هوس غير طبيعي

[طير الحب]

المفروض شيء والواقع شيء آخر لدى بعضهن...فالمفروض أن تكون ستر ولكن الواقع بأنها تحولت لوسيلة جذب وتنافس وهوس بشكل لا يتصوره عقل:vertag:


انها العباءة التي من المفروض ان تكون ستر للفتاة بزمن بات صعب ولكنها تحولت لشيء ابعد ما يكون عن الستر.

ربما ما دعاني لكتابة الموضوع الهوس غير الطبيعي على اقتناء عباءة مميزة لا يلبسها احد وللعلم فقط هبطت اكثر أسهم المحلات التجارية بعد دخول المواطنات ميادين اختراع تصميم جديد للعبايات ولمرة واحدة او مرتين فقط اي احتمال ان تلبس غيرك هذه العباية معدوم وهذا ما تطلبه اكثر فتيات اليوم....فمن المعقول جدا ان تتحول 2000 درهم لعباية او اثنيتي خلا ل اسبوع من الشهر وقد باتت العباية لبسيطة تكلف بحدود 500 درهم وهذا مبلغ لا يستهان به في زمن غلاء الاسعار وهناك فئة ممن لازالت تبحث عن عباية سادة بـ100 درهم بعد ارتفاع سعر العباية السادة الى 300 درهم...ومن الفراشه للوطواط للطاووس اختلفت المعايير وما أدري اذا شفتوا العباية الي فيها حزام على الخصر هذا ما اعرف شو لزمتها...عشان الوحدة تشارك بفيديو كليب...لا والأدهى والأمر انتشار لبست البرمودات والتنانير القصيره على عباءة مفتوحة طيب لو عباية مسكرة وخامتها داكنة مش مشكله لكن ان تصل وقاحة الفتيات ان تلبس برمودا ونعال ونسص الساق مكشوف الله يجيرنا من هالزمن ويحفظ عيالنا...

طيب جد سمعتوا عن المصطلح المتدوال بنات دبي جي استايلهم وبنات الشارجه جي والوحده تنعرف من طريقة لبسها كل البنات الي يبون يظهرون مفاتنهم صاروا واحد ما عدنا نفرق بينهم لا احتشارم ولا مراعاة لدين الله..

أنا للأسف ما عدت استغرب بس الي يون جي يعرفون شو نظره الشباب لهم وهل الي تسوي جي تفكر بالزواج وهل في واحد بيفكر ببنت ما تحفظ نفسها الا انه يتسلى.

يعني الصراحه اليوم في فئة جدا صارت وقحه لدرجة تحط عينها بعين رجل لا تعرفه في اي محل تجاري.

ما دعاني لكتابة هذا الموضوع اولا بعض المعارف ممن يتعاهفتن على اقتناء العبايات كأنها ملابس ووحده قالت لوحده...ليش انتي مب عايشه معانا ما تشوفين البنات شو يلبسون لازم نحنا نسوي مثلهن:bye2:

والموقف الثاني زوجي كان رايح الجمعية وانصدم من منظر الفتيات وانا احس عادي تراني نشوفهم في المراكز ما عدت استغرب...بس استغربت من ردة فعله يقول والله حسيت اني اشوف اهل النار يقولي يا طير مش مكياج الا اصباغ مخليتنهم بشعين وملفتين والي يايه بفستان ومب قادرة تمشي يقولي لو شفتي كسف الشواب يشوفونهم باستهجان...ليش مسوين جي بعمارهم وليش الناس ساكته ووين اهلهم...اقول اذا فكرنا ننصحهم بنلقى ردة فعلهم اوقح عن الي يسونه...فالله يهدينا ويهديهم


طيب وحده رايح جمعيه ليش كل هذا ولا تحولت كل الجمعيات ل/....................؟


ونقطة عالسطر.

[بوزايد]

يالله بالستر

لا تعليق


ما اعرف شو ارد

[هزاايم]

..............

[بنوتة جميرا]

انا معاج في كل اللي قلتيه
والصراحه الواحد يقول يالله بالستر يوم يشوف هالاشكال
والواحد ما يبا يرمس ويعايب
لانه من عاب ابتلى
وهالاشكال احسهم ناس وقحين
يعني لو نصحتيهم بيكون ردهم وقح شراتهم
الله يستر ع الجميع ان شاء الله

شكرا غاليتي ع الطرح

[وحي القلم]

اقول اذا فكرنا ننصحهم بنلقى ردة فعلهم اوقح عن الي يسونه


هاذي هي المشكله يا طير

أنج ما ترومين ترمسين ولا تقولين شي

لانه بتكونين متخلفه "على قولتهم"

و الصراحه .. استوينا أوقات نحس بانه نحنى اللى شكلنا غلط بينهم من اللى يسوونه فعمارهم :fa55:

بس بعد .. ما أتخيل انه اللى تسوي جذيه تكون مرتاحه

.
.

ولا عن العبي الساده :fa55:

صدق قاصين علينا .. يعني العباه الساده بــ 300 ! على شوه ؟

ما فيها شي أصلاً عشان تكون بهالجيمه

ولا شي منهم يقولولج عشان ايحطولج التوقيع على العباه ادفعي 50 " زياده على السعر الاصلي"

و على فكره اللى يبيعون فمحلات العبي وايدين منهم يحاولون يقصون عالحريم بأي طريقه عشان يدفعون زياده !

من مده سرت بفصل شيله و بغيت أغير لون الشغل اللى فيها

جان يقول لي اللى يبيع إذا بتفصلين معناته لازم تدفعين زياده !! يعني أغلى عن سعر الجاهزه

لكنه رد نزل السعر عقب ما حس اني بغير رايي عنها :mad:

.
.


الله يكون فالعون

[حلم الطفوله]

السلام عليكم

صدق إنه هوس غير طبيعي ! يركضون ورى شيء اسمه موضه وفاشن !

إن الله جميل يحب الجمال .... بس إبراز الجمال يحتاج ضوابط ومكان وزمان مناسب :h_qor9anah:

مشكلتنا يا طير ....وايد نشوف ! بس من كثر ما نشوف ..أقول بخاطري وين محارمهم ؟

والمشكله الثانيه يا طير ....الاستغلال لكبير من مصممات العبي والشيل المواطنات !

أسميهن استغلاليات ...وكلامهن المعسول بإنه هالعباه إلي بتلبسينها مستحيل تتفصل لغيرج !

وعفكره ....فيه مصممات للهاي كلاس ...يعني أقل طقم يبدأ بـ3000 ويكون بسيط جدا !

الله يهدي الجميع ....الواقع إلي نشوفه جدامنا أكبر من احتمال عقولنا .... الله المستعان

[مــهــابه]

السـلام عـليكم والرحمه

فـعلاً اختيه ، البنات مب صـاحيات والله ، إذا نحـن البنات انطالعـهن بنظـرات استحقـار فـمابـالج بـالشبـاب

الحمدلله والشكر ، هالأيام نحـن مانشوف بنات لابسين عــبي

فـعـلاً الوضع صـاير مب طبيعـي

يـعني حركات وأفكار ماتخطر فـالبـال

وهم يتحـرون هالشي للكشخه ، امحق كشخه لو كانت جيـه !!


الله يـعين

ويهديهن ويعطيهم نعـمة العــقل

لأنهن لو يفكرن صح ماراح يلبسون جيه

[الشيـــن]

برد ع السريـع لاني بروح أرقد ..سطلــت ..

[ برمس بشكل عام مش عن العبي بس ]

المشكله ان هالبنـات مايفرقـون ..

تلاقيــن دفتر فنيه فـ ويههـا و شيلة ألوان وعبـاااه جنها فستـان الي تحتها يستر اكثر منهـاا ..
وسايره الـمول ..
يعنـي كشخه عن كشخه تفرق ..
الـمول له لبسـه .. و العزايم إلها كشختهـا .. والأعراس إلهـا لبسها ومك أبهـا ..

والله هاك اليـوم فـ بحر المشرف (بوظبي مش دبي ) ..
شلة بنـاات فالات شعـورهم وفل ميك أب .. عباه وتحتها برمودا
الحين البرمودا قلنـا يالله مال بحر
بس الميك أب و الشعر مش مال بحـر .. ولا تبين تكشخين غصب فـ كل مكان S=

كشيخـات أونهم .. بس مايعرفون وين يكشخون وكيف الشي المناسب للمكان الفلاني .!

[حركات]

هالفئه من البنات كثرن وتشوفينهم ف كل مكان

الحين ف الجمعيات او من هالاماكن اتلاقين البنت اتلامع من بعيد انا استغرب يوم اشوفهن لو ف عرس شو بيسون اكثر عن جي مستحيل :ohboy:

في منهن اتلاقينهن عندهن الميكب وهالاصباغ ضروريه ومايستغنون عنها يحطونها ف كل طلعه حتى لو حق مشوار 10 دقايق او ربع ساعه اتلاقينهن متصبغات لوول


الله يهديهن .

[تحفه]

مره شفت وحده لابسه عباه ومن وراه ظهرها شويه تحت ( ايوا الي فهمتوه ) حاطه سراسز على شكل قلب .... كرحه وايد ......................... و قـ حـ ـه

[طير الحب]

بو زايد...نتمنى نقرأ وجهة نظرك في المرات القادمة...شكرا عالمرور


هزايم...ما ادري البنات كيف يفكرون انقلبت الأدوار وصارت الفتاة متهمة في لفت نظر الشاب لها وفي المعاكسات ولا يسعنا ان نقول الا معهم حق ان كان منظرها ولبسها واستهارتها هو ما اوقع الفتيات في فخ الموضة.

[ذنـيـنـي]

تصدقين يا ام عبدالله انه من كثر ما اشوف البنات يلبسن هالنوع من العبي الغريبه و العجيبة
قمت اقول في خاطري

معقوله ما تمت في بلادنا بنت زينه و حشيمه >> طبعا ما اقصد الكلام، لأنه ولله الحمد شي ناس قادرين يربون عيالهم
بس جد يعني، معقوله انه كل هالبنات ما وراهم رياييل و المشكلة انه اغلب الي في السناتر من هالنوع !!
و الي يقهرني اكثر هالبنات الي مسويلهم " قــبــّــه " فوق راسهم استغفرالله العظيم شكلهم ايييييي شييييي
جي لوووووث >> اللهم عافنا و استر علينا و على اهلنا دنيا و آخره

آخر شي شفته و الي جد جد ضحكني و ما قدرت اني ايود عمري من الضحك
وحده مسوية عباة على شكل روب مال الحمام و جي وااايد وردي و صابغة ويها وردي تبغي تستوي باربي بالغصصب. :fa44:

نصيحه من شاب للبنات و اعتقد انه اغلب الشباب و الرياييل يوافقوني في الراي
طبعا رايي عن شخص مش متشدد

خلكم simple و بسيطين في شكلكم
لأنها والله العظيم احلى بوايد من الحركات العنقاش و الحركات الجريئة
الي بكل صراحه تعطي منظر مش حلو للبنت >> يمكن تكون حلوة كشكل و مثيره لكني اقصد نظرة الشاب للبنت تكون نظره مب زينه و على طول ايي في باله انه هذه بنت مب زينه لأنه البنت الزينه تحشم عمرها.


و بس وااايد تحرطمت
بس جد الي نشوفه صاير في بنات بلادنا وايد يقهر :k_icon28:

[بنت الدلع]

انزين هذيل وين اهلهم ؟

يعني مايشوفونهم يوم يظهرون من البيت ؟

اكيد يشوفونهم
ليش مايرمسون
وليش مايصلبونهم

مستوااااهم متدنييي

نحن البنات ننظر لهم نظره دونيه
الشباب كيف بتكون وجهة نظرهم !

الكشخه لها مكانها
مب اي مكان حي الله يالله ظهري شعرج وحطي ميك اب والبسي هذيج الشيله الي تلامع :boxed:


قسم بالله شكلهم وعع وتحتها خطين

الله جميل ويحب الجمال والوحده لازم تحافظ على مظهرها ولكن مب بهالشكل الي ينفر الناس منج

لهدرجه صارت رخيصه وماتهمها سمعتها

---

احيد يوم كنت في المدرسه
ابلتنا قالت لنا جمله ولين الحين ترن في اذني

بنات مدرسه عادي يقولون ماشي رياييل
البنت تركض تلعب ويا ربيعاتها
ريولها تظهر
وعمال يمشون واحيانا موجهين
اتقول محد بينتبه

فكانت الابله ترمس عن هالظاهره و قالت لهذي الدرجه ريلج رخصيه !
تخلين الي يسوى والي مايسوى يشوفها
حتى الهندي !

يزاها الله الف خير
من بعدها البنات قامو ينتبهون
يمكن البعض محتاج لضربه على راسه عشان ينتبه
ولكن الي نشوفه انهم يعرفون الصح من الغلط ولكن لا مبالاه

[مجموعة إنسان]

موديل يديد للعبي ..
عباة على شكل ( مندوس)

[الشيـــن]

[[[معقوله ما تمت في بلادنا بنت زينه و حشيمه >> طبعا ما اقصد الكلام، لأنه ولله الحمد شي ناس قادرين يربون عيالهم
بس جد يعني، معقوله انه كل هالبنات ما وراهم رياييل و المشكلة انه اغلب الي في السناتر من هالنوع !!]]

ذنيـني .. صدقك والله
أنـا [ البنت ] .. يوم أجـوووف وايد بنات جي مسويين بأعمـارهم
أقول فـ خااطري الحين ستايل كل البنات جي ؟ .. شي بنيـه simple هالأيام !!
والله حلات الشي فـ بسااطته ..
يوم أشوف بنت جي بسيطه احس تعيبني .. بالعكس يوم الواحد يشوفها
يحس ان حلاتها طبيعـيه ..
مش هاذيل .. الواحد يتخيل شكلهـا بدون هاللي فـ ويهها
انا ماقول ان دووم أقول لبسهم وستايلهم مب شي .. والله مرات يعيبوني
بس مش مـاال موول وسناتر .. أحس حق عزيمه ، يمعة بنات وهالسوالف .. يكون حلـو
بس مول !!

((و الي يقهرني اكثر هالبنات الي مسويلهم " قــبــّــه " فوق راسهم استغفرالله العظيم شكلهم ايييييي شييييي
جي لوووووث >> اللهم عافنا و استر علينا و على اهلنا دنيا و آخره))

لول انا هاذيل أقول لـو ما [ ----- ] .. جـان طاحـوا ع ورا .. ههه
تقول وحده مفلـوووعه \=



بنت الدلع
[[نحن البنات ننظر لهم نظره دونيه
الشباب كيف بتكون وجهة نظرهم ! ]]

المشكله ان هالبنات يشوفون الشباب يلاحقونهم ويستانسون عليهم
ع بالهم خلااص جي كشخه وحلـو ..
انزين ها يطالعج جي بس حـق تيلفون ومواعد وطلعـات بس sure نظرته لج أي شي !

بس القهـر يوم أشوف واحد يمشي ويا خـواته وهن جي .. حتى اشك
اقول يمكن ربيعته !! مايندرى والله !!


ام عبـادي .. سوري ع المداخله هاي .. بس عايبني الموضوع .. =)

[عمة العيم]

انا مره شفت

وحده حاطه كشاكش و سلاسل نازله من شيلتها لي ويهها يعني من تبا تطالع شي تيب السلاسل على يمب بس عسب تروم تطالع (المصيبه انها يايه القريه العالميه في هالزحمه ليـــــــــــــــش!!)

زين شو الله كالفنج جي تسوي بعمرج .....اشك ان عندها مرايا في البيت

ياربي حررررر موووت رطووووبه خياس لوعة جبد لو بيدي بخوز ويهي من مكانه بس عشان الحر و هذيل متحملين المكياج طبقااااااااات ليــــــش!! (هاتولي اكسجين بموت....)

البارحه شفت وحده تمشي جذا سيده مستقيمه ليش؟؟؟ لان لو تحركت قدلتها بتتحرك (ههههههه) و بعد رموشها بتتحرك بتخترب كشختها

و بعد حلقانها تقول معلقه تواير سياكل الصغاريه الملونه الحلق يمكن يطيح مايوز تتحرك يعني ظاربينها على ايدها في البيت لازم تمشين و راسج سيده و تتحركين شوي شوي.....العروس مابتمشي جي...!

( في العياده ) حاطه روج احمر و لماعي يلق فوق خدودج و مسشوره شعرج ليـــــــــــــــــــــش!


ماعرف عندي وايد اسأله اتمنى اتمنى القى لها جواب

واللي تمشي حاطه يريووور على راسها ليييييييييييييييييييييييي ييييش؟؟؟ 3 روووس زياده فوق راسها يعني!

واللي تمشي تقول رقاصه تمشي ليـــــــــش؟؟ عنبو انتي يايه السوق.....والله والله العظيم مامسوين عرض ازياء ولا هم يصوروووون!!!

بس تعبت ماروم اكمل

الله يكون في العــــــــــــون

(^_^)

...

[بنت الدلع]

^ ههههههههههههه

شر البلية مايضحك

صدقج يا عمة العيم
يتعنوووون ويسوون اي شي بس عشان الكشخه وجان زين كشخه مقبوله

==

الشين
البنات الاي شي يشوفونه وااو ، ياربيي يالس يلحقني ويطالعني شوفي شوفي نظراته شقايل

عفان الله !
اللهم سترك

[الشيـــن]

^
ع بالهم كل واحد يطالعهم يعني عايبنه الي مسوينه
جان ما ذامنهم ذممم قبل لا يفر الرقم .. غبـاااااااااااااااااااااا اااء ..

[عمة العيم]

انا باجر بلبس عبايه بركب عليها ليتات

ترقبونـــــــــــــي

(^_^)
...

[بنت الدلع]

خبريني وين عسب ايي اصور

يمكن بعد يعيبني الموديل O.o

[عمة العيم]

انتي تعالي حطي كشاف مال الاعراس على وقايتج باجر الساعه 11 الظهر في الجمعيه بنتلاقى خخخخخخ

(^_^)
...

[وحي القلم]

محد بيعرفكم :hysterical: ^^

[طير الحب]

بنوته جميرا ... الله المستعان...نحن في زمن اختلط به الحابل بالنابل...وصارت الموضة اهم من الدين والتقاليد.

وحي القلم...والله صدقج كل يوم ظهرولنا بسالفة يديدة وين نروم نواكب هالموضة الي كل لحظة فيها شيء يديد...ساعات احس بعد اني مب رايمه افصل عباة من كثر الي اشوفه وآخر شيء أرسى على العباة السادة :)


حلم الطفولة...والله لو كل انسان فكر انه بيتحاسب على اسرافه ما كان حال الدنيا و جشع التجار واصحاب المشاريع في تزايد مستمر...كل حد يبا تزيد فلوسه على حساب الاذكياء الي تغريهم هالسوالف .

مهابه...صدقج والله فساتين مب عبي للستر...ربي يرحمنا برحمته.

الشين...والله موضة البرمودا قايم سوقها هالأيام وايد ...بس فيه ملاحظة اهم شيء تكون العباة غليظة ومسكرة كامل لانه بالشمس تشف ويبين اللبس :)

حركات...يمكن ماخذين قدوتهم حليمه بولند الي تخاف تطلع بدون مكياج...غريب امرهم بالعكس في فترات الواحد يبا يفتك من المكياج ويكون على طبيعته...ماشيء بساطه عدنا كله صبغ * صبغ.

ناصر...والله يا اخوي هذا مب بس كلامك كلام كل الرياييل الغيورين...والله نفس الرمسه ريلي يقولي معقوله كل هالبنات ما عندهم اهل ورياييل وماشين على كيفهم...كل يوم تشوف شيء أدمر حتى قمنا نعاف نسير مولات بالليل من الشغلات الي تصير...وعادي جدا واحد يكون ماشي مع زوجته وعياله وتحاول بنت من اياهم تثير انتباهه صاروا البنات ما يردهم سواء الريال معرس ولا لا...لا حول ولا قوة الا بالله.

بكل بساطة يا ناصر نحن كبنات لو شفنا وحده مسويه كل هالسوالف بنقول ما وراها ريال عيل شو الحال بالرياييل...لا والقهر وكل القهر انه وحده متزوجه يظهر منها كل هذا هاي متزوجه ريال ولا...في هلحالة تكون المسؤولية مسؤولية الزوج الي مب رايم يرد حرمته.

[تحفه]

لكل شي حد ومقام