أذان يا بهايم

[الجنيه]

السلام عليكم ورحمة الله وبركاته ...

الصراحه عقب ما انقطعت عن الواحات ما حسيت اني في خاطري شي اكتبه بس اليوم انجبرت عقب الي شفته استغفر الله شوفوا لوين وصل فينا الحال

امس كنا نمشي ع الممزر وحزه الأذان اشوف لكم ذاك الهندي الي عنده كرولا مشغل الأغاني والصوت شال البقعه شل تميت اتحرطم عليه عنبو مب مسوين اعتبار لنا ولا لدينا ؟؟؟ ما بيدي شي اسويه خطفنا عنه ورجعنا البيت ..

اليوم نفس الحاله بس الفرق انه شباب مواطنين مدعوسين باستيشن وصوت الاغاني يسمعه الاصم والله حسيت بالدمعه بتنزل من عيني معقوله في حد منا يسوي هالحركات ؟؟ ومنوه ؟؟ شباب البلاد وينقال انهم مسلمين انصدمت ع كثر البلاوي الي اتصير في البلاد ما توقعت اشوف هاليوم وقتها بس فهمت ليش الهندي تصرف ذاك التصرف اذا عيال البلاد والمسلمين ع قولتهم هذا قدر الأذان عندهم وهذا الاحترام الي يكنونه له شو نتوقع من وافد لا يعرف شي عن دينا ولا يقدره !!!!!!!!!!!!!!!!!


ما اقول غير الله المستعان دام هاييل عيالنا علينا العوض

[إسهر معي ليله]

جيه مب تارسين عينج مالج خاطر تكتبين :k_harhar1:

::
::

والله شو اقولج،، الأجانب مستوين خياس ومب مسويـن
سالفه لـ حد،،

اما المواطنين فـ هاي سالفه ثانيه بعد ،، يسوون سوالف
غلط وتحصلين بعض الأجانب يقلدون،، او انه يشوف هذا
من اهل البلاد ويسوي غلط،،، فيقول ليش ما اسوي انا !

اما يوم الأجنبي بيحس بعمره وبيشوف انه هوه الوحيد
في هالغلط،، يمكن يستحي ع دمّه شوي


المفروض احنا احين ما نسكت عن حد،، ونستوي شرات
الشوّاب.. لو شافوا غلط ما يستحون ويعطون في الويــه
لو منو كان،،

مشكورة عالموضوع

[عذبة الروح]

وعليكم السلام والرحمه

حياج الله اختي
ويلكمووونيشن بااااك

اخويه اسهر معي ليله .. اسمحلي



المفروض احنا احين ما نسكت عن حد،، ونستوي شرات
الشوّاب.. لو شافوا غلط ما يستحون ويعطون في الويــه
لو منو كان،،


كفيت & وفيت بـ آخر سطر :thumbup1:
لكن منو عنده جرأه حتى نقدر نواجه الغلط
واذا انت عندك ..
غيرك ما عنده نكتفي
ونقول نبعد عن المشاكل أحسن .. لانها ممكن تصير لو نصحنا حد

والمصريين ما غلطوا يوم قالوا ][ اللي اختشوا ماتوا ][ <--- من اللي نشوفه كل يوم والثاني

][ والله يهدي من يشاء ][
عن نفسي اللي اقدر عليه .. اسأل لهم الهدايه
مب جريئة شراتك اخويه :fa55:

[مزن هتان]

عليكم السلام ورحمة الله وبركاته

EML
تقول المفروض نحن ما نسكت عنهم؟!!!
بس ما تحس انها صعبه شوي
للبنات؟

أحيد بـ رمضان نحن عن الاشاير و نسمع
حشرة أغاني كانوا شلة شباب و بـ عز الظهر
مو حاشمين عمارهم و لا الشهر اللي كنا فيه
شوي والا واحد ينزل من السياره اللي كانت قدامهم
قطعهم تقطيع صج برد فوادي

انجن يوم اشوف عيال البلاد يسون جيه

مشكوره جناويه

[عمة العيم]

الشكوى لله

ادعوا لهم

بعد شو بنسوي يعني

السموحه

(^_^)
...

[ولد الشحوح]

أجانب ... البلاد بلادهم محد يقدر يقول لهم شي والا جن منعوهم من حركاتهم الماصخة في المولات عن ابوه ما بتجوفها فالبيت سو اللي تباه عقب !!!

[العجيبة]

هو خيـار واحد لا غيـر .. اللي يسوون جي ما يستحـون من ربهـم ولا يحترمــونه ولا يعـرفون حقه عليهم !

ودامكم تشوفون هالشي تقدرون تذكرونهم بأنه يأذن، أو بنصيحة عابــرة انه هالشي ما يستوي،
يقووولكم العاصـي لو تنصحونه يمكن ما يسمع من أول مرة، بس سبحان الله يمكن
الكلمة اللي تقولونها له بـتــرن في أذنه في وقت ثاني ويمكن الله يهديه على ايديكم !


الله يهدي الجميع ..

[مــهــابه]

عــليج الســلام والرحمه اختـيه

هاللـي نشوفـه شي من لاشي

لـو ع الاجانـب بنقول انهم مايحشمون، ومايعـرفون ربهم ، وماخذيـن راحتـهم فــبلادنا وووايد

ولكـن !


المواطـنين ، هـذيل مايسـتحون من ربـهم ، بيسـتحون منـا احنــا؟

والله هـم يعـرفون الصح والغـلط ، ويعـرفون اللي يسونه غلـط ، فـما اعـتقد لو عطيـتهم فـالويـه بيتأثرون هـالأشكال مـاتستحي ع ويـههـا أصـلاً ، ولو تستحي جان استحت من ربـــهــااا


وبـعدين يحطـوون أغـاني ، وفـ رمضــان الله يسـلمج

عـاادي تشوفين لج واحد قـاعد يأكل فالشــارع ولا بـعد ( موااطـن) عيني عـينك

ويدووخ بــعد

حشــى

هـالناس ماتـعرف الحيـــا ؟؟!


الله المســتعــاااان

[ريم العين]

اذا هالشخص ماتربى عدل او اهله قامو بالواجب لكن الاهمال منه
بيشوف من الناس الادب كيف وبيتعلم
والعكس صحيح
وهالريال اللي يطول عالاغاني مابيلاقي واحد يحتشر عليه بالطريج
بيلاقيي كل مره حد يحتشر عليه واكيد الامل بهالشي ضعيف

بس ما فكرتو للحضه كيف ممكن يغير هالشخص هالاسلوب ..
في طرق وايده..
واهمهاوللي يت فبالي الاحسان ..اذا هوما احسن او ما احترم وعبر الشخص اكيد الشخص بيرد له نفس الشي
لكن رسول الله كان يلاقي الاسائه بالاحسان
ونحن مثل ما بغيناه ما يطولعالاغاني لانه مب من الاداب بعد ما بنصارخ عليه ومابنعصب لانه مب من الاداب
بنعامل الاسائه بالاحسان مثل الرسول
وباسلوب محترم وبعيد عن العصبية او اذا كان من الحرمه بعيد عن الترقيق
فاكيد هالريال بيستحي على نفسه بيقصر عالاغاني
وبيكون فالاخير هالشي ايجابي ولصالح الطرفين
الاول ما يتعب نفسه ويصارخ ويعصب
والثاني بيبتعد عن هالاسلوب

شرايكم بكلامي صح ولا غلط

[الجنيه]

إسهر معي ليله
المشكله تارسينها وغصبن عني بعد ههه

الله يسلمك نحن قبل ما انلوم الاجانب لازم انشوف عيالنا وبلاويهم ما يصير نحن كل يوم والثاني انلعلع بحسسونا الاجانب والاجانب اول بادي لازم انربي عيالنا من أول ويديد ونخلق لهم هيبة المسلم والاسلام الحين الي يقول الاجانب سوو والاجانب ما ادري شو ياخي انت احترم دينك وعاداتك وتقاليد وعقب تحرطم تبا الاجانب يحترمونها صحيح انه الاجانب لازم يحترمون عادات وتقاليد البلد الي هم فيه بس وين بيحترمون واهل البلاد رايحين فيها ؟؟؟
الله يرحم زمن شوابنا يوم الواحد فيهم يشوف حد يغلط والله ما يسوي واحد اثنين يا غير انه يمرغه بالعصى الي بيده ولا حد يرمس عقبها لكن الحين لو بتنصح قبل كل شي بينشون الاهل وبيضاربونك اونه شو نحن مربين عيالنا احسن تربيه ومب من حق اي حد يربيهم ويفشلهم جدام الناس عن يتعقدون !!!!!


لو اني واحد من الشباب والله لاعرف شغلي وياهم بس ياخوي المصيبه بنت مالي حيله يعني الصراحه مافيني الجرأه اني اقوله أذان يا أصم يعلك السم



عذبة الروح
ماجذبتي صدق الي اختشوا ماتو ,, الله المستعان وادعيلهم بالهدايه ان شاء الله
جان زين لو يحسون ع دمهم


مزن هتان
هي والله زمان كنا نحس بهيبه الشهر الفضيل وعظمته والا الحين بتشوفين من هالاشكال واردى عنبو ريال طول بعرض يوقف ع زنده الي ما يتسمى ما يصوم ؟؟؟ عنبو شو هالحياه الي عايشنها ؟؟ الله يعزالبهايم عنهم
الله المستعان

عمة العيم
ندعيلهم والله صبح وليل عسى الله يهديهم ويصلح بالهم ويرحمنا برحمته

ولد الشحوح

انا أوافقك الرأي بس بعدني ارد واقول قبضو عيال البلاد خلهم يودرون عنهم المصاخه هاي عشان يكون لنا ويه نمنع الاجانب عن مثل هالتصرفات أغلب الي عندنا يسون حركات مالها لزمه والقهر يوم انه لحيته واصله لين نص بطنه وحرمته اسود في اسود وآخرتها حاضنها من خصرها جدام الله وخلقه في نص السوق ؟؟؟؟!!! عجب عجاب

[عيون الليل]

عزيزتي ، ،

الهندي لو نزلتي الدريشه وقلتي له آذان وسكر الاغاني . . وبكلام طيب . . صدقيني بيقولج إن شالله وبيسكر المسجل . .

لكن المواطن عادي يغلط عليــــج . .

ويوم الاجنبي بيشوف راعي البلاد يغلط . . فأكيد انه بيسوي مثله . .

شو بتقولين بس . . كان الله ف العون والواحد كثر ما يقدر يحاول انه ايوقفهم عند حدهم . . .
لانه الســاكت عن الحق . . شيطــــانٌ أخرس

تسلـمين

[الجنيه]

العجيبة
حبوبه صدقج بس مثل ما قلت قبل يعني صعبه وبعدين اغلبهم يتمون يفترون ع الشارع يعني لين اوصل عنده جد خطف عني وصل الصوب الثاني المفروض هالشي يكون مغروس فيهم من حبهم واحترامهم لدينهم ..

مــهــابه
وأنا من رايج انه هالاشكال ما تستحي بس الشرهه مب عليهم الشرهه ع التربيه صدقيني لو واحد متربي تربيه زينه وهله معلمينه الصح من الخطا من هو صغير ما ضن بيتصرف مثل هالتصرفات ..



ريم ريم
غناتي ترا في ناس مبداهم في الحياه اشعلي انا من الناس واشعلى الناس مني يعني اذن من طين واذن من عجين ع قولتهم اذا من المره الاولى ما استحوا ع ويههم تعتقدين مرتين او ثلاث يفون بالغرض؟؟

[مزايا]

السلام عليكم
شو سالفتكم
هالكثر منقهرين من الاجانب
:k_harhar1:
مايسوى عليكم
ســالفة الاجانب وايد تهون جدام عيال البلاد
على الاقل الاجنبي يمكن يكون ماعنده علم باللي يجوز واللي مايجوز
بس الطامه الكبرى إنه شباب البلاد يعرفوون ويسوون الغلط
مثل ماسبق وقالو اللي قبلي إنه وايدين ياكلون ف رمضــان والناس صيام
وهم خبر خير
الله كريم

بس خفّوا شوي عالاجانب لانه سالفتهم اهوووّن بوايد عن اللي حاصل فالوقت الرهن(أخبار الساعه:a116: )

وافضل تكون المواضيع اليايه عن شباابنا عشان نقطعهم شوي
ولا احسن نطلع فضايحهم الحين
من فتره يمكن من اسبوع كان في يوم مفتوح اظن ف تقنيه دبي (طلاب) والشبيبه ماقصــروا
نقع الرقص هناك
ريــال ويرقص !!
والله هزلت
يوم الريــال يرقص شو خلوا حق البنات
ولا هم بعد عماد الوطن
أمحق عماد والله
جان هم جيه عز الله ماكدينا خير
الله يرحمنا برحمته

[الجنيه]

عيون الليل

صدقتي والله انا بعد جي حسيت اذا قلت للهندي بيسكره لكن لو مواطن ههه على الدنيا السلام الا من رحم ربي ..


مزايا

وعليكم السلام ورحمة الله وبركاته ...
هي نعم مقهورين وبنتم مقهورين بس هذا ما يعني نتغافل عن تصرفات عيال البلاد الي اشوفها اتسود الويه .. انا برأي التربيه ثم التربيه ثم التربيه هي الي تعلب دور والا نحن عيالنا قوم بـ 8 و9 سنين من يأذن يودرون اللعب ويقرون الدعاء وعلى الصلاه الحمدلله لو نحن من هالعمر بنسكت عنهم وبنخليهم يكملون لعب بيشبون ع نفس هاي العادات

[المحاق المشتعل]

من امسات كنت في الممزر وكان في مثل حفله مجابل المسيد إلي عالبحر

وهالمسيد درايشه مفتوح يعني اصوات مسجلات السيارات كلها داخل والله يوم انصلي

لكن اتخيلو اللعانه إلي صارت

حاطين سماعات هالكبر مجابل المسيد

ومشغلين اغاني بصوت عالي عالآخر

والمطوع يقول الله اكبر صوته ما ينسمع من حشرة الاغاني إلي عالبحر

بعد اتقولون صوت المسجل

حفله كامله حاطينها جدام المسيد ومحد رمس :a046:

وإلي منظم الحفله ماعرف منو الله يهديه

وفوق هذا كله بس حزة الصلاة كانو امشغلين الاغاني ليش؟:fa55:

....

والسالفه إلي تقهر اكثر الاذان في الايام العاديه ما ينسمع

لكن في رمضان عشان الفطور ماعرف شو يحطون في السماعه شو من جهاز ( يمكن مكينة طراد )

انه يوم يأذن حتى إلي راقد يقوم على صوت الاذان

ليش يعني بس رمضان وين باقي الايام :fa55:

الجنيه اشكر لج هاي الروح الطيبه

موضوع جداً برد خاطري

جزيل الشكر والامتنان

محاق

[خنفروش]

و عليكم السلام ورحمة الله وبركاته

اولا الحمدلله عالسلامه


ثانيا :- الصراحه في مواقف اتخلي الواحد يوقف امبهت .. من الشباب و البنات و المواطنين و غيرهم .. يعني حدث ولا حرج " إلا موت من الـ حرج - شو بتقول و كم بتيلس ترمس بيطيح فجك و انت ما خلصت ولا برد خاطرك " الله يسامج يالجنيه .. بالفعل جلبتي علينا المواجع .. لان في بعض الاماكن مب الاذان وحده يكون شيء غريب إلا كل شي يتعلق بالدين بالقيم بالعادات يكون مستهجن و متخلف و اغرب من الغريب .. انا ما كنت برد على موضوعج لان مضمونه مؤلم جدا .. بس حصلت الكلام يجبرني عالكتابه .. و السموحه من كل ينونج

[ايه احبك]

الحمدلله انا كل ما اسمع أغاني في مكان معين ويكون وقت الصلاة لا استحي ولاهم يحزنون
دايراكت سكروو الأغاني لنه حزت الأذان واذا طنشوني وهي كثير ما تصير عاد انا ما اسكت
صكر/ي يأذان
صـــــــــــكر/ي يأذان
بليزززززززززززززز صكروووو يأذان
عاد اطول السالفة لين ما الكل ينتبة انه هالناس ما يحشمون حد هني يستحون على ويهم ويصكرون
انا عمري ما بسكت عن شي يخص ديني لا في مواطن ولا أجانبي

بس هاا كله في صوب ولي اتسوي قناة دبي في صوب
وحليلها من انشغلها في برنامج الميدان ونجاحه وانشغالها في برامج الأغاني الى ما تنحط الا في وقت الأذن تكتب بخط صغير تحت الأغنية عشان ما تكسر خاطر حد

----حان الأن موعد أذان العشاء----
لا حيا ولا مستحى

شكرا على الموضوع

[العجيبة]

اسمحولي ..

بس منو قالكــم انه المواطنين كلهم أشراف مكــه ؟!

في مسألة الدين ما شي مواطن وأجنبي ، انتوا واثقين ومتأكدين ان كل المواطنين مسلمين ؟
ليش ما يكون فيهم المرتد والملحد أو المتدين بديانة ثانية مسيحية أو يهودية مثلا ؟

وليش مخلين في بالكم ان كل الأجانب مب مسلمين ؟
فيه منهم والله اسلامهم أحسن عن اسلامنــا بألف مــــــــررررررة !


وبعدين منو قالكم انه المواطنين يسبون اذا حد قالهم بندوا الاغاني ؟
صارت عندنــا أكثــر من مرة، أخوي يفتح الدريشة بس بإشارة يقولهم انه أذان وهذيلاك يشكــرون بعـد مب يسمعون الكلام وبس !
ترا الأخلاق ما زالت موجودة سواء في المواطنين أو غيرهم !

وبس ،

هي مب قضية، هالشي ممكن يصيـــر بغفلة أحيــانا، وأحيــانا يمكن يكون متعمد، وفي الحالتين ذكـروهم واخطفــوا عنهم ..

[الجنيه]

المحاق المشتعل

الله يخليك المكان الي مجابل المسيد دوم جذه والطامه انه في هالمكان بالذات مستحيل اتقول ما ينسمع الصوت ولا انه الواحد ما انتبه ع الاذان والله انه ينسمع وعمك اصمخ ع قولتهم ...

أما سالفة رمضان فأقولك تراها ايجابيه 100% أقل شي الي ما يصوم يتحمس لانه يحسب اقتراب موعد الفطور *_* ( عافانا الله )



خنفروش

الله يسلمك ويسلم غاليك ...
كم بنجلب في هالمواجع ؟؟ !! ماشي فايده ما اتحصل غير ويع القلب والراس ويزيد الحزن ع الحال الي وصلنا لها المشكله نحن بنرمس وبنقول وبنتحرطم لكن منو الي بيتعض؟ ؟ ومنو الي بيسمع ؟؟؟ لا حول ولا قوة الا بالله ..


ايه احبك

بارك الله فيج وجعله في ميزان حسناتج ان شاءالله ... الغاليه اذا علي تراني ان كنت في مكان يعني مثلا السوق ما اسكت عن راعي المحل ان كان مشغل اغاني والا شي حتى لو كنت بيت ناس لكن يوم انتي ع الشارع والسيايير اتخطف جدامج طياره كيف بتقولين لهم ؟؟ تربعين ورا السياره مثلا ؟؟ المصيبه انه يخطف عند المسيد وصوت الآذان يشق المسامع ولا في فايده ..


العجيبة
فديتج محد قال انه المواطنين اشراف مكه لا ابد محد قال و لا بيقول المواطن قبل كل شي انسان والانسان خطاء يعني مش معصوم من الخطأ بس لانه نحن كلنا تربينا في بيئه مسلمه عممنا هالشي ع الكل الا مجموعه ما تقدرين اتحددين هويتهم الدينيه لانهم لا يمتلكون وحده مسلمين بالاسم كلنا من انولدنا ا ول شي سوه لنا أذنوا في آذانا يعني مسلمين ولله الحمد ما نقدر انحدد درجه ايمان الشخص الا بالعشره ..

بالنسبه لموقف اخوج يزاه الله خير وكثر من امثاله بس انتي غلطانه يوم اتقولين الي بتنصحينه ما يسب ولا يرد انا لو مب شايفه بعيني بقول نفس كلامج بس صدقيني صار هالشي جدامي وعلى مرئ ومسمع مني حرمه كبيره اتقول للشاب مب زين عليك اذان يأذن خاف ربك وسكر هالمسجل وجابل ربك قال لها مب انتي الي بتدخليني الجنه والا النار !!!!! واتقولين ما يسون هالحركات ؟؟

مثل ما قلت قبل انا ما اقصد انه الي غافل والا نسى نحن بعد بشر من حرصننا على انه ما نقع في مثل هالخطأ صدقيني قبل الأذان بربع ساعه اقل شي اسكر المسجل انا ما اقول اني ما اسمع اغاني ولا اني ملتزمه وما اغلط بشي لا بس اقل شي مثل هالاشياء بأمكاني اسويها لاني ما ابي انحط في مثل هالموقف لكن الي قصدته هم الشباب الي يمرون ع مسيد الممزر اذا مريتي صوبه بتعرفين الي اقصده انه لو كان اصم يسمع الاذان لانه المسيد لاصق بالشارع الي يخطفون عنده ..