مش هذه الحياة الي ابغيها !!

[ذنـيـنـي]

السلام عليكم

مرحلة الكثير منكم مر فيها و الحين انا امر فيها و الي هي الخوف من المستقبل
هو مش خوف بمعنى خوف، لأني و الحمدلله لله شبه مرتب اموري و عندي خطه لبناء مستقبلي سواء من الناحية الاكاديمية او من الناحيه الوظيفية
لكن الشي الي شاغل بالي هو انه لو ما صار الي في بالي،
لو ما حصلت الوظيفة الي ترضي طموحي
لو حصلت الوظيفة الي اتمناها لكن ما حصلت فرصة لأكمال دراستي
لو قدرت احصل فرصة دراسة قوية لكنها ما توافقت مع وظيفتي الي يمكن ما تتعوض

أسئلة يوم اسالها نفسي احس بخوف و توتر من المستقبل
لأنه الحياة مش سهلة مثل ما كل حد يشوفها


مش هذه هي الحياة الي ابغيها !!!

ما احس انه يرضيني اني اعيش بنص شهاده و استلم راتبي و اصرفه على اشياء ما تسوى و انسى اني ابني مستقبلي
ولا يرضيني اني خلاص اداوم و اتم مثل الشباب البطالية اسير التمشى في الضيافة و اغازل هذه و الاحق هذه
أحس اني اكبر من هذه الامور و طموحي اكبر من اني اعيش حياتي عايش على 10 الاف درهم و رنج باقساط
:sleepy:

ابغي اكون انسان له وزنه في المجتمع
له كلمه و له هيبه و له احترامه
محبوب من بين الناس
محبوب في بيته بين اهله و عياله قبل ما يكون محبوب من قبل الناس
ما ابغي اكون مقصر في حق اهلي
ولا ابغي اقصر في يوم في حق والدتي و الي ابغي احطها في عيوني على التعب الي تعبته وياي
ما ابغي في يوم من الايام افكر اني اقصر في حقها بسبب اهتمامي بشغلي و اسرتي



الدراسة

دخلت التقنية "الزفته" الي شعارهم
"ارسب في ماده و ضيعه سنه كامله من حياتك" او اربع سنين مثل ما حصلي وياهم
احيد اول ما وصلت لفل 3 في التقنية رسبت بسبب احد المدرسين "النحسين"
و الي بكل بساطه رسبني في مادته الي كلها بروجكتات
لأنه يقدر يرسب الشخص في البروجكت والسبب هو انه ما اقتنع بالي مكتوب في البروجكت
:fa55:
بسبب هالمدرس الـ لا مبالي اضطريت اني انزل نفسي من برنامج الدبلوم العالي الى برنامج الدبلوم
و الحين لازم ارد اكمل دراستي في احد الجامعات الاخرى للحصول على شهادة البكلريوس

اختيار الجامعه المناسبة بروحه هم و التخصص المناسب هم ثاني و توزيع الوقت ما بين الدراسه و العمل هم ثالث



ذنيني المعرس

كل هالهموم شالنها على راسي عسب شي واحد و الي هو الهم الاكبر "الزواج"
مع انه و الحمدلله الخير موجود و اهلي مستعدين يزوجوني اليوم قبل باجر
و بيدفعون عني كل التكاليف و فوق هذا مستعدين ينزلون لي معاش
الا اني ما احس اني بحس بالمسؤولية اذا ياني كل شي زاهب و بدون تعب مني او جهد مني
و ما احس انه الريال بيحس بالمسؤولية اذا ياه كل شي زاهب مزهـّب

اكمالي للدراسة و طموحي للحصول على وظيفة مرموقة ماله سبب غير رغبتي بالاستقرار و توفير حياة كريمه للأنسانه الي بكمل وياها حياتي و للعيال الي بيحملون اسمي من عقبي
أبغي اكون اب يفخرون فيه عياله
:a010:

وايد افكار و اسئلة شال همها من الحين مع انها مسائل عاديه و يمكن انا عاطنها اكبر من حقها
لكني حسيتبها مثل الهم على قلبي و حبيت افضفض و السموحه منكم

[تحفه]

قبل يومين شفت موضوع كلولوش مال صور السكينغ قلت ياليتني ولد ... الحين قريت موضوعك قلت حمدلله انا بنت



ماشي الا النص نص حياتهم مضمونه هههههههههههههههه :k_harhar1:

[قصايد غلا]

:thumbup1: حـــدد أهـــدافـــك ، و دوووووم عط عمرك حوافـــــز :thumbup1:


لا تتكاســـل أو تتهاون في مسألة الدراسه لأنه ما بينفعك شي غيــر دراستك :k_smile2:


خـــل عــنـــك شي اسمه تعب :sleepy: ، صح إن الواحد يحس بتعب ويحس إنه طفراااااان من الكراف لكن عقب هالتعب راااااحـــــــــــه في النهايه ما يحس بها إلاّ اللي بذل جهد وتعب في البدايه



و إن شا الله تتحقّق كـــــــــل أمانيــــــــك وتستوي أب + تعطي والديكم حقهم و زوووووود + تكون في وظيفه ومكانه مرموقه ، ربــّـــي يوفقك

[كـلـكـلـووش]

لو الحياه تمشي مثل ما نحن نحلم .. جان شفت الناس كلهم ملوك .. و ما شفت فقير .. و ما شفت مفلس .. و ما شفت مديون

لكل شيء تخطيط .. و اذا كان سليم .. بتلاقي امورك ماشيه ..

و بدال ما تسميها هموم .. سمها خطط .. و ابدى فيها .. و بتنتهي مثل ما انت تباها

[الـيـاه]

ســلاااام ..


:: ذنـيـنـي ::


حليله :k_santa_1: < قلبه مترووساااااااااااه لول


جميل اللي قلته ..
والأجمل أنه نشوف شاب طموح وفكره أكبر بوايد من ملذات الدنيا وسوالف الشباب البطاليه :fa44:


التخطيط للمستقبل خطوة وايد مهمه
والتعب والاجتهاد عليها شي أهم لأن بدون جهد مابيكون في هدف ومابتكون في رغبه في تحقيق
هالهدف اللي ودك تنجزه !!
:fa51:


لكـــن
حاول قد ماتقدر تبتعد عن الاحباط لأنه من أساسيات الفشل
يعني أنك ما تتردد وايد أو تحتار مثل ما هو - حالك الحينه - لأنك لو كنت محتار مابتقدر تحقق أي نجاح
وأي خطه من الخطط اللي أنت حاطنها :k_sadwalk: ..



ودراستك :d014: لا تتكاسل عنها أبد وحاول تدور على أي شي يديد ويفيدك
واللي ممكن يخليك فخور بنفسك ويفخرون فيك أهلك =)
( لأنك شخص طموح ماشاء الله عليك )


وأهم مافي الوظيفه ( العمل والابداع ) مابتقدر تثبت نفسك إذا كل اللي حولك مبدعين وأنت موظف :k_special2:


أدري وااايد هذربت سوري يعني >.<
وآخر شي أقولك اياه أن خلك متفائل دوم وحط في بالك أن مستقبلك بيد الله
فـ استعين به في كل شي
صح التخطيط مهم
لكن لا تشغل عمرك فـ يوم بعده ما يا .. فكر في اليوم اللي أنت فيه لأنك بتنسأل عن يومك هذا
مب عن يوم أنت ما عشت فيه صح :yes:



السموحه ع الإطاله
بس موضوع وايد حلو
:fa35:
.
.
.

[وحي القلم]

ذنيني

حلو انه الواحد يطمح للأحسن في كل شي :thumbup1:

و مشوار الألف ميل يبدا بخطوه

.
.

بس لا تشتت عمرك بكل هالاهداف من الحينه

المفروض تحدد أقرب هدف تقدر توصله

و حاول أنك تركز عليه و تسوي كل اللى تقدر عليه عشان تحقق اللى تباه

.
.

و عقب ما توصل له فكر فاللى عقبه.. و كمل بهالطريقه

عشان توصل لكل اللى تباه بالتدريج

(( و اليبل ما ينصعد عليه مره وحده :k_smile2: ))

.
.

[أنشودة المطر]

عليكم السلام

أنا أؤيد كل اللي قالوه الأعضاء قبلي و أحب أضيف أو أذكرك أنه كل شي عند الله

كلنا أرزاقنا محفوظة من قبل ما نظهر للدنيا

توكل على الله اخويه

و اللي ياخذ بالأسباب و يسوي اللي عليه ما يظيع حقه بإذن الرحمن

أنا شخصيا أوقات وايد أحس بهذا الشعور بسبب ظروف دراستي
بس يوم أذكر أنه كل شي عند الله و أنه ما بيستوي غير اللي الله رايدلي اياه
و"اللي أثق تماما" أنه هو الأحسن لي

سبحان الله كل شي يتيسر لي و أحيانا تتيسر لي أشيا أكثر عن اللي كنت أتمناها

عشان جي الأساس أنك تتوكل على الله و تسوي اللي عليك

التفكير جذي ترا وايد يريّح

و الله يوفقك إن شا الله
--------------------

توكلت في رزقي على الله خالقي وأيقنت أن الله لا شك رازقي

وما يك من رزقي فليس يفوتني ولو كان في قاع البحار العوامق

سيأتي به الله العظيم بفضله ولو لم يكن مني اللسان بناطق

ففي أي شيء تذهب النفس حسرة وقد قسم الرحمن رزق الخلائق

للإمام الشافعي

:thumbup1:

[الجنيه]

لو تفتح أبواب الشياطين *_*

يحق لك تحس بالتوتر والضياع في هالفتره لانه هذي هي الفتره الي بتحدد فيها مصيرك ومستقبلك كل الي محتاج له انك ترتب امورك وتتوكل على الله دام النيه موجوده واهم شي دراستك لا تأجل موضوعها اكثر وان شاءالله بالتدريج بتتضح لك الصور وبتعرف موقعك من الاعراب على ما يقولون وربي يوفقك

[هزاايم]

............

[بنت الدلع]

لاتشل اشيا فوق طاقتك

ابدا خطوه خطوه

تم في الشغل الي انته فيه وابدا يمع من الحين حتى ولو مبلغ رمزي
قدم في المكان الي تبا تدرس فيه وباذن الله اذا فيه خير الله بيسر لك امورك

خطوه خطوه بتوصل للي تباه

اهم شي ماتحبط عمرك
شوف انته شو الي وصلت له ؟
تعبت ، اشتغلت ، درست ، طعت والديك
هالشي كله مايا من عبث
وكلامك يدل على انك انسان تطمع للمزيد وهالشي ايجابي
وانته مابتفكر جيه الا اذا انته تطور كل يوم

لاتحمل نفسك فوق طاقتها
والتفكير يهد الحيل
سو الي عليك واتوكل على الله
واكيد دعاء الوالده لولدها مستجاب
لا تظهر من البيت الا وانته بايسنها على راسها :thumbup1:

والله يجدم لك الي فيه الخير

[عافك الخاطر]

السلام عليكم ..


هاي الأفكار تحط الواحد في دوامات من الشك و الهم ..
والنتيجة احبـاط و حتى شغلك ما بتقدر تنجزه بالطريقة اللي ترضيك ..لانك تفكر في الجانب المظلم من الموضوع..

فـ
اتوكل على الله و ثق بنفسك و اتمسك بأحلامك :)

والله يوفقك و يحقق لك كل اللي فـ بالك ..
..

[الا انا]

ياااااااه ... ماشاالله كل هذي الشغلات شاغلتنك ... يوووووه ..


والله رتب امورك ... وحط اولويات واهداف ... كل شي بيمشي اوكيه ..

لازم تشيل هالاحباط من بالك ,,, لازم تكون متفائل ..((( تفئلو بالخير تجدوه ))

ربي يوفقك انشاالله ...

احترامي ..

[جنة عدن]

:k_blush-anim-cl: :k_blush-anim-cl: :k_blush-anim-cl:
واو انت اديش تفكيرك رائع
وان دل فهو يدل على الانسان لي في داخلك
اهو دليل على انك انسان تبي حلاوة الدنيا
والحلاوة هي في الجد والكد والعمل
وطموحك تكمل دراستك اكبر دليل على انك
انسان له تفكير وعقل موزون
الف تحية لاخي الفاضل
والفين كلمة محبة وتقدير
:k_blush-anim-cl: :k_blush-anim-cl: :k_blush-anim-cl:

[طفلة من هذا الزمان]

انســان غير عادي !
هذا اللي وصلت له من سطورك ..
و لتحقيق هالهــدف بقولك بعض الأفكــار السهــل جدا تطبيقهـــا،،

أولا .. احمــــــــل هـــم ،، و هــم كبيـــــــــر بعد ،،
لأن الحيــاة ما عـــادت سهلـــه .. و أسهــل شي نعيش عــالة على أهلنــــا لآخــر العمـر .. ويذكرنــا الكـــل بكونا عالـــة لا أكثــر .. وأصعب شي تطلــع من ظــل أهلك و تحقق لك اســم ومركــز بعيد عن "هييييه ترى اهلــه رزووه "

الحيــاة ما عادت مجرد دراســة ووظيفـــة .. هذا للناس العاديين ..
الغيــر عادييـــن يعــرفون تمــاما إن الحيــاة .. تفكيــر متواصل .. و تخطيـــط متواصل .. و الأهــــم اقتنــاص الفرص اللي الله ينعم علينا بها من فترة للثانيــة .. ونحن بغبـــاء نقوول "تــو النـــاس .. تونــا صغــار ع الهــــم " ..

أحمـــــــل هـــــم .. لكن لا تحمــل أرق هالهـــم ..
الحيـــاة تخيلهــا كالتــالي .. مســـاحات .. وزعتهــا انته بجــدارة بين الأشيــاء اللي تعتبر أولويـــاتك ..
دراســة .. اســــم ومــركز .. زواج .. و العايلــــــة ..
وواضــح لكل مساحــة رسمت معــالم خطتك .. و الخطة ياخوي قسمين : الشورت تيرم (المدى القريب) و اللــونغ تيرم (المدى البعيــد) ..

in other words..
تــأمل كل مساحـة .. هل الدراسـة اللي اخترتهــا اليــوم .. بتوصلك لهدفــك باجــر؟
إذا هيه فاختيــارك صحيح لكن الزمن بيطول .. صح؟
و اذا كـان العكس فأنت ارتكبت الtypical mistake done by all teens..
كلنــا بعد الثانويــة إما نقوم باختيارات عشوائيــة أو مبنية على رغبات أهــل او مع الخيــل يا الشقرا ...
وبعد ما عليــه .. هذي احسبهــا تجربــة وواضح جدا انها دفعتك لبذل المزيد ..

نفس الفكرة اطبقهــا على المساحات الباقيـة .. و بتعرف هل انته ماشي صح .. و لا تخطيطك يباله إعادة صيانــة !!

و انا اضمن لك انك بتعيـــد تخطيطك من فترة للثانيــة .. لأن الزمن يتغير .. و الدنيــا تتغير .. و job market يتغير .. و الشهادات المطلوبة و الخبرة (اكبر عائق للي في عمرنا) تتغير ..

أفكــار أخرى ::
- خلك عضــو نشيط في كليتك .. انضم لأي أنشطـة تطوعيـة أو مجالس الطلاب .. لأنها طريقـة تصقل شخصيتك و تزيد خبرتك من ناحيــة .. ومن ناحيـة أخرى تتعرف من خلالهــا على فرص عمل و شخصيات .. اول وظيفة بحياتي خذيتها بسهولة لأن الCV كان شاهد كبير على جهودي .. و على فكرة انا تخصصي تربية يعني المفرووض ما احصل وظيفة في القطاعات الحكومية و الخاصة و اتريا التربية و التعليم .. لكني حصلت

- دراستك استمر فيهـا .. لا توقف عند البكالريوس .. لأن الدراســة عبـادة أولا .. و ثانيــا مدخل لوظايف أفضــل ..

- الفرص من دروات تحصل عليها على شهادات اغتنمهـا .. و ماقولك دروات التربية او الشخصية وغيره ؟؟ دور الدورات الخاصة بالشهادات الدولية .. هذي بتفيدك ع المدى البعيد .. طبعا اللي تكون في مجال دراستك ..

- خلك قريـــــــب من رب العالمين .. استمر بالدعاء و الاستغفــار و انته تشوف كيف كل عقبة في حياتك تختفي بعد دقايق من وقوعهــا ..

أتمنى اني خربطت بشي مفيــد .. بس كله عن خبرة
تمنيــاتي لك بالتوفيق ياخوي

فوزيــة الدريع الواحــات .. اقصد طفلـــ:icecream: ـــــة

[سفير الخيال]

السلام عليكم


عزيزي ذنيني.. هناك عدة أمور يجب أن نتعلمها في الحياة، سأذكر بعض ما تعلمت وتمعـّــن بها


1.المستحيــــــلّ



كلمــة موجـــوده في عالــم الحمقـــى


"لا مكان لكلمة مستحيل في قاموس القيادة, و مهما كانت الصعوبات كبيرة فإن الإيمان و العزيمة و الإصرار كفيلة بالتغلب عليها" محمد بن راشد آل مكتوم


"شعبك هم الحيـــاة والطموح والمستقبل والأمل والعزيمة وأنت قـــائدهم" سفير بن الخيـــال :biggrin:



2.الأمـــــلّ



ربمـا يتـلاشى .. لـكن لا ينعـــدم


3.حاضرك ومستقبلك


لا تفكر بالمستقبل بقلق وتنسى حاضرك، لأنك بذلك لن تعيش حاضرك ومستقبلك


4- الموجود و المفقود


لا تفكر بالمفقود حتى لا تفقد الموجود



5-من اشترى مالا يحتاج إليه,,,باع ما يحتاج إليه




وأخيرا


عظَمة عقلك تخلق لك الحساد



.. وعظَمة قلبك تخلق لك الأصدقاء



تحيـــة :fa41:

[قلوب دبي]

ساعات الواحد من كثر ما يفكر ايحس انه راسه بينفجر من المسئوليات اللي عليه

بغض النظر عن الماديات كثر ما ايكون ايحاتي الاساسيات او بالاحرى الامور المصيريه

هموم العرس ويا هالعرس اللي عافس الدنيا مب عرس مسوي فوبيا

الزوجه ... ( روحها هاي قصه طويله )

الواحد ايفكر باجر كيف بيكون بعيد اليوم اللي هو فيه ..

باجر ببدأ صفحه يديده مع الزوجه والعيال ..
ومسرع هالايام كيف فجأه اتخطف السنين

عزيزي ذنيني انا معاك في التوتر والمعاناه اللي تطريها

وفي القلب الكثير

طريج الاحلام والطموحات وايد كبير

بس

عن تجربه قد تكون ناجحه نوعا ما
وقد تكون متعثره في اجزاء منها لحد ما

الانسان بذاته

يقرر ويصمم

ينوي و يحدد

ويتوكل على الله

بعد ما يضع اهدافه في الحياه

والنقاط اللي ينوى تحقيقها

ويضع حدود ومواقيت للوصول اليها

طبعا متزامنه مع الجهود المبذوله في الوصول الى الغايات والاهداف الموضوعه

والله يكون في كل شاب مر او بيمراو بيمر في المرحله هاي

واقع من الحياه

[ملاك الروووح]

::

ياهلا ذنينــــي

والله مادري بشو أرد عليك ..

ولا أعقب على كلامك .!

الاخوان والاخوات قبلي ما قصروا ..

قالوا كل اللي ف خاطـــــــــــــري !!

::

ماعندي غير انه أدعي لك بالتوفـــــــــيق

والله ايسر لك امورك ..

وان شاءالله اتحقق كل اللي تطمح لــــه ..

ونشوفك انسان متميز .. ومبدع في المجتمع ..

شرات ما شفناك متميز هنيه .. في الواحات ..!:thumbup1:

وان شاءالله اتكمل دراستك .. وتاخذ الماستر والدكتوراه بعد ..

وتمسك الوظيفه اللي اتحسها اتناسب طموحك .. وامكانياتك ..

واتحس انها ف مجال تخصصك .. و مكان تقدر اتبدع فيه ..!

::

تحيــــــــــة اعجاب كبيره بشخصك الكريم ..

:a070:

[ذنـيـنـي]

تسلمون اخواني على ردودكم الطيبه
صدقوني قريت كل كلمه كتبتوها بس ما قدرت ارد عليكم

=============


كل الي انقال في هالموضوع يالس اعيشه حاليا و التفكير في هالامور كلها تضاعف فوق الـ 10 مرات اليوم و احس انه راسي بينفجر من كثر التفكير و الهم و "الخوف"

الله المستعان

بسير اصلي صلاة الاستخارة و بدعي ربي انه يوفجني و ان شاء الله الامور تتيسر