مأساه البدون في الامارات..رايكم؟؟ [الأرشيف]

مشاهدة النسخة كاملة : مأساه البدون في الامارات..رايكم؟؟

بنوتة جميرا

16-04-07 ||, 06:36 PM

السلام عليكم ورحمه الله وبركاته
اليوم يالسه اطالع كل المواضيع في الواحه المفتوحه
وشفت موضوع لاخونا المقاتل عن مأساه البدون في الكويت
فحبيت اتكلم عن مأساه البدون عندنا في الامارات
في قصه مرت عليه فأحب اني اخبركم بها
وهذا طبعا جانب واحد للمأساه اللي عايشينها البدون

طبعا شرات مانعرف ان البدون(اللي ماعندهم الجواز و الجنسيه -او اللي عندهم الجواز بس بدون الجنسيه)مايرومون يكملون دراستهم الجامعيه في الجامعات الحكوميه اللي هم(جامعه الامارات-جامعه زايد- كليات التقنيه)
في وحده من بنات كلاسي قالتلي بسير الاداره برمسهم عسب بنت جيرانا
قلت لها خير شو فيها
قالت لي هالسنه هي ثنويه عامه وهم بدون(عندهم الجواز بدون الجنسيه)
فتقول امها قالت لي لو تسيرين وتسالين حد في الجامعه لو بيقبلونها
سرت وياها ورمست وحده هناك عندنا في الاداره
وقالت لها مستحيل تنقبل عندنا في جامعه زايد
هذا قانون من فوق انا ما نقبل البدون

طبعا في شي يديد عندنا في الجامعه بيصير من السنه اليايه
International college at Zayed University
يعني كل الجنسيات اتروم انها تدرس في جامعتنا طبعا برسوم
يعني عادي في كلاس واحد مواطنات مع(هنديات-روسيات-زلمات-.....الخ)
بيفتحون المجال لهذيل كلهم
والبدون حليلهم مايقبلونهم حتى لو برسوم
ليش؟؟منو الاولى انه يدرس في جامعاتنا؟؟
البدون عايشين في بلادنا يمكن قبل لا نحن ننولد بعد بس لسبب من الاسباب ماحصلوا الجواز والجنسيه
ليش هالمأساه موجوده حتى في بلادنا؟؟
حارمينهم من الدراسه في جامعاتنا؟؟
من حقهم انهم يدرسون فيها قبل باقي الجنسيات؟؟

يوم قلت هالرمسه للحرمه اللي سرنالها في الاداره
صخت ومارامت اتقول شي
وعقب قالت معاكم حق بس هاي قوانين مانروم انغيرها
الا اذا عندها واسطه قويه اتروم ادخلها

هذا جانب واحد من المشاكل اللي تواجهم في بلادنا وفي غيرها واااااايد
احس ان مشكله البدون مشكله كبيره في بلادنا
بلادنا اتجنس اللي تبغيه واللي ما تبغيه يتم بدون
هذا مب حرام
والله قلبي يعورني عليهم ما يرومون يدرسون شراتنا او يشتغلون
لين متى بتم هالمشكله عندنا في الامارات؟؟
مالها حل؟؟

ارجو تفاعلكم
ونبغي نطلع بنقاش هادي والكل يشارك فيه ويشاركنا برايه

اختكم.. بنوتة جميرا ..

تحفه

16-04-07 ||, 09:30 PM

على طاري البدون والجوازات

سمعتو ان جواد العلي صار اماراتي p;

والله وايد فرحت له XPXPXPXPXPXP

أنامل قلب

16-04-07 ||, 11:23 PM

ان شاء الله لي عودة ..

(( مجرد تسجيل مرور واعجاب للموضوع واهدافه .. ))

ويزاج الرحمن كل خير اختي ..

بنوتة جميرا

17-04-07 ||, 01:23 PM

تحفه
الصراحه لاتعليق
الحين جواد العلي اولى انه يصير اماراتي
من اللي مولودين ع ارضنا بس للأسف بدون
الله المستعان

بنوتة جميرا

17-04-07 ||, 01:25 PM

أنامل قلب
تسلمين اختي
وفي انتظار عودتج ومشاركتك

الدلووووعة

17-04-07 ||, 02:04 PM

تسلمين اختيه عالموضوع

والله صدثق يسكرون خاطريه هيا الفئه

وبعدين اكتشف طالعو شو اكتشفت ^_^

انه اغلب البدون والله بناتهم شطااااار
ويبون نسب فالتسعينات

كانت وحده فكلاسنا حليلها بدون بس والله كم يابت نسبه 96 بس للاسف
مارامت تسير مكان وبعدها يالسه فالبيت يتخيلو وحده جي نسبتها وعدها طموح بس
شو ماتروم تسوي ولا شي لنها بدون صدق شي يقهر

هم ليش مايشوفون نسبهم وبعدين يقروون اذا يستوي يدخلون الجامعة ولالاء

يعني هيل البدون مابيسون شي ولا بيسرقون هم بيكونون احسن عن الاجانب اللي يعطونهم الجواز الاماراتي وهم اصلا مايستاهلونه يعني هيل البدون اولى منهم

بس ربي يعينهم الصراحة

بنوتة جميرا

18-04-07 ||, 09:03 PM

الدلووعه
وايد منهم يكونون متفوقين
بس للأسف المجال جدامهم مسدود لاكمال دراستهم الجامعيه
ومثل ماقلت
دولتنا اتجنس اللي تباه واللي ماتباه يتم بدون
صدق حليلهم
الله يعينهم يارب

شكرا غاليتي ع المشاركه

شرجاوي

19-04-07 ||, 03:34 PM

على طاري البدون والجوازات

سمعتو ان جواد العلي صار اماراتي p;

والله وايد فرحت له XPXPXPXPXPXP

قصدج صارت مواطنه هع هع هع

البدون مظلومين في دارهم ... و كذلك ابناء المواطنات:fa39:

بنوتة جميرا

19-04-07 ||, 03:43 PM

شرجاوي
لا تعليق ع السطر الاول..خخخخ..
بحط موضوع بعد لابناء المواطنات
بس للحين ماشوف اعضاء يخبرونا رايهم بهالموضوع
مشكور ع المشاركه اخوي

فنجان قهوة

19-04-07 ||, 09:42 PM

شرجاوي

19-04-07 ||, 11:15 PM

محد لهف حقوق البلاد غير المواطنين ب انفسهم ...

و اختي المواطنين اللي عندهم الجنسيه هذيله اصولهم اماراتيه 100% ؟؟؟ يمكن 1% ( اذا مب اقل ) من المواطنين اجداد اجداد اجدادهم انولدوا هنه .. المواطنين في منهم بلوش و في منهم عيم و في زلمات و في مهنده و يمنيين و و و و .. كم و كم بنتكلم فهالموضوع ... بس البدون 100% مظلومين عندنا .. المواطنه اذا خذت بدون تنسحب جنسيتها .. و المواطن ما ايزوجونه لوحده من فئة البدون ... و هاي ما عندها غير واحد من فئتها يعني بدون .. هذا ما يشتغل وين بييب مصاريف العرس و كيف بيصرف على حرمته و عياله ... اختي لو كنتي مكانهم صدقيني كلامج كله بيتغير

الـيـاه

20-04-07 ||, 02:30 AM

انزين احين البدون مب من إيران ؟ اوكي ليش ما عندهم جوازات إيرانية ؟

بنت الدلع

20-04-07 ||, 12:05 PM

و الله هاي المساله نحن مالنا الحق ان نرمس فيها لان الجهات المعنيه يعرفون شو الي يستوي منهم
صح في منهم مساكين و يستاهلون الجواز بس في منهم من لهف حقوق البلاد
و مافي انسان بدون في الامارات لان مافي انسان يه من الهوى
يعني هم اكيد لهم اصل
و دامهم اتبروا منه مره ممكن يتبرون منه الف مره
و وايد من الي يبون الجواز عشان يبون الامتيازات
و الدوله لازم تحقق و تتحرى في الموضوع
لان اولي الامر ما يبون ياكلون حقوق المواطنين

اول شي بتخبرج
انتي تعرفين كيف الناس حصلت جوازات ؟

اذا ماتعرفين لاترمسين في هالموضوع

البدون عايشين في الامارات من مده طوييييله
واصلهم مواطنين
نحن مابنرمس عن الي شردو ايام الغزو
نرمس عن الاماراتيين
ياما سمعنا سوالف تقطع القلب
ياما ناس اشتكت في الاف ام ومحد سمعها

ناس حالهم حالنا
ليش مجردين من الهويه !
مالهم حق في الدراسه ولا العيش
كيف يقدرون يدشون جامعات خاصه وهم يادوب المعاش يكفيهم
لاتستهزؤون بهذي الفئه من الناس
متعلمين ومتثقفين وفاهمين
طبعا مب الكل
بس معضمهم اخلاقهم مالها مثيل الصراحه

جنسو الرقاصات المغنيات الاجانب اللوث
والمواطنين الي لهم حق والاوليه في البلاد ماحصلو جناسي

شي يقهر الصراحه

يالياه انا قبل كنت اقول شراتج ليش مايردون ايران
ولكن يوم قريت عنهم وسألت
عرفت ان اصلهم هنه
حتى ولو بعضهم كانو مسافرين ومهاجرين
لغرض التجاره ولغيره
يمكن بعضهم ماكانو موجودين يوم ظهر نظام الجوازات
بس الحين هم هنه
ومن اكثر عن 20 سنه موجودين

مره وحده اتصلت حق بوراشد اذا ماخاب ظني
ورمست عن حالها
تقول نحن من زمان عايشين هنه
اجدادنا هنه
عيالنا مانروم نأكلهم مانروم نصرف عليهم
كيف قلبنا مابيرق عليهم ونحن عايشين في نعمه
ندرس ونتعلم ونشتغل والي نباه نحصله واحيانا نتبطر على الدراسه
لكن في المقابل نشوف ناس فعلا محتايه ولكن مالهم حيله

الله يخفف همومهم ان شاء الله
واللي له حق بيحصله ولو في يوم الحساب

أنامل قلب

20-04-07 ||, 04:10 PM

السلام عليكم والرحمه ..

ببدأ بسرد حياة واحد من البدون ..
اللي له قريب الثلاثين سنه عايش بهالبلاد وبالتحديد " دبي " ..
متزوج وعنده " اظني 4 او ست " عيال .. رزق رب العباد ..
معاشة مايتجاو الــ 3000 ويمكن مب موصل للـ2500 .. >> وعايش بدبي ..
عياله اكبرو مايعرفون غير اللهجة الإماراتية وهويتهم بدون ..
في من عياله بمدارس حكومية " متفوقين لكنهم ماقدرو يكملون لان ممنوع عليهم دخول الجامعه " ..
منهم اللي بعده مب مخلص بمدارس خاصه عشان القرار اليديد اللي ظهر ويمنع دخولهم المدارس الحكوميه ولو بواسطه ..
عايشين بشقه >> بدبي ..

وأكرر كلمه " بدبي " لأن الكل عارف بحال البلاد الحين ..
شقق امكحكحه ماتجاوز غرفة وصاله ما تقدر تمد ريلك من كبر البيت .. ! والإيجار مايقل عن الـ 50 ألف ..
مع التذكير بإن المعاش مايوصل للـ 3000 ..

هذا غير مصاريف اكلهم ولبسهم وعلاجهم اللي من يمرض واحد من العيال يباله دوا بخمسمية !
غير الماي والكهربا .. والكل عارف بإن دبي صارت غالية .. ومصاريف اهلها مكثرها ..

واللي يقول ان البلاد عارفة بهالأمور اللي تصير منهم ! .. وإن في منهم من لهف حقوق البلاد .. !
أقوله محد من خلق الله كامل ومانقدر نشمل .. إذا أهمه 5% منهم " كأقصى حد ماوصلوله " كانو من الصنف للي تم ذكره ..
( واللي مالقولهم مفر غير اتباع هالدرب لكثرة ماضاقت الدنيا عليهم وانحرمو من ابسط حقوقهم )
فإن غيرهم ترس من اللي مايشرف البلاد سلموهم الجواز والجنسية قبل لا يطلبونه بس عشان شي مسمينه الواسطة .. وحبا بالمظاهر ..

ومثل ماقلت بردي بموضوع أخوي المقاتل ..
(( لو الواحد منا حط نفسه مكان احد هذول البدون .. وقدر يحس
بمعنى ان يكون تحت اطار مسمى " البدون " .. والاحراج اللي فيه ..
ماكنا بنشوف هالظلم اللي واصلين به لابعد الحدود ..

احس جي كإن ذالينهم عشي مانه موجود ..
مجرد انهم عايشين ببلاد ماهي بلادهم .. ذلوهم ..
لا معاشات مثل الأوادم يحصلون .. لا اسم وهوية طيبة يحطون لهم >>> بدون
شو ها بعد ..
وغيره وغيره وغيره من حال ما يسر الصراحة .. ))

(( كأنهم عايشين عجبد البلاد .. مع انهم اكثر من يرتبط ابها ..
لكن من يحس .. ))

.
.

وعلى فكره أعرف ناس رافعين راس البلاد حالهم حال البدون " بالأصل " ..
لا بعد الشيخ مكرمنهم ومحتلين مناصب عالية " جدا عالية "والكل يذكرهم ..
لكن الفرق الوحيد ان هذول متجنسين ..
والبدون تمو بحالهم .. مع انهم مع كل هذا يعتبرون انهم ببلادهم " وفعلا هم ببلادهم "
وناطرين الفرج ..

..................
اختي بنوتة جميرا أكرر شكري لج على طرحج ..
واذا ربي راد بيكون لي مرور آخر ..
وأعتذر على الإطالة ..

..............................:: جل احترامي وودي لج في الله .. إختج أنامل قلب ..

مجموعة إنسان

20-04-07 ||, 04:52 PM

انزين احين البدون مب من إيران ؟ اوكي ليش ما عندهم جوازات إيرانية ؟

هذيل اصلهم من إيران .. صح
بس قبل الظروف ما كانت سهلة عليهم ( قبل يعني من سنة 1960)
يعني كانوا يسيرون الكويت والسعودية والعراق والكويت
كانوا يسترزقون الله
يدورون لقمة العيش

ويو وسكنوا في الأمارات
والله ان في ناس أعرفهم من سنة 1969 موجودين في البلاد .. بس ماعندهم جوازات..

في واحد مخرج أفلام في الأمارات .. يوم يتكلمون عنه ان المخرج الأماراتي فلان والفلاني
بس هو بدون..

هالبدون يخافون من اليوم اللي بيطلع في قرار بطردهم ( بس هذا الشي مستحيل بيصير ،، )
.
.
.

ماقدر أكمل ...

شرجاوي

20-04-07 ||, 05:17 PM

واحد من الوزراء اليداد عطاهم ب نقعه اثناء اداء القسم اعتقد و حتى الشيخ الفلاني ضحك عليه ... كلكم عارفينه منو .. و عارفين شو اصله

الحمدلله الحين تجنيس البدونلا زال مستمر و اتمناه يستمر

بنوتة جميرا

20-04-07 ||, 05:45 PM

فنجان قهوه
قريت ردج انقهرت
سوري ع الكلمه بس صدق
الحين البدون حليلهم هم اللي لاهفين حقوق البلاد؟؟
فكري بالكلام عدل قبل لا تكتبينه وشوفي منو اللي صدق ناهب هالبلاد

لو سرتي برا مثال امريكا
اي بيبي ينولد هناك على طول يحصل الجنسيه لو هله وافقوا
بس في بلادنا البدون اللي انولدوا هني ع ارض الامارات حليلهم
من زود سكان الامارات ما يعطون البدون الجنسيه!!!؟؟

مشكوره ع مشاركتج

بنوتة جميرا

20-04-07 ||, 05:49 PM

شرجاوي
انا معاك في كل اللي قلته
المواطنين اللي عندهم الجنسيه اصلهم من ايران والا باكستان والا اليمن...الخ
ويمكن 1 او 2%اصلهم من الامارات

واكبر فئه مظلومه في بلادنا البدون
يتريون الفرج متى يحصلون الجنسيه
الله يكون في العون

تشكر اخوي مره ثانيه ع المشاركه

بنوتة جميرا

20-04-07 ||, 05:51 PM

الياه
الله يعينج لو ها تفكيرج
البدون اغلبهم موليدين هني
بس للأسف هم بدون بسبه قوانين ظالمه في بلادنا

بنوتة جميرا

20-04-07 ||, 05:59 PM

بنت الدلع
صدقتي والله
وشرات ماقلت بلادنا اتجنس اللي تباه لو بالواسطه
واللي ماتباه يتم بدون
حسبي الله ع اللي يتعامل بالواسطه في بلادنا ويرضى بها ويقبل الرشاوي
مخربين بلادنا الله لا يسامحهم

الوافدين حصلوا الجنسيه واغلبهم بالواسطه
بس البدون مظلومين للحين يتريون الفرج ذنبهم في رقبه هاللي يتعاملون بالرشاوي
وفنجان قهوه اتقول ان البدون هم اللي لهفوا حقوق البلاد
لو رمست في هالموضوع برمس ومابسكت من الظلم اللي اشوفه
حسبي الله ونعم الوكيل ع كل ظالم في بلادنا وان شاء الله لهم يوم
والبدون بياخذون حقهم لو يوم الدين

مشكوره بنت الدلع ع المشاركه

بنوتة جميرا

20-04-07 ||, 06:03 PM

أنامل قلب
الكثير من البدون يعانون
وقصص كثيره نسمعها يوميا عن حال البدون
الله يكون في عونهم
وبخبركم عن قصه واحد بدون يشتغل عند ابويه
صدق يكسرون الخاطر

شكرا لج عزيزتي

أنامل قلب

20-04-07 ||, 06:06 PM

تذكرت موقف صار مع اثنين من خواتي لمن كانو بالثنوية العامه .. >>
>
> طبعا الكل يدري بإنهم يطلبون من كل مواطنه نسخه عن الجواز والخ من أمور عشان الجامعه والطلبات ..
تخيلو المشرفه عندهم بكل برود تقول " واللي ماعندهم اوراق خلاصة القيد مايقدرون يسجلون .. فخلهم يقولولنا لأنهم مابيحضرون معانا باجر للجامعه .. " .. لا وتبتسم لهم بعد >_<

وطبعا تقولي في بنات ماتوقعتهم ظهرو بدون .. لأن سبحان الله عرج البلاد صار ابهم ولهم .. شكلا ومضمونا ..
وتقولي بعد ان الاحراج اللي صابهم شي جدا ضايقنا كلنا نحن العيم والعرب بعد ..

واختي اللي مخلصه الثنوية من سنتين .. أحيدهم بهدلونا من زود مايتصلون ابنا وايميلات وبريد كل ها
عشان موضوع الجامعه ويأكدون عليها باستفهام انها ماتبي تكمل ..
بس لمن إيون عند البدون يظهر كل شي ممنوع ومشدد .. شو هالتناقض !

وفعلا ..
موضوع البدون شي جدا كريه .. وماله معنى ..
ولو قعدنا نتكلم عنه فعلا مابنخلص ..
لكن ياليت أحد يسمع ويجيب ..

ربي يكون بعونهم ويرزقهم من رحمته .. بفضله ..
وأعتذر عالاسلوب اختي بنوته جميرا .. وعالازعاج ..

بنوتة جميرا

20-04-07 ||, 06:09 PM

هواجيس مشتاق
البدون اغلبهم ناس مجتهدين ومتفوقين
بس للأسف بلادنا واقفه في ويوههم

قصه واحد بدون سمعتها من ربيعتي
ماشاء الله عليه عنده خير
ومحلات وصاحب تجاره
والسياره ماتم عنده شهر
يعني له دور فعال في بلادنا
رافع راسه بشغله وبجهده ورافع راس الامارات
لانه يعتبرها بلاده وهي اصلا بلاده لانه مولود فيها
هذا البدون الله عطاه من خيره بس في بدون حالتهم جدا صعبه
الله يكون في العون

شكرا اخوي ع المشاركه

بنوتة جميرا

20-04-07 ||, 06:18 PM

انامل قلب
لج حريه التعبير اختي
وبالعكس كلامج مافيه شي غلط
وع طاري ايام الثنويه
ربيعتي الروح بالروح كانت بدون
ماكنت ادري الا لما كان لازم انه انودي صوره الجواز والجنسيه عسب الجامعه
هني عرفت
ماكنت اتمنى انحط بهالموقف
اشوف ربيعتي حزينه انها ما بتكون ويانا
وانها ماتقدر اتكمل دراستها
قلبي عورني واااايد

بنوتة جميرا

20-04-07 ||, 06:22 PM

قصه الشاب اللي يشتغل عند ابويه
هو بدون
بعد ما صارت الخصخصه في اغلب الدوائر الحكوميه اتفنش
وتم بدون شغل
مع العلم انه معرس وعنده عيال
كيف بيصرف عليهم وهو اتفنش؟؟محد يفكر فيهم وشو بيصير في حالهم بعد ما يتفنشون؟؟
المهم الحين اتوظف عند ابويه
ويوم سمعت بقصته وحالته يوم اتفنش
كيف كان يعاني وهو ما يشتغل وماعنده راتب
عسب يصرف على عياله وبيته
قلبي وايد عورني عليه

وكثير غيرهم يعانون

الـيـاه

20-04-07 ||, 07:13 PM

بنوتة جميرا : بأي حق تحكمين على طريقة تفكيري من سطر ! واصلن أنا ماذكرت راي أو وجهة نظر
عسب تقولين ( طريقة تفكيرج ) يعني ردج مول مايخصه ..

أنا كنت أسأل بس
لأني اصلن ماعرف شو سالفة البدون .. ادري أنهم بدون جوازات لكن - ماعرف وين بلدهم وكيف يو هني وكيف وكيف ؟ - فـ كنت أسال ؟

بنوتة جميرا

20-04-07 ||, 07:38 PM

الياه
معقوله ماتعرفين البدون ولا سامعه عنهم؟؟!!
جي مب عايشه انتي في هالدنيا؟؟!!

الـيـاه

21-04-07 ||, 11:57 PM

^

تعبت لول .. انتي ليش وايد تستبقين الأمور وتفهميني بالعكس لووول
ساااااااااااااااااامعه سااااااااااااااامعه بس ماعرف شو مشكلتهم وليش مايحصلون واصلهم من وين
تاريخهم يععععععععععععنننننننننننن ي ..

الدلووووعة

22-04-07 ||, 12:25 AM

بنوتة جميرا

22-04-07 ||, 08:02 PM

الدلووعه
شكرا الغلا ع مرورج مره ثانيه
وتراني طلعت اللي في خاطري ع هالرد

ملاك الروووح

23-04-07 ||, 08:17 AM

::

السلام عليكم ورحمة الله وبركاته ..

تحية شكر أول شي ..

لج عزيزتي لطرحج لمثل هالموضوع الحساس ..

وتحية لكل من شارك .. وأبدى رايه ..! :thumbup1:

:

البدون ..

انولدوا ف هالبلاد .. وربوا فيهـــا ..

وفطموهم على حبها ..

وماعرفوا لهم وطن .. ودار غيرها !

انتماؤهم .. وطنيتهـــم .. هويتهــــم ..

مالهـــا معنى .. لأنهم ( لا يحملون أوراق ثبوتيه ) !

:

قاموا يجنسون كل من هب ودب ..

كل حد يا عطوه الجنسيه الاماراتيه ..

بس هالفئه .. اللي معظمها صابر أكثر من 30 سنه ..

ومتغربل .. ومتلعوز .. ومتبهدل ..

للحيــــن منتظرين .. هالجواز والجنسيه ..

اللي بيحلون لهم مشاكلهم .. وبيخلونهم يذوقون طعم الراحه ..

من عقب سنين الحرمان .. والتعب .. والشقا ..!

بتخلي عيالهم .. يرفعون راسهم .. في مدارسهم ..

اللي ينشدون فيها .. نشيدنا الوطنــــي ..!

بتعطيهم الحق في انهم يكملون دراستهم الجامعيه ..

ويحققون طموحهم وأحلامهم ..!

بتعطيهم .. الاحساس بالأمان .. والراحه ..

اللي ما حسوا بها أهلهم من سنين ..

سنين .. عايشين وشايلين فيها هم عيالهم ..

وشو بيصير عليهم عقب ما يفارقونهم !!

:

غصـــــه !

يارنـــا الباكستاني .. مواطــــــــن ..!

زميلة اختي الهنديه في العمـــل .. مواطنه ..!

جواد العلي .. ( ع قولة تحفه ) مواطن ..!:fa55:

السوبرفايز الفلبيني .. المسؤول عن أخوي .. مواطـــــن !!

:

ربيعتـــي .. بدون !

راتب أبوها .. ماكان يتعدى الــ 4000 درهم ..

وكان يصرف على أكثر من 10 أفراد ف عايلته ..

يشتغل في الجيش .. لأكثر من 30 سنه ..!

ومعروف عنه سمعته الطيبه .. وأخلاقه اللي الكل يشيد فيها ..

كل اللي ف بيتهم متفوقين .. ومن الأوائـــل ..

ونسبهم في الثانويه كلها في التسعينات .. لكن انحرموا من فرصة التعليم ..!

حتى هي نسبتها ماشاءالله كانت 96.5 .. لكن ما قبلوها ف أي جامعه في الدوله ..

حاولت وحاولت .. مع الجمعيات الخيريه .. والمؤسسات والدواووين .. عسب يساعدونها

كلمت مسؤولين .. وصلت لناس كبار .. لكن كل اللي حصلته .. مجرد وعود .. وأوهام ..!

وفجأة .. أبوها فنشوه ..! واستغنوا عن خدماته ..!

من عقب خدمه 30 سنه ..!

بدون أي مقدمات .. عطوه خدماته .. وقالوا له توكل على الله ..!

حط هالمبلغ حق ولده عشان يكمل دراسته ف جامعه خاصه ..

وكمل سنتين ماشاءالله ف كلية الهندسه .. لكن مصاريف الدراسه كانت فوق ما يتحملون ..

فاضطر انه يوقف .. والحمدلله حصل له وظيفه ( بالواسطه طبعاً ) !

ظروفهم صج كانت صعبه .. حسيت بمعاناتهم ..

الحمدلله اللي عوضهم عن سنين الصبر والحرمان هاي ..

وحصلوا الجنسيه من فتره .. بأوامر من سمو الشيخ محمد بن راشد الله يحفظه ..

استانست .. تحرت انه موضوع دراستها خلاص منتهي ..

بس للأسف .. راجعت الكليه وجامعة زايد وجامعة العين ..

ومحد منهم يقبلها .. لأنه صار لها أكثر من سنه متخرجه .. والأولويه حق خريجين هالسنه ..!

الحمدلله .. حصلت وظيفه الحين عقب ما صارت مواطنه ( بعد بالواسطه ) ..

وقاعده تكمل دراستها الجامعيه ف جامعة خاصه .. على حسابها ..!

:

شو ذنبهم انهم انولدوا .. وهم ما يحملون الجنسيه ..!

هم أحق وأولى من اللي قاعدين يحصلون جناسي دولتنا ..

ليش نحرمهم من أبسط الحقوق .. اللي يستحقونها ..

ليش مستكثرين عليهم اللي بيحصلونه من ورا الجنسيه ..!

الحمدلله الخير وايد .. وبلادنا ف نعمه ..

وشيوخنا الله يحفظهم ويطول ف أعمارهم .. خيرهم سابق و واصل اخر الدنيا ..

اللي في البلاد مش أولى ؟!

ويقولون لي خلل في التركيبه السكانيه ..

كيف ما تبون يستوي هالخلل .. إذا كنتوا رافضين تجنسون البدون!!

ماشاءالله في الكويت والبحرين من كم سنه .. بدوا يجنسون البدون اللي عندهم ..

وقدروا يستوعبون المشكله هاي ..شوي !

ونتمنى من المسؤولين .. والجهات المعنيه .. انهم يعيدون النظر ف وضع ( البدون ) في البلاد ..

لأنه حالهم ما يسر العدو .. و أوضاعهم وحالتهم الاجتماعيه جداً صعبه ..

ويادوب يقدرون يتحملون تكاليف الحياه الغاليه ..!

::

السموحه لو طولت في الرد ..

بس موضوع شرات هذا .. لو تكلمنا فيه لأيام ما بنخلص ..

وانا للحين ما قلت اللي ف خاطري ولي عوده :h_daleel:

:

تحياتي لج حبيبتي :inlove:

أنامل قلب

23-04-07 ||, 03:13 PM

حبيت أبدي إعجابي لردج الطيب اختي ملاك الروح ..

ويزاج الرحمن كل خير عنا وعن كل من ابتلي بهذي البلية ..

.
.

احترامي وودي لج في الله .. اختج أنامل قلب .. ^_^ ..

ملاك الروووح

23-04-07 ||, 10:32 PM

::

حبيبتــــــــي انامل قلب ..

تسلمين الغاليه .. ما عليج زود

:inlove:

:

واللي قلته غيض من فيـــــــض والله

محد بيحس بمعاناتهم .. إلا إذا عاشها .. ولا عاش مع حد جريب منه وايد ..!

وعرف شو يعني جيمة ( الجنسيه ) !

:

يارب تنحـــــــل مشكلتهم جريب ان شاءالله ..

لأنه وضعهم صج يعور القلب ..!

ولــــــي عوده ثانيه للموضوع ..!

بنوتة جميرا

24-04-07 ||, 12:54 PM

ملاك الروح
اشكر لج ردج الرائع
يزاج الله خير الغلا
وشرات ما قلتي موضوع شرات هذا
لو نرمس فيه من اليوم لين باجر ما بنظهر كل اللي في خواطرنا
ان شاء الله تنحل هالمشكله باقرب وقت
ونحن بانتظار عودتج للموضوع مره ثانيه

بنوتة جميرا

24-04-07 ||, 01:01 PM

أنامل قلب
شكرا الغلا ع مرورج مره ثانيه

ذكيه_بس_غبيه

12-05-07 ||, 01:42 AM

ما اقدر اقول غير الله يكون افعونهم

:)

بنوتة جميرا

12-05-07 ||, 12:59 PM

ذكيه_بس_غبيه
اكيد الله يكون بعونهم
شكرا ع مرورج الغلا

بنوتة وردية

12-05-07 ||, 10:08 PM

مشكورة اختي بنوتة جميرا ع الموضوع المميز

الصراااحة هذا ان دل دل على طيب اصلج انج اتفكرين ف غيرج

وعلى سالفة البدون.. قبل كانت حياتهم احسن لكن الحين

حتى شهادة الميلاد والتعليم ولو كان بمدارس خااصة محرومين منها

ومعاشاتهم ما تتعدى 4000 واذا ما كان اقل بعد وتعرفين البلاد والغلاء

اللي كل مالها يزيد ما ادري كيف بكملون حياتهم...

ما اقووول غير الله يكون ف عونهم..

بنوتة جميرا

13-05-07 ||, 08:45 AM

بنوتة ورديه
تسلمين غاليتي
ولازم الواحد منا يفكر بغيره
والله يعينهم