الدراسة في هالزمن ..

[أميرة الود]

السلام عليكم .. أشحالكم عساكم بخير .. أسمحولي انقطعت عن المنتدى كان عندي امتحانات تقويمية و عقبها نهاية العاة أدعولي بذيج الدرجات السنعة ..
المهم أنا ما بطول عليكم .. أنا أبي أناقش وياكم موضوع المدارس و الأنظمة اليدية ..
أتعرفون أنا أشوف نظام السيبا حق الثانوي مش مناسب أبد .. و لا نظام الفصلين ..و لعلمكم السنة و السنين الياية ما فيه شي أسمه أوائل ثانوية .. "مبروك " و لا بعد طالعيلكم بمشروع يديد على قولتم " مدارس الغد" هذي المدارس الله يسلمكم يجمعون فيها الطلبة أو الطالبات من صف أول إلى الصف الثاني عشر في مدرسة وحدة .. و ازيدكم من الشعر بيت أجانب اللي يدرسون فيها .. و مواد العلوم و الرياضيات بالأنجليزي حق المرحلة الأولى " من الصف الأول .. لين خامس" شوه هذي القرارات السخيفة .. يعني الأجانب في بلادهم يدرسون عيالهم اللغة العربية .. نحن ما نقول ما نبغي نتعلم إنجليزي نحن نبى بس مب بهاذي الصعوبة .. و يعلم الله أن اشكثر متعذبين في المدارس من كثر هذي الأنظمة و القرارات ..
أبي تفاعلكم وياية .. لا تخذلوني ..

[بنت الدلع]

انا بعلق على شي ثاني > اذا ممكن

ميخصه في الموضوع
بس شي قاهرني

نظام النسبه المئـويه

نظام غبي ومايبني الطالب في الأساس
الجامعات الي برع ماعندهم والله ييبي النسبه الفلانيه عشان تدخلين التخصص الفلاني
كل جامعه ولها نظامها
تبين هاي الكليه سوي هالامتحان وييبي هالدرجه
مايبتيه ترومين تسوينه مره ثانيه

هني لا

بتكلم على نظام السنوات السابقه

درسي كتابين كاملين
والدرجات مب محسوبه الا حزت الامتحان
الطالب مرض استوى به شي
نفاد ينفده
ماعنده شي يساعده

واذا ماياب النسبه المطلوبه مستقبله ضااااع وتحتها خطين
ومخططاته فشلت وتحتها 3 خطوط
وطموحاته انه يستوي الانسان الفلاني ولّت

طيب انتو تبون تاخذون افكار الغرب
ودراستهم
ليش ماتاخذون هالنظام
كل كليه لها امتحان تحديد مستوى الطالب يذاكر ويمتحن
وبيدش التخصص الي يبااااه
مب والله اذا يبت تحت الـ 80 مانقبلك
وكل سنه يرفعون النسب

اذا عندي شي زياده برد اعقب

[بوزايد]

ويلكم باك فيرستلي


نظام السيبا انا اشوفه اوكي عشان اصلا الناس تروح الجامعات ولا فاهمه شي بالانجليزي يعني حرام تضيع سنه او سنتين بالجامعه وبعدين ينطرد الشخص

يعني لازم المدرسه المؤسسه للطالب اتخرجه على انه مؤهل ع الاقل ع اساسيات الانجليزي

نظام الفصلين اشوفه اوكي لانه اصلا يريح الطلاب اكثر مب زمنا نحن كنا مضغوطين وايد والي جرب نظام الاولي ما يتمنى يرد يمتحن مره ثانيه انا اتكلم عن الطلاب المتفوقين مش الناس الي بس يبون النجاح

بس اوائل الثانويه مش حلوه لو في اوائل احسن

مشروع الغد زين من ناحيه انه يدرسون مواد العلوم والرياضيات

لانه اصلا الانجليزي لغة العالم ولازم نتعلمها

ولازم اجانب مش عرب لانه العرب حتى لو يدرسون بالانجليزي نص الكلاس يرمسون عربي شو استفاد الطالب

ومب زين انهم يجمعون الطلاب من الصف الاول لين ثالث ثانوي لانه بتستوي مشاكل ما ابغي ارمس عنها

والسموحه

[العجيبة]

هذي هي الدراسة والا بلااااااااش

يعني الله يخليج انا خلصت الثانوية هالسنة .. سأليني شو اللي اعرفه ؟

يا دووووب أعرف أكتب اسمي بالعربي والانجليزي وأعرف 1+1 كم ..
حتى جدول الضرب اللي فوق الـ 5 ما أعرفه عـدل ..
شو سوتلي المدرسة ؟ ولا شي .. يمكن عرفت أشياء ما كنت أعرفها قبل .. واسأليني عنها الحين ما بعرفها !
لو دارسة مثل ما درسوا من زماااان عند المطوع بطلع بنفس اللي طلعت به الحين وفـوقه حافظة القرآن كله ..
لذلك أنا أحيي فيهم هالنـزعة اليديدة في تطويـر التعليم اللي يــت متأخــــــــرة بوايــد ..
عمـومـا بتفيد عيالنـا وأحفـادنــا إن شاء الله !!

[الـيـاه]

بالعكس ها كله لصالح الطلبه ..
والا واحد يطلع من المدارس الحكوميه مايعرف يقول جملة وحده عدله بالانجليزي !!!!!

والسيبا اشوفه احسن لهم .. يعرفون كل واحد وشو الـ level اللي لازم يكون فيه فالجامعه .. والا
تبونهم سيده يحطونهم major وفي منهم essay مثل الناس مايعرفون يكتبونه ؟


أنا اشوف زين منهم قامو يطورون المدارس الحكوميه
واحس بالعكس - المدارس الحكوميه فالمستقبل - يمكن تنفاس المدارس الخاصه ..


.
.
.

[الشيـــن]

وايـد أحسن صدقيني ..
لاتجـوفينه من ناحية صعب وسهـل وأجانب وعرب ..
ع الأقل جي يتخرجون ويبين عليهـم شي ..
مب نـدرس أشيـا [ غصبـاً ] عنـا .. ونحفظهـا ولا نفهمـها ونسير نفرغ الي فـ مخوخنا
ف ورقة الامتحان ونطلع من الامتحان ناسين كل شي ..
بعيد عن المناهج طريقة التـدريس فـ بلادنا مش لهناك عند معظم الاساتذه ..
يدش الاستـاذ .. يكر الي عنده واليوم الثاني يسأل الطالب عنه .. والي مب فاهم ولا حافظ
يا ينقص درجات وعند المتخلفين .. ينظرب !! وين يبووون !!

وعن الانجليزي والسيبا وهالسـوالف ..
صدقيني وايد أحسن .. يعني تخيلي واحد دارس 12 سنة .. ومتخرج من المدرسه
مايعرف يقـول جمله كااامله عدله بالانجليزي ؟
شو فايدة الـ 12 سنة عيل ؟


وتعقيبـا ع كلام بنت الدلع
صدقج .. يعني الواحد مثلا بيتخصص تخصص [ أ ] .. ودارس وايد أشيـا أو مواد
تخص تخصصات ثانيه [ب] و [ج] و [د] ...etc ..
درجـته فـ المادة الي تناسب [ أ ] .. عاليه ويمكن كامله بعد ..
بس الي منزل نسبـته .. المواد الي مايخصها فـ السالفه .. مب حرام جي ؟
أوكي مثلا يخلـون نسبة حق نسبته أيام الثانويه ونسبة حق الامتحان اللي يأهله لدخول هالتخصص
أو لا ..
وعقب يشوفون النسبه النهائية .. اذا اتأهله ولا ..

ع العموم ..
صح انهم بـدوا يطورون متأخر .. بس الحمدلله وان شالله من أحسن لـ أحسن ..

[أميرة الود]

هلا .. أخواني الأعضاء .. أشحالكم .. مشكورين كلكم على مروركم الطيب ,, و الله ما كنت متوقعه أنكم بتردون علية قلت بتحقروني .. المهم ما علينا ..
و الله ياأخواني أنا ما أعترض على نظام الفصلين بالعكس أنا عيبني و هوه مريح للطالب .. بس اللي مغصص عليه أكثر هوه نظام السيبا .. لوكانوا معتمدينه من المراحل اللي مر فيها الطالب من قبل الثانوية بيكون وايد أحسن لأنه إيي أخر سنة في المدرسة و اللي بتحدد مصيرهم و مستقبلهم و يطبق عليه هذا النظام و يكون في كل المواد مرتفع و يمكن فل مارك و يي في الأنجليزي يا راسب يا درجته الحمدلله ناجح و على الحفة بعدين تنزل النسبة ..

[ولد الشحوح]

النظام اليديد عطا ناس ما تستحق النجاح درجات عالية
وناس نسبتها المفروض تكون ب 90 توصل ال 80 %
لو أتكلم وأطلع اللي فخاطري بتعرفون حقيقة النظام اليديد

[الشوق]

الله يسهل عليج ويوفقج
لكن عذرا اختي ينقل الموضوع للجامعات والمدارس
هناك مكانه المناسب ..
تحياتي / الشوق

[أنامل قلب]

السلام عليكم عزيزتي أميرة الود ..
أول شي حياج الرحمن إخت يديده لنا بهذي الأسرة الطيبة ..
واللي سرنا فعلا انضمامج اللي من أوله ظهر قوي .. (( دامه يخص المدارس والنظام اليديد ^_^ ))

:

اممم .. بالنسبة للموضوع الصراحة ..
وايد تكلمنا عنه .. والحجي فيه وصل حده ..
بالنسبة للنظام اليديد .. وبعد ما هلكنا واحنا نذاكر ويدوب لحقنا نخلص تأكدت فوق ماإني كنت متأكده
بأني نووواااي كنت بقدر أدرس الكتاب كله شرات ما سوو قبلنا .. والدليل (( الفيزياء )) اللي ليما الحين ماني مصدقة اشكثر خبصت به ..
ووصلت لدرجة إني احاتي فيها الرسوب >_< (( شي تاريخي لازم يحطون ابـ كتاب في مثل هذا اليوم لول ))

ومع اقتناعي بإن النظام اليديد أشوا عن قبل إلا إن نسبتي نزلت فوق الـ 10 % عن مستواي المعهود .. !!
يمكن لأنهم يابولنا القرارات فجائية خاصه بالفصل الأول ..
وصدق ماكانو مرتبين أمورهم ولا حتى الابلوات عدنا عارفين وين محلهم من الاعراب ..
كل ما سألناهم شي قالولنا : ماوصلنا خبر .. #_# ..
وحتى الامتحانات ما فلحنا ابهم .. صارت كل وحده تسأل الثانيه (( المتفوقات )) : بكم ماده رسبت ..
واللي نجحنا درجات التقويم ..
شو استفدمنا عيل .. دامنا انشغلنا طول الفصل بالتقارير والانشطه .. ويينا عالامتحان وخبصنا ..

أهو كنظام وافكار اوك ما بنقول شي .. بس يرتبون قراراتهم وينظمون امورهم ..
مب كل شي مخربط .. وبعدين قبل لا يطالبونا بهالأشيا اللي بالنظام اليديد لازم يأسسونا قبل عليها .. مب إيونا مره وحده وسوو وهاتو .. !!

وعن السيبا .. فهو حلو انه يعتبر امتحان يقيمون فيه مستوى الطالب بالانجليزي عساس يراعون قدراته وامكاناته بالجامعه .. وهذا أكيد لصالح الطالب..
بس الخطأ اللي متجاهلينه إن اهم يبون من الطلبه يمتحنون السيبا .. يعني يمتحنونا بلغه كامله اعتمادا على قدراتنا الخاصه ..
بمعنى إن نحن دخلنا مب داقين الكتاب يدوب مرينا عالمعاني اللي فيه .. ليش .. لأن مابه شي يفيد .. !
وطبعا ما بندرس الـ 2500 كلمه اللي يبونا نحفظهم بيوم وليلة .. وبعدين هذي لغه مب لعبه .. لازم نكون متمكنين منها بالممارسه والمحادثه ..
يعني عدنا الفالحين بالانجليزي اهمه اللي إما كانو بمدارس خاصه أو يتابعون بامتياز الافلام والمسلسلات الاجنبية ..
أو لهم علاقات تجبرهم باستخدام اللغه وبالتالي تمكنهم منها ..

أما الباقي خرط .. يعني نحن .. حصة الانجليزي عدنا شرات العربي ..
يدوب وحده تقرا والابلة الترجم ..
ما أقول ان اللغه الانجليزية صعبه .. لكن أكيد ما بنفلح فيه يوم ان كل اللي ناخذه حفظ كلمات وتطبيق قواعد ..

عبالهم كمبيوتر يسيف المعلومات والسلام ..
مب جنه أوادم محتاجين اسلوب معين للتدريس ..
واذا بيخلون المناهج كلها بالانجليزي من اول ابتدائي بعد أحسن واحسن ..
ورايي يخلونه من الروضة بعد .. لأن الياهل بسرعه يتعلم وبيتأسس بطريقة سليمه .. وبيتمكن من اللغه ..
مب يونا عآخر سنه لنا ويقولولنا الحين درسو اللغه عدل ..
ليكون مسألة حسابية وانا مادري #_# ..

وطبعا دون اهمال اللغه العربية .. مافينا بعد يطلعون الاجيال الياية أجانب قلبا وقالبا بعد .. !!

:

والسموحه منج خيتو عالاطالة والهذره الزايده ..
بس ماعليه بتتعودين علي .. ^_^ .. >>> وبالمره طلعت حرتي .. !!

[أنامل قلب]

^

بسم الله ..
مب جنه الرد السابق قصير بزود .. !!

[طير الحب]

ينقل لواحة المدارس والجامعات وان شاء الله يستمر النقاش بصورة جميلة