اسأل وفكر بصوت عالي ! [الأرشيف]

بنت الدلع

28-06-07 ||, 04:56 PM

بسم الله الرحمن الرحيم

السلام عليكم ورحمة الله وبركاته

نرحب بأعزائنا المتخرجين والمتخرجات ونبارك لهم بنجاحهم
وبنسبهم الجميله

بما انكم على ضفاف دخول الكليه او الجامعه
يسرنا ان نفتح لكم المجال للسؤال
ونقدم لكم جميع الاختيارات والحلول التي تناسب ميولكم

هنا تستطيعون الاستفسار عما يحلو لكم
اذا كنتم محتارين في دخول التخصص المناسب
او تريدون معرفة التخصصات المطلوبه في سوق العمل

ما عليكم سوا السؤال
ونحن سنقوم بالرد على استفساراتكم باذن الله >> استوت مال اتصالات :tongue:

نعلم بأنها اصعب مرحله من المراحل الدراسيه
وجميعنا مررنا بها
( الختطيط والتفكير للمستقبل )
لا يسعكم سوى السؤال والتفكير والتوكل على الله

كل الشكر يعود لصاحب الفكره خيال الحب

تحياتي ..
بنت الدلع

خيال الحب

29-06-07 ||, 03:46 PM

:fa55: جان يسوولنا طاف:fa55:

عيماني وكلي فخر

29-06-07 ||, 05:33 PM

السلام عليكم ورحمة الله
خيال الحب + بنت الدلع
يعطيكم العافية ع المجهـوود الطيب

أنزيـن انا مخلص الثانوية
ومقدم على تقنية دبي
وماعرف شو أتخصص
وانا سمعت انه بعد السنة الاولـى تتخصص
مع العلم انه ميولي كمبيوترية :fa32:

أبي أسمــع شوركم
:2:

بنت الدلع

30-06-07 ||, 03:40 AM

خيال الحب
شفت كيف =(

عيماني وكلك فخر
اذا انته علمي
ليش ما ادش هندسه؟
دراستها حلوه
واغلبية الاشيا عمليه
ويبالها تفكير وتشوف الاشيا جدامك
وغير هذا يوم بتتخرج
شهادتك بتكون على مستوى
ومسماك الوظيفي مهندس
وبتحصل علاوة المهندس فوق الراتب

وعندك تخصص الآي تي
وايد مطلوب
وحلو
وشي تخصص يديد فاتحينه في كلية الآي تي
والي هو
IT security
امن نظم المعلومات
كله يخص الكمبيوتر
ويوم بداوم مكانك بيكون حلو
كل مكان مطلوب الامن
انته بتكون المسؤول عن الملفات السريه و حمايتها

عيماني وكلي فخر

30-06-07 ||, 03:18 PM

اهــاا

اشكرج أختي بنت الدلع ع الافادة
لكن انا تخصصي أدبــي
ولاهنتــي خيتي

بنت الدلع

30-06-07 ||, 05:13 PM

^ اي تي حق الاثنين

خيال الحب

30-06-07 ||, 05:35 PM

يامرحباا والله بعيماني..

حاول تتخصص بشي تاخذ منه باكالريوس ..

لاتطمح للدبلوم..

شد حيلك وحاول تاخذ على الاقل دبلوم عالي..

لانه فرص العمل والمعاش بتكون عاليه وحلوه

وبالتوفيق..

عيماني وكلي فخر

30-06-07 ||, 08:03 PM

بنت الدلــع .. خيال بن الحب

تسلمــوون والله ع النصيحـة وماقصــرتوا
وإن شاء الله أقدر أردها لكم

خويكم
:12:

وحي القلم

30-06-07 ||, 10:34 PM

عليكم السلام و رحمة الله و بركاته

أبغي أسأل عن الصيدله

شو رايكم في هالتخصص ؟ على شو يعتمد بالضبط ؟

قالولي انه يعتمد على الكيميا أكثر شي.. فـ قلت بتأكد

لانه أقل درجه عندي في الكيميا :tongue:

.
.

و مشكورين يا بنت الدلع و خيال الحب

على هالموضوع المهم.. ما شفته قبل

يمكن أرد مره ثانيه لانه عندي وايد أسئله :fa46:

قرموشة

30-06-07 ||, 11:33 PM

وبنكـون متـواصليــن ويااكـم للـرد علـى أي شي يخـصص الهندسـه أو البزنـس :thumbup1:
وعـن الجامعـات وبالاخـص جامــعـه الشاارجـه ..
وأي سـؤال بغيتـوه ان شا ءالله ما بنقـصر ويااكــم بالاجابـه
بنت الدلــع \ خيال الحـب .. مـوضـوع مفيـد جـدا .. شكـرررآآآ =)

قــبقــوبـه

01-07-07 ||, 12:34 AM

مـووضـوع شيــق ومفيــد ...
اذا تبـون تسألــون عن تخصــص البـزنس في جــامعة الشــارجه أنا زاهبـه ..
ما يــردكم الا كيبــوردكــم .. :)

دمعة شوق

01-07-07 ||, 12:58 AM

مــرحبــا السـاع في ذمتـيـه
حــي هالمواضـيع
تـثـدقـون كنـت بـنـزل موضوع بتخبـر فيـه ؟
وزيـن أنيـه لقـيت الدعـوة لهـموضوع .!!
؛؛

امممممم أنا نـاويـه أدث جامـعـة الإمـارات
وووامممم
مـاعـرف يـعـنـي أكثــر ثــي حاطتنـه في بـالـيـه
اممم
لا تــثـــردون ثــمعونيه للأخير
:k_sadwalk:

قــانــون
:icecream:

امممم امممم ادري يباله وايد بس انا ماثــي ورايـه
فـ ماادري يعـنـي ماادري وفي بالي ثــي ثـانـي اللي هـو الإعـلام .؟!
؛
وليـن الحينه مااعرف وثـــكليه برثــي على الـقـانـون
ثــــو رايـكم . وثـــو فـكـرتـكم عن هالتخصـص .؟!
؛؛

خبيلـوه وأم سـعيـد

ياخي انتوا تمام أشكـركم على هالمووضوع الترتوبـي
ولكم الأجـر إن شاءالله
:police:

دمعة شوق

01-07-07 ||, 01:01 AM

وكنـت حاطه في باليـه تـرجمـه وعلوم سياسيه بس الحينه الغيتهن من باليـه
؛؛

عـذورنيـه فوق ضرسـيه طايح خخخخخ

وحي القلم

01-07-07 ||, 01:06 AM

قبقوبه و قرموشه

دام انكم يبتو طاري البزنس

شو رايكم إذا درست محاسبه ؟ حلو التخصص ولا لا ؟ :tongue:

مزايا

01-07-07 ||, 01:10 AM

دمعة شوق
القانوون وااايد حلوو وبيفيدج ف حياتج بعد
وحتى عقب ماتتخرجين إن شاء الله لو بغيتي تستوين
محامية ادشين المعهد القضائي سنة وشي أو سنتين
وبعدين بتستوين محامية قد الدنيا =)

العجيبة

02-07-07 ||, 11:08 PM

قالولي انه يعتمد على الكيميا أكثر شي.. فـ قلت بتأكد

لانه أقل درجه عندي في الكيميا :tongue:

.

نصيحة .. لا تعتمـدي على درجــاتج في المدرسة ، هاي شكليــات بس ..
دشي الشيء اللي تحبينه واللي تحسين انج بترتاحي له

وسمعـت ان الصيدله فيه كيمـيـا .. تعرفين تجـارب المعايـرة اللي سوينـاها الفصل الاول أظن ..
كنــا نحـاتي إنه ولا ملــيلتر يـزييييد ولا ربع ملي ينقـص .. خخخخ الصيدلة جي وأكثر :woot: < حرق أعصاب

والله يوفقــج وين ما تروحييين ..

خيـال الحب + بنت الدلع
موضوع مفيــد ويا في وقته ، شكـرا لكم :fa35:

وحي القلم

02-07-07 ||, 11:44 PM

مشكوره يالعجيبه ^_^

و جان تبين الصدق أنا ما حب الكيميا

عشان جيه مب مقتنعه وايد بالتخصص :glare:

.
.

انزين شو تعرفون عن تخصص (( حماية و أمن نظم المعلومات )) ؟

الشيـــن

02-07-07 ||, 11:55 PM

انزيـن شـ سمه محد فكـر لو لـ مجرد تفكير يدخل المعهد البترولي عشـان أحس اني
ماغلطـت يوم دخلته )=
شو هاا نبى بنـااات عدنا نقص لووول ..!

قرموشة

03-07-07 ||, 12:18 AM

^
هـ المكـان وايـد زين .. و علاااواتــه ومميزاتـه يوم التخرج والتوظيف عااليــه
ما غلطتــي يوم دخـلتيــه .. لول

قرموشة

03-07-07 ||, 12:22 AM

وحـي القلـــم .. تخـصص المحـااسبــه صدق واحـد من تخـصصات البزنـس المطلـوبـه جـدآ
اذا دخلتـيـه ما بتندمـيــن .. وقبقوبـه بتعطيج التفاصيــل .. ان شاء الله ...

بنت الدلع

03-07-07 ||, 01:18 AM

وحي القلم
بالنسبه لتخصص الصيدله
معلوماتي عنه شبه معدومه
قريت عنه قبل لا افيدج بس مب كاتبين التفاصيل
غير انج بتسوين تحاليل
وبتنظمون وبتشتركون في مختبرات
وهو تخصص دقيق
يبالج تحفظين جميع الادويه الي في العالم >> مول ماخوفتها

ان شاء الله عافك الخاطر تقدر تفيدج اكثر
بما ان تخصصها شووي قريب من تخصص الصيدله

==

قرموشه & قبقوبه
اشكككركم الصراااحه
تعاون جميل منكم

===

وحي

المحاسبه واااااااايد مطلوبه
ومب وايد عندنا مواطنين عندهم بكالوريوس في المحاسبه
وبعدين في كل مكان ترومين تشتغلين
وخلال سنتين او اكثر بتم ترقيتج لمسؤول القسم

بنت الدلع

03-07-07 ||, 01:22 AM

العجيبه

اشكرج على مرورج ونصيحتج عزيزتي
ودرجات المدرسه مثل ماقلتي
الواحد مايعتمد عليها
لا مب دايما تقيم الطالب

والعفوو ^_^

===

وحي القلم
شرات الي كتبته في الرد على الاخ عيماني وكلي فخر

===

الشين
يييتي عالعووق
كل يوم اتحلم بهالمعهد انا =( >> جذابه مب كل يوم
مب كل يوم يمكن يوم وترك >> بعد جذابه P=

بس صدق والله واااايد فخاطري ادرس هنااك
من سنتين وانا اقول بسير
والسنه الي فتحو حق البنات ماسرت
الله مب كاتب

المعهد البترولي مستقبله مظمون
وربعتي كانت بتسير هناك والصراحه واايد نصحتها
وانتي ماغلطتي يوم سرتي
بالعكس مخج مفتح
حلوه سالفة اللابات وانج تجربين اشيا
خاصه في البترول
الي يعتبر من اهم مصادر الدخل في الدوله

دموع قلم

03-07-07 ||, 01:45 AM

وعليـكم السـلام ورحمة الله وبركــاتــه

الشيـــن ..
أنتـي تدرسيـن في المعهـد البتـرولي في بوظبي ولا ..؟!
وكيـف دراستـهم بشكـل عـام ..؟ وكم النسبـة المطلـوبة ..؟!

ومشكـوريـن على موضـوعكم الطيـب ..

السمـوحـة

^_^

خيال الحب

03-07-07 ||, 02:05 AM

يامرحباااا والله

شكلي وهقت بنت الدلع بالموضوع لووول

انزين اختي وحي القلم..

طال عمرج لاتاخذين رمسة الناس

انا قبل ماتخصص.. قالولي الهندسه الكيميائيه صعبه وكلها كيميا ومادري شوو

ودخلتهااا .. ولا يخصها بالكيميا مال المدرسه ولا شي..

كلها رياضيات وفيزيا
ودراستها وايد حلووه
وانا الي سمعته من وحده من الاهل.. انه الصيدله وايد حلوووه..

انزين يالعجيبه انتي ما قلتي وين بتروحين..

وما سالتي عن شي !!

ليش

حق ليش ما تسئلين هااع

دموع قلم ان شاء الله الاخت الشين تفيدج ^__^

والله يوفقكم

بنت الدلع

03-07-07 ||, 02:11 AM

خيااال..
الا ماوهقتني لول
بالعكس يسعدني اساعد خواتي ^_^

دموع قلم
النسبه المطلوبه فوق الـ 70
والمعهد البترولي مافيه الا في بوظي

والباجي الشين بتساعدج

شوق القلوب

03-07-07 ||, 04:01 AM

انزين شو تعرفون عن تخصص (( حماية و أمن نظم المعلومات )) ؟

يبــالج تسئليـــن ما يهــزك ريـــح.. اتوقع بيفيدج أكثـــر..

..

وحــــي.. فكـــري شو ميــولج ؟

كل دراسه فيها تعب.. بس التعب بيهـــون اذا كنت حابه تخصصـــج..

..

يعني اذا كنت اتحبين سوالف الاحيــاء.. عليج بالتخصصات الطبيه : مثل المختبرات و الاشعه و هالسوالف..

اذا اتحبين الرياضيات ( مثلي ) : عليــج بالهنــدسه ..

اذا اتحبيـــن البرمجه : عليج بعلــوم الحاسب..

اذا اتحسين عندج ميول اداريه : عليــج بالبزنــس ..

..

فكري.. عقب 5 سنين.. شو تبين اتكونيــن..و وين بتبدعين..

دموع قلم

03-07-07 ||, 05:34 AM

صبــاااح الخييـــر ..

شـوق القلــوب ..

مـا تـدريـن اشكثـر أحـب الريـاضيــات .. أحبهـــا وااايــد واااااايــد ..
ويـوم خبـرتهـم .. يقـولـون لـي أدش المحاسبـة أو الإحصـاء .. بس مـاحد يـاب طاري الهنـدسة ..!

وتـدرين .. فكـرت في الهندسـة من فتـرة ..
بـس قـالولي الهنـدسة أكثـر شي للشبـاب .. ويـوم بنتـوظف بيختـارون مهنـدسين قبـل المهنـدسـات ..!

اممممم .. ممكـن تفيـدينـا شـوي ..
وأي هنـدسـة أنتـي دارســة ..؟!

خيــال الحــب ..
مشكـور أخـوي مـاقصـرت .. ^_^

وووالسمـوحـة ..

^_^

دموع قلم

03-07-07 ||, 10:55 AM

اممممم ..
بسـألكم .. ويـن أقـدر امتحـن أيلـــس ..؟!

اتصلـت في بـريتـش كـاونسـل مـاحد رد علي.. مشغوليـن ..!

اتصلـت في قريـة المعرفـة.. خبـرونـي اتصـل في وولـونج يـونفيرسيتي ..

ويـوم اتصلـت فيهـم .. خبـروني انهم بيعطـوني الامتحـان ع شهـر 9 ..
وأنـا أبـي من وقـت .. عالأقـل ع شهـر 8 ..!

فـ ويـن ممكـن امتحـن بعـد ..؟!

وووالسمـوحـة حشـرتـكم ..

^_^

وحي القلم

03-07-07 ||, 12:02 PM

سيري المعهد إذا ما ردوا عليج

و هم بيحددون أقرب وقت تقدرين تمتحنين فيه

بس لا تنسين تاخذين جوازج و صورتين ^^

لانه كل ما أجلتي التسجيل كل ما تأخر موعد الامتحان

وحي القلم

03-07-07 ||, 12:04 PM

قرموشه :: بنت الدلع :: خيال الحب :: شوق القلوب

مشكورين ^_^

دمعة شوق

03-07-07 ||, 03:10 PM

لاتخـلون الواحـد يـتأمـل منـكم نصـيحـة ولا شـي
وآخـر شـي ينـصـدم فيـكم
:glare:

شـكـرا ً يـ مـزايـا
وإن شاءالله بـاخـذه لان كـل المؤسسات تقريبـا ً تحتاج حـد تخصصه قـانـون
ومـاعليـج أنـا من الحينـه أدافـع واكـتـب قضـايـا والحمـدالله نجـحـت فـ أكـثر من قضـيـة
:icecream:

دموع قلم

03-07-07 ||, 03:20 PM

عـزيـزتي وحـي القلـم ..

اممممم أي معهـد قصـدج ..؟!

العجيبة

03-07-07 ||, 03:24 PM

خيــال الحـب ..

أنا ناوية ع جامعة الامارات ان شاء الله !

وبس كمن شيء يحوطون فـ بالي ألحين ، وفي تخصص فـ خاطري أدشه بس بعدني ما اعتمدته !

السنة الأولى شو يدرسون فيها ؟ والانجليزي كيف بيكـون ؟ أييب الشهادة قبل ولا أترياهم هم يدرسوني ويمتحنوني ؟

شيء ثاني ..
السكن .. سمعت انه في سكن خاص حق عيال السفارات واللي يايين يدرسون من دول ثانية ..
اذا صدق هالكلام .. شو مميــزات هالسكن ؟ بيعطوني غرفة بروحي ؟
ما يستوي نستأجر غرفة ؟!

وبس .. بعد قوول العجيبة ما تسأل !

بنت الدلع

03-07-07 ||, 06:24 PM

دمعتيييييييييي فديييييت خشششششمج انا

اسمحييييلي الغلا
البارحه وانا ارد نسيييت ارد عليج
والله مب معناته ماسويتلج سالفه
اسمحيييلي فديتج
بس كمن شي يدور في مخي مالحقت يعني
حقج علي دبووووه

عن تخصص القانون انا اشوفه وايد اوكي
واذا انتي فيج لسان وتحبين تجادلين وترمسين دشيه
بس دراستهم متعبه
بعد ماتخلصين بدشين معهد وبعدين تدريب في المحكمه
الدراسه مسليه والشغل حلوو بتستمعتين
بس لازم تشوفين اذا انتي فيج هذي المقومات ولا

وحي القلم

03-07-07 ||, 07:17 PM

الـ برتش كاونسل يا دموع (^^)’

ايه احبك

03-07-07 ||, 07:42 PM

بعد أذن صاحب الموضوع

دمووع قلم ترى في امتحان تاريخ 1/9 في بريتش سيري لهم اهناك ويا صورتين واو صورة جوازيج و 750 درهم وسجلي ولا تترينهم في التيلفون

شوق القلوب

03-07-07 ||, 08:29 PM

دمــوع قــلم ..

عزيزتي انا دارسه هنــدســة كمبيــوتــر..

و خــلال هالفتــره درســت 6 مواد كلها Math .. و باجــي المواد كلها تعتمــد على مســائل و حل.. يعني مب حفظ ..

لانه لليــوم صراحه ما اتخيــل عمري ادرس اشيا فيها حفظ و هالسوالف مثل البزنس و الاعلام و الطب. .

..

عندج هندســه: كمبيـوتـر \ كهربائيه \ معمـاريـه \ ديكــور \ بتروليه \ كيميائيه ..

شوق القلوب

03-07-07 ||, 08:30 PM

ســـؤال : حد يعرف معاهد.. جامعه .. المهم مكان في الشارجه يدرس الايلـــس...

دموع قلم

03-07-07 ||, 08:31 PM

إيـه أحبــك ..

إن شـاء الله بسيـرلـهم وبطـالع ..
اممممم بـس مـاشـي مـوعـد أقـرب من جيـه ..؟!

وحي القلم

03-07-07 ||, 08:31 PM

شوق.. الايلتس ما يباله دراسه.. أنا اللى جيه سرت امتحنت و نجحت

وايد سهل و الله

وحي القلم

03-07-07 ||, 08:35 PM

بس كنت أدخل مواقع فيهن شرح عن أسلوب الامتحان

و راجعت من ملف فيه نماذج أسئلة الـ سبيكنغ

و بس

ايه احبك

03-07-07 ||, 08:46 PM

لا انا انصح انها اتسير معهد --- ايسمونه اسكور بلس ورا لامسي
وبعدين يا دموع ها أقرب موعد سمعت عنه لنه اربيعتي ما يبت الأيلتس فدقت لهم او قالوا لها اتسير هالوقت

دموع قلم

03-07-07 ||, 09:52 PM

شــوق القلــوب ..

هنـدسـة الكمبيـوتـر .. تعتمـد عالريـاضيـات .. والله كشخــة ..!

اممممم .. وبـأي جامعـة درستــي ..؟!
المشكلـة اللي ماحبهـا في جامعـة زايـد .. أن مافيهـا تخصصـات كثيـرة .. حتـى الهنـدسة ماعنـدهم ..!

امممم .. انزيــن .. حـد يخبرنـا نبـذة عن أي من التخصـصات الهنـدسـة هـذي ..
هندسـة .. معمـاريـة .. بتـروليـة .. كيميـائيــة ..؟!

إيــه أحبــك ..
تسلميــن أختــي .. وبحـاول إن شـاء الله بـاجر أسيـرلهم .. ^_^

وووالسمـوحـة ..
أدري ثقـلت عليــكم ..!

^_^

الشيـــن

04-07-07 ||, 12:00 AM

دموع قلم .. باجر برد ع اسألتج .. لاني الحين بطلــع من النت سوووري فديتج ..

دموع قلم

04-07-07 ||, 01:15 AM

الشيــن ..

خـذي راحتـج عـزيزتـي .. ^_^

خيال الحب

04-07-07 ||, 02:29 AM

اختي دموع قلم..

انا انصحج لو بتدخلين هندسه خذي يا ميكانيكيه او كيميائيه

وحلووه دراستها الهندسه الكيميائيه

.. طبعا مافي شي يعتمد ع الحفظ.. وكله فيزيا ورياضيات .. ومعاشج يوم بتتخرجين بيكون وايد حلووو ..

وعن البرتش كاونسل..
هاييلا حركات
احيد بالصيف الي طاف يوم اتصل اخوي قالوله تعال اخر 8 ونحن كنا متصلين اول سبعه..

وبنت عمي دقت لهم قالولها تعالي بعد يومين.. فانا طرشت اخوي وياها ودخلوه

يمكن دفع 200 درهم حق الامتحان وصورة من الجواز

احشريهم بالتيلفون .. قوليلهم انا اباه ضروري وجي...

والله يوفقج ^__^

خيال الحب

04-07-07 ||, 02:53 AM

انزين يالعجيبه ^__^

.. نحن الشباب حالهم نفس حالنا..

بس انا اقول اسكني ويا وحده تعرفينها.. بتونسج.. فليـــــل وبتسولف وياج..

والغرف الخاصه حق المراض..

واول سنه يسكنونكم بسكن المستجدات على ماعتقد.. نفس الطلاب..

وليش ما تروحين جامعة زايد..

او التقنيه..

شو تبينها العين>>>>جان احبط معنوياتج

ولو عندج واسطه يمكن يخلونج بغرفه روحج..

وحي القلم

04-07-07 ||, 11:32 AM

خيال الحب .. امتحان الايلتس بـ 750 في البرتش كاونسل

وحي القلم

04-07-07 ||, 04:55 PM

وعن البرتش كاونسل..
هاييلا حركات
احيد بالصيف الي طاف يوم اتصل اخوي قالوله تعال اخر 8 ونحن كنا متصلين اول سبعه..

وبنت عمي دقت لهم قالولها تعالي بعد يومين.. فانا طرشت اخوي وياها ودخلوه

دموع قلم

صح اللى قاله خيال

اتذكرت اني يوم اتصلت بهم قالتلي الحرمه انه أجرب موعد للامتحان عقب شهر

لكني يوم سرت عشان أسجل الموظف اللى هناك قال شي امتحان ثاني قبل اللى كنت بسجل فيه:k_puppyeyes:

مع اني كنت قايله لهاذيج انه ما عندي وقت :glare:

عالعموم انتي لا تعتمدين عالتيلفون.. سيري لهم أحسن

الوحيدة

04-07-07 ||, 06:19 PM

الوحيدة

04-07-07 ||, 06:20 PM

هييه بعد أبا أسأل عن السكن ؟

هل هو مريح ولا يخوف شرات ما يقولون ؟

قرموشة

04-07-07 ||, 06:39 PM

نصيحـتــي .. اذا بتدخــلون هنــدســه عليــكم بـ
1- كهربــائيــه ( اتصـلاات أو الكتروونـيــات )
2- كيمـياائيــه
3- كمبيوتـر

غـير عـن جـي بصـراحـه ما أشجــع !
لانـه
1- المدنيـه ( شغـل ريــاييل )
2- المعمـاريـه هـم نـفس الشي ( أربع وعشرين ساعه مخططاات )
ومحد غامضني في الجـامعه غير بنات الآركتكجر وحليلهــم شاليين على جتووفــهم اللوحـات والمســـاطـر والمجسمات لوول ..

بس في المقــابــل .. أصعـب أنواع الهنــدســه
1- الكهربــائيـه
2- الكمبيوتـر
لانها تحتااج لتمخميييخ

بس المعماريه والمدنيـه دراستهم سهــله

دمعة شوق

05-07-07 ||, 03:19 AM

ام خمـاسـو
لا علني فـداج عــادي ؛ ماحـطيـت في خاطريـه ولا شـي
( ماشي يـرزا )
:icecream:
؛
انزين امممم مادري محــتـاره وايـد وماعـرف لعمريـه الحيـنـه .؟!
:k_sadwalk:
الله يعيـنـي
||

أولا ً : انـزيـن بغيـت أتخبـركم اممم شو الأحسـن نمتـحـن التـوفـل ولا الآيـلس .؟!

ثـانيـا ً : الله يغربل جامعة الإمـارات حشـى نقـعـت التلفون عسب ايردون
آخـر المطاف سبيتهم وخليتهم ،
اممم الحينه الجامعـة الإمارات تبـا امتـحـان توفـل ؟ لان شفت في الكتيب مال الإرشـاد إن الطالب لازم يكون عنده توفـل ؟

ثـالثـا ً : اللي يكون عنـده توفـل ولا الآيـلس شو بتفـيـده في الجامـعـة ؟ اقصـد بتوفـر عليه السنة اللي بيـدرس فيـه تخصـص ؟!

خيال الحب

05-07-07 ||, 03:26 AM

دمعوووه..

انا الي سمعته انه الي اييب لهم التوفل.. يعني انه اجتاز امتحان التوفل بدرجه معينه.. ما يدرس الانجليزي .. يطوفه كله

هالي سمعته انتي تاكدي

دمعة شوق

05-07-07 ||, 04:06 AM

الله يخسـهـم مايردون ..

عفاريتووو

05-07-07 ||, 10:35 AM

الوحيدة ..

طب الاسنان حلوو و دراسته مب مملة
اول سنة تاخذون فاونديشن
ومن ثاني سنة بتبدون في الاسنان و بيكون عندكم اربع مواد
و كل مادة فيها محاظرات ولاب وtutorial (نفس محاظرة بسس يكون نقاش اكثر و العدد اقل )
و و الدراسة ما بتكون جامدة يعني من كتب وجي .. لا ..من المحاظرات و مرات يعطونج كتيبات و مرات من كتب اذا حسيتي عمرج مب فاهمة ..
و من هــ السنة تبدون تشتغلون على اسنان بعض ..
ثالث سنة بيكون عندج نفس المواد .. بس اللابات بتكوون اكثر
رابع سنة .. بيكون عندج ثلاث مواد
خامس و سادس سنة .. مادتين و بيكون في المستشفى اللي يبنونه في الجامعة + جراحة

و أنصحج فيه .. دراسته حلوة ..
و اي استفسار نحن حاظرين .. ^_^

دموع قلم

05-07-07 ||, 01:38 PM

انـزيــن ..

هنـدسـة الكمبيــوتـر .. ويـن ممكـن أدرسهـا غيـر في جامعـة الشارقــة ..؟!
وكـم سنـة حـق بـاكلريـوس ..؟!

وووخيــال الحــب ..

عن الهنـدسـة الكيميـائيـة .. شـو يـدرسـون فيهــا ..؟!
وووبأي جامعــة تنصـح ..؟! .. وكم سنـة حـق البـاكلـريـوس ..؟!

ووووالسمـوحـة ..

^_^

الوحيدة

05-07-07 ||, 04:25 PM

الله حلوو .. ثنكس عفاريتوو شجعتيني الصراحة !

إنزين والسكــن ؟

ها إلي خايفة منه !

الشيـــن

05-07-07 ||, 04:51 PM

الشيـــن ..
أنتـي تدرسيـن في المعهـد البتـرولي في بوظبي ولا ..؟!
وكيـف دراستـهم بشكـل عـام ..؟ وكم النسبـة المطلـوبة ..؟!

سوري ع التأخيـر ..

أصلا المعهد ماشي منه إلا فـ بوظبي .. والسنة الي طافت كانت أول دفعة بنات يقبلونها ..
دراستهـم بـ شكل عااام مابقول صعبه بس يبـالها مذاكره أول بـ أول
يعني لو كنتي طالعه من الثانويه تقولين يااااي واخيرا بفتك من الكرف
وشفتي كرف المعهد جدامج بتنصدمين صدق ..!
وبعدين الهندسه بشكل عـااام جي دراستهـا .. بس الحلـو فيه انه شي بعده يدييد وجـي ..
حاليـا توهم يبنون سكن للطالبـاات ..
والتخصصات الموجوده
هنـدســة : بترولية ، ميكانيكية ، علوم أرض جيولوجيه ، كهربائية ، كيميائية ..
ومن فترة المعهد ماخذ شهادة ماعرف شو من مادري أي جامعة فـ أمريكا بتدريس الفاونديشن جنه
وكان الأول في العالم بعد جنه ..
شي جي ماحيد بالظبط .. انطب احسن ههه
والنسبة المطلـوبه فـوق الـ70 .. وعلمي طبعـا ..

ها بشكل عام .. اذا عندج أي سؤال ثاني .. انا حاظره لج ولـ غيرج ..

جان احس اني أقوى شي .. هع يسألوني بعد هااا:icecream:

شوق القلوب

05-07-07 ||, 08:51 PM

هلا دمــــوع...

مممم... التخصص موجود في جامعه الشارجه ، و الجامعه الامريكيه في الشارجه.. و اتوقع موجود في جامعة الامارات..

المنصوري

06-07-07 ||, 12:16 AM

إحمــ إحمــ ..

أنا ييييت !

زين والله حصلت حد في جامعة الشارجة ..

والله أنا كنت حاطة في بالي أدرس مختبرات طبية بس عقب غيرت رايي وناوية أدرس طب أسنان إن شاء الله .. إمممم ,, أبا حد يعطيني نبذة عنه بشكل بسيط ..

والسموحة لو ثجلت عليكم !

نصيحة ..
اذا فيج همة عالطب .. ما انصحج بطب الأسـنــان
ادرسي بجامعة الشارقة .. فاتحين مبنى خاص بالطب
وبيفتحون به مخبر عووود ( مستشفى تعليمي )

وعن السكن .. ما عليج من رمسة الناااااس
كل شي بسهاااااله .. بس اشويه ( لا الصراحة هب اشويه :fa45: ) تشتاق لأهلك وخاصة اول الايااام

موفقة دختورتنا :icecream:

( لو تبين حد طب اسنان في الواحات ممكن ادلج على حد قال لنا بانه يدرس طب اسنان :a033: )

عفاريتووو

07-07-07 ||, 09:06 AM

^
حتى طب اسنان فاتحينله مبنى خاص مع الطب
و بيفتحونله مستشفى تعليمي خاص ..

الوحيدة

07-07-07 ||, 07:17 PM

ليش ما تنصحني بطب الأسنان ؟؟!

الصراحة هـ التخصص داش فـ خاطر خاطر خاطري !!

إنزين منو هو الي يدرس طب أسنان في واحاتنا ؟

دموع قلم

08-07-07 ||, 11:41 PM

اممممم .. بسألـكم .. << أدري حشـرتـكم بأسئلتـي ..!

إذا درست هنـدسـة كيميـائيـة .. أو هنـدسـة الكمبيـوتـر .. في كليـة التقنيـة بـدبي ..
كـم سنـوات بـدرس حـق بـاكلـريـوس ..؟!

وووالسموحـة ..

^_^

دمعة شوق

09-07-07 ||, 12:51 AM

اممممممم بغـيت اسألـكم شـو الأحسـن نمتـحـن تـوفـل ولا الآيـلس ؟

خيال الحب

09-07-07 ||, 01:31 AM

مرحبا اختي دموع بنت القلم ..

احسن لج يوم تسئلين لانج بتستفيدين ..

صدقيني الهندسه الكيميائيه دراستها وايد وايد حلووووووه..

وتقريبا تستخدم بحياتنا اليوميه بشكل كبير..

دراستها 5 سنين ..

عاد بالتقنيه مادري على حسب متى انتي تخلصين الاساسي

والله يوفقج خير يارب

دمعة

خذي التوفل انا اقول..

جربي هذا وهذا

هزاايم

09-07-07 ||, 04:11 AM

.....

العجيبة

09-07-07 ||, 03:24 PM

دمعة شووق مب على كيفج توفل ولا ايلتس

على شوور الجامعة ، كيف منهاجها .. أمريكي أو بريطاااااني ..

دمعة شوق

09-07-07 ||, 07:14 PM

خيـال الحب
اممم شكليـه باخذ التوفـل ،
شـكرا ً لك
:icecream:

هزاايم
حي هالطله والله ، امم شكليه الا باخذ الايلس
بمتحنـه وعـقب باخذ هالغبـي الغبوب
:a068:
اممم شكرا ً علني فداج
:a033:

العجيبـه
يختـي هالجامعة تبا اي شي بتلـم لغبـهـا
وشكليه الا باخذ الايـلس وعقب التـوفـل
شـكـرا ً يخويتي

وحي القلم

15-07-07 ||, 07:59 PM

شو رايكم في دراسة القانون فجامعة الشارجه ؟؟؟

دمعة شوق

15-07-07 ||, 08:01 PM

ناويه ع القانون وحـي ؟

وحي القلم

15-07-07 ||, 08:07 PM

بعدني أتشاور :fa46:

و أبغي أعرف أكثر عن التخصص في الشارجه

خيال الحب

21-07-07 ||, 05:49 PM

وحي القلم..

ان شاء الله الاخت قرموشه تفيدج بهالشــي ^__^

بس حلو القانون يمكن تستوين محاميــه أد الدنيا ^__*

عفاريتووو

21-07-07 ||, 06:13 PM

وحي القلم

في كم من وحدة اعرفهم يدرسون قانون في جامعة الشارجة .. وحابين تخصصهم ومرتاحين فيه ..
وها موقع الجامعة جوفي المواد اللي بتاخذونها

https://www.sharjah.ac.ae/Arabic/Academics/Colleges/Law/Programs/BachelorinLaw/Pages/default.aspx

والله يوفقج ان شالله ^_^

وحي القلم

21-07-07 ||, 06:26 PM

شكرا ً خيال الحب و عفاريتوو :12:

بنت الدلع

29-07-07 ||, 10:55 AM

مرحباااا

اسمحوولي عالتأخير يا حلوين
كنت مسافره في هالفتره
واليوم ان شاء الله برد بشكل عام على الاأسئله المتكرره

اول شي بخصوص سؤال الاخت دمعة شوق
شو الاحسن توفل ولا ايلتس

التوفل امريكي
والايلتس بريطاني

التوفل مايقيس مستوى ذكائج لانه غبي
الايلتس يقيس مستوى الذكاء ويعتمد على الاشيا الي خذناهم في المدرسه والي بتاخذينه في كلاسات الجامعه

اغلبية الجامعات يبون score التوفل 500
والايلتس 5.5

التوفل فيه 3 اقسام
Listening, Grammar, Reading
اول قسم 25 دقيقه وثاني قسم ما اذكر
واخر قسم 45 دقيقه ويضم 5 فقرات كلهن قرايه

الايلتس هممم على حسب علمي 5 اقسام
Speaking, listening, Reading, writing
وو شي رايح عن بالي

التوفل مافيه كتابة essay
اما الايلتس فيه ولازم تكتبين موضوعين

التوفل اصعب من الايلتس بشكل عام

سعر التوفل يتراوح بين 200 الى 300
والي يبا يسوي توفل كمبيوتر الي هو الـ IBT
سعره يا 700 او 750

الايتلس سعره 750
وممكن تمتحنونه في المعهد البريطاني "برتش كاونسل"
أو
في كلية تقنية الشباب الي في دبي
ومكانها في الرويه عدال جامعة زايد

هالاشيا الي عندي بخصوص التوفل والايتلس
ادري طولت بس عشان تاخذون فكره عامه عنهم

وعن سالفة الاصعب والاسهل هالرمسه من آراء البنات الي درسو وامتحنوا الاثنين

والله يوفقكم ان شاء الله

بنت الدلع

29-07-07 ||, 11:07 AM

الـ AUS
يبون score التوفل 530 لشهر 9

وشو فايدة التوفل ؟

اذا من اول مادخلتي الجامعه وانتي عندج شهادة توفل
بتطوفين سنه كامله
الي هيه سنة الانجليزي
مثلا في جامعة زايد
عندهم شي اسمه الـ Readines Program
وهالبرنامج الفاصل بين مرحلة المدرسه والمرحله الجامعيه
ويتكون من levels
من 3 لين 8
ويتم اختيار لفل الطالبه على حسب معدلها في السيبا
وعلى حسب كم يابت في التوفل
وكل لفل له سكور معين عشان تعديه
ويوم توصل لفل 8 لازم اتيب الـ 500
فاذا البنت اوريدي عندها شهادة التوفل مابتحتاج لهذي الخرابيط كلها
بس مثلا لفل 8 يهيء الطالبه على الدراسة الجامعه يعني منه فايده

العجيبة

30-07-07 ||, 11:57 PM

اذا من اول مادخلتي الجامعه وانتي عندج شهادة توفل
بتطوفين سنه كامله
الي هيه سنة الانجليزي

^^ هالكلام نفسه في جامعة الامارات ولا ؟!

بنت الدلع

31-07-07 ||, 12:14 AM

no idea

يمكن خيال الحب يقدر يفيدج بخصوص جامعة الامارات

دمعة شوق

31-07-07 ||, 06:20 AM

بنت الدلع
الحمدالله على سـلامـتج :)
مشكوره فديتج وماتقصرين
شكليه الا باخذ الايلتس

\\

العجيبـه
ربيعتيـه ماخـذ الايلتـس ويابت فيه تقريبا ً 6
وقالت انها بتدرس تأسيسي وبيحطونها لفل 3 وبتاخذ مادة من التخصص

دموع قلم

08-08-07 ||, 03:32 PM

بنــت الــدلع ..

وإذا دشيـت جامعـة زايــد .. وحطونـي في إحـدى الـ levels ..
وأنـا بنـص المرحلـة .. خـذيت شهـادة التـوفل ..
ساعتهــا .. بيعـدوني ع بـاقي الـ levels .. ولا بتـم أكمـلها لأني تـأخرت عليهم بـشهادتنـي ..؟!

ووومشكـورة الغـاليـة .. ^_^

بنت الدلع

08-08-07 ||, 05:25 PM

دموع قلم
خله نفترض انج لفل 6
وقبل لاينتهي اللفل انتي يبتي الشهاده
بيخلونج تكملين لفل 6 وبعد ماتخلصين بيسوون لج امتحان لفل 8
الي اسمه الـ chaleng
واذا عديتيه بيدخلونج جنرال على حسب عاد في اي سمستر
الجنرال عادة في 20 اسبوع
ممكن تاخطينه مكثف في 10 اسابيع او اذا في بدايته بتدرسينه في 20 اسبوع واللي هو الافضل

واذا ماعديتيه ممم مادري شو بيسوون لج

ايه احبك

12-08-07 ||, 02:18 PM

يا حلووييين انا ابي اسألكم عن جامعة مدل سكس
هل هي معترف فيها او لاء
او اذا هيه شو نسب الثانويه الي تقبل بهم
واذا نسب منخفضه شو التخصصات الي عندهم
وسلامتكم ^_^

شمعة أمل

12-08-07 ||, 10:46 PM

^
هي معترف فيها في لندن لكن هني لا
يعني
هي جامعه معترف فيها وتييج شهادتج من لندن .. يعني بينكتب في شهادتج انج انتي دارسه في لندن مب دبي لانها فرع جامعه بريطانيه .. ف شهادتج تيي من عندهم .. يعني شهادتج تكون أقوى من لو كانت معترفه في الامارات .. لانه لو اعترفو فيها هني بيكتبون في شهادتج دبي بدال لندن

عن النسب ماعرف وبصراحه ماشوف انه مهم بس انصحج تاخذين التوفل ولا ايلس عشان يطوفونج الانجلش واذا انتي اكبر عن 20 مادري 21 بس تدرسين 3 سنين باكلوريوس
غير انج انتي مواطنه .. ف بيسوولج اكسبشن لانه هم يبون مواطنين زياده
والتخصصات .. بزنس ويا انواع البزنس
ميديا ويا انواع الميديا
كمبيوتر
وسايكولوجيي الى اظني تسمونه علم نفس بالعربي؟ لول ماعرف

دموع قلم

12-08-07 ||, 11:12 PM

بنـت الدلـع ..

اممممم ..
ليـش في 20 أسبـوع هـو الأفضــل ..؟!
عشـان مايكـون ضغـط عـلي ولا ..؟!

شمعة أمل

13-08-07 ||, 01:34 AM

20 اسبوع = سمستر واحد في جامعة زايد
لو تسوينه بهالطريقه بتكونين منظمه وتعرفين بالضبط متى بتتخرجين .. يعني بتتخرجين في اخر سمستر ومب نص سمستر .. غير انه مجموعة البنات اكثر ف بيكون عندج خيارات اكثر من ناحية كلاسات وجي عن الى يبدون في النص

انتي خذي التوفل وسيده دخلي جنرال عشان تفتكين .. غير انه بتتخرجين في 4 سنين .
الردنس بهدله و *ملل* .. وبياخذج وقت اكثر عشان تتخرجين