طاق طاق طاقيه

[بنت الدلع]

السلام عليكم والرحمه

شحااااالكم ؟

ان شاء الله طيبين

استريحو :k_devil2:


بلاكم زايغين ؟

ماتحبون تذكرون ايام الطفوله :sad:

جان ازعل :sad:
ليتها تعووود والله

كنا بريئين نسوي الي نباه مافي شي اسمه عيب ومنقود ولا حرام
نلعب في الحوي
في الفريج > حدي جدام الباب
يوم يبنون اسير اوقف عالرمله الي برع
اطالع السيايير والعب بالكنكري وارد :fa38:

يطولي بعماركم
من كمن يوم وانا اغني عمي ابو كبش
عد لين 11 ، واحد ثنين ثلاث اربع .......... الخ

هذي كانت كلمات لأغانينا الي كنا نرددها ونحن صغار

كلمات حلوه مفعمه بالحيويه والنشاط والبرائه
كلمات قد تكون مضحكه في بعض الاحيان

على سبيل المثال
طاق طاق طاقيه
رين رين يا جرس
والثلعلب فات فات
في ذيله سبع لفات
والدبه طاحت في البير
صاحبها صاحب خنزير ( احم انا ميخصني :fa52: )

شو سالفة هالاغنيه ؟
ومتى نغنيها ؟

نتيمع نحن الصغاريه
ونيلس على شكل دائري
ونشل قحفية (الي يلبسونها تحت الغتره) واحد من الاولاد او اي خلقه او اي شي ثاني بس غالبا اتكون قحفيه بيضه

ونختار واحد من الصغاريه عسب يدور على الحلقه الي مسوينها
يركض ويردد هذي الاغنيه ويكون ماسك بالقحفيه
ولازم يحطها ورا ظهر حد من الي يالس
طبعا في هذه الاثناء عيونا تكون مسكره
وبعد مايحط القحفيه يقول:

احدى منكم تحدثو تحدثو
يالله يام الشعر طويل
بصي وراكي اهو المنديل
وكل واحد / وحده يـ صد وراه عسب يشوف اذا المنديل وراه ولا
والشخص الي يحصلها وراه يقوم ويلحق الشخص الي حطاها
ولازم يزخه
اذا ما زخه
هو لازم ياخذ مكانه ويدور عالحلقه

==

باص باص بصينا
اليوم العيد تعشينا
تعشينا فاصوليا
واللحمه المشويه

ثنين من الصغاريه يمسكون ايد بعض
وكل واحد يكون مجابل الثاني
ونحن نمشي من بينهم " تحت اياديهم "

واول مايوصلون لكلمة اللحمه المشويه يزخون الشخص الي وصل عندهم
ويسئلونه انته شو تبا
الحصان الذهبي
ولا العروس الذهبيه
وبعد مايختار يسير عند فريقه
ويوقف وراه

يعني مثلا عبود هو الحصان الذهبي والولد اختار الحصان بيوقف وراه
ويت وحده واختارت الحصان بعد توقف ورا عبود
لين مايخصلون ويشوفون اي فريق صاحب اكبر عدد من الصغاريه وهم الي يفوزون

اذكر ايامي
دايما يوم يزخوني يعفصوني ماعرف ليش !

==

تك تك تك
من عند الباب ؟
انا الوالي
شو بدّك ؟
بدي بيضه
شو لونها ؟
لونها ........ يختار اللون الي يباه

طبعا قبل لا ايي الوالي
نحن نتيمع وكل واحد منا يختار اللون الي يباه
مثلا
ساروه مختاره اللون الاحمر
والوالي قال انا ابا لون احمر
تطلع سويره وتربع
وهو يربع وراها
لين مايزخها
بس هيه لازم ترد البيت قبل لا يزخها
بس اذا زخاها هيه بتدور مكانه
والوالي بياخذ مكانها

يوم كان ايي الدور علي وواحد منهم يربع وراي
غربلات بليسهم
كانو يمجعون شعري
عشان يزخوني بسرعه :7:

==

الحول

مكان الامان لنا كلنا
خاصه لي
من ما اوصل له على طول راسي يدق فيه
عسب اتأكد اني وصلت :9:

الحول = ايدار >> بيتنا

متى نستخدم الحول؟

في لعبة كوك لحق او البعض يسميها بكوك لاحق

سلّوم يوقف عند الحول
ويعد من 1 لين 10
وبعدين ينهد :a049:
قصدي يربع ورانا
ونحن لازم نشرد
واذا وصلنا الحول مايروم يزخنا

والشخص الي يزخه يسحبه ويخليه عنده :k_devil2:

==

ان شاء الله استمتعتو
من زمان مانزلت مواضيع فيها رمسه وايد
فإذا الافكار مش مرتبطه اعذروني

وان شاء الله لي عوده عشان اكمل باجي الالعاب الي كنت العبها

واكيد ما استغنا عن اضافاتكم
ومواقفكم الحلوه الي صارت في صغركم

كل الود
بنت الدلع
ويا مرحبا :fa41:

[قرموشة]

وعليكــم السـلااام والرررحمـه

ويا مـرحـبــا الساااع


.
.


ياربـي أسـميني وانـا أقرا مـوضـووعـج رديييت 10 سنيين وراااااااااااا :bye2:
صدق كـانت ألعـــاب جميــله وأغااني وترانيـم أجمـل نرددهـا ونحـن يهـال
كنـا بكـل براءتنـا ونتريــا يمعه الاهـل عـشان نلعــب ونسـتــانـس .. كنت ألعـب كـل الالعــاب اللي ذكرتيهــا فــوق:h_ttmasha:
.. وعـن سالفـه الرمـل والكنكري اللي يحطونه عـشان البنـاا ..اللي أذكـره انـي
كنــت أحـفـر في الرمــل وحد من بنات خالتي تحـفر يدامـي .. ليــن ما نـسوي نفق يـوصـل بينـا نحـن الاثنيين لوول


أيـــاااام حـلوة ليتهـا تعـود والله :inlove:


بنت الدلــع مـوضـووعـج فعلا امتعنــي :fa42:
تسـلم يمنــاج حبيبتـــي ونتريــا التكلمــه
=) ~

[هزاايم]

السلام عليج والرحمه

بنت الدلع
اسمييج حركااات
والله زمناات
عن أول لعبه:shutup:
وعن ثاني لعبه
ليش نحن نلعبها غير:a046: ليكون يقصوون علينا
احيد إللي يطيح عليه كلمه واللحمه المشويه
يظهر من اللعبه ونقعد زعلانيييييييييين:sad:
صدق الشر بعيينهم:k_devil2:
وعن اللعبة الألووواان
احيد شي ثااني كنا نقول
بس الكبر شيين ومااذكر:shutup:
وعن لااااااااااااااحق
احيد مثل صااااااااااااااااااايح
لووول اسمينا كنا نطيح ونركض بس عسب مايطيح الدور علينا

شي لعبة الذيب وشي خوصه البوصه"لعبه بنووتيه اكثر"
خوصه بوصه يالنبوصه

كلاج الدود من حندود

لي عجارب لين السود

مرينا على غريب

ياكلون الشباح والنباح

يتنايلونا من قطر إلى قطر

فيه الزعاع والمطر

فيها صبي غاوي عماري

يسند على ضو القمر

وييب لامه ناري

من حلتي لي حلة الكفاري

ياسند ويا سنيدوه

ويارطيبات الخشكاروه

لووول يوم اكون ملانه اغنييهااا"اذكر المرحومه حصه كانت تضحك علي يوم اقولها شو خشكااروه؟"ولين الحين لووول مااذكر شو معناها
بدور

لاهنتي عالموضوع الطفوووولي:m_9afgah:
:love: اياااااااااااااااااام

[ألم ترى]

بسم الله الرحمن الرحيم ..

كح كح واااااااااااااااااااااااا يد رديتيني ورى :woot: ! ..

والله احلى شيء ذكريات الطفوله يا سلام عليها من ذكريات ..

المهم ياختي انا سامع قبل بأن اغنية طاق طاق طاقيه مب زينه :fa52: ! ..

ها لا تعصبين علي والله اني سامع هالكلام من زمااااااان ..

انزييييييييين اكتبي ف الـ googil طاق طاق طاقيه وشوفي النتائج ! ..

والمعذره ياختي :fa38: ..

[هزاايم]

^^انا بعد جي قالوا لي
ان فيها يهود و سيده عائشه رضي الله عنها
مااتذكر القصه بالضبط
بس إللي اذكره كرهت اللعبه من بعدها

[حلم الطفوله]

السلام عليكم

تسلمين يا بنت الدلع على هالألعاب....

والله يجيرنا من مكر اليهود ودسائسهم

[بنت الدلع]

وعليكــم السـلااام والرررحمـه

ويا مـرحـبــا الساااع


.
.


ياربـي أسـميني وانـا أقرا مـوضـووعـج رديييت 10 سنيين وراااااااااااا :bye2:
صدق كـانت ألعـــاب جميــله وأغااني وترانيـم أجمـل نرددهـا ونحـن يهـال
كنـا بكـل براءتنـا ونتريــا يمعه الاهـل عـشان نلعــب ونسـتــانـس .. كنت ألعـب كـل الالعــاب اللي ذكرتيهــا فــوق:h_ttmasha:
.. وعـن سالفـه الرمـل والكنكري اللي يحطونه عـشان البنـاا ..اللي أذكـره انـي
كنــت أحـفـر في الرمــل وحد من بنات خالتي تحـفر يدامـي .. ليــن ما نـسوي نفق يـوصـل بينـا نحـن الاثنيين لوول


أيـــاااام حـلوة ليتهـا تعـود والله :inlove:


بنت الدلــع مـوضـووعـج فعلا امتعنــي :fa42:
تسـلم يمنــاج حبيبتـــي ونتريــا التكلمــه
=) ~



المرحب لاهان
خششمج } { :fa46: >> وينج ياعنود الريف

اياام جميله والله
كنا نتريا الويك اند ايي عشان كلنا نتيمع ونلعب
على ايام الكنكري كانت وايد مواقف حلوه وبريئه تستوي لي
اونه على بداياتي يوم كنت اتحجب
جدام ولد خالي اتحجب ولا شعره تطلع
بس يوم اسير برع عاااادي ولا جنه شي رياييل
لين ماكبرنا وعرفنا الصح من الغلط

تسلمين عالوجود يا حلوه
وان شاء الله بكمل الموضوع جريب


ويا مرحبا :k_devil2:

[عنود الريف]

درب درب درب درب
انااااا يييييييييييييييت خششششششششششمج .. هاي روحها اياااااام

والله احس مر عليناااا دهر من ايام العاب الفريييج ..
انا دووم العنزة المربوووطه .. كله انا يخلووني الضحية ..
وشي اغاني العاب نحن عندنا غير :Oo: عااد ما ادري منو الصح ومنو الغلط .. المهم كنا نستانس ونحن نلعبهن ...

ولا تنسين لعبة عنبر .. ام القواطي وتيبين كرة ..
عاااد خليني العب هاللعبه ويا اخوااااني ..
تطلع نذااااله الدنيا كلها .. ويفروووووووووني من الخااااطر .. عاد اندبغ على ويهي من الضربه ..
والصيااااح ببلااااش يا اختي .. خخخخخخخخخخخخخ
اما رمل البنا والكنكري .. يالله ما نصدق حد يبني حذالنا .. من الضحى ونحن على الرمل ونتفاااالع مرات بالكنكري.. يزقروونا نتغدى ونرد مرة ثانية برع .. منو يقوول ان الشمس تصلخ .. والله عااادي عندناااا

الغاليه تسلمين على الذكريااات الحلوة ..

=================================================

يثبت الموضوع ..

[مــهــابه]

عـليج الســلام والرحمـه اختيه

ذكرتـيني بـأيــااام زمــان

يوم نلــعب بالفريــج ، ونردد هـالأغـاني ببـراءة


وماعـليج بـعدنا للحين انرددهــا ، وفـ كل عـيد أضحى أيلس أغنيلـهم:

بـاجر عـيد وبنعـيد
وبنـذبح ابقـرة السيــد
السـيد ماعـنده بقــره
بـنذبح بنـته ( أقولـها بأسامي اليهااال ، يسـتانسوون:fa56: ) ع الشـيره


ماعـرف جان اتعـرفونها ولا يديده عـليكم:fa44:


استمتــعت جداً فالموضوع

[عهد الوداع]

بـاجر عـيد وبنعـيد
وبنـذبح ابقـرة السيــد
السـيد ماعـنده بقــره

مهوبه هاي يديه علي ...

الموضوع ما عليه كلام بنت الدلع ,,,


تك تك تك
من عند الباب ؟
انا الوالي
شو بدّك ؟
بدي بيضه
شو لونها ؟


من فتره كنت العبها حق اليهال ههههههههههههههه ,,,

تسلمين فديتج ,,وياليت الطفوله تعود يوماااا ....

[العجيبة]

ههههه ذكـــريـــاااات

بس انا كنــت طفله غبيــة ما أعرف أغني، أتيمع ويا اليهـال عـادي، بس هم يغنـون وانا استمتع باصواتهم الشجية !


فــيه لعبة كنــا نلعبـها وايـد، اللي هي الحفــر ، وتقـريبا أحلى لعبة لعبنـاها ..
نحفـر حفــرة لكـل واحد فينا وكلهـن حذال بعض، وعقب نبتعد مسافة متر عن الحفـر وواحد يفـر كورة صغيرة عالحفــر، اذا طاحـت الكورة في حفـرتي مثلا، لازم اللي وياي يشردووون بعييييد، وأنا اسييير صوب الحفـرة وازخ الكورة وأقووول StoooooooooooooooP
لازم يتجمدون أماكنهم، وعقب اختار واحد واضربه بالكورة ، اذا الكورة لمســتـه تنحــط له حصاه ( على اساس انها بيضه ) في حفرته ، اذا ما صـوبت عليه عـدل، تنحط البيضة في حفـرتي !!
أول ما نوقف اللعـب ، اللي عنده أكبر عدد من البيض يكون هو الخســران .. واعتقد كنـا نضربه ..

أصلا أغــلب ألعابنـا لازم يدخـل فيهـا ضرب، ولازم واحــد منـا يمـد بوزه في آخــر اللعبــة خخخخخخ

لووول كـــان شي عجـيب ..


تشــــــكرااااااااات بنـت الدلع عالموضوع العجيييـــب ..

[بنت الدلع]

يجتمع الصغار خلف الأم
ليختفوا من انظار الذيب

وخلال هذه الاوقات يردد الذيب:
انا الذيب باكلكم

وترد عليه الام:
وانا الام بحميكم

الذيب:
عيني على ذيج الورا ذيج الورا

الام:
وخر ورى وخر ورى

وينتهي المطاف بأخذ اخر طفل

وتقول الام:
هالصوووب

الذيب:
لا

هالصوووب ، لا



كانت لعبه جميله نقف خلف الام
وفي الاخير يأتي الذيب يعدو خلفنا حتى يقبض علينا ويجعلنا في اسره


==


قحّيف
او البعض يقولون حوّيم >> غالبا هل دبي جيه ينطقونها

من احلى واسهل الالعاب الي عندي

نرسم مربعات بالطبشوره على الصبّا >> ايام قبل ماشي كاشي ولا انترلوك :k_harhar1:

نبدأ بمربع رقم 1 وننتهي بـ 8

http://oasis.bindubai.com/bin/uploaded/2211_01176384965.jpg (http://oasis.bindubai.com/bin)

نشل حصى في ايدنا
ونفرها
لازم نمشي خطوه خطوه
وننقز بس بشرط على ريل وحده
واذا طاحت الحصى برع المربع الشخص يخسر
واذا طاح وما اتوازن بعد يخسر

==

بعض الاغاني الي كنا نرردها ونحن نلعب :

يا بنية ما دريتي ... عن خطار لفوج
قالت لفوني غبشة .. على خيول وبوش
مصلين الجمعه ..صقر ولد الشيوخ
يالس على الدجيجه .. يالس ويعد فلوس
يا الطاسه يا المخبوقه .. ما ضمتها الفلوس


يامي يامي ياماية ...راعي البحر ما ابااه
ابا وليد عمي من خنيره ورداه...ما هد خطام الصفرا ولا ضيع عصاه


ياعائشه ...يا فاطمه ...ما تأكلي حبة ذره ...ما تشربي ماء الهنا ...عندك عريس ولا عروس



بعض الالعاب كانت الدخيله على تراثنا
وهي اصلا مش من التراث
ولكن كنا نلعبها في صغرنا
مثل


دور دور ديسي
ديسي ديسي دور
في سامرلا
أفاي ماي دور

اكيد مافهمتو الكلمات
بس كانت لعبه جميله وكلها نشااط

و

كهربه :a049:

حركه بركه ستوب

ولازم ما نتحرك اذا تحركنا نخسر
انتم جامدين لين ما يرأف بحالنا ويقول كهربه :fa54:

كانت مواقف طريفه تستوي في هذي اللعبه
ولد خالي ايي صوبي يسوي اي شي عشان اظحك واتحرك واطلع برع
بس منو يقووول
مايهزك ريح :k_harhar1:

==

لي عوده باذن الله عشان نكمل بعض الالعاب
منها الصقله
وغميض
ير الحبل ... الخ


اشكركم على تواجدكم و مشاركاتكم :fa41:

[الاسطوري]

السلام عليكم ..

"بنت الدلع"

بصراحه إستمتعت وايد وأنا أقرا الموضوع وأتذكر الألعاب اللي مالها أي وجود عند
الجيـل اللي بعدنـا وفي ألعاب ثانيـه بعدج ماذكرتيهـم ونحن
بإنتظار التكمله وترانا متابعين
وشكــرا
:yes:

الاســـطـــوري
أخوكم

[عنود الريف]

خشششششششمج يا بنت الدلع .. مرتين .. زياده الخير خيرين ..

المهم كنت ابا اذكركم بلعبه كنا نلعبها ..
اللي هي وقعت الحرب فــــــــــــــــــــــــ ـــــــــــــــــــــــــ ــــــي؟؟؟؟؟؟

كنا نرسم دويرة بالصخااام على الصبة ... وكل واحد فينا يختااااار دولة ... ويوقف في دويرته ..
موزووه : الامارات
سعوود : عمان
حمود: الهند
مريوم: الكويت
سلوم: السعودية

مثلا موزووه اتقول وقعت الحرب في الهند
كلهم يتراكضون ويطلعون من دويرتهم ويدورون مكان يلجاوون له ... ما عدا الهند
واللي ما يحصل مكان
انسير انحط له حرف ح وجيه لين ما تكتمل الكلمة عند وااحد فيهم ويستوي يا حمار او حمااارة :k_harhar1:
واسميها مرات تستوي ضرااابة اذا وحده من البنات استوت حمار
البنت اتقول لا لازم تستوي حمااارة ... والولد يقوول لا خلاص انتي حمااار
دوووم نتضارب على هالسااالفه..

يالله نتريا العاب يديده .. الصراااحة الموضوع وااايد عيبني ومتحمسة فيه بعد
سوري بنت الدلع اذا واايد اتدخلت ..

[العجيبة]

عنــووود الــريـــف

هاللعبــة كنــا نلعبـها ونحن صغــار بعـد
لوووول أول شي كنا نختار اسماء دول ، ودول قووية بعــد مب الهند وهالصوب ..
البعض يختار اجنبيه والبعض يختار عربية ، والضرابة تبــدأ بأصول > مدخلين السياسة حتى في العابنا
بس عقب ونظــرا لأن أصواتنا عالية ونحن نقول ( وقعععععععععت الحرررررررررررررربوووووو بيننــــــا وبييييييييييييييين ....)
الأهـل منعـونا نكتـب اسماء بلدان، وصرنا نلعبهـا بأسماءنا خخخ

لعبة حلوووة والله ..

[بنت الدلع]

ماااي فرند

ولايهينج ان شاء الله

مثل ماذكرتي خوصه بوصه لعبه بنوتيه
نقعد شرات حلقه وكل وحده تمد اياديها وانتم نحسب

ولكن يوم فيه تجمع شباب مانروم نلعبها
لانهم مايميلون لها كثرنا

وعلى طاري اللحمه المشويه
كل شسمه ولهم طريقتهم في اللعب >> ماعرفت شو اقول كل عيله ولا كل يهال المهم وصلت المعلومه :love:
نحن بعد ماتخلص اللعبه نحولها شد حبل
لان يكون فيه فريقين ويتم التحدي
والبقاء للأقوى

مشكووره عاليـيّه فديتج :fa41:
نزورج في عرسج قولي آمين :fa54:

==

الم ترى

صحه صحه تبا ماء ؟


عشان ليش ولا حق ليش (اختارو اللي يعيبكم) الطفوله ماترجع
والله الطفووله احلى شي
بس الحمدالله على كل حال
كل واحد ويعيش عمره

الصراحه اول مره اعرف شو معناة هذي الاغنيه :boxed:
سويت سيرج وماتوقعت ان جيه معناتها
بس استغفر الله ماعرف شو اقول
نحن نغنيها كمجرد اغنيه طفوليه شرات غيرها من الاغاني ومافكرنا في يوم نبحث عن معناها
ولكن مب شرط يكون هالقصد من هالاغنيه
العلم عند الله

وتسلم عالتنبيه

ماتبا كرك ؟

==

سوزي :a010:

حبيتج والله :fa41:

الله يسلمج ويسلم غاليج ومغليج

آمين يارب، اليهود يطلعون في كل مكان ومسوين لهم بصمه في كل شي

==

طووط طوووط
بــــــيب بـــــيب

يالله بسرعه افرشو السياده الحمرا
وهنه حطو وروود حمرا ، يا سلاام
جيه اوكي
بسسسرعه وين البخوور يالله هااتو

احم

ياااا حييييها عنووود الرييييف
خشششمج يا امـــيه
انتي ويييينج مختفيه
نورتي الموضوع والله

الدرب سالك حياج :6:

مشكووره عالتثبيت, لي الفخر :k_smartass:

بس ممكن تذكريني في لعبة عنبر
لاني بصراحه ما اذكرها
يمكن ماكنت العبها بعد
لان الاسم يديد عليا

ههههههه يحليلج عيل كنتي العنزه المربوطه :b015:
على ايامي كانو يستخدموني في المهمات الصعبه
عااد والمهمات والله
اخوي يعطيني كوب ماي
ويقولي حطيه فوق الباب

يعني : الباب اخليه ملايم والكوب فوق
ويوم اخوي الثاني يحدر الحجره
تشششششششش
ينصب الماي عليه :a049:

خخخخ عاد تبدا الشرده
انا ميخصني اخوك الي خبرني :k_harhar1:

==

اسمحولي عالتأخير
والصراحه يـيّـتكم تسعدني وااايد :thumbup1:


سياره حمرا تمشي في صحرا وراها ناطور الحق يا دكتور

ويا مرحبا :k_smile2:

[خيال الحب]

:fa56: له له له يا بنت الدلع:fa56:


رجعتيني مليون سنه ورى:k_harhar1:



ايااااااااام والله .. يوم كنت العب ويا بنات الفريج:a032: .. لازم كل يوم اكفخ لي وحده لووول:k_busted_cop:

ايام حلووه والله وخاصه في رمضااااان .. كنا نترياا رمضان عسب نلعب هالالعاب..

[خيال الحب]

اخوي يعطيني كوب ماي
ويقولي حطيه فوق الباب

يعني : الباب اخليه ملايم والكوب فوق
ويوم اخوي الثاني يحدر الحجره
تشششششششش
ينصب الماي عليه :a049:

خخخخ عاد تبدا الشرده
انا ميخصني اخوك الي خبرني :k_harhar1:

ههههههههههههههههههههههههه هههههههههههههه


يعني مب انا الوحيد الي كنت اسوي هالحركه الوصخه:hysterical: :hysterical:


ههههههههههههه لين ما حصلت ضرب بالخيزرانه من الوالد الله يطول عمره ومن عقبها قلت التوووووبه خخخخخخخ

والله ما تم حد ما سويتله هالحركه

بشاكيرنا+عيال عمي+اخواني

ويوم حصلت الضرب كان كوب الماي طايح على ابوي:d010: ماكنت اقصد خخخخخخخخخخ:shutup:

[الدلووووعة]

والله انها ايام

بس تعرفين انا لين العام كنت العبها
بس السنه مالعبها والسبه الجامعة العبيطه^_^


بس صدق ألعاب كشخة احسن عن الحينه ماعدهم إلا سوني وسياير وطياير وها الخرابيط مالهم
ولا باربي والحينه فله مالت عليهم خخخ

انزين هاي الحويم نحن نسمها لعبت ام قوين ليش ماعرف خخخخخخخ

ولعبت شرطي حرامي خخخخخخ

هاي اللعبه كششخة

عاد حلاتها فالليل خخخخخ

في نص الفريج بعد خخخخخخ

طبعا هاي اللعبه

في شرطة وفي حراميه

والشرطه دور عالحراميه وتزخهم

طبعا عادي كنا ندخل بيوت يرنا ونندس فمزرعتم ورا سيايرهم اي مكان

انا والطبجة خخخخ( نحن الثنتين دوم يهزبونا^_^)

نقع خيانه فيهم يوم أي علينا الدور انه نحن الحراميه نسير بيتنا ولا بيتهم ونيلس نلعب بروحنا
وهم يدورون علينا وبعديييييين نردلهم خخخخخ

عاد اغلبهم شباب يهزبونا ويظربونا خخخخخخخ

ولعبت الغميظة خخخ

هاي انا ماحب اكون فيها انا اللي يغمضون عيني

لنه دوم يظربون خخخخخخخ بس يوم اي دورهم انا ماقصر فيهم اظرب واشرد اللي مسكرين عينه مايعرف
امنو اللي يظربه لين مايممسك واحد وبعدها يقول امنو ها اللي مسكه بعدين يفرجون عنه واللي مسكه يكون الدور عليه ^^

بس مالت الماي هاي حركة انا ماحب اسويها ابد

اذا انتو ماي لا نحن شو ماي عادي عصير
اي شي اي فالبال خخخخخخخ

وكنا دوم نحطها في حجرت الاولاد خخخخخ

بس اذا طاحت على اخويه الكبير تعالي
شوفي عاد احيد كان يب الغتره وماعرف كيف يسويها

المهم انه يحركها اذاجاستج تعور يعني تقريبا يظربنا فيهاخخخخخخ


وتعرفين هاي مال 11 انا مرات اايلس اقولها فالامتحان اذا ماعرفت اي جواب وكان فيه اكثر عن خيار اقولها واللي يظهر اخر واحد احط ها الجواب خخخخخخخخ


وبس اذا تذكرت لعبه ثانيه بي وبحطها خخ

وتسلمين عالموضوع الكشخة

[عفاريتووو]

السلام عليكم











بعض الالعاب لين الحين العبها مع اخوي و عيال اعمامي الصغاريه


كل جمعة نلعب شي


هــ الاسبوع لعبنا باص باص باصينا


نرد لايام الطفوولة شوي :fa41:
بس الفضيحة يوم هم يفووزوون علي لوول








موضوعج واييد حلوو رديتنا لاياام واييد حلوة :fa41:

[بنت الدلع]

مهابه

نحن نغنيها بس غير
نقول
باجر العيد بنذبح بقره
بنخلي " اسم الفلان " مادري شو التكلمه :k_harhar1:

لول نسيت والله :blush:

لين الحين اغنيها
قبل كل عيد
وبعد ماعرف التكلمه بس اييب اي شي عاللحن :biggrin:
اشكرج عالمرور :k_busted_cop:

--

عهد الوداع
اهلين عزيزتي
احس هالالعاب ماتنفع نلعبها ويا الصغريه في وقتنا الحالي
هم مب شراتنا
قبل نحب نراكض
وشرطه حرامي وهالسوالف
الحين اغلبيتهم يتيمعون ويا عيال عمهم ويسيرون في الفريج ويدورون لهم اي شي يلتهون به
ولازم واحد منهم راد وهو يارح عمره ولا مزاعلين

--

العجيبه

طفله غبيه O.o
يا حليلج
انا كنت استمتع يوم اغني

ماحيد اللعبه الي رمستي عنها
بس اي شي كنا نلعبه كان حلو ويسلينا
لول
واهم شي الضرايب في النهايه

احيد لعبة black shoe
ههههههه اسمينا نتظارب
وانته اصلا بالعمد دست ريولي قوي
والخ الخ الخ


العفو عزيزتي
سعدت بتواجدج :inlove:

--

الاسطوري
الموضوع يحلى بوجودكم واضافاتكم
صدقك العاب الحين غير عن قبل
قبل حتى ولو ماكانت عندنا وااايد اشيا نلعب بها
بس نبتكر اي شي
وحلاتها ويا اليمعه
نودر كل شي ونتوجه للعب

في العاب كثيره ناستنها
والعاب كثيره مالعبتها
لان تقريبا كنت اصغر وحده من الصغاريه :k_blush-anim-cl:
فاللي سبقوني لحقو على هذي الالعاب

بكون سعيده جدا باضفتك وقراءة مواقفك الطفوليه ^_^

--

عنود الريف
ههههههه
خشششمج يالغلا
اقربي

افا عليج شو سوري بعد
الموضوع موضوعكم حبيبتي
وحياج في اي وقت
والموضوع بدون وجودكم ماله طعم :a074:

هيـــــــــــه ذكرتيني بوقعت الحرب
ههههههه
اسمي الركض لاعب دور في هاللعبه
اغلبية العابنا كانت عالركض
انته سريع مابتخسر
دز الي عدالك والي وراك وفل عنه :4:

[بنت الدلع]

غميضه

اهئ اهئ
ماحبها

يسكرون عيوني بقماش ويخلوني ادورهم
واتي وحده تظربني ولازم ازخها واقول منو هاي الدبه الي ظربتني :k_harhar1:

الغميضه لعبه حلوه واحسها اوكي حق الاخساس
اييبون هاكي الشي ماعرف شو اسمه
المهم يغطون فيه العين
ولازم يكون لونه اسود والشخص مايشوف الي جدامه
ويبدا يمشي
ويدعم هنه ويدعم هناك
والصغاريه اييون ويلعوزونه ويظربونه وهو مسكين :a0360:
لازم يمسكهم
واذا مسك واحد منهم لازم يقول اسمه
واذا غلط بيتم على هذا الحال لين مايقول صح ويتغير الدور

[المنصوري]

خاطــري بـ ( خبيـــص ) :k_nono:

احـيــد شي موضوع في الواحة التراثيــة اشويـه طشووونه قديــم بعنــوان ( العاب بنات الواحات التراثيــة ) :a034:

لي عودة

[عنود الريف]

غميضة ما كنت احبها وااايد .. لان كذا مرة داعمة كبت والا طاولة والا يدار يوم نلعبها في الحجرة

المنصووووري ..
هيه صح موضوع العاب بنات الواحة التراثية .. كان موضوع مميز والله ...

[عنود الريف]

ينزل الموضوع من التثبيت كون الموضوع أخذ كفايته