ساعوني بإتخاذ قراري وبكون شاكره

[حنين دبي]

السلام عليكم ....
اخواني وخواتي ما بطول عليكم وايد اعرف الكل مشغول بس حبيت استشيركم بموضوع ....
انا اشتغل من سبع سنوات بدائره حكوميه والحمدالله مرتاحه وانجزت بعض الامور من خلال شغلي وشاركت بوايد اشياء منها فعاليات ومؤتمرات وبعد بالتنظيم للاعراس الجماعيه وكنت اداريه بلجنه الانتخابات بالنسبه لإمارتي بس لين احين عندي هدف وحلم خاطري احققه اني اصير اعلاميه مشهوره واشتغل بالتلفزيون واشارك بأمور وايده مع العلم انه تخصصي علم نفس واداوم بقسم العلاقات العامه يعني ما يخص التخصص
والحين مصره اني استقيل واحاول اخطي الخطوه الاولى بس متردده وبصراحه هالشي وايد شاغل بالي
علشان جيه حابه تساعدوني بقراري وتحمسوني وبكون ممتنه لكم واذا في حد يقدر يساعدني اتمنى يرد علي....
ها شو رايكم .....

[كـلـكـلـووش]

حلو ان الانسان يكون عنده طموح .. بس الاحلى ان يحقق طموحه من دون تسرع ..

انا من رايي لا تستقيلين لين ما تضمنين المكان اللي بتسيرين له من بعد الاستقاله .. اول شي خططي وين بتسيرين .. و هل المكان القادم يناسب طموحج .. و هل بتحصلين اشيا افضل .. و هل بيوصلج للشهره مثل ما تبغيين و لا لأ ..

كل شخص عنده طموح و بخاطره يحققه .. لكن اللي يخطط كيف يحقق هالطموح و يشتغل عليه بيحققه ان شاء الله ..

فكري اكثر بالموضوع و لا تستعيلين ..

و شي ثاني .. صلي استخاره .. و ربج بيدلج على المكان اللي فيه خير لج ..

هذا رأيي و السموحه

ســلام

[حنين دبي]

اشكرك اخوي عالمرور... وانشالله بسوي بنصيحتك ....
تسلم

[ألم ترى]

بسم الله الرحمن الرحيم ..

الحل هي صلاة الأستخاره إن شاء الرحمن ! ..

من الله اطلب بأن تتوفقين ف حياتج ..

والمعذره ياختي ..

[محد يستاهل]

انا من راي ألم ترى هذا انســب حل ؟؟

[حنين دبي]

ثااااااااااااااااانكس عالمرور وتسلمووووووووون

[الجنيه]

السلام عليكم ورحمة الله وبركاته ...

حبوبه اول بادي عيلج بصلاة الاستخاره ... ومثل ما قال ذنيني وايد مهم تضمنين نفسج بالمكان الثاني يعني لا تستقيلين لين تلقين عرض حلو بالمكان الي يناسبج و ان شاءالله موفقه *_*

نتريا الاخبار الحلوه

[جواهر]

تسمحيليه أسألج كم من سؤال

:h_waa:

ليش تبين تكونين اعلامية مشهورة ؟

عشان شو ؟

و بعد ما تصيرين مشهورة شو بيصير ؟

وكيف تبين تخدمين المشاهد, من اي ناحية , شو القضايا اللي تبين تتناولينها؟

و لأي درجة تبين تساهمين ؟


و سلامتج

[حنين دبي]

اول البادي اشكرج اختي عالمرووووور.... ثاني شي بجاوبج على كل اسئلتج... مب المقصود اني اكون مشهوره وبس انا الحمدالله مشهوره على مستوى امارتي وماسكه قسم العلاقات العامة بدائره حكوميه مهمه ومرت علي وايد امور واديتها على اكمل ويه ومن خلال شغلي وصلت وتعرفت على ناس وايد مهميين بالمجتمع ينذكرووون بالخير بس انا حابه اشتغل بمجال اقدر اساعد فيه اكبر شريحه بالمجتمع والكل اصير يدعيلي ويذكرني بالخير والقضايا الي حابه اتناولها طبعا الاجتماعية الي ممكن تخدم الناس يعني خاطري اقدم برنامج يخدم الناس المحتاجه مثل (قريب المنال)إلي يقدمه علي الرميثي او اي برنامج ممكن يضيف معلومه يديدة حق الناس يستفيدون منها اووايد مواضيع ممكن نطرحها ونتناقش فيها يعني قضايا قابلة للطرح والحوار الجدي.....اتمنى اكون جاوبتج
وسلامتج...

[جواهر]

اشكرج عالرد

::

انتي ممكن تسوين هالشي من غير ما تكونين اعلاميه " و مشهورة "

و تسوينه لله .. و الكل بيدعيلج " في السر و العلن "

^_^

اعتقد وضيفتج الحين احسن لج " هذا رايي "

بقولج اياها بصراحه .. اللي تبين تسوينه شي مب جديد عالساحه .. وموجود حاليا

و لين ما تستوين مشهورة يبغيلج مب اقل من 4 -5 سنوات واكثر ,

و بعدين شهادتج علم نفس

لازم تدرسين اعلام ..

R U willing to do so

?

و لا بتمشين اوراقج بشهادتج هذي ؟

^_*

يعني يبالها خطه وتحظير و بعدين تباشرين التنفيذ


***

انا بصراحه ما احبذ عمل المرأة في مجال الاعلام

انا انسانه عندها عصبيه للدين و للعادات و التقاليد

و السموحه اذا اني ازعجتج بردي هذا




و سلامتهم

[حنين دبي]

اختي جواهر الانسان الي يبي يوصل لشي عمره ما يصيبه اليأس لو حاول سنه وسنتين وعشر وانا مثل ما قتلج طموحه وايد ونسيت اخبرج اني قاعده اخذ دبلوم في الاعلام واعتقد البنت قادره حاليا تفرض احترامها بأي مجال ممكن تكون فيه والخبره غير الشهاده وانا خبرتي كبيره بها المجال غير مجال شغلي الي قاعده ولله الحمد اشتغل فيها وكل انسان وطريقه تفكيره.....
وسلامتهم

[قلوب دبي]

عليكم السلام ورحمه الله

الوظيفه الحاليه اللي تشغلينها ماشاء الله عليج قدرتي تثبتين وجودج فيها قدمتي خدمات وما زلتي اتقدمين الخدمات الطيبه في مجال وظيفتج و في حدود امارتج ويمكن تقدرين تظهرين عالساحه العامه في اطار الدولة ..

وبنظري انه كل انسان يأدي اي وظيفه كانت وفي اي مستوى كان سائق حافلة والا مدير عام فهو يخدم المجتمع ، والاعلام شيء جيد ومن خلال قراءتي للحوار وللموضوع اضم صوتي للاخت جواهر في تعقيبها ، من ناحيه الطموح اللي عندج وايد وايد طيب و لو تستغلينه في اطار مجال وظيفتج الحاليه بيكون افضل و احلى و التغيير الوظيفي بعد خدمه طال هالسنوات اللي قضيتيها عندهم ما اظن انه بيكون الامر بسيط و سهل عليج و ثاني شيء المدير اليديد والادارة اليديده ما بتعير اي اهتمام بالفتره السابقه لمجال وظيفتج لانها مختلفه تماما عن الطابع والمجال اليديد اللي بتروحيله ..

خدمه المجتمع يمكن تصقليها في تقديم الكثير من المساهمات وكونج في دائرتج تعملين في العلاقات العامه بامكانج عمل شراكات عمل منظمه ومدعومه من جهات كثيره مع مختلف الدوائر الحكوميه وشبه الحكوميه في الاماره و جهة ثانيه بامكانج انه تكسبين الكثير من جراء تقديم المساعدات والخدمات الانسانيه والاجتماعيه ..

اتمنى استمرارج في مجال وظيفتج الحاليه واتكثفين جهودج في تطوير العمل اللي تشغلينه..
ومب قصدي احطم افكارج وطموحج بل حبيت اعطيج رايي

والله يوفقج

السموحه

[حلم الطفوله]

السلام عليكم

الطموح واااايد حلو ...وخصوصا إذا كان يخدم المجتمع ويساهم برفعته وتقدمه

وأعتقد إنج بشغلج الحالي وصلتي لمركز صرتي فيه مشهوره مثل ما كنتي تتمنين :laugh:

طبعا بسالفة اتخاذ القرار عليج بالاستخاره

ولكن كراي شخصي ... الإعلام مهنه تحتاج تفرغ لأنه الإعلام الحقيقي يحتاج سفر وجولات ميدانيه

وباعتقادي إنها كمهنة تناسب الرجل أكثر !

بتقولين ليش ؟

الحين صدق إنه نظرة المجتمع للمرأه تغيرت ...وصار الممنوع مسموح في أغلب الأشياء والأعمال

ولكنها بالنهايه ....بتكون زوجه وأم ! هاي وظيفتها الأساسيه

والرجل محتاج لزوجه مهمه ببيتها أكثر مما تكون مهمه ومشهوره بشغلها

أنا ما أقلل من طموحج وإلا أقلل من إرادتج وحبج للشهره ....

أنا أقولج المرأه بتكون مهمه ومشهوره في طريقة تربيتها لعيالها كإماراتيه !

طبعا هاي مسؤوليه دينيه أكثر منها كواجب أم نحو أبناءها

يمكن ردي تحكمه نظرتي لواقع أعيشه وتفكير أعتز فيه وعادات جديمه بس بالنسبه لي مقدسه

واختلاف الرأي لا يفسد للود قضيه

[بو عمير]

انا أقول قبل ما تقدمين على العمل هذا إسإلي حد من المفتين
مايصير المسؤولين يثنون عليج وربنا هب راضي عليج.
ما أقول حرام لكن إسئلي