دفشه

[الجنيه]

السلام عليكم ورحمة الله وبركاته ...

دفشه هذا لقبي في البيت ليييييييييش ؟؟؟!!!! ما ادري مع اني احاول قدر المستطاع اني اغير من نفسي بس غصبن عني استوي دفشه بس في البيت وبين اهلي لان عندي قناعه ان البيت هو المكان الوحيد الي ممكن فيه اتخلى عن الرسميات والسوالف الثانيه ...:rock:

تخيلو معاي هالموقف و احكمو ..

خ( أختي ) : شفتي (م) شو سوت ؟؟
الجنيه : شو بلاها بعد
خ:اتصلت اسلم عليها واتنشد عنها جان اتقولي انا مشغوله بتصل بعدين
الجنيه : سو وت ؟؟؟ شو يعني ؟
خ : شو شو يعني هاي مب اول مره اتسوي بي هالحركه دومها جذه
الجنيه : اساسا انتي غلطانه محد قالج تتصلين بها يعني انتي اتعرفين اطباعها اشعنه تتعين وتتصلين بهاي الاشكال؟؟ تستاهلين
خ : ايه انتي ليش جي دفشه عنبو صلة الرحم واجبه وبعدين يمكن هي صدق مشغوله
الجنيه (قاطعتها بقهر ) : مره ثانيه لا اتمين تتشكين لي يكون احسن:argue:

الحين بس لاني قلت رايي بصراحه صرت دفشه وأمي اتقولي انتي قلبج طيب وحبوبه وكل شي زين فيج غير هالدفاشه الي لو اتودرينها عنج ما في اخير منج

هل أنا عندي انفصام شخصيه مثل ما يقول اخوي ؟؟؟

مع انه علاقاتي الثانيه كلها من احسن ما يكون وسبحان الله عندي صبر ع الغريب أكثر من القريب يعني انا وايد ناس ترتاح لي وتشكي لي همومها ومشاكلها واساعدهم واخفف عنهم بس ما ادري ليش في البيت تلقائيا اسلوبي يتغير وما اتحمل شي وان حاولت اضبط عمري ماشي فايده لساني يفلت وغصبن عني تطلع الرمسه مني شو اسوي ؟؟؟؟؟

وحده من خواتي اتقولي انتي مشكلتج انج اتحاولين اتعبرين عن رايج وبصراحه غير مقبوله احيانا لو انتي صادقه في الي اتقولينه بس اسلوبج دفش ما اتعرفين تبدين رايج بدبلوماسيه :wacko: شو اسوي راسي افتر والله زعلالالالالالالالالالالال الالالالالالالالالالالالا لالالانه

[مــهــابه]

عــليج الســلام والرحمه أخـتيه الجنيـه

أنـا اللي فهمـته من كـلامج ، انـج هب دفشـه ، ولكـن صريحـه ، وصراحـتج اللي حواليج مايـتقبـلونها

يعـني هالموقف اللي ذكرتـيه ماحسبه شي من الدفـاشـه أحس انج كنتي صريحـه مع اختـج == > ويمكن لأن اسلوبي شوي قريب من اسلوبج ، رغم هذا مايقولون لي دفشـه


مـااعـتقد انه عندج انفصام شخصيه أو شيـاته بالعكـس !!

ولكـن لو هالشي يـضيج اللي حواليج منج ، ويخليج انتي متضـايجه ، حـاولي بطـريـقه او اخـرى

أو انج اتميــن ع هالشي ، وتقـنعين اللي حواليج بانه هذا هو أسلـوبج ، لو تـشوفين انه اسلوبج مابه شي يـنعـــاب



والسموحه منـج



وموفقـــه

[محد يستاهل]

الجنيـة

الصراحــة مصطلح اتغير معناه في وقتنا الحينــه

وصــار الدفاشــة معناه الأصلي

صاروا النــاس مـــا يتحملون شيء

مب أنتي بس اللي تعاني من هاي المشكلــة بس
أنـا وحدة منهم الحين
لأني ما احب اسكــت عن الحق وكلمــة الحق صـارت اتزعـل ...

الله يعينـج وما علييج من كـلااام حد

[ملاك الروووح]

:

وعليكم السلام ورحمة الله وبركاته

هلا والله عزيزتي الينيه ..

اسمج يخرع :4:

:

أنا رايي من راي مهابـــــــه !

شي فرق ترى بين الدفاشه و ( الصراحه ) !

انتي صريحـــــه .. وهذا شي طيب .. وحلو .. وايجابي !

لكن أحياناً الأشخاص اللي حولنـــا صعب عليهم يتقبلون هالصراحه ..

لأنها يمكن تكون قاسيـــه .. او جارحه .. أو محرجه لهم !

وأنا ما أتكلم بس عن موقفج اللي صار مع اختج ..

أتكلم بشكل عام ..!

:

ف شو الحل ..! :biggrin:

<< الله يعينج عليها الحين بتتفلسف :k_harhar1:

أنا أشوف انه يوم تبين تقولين رايج مره ثانيه .. يودي عمرج ..

وفكري بينج وبين نفسج .. إذا الكلام اللي بتقولينه حق هالشخص بيأثر عليه !

وبيعيبه .. وشو بيكون موقفه منه !!

ف إذا حسيتي انه بيزعل ولا بيتضايج .. لا تقولينه .. ولا قوليه بس بطريقه ثانيه ..

بأسلوب دبلوماسي يعني ..

توصلين له فيها رايج .. وتحرجينه بأسلوبج .. ف ما يقدر يقولج شي ! :biggrin:

مادري اذا اللي أبي أقوله وصل صح ولالا :m_afaker:

:

بس ان شاءالله يعطونج في البيت مساحــــه .. وحريه لابداء رايج ..

دون قيود أو ضوابط ..

<< وحده ضيعت السالفه :4:


والله يوفقـــــــج حبيبتي

[العجيبة]

أنا أعتقد انج مفــرطة الحساسيــة ..

حاولي انج تتقبلين اللي ينقال لج بروح رياضية ..

لو بنتم نزعل على كل كلمة تنقال .. صدقيني ما بنلقى وقت نفرح فيه ..

وأعتقد انج يوم تزعلين تعصبين وتقولين كلام المفروض ما تقولينه مثل هالجملة (مره ثانيه لا اتمين تتشكين لي يكون احسن) .. انتي بهالكلمتين يالسة تهدمين مبنى علاقتج ويا أختج بطريقة غير مباشرة ..

نصيحة .. عـدي لين العشرة قبل ما تقولين أي شي .. فكـري في الشي اللي تقولينه ..


ولا تزعلين .. الحياة حلوووة لونها بمبه ..

[المزوحي]

عيل وا نت دفشة فأنا يقولون عني حساس !

شكلج تبين حل لمشكلتج وانا عطيتج مشكلة بدون حل !

بس لحظة ..

يوم الواحد ينتقدتج .. فكري .. إنه أكثر من شخص قالج هالشي ...

ومرات الواحد يحب ياخذ كلمة الغير .. يعني

لو امج قالت لج دفشة فأختج تحب تقول نفس الرمسة وخلاف أخوج يقول عنج مثلهم ..

فراسج يعورج من السالفة .. ليييييييييش كلهم يقولون عني جيه !

إذا تحسين نوعية أختج ماتحب تسمع نصايح مثل هاااي وتقول دفشة .. مره ثانية يوم بتتشكى

اسمعيها .. يعني لاتقاطعينها وتقولين ليش انا ارمس يوم انت ماتسمعين رمستي ...

سمعيها ولاتعلقين او لو حبتي تقولين شي بس كلمتين لاتكثرين .. عسب ماتقولج طنشتيها ..

مرات يوم اطفر من شخص بسبب أسلوبه أعامله جيه ...

عني أنا حساس .. حساس .. حساس ....

مليييييييييييت صدق مليييييييييت ...

حساس لأنه يوم اعطي انخدع وفي شغلااااااات يوم تقهرني اقووول ليش جيه

عقب يقولون لي حساس

احاول إني اطنش اللي يستوي واقوول مافي شي يستاهل

بس .. عسب ما انقهر ويقولون حساس ...

[الا انا]

ههههههه
يحليلج يالجنيه
فديتج بالعكس هذي يسمونها صراحه :::: وخلج جذي احسن
ماعليج من كلامهم خلج صريحه وعطي بالويه بس باسلوب
وردج على اختج """ حلو ::

تقريبا انتي نفسي :: بس انا زياده يقولون عصبيه وحساسه زياده عن اللزوم .. دووووووووووم

[تحفه]

ليش زعلانه حبيبتي والله ...... لا تزعلين انا بعد يسموني الدفشه في البيت لول

[تحفه]

^احتسبها مدحه بعد وخخخخ

[بوزايد]

احب الدفاشهــ واطفر بالناس

[الجنيه]

مــهــابه

هي فعلا حسب ما اشوفها انها صراحه لكن احيانا اسلوبي يكون اشوي مش حلو لاني يوم انقهر واغيض يعني اطلع حرتي ف الرد صدق وما اقدر اتمالك اعصابي يعني احس عمري مسيره مش مخيره وعشان جذي تقريبا الكل ماخذ عني هالفكره رغم انهم يعترفون اني اقول الصدق والواقع بس اسلوبي ما يعيبهم يعني انا ما اعرف احور الكلام والف وادور اعطيهم كاش في الويه حاولت اغير من عمري بس ماشي فايده لساني يباله قص الظاهر...

محد يستاهل

والله صدقتي محد يتحمل كلمة الحق في هالزمن وصرنا دفوش والسبه الصراحه هاي الله المستعان ..
عندنا وعندكم الخير وايد ....

ملاك الروووح

حبوبه انا فعلا اراعي الشخص الي جدامي واحاول قدر الامكان اني اتجنب اجرحه او ازعله ودايما احاول اوصل لهم وجهة نظري بشكل غير مباشر بس القهر يوم يتمون يعاشونج ويصرون على رايهم هني اظطر اني اصر على رايي واستخدم اسلوب الدفاشه على قولتهم يعني اتكلم بواقعيه اكثر ومن النوع الي ما اسكت لين ما اقول كل الي في خاطري واهم شي انا اكون مرتاحه وراضيه بالي قلته ومقتنعه قبل كل شي ...

عيل اسمي يخرع ؟؟ ماعليه اتريي اليوم فليل بتشوفين ربعي الينانوه يحومون حولج وبيخبرونج منو الي اسمها يخرع :h_daleel:

العجيبة

صدقيني انا مب مفرطة الحساسيه مثل ما اتقولين بس احيانا هم يظطرونج تتصرفين مثل هالتصرف واتعقين هاي الرمسه يعني مثلا بالي صار ويا اختي يعني هاي الي رمسنا عنها من استوت وهاي حركاتها يوم تتصلين فيها تتعذر مشغوله وما ادري كيف ويوم اتجابلج جدام الناس اتسوي عمرها المظلومه الي محد يسـأل عنها واتطلعج مقصره في حقها وتحرجج جدام الناس واختي رغم انها اكبر مني بوايد بس قلبها طيب وايد تسال عن الناس حتى لوما سالوا عنها ولا عن عيالها ودوم اتصير وياها مثل هالمواقف بسبة طيبة قلبها وتتشكى جدامي انقهر مبدأها في الحياه كوني احسن منهم بس انا ما اقدر اسوي مثلها ,,,



ضغطي ارتفع لي عوده من بقية الردود

[الجنيه]

المزوحي

المشكله اني مستحيل اسكت يعني احاول قدر الامكان اني اقبض لساني وضبط اعصابي بس اتنرفز بسرعه و ردي يكون ناري وبنفس اللحظه .. صدقك الكل يردد نفس الرمسه من يسمعونها من حد ...


مم انا من خلال الفتره الي قضيتها في الواحات حسيتبك انسان صدق حساس يعني بسرعه تتأثر وتنجرح بس مش بشكل سلبي بالعكس اغلب المواقف الي اتطيح فيها تتطلب هالحساسيه بوجهة نظري ..*_* لا اتطنش اذا تضايقت من شي بالعكس توغل فيه وشوف انت بشو غلطت وتسببت لنفسك بهالموقف من غير ما اتحسس الشخص بالي في داخلك جذي بترتاح نفسيا وبتتفادى الخطأ المره الثانيه ..

الدافيه

هههههههه لو في هنتين زياده منا على الدنيا السلام *-*

اقولج تراه مب بيدي حتى لو بغيت ما ارد غصبن عني ارد

تحفه
ويه فديت الدفاشه الي فيني والدفشات الي ردن عليه *_* بس وناسه اتحسين في اكشن يوم تتناقشين ويا حد لانه لازم يطيح الدفان

بوزايد
وابويه كله ولا دفاشة الشباب الصراحه ما تنرامون انتوا من دون شي دفوش بعد اتزيد الجرعه الله المستعان *_* (عن تزعل اثولف )

[سفير الخيال]

إختي الجنية..

أغلب البنات اللي هم في سن المراهقة لو كانوا دفشات,, اتحصلينهم أكثر البنات أنوثه بعد سن الرشد

ولا تسأليني ليش؟... مجرد احصائيات


وكلامي ما يعني إني أوافق أهلج في الرأي، أنا بس أحاول أقول إن البنت حتى لو كانت دفشه في هذا السن ما يعني إنها تبقى طول عمرها دفشه :doh:

تحيـــة :yes: