يداً بيد ... يا إماراتي

[أمطار]

السلام عليكم ورحمة الله وبركاته


قريت موضوع المزوحي عن غلاء الأسعار..
تكلمت ويا ربيعاتي وويا أهلي وويا كل حد عن غلاء الأسعار. . .!


وكل ذرة احساس فيني كانت تنتفض "غيض" وضيق،، ليــــش هالأستغلال صاير؟!
حتى في الدول الثانية يزيدون الأسعار إذا عرفوا إننا من الإمارات ..


لما كنت في السعودية .. وسرت اشتري هدايا للأهل من مكه .. حاسبت بس حسيت انه الأسعار اللي قالي عنهم البياع موول مش معقوله .. قلت له غااالي ...قال لي البياع وبالحرف الواحد "أنته اماراتي.. فلوس زيادة"...


اختي كانت في الكويت.. واشترت شي.. بعدين عقب ما دفعت سألها البياع قال لها انتي من وين.. قالت له من الأمارات .. قال لها اووووووووف لييييييش ما يخبر قبل !!! انته عنك فلوس زيااااده .. انا فكّرت انته من سعوديه ...


معقوله؟!


انزين الحمدلله .. خير زايد الله يرحمه وصلنا ووصل بلاد برع بعد... ليش الناس كلهم حاطين عيونهم عليناا؟!



زايد الله يرحمه ما قصر فينا.. ولا شيوخنا قصروا فينا ..
بس هل يعني هذا ان كل من هب ودب من الخارجية يحط عينه علينا ويقول هذيلا فلوسهم ما تخلص؟!



يا عااااالم.. فيه ناس لها دخل محدود..
ويالله يالله يكفيهم معاشهم او راتب التقاعد لنهاية الشهر . . .!


ليش كل ما بغا اي خارجي يبدا تجارته .. يبداها في الإمارات ويستغل انه ما فيها رقابه ع الأسعار؟!؟!؟


حتى يوم ايدرسونا في البزنس وعن المشاريع..
قال لنا الدكتور.. الإمارات الدولة الوحيدة اللي تسير لمحل وتلقى سلعه مثلا ً بـ 150 درهم .. وبعدين تسير لمحل ثاني اونه "اكشخ" وتلقى نفس السلعه بالضبط بـ 1000 درهم.. !



المهم، وصلني ع الأيميل هالنداء .. وحبيت اني اشارككم فيه..


. . . . . . . . . . . . .




الكل يقاطع الوافد قبل المواطن


http://by104w.bay104.mail.live.com/mail/SafeRedirect.aspx?hm__tg=http://65.54.175.249/att/GetAttachment.aspx&hm__qs=file%3d746ad336-a847-4842-99ed-efb6f1cdae76.gif%26ct%3daW1hZ2UvZ2lm%26name%3daW1h Z2UwMDEuZ2lm%26inline%3d1%26rfc%3d0%26empty%3dFals e%26imgsrc%3dcid%253aimage001.gif%254001C826B1.B91 09E00&oneredir=1&ip=10.1.106.201&d=d2846&mf=0








قاطع يا إماراتي ؟! لنفرض نفسنا ضد الجشع ..

ونقولها كلمة واحدة .. كلنا لأجل الإمارات ..
كلنا لأجل أن يعيش أبناءنا بعزة .. بعيداً عن مزايدات الأجانب و تسلطهم ..


قاطع يا إماراتي .. لأجل الوطن .. ولأجل إثبات الذات ..





للمساهمة في أكبر تظاهر ضد غلاء المعيشة ستتم مقاطعة كل مما يلي :


1. محطات البترول يوم 29 نوفمبر


2. الجمعيات يوم 29-30 نوفمبر


3. كارفور يومي 1-2 ديسمبر


مساهمتك تعني الكثير في اعادة النظر في أسعار مواد الغذاء والبترول والذي يعد أهم أسباب الغلاء




معاً ضد غلاء الأسعار وجشع التجار


لاترفع الأسعار فالبديل في الإنتظار





انشرها



http://by104w.bay104.mail.live.com/mail/SafeRedirect.aspx?hm__tg=http://65.54.175.249/att/GetAttachment.aspx&hm__qs=file%3d2e23beff-d9b9-4c70-bf75-89d28301e6dc.gif%26ct%3daW1hZ2UvZ2lm%26name%3daW1h Z2UwMDIuZ2lm%26inline%3d1%26rfc%3d0%26empty%3dFals e%26imgsrc%3dcid%253aimage002.gif%254001C826B1.B91 09E00&oneredir=1&ip=10.1.106.201&d=d2846&mf=0






خلونا يداً بيد ونوقف هالأستغلال ..

[حلم الطفوله]

السلام عليكم ورحمة الله وبركاته


هيه والله يا أمطار !

الدنيا مستويه ضو ! ومحد حاس بهالواقع غير محدودي الدخل !

خير بلادنا وصل للقريب والبعيد ولله الحمد ....ودومها بلادنا أياديها بيضا للقاصي والداني

بس الاستغلال إلي نشوفه ما ينسكت عنه ! :fa55:

إنت إماراتي ....يعني ادفع زياده ! :vertag:

أذكر مره كنت بتركيا وتحديدا بالسوق المصري ! كان البياع التركي يسألني إنتي من وين !

ولما عرف قال : إمارات ! يعني بير بترول تحت كل بيت ! وجان يزيد بالسعر:boxed:

افتخارنا ببلادنا .... نابع من افتخارنا بزايد وشيوخنا..... بس مب معناته يستغلونا !

أبشركم زادونا 70% ..... الله يستر من باجر :k_icon9:


أمطار كلنا وياج أكيد !

وطني انا ...........انا وطني :fa42:

[مايهزك ريح]

كيف يقاطعون اذا في هالأيام ينزل الراتب والناس اتسير تتشرى من الجمعيات وغيرهن مير للبيت .. !!!!! :10:
تتوقعون انه حد بيقاطع ولا .. :smile2:
انا عن نفسي اصلا ما اسير في هالأيام كارفور او الجمعيه او غيره .. :4:
لأني ما اداني الزحمة .. :3:
انا دايما اشتري في نص الشهر عكس الناس .. :whistling:
عشان اتفادى الزحمة .. :fa46:
واوقات مثل الصبح اول ما يفتحون عشان امشي على راحتي .. :fa42:
واشوف شو اليديد .. :14:
في الزحمة الواحد ما يشوف وين ايحط ريله .. عن ايدوس حد خخخخخ :bash:

[حلم الطفوله]

جان أفكر أكثر !

هل كيف بنقاطع البترول؟

شباب بدون سياره كشارع بدون رادارات ! أمحق تشبيه :)

[مايهزك ريح]

لا وازيدج من الشعر بيت .. وقت المقاطعه وقت اجازه ورحلات ..

[راعي الزعـامه]

الاشياء اللي تبون اتقاطعونها اشياء مانروم نستغني عنها

يعني مافي فايده من النداء للمقاطعه ،، والله يعينا على كل شي

[خطايــا]

جان أفكر أكثر !

هل كيف بنقاطع البترول؟

شباب بدون سياره كشارع بدون رادارات ! أمحق تشبيه :)


خبرت اخويه عن سالفه المقاطعه قالي اوكي مب مشكله اليوم اللي قبل الكل بيترس تانكيين يعني نفس الشي تراهم مستربحيين جي

[دمعة شوق]

أنـا بعـرف دخـل الدولـة اللي كثـره ويـن يـروح ؟؟
يغـدون ويعشـون فيه الأمريكـان في العـراق ؟
؛
وجذب اذا قالـوا كـل مواطـن مرتـاح وسـاديـن حـايـتـه
جـذب فـي جـذب
نــاس مواطنـيـن فـاتـورة الكهرباء مايرومون يدفعونهــا
وروحـة الجمعيـة مايرومولـهـا .!!!!
حتـى فضـيحــة
؛
يـاخـي يقهروني يوم يرمسون اونه مادل في سنة كم مستحـيل مواطـن يسكـن في شـقـة ؟؟؟
ع منوه يقصون ؟؟
خلهم يشوفون أوضاع الناس قبل
×

السموحه منج يـا أمـطـار بس والله منقهرة يوم سمعت وشفت هالنـاس
الله يعينهـم ويصبرهم ويفرج عنهم

[عمة العيم]

الحمد لله من 27 نوفمبر لين 2 ديسمبر انا مسافره خخخخ

الله يعين

لا تقولون انكم من الامارات قولوا نحن من جنوب افريقيا (خخخخخ)

اصلا منو قال تحت كل بيت في بير بترول......اصلا بترولنا = جريب بيخلص مافيه شي وكله لمنو؟ لـ امريكا..


شو بنسوي يعني الله يرحم هييج الايام بس

الله يرحمك يا زايد

...
...

[أمطار]

صباحكم ودّ . . .!

حبايبي .. القصد الأول والأخير من المقاطعة مش انه نسبب لهم خساره!
بالعكس الكل بيشحن السياره بترول ويوم واحد ما يضر .. صح؟!

لكن ع الأقل بتكونون بيّنتوا وجهة نظركم..
وأن الغلاء اللي ما له داعي مش عايبنكم ولا عايبنكم الوضع !

الجمعيات قبله بيوم او يومين سيروا اشتروا ..
كارفور نفس الشي ..
محطات البترول .. سيروا اترسوا سياراتكو بترول .. محد قال لا..

بس ع الأقل هالأيام تبينون وجهة نظركم
هل نقدر نستغني عن البترول؟ طبعاً لا
هل نقدر نستغنى عن الجمعيات وكارفور؟ بعد لا

اتمنى اني اكون بيّنت وجهة نظري

وعن نفسي..
كارفور مش دوم اسير له ولا الجمعيات
ولا عندي سياره عسب اقاطع !

..

[الجنيه]

للأسف خيرنا لغيرنا وهالسبب الي جذب أنظار العالم لنا وخلاهم يعتقدون ان كل مواطن تحت بيته بير بترول *_*

الله يطول بعمار الشيوخ ويخليهم لنا يمكن هم يسون شي ك فعل خير لكنه ينجلب علينا لان الناس اتشوف الظاهر يشوفون الملايين والبلايين الي تتبرع بها الامارات لكل من صابته مصيبه ونمد يد العون للكل سواء بالمال او بغيره وهالشي يخليهم يقولون مدام عندهم يساعدون الغرب اكيد هم مش محتاجين وعندهم خير يسدهم و يزيد لكن واقعنا مؤلم واااااااااااااااااايد

الله المستعان

[ملاك الروووح]

::

المفروض انكون على قلب واحد ..

ونوقف ضد هالغلاء الفاحش في المعيشه !

بصراحه الوضع تعدى حدود المعقول ..!


يزيدون في الرواتب .. ومن الصوب الثاني ..

يزيدون أسعار المواد الغذائيه وأسعار البترول ..

شو الفايده يعني !!


المواطن كاسرين ظهره ..

والأجنبي عايش معزز مكرم في بلادنا ..

ياكل من خيرها ..

وعادي يعطونهم الحين .. بدل سالك وبدل بترول ..

يوم انهم عطوهم ( بدل جلب ) أتوقع أي شي !


المهم نرجع لمحور حديثنا ..

نحن ما ندعو للشغب أو شي ..

بس مجرد مقاطعه .. تبين وجهة نظرنا ..

وصدقوني انهم بيخسرون وايد ..

خاصه الجمعيات .. وكارفور .. واللي عادي في اليوم يدخلون جريب المليون !

لو كل واحد قاطعم ف هالأيام .. صدقوني بيعيدون يمكن التفكير ف هالأسعار

وفي اللي يسوونه !


الله يرحم أيام الشيخ زايد ( الله يرحمه )

كنا عايشين ف خير ونعمه الحمدلله .. وبعدنا عايشين ..

بس الوضع وايد صاير صعب ..

والواحد يا دوب راتبه يكفيه لين آخر الشهر !!

هذا غير الايجارات اللي ضاربه أسعارها ..

المواطن صار ما يقدر يعرس .. عشان مب ملاقي شقه سعرها معقول ..

ييلس فيها !!


الله المستعان !!:3:



تسلمين حبيبتي على موضوعج ..

وان شاء الله بنقاطعهم ..

ويارب اتييب نتيجه هالمقاطعه !

:fa56:

[ايه احبك]

انا وياكم وياكم
اكيد بقاطعهم تقطيع بعد
XD
لنه ما يخصني بسوالف البيت هيهيهي XD
ولا عندي سياره هوهوهوهو XD

لحظو الضحكه XD
لا صدق لازم انقاطع ولا انقول هاليوم جي ولا هاليوم جي الي بيشتري يشتري قبل بس في هاليوم لا
عشان ما يترولهم انه نحن شعب غني وما يعارض اي زايده في المنتجات الي يسونها
حشه التضخم بينفجر عندنا بسبت زايدة الأسعار XP

[بنت الدلع]

كلامكم وايد يعور القلب الصراحه
فعلا الأسعار يالسه ترتفع بشكل غير معقوول
شي ناس مب قادرين ياكلون كيف بيقدرون يعيشون ويأمنون مستقبل عيالهم

وانا الصراحه وياكم على هذي المقاطعه
وان شاء الله اتيب فايده

[حلم الطفوله]

بصراحه الأسعار صايره نار ونحنا بعدنا ما شمينا ريحة لزياده !

حتى سوق اليمعه !!!

[أمطار]

تخيّلوا .. من كمن يوم كانت ختيه في السوق ..
ويا في خاطرها سندويج شاورما .. وخذت لها وحده تخيّلوا شو قال لها راعي المطعم؟!

اون الشندويجه الوحده بـ 6 دراهم ..
زادوا رواتبكم!!!

آخ يالقهر!

..

الله يطوّل عمر رئيس الدولة وحكّام الإمارات
زادوا رواتبنا عسب نقدر نساير الأسعار ونقدر نشتري مثل العالم..
قاموا يزيدون الأسعار .. اون لأن الرواتب زادت!!

بصراحه مصخت السالفة
يبالنا نرفع صوتنا ونوصّل هالكلام لـ فووووووق ...

وين وزيرة الأقتصاد عن اللعب اللي صاير في البلاد؟!؟!؟

[ولد الشحوح]

مبروك عليكم زيادة البترول الياية الله يستر ...

[الجنيه]

حلم الطفوله

ههه صدقج الويكند الي طاف سرنا جدا الفجيره وطبعا ما يصير نخطف عن سوق الجمعه بليا غنايم اقولج البياعين مستوين شو بقول :k_icon28: حشا ما تقدرين ترمسين كلمه والثانيه قالج راتب سوي زياده فلوس زياده مافي مشكل عشرين درهم زياده قاهريييييييييييييييييييين ي

[مجموعة إنسان]

وزيرة الإقتصاد تسأل عنا تفكرون !!

أمس يوم طلعت زيادة الجيش ,, أخوي كان يبي ياخذ بيت في مجمع سكني في بوظبي ..
قبل كان سعر البيت مليون و 20 الف
الحين استوى مليون و80 ألف

هلا كيييييييييييف !!!


لالا
المشكله الثانية
المس الصبح الدكاكين ماعندهم بيض
لان زايدين سعره درهمين !!

[مزن هتان]

الله يستر... من باجر

[مايهزك ريح]

انا اقول لو نقتصد وما نشتري إلا الضروري ونأدبهم يكون احسن .. اسميهم بيخسرون .. بس منو بيطبق .. !!!!!!!

[شوق القلوب]

السلام عليكم..


المشكله انه في فئه كبيييييييييييره من المجتمع مستحيل تقدر تقتصد في مشاريها.. لانه ( وخصه اغراض السوبرماركت ) من الاشياء الضروريه اللي محد يقدر يستغني عنها... يعني حتى لو زادوا السعر 100% .. بعد الناس بتضطر تشتري.. شو بيسوون..

بيستوي المعاش الا حق الاكل..!

..


ليش الحكومه ساكته ..!

[حلم الطفوله]

بصراحه فضيعيييييييييييييييييييين !!

توني راده من عند الخياط ! أسميييييييييييييييه زايد أسعار المخاوير !

ويوم هزبته قالي ...إنتوووو واااايد يعصب بعدين يدفع !!

[ألم ترى]

بسم الله الرحمن الرحيم ..

يعني الحين الجماعه ما يعرفون شيء عن الأرف اللي نحن فيه :k_icon9:؟ ..

اليوم رحت لـ محل الخواتم وقلت له ابي هالخاتم فعطاني سعره وانا قلت له وايد غالي ! ..

قالي مافي مشكله انا بينزل خمس درهم بس ..

قلت له شو خمس ؟ بعد نزل خمس ولا ما اباه ..

قالي اللحين خمس شو في فرق :whistling: ؟ ..

صدقوني إني كليته اكل وحطيت عليه حط لين ماقال خلاص خلاص ارباب مافي زعلان ! ..

طبعآ هذا الصبح ..

وامس بعد صلاة العشاء رحت مع اربيعي لـ سوق الخضره لئن الأخ متوحم ع اجار الوالده ..

ولازم نشتري لومي لجل العيوز اتشد حيلها لووول ! ..

المهم اول ماوصلت قلت لهم تراني ما اشتغل ف الشرطة ولا الجيش انا اشتغل ف البلدية :birgits_giggle: ! ..

عاد هنه الهندي صاوخ وقالي شو يريد ارباب ؟ ..

اقول فبالي ارباب مايبي غير اتراعونه ف الحساب هههه ..

المهم عطاني احس لومي ف رأس الخيمة كلها ورخيص بعد لئن فايدته ربيتين بس ..

صح هي جذبه لكنهم ذبحونا الصراحه :fa52: ..

اما عن زيادة الرواتب وزيادة الأسعار ف السالفه فيها إنى و خواتها ! ..

شكرآ ع الطرح ..

[صدى الأحزان]

السلام عليكم
الله يستر من اللي ياي

اكيد الكل عرف وسمع قصة ام احمد (المطلقه ) كانت تشتكي من غلا الاسعار وانها دخلها ما يكفي لمدة اسبوع وعندها بنتين وطلعت بنتها من الجامعه بسبت العجز المادي
لدرجة انه بنتها اللي في الثانويه تاخذ معاها بس درهم

وين فلوووس زيااااده اللي يتكلمون عنها الناس
ترى هناك ناس دخلهم محدود الله يعينهم الصراحه والله يعورون القلب

[مايهزك ريح]

شوق القلوب ..

انا يوم اسير الجمعيه اشوف انه في ناس يشترون اللي يبونه واللي ما يبونه ..
عشان جيه قلت لازم اقترح هالإقتراح ..
والواحد لازم يوم ايي يشتري شي يفكر ابعقل هل احتاجه يعني ضروري ولا لأ ..
في مثل اجنبي يقول ..
" Buy what you need not what you want "

[حلم الطفوله]

مشكله الحريم !!

يعني مهما الانسان بيجرب إنه يقتصد أو يشتري إلي يبغيه بس ....ما يقدر ! مب خقه لا سمح الله

بالجمعيه مثلا .... أدخل بشتري شيء معين ! أطلع بعربانه شو كبرها ؟

ومن جانب ثاني ...الأسر الكبيرة واحتياجاتها ما تساعد الانسان يقتصد ....لأنه احتياجاتها الأساسيه وايد !

نحن نبغي حل جذري للغلاء .... لأنه الاستغلال صار لا يطاق !

مهما قلنا بنقتصد الغلاء ما يشجع ...

صدى الأحزان ....قريت قصتها بجريدة الاتحاد اليوم ! بس والله هناك حالات كثيره بواقعنا بس التعفف يمنعهم من الاعتراف

[الملهم]

انا سمعت في البث المباشر ان نحنا انروم نشتكي على المحل اللي يزود اسعار بضاعته ..
في رقم تلفون الخط الساخن بس ما اتذكر شو الرقم ..
هو في الدايرة الاقتصادية .. ممكن تتصلون بالدايرة الاقتصادية وهم بيقولونكم ..

نذكر اسم البضاعة واسم المحل ..
وكم كان قبل والحين كم سعره ..

بس ان شاء الله ها الشيء يكون مفيد ..
الله يعين .. شكلي بعيش ويا اهلي حتى عقب ما اعرس ..

[راعي الزعـامه]

باجر بنقاطع المحطات الكل يفول موتره اليوم :)

[الجنيه]

راعي الزعـامه

ذكرك الله بالشهاده *_* كنت ناسيه عيل اليوم الساعه 11 ونص هجوم ع المحطات وتفويل للمواتر *_*

والاهل ناوين ع رحلة اونه ههه بترول ماشي

[مايهزك ريح]

البارحه فولت موتري لأني تذكرت المقاطعه ..
والجمعيه وكارفور ..اصلا ماسير اشتري عندهم اول الشهر عشان الزحمة .. فهذا ما بنساه ..

[راعي الزعـامه]

الموتر فيه نص تانكي ان شاء الله يكفي لاخر اليوم

[خطايــا]

انا سمعت في البث المباشر ان نحنا انروم نشتكي على المحل اللي يزود اسعار بضاعته ..
في رقم تلفون الخط الساخن بس ما اتذكر شو الرقم ..
هو في الدايرة الاقتصادية .. ممكن تتصلون بالدايرة الاقتصادية وهم بيقولونكم ..

نذكر اسم البضاعة واسم المحل ..
وكم كان قبل والحين كم سعره ..

بس ان شاء الله ها الشيء يكون مفيد ..
الله يعين .. شكلي بعيش ويا اهلي حتى عقب ما اعرس ..


رقم الخط الساخم في وزارة الاقتصاد ...

600522225