شو تفسرون التصرف ؟!!

[المزوحي]

السلام عليكم

كل منا له طبع يختلف وما أمدح نفسي بتصرفاتي ...

لكن هل انتوا تعاملون الناس مثل مايتعاملون وياكم، وإلا تكون بشخصيتك حتى لو هو يتصرف

تصرف تتنرفز منه ؟!!

يوم تعيش مع ناس في العمل وياك أكثر من 7 سنين .. لكن مايحب يقول لك شي ...

أنا وياكم إني لقيت في مجال عملي اللي يرمس وايد وما يخلي شي مايرمس به واللي يكتم ..

حلو الواحد يكتم ويحتفظ بأسراره ومب كل شي يطريه وجدام أي حد ..

لكن ما تتنرفز من تصرف واحد يعاملك كأنه ( ماعرف شو أقوول الصراحه )

بوضح لكم ... هل لو انته بتسافر مب لازم تستسمح من الناس ... هالشي اللي نعرف عادة

لكن يوم تطلعون بالخميس من الدوام وربيعك اللي وياك 7 ساعات في الدوام مسافر ..

وحتى يوم يكلمك يبين إنه هو في الكوفي وإلا في البيت أو السيارة وهالشي مب مره وإلا مرتين حصل

صح أقوول أنا مالي دخل في الناس وكل واحد على هواه ... ومب لازم يخبرني ..

ولا أنا لحوح أو فضولي ولا أكلف على الناس بشي ... عشان اشوف هالتعامل ..

هممم مب شرط بدر مني كل اللي ذكرته ، أحصل هالشي لكن شو تفسرون هالشي ...

" ي " الوقت اللي خلاني افضفض عندكم .. وإلا دوم اقول اش حقه اتنرفز وانا ماعليّه من حد ..

وفوق هذا كله هم يسألون عن كل شي ويبون يعرفون كل شي ..

ومرات يستهبلون يوم يسألونك وحاولت احرج هالشخص .. لأنه هو يعرف الشي ويسأل ..

[حبوبه دبي]

ســلااام !!

همممم والله مــب عـارفه شــو اقــولك !!

شــرات مـا قلت كــل واحد وطبـعه ،، دامك قــلت انه ويـاك من 7 سنيــن اكيـد تعرف كيــف تصرفـاته هالريـال ..

يمكن يكـون متعمــد أو مب قـاصد ..

لا يحــز بخــاطرك هالشـــي .. وخلــك كوووول يالمـزوحـــي :icecream:

والسمــوحه

.
.

[سفير الخيال]

السلام عليكم

عزيزي المزوحي,, استهدى بالله واتعوذ من إبليس

أنا ما فهمت شي من اللي قلته غير إن ربيعك من 7 سنوات ما طاع يخبرك بشي إنته حاب تعرفه؟!

صح ولا انا غلطان :m_afaker:

اعذرني حبووب,, يمكن مخي مقفل بهالساعة

[الجنيه]

هي يالمزوحي اسميك ييت ع العوق ....
انا بالنسبه لي عندي تصنيفي الخاص للناس ما ادري اذا هو هذا المتداول بين الخلق او لا .... في نوعين من هالبشر :
1-فضولي : يعني مثلي يحب يعرف عن الاشياء اللي تحسسه بالاكشن وانه فيها ان او سمع طلاطيش كلام وده يعرفها كلها بس ياكل تبن ويخليها تقرقع في خاطره ...

2- حشري : والي هو نفس الفضولي والفرق انه ما ياكل تبن ويخلي السالفه تقرقع بخاطره الا يسال ويرز ويهه في كل صغيره وكبيره ..

المزوحي في ناس طبعها خايس يحبون ياخذون منك كل شي حتى لو كان هالشي يحرجك او مش من حق اي حد يعرفه الا انه سؤالهم والحاحهم احيانا يجبرك تقول الي في خاطرك لكن تعال يوم انت تبي تاخذ منهم نص معلومه لو تذبح عمرك ما تطلع وياهم بشي ... وهني المشكله يتدخلون في حياة الناس وامورهم وما يبون حد يتدخل في خصوصياتهم ...


بالنسبه لربيعك اعتقد هذا واحد من الاثنين يا انه ما يبي يخبرك ع سفرته لانه ما يبا يخبرك
والا انه ما يبا يخبرك عسب ما تنشر الخبر بدون قصد يعني يمكن هو اوهم حد في الدوام انه ماخذ هالاجازه بسبة ظرف طارئ او شخصي واذا انت طريت ان فلان مسافر المكان الفلاني بتستوي البلاوي ..

هذا والله اعلم من الملل بديت اكتب معلقات السموحه

[مايهزك ريح]

ما احب الإنسان اللي ( يشخلك ).. عقب يوم تي تسأله سؤال واحد يغير الموضوع :a046:

الله يعينك على هالإشكال .. انا عن نفسي قمت اتحاشاهم .. لأنهم يسألون ( عن القرحة ودواها )
وانا ما احب انه حد يستجوبني .. :pullhair:

[ايه احبك]

انا عن نفسي تعودت على على الفئة من الناس
تحب تاخذ كل كبيره وصغيره
وفي المقابل انته مب لازم تعرف اي شي عنهم
انا اقول سو طاف واستخدم نفس اسلوبه
هالفئه من الناس يا انهم يخفون من الحسد وهاي احسن طريقة انهم يجنبهونها ==وطبعا هايلا مرضه
يا انهم ما يكنون لك اي حب او موده

[شمعة أمل]

سالفة انه سافر وماخبرك احس هالشي وايد عادي =s يعني انا دوم اسافر وماخبر حد .. مب لانه ماباهم يعرفون او اني مادانيهم لكن بس جي يعنييي مرات ماعندي وقت مرات مب متفيجه مرات صدق مايخصهم اذا مسافره ولا ولا .. اذا السالفه سالفة السفر احس انه مب لازم تزعل .. لانه هالشي وايد عادي

[المزوحي]

لا أنا أحب أسأل الناس ولا أحب حد يسألني ..

وانا من النوع اللي ما أرمس بأي كلام .. حتى لو سافر ومايحب يخبر الغير انا عني نفسي ما اقول

إنه فلان سافر ... لكن هو كل شي يسأل عنه ... حتى لو كنا يالسين 5 اشخاص وواحد منهم

تكلم عن مكان معين .. بيتتم ساكت وخلاف بسير بدون مايقولنا ..

صح مب ضروري ياخذ الأذن منا .. لكن مب حلوة يبغي يعرف كل شي وهو مايرمس ويدس

وكل شي يبونه لعمارهم ..

[تحفه]

مزوحي مرات احسك تشفر

[المزوحي]

شو بعد اشفر تحفه، مافهمت عليج ؟؟

[حبوبه دبي]

عــادي طــاااااف يالمــزوحــي ومــا عليــك منــٌه

:fa51:

.
.

[المزوحي]

صح ماعليّه منه، لكن يوم يكون وياك كل يوم وهو يدخل ويسأل ...

[طعون القلب]

إذا كان ربيعك وقريب منك .. لازم يخبرك ومن حقك تزعل إذا ماخبرك ..

لكن زميل عمل حتى لو وياااك من 20 سنه مب شرط .. لانه في نفس الوقت مايعدك إلا زميل وياااه وهب لازم يخبرك .. يعتبرها من خصوصياته اللي ماتدخل ضمن الدوام ...

ويمكن هالشي يدخل ضمن شخصيته .. لأنه في ناس يعتبرون أحاديثهم ماتجذب الأشخاص فيفضلون السكوت( بالرغم فخاطرهم يبون يقولون كل شي .. لكن ترددهم بالإحساس أنه كلامهم مابكون في أهمية يخليهم يسكتون) في حين يحبون يعرفون كل شي من الأشخاص الآخرين ويستمتعون بسماع السوالف من الآخرين...

وخذ الأمر عادي .. إذا سالك جاوبه على الأسئلة إلا فالشي اللي تحس انه من خصوصياتك وانت ماتبا تخبر إلا القريبين منك..

[المزوحي]

طعون القلب .. الشخص اللي يتحذر منك واااايد ومايحب يخبرك .. مب لازم هو يلومك

أنا مره جربت ويااه شي وماخبرته وهو أمر مايخصه بالمره ... عقب فتره قال : وليش ماقلت لي

وأمس حصل موقف في الدوام .. لكن أنا مارمست ... ويوم عرف قال عيل ماقلت لي ..

مع إنه شغله مب تخصه ومع هذا قال ليش ماقلت لي ..

إذا "ي " الصيف يبتدي يسأل الكل عن إجازاتهم وين بتسافرون .. وهو يكون مسافر

ولا يسلم علينا ... مب لازم يقول كل شي، لكن الواحد يستسمح !!