يوميات موظفــــــ/ ـه

[الشوق]

الســـــــلام عليكم ورحمة الله وبركاته و :m_mar7ba:
عدت اليكم مع موضوع جديد واتمنى ان ينال اعجابكم .. بس ها لازم اشوف مشاركاتكم ..

.

.
.
موضوعي راح يكون عباره عن ((يـــــــوميـــــات موظـــــــــــف ))
واي حد من الاعضاء عنده يوميه من هاليوميات او حاب يعلق على اي يوميه ( فليدلو بدلوه ):a018:
.
.

موظفــــــ/ ـه
صارلها فترة طويله تشتغل .. وحق السوالف رقم 1 .. يوم اتشووف الشياب والعيايز ..
اتعاملهم احسن معامله .. وتحسن اليهم .. وبتطلع نص اسرار بيتها لهم ..لكن يوم بتشوف الفقارى والهنود ... اتجز منهم ... والمعامله اللي المفروض اتخلص في خمس دقايق بتخليه امخلص في ربع ساعه ... شو السر يا ترى ؟؟
.
.
.
موظفــــــ/ ـه
ياي علشان يثبت نفسه اب نفسه ... وفجأه يشووف نفسه بين خمس موظفات وهو المغلوب على امره .. زميلاته بنات .. ومسؤوولته بنت .. ومديرته بنت .. يقووول بينه وبين نفسه . حظي حلو يا ترى اني بين كل هالوروود .. والا بس راح اكون في ورطه لما اتشووف هي نفسها علي ... يا ترى كيف اتعامل وياها ..
.
.
.
موظفــــــ/ ـه
عميل جدامها ... والسماعات في اذنها .. ويقولون انها في قسم خدمة العملاء ... اتعين العميل ..
لكن مخها مع الطرف الثاني اللي معاها في التيلفون .. اتخلص ابسرعه .. لكن يا ناس .. كيف الواحد يروم يشتغل ويدق سوالف في نفس الوقت .. وكيف بتكون الخدمه حلوه دام ان هناك من يجعلك تستمع لنصف مكالمته دون استئذان ...
.
.
(( أكيد شفتوا مواقف كثيره من موظفين اتعاملتوا وياهم .. عشتوا معاهم .. خلونا انعيش هالمواقف واتخبرونا كيف راح تتصرفون .. واي حد عنده موقف .. فليدلو بدلوه ... يمكن نعطيكم حلول ونسمع لكم :a018:

تحياتي / ولي عوده مع يوميات موظفــــــ/ ـه.. اخرى
اختكم/ الشوق
10-06-2007
:fa35: :fa35:

[بنوتة جميرا]

اكره معامله الموظفات اللي في مراكز العيادات الحكوميه
يوم اسير اودي اخويه الصغير حق التطاعيم
بعضهن معاملتهن جد زفته
خاطري اعطيها كورس في الادب وكيف تتعامل مع الناس
وعقب اتي تشتغل
لانهن والله مب ويه شغل
يوم هن مب طايقات عمارهن اشحقه يشتغلن؟؟!!

كل الود والتقدير لج اختي ع الطرح المميز

واذا حصلت شي زياده لي عوده

[الجنيه]

السلام عليكم ورحمة الله وبركاته ....

الشوق الموظفين الي تطرينهم منهم آلاف مؤلفه مكرسين انفسهم للتغصيص ع الغير وعيش حياتهم العمليه بالكيف *_* الحمدلله اني مش منهم ....

قهرني موقف صار لي من فتره قريبه وايد حرمة يرانا حليلها متكله على الشؤن وظروفها صعبه ومثل كل سنه لازم اتيب شهود يثبتون حالتها وبما انها حرمة يرانا وحق الجيره واجب علينا سرنا وياها انا واخوي وولد عمي الشهود ... اول ما حدرنا انا وياها ع مكتب البنات كل وحده تتطالعنا بطرف عينها جنه يايات نشحت منهم والحرمه مسكينه مب مصوره جوازها يعني يايبه الجواز الاصلي تخيلي الي ع الكاونتر بكل وقاحه اتقول لها اشعنه مب مصوره الجواز ؟؟؟ بطريقه خايسه وعقب ردت الجواز عليها بـ شبه فره اونه سيري صوريه وارجعي باجر ( كانت الساعه 12 ودوامهم يخلص 2 ) جان ارد عنها وقلت لها ما يباله ربع ساعه وبنرد لانه فيه محل تصوير قريب بكل وقاحه ولوعة جبد اتقولي لا باجر احسن ..

عصبت وماخليت شي ما قلته لها هزاتها واشتكيت عليها مب لاني ابي اراويها انا شو اقدر اسوي بس لانه ما عيبتني نظرتها للناس المحتاجه الي ايونهن بعدها لو تدفع من جيبها ما ادري شوبتسوي ....

الكلمه الطيبه اهم واحلى من اي شي ثاني في التعامل مع الناس

[الشوق]

بنوتة جميـــــــرا ...
شاكره لج لهالتواجد يالغلا ..
تدرين اهم شي في العمل هو إرضاء العمــــــــيل او الجمــــهور ..
بمعنى اذا كنت اشتغل في مكان واحس برضا العميل وان العميل طلع من هالمكان هو راضي ...
فليضع في باله انه هو طلع وراح ايييب 9 عملاء غيره ...
وهالشي راح ياثر تاثير ايجابي في العمل ..
الا وهو ارضاء نفسي وارضاء العميل وارضاء مسؤولي ..
وبحس بالرضا اني ساعدت غيري وبطريقه جيده بتعاوني معاهم في حل المشكله
.
.
شاكره لج يالغلا وخلينا انشووف تواجدج
لان اكيد لي عوده

[الشوق]

الجنيــــــــــه :-
صدقـــــــــتي .. يالجنيه .. وموقفج هذا ذكرني اب كلام اربيعتي اتقول كانت تشتغل في احدى الجمعيات الخيـــــــــريه .. وطبعا هناك ايوونهم ناس من متختلف الاجناس ..
دايما اردد واقوول اذا بغيت اتصدق على الفقير والمسكين وابن السبيل .. اذا بغيت اتصدق على المحتاج واليتيم .. اذا بغيت اتصدق على الناس اللي ما عندها شي تاكل ...
لكن يوم انحس ان معاملة بعض الاشخاص العامله هناك اتهين الاشخاص المحتاجه ..واتحسسهم بالذل والاهانه .. (( ومثل ما قلتي كانهم يطرون )) فأقول افضل كرامتى وعزتي ..
لكن وين الموظف المثالي المسؤول عن رعيته وعن شغله وعن الناس اللي اييووونه ...
قريت في المجله من فترة ان واحد انتحر لان ماامحصل اكل يعيل بيته ..والمقصد راتبه ما يسد ..
مااقول غير الله كريم
سلمتي يالغاليه ع التواجد ..
خليتيني اطلع اللي في خاطري
والسموحه
اختج/ الشوق
:inlove: :inlove:

[ملانـة]

و عليكم السلام و رحمة الله و بركاته..

اتصدقين.. في لحظة شكيت انج تكتبين عن قسمي (خدمة العملاء) لأنه الثلاث حالات اللي ذكرتيهم تصير عندنا لووول:birgits_giggle:

اتذكرت موقف صارلي في العيادة اللي في منطقتنا... كنت سايرتلهم عسب يعطوني موعد حق مستشفى الوصل قبل لا أربي و خيستني ربع ساعة جدام الكاونتر (هذا و انا حامل في الشهر السابع).. آخر شي شو تتوقعون تقولي؟؟ :look:

اونه : اختي هذا رقم قسم الأشعة في المستشفى اتصليبهم و خذي موعد يمكن يردون عليج لأني اتصل من الصبح و لابسيني!!!!! :k_shock_1: تخيلوا!!! جان اقولها يزاج الله خير و طلعت و قررت اربي في ويلكير..!!

لو افترضنا انها فعلا كانت تتصل و ما يردون عليها,, المفروض انها أولا ما اتخيسني جدامها و تيلسني لين ما تخلص معاملتي و ثانيا ما اتشوه سمعة الجهة اللي تشتغل فيها و تقول انهم ما ايردون ع المكالمات!!! ابسط شي اتسويه انها تاخذ رقمي و تتصل فيني اول ما تأكد الموعد معاهم و هالشي نسويه نحن بشكل شبه يومي في القسم عندنا في البنك...

الحمدالله ع كل حال

[الشوق]

مــــــــلانـــه ..
المشكــــله انهم يؤثرون على سير العمل ...
ويؤثرون ع اسم ومكانة الجــــهة اللي يشتغلون فيه ..
.
.
فمثل ما اتقولين الكلمه الطيبه هي احدى الطرق االلي اتوصل الى ارضاء العميل

[المزوحي]

مرات يوم أسير مكان وأشوف الموظفـ/ــة

يكون بطئ في المعاملة أو يتم يتكلم مع اللي وياه عن أمور خارج الدوام وأنا انتظر ...

أقول لو أنا مكان هالموظفــ/ــة مابعطل الغير ..

وآخر موقف صار لي ... في مركز اتصالات ...

عسب اطلع باس وورد للنت ...

في واحد يالس على كاونتر الاستعلامات .. توني بسأله وين اقدر احصل ...

لقيته دزالفورم وقال عبي الفورم وهو صاد على واحد ياينه يضحك وياه ....

قلت له لكن انا ماعرف شو اسوي بالفورم .. لأنه اسلوبه خايس ...

شل القلم وحط اكس اللي المفروض امليه ..

[الشوق]

عدنــــــــــــــــا ,,,,:a070:

موظفــــــ/ ـه
ضحوكه .. فرفوشه مع زملاءها في العمل ,,, شغلها اتخلصه في وقته ..
لكـــــن هي ما تعرف الوقت مره .. يعني اذا الدوام يبتدي الساعه 8 هي تحظر الساعه عشر واتخلص على نفس وقت الدوام بالظبط .. لا زياده ولا تعويض للوقت اللي اتاخرت فيه ..
ويوم العميل يتصل يستفسر عن شغله ... طبعا الحبيبه بعدها ما وصلت والسبب ... منبهها كان امعطل هاليومين ...
(( ودومه يتعطل هالمنبه - او - ما ينسمع له حس ))
.
.
.
موظفــــــ/ ـه
مسؤوول متناقض ..... .. طيب القلب .. لكنه خبيث ...
مهتم ان يخلص شغله لين اخر . لكن تدقيقاته على معاملات موظفيه بطريقه غير شرعيه ...
يحب يراوي الناس انه هو الوحيد اللي يشتغل .. ويتكلم على سلبيات فلان وعلان ....
وماامخلي حد ماامقطعنه ... لكن مشكلته ينسى مبدأ ( اللي يتكلم على غيرك .. اكبد بيتكلم عليك في يوم ))
فحاسب عن اتطيح تحت هالمسؤووول
.
.
.

موظفــــــ/ ـه
رقيقه لابعد الحدود ... ومن رقتها ... اتخلص الشغل بكل بطىء ..مثل السلحفاة ...
يتم العميل عندها ؤبع ساعه علشان اتخلصه ... وبالرغم من بعض السلبيات اللي اتحصله من خلال هالتصرف الا ان عندها ايجابيه حلوه .. ان التأني في الشغل يطلع من وراه شي نظيف .. بمعنى ان معاملاتها اتكون خاليه من جميــــــــع الاخطـــــــــاء ,,,
.
.
.
تحياتي للجميـــــــــــع :a033:
ولي عوده مع نماذج اخرى من يوميات موظف وموظفه
بس على فكره ما شفت منكم تفاعل :redface2: شكله الموضوع ما عيب البعض

[ألم ترى]

بسم الله الرحمن الرحيم ..

هلا اختي ..

عيبني طرحك وخاص كـ عبره لـ الموضفين و الموضفات :smile2: ! ..

ربي يعطيك العافيه ..

متابعين بعون الرحمن :fa35: ..

[هزاايم]

............

[أمرين]

يعطييج لعافية :) عزيزتي

حلوة القصص

[الجنيه]

صباحكم ورد

عـدنا من جديد ومن قلب الحدث صاير موقف طازج فرش لازم اخبركم عنه *_*

بعترف بشي المفروض ما انسويه كـ موظفين ....

طبعا أول الصبح كان المود داااااااااااااااااااااااا ااااون بالقو وما عندي استعداد استقبل اي حد ومن غير موعد مسبق طب عليه واحد من العملاء وانا احتسي قهوة الصباح ... ما اقدر اقول شي غير اني اخلص موضوعه بس طول الوقت كنت مكشره والريال فقير ساكت وما يرمس الا بما قل ودل واخر شي عقب ما خلصت سلمته معاملته وابتسمت
جان يقول ان شاء الله دوم مبتسمه لاني الصراحه حسيت بج معصبه اول ما ييتج وكنت مفتشل منج

جاااااااااااااااااااااان ويهي يحترق وحسيت بالاحراج وقلت في خاطري شو ذنبه هالفقير اذا انا مزاجي متعكر ليش احسسه انه ثقيل واني اشتغل من ورا خاطري ,,,

ادري وايد منا يسون هالشي بس لازم يعيدون التفكير بالي يسونه

الشوق ,,,, يسلمو صدق اني هذربان *_*

[الشوق]

الم ترى
خلك متابع ونتمنى انشوفك متواصل ويانا .. تسلم ع المرور الجميل يااخوي
.
.
.
هزايم
مرورج جدا مميز فما بالج اذا صغتيه ببعض اضافاتج نترقب ردودج وجديدج يالغلا
.
.
.
أمرين ..
الله يعافيج يالغاليه تسلمين ان شاء الله تستفيدون ..
.
.
.

قريبا جدا مع .... يوميات موظفــــــ/ ـه.. اخرى

[عنود الريف]

موضوع حلو الصرااحه وبما ان انا بعدني طالبة بتعلم من هالنماااذج ...

متاااابعه وياااكم

[خنفروش]

موضوع جميل .. إذا ماقدرت أرد يكفيني شرف الحضور

[الشوق]

عميــــل متنقـــــــل بين ايد .. موظف ليد موظفه .. في ظل انه ياخذ معلومه عن معاملته ولا امحصل .
والسبب (( كثرة الاستقالات والتنقلات بين الموظفيــــــن ) وما انقول غيــــــر وين الدورات اللي يتكلمون عنها في بعض الاماكن .... لان اللي ييلس على كرسي مجرد كرسي وراتب في الجيب .. شو فايدة يلسته عيل .. حاله حال المتقاعد .. اللي يستلم الراتب ويالس في البيت ...
.
.
موظفــــــ/ ـه اتزن واتنم الا فلانه سوت وعلانه قالت .. وشفتوا هذي الله يقطعه .. وشفتوا وووع عليه
هالعميل من ريحتـــــــه .. والا الحقــــــــوا دريتوا شو صار وشو استوى ...
ما خلت قسم ولا ايميل ما راحت طرشت الاخبار ووصلته اتقولون صايره ( الســـت حشوووره ) ...
وحتى العميل اذا يا عندها بدال ما تنهي الشغله اللي ياينها بتعطيه التفصيل العام عن كل اللي جرى .. وهلم يا ترى ...!!!

.
.
.
وووووتابعونا .........

[لبن مثلج]

السلام عليكم

والله يالشوق رديتيني لايام زمان ،، ايام الشغل:a058: في التراخيص الطبيه

الصراحة كنا نعم الموظفات في هالمجال .. لكني كرهته في الفتره الاخيره لاني حسيت اني مجابله الرياييل اربع وعشرين ساعه .. :m_mar7ba:


لكن في مره من المرات .. سرت ادراة الجنسيه اللي في بن سوقات حق الهويه قبل مايسون الهيئه
اصدقين اني كنت واقفه فترة طويله والمكان ضيق وكله شباب ... ويهي احمر حسيت اني غلط في هالمكان والبنيه اللي يالسه اخر الكاونتر امطنشتني ...:a058: الصراحة قهرتني سرتلها وسالتها جان اتحيس بوزها وتقول نعععععععععم ،، قلت فخاطري شو الخدمة اللي تفتح النفس :k_nono: وعقبها قالتلي ماعرف واتففت ،، وانا ياللبن :k_puppyeyes: .. قام الفقير الولد اللي يالس على الكاونتر الثاني وزقرني بكل ادب وجاوبني ...

يعني وين خدمة العملاء والاسلوب الحلو .. والله يختي يوم كنت اشتغل كان مديرنا يدقق على هالسوالف وايد كان يقولنا انتوا سيروا حق المراجع قبل ماهو اييكم ومب العكس .. وعليكم بالابتسامه الحلوه والاسلوب الحلو وو... وساعات كان يراقبنا سواء بالتيلفون او بحضوره للمكتب :ohboy:

[شهوووودة الأمورة]

حلو الموضوع يالشووق ..

متابعه .. ما عندي شي اضيفه

[الشوق]

اصبح العمل كروتين في حياتي ..
بالرغم من اختلاف الوجوه والناس .. وتقارب المشاكل .. واختلاف الأسئلة ..
لكن دائما ما يكون هناك موقف .. قد يكون طريفا وقد يكون .. مزعجا بعض الشيء ..
وهنا في هذا الرد احاول اغير نمط الموضوع لكن في جو العمل الوظيفي ..

مقتطفات
.
.
عميل متطلب . لدرجة كبيره لا يستطيع ان يوزن امور حياته .. ولا يعلم كيف يجاريها .. في حين زيادة راتبه تجده اول الحظور من اجل طلب .. قرض وبطاقة فيزا الى ان يصل الى المكشووف .. ... لدرجة انه لم ينتهي نهاية الشهر حتى تجده يأتي مستنجدا في طلب كشف حسابه ... وبالرغم من طلباته الزائده ...الا انه رغم مشاكله الماليه فهو انسان مؤذي .. للموظفين .. من اول موظف يتعامل معه حتى يصل بمعاملته الى اخر معاملته ...

.
.
عميل
يأتي لينهي معاملة له . نجده في لحظه يطلب يد احد الموظفات طالبا يدها للزواج ..
.
.
عميل
خارجا من سوق السمك .. زائرا للبنك لكي ينهي الموظفين احدى معاملاته .. متناسيا ..
ان حتى يقابل الناس عليه ان يكون منظره جميلا في اثناء مقايلته للناس ..
.
.
عميــل يخاف من ان معلوماته البزنسيه تتسرب في ايدي موظفيه او حتى اي موظف يعمل لديه .. وعندما ياتي الى البنك .. مطالبا بأن نعطيه رصيده المتوفر في البنك .. يزلزل البنك فوق تحت وذلك لان طالبناه فقط بالتوقيع للتأكد من هويته .
.
.
عميل يجد ان احد الموظفين يعمل بكل كد ويقدم المعلومه الصحيحه .. يطلب من هذا الموظف ان يعمل لديه .. مقابل راتب مغر .. ووظيفه اخرى..
.
.
و
و
و
تــــــــــــــا بعونـــــــــا

[رمــش الغـــلا]

متابعهـ عيبني الموضوع

انا طالبهـ ما عندي شي أضيفهـ لج ^^

[طفلة من هذا الزمان]

بتثاقل .. أفتح عيناي كل صبــاح .. أغلق المنبة مرارا أستجدي فيها بضع دقائق من نوم .. كسل جميل يتسلل إلى جسمي .. و شيطان رجيم يهمس في أذني " لا تذهب .. نم بعض وقت بعد " .. ضميري (ربما) يخبرني أني قد استنزفت كل طاقة إجازاتي العارضة كانت أو المرضية .. فلا أعـذار عادت تصلح .. و لا صبر لمديري لمست مذ آخر المرات التي فيها تغيبت ...

أعتدل في جلستي رافضا أن أغادر مكاني .. أستنجد ببعض قـوة أن تحتـل جسمي وتدفع بي خارج سريري ... أو ربما دوامة نوم تغرقني فأنسى .. أنسى كل شيء .. كـــل شيء ...
ولا شيء يحدث ..

أعتدل أخيرا في جلستي .. و أنهض مطلقا زفرة حــادة أشعرها تحرق صدري .. أتحسسه.. يا إلهي .. من يبدأ نهــاره بــ "أفــــــــــــــــــــــ" مثلي .. أقسم أني ما كنت هكذا يوما .. أذكر جيدا حينما ما زلت متدربا .. كنت أولهم في الحضور .. رغم أني حينها لم أكن أتقاضى أي راتب جزاء عملي .. كنت نشيطــا .. مندفعــا لتقديم الأفضل .. كان نفسه مديري الحـالي يثني علي مرارا .. وتكرارا .. يثني على همتي و أدائي العــالي و تفاني في العمــل .... يخبرهم كلهـــم .. "كـــونوا مثلـــه "

كيف وصلت هنا ؟ للدرجة التي بت فيها أكره صباحاتي .. أكره حقــا مجرد فكرة أنني سأصحو غدا لأؤدي وظيفة (ظننت ) يوما أني أصلح لهــا .. وأجدني اليوم لا طـــــاقة أملك .. البتــة ... تحولت لرجل آلي يؤدي مهامه لمجرد تمضية وقت .. تضييعه حتى أغــادر هذا المكــان ..

هناك .. أشعر بالجدران تضيق علي .. أشعر فجأة بالإختناق .. ودخـان يستوطن رئتاي لا أحد يعلم مصدره .. يتلفتون معي يبحثون عن رائحة ما .. و لا يجدها سواي .. رعشة أطرافي لا يخمدها سوى الكثير من الكافيين الذي صرت أتجرعه ليمضي بي نهــاري .. أنا الذي كنت أقاطع أي مشروبات تحوي مواد منبهه وأعتمد على Diet صحي وبرنــامج رياضي ليومي .. كنت يومــا أخطط .. ليومي .. كما قد خططت مسبقا لسنواتي .. كنت أعرف من أنــا .. كنت أعرف من أريد أن أكـــون ...!!!

واليوم أصبحت مجرد عدد .. عدد يسهل نسيانه في ذاك المكتب الكبير المليء بالوجود التي لا تتذكر اسمي عادة .. وجوه تأتي و تذهب .. سواي .. لا أعلم أين أذهب !! لا أعلم ماذا حدث ؟!!

قد يكون السبب حين كافأني مديري يوما على جهودي بترقية سواي .. زميل لم أعلم وجوده سوى أن لاسمه نبرة خاصة حين يذكر .. ووراءه اسم والد يقف له الجميع حين يدخل .. و(طويل العمر)تتلاحق على ألسنتهم جميعا ..... أو قد يكون السبب .. تفضيل مديري ثلة من الزملاء الذين يمضون النهار في إطلاق النكات و المزحات .. وقراءة الجرائد والإتصالات علي .. فأدرج أسماءهم في دورات خارج الدولة كنت أجتهد لأحصل عليها ..... ولا يحـــدث ..


وربما لا شيء من الأسباب قد يكون السبب.. وقد أكون ..وحــدي .. أنــــــا الســـــــبب !! .....

اليوم مديري يقول لهم " لا تكـــــــــــونوا مثلــه .... لا تكونوا مثلـــه " .. ضحكة أغتصبها من شفتاي .. وأشعر بالحرقة في مكان آخر لا أعلمه ...


صوت المنبه من جديد .. أوووووه تأخرت ثانية .. هه .. ثانية و للمرة الألف ..........................................


مجــــــرد موظــــــــــــــــــــــ ــــــــف - ..

الشـــــــــــوق ،،، حبيت أسمح لخيالي يشطح ..
أشكرج على المســـــــاحة ،،،

تحيــاتي لج ،،
طفلـــــــــة .......