جامعه خاصه ومختلطه :(

[الجنيه]

السلام عليكم ورحمة الله وبركاته ...

احم يعني من العنوان فهمتوا السالفه ما ادري كيف حاسه خايفه ومتردده شوي 15 سنه دراسيه قضيتها على مقاعد الدراسه بين البنات والحين فجـأه انتقل لعالم ثاني ما ادري كيف احس انها شوي صعبه علي وهالموضوع مسبب لي ارق هو صحيح اني اشتغل وبتقولون يعني عادي المفروض ضاريه ع الاختلاط بس الشغل غير والدارسه غير يعني مهما صار ما اكون مع الشباب في مكان واحد لاكثر من عشر او خمس دقايق ع حسب الشغله يعني يدوب يحدرون عندي المكتب يسلموني او يستلمون مني وكل واحد يروح لدربه خصوصا انه انا وربيعتي بس في مكتب يعني ما احس فيها شي بس الدارسه وياهم ومجابلتهم يعني 3 او 4 ساعات ما ادري كيف ...

ادري بتقولون انتي سايره تدرسين ما عليج منهم لا تركزين عليهم وهذا الي بسويه بس بعد ما ادري كيف حاسه ويمكن لاني للحين ما جربت متخوفه من هالشي والا ما ادري الصراحه ضايعه ومرات اقول انا غلطانه يوم اني ابي اخذ شهادات اعلى بس بنفس الوقت صليت استخاره والحمدلله للحين كل اموري ميسره

ابيكم اتشدون من ازري وترفعون معنوياتي الي مستويه 100 تحت الصفر


فضفضات متكوده جان انطلعها والسموحه

[وحي القلم]

ماعرف شو أقول لج يالجنيه :9:

دام انج صليتي الاستخاره توكلي على الله

و ما بيستوي الا اللى فيه خير لج ان شا الله

أنا التخصص اللى كنت أبى أدرسه غيرت رايي عنه عشان هالسالفه :fa46:

.
.

[بنت الدلع]

هالفكره تراود بعض البنات قبل دخول هذي الجامعات المختلطه
اول البادي بتحسين ان شي غير
جنج تسوين شي غلط
وبتحسين انج موضع تركيز واهتمام
وان كل الناس تطالعج
بس هذي مجرد افكااار
ويوم بتكملين هناك مب اكثر عن شهرين
بتحسين ان الامور طبيعيه
بتعرفين الشباب وطريقة تعاملهم
اذا البنت محترمه مايشبرون صوبها
الا لغرض الدراسه طبعا
هالشي ممكن يمنحج جرأه اكثر
وخصه انتي تداومين
يعني المفروض تكون هذي التجربه ماتيب لج كل هالاحساس
انتي سايره تدرسين
ماعليج منو الي وراج ومنو الي عدالج
بتتعرفين لج على بنات وبتمين وياهم
والشباب بروحهم في جهه
لاتخلين هالشي يمنعج عن اكمال دراستج
واذا انتي مب مرتاحه قدمي في جامعة بنات اذا حصلتي .. !

[الجنيه]

وحي القلم

والنعم بالله ... انا بتوكل على الله والي فيها فيها ع قولت اختي لو ما ارتحتي اطلعي محد بيقول شي *_*

بنت الدلع

الصراحه حسيت اني هبله هههه عادي حبوبه انا عن الجراه نمبر ون بس الي مخلني بهاي الحاله اني ما جد جربت هالوضع ومتخيلتنه بشكل وايد غبي في بالي وان شاء الله ما يكون مثل ما تخيلته والله يقدرني اني استمر واخذ شهادتي ,,
المشكله ماشي جامعات بناتيه خصوصا اني خريجة تقنيه من ثلاث سنين تقريبا

[ايه احبك]

لووول يالجنيه لو تعرفين شو استوى بي اول ما دخلت معهد مختلط لووول
يتني دوخه ولوعه وتلصقت بقرب بنت حذالي لووول ها اليوم الأول وطبعا كل يوم ناس غير حسب الوقت الي اخذه
اليوم الثاني قلت الله واحد اطلع من الكلاس اذا الكلاس ما فيه الا انا البنت الوحيده يعني ^^. وصار
الذي لم يكن في الحسبان انا كنت اول وحده في الكلاس جان يدش الولد الأول والثاني وانا اتريا بنينه وحده دش الكلاس لين ما كملوا 9 شباب خلاص الكلاس اكتمل وما في ستيودنتس موور
والدمعه غلغلت خلاص لا مفر من هاي النهايه فيوم ييت بطلع جان يدش السير ويسكر الباب
صابتني خيبت امل فضيعه وتميت ساكته ومنحرجه
المشكله هالحيا ايأثر على مستونا الدراسي وايد يعني طول الوقت خايفه من شوه ما دري وغير عن جيه ما روم اشارك او اعبر عن راي الي في مواجة حياء داخله فيني
الجنيه مع مرور الوقت بيسود فيج التأقلم وانصحج انج تكتبين المحاضرات عشان تلهين نفسج من الحيا وشعورج بالقفطه لنه كلام بنت الدلع صحيح......

[مــهــابه]

عــليج الســلام والرحمــة


اممم من حـقج تــتخوفـين لـ سبـبين ، الأول أنج كنـتي فـ بيــئـة وبتنتقلين لـ بيئـة ثـانيه واللي هـي
من المـدرسـة للجـامعه . .

اما السـبب الثــاني اللي هو ذكرتـيه ، الـ [ جامعـة المختـلطة ] . .
كـل أنـسان لـه شخصيـه وميــول ، وحسب شخصيـتج يمكن أنـتي تتأقلمين ع الوضع ويمكـن لا !

بـعطيج مثــال من الواقــع:

يوم رحت تقنية العين ، الكورس الماضي ، وطبعـاً ماكانت مختلطة بس نحن البنات كنـا فـيها يمكن 9 أو 10 بس! ، والباجين كلهم اولاد . .
أول مـارحت كنـت أتـغشــى ! . .

عـقب قلـت يسد اني محجبـة مايحـتاي الغـشوه

أقـولج أبـد ماخذت راحتي ، وحسيت اني مول مب مرتاحه ف الدراسه ، رغم انه قبل كنا نسوي معـارض فـ جامعة الشارجة ، وانروح عندهم ونجتمع وجيـه ! ..
لكـن فـ كلاس والغـلبه تكون لـ شباب وكلهم مواطنين بــعد ، حسيـتها وايد صعـبة ، وقلـت : الـتوبة
رغـم أنـه الشباب ماياكلـون ولايسـوون شي :fa56: ،

أهـم شي قـلـتيه أنـتي:

انج صـليتي الأسـتخاره ، ومدامج مرتــاحه ، يوم بـتروحين كـل الأمور بـتتيــسر والـلـه ، وبـتحسيين الأمر عــادي جــداً


مـوفقـه !

بس لاتـنسين يكون هـدفج الأول والاخير [ الدراسـه ]

وكـل شي بيــصير سـهل عـسب هذا الـ هــدف

[دموع قلم]

وعليـكم السـلام ورحمـة الله وبركـاته ..


عـزيزتـي الجنيــة ..
حلـو جـدا يـوم وحـدة تتصـف بصفـة الحيـاء .. لأن الرسـول صلـى الله عليـه وسلم كـان أشـد النـاس حيـاء ..
لكـن صفـة الخجـل هي المشكلــة .. حـاولـي تحتفـظين بـ حيـاءج .. وتقلليـن من خجلـج .. تكلمـي .. شاركـي ..
إبـدي رايـج .. كـونـي شخصيـة قـوية .. عـامليـهم بحـدود .. وكـل هالأمـور تسـوينهـا بحيـاء .. بـرقة .. لأنـج أنثـى ..!

شـي غـرض .. ارمـسي ويـاهم .. عامليـهم بـالزيـن .. وإذا ماشي غـرض .. خليـج في حـالج ..
وأكيـد شي بنـات يـدرسـون ويـاج .. ممكـن هالشـي يلهيـج عنـهم .. وإن شـاء الله فتـرة بسيطـة
وبتكـونيـن طبيعيـة ..


ربـي يـوفقـج إن شـاء الله ..

^_^

[شمعة أمل]

واااااايد عاااااااااادي
تدرين
جامعه مختلطه وايد غير عن شغل مختلط .. انا جربت الاثنيـن
جوفي في الجامعه
عندج 4 أنواع من الشبـاب
عندج الى توهم طالعين من المدرسه والى صدق اغبيا ومتخلفين وتبين تصفعينهم لول .. لا صدق يعني هاذيل الى صدق صدق صدق بيرفعولج ضغطج .. لانه توهم طالعين من المدرسه واونه كبروو بس من الصوب الثاني وايد ماصخين كل رمستهم سب غير انه مايحضرون نص الكلاسات عقب يعيدون الكورس ويتأدبون:k_devil2:

عقب عندج هاللي مادري كيف .. يعني نوعية الشباب الى يحب يمتحن البنات:a046: .. يعني بيسوي اي شي عشان يعرف حقيقتج .. اذا انتي محترمه ولا صايعه .. يوم يكتشف انج محترمه فجأه يتأدب وعلى اي شي يتأسف ومستحيل يزعجج وصدق يستوي ريال

عقب عندج المحترم درجه أولى الى صدق ريال بمعنى الكلمه

وبعدين عندج نوعية الشباب الى *نحن ربع عااادي* يعني مثلا شي شله في جامعتنا شباب وبنتين وهالبنات وايد *عادي* ويا الشباب يعني مثلا بين الكلاسات لو عندها كتب ماتباهم تسير وتحط في سيارة واحد من الاولاد الى وياها .. ومثلا لو بتزقره ادلع اسمه:boxed:


انا وحده صدق مول ماكان عندي اكسبيرينس ويا شباب يعني صدق صففر لانه ماعندي اخوان بس الحمدالله حصلت احترام كلحد..
يعني مثلا في المحضارات .. مستحيل ولد ايي وييلس عدالي .. مستحيل .. لكن وحده ثانيه مواطنه عادي ييلسون عدالها ..
ترا الشباب وايد يختبرون البنات المواطنات في جامعتنا.. اذا يحسونج صدق يايه عشان تدرسين وايد يسهلون امورج ويعاملونج عدل وبجديه لكن لو انتي يايه تلعبين جيي بيعاملونج جنج زباله يعني من صوب بيتمشون وياج وجي لكن من وراج حشش وسب والى اخره..

نصيحتي لج..
كوني واثقه من نفسج .. لاتكونين ديايه
جاوبي في المحاضرات والكلاسات .. اثبتي تواجدج في الصف *هذا اهم شي* تحصلين على احترام الدكتور والطلاب .. غير انه وايد سهل لانه كلحد يحفظ اسمج ومب لازم تعرفين عمرج عليهم لول
كوني جديه
رابعيلج كم من بنت *نصيحه لاتتلصقين في وحده يعني خلي علاقتج سطيحه لانه في الجامعه لازم تخافين على عمرج من البنات مب الشباب صدقيني*
واهم شيييييي لاتعطييييييييين ايييي ولد رقمججججج لاتسوييييين هالشي ابدااااا ابداااااااا ابداااااااااااااااا .. حتى لو بحجة الدراسه
مثلا انا اعرف بنات عطو الشباب الى وياهم في بروجكت رقمهم .. لكن انا مستحييييييل
عطيييهم ايميل الجامعه واذا الجامعه ماتعطيج ايميل افتحي ايميل يديد وقوليلهم هذا ايميل الجامعه وتواصلي وياهم بالايميل فقط واذا يستخفون ويحتجون ترا اذا شي ضروري هالشباب يقدرون يتصلون في البنات الى عندهم رقمهم وهالبنات يقدرون يتصلون فيج لكن مول مول مول لاتعطينهم رقمج ..

اول اسبوع بتكونين زايغه ثاني اسبوع عادي وعقب شهر بتقولين الحمدالله انا في جامعه مختلطه ومب بس بنات.. لانه غير يوم شي شباب في الكلاس .. يهّدون الوضع لانهم وايد laid back عكس البنات .. غير انه تفكيييرهم غيييييييير يعني صدق يوم لازم نرمس عن موضوغ ونتناقش فرررررررررررررررررررررررر رررق جي طريقة تفكيرهم غييييييييييير وااايد intresting

[الجنيه]

مــهــابه

هههه فديتج والله ردج خلاني اضحك من كل قلبي *_* ودعنا مقاعد المدارس والكليه من سنين بس مب وايد الحمدلله يعني مب عيوز ...

بصراحه انا الحمدلله شخصيتي من النوع الي افرض احترامي ع الكبير قبل الصغير لاني ما اتعدى حدودي ولا اسمح لاحد يتعدى حدوده ويايه بس مثل ما قلتي يمكن هالاحساس لاني للحين ما جربت الاختلاط في الدراسه وان شاء الله اتعدي الامور على خير

تسلمين حبوبه ع التواجد *_*

[الجنيه]

دموع قلم
ما تتصورين اشكثر استانست يوم شفت اسمج بين الردود بردتي فادي بردج الحلو *_* ان شاء الله ربي يقدرني واكمل ع خير *_*

مشكوره الغاليه

شمعة أمل

ههههه تصنيفج عجيب والله *_* عاد من هالناحيه تطمني انا وحده ما عندي واحد اثنين يعني غايه الرمسه ارمس وما علي من حد واتناقش بكل جديه وما اعطي حد مجال استهتار او عبط *_*

مستحيل ارابع حد بتعمق الا فيما ندر لان الحمدلله عندي مجموعة صديقات الله يحفظهن يغنيني عن الكل بس هاييل بتكون بينا مجرد زماله لا اكثر *_*

ثانكس ع السبورت حبوبه *_*