماسرتها بس وايدين يمدحونها
والا المغرب (الرباط) .. المغرب واااااايددددد حلوه سرتها قبل 7 سنين لول

[المزوحي]

الياه لأنه متوفر لنا سكن هناك في اليبل ومنها نطلع على سوريا ويمكن تركيا

مصر مادري ليش ما احبها ( مع إني ماسرت لها بالمره )

[ذنـيـنـي]

تدرون انه تذكرة طيران الامارات من الامارات أغلى شي !!
و من كل دول العالم رخيصة


ربيعي و أهله بيسيرون لندن هالسنه على الفيرست كلاس
طلعت تذاكرهم مال 130 الف درهم تقريبا

شو سووا,, ساروا الهند و خذوا تذاكر من هناك طلعت عليهم بـ 100 الف
كيرلا - دبي - لندن - دبي


صدق قههههههههر
يعني حتى حق الاغراب الاسعار ارخص
و في البلاد الاسعار اغلى !!


في كل الحالات انا شخص مقاطع طيران الامارات، لأنه بالمختصر خايس تذاكرهم وااايد غالية مقابل الخدمة الي نحصلها منهم "انا اكلم عن الدرجة السياحية"

هالسنه حجزت على الاتحاد و تذاكرهم سعرها معقول مقارنه بالخدمة الي بنحصلها على طيارتهم

[المزوحي]

الامارات من أفضل الخطوط لكن يوم سافرت من سنتين عليها كانت خدمتهم مب شي، ومادري عاد لو الحين اعتدلوا

ومع هذا التذاكر غلت ... كل الاسعار ارتفعت عندنا، ومن ضمنها التذااكر وبشكل مبالغ ...

[شمعة أمل]

المزوحي مانصحك بلبنان.. خطر
من فتره احيد امي تقول واحد نعرفه سار لبنان ومادري شو استوى واضطرو بسـرعه يطلعونه من سوريـا
ليش ماتسيرون الاردن بدل لبنان.. احس حلوه

[المزوحي]

شمعة لأنه عندنا بيت في لبنان ( في اليبل ) يعني احتمال نسير سوريا ويمكن نمر بالسيارة على تركيا

ونخلي لبنان عند الرده ...

[ذنـيـنـي]

المزوحي

طيران الامارات سيئ سيئ سيئ سيئ سيئ سيئ
و بعد سيئ

لو ركبت طيارة البويينغ 777 بيكون اوكي

لكن للأسف 90% من طياراتهم ايرباص الخايسه



انا سرت المانيا على القطرية و على الامارات

بصراحه القطرية كانت افضل بواااااااااااااااايد صح انه الطيارة الي ركبناها مافيها تلفزيونات بس كم يسوى انه شي مساحه تروم تمد فيها ريولك

في طيران الامارات مخلين المسافات ضييييييييييجه
اظني مصممين الطيارة للأطفال بعمر 10 سنوات لوول

[المزوحي]

ذنيني ما احب ادفع وما احصل خدمات في اشي كان .........

بالنسبة لرحلتكم بتنزلون في فرانكفورت أول بادي، على طول بتسيرون ميونخ وإلا ناوين اتمون فيها ؟؟؟

[ذنـيـنـي]

بنبات ليلة في فرانكفورت و ثاني يوم الظهر بنسير ميونيخ

[المزوحي]

هيه زين، لأني سمعت إنه مافيها شي يستاهل ...

الله يوفقكم

[قصايد غلا]

المزوحي : مصر تلوّع بالجبــــــــد :shutup:

[شمعة أمل]

المزوحي
لو انا في مكانكم مابسـير :s حتى لو عندكم بيت هناك.. تكونون في أمان أهم من انه تسيرون بلاد عندكم بيت فيه


ذنيني
لهــــالدرجه ماتحب طيران الامارات =s صدقني هم أحسـن عن غيـرهم.. يعني حتى وهم رافعيـن الاسعار.. ماتقدر تحصل كرسي من كثر الزحمه

[حلم الطفوله]

انا من استويت ما أحب أسافر على طيران الامارات ...بس حكم القوي على الضعيف

وجربنا الطيران السنغافوري طلع أرحمممممممممم بليار مره وخدمتهم رهيبه

وجربت بعد الاتحاد ....بس طيارة السيره أحسن عن طيارة الرده على قولة الوالده ...

أف أف شو هالأسعار!!! متأكدين إنكم تتكلمون عن تذاكر سفر وإلا تذاكر ماركه ؟؟؟

[شمعة أمل]

ههههههه p;
حلم اذا بتسـيرين الهند شليني وياااااااااج 3>

[صريح]

يا زينهن صلاله و خصب و الذيد
:4:

[حلم الطفوله]

أفا عليج يا شمعتي .... زهبي الشنطه من اليوم ...

[وحي القلم]

أنا أشوف أنه خدمات طيران الامارات وايد أحسن عن الباقين

بس المشكله أسعارهم :shutup:

.
.

حلم الطفوله.. لا تيبين هالطاري عن تستوي السالفه صدق .. هذا اللى ناقص :boxed:

عاده عقب بيطيح سوق طيران الامارات :k_harhar1:

[مايهزك ريح]

انا دايما على حظي ولله الحمد اتكون طياره 777 ..
وما جد جربت الإيرباص إلا مره وحده .. في رحلة سنغافورة *اعتقد* ..

[شوق القلوب]

السلام عليكم..



طيـــران الامارات اهتمامهم و خدماتهم كلها منصبه على الدرجه الاولى... اما السياحيه فمن اسوأ ما يكون..

..

حالياً لو خيروني بسير على الاتحاد.. لانها احسن ..

و القطريه جربتها من جريب.. كانت وايد زينه.. وفيها تلفزيونات لكل شخص..

..

[الـيـاه]

المشكله ان البدائل كلها أرف .. الاتحاد فبوظبي ومطار بوظبي لوعة جبد يقولون وبعيد
برتش ايرويز مهمليييين وايد جبرتهم ويضيعون الاغراض .. virgin atlantic مب مال عايله مال هني مون لول لانه سعرها دبل الامارات بس ماركبت طياره احلى عنها ..

فـ من بين الخيارات اللي عنا اشوف الامارات احسن شي .. والسيرفس مالهم واااايد زين يدلعوني لول

[حلم الطفوله]

الياه ... بالعكس مطار بوظبي أحلى ما فيه إنج تدخلينه وتشوفين عمرج جدام بوابة الطياره بربع ساعه

بس السفر بمطار دبي غييييييييييييييييير !!!

[الـيـاه]

^

هههه ترا هذا هو .. احب المطار وايد

[المزوحي]

ابغي اصرف دولارات، كم اصرف في البلاد ؟؟؟ والشي الثاني كم ياخذون نسبة على السحب بالبطاقة برع

[مايهزك ريح]

اصرف في الأنصاري .. او
uae exchange
..(3.68)..تقريبا
وكم على حسب حاجتك ..
وكم يظربون على البطاقه .. اعتقد 20 او 30 درهم على كل سحبه وعلى حسب البنك اللي تتعامل وياه .. !
اسأل البنك ..بعد احسن !

[مايهزك ريح]

حد متعامل ويا الطيران السويسري ..
وشو رايكم فيه !

[المزوحي]

مشكور مايهزك ريح، عطيت واحد يصرف لي من البنك وللحين ماعرفت الرييت اللي يعطونه في البنك ..

[شمعة أمل]

أنـا جربت السويسـري مره.. انه سرنا من جنيـف ليـن لندن
ف سرنا على طيـاره صغيره .. حسيت انه خسرنا بيزاتنا على الفاضي.. لانه الطياره بس فيها بزنس وسياحي.. والصراحه موووول ماشي فرق
السرفس عادي basic طياره وايد سمبل وخدمات بسيطه جداً .. هذا كله طبعا لانه رحلتنا سريعه قم بو ساعه مادري ساعتيـن.. ف حسيـتها تنفع .. نفس اللوفثانزاا.. بس اذا سرت مره ثانيـه احس بسيـر سياحيـه لانه نفس الشي بالضبط بس الفرق في وزن الشنط الى تروم تاخذها
بس اذا رحلتكم طويـله ماعرف

[مايهزك ريح]

المزوحي .. البنك اعتقد انه الريت فيه اعلى من اي مكان .. عشان جيه انا ما اصرف عندهم >_<"


مرحبا شمعة أمل .. تقريبا عندي وياهم اذا ظبط يعني بتكون رحلتين طوال .. وحده 6 ساعات والثانيه 9 ساعات !
يا رب اتكون اوكيه ..وما اتبهدل ..دا انا مش ..وش بهدله ^_^

[شمعة أمل]

9 ساعات! ويييه الله يعييينك.. آخر مره يوم سرت لندن خذ منا 8 ساعات عشان نوصل حسيـت اني خلاص بنفجـر لول.. لاني ماروم اكون في اماكن ضيجه لـ فترات طويـله xD عشان جي دوم ايلسووني عند الدريشه

[مايهزك ريح]

انا طالب window seat ولا بموت من الضيج .. ^_^!!

[الـيـاه]

مايهزك ريح : الله يعينك
جربت السويسريه في 2005 .. كئييييبه الطياره >.< صح الكراسي وسيعه بس مادري كئيبه S:

[مايهزك ريح]

شكلي بتم ويا طيران الإمارات .. ما رمت اغير الحجز >_<

[عفاريتووو]

حد سار صوب اخن و كولن و دوسلدورف في المانيا
طبيعتهم حلوة ولا سويسرا احلى ؟

مادري محتارين نسير هالاماكن ولا سويسرا ..

[شمعة أمل]

أنا مول ماداني ألمانيا>_<
سيرو المكان الى ولا مره سرتوله.. بتستانسون اكثر

[المزوحي]

عفاريتو سيروا ألمانيا وسويسرا

[المزوحي]

مايهزك ريح صرفت دولارات طلعن 1360 دولار مقابل 4998 درهم (3.675)

[مايهزك ريح]

صح الصرف .. انا عطيتك التقريبي .. ^_^!!