مشاهدة النسخة كاملة : رمضـان فـي الصيـف
الاسطوري
20-04-07 ||, 08:48 AM
السلام عليكم ..
من فترة في موضوع فـ بالي وحاب إني أشوف
راي الأعضاء فيه وكيف
نظرتهم له
:smile2:
طبعا كلنا نعرف بإن السنة الهجريـة أقصر من السنة الميلاديـة بحوالي من 7 - 10 أيام مب متأكـد من
الفرق ، والأعياد مثلا سنويا يتراجع وقتها في السنه الميلاديه فـ على تقديري
خلال 8 - 10 سنوات بيكون شهر رمضان في
نص شهر 7 (يوليو)
يعني في عز الصيف والفير الساعه 4 وشوي والمغرب الساعه 7 ونص وأحيد إني لحقت على هالأيام
يمكن في بداية التسعينات تقريبا ، فـ الطلبه بتكون عندهم إجازة الصيف مع
إني ماتوقع لين هاك الوقت حد من الواحات بيتم
بعده طالب إلا قله قليله
فإذا الله عطانا العمـر وعشنا ،، هل الطلبه يشوفون بإن الدراسـة في شهر رمضـان أفضل ولا الإجـازة
مثل النظام السعودي ؟ وهل اللي متعود على السفر ممكن إنه يسافر للسياحه
ويلف مثلا أوروبا ولا شرق آسيا حتى لو كنا
في شهر رمضان ولا
ممكن إنه يجدم السفر قبل بفترة أو يأخر ويقصر المده عشان يريح عمره في هالشهر ؟ وشو بخصوص
النهار الطويل هل تفضلون إن الواحد يرقد يريح عمره من تعب الدوام
وعشان مايحس بالعطش مثلا ؟ طبعا للي
بيكونون يدوامون ولا
التعبد والصبـر وقت الشدة وكسب الأجـر دام الواحد عنده القـدره على التحمـل ؟ ولا يمكن في حد يقول
المسلسلات أهم شي مايفوتها مهما كان الثمن ؟ أتمنى إني أشوف
آرائكم في هالموضوع والسموحه
على المغثه
:bye2:
الاســـطـــوري
أخوكم
قرموشة
20-04-07 ||, 09:38 AM
وعليـكم السلام
وياا:h_mar7aba:
أحـيد الوالده خـبرتنـي انـه قبـل رمـضـان كـان في الصيــف .. وكـان صدق تعــب ! حـر وشـوب
صـح انـه اجـازة لكـن الوقـت ما يمـضي بسرعــه
يعني نحن على أيـام المدراس كـان معظـم وقتنـا نقضيـه هنــااك .. ومـانحـس أبد .. وأتوقـع الوضـع بيكـون أصعب بـوايـد !
أفضــل انـه يكـون فيه دوام طبعـــا لان مـثـل ما قلت الوقت يمـشي أسرع لاني شو بستفيد من الرقـاد طول النهار ؟!:boxed:
والسفـر في رمـضان . بعد هـم صـعب يعني فرق الوقت وغيره ..
وشهر رمـضان عبـاده وتقرب مـن الله .. مب سيااحـه وطلعاات وسفر لول
ممكـن انـه يأخـر السفر مـثـل ما قلــت أو مايسـير أوروبا و يسير يعتمر خـلال هـ المده و بتكون الفايده فايدتين .. ( أجـر + سياحـه ) :thumbup1:
وبخـصـوص المسلسلات
بـصـراحـه من رمـضان اللي طـاف واللي قبلـه هـ الاشيا ماقمت أتابعهـا أبدا والتيلفزيون في الأوقات العاديه ما أقربـه فـ مابالك فـ رمـضان !
بس وايدين الله يهديهـم يكون رمـضان بالنسبه لهـم مـسلسلات وبرامج نص الليـل الـخ .. بدل مايقضـون هـ الفتره بالعباده وكـسب الاجـر :glare:
وووبس :vampire:
الاسطـوري شكـرا ع الطـرح ومـاقصـرت
:fa51:
بنت الدلع
20-04-07 ||, 01:06 PM
وعليكم السلام والرحمه
رمضان وقت الصيف احس انه وايد مرهق
نحن بعدنا ماجربناه
ولكن بعد كمن سنه مثل ماقلت بيكون رمضان في الصيف
انا اشوف ان الداومات وايد تخفف من التعب
بدال مانكون يالسين في البيت ونحس باليوع والتعب ومافيه شي نشغل عمارنا به غير العباده
الدراسه بتشغلنا والوقت بيطوف بدون مانحس به
وعن الرقاد في النهار
اذا شي اجازه صعب ترقد في النهار بعد
اما ايام الدوامات ترجع وانته تعبان واتحط راسك
بس جيه الواحد مايحس بالصيام
الصبح يكون مشغول
ووقت القايله يرقد
بس ينش ياكل ويتعبد وخلص اليوم
وعن المسلسلات
احسها وايد تشغل عن العباده
ولكن الي ينظم وقته ويخلي الاوليه هيه العباده
مافي شي بيأثر عليه
:fa35:
الدلووووعة
20-04-07 ||, 01:22 PM
عني انا احسه بيكون احسن فرمضان ^^
يمكن لنه ماعدنا شي نسويه
غير عباده ورقاد واكل بس ها اللي بنسويه
بس بيكون تعب على اللي يشتغلون
وعلى اللي هب متعودين على اليلسه فالبلاد فالاجازات
بس بيكون احلى للي يبون يسيرون العمره فرمضان
والداراسه مانعتنهم من ها الشي يعني شراتنا ^_^
بس خاطري اجرب رمضان فالصيف ^^
الاسطوري
21-04-07 ||, 03:54 AM
هــــــــــلا ..
"قرموشة"
الأوليين لحقـوا علـى كل شي حليلهـم وصدق كان تعب عكـس هالأيام اللي نمر فيها والمغـرب
مرات يوصل 5 ونص تقريبا يعني سبحان الله الصيام خفيف والوقت
يلعب دور كبير وخاصه لليهال اللي توهم
يصومون بس الله
يعين من وقت الصيف اللي يتريانا نفس ماذكرتي أصعب عن الحين بس أحس بنتعود مع الأيام
والتدريج في تغير الوقت واللي متعود إنه يسافر الله يعينه بصراحه
بس حلاته السفر ثاني أيام العيد ويه قروب
عود لأن ماله طعم هني
مـول وعن المسلسلات انـا وياج ماتابع مـول في الأيام العاديـه وفي شهر رمضـان بس وقـت
الوجبـات يمكن بعـد أما إني أتعنـى عشان أشـوف لا نادرا تصيـر
والأيـام العاديـه تقريبا مستحيـل وشكرا
على الرد الطيب
"بنت الدلع"
صح كلامج الواحد يوم يكون مشغول بشي مايحس بالوقت ويمر بسرعه وبدون تعب عكس
يوم الواحد يكون فاضي بلا شغله ولا مشغله بس لين هاك الوقت
ماتوقعج بتكونين بعدج تدرسين إلا إذا حد
داعي عليج هذا شي
ثاني ، والرقاد مثل ماذكرتي إن الواحد يرجع من الدوام وبعده النهار طويل باقي كـم ساعه
للمغرب فـ يعني الواحد لو يريح له شويه أحسن عشان يقدر يتم
واعـي لوقـت متأخـر فالليـل ويتعبـد ،، وعن
المسلسلات بصراحه سنويا
يزيدونهم عشان يشغلون الناس والمشكله إنهم يلاقون إقبال من الجمهور عشان جيه
مستمريـن وللأسـف مسلسلاتنـا بدت تطـرح أفكـار تهـز
قيمنا ومبادئنـا ولا تحرمينـا
هالمرور
"الدلووووعة"
قصدج أحسن في الصيف وصح كلامج للي تكون الدراسه ثقيله عليهم أو وايد عندهم أشياء
يسوونها وتشغلهم عن العباده وتعبهم في الجهه الثانيه بس موضوع
الأكل مهم اللي تطرقتي له وبصراحه صار
هم الناس خاصه
يمكن عندنا في دول الخليج الأكل في شهر رمضان يعني مب شهر تعبد لا شهر أكل وبس
والمشكله إن نص الأكل للأسف مصيره الرمي وفي ناس في
دول ثانيه مب لاقيه تاكل وشكرا
على التواصل
الاســـطـــوري
أخوكم
مــهــابه
21-04-07 ||, 08:01 PM
وعـليكم الســلام والرحمــه
رمضـان فـ الصيف ، مـاحيد اني لحقـت على الأيام اللي كان فيها رمضان فالصيف ، ولكن امايه كانت تخبرنيه عـنها دوم ، في اعـتقادي ان رمضـان وفالصيف بيكون تـعب عـلينا لو كان في دواماتـ
أما لـو كان بإجازه صح بيكون تـعب ، لكن هب شرات لو كان في دوامات ،
لوكان رمضان فـالصيف ، احس أشيا وايد بتـتغير ، يعني مثـلاً ماشي سـفر ، وع طاري السفر حسب الوقـت يعني ارمضان متـى يكون
وع طاري المسلسـلات ، انا ماطالـع المسلسلات فأيام رمضان ، لانه دوامات ، أما لوكان فـإجازه ، اعـتقد راح نطـالع ، لأن الصيف ليلنـا نـهاار ونهارنـا ليل ، ورمضـان نفس الحاله ، تحس بأننا نسهر ، بس مب شرط ع التـلفزيون
يـعني مثـلاً فرمضان وعسب الدوامات والوقت وجيه ، مانقدر نختم القرآن غير مره وحده ، ولكن فالصيف وفي الاجازه راح يسهل علينا المهمه ونقدر نخـتم أكثر من مره !!
ووبس !!
مشكور أخويه ع الموضوع
تـحيــاتي لكــ
مزايا
21-04-07 ||, 08:08 PM
انا بصراحه ماشووف فيها شي
يعني رمضــان اللي كان ف آخر السنه بيكون ف الصيف
نفس الشي بإستثنااء الجو
بالعكس أحسه إختبــار للصــايم :)
الجنيه
22-04-07 ||, 09:40 AM
السلام عليكم ورحمة الله وبركاته ...
الاسطوري الصراحه موضوعك حلو امس كنا نرمس عنه هل تعلم انه رمضان السنه بيكون باذن الله 11/9/2007 *_* واحتمال يجدم او يأخر يوم يعني شهر 9 اوريدي صييييييييييف بس اضن يوم بيكون في نص 7 والا 6 بيكون اشوي اصعب رغم انه البركه في المكيفات الي ما تهدا دقيقه هالشي ممكن يساعد على تخفيف الحراره ..
بالنسبه للنهار الطويل احس لو بدوام افضل صح اتعب بس بعد الواحد يكتسب الاجر من وراه ...
المسلسلات آخر همي الحمدلله كبرنا وعقلنا خخخ يعني ما اتابع مسلسلات بجنون يادوب مسلسلين ويستاهلون مش اي كلام وان شاء الله ربي يقدرني هالسنه حتى المسلسلين ما اتابعهم..
الاسطوري
24-04-07 ||, 07:08 AM
هــــــــــلا ..
"مهابه"
صح أنا وياج يعني اللي ينش من الصبح ويداوم خاصة اللي دواماتهم فنيـه وتقريبا في
الشمس يتعبون وايد فـ كيف يوم بيكون هالشي في الصيف والواحد
صايم ! وبخصوص الإجازات أتوقع بأن
الواحد بتكون له
رغبه بإنه يطلع إجازه في هالفترة لأن الدوام في الأيام العاديه مقدور عليه مقارنة
بالفترة هاي وصدقج يمكن نلقى فترة أطول نتعبد فيها ونختم
مرات أكثر ،، العفو اختي ولاتحرمينا
هالتواجد الطيب
"مزايا"
اممم مادري ليش أحسج مرات تبدين من نقطة الاختلاف قبل نقطة الاتفاق بس ماعليه
رايج يهمني كـ طارح للموضوع وصح يمكن حاليا ماتشوفين
إن في إختلاف بس عقب ما
نعيش التجربة إذا الله عطانا العمر في إحتمال تتغير نظرتج خاصه إن نحن ماعشنا
هالتجربه قبل بشكل جدي مع كل هالتغيرات اللي تصير
اليوم وشكرا على المرور
:yes:
"الجنيه"
وعليكم السلام ،، اممم اذا التاريخ اللي ذكرتيه صحيح يعني الفرق اللي أنا ذكرته غلط وعليه
شهر رمضان بيكون في عز الصيف خلال 4 او 5 سنوات ومثل ماقلتي
من الحين هو تقريبا بدا يدخل في الصيف بس
بعده الفطور يكون بحدود
الساعه 6 قبل او بعد بشـويه بس عقب بيتأخـر وايد لأن في الصيف المغرب مرات يوصل في
حدود الساعة سبع وثلث وأحلى مافي الموضوع إن الله سبحانه وتعالى
خله التغير يكون تدريجي يعني سنه ورا سنه
يتغير شويه مب مره وحده
ونحمد الله على هالنعمه وعن المسلسلات شوفيهم بس مثل ماذكرتي بحدود يعني ماتخلين
المسلسلات أهم من فروضج مثلا وتحاولين تختارين شي ممكن
تستفيدين منه أو تاخذين فكرة عن بيئة
معينه والله يوفقج
الاســـطـــوري
أخوكم
دانة حتا
24-04-07 ||, 10:37 AM
احس تعب الدوام برمضان
الدوااام زفت ونحن تعبانين
ع الاقل في البيت مرتاحين وما نسوي شي غير انا نقعد وبس
بس دوام ومراكض ما احب
مزايا
24-04-07 ||, 08:18 PM
"مزايا"
اممم مادري ليش أحسج مرات تبدين من نقطة الاختلاف قبل نقطة الاتفاق بس ماعليه
رايج يهمني كـ طارح للموضوع وصح يمكن حاليا ماتشوفين
إن في إختلاف بس عقب ما
نعيش التجربة إذا الله عطانا العمر في إحتمال تتغير نظرتج خاصه إن نحن ماعشنا
هالتجربه قبل بشكل جدي مع كل هالتغيرات اللي تصير
اليوم وشكرا على المرور
:yes:
مش مشكله اذا بديت بـ نقطه الاختلاف او نقطه الاتفاق
الاهم إني اطرح رايي فهالموضووع
الاختلاف الوحيد اللي بنلااحظه هو اللي قلته قبل وهو الجو
وبعدين فالصيف مافي دوامات
يعني راحه للكل
عهد الوداع
24-04-07 ||, 09:24 PM
ترا الايام الدور ,,,والحين يا دورنا ,,
من فتره كنت ارمس امي عن هالموضوع الله يعين والله بيكون صج تعب وحر ,,,
وبيكون اليوم وايد طويل ,,,
تحفه
24-04-07 ||, 10:12 PM
ممتعوده على اجواء ارمضان البارده ابصراحه ما اتخيل ارمضان من دون البرد
الاسطوري
25-04-07 ||, 05:11 AM
هــــــــــلا ..
"دانة حتا"
اممم احسج مارمستي في صلب الموضوع الاساسي بس الفكره بتكون وحده ومن ردج يبين إنج وايد
تحبين الكراف لـ درجة إنج تحبين تكونين في البيت عشان تقعدين وبس ومن
واجبي إني أنصحج بأن تحاولين تغيرين هالعاده
لأن صدقيني يوم بتشتغلين
وبتساهمين وبتنجزين حتى لو شي بسيط بتحسين بقيمتج كـ شخص فعال في هالمجتمع بس دام إنج
ماسويتي ولاجربتي ماتقدرين تحكمين وحتى لو كان الموضوع فيه شوية
تعب بس أقولها من تجربه لذته أحلى مما
نتوقع ويستاهل الجهد
"مزايا"
احترم وجهة نظرج بس عن نفسي مقتنع بوجهة نظر دكتور علم النفس بان الواحد إذا كان
حاب ياخذ ويعطي في أي موضوع بسلاسه وهداوه لازم يبدأ من
النقاط المتفقين عليها ثم بالتدريج يعرض
وجهة النظر الثانية
هذا في حالة وجود نقاط متفق عليها ولكنج سويتي العكس وصح في الحالتين وصلت
المعلومه بس بالطريقه هاي ومن كلامج حسيتج تشوفين الحياة
بنظرة تشاؤم شويه يعني أمس مثل
اليوم ومثل باجر
"عهد الوداع"
هيه والله صدقج الايام اتدور واحنا تونا بنشوف هالايـام وأعيالنا مثلنا مابيشوفـون
هالشي إلا عقب عمر طويل وان شاء الله نتحمل ونصبر ولنا الاجر
والله يخلي لج الوالده ويحفظ أمهاتنـا كلنـا
وشكرا على التعقيب
"تحفه"
هيه تعودنا على الخيم والسهر في الجو البارد على ضوء القمر بس ياحسرة ما
بنشوف غير الرطوبة والحر حزتها ومالج غير تصيفين برع
البلاد عشان مايتغير عليج الجو وشكرا
على التعليق
الاســـطـــوري
أخوكم
ألم ترى
25-04-07 ||, 06:20 AM
بسم الله الرحمن الرحيم ..
هلا خوي ..
بنظري بأن رمضان ف الصيف بتكون فيه حلاوه وخاص لما تذكر الاجر وانت عطشان او يوعان ! ..
يالله كيف ينظر لك الرب وانت ماسك الخشب وواقف ع ريلك وتقول اللهم اني صائم ..
والله صح وادري ومتأكد بأنه بيكون تعب وخاصه لـ العسكريين اللي ع الطوارئ ..
شكرآ شكرآ لك اخي ع الطرح ..
اللهم ارحمنا برحمتك الواسعه ..
مزايا
25-04-07 ||, 11:13 AM
"مزايا"
احترم وجهة نظرج بس عن نفسي مقتنع بوجهة نظر دكتور علم النفس بان الواحد إذا كان
حاب ياخذ ويعطي في أي موضوع بسلاسه وهداوه لازم يبدأ من
النقاط المتفقين عليها ثم بالتدريج يعرض
وجهة النظر الثانية
هذا في حالة وجود نقاط متفق عليها ولكنج سويتي العكس وصح في الحالتين وصلت
المعلومه بس بالطريقه هاي
انا وياك في طريقة عرض الراي على الثانين
إنه نبدا بالاشيـاء اللي متفقين عليها وبعدين نبدا بنقطه الاختلاف
انا بديت ب نقطه الاختلاف لانه اللي قبلي بدوا بنقطه الاتفاق وانا مابزيد عليهم شي
سوا اني بردد اللي قالوا مثل الببغــاء ف فضلت إني ابدا بالاختلاف =)
ومن كلامج حسيتج تشوفين الحياة
بنظرة تشاؤم شويه يعني أمس مثل
اليوم ومثل باجر
مش تشــاؤم بس
ماتعب راسي بشي
بيستوي عقب كمن سنه
ناس تحيا وناس تموت لين هاك الوقت
ويوم بيستوي رمضان فالصيف الله بيّسر علينا
:blush:
الاسطوري
26-04-07 ||, 06:03 AM
هــــــــــلا ..
"ألم ترى"
هيه والله صدقك ترا على قد التعب يكون الأجر والموقف اللي ذكرته كأنك نقلتي لـ زمن
ثاني بعيد وعشت الموقف بلحظاته والله يعين اللي دواماتهم متعبه
وفيها بذل جهد جسدي كبير وشكرا على
المرور عزيزي
"مزايا"
مابى أطلع من الموضوع بس ما أتفق وياج في إنج لو بديتي بالاتفاق بتكونين رددتي كلام غيرج
بدون فايده بالعكس بتكون هاي وجهة نظرج ومايخصها بحد لأنه بيكون
في نقص في الفكرة إذا الرد مب كامل أما
بخصوص التشاؤم
فكلامج يرد يأكد لي هالشي لأنج ذكرتي الموت وبمعنى ان الواحد مايضمن عمره وهذا كله
تشاؤم في نظري لأن المفروض الواحد يسوي لـ دنياه كأنه يعيش أبدا
ويسوي لآخرته كأنه يموت غدا يعني
الموت لازم ماتربطينه
بشغلج وخططج وطموحاتج المستقبليه في الدنيا ولا بتيلسين مكانج حاطه إيدج على خدج
وتقولين في يوم من الأيام بموت (بعيد الشر) وحتى لو عشتي 100
سنه مابتسوين فيهم ولا إنجاز أو
عمل يذكر
الاســـطـــوري
أخوكم
مزايا
29-04-07 ||, 07:16 PM
^
^
^
=)
هزاايم
04-05-07 ||, 02:19 PM
................
الاسطوري
27-08-08 ||, 02:33 PM
^
وتراجع شهر رمضان بالنسبه للسنة الميلادية مازال مستمر وفي إتجاهه لعز الصيف خلال
السنوات القادمة، إن شاء الله يكون الصيام سهل على الجميع
وخاصة اللي أشغالهم تكون خارجية
في الشمس
بحر الموده
27-08-08 ||, 03:02 PM
وعليكم السلام ورحمة الله وبركاته
اخوى الاسطورى شكراً لك على هذا الموضوع الطيب
مبروك عليكم شهر الخير مقدماً والله يعوده على الجميع بالصحه والعافيه
الله ياوقت مضى انا لاحق على رمضان يوم كنت صغير فى شهر 5 والشهور تدور مرات فى البرد مرات فى الحر
وعن السفر فى رمضان انا اشوفه مب شىء والواحد احسن له يتم فى ديرته بين اهله وربعه واذا بغيت اسافر عقب العيد او قبل شهر رمضان
وعن المسلسلات فى رمضان انا مااتابع لانه رمضان شهر عباده شهر صوم وصلاه وقيام ليل مب ضرب سهر لين الفجرانيه ...
وربى يرزقنا جميعاً الاجر وختم القرآن اكثر عن مره