المساعد الشخصي الرقمي

مشاهدة النسخة كاملة : عندي كلام .. وخاطري أقوله !


المزوحي
06-04-07 ||, 10:30 AM
السلام عليكم

صح واحة الفضفضة الواحد منا يفضفض ... لكن يوم الواحد يحس بإنه المشاكل من كل صوب

ويوقف مايقدر يحلها والضغوطات ...

خاصة يوم تبغي شخص ينصلح حاله .. وتستغرب هذاك الشخص اللي تشوف أخلاقه طيبه

ويتغير ...

إذا عندك أخت ( شقيقتك ) مربينها أحسن تربية وعارفينها هي كيف وأخلاق ..

إلا طاف بها العمر ووصلت 35 سنة ... صرخت قالت زوجوني .. تقول انته عييييييييييييب

عييييييييييب .. هيه مب من حقها تتزوج وتكون أم ؟؟؟ سؤال يحتاج لإجابة ..

ويا كثر الاسئلة ...

أحيانا الوحده توصل سنة كبير وقمة النضوج .. لكن تتصرف تصرف غلط * غلط

يعني ممكن تقول يوزوني ولو واااااااااااافد .. وتبتدي تقنعك إنه هم عرب ومسلمين مثلنا

وغيره من هالكلام .... وتبتدي المعراضات من كل صوووب ..

لكن يوم نوصل عن الشاب .. نقول حلال يسووووووووووووووي كل شي قبل الزواج

ويوم بيتزوج خلوه يلتزم ... حتى لو حلتوا روحكم .. انا مابغي أكون جيه .. كم أمسك نفسي

عن مغريات الحياة .... ومثل ماسمعت دوووووووووووم نقول الحرمة تتعب في كل شي منها الحمل

والولادة والتربية ... بي المعلومة اليديدة اللي عرفتها ... إنه الشاب يكون تعبااااان أكثر وعليه

ضغوطات أكبر من الشابة .!!!

إذا تكلمت عن المهور .. وياما طرحتوا مواضيع عن غلاء المهور والزواج من اجنبيات ..

وتقرووون وااااااااااااااااايد في المجلات وفي النت وتسمعون في الإذاعة وتشوفون في التيلفزيون

ما بااااي أنا أزيدكم بموضوع واحد مثل هذا ...

لكن وصلنا لقضية .. أو بالأصح ... شي موجود عندنا في أسرتنا ...

أخويه ( شقيقي ) يصغرني سنا ... يبغي يتزوج ... وبحكم إنه ماعندنا مكان في البيت ..

ووعدناه إن كل فرد منا يساعده بمبلغ طبعاااااااااااا بدون مايرد هالمبلغ علينا ... يعني هدية له ..

بس قلنا له اصبر سنتين ... بعد ما ننتقل البيت اليديد .. واللي تبغي تتزوجها سواء من الأهل

أو برع مب مشكلة ...

دايما يفتح الموضوع .. إنه واحد من ربعه يقول : الوافدة أدفع لها 10 آلاف درهم وخلاص تكون

معرس اليوم الثاني ...

بس هاااي هي الحياة 10 آلاف وأصبحت معرس وزوج وبعدين أب ... وعقب ماحققت رغبتك ..

يمكن تستوعب حقيقة هالشي ...

انا ما أسب أو احط عليهم .. ولكن بعيد عن المشاكل اللي تنشأ عقب سنوات من الزواج ..

خلنا نكون بعيد .. وعلى كثر النصايح اللي نصحته .. يقول من مكانه ويطلع ... والكل كلمه ..

من سنة وهو متعرف على وحده من الجنسية العربية دون تحديد ... قلنا يمكن كأي شاب يبغي

يتكلم وبس ...

شفته في إحدى مراكز التسوق ماسك صلب ( الجقارة ) وانصدم يوم شافني .. لأنه هو مايدخن أصلا

وعمرنا ماشفناه .. انا سكتت ... لكن هو تم متوتر .. هيه هالشي عادي حتى ولد 14 بيدخن ..

لكن العلاقة تطورت بحيث انا شفته بعيوني .. في إحدى مراكز التسوق وانصدم ... مع الفتاة

اللي يكلمها ويبغي يتزوجها ...

الكلام اللي تقرونه الحين .. مب فضيحة أو سر اتكلم به برع البيت ... لا ..

ولا حد من ربعي أو أهلنا عارف الموضوع .. وهاذي أول مره أفتح الموضوع في الواحات

لعل نلقى حل ...

طبعا ماشي غير الدعاء أولا وأخيرا ..

فتح الموضوع للمره العشرين وبصريح العبارة ... بتزوج فلانه وبأسرع وقت ...

ومصر على هالشي ... طبعا الوالدة زعلت وااااااااااااااايد ... قال هاذي حياتي ...

وانا أحبها وأحس بإنه أطباعنا متشابهه .. لكن أنا أحس بإنه هالشي فترة ...

الواحد وايد أشياء في الحياة يبغيها لكن مب شرط يمتكلها ...

لأنه لحظتها يحس بإنه يحبها .. فهي الحياة ... انا فهمته هالشي .. قال انتوا تبتدون عيوب

في الناس ... مع إني ييته بأسلوب طيب .. لكن هو مب راضي يقتنع ...

ويدخل الحجرة ... وصلنا لقرار إنه حياته وحر بحياته .. وليش الواحد شل هم غيره ...

بيتزوج وخلاااااااااص وهو اللي يختار ... ليش نحن نتم نفكر وااااااااااااااااااااايد ونبغي نمنعه

بأي طريقه ... لكن كنت اقنعه إنه مابتستوعب إلا عقب مده من الزواج ...

لكن الحين أبغي اقنعه بس عسب الوالدة تكون راضيه ... ما أحب حد يزعلها ...

ومن غير هذا بدأ يسهر برع والظنون تاخذني وتوديني ... لأنه سمعت إنه في شاب اتزوج بالسر

وبعد سنة اعترف لأبوه إنه حرمته ربت بولد .....

والبارحة على أساس إنه الويك إيند يرجع الساعه 2 بالكثير 3 برع البيت

إلا إنه اليوم مارد واتصلت به الحين ..قال انا عندي ربيعي ...

ربيعي ؟؟؟؟؟؟؟؟ أقول في خاطري انته مب ساير رحله ... ولا معسكر وإلا مسافر ...

بس سكرت عنه ...

ومرات الواحد يقول برضخ للأمر بس عسب مايغلط ونكون نحن السبب ...


طولت عليكم .............. اسمحو لي ...............



في نظركم شو الحل ؟؟
دهن العود
06-04-07 ||, 11:49 AM
::

مرحبـا المزوحـي..

اولا اشكـركـ ع صـراحتكـ وع جرأتكـ انكـ حطيـت

موضـوع مثـل هـذا.. وهذا مايعني انـكـ تقـول سر من الاسـرار

الانسـان يامـا يحـس انه محتـاج لأحـد ينصـحه او ايودهـ من ايدهـ

ويدلـه الطريـج الصـح .. بغـظ النـظر عن العمـر.. ياما ناس اعمارهم صغيـرهـ ويستفيدون

منهم الاعمـار الكبيـرهـ..

خلنـي ابـدأ بالحـل..

رايـي انـا يالمـزوحـي.. وعن تجربه صـدقني

نحـن وايـد عشنـا الحـال اللـي تعيشـونه احيـنه..

وصـدقني هالحــال ماقـادنـا إلا للـندم والحسـرهـ..

نفـس الموضوع اللي مستوي عنـدكم استوى عـندنا ووصـلت المواصيـل لـي

انه الريـال كـانت تستـويبه اشيـاء عـودهـ ..يمـرض علينـا وحطيناه فـ المستشفى وكان

ينطـق بأسمها يقـول انـا ابـاهـا.. ولو ماخذتهـا حرام علـي آخذ غيـرهـا.. وهي طبعـا من جنسيـة

عربية ومـول ماينـاسبونا طبعـا هنيـه الوالد رافـض والوالدهـ تصيـح وتقول دخيلكم ماتحمل اشوف

ولـدي جيـه.!! والمشكـلهـ انه سمعـة البنيـه ... يعنـي نـدور شـي طيـب فيها مانلقـى.!!

ويـامـا شـفناهـ وياهـا .. ويـاما يلسنا ويـاهـ ونصحنـاهـ .. بس مـاشي فايـدهـ.. اللـي فـ راسه بيستويهـ..

وكـان يـرد البيـت بأوقـات متأخرهـ.. وطبعا هنيه الشيطـان يلعـب . وكـل ماقلنـا له شـي قـال

هـذي حيـاتي وانـا حر فيـها.. انا اللـي بتزوج وانـا اللـي بتحمـل..

فـ هالحـال..سرنا وخـذنا البنيـه.. ومـن بـعد الزواج بكمـن شهـر.. بـدا الحـال يسوأ اكثر واكثـر..

ولـي يومكـ هذا مشـااكل ×مشـاكل .. صـار ينـدم على كـل كلمـه قـالها قبـل.. هو بروحه يقول

انا كيـف كنــ وكيـف استـويت.!!

فـ ارجـوا منكـ يالمـزوحي عـدم الاستـسلام خلكـ دوم ويـاهـ.. دوم انصـحه دوم قلـه

تـرى الوالـدهـ مب موافقـه واللـي تسويـه مـب زيـن.. وياما سمعنـا قصص جيـه انتهت

حياتهم بالدمـار ..

بأي طريقـة يالمزوحـي بس خطـوه بـ خطـوهـ.. حاول تنسيـه هالشـي..

صـدقني يالمزوحـي انا اتكــلم عـن تجربـة مستويـه.. هالزواج وهالعلاقات ماوراهـا

إلا النــدم والحســرهـ..


اعـرف انـي وايـد طولــت.. بس اتمنتـى هالكـلام الكــل يستفيـد منه

مب بس المزوحــي..



والسموحهـ



:::
المزوحي
06-04-07 ||, 11:59 AM
شكرا دهن العود

وتراني أدري إنه بيندم .. من جيه أقوله الحين انته مب حاس وخلاف بتندم

لانه هالشي استوى قبل .. في اخويه الكبير ... بس الوافدة اللي ماخذنها عندها

جواز الدولة ... ومن بعد ما كان يركب أفخم المواتر .. حاله تبدل ... وللحين مب مترقع

ودومهم مشاكل .. ويوم نقوله شوووف اخونا .. يقول أنا غييييييييير .. تعاملي بيكون غير وشخصيتي

أنا غيييييييير .. تدرين دوم أقول الواحد ماينقرص إلا يوم هو يمر بالتجربة نفسها ...

اسأل الله أن يهديه ويغير رايه عنها بحق يوم الجمعة .. يااااااااااارب ...

مشكورة على الرد ..
دهن العود
06-04-07 ||, 12:03 PM
::

آمين يـارب

بس مثل ماقلت لك يالمزوحـي لا تيأس ترى لو انتوا

ماقلتوا له ولو ماحذرتوه منو بيحذرهـ.؟

ماله غيركم صح ولا


العفـو عزيزي



:::
المزوحي
06-04-07 ||, 12:06 PM
هيه .. من متى نحن نكلمه .. مايحب يسمع حد .. مع إنه مانتهجم عليه .. نكلمه بأسلوب طيب

بس يقول : خلاص هذا قراري أنا ..........
وحي القلم
06-04-07 ||, 02:58 PM
انتو شقايل علاقتكم به ؟

قصدي.. علاقته بامه و اخوانه قويه ولا لا ..؟

لانه شي واحد سالفته شرات اخوك

و خذ اللى يباها مع انها هي اللى دازه عمرها و خلته يتعلق بها.. "مب سهله" :fa55:

بس عقب ما خذها بفتره حاولوا اهله أنهم يكسبونه فتقربوا منه أكثر

و هو لانه ما ارتاح وياها أصلا و فنفس الوقت حس بانه اهله وياه فرد و طلقها

يعني .. ماظني أنه كان بياخذها إذا كانت من البدايه علاقته باهله قوية

.
.

حاولوا أنكم تكسبونه قبل ما ترمسونه عنها.. يمكن يقتنع بكلامكم
المزوحي
06-04-07 ||, 03:01 PM
وحي القلم

نحن مانعرف البنت موووووووووووووووووووول ... مانعرف أي معلومة عنها

انا ماعرف هي موظفة -- طالبة -- عمرها -- وين ساكنه بالضبط ..

ىخر شي عرفته إنه هلها قالوا لأخويه ... متى بتي تخطب ..

شكلهم يبووونه قبل لا يطير من بين إيديهم ... يعني شكلهم طمع ..
وحي القلم
06-04-07 ||, 03:17 PM
آخر شي عرفته إنه هلها قالوا لأخويه ... متى بتي تخطب ..

شكلهم يبووونه قبل لا يطير من بين إيديهم ... يعني شكلهم طمع ..

وايدين منهم جيه.. يعني هو ما يكون حاط فباله هالشي

بس هم اللى يدزون بناتهم

جنه بناتهم طايحات فجبودهم .. عفان الله :fa55:

.
.

بس بعد انتو حاولوا وياه.. قصدي حاولوا انكم تفهمونه أكثر

يمكن يكون متظايج من شي معين .. و خلاه يعاندكم

ولا يحس انه في شي ناقصنه
وحي القلم
06-04-07 ||, 03:19 PM
خل امه تدعيله بعد .. دعا الأم مستجاب
المزوحي
06-04-07 ||, 03:29 PM
تدعي والله ...
هزاايم
07-04-07 ||, 12:22 AM
:fa54: الله يعينك ويصبرك

مااعرف شو ارد عليك,,لأن صدق الموضوع يبيله حد عاارف الدنيا وسوالفها
وانا يادوووب إلا تحت 20 ومن وين لنا الخبره
بس والله اني صدق اقولك
الله يعينك ويصبرك ويرضى عليك ربي
المزوحي
07-04-07 ||, 12:26 AM
مشكورة هزاايم .. ومب شرط العمر .. ممكن عندج خلفية او كلمة تنفعنا ...
هزاايم
07-04-07 ||, 12:52 AM
اممممممممم
مااروم ايود لسااني:fa55: للأسف
دامك تطري لنا قصه من وااقعك
اندووك قصه من واقعنا
ربيعة الطفوله "حفيده خالي"
يوزووها وهي 17 سنه
والكل فرح لها يوم عرسها
والكل مستانس من اهل المعرس واهل العروووس
هذا البجر وهذي بعد البجر
فالحضووور ماشاء الله لايحصى

يمر عليك اسبووع ونسمع ان السالفه بتتفركش
:shocked:
ليش شو استوى
الولد ماكان يبغاها ولا البنت عافته وحست بالمسؤوليه
ظهر لاهذا ولاذااك
الولد خذ البنت لأن امه تريده ينااسب ناااس من اهل البلاد ولا بنت المغاااربه:a116:
البنت وافقت عليه عسب مايصير بين ام المعرس و اهلها اي خلاف"لأنهم ربع وعلاقتهم جدا قويه ببعض"
وآخر سبب لأنهم يهاااااااااااااال

ف إذ امك مش رااضيه,,,لازم تعرف ان مهما ربت وتعبت عيال هالزمن تغرهم الدنيا بالسهووله,, و الولد يقدر يسوي اي شي يباااه,,دام بنت العرب سااحرتنه,,واذ هو صدق يهمه راي امكم
اكيد راااح يلعب بذيله"مش اكيد لكن بوطبيع ماايووز عن طبعه:shutup: "

مدري إذ السالفة تخصه بساالفتك
لكن الشي إللي يربطهم ان اخووك مصر على البنت ومايريد غيرها,,وذاك سمع كلام امه ولعوز بنت النااااس
اسمييييييييينييييييييي كرهته,,حرااام عليهم دمر حياتها :a046: يعني بناات الناااس لعبه
الولد تنسى سوالفه,,لكن البنت:fa54:
الله يصبركم يااارب
هزاايم
07-04-07 ||, 12:54 AM
آسفه إذ بكلامي
اي نوع من التحبيط
لكن هذا هو الوااااااااااااقع
المزوحي
07-04-07 ||, 08:47 AM
هزاايم ..

نحن يوم طرينا سالفة السوا .. أكثر احتشر علينا ... وأنا أعرفه هو مب من النوع اللعاب ..

وفوق هذا كله بيتوتي .. مب من النوع اللي يحب يظهر واااااااااااايد ... هذا اللي استغربت منه ..

قال انتوا كله تحطون في بالكم الشغلات السلبيه عن الناس .. قلنا له نحن فاهمين الحياة

ونعرف شو اللي يدور بها ... عندنا خبرة ..
الارستقراطيه
07-04-07 ||, 11:29 AM
المزوحي ،،

((وعسى ان تكرهوا شيئاً وهو خير لكم ))


كلنا نتمنى الزين لنفسنا ولأهلنا ، لكن هل كل الي نتمناه يصير ،، هاي حال الدنيا،، ويمكن تكون هالبنية زينه ،، وانته حط في بالك انه كل شي مكتوب ومقدر ،، واذا رب العالمين رايد انه ياخذ هالبنية صدقني لو شو ما سويتو عشان تمنعونه بعد بياخذها ،، وعلى فكرة ما في شي يغير القضاء والقدر غير الدعااااااء
اعرف اني ما قدرت افيدك بس فوض امرك لله والله يهون عليكم ،، والسموحة
المزوحي
07-04-07 ||, 06:11 PM
الارستقراطيه

نحن مانذم البنت كثر ماننصحه ياخذ بنت البلاد .. هو يقول المشاكل حتى تكون بين بنت البلاد

صح كلامه .. لكن ليش الواحد يخلق له مشاكل .. بس بسبب إنه كل واحد من مكان ..

بعدين ماسمعتي من اسبوع موضوع في الإذاعة .. واحد يقول أمي مواطنة وأبويه سوري

وطبعا أكثر من 15 سنة وماعطونا الجواز .. وأبوه سار يتزوج سوريه ..قال أمكم مواطنه وعندها

فلوووس .. شوفي النظهر كيف بس ! وهو يبغي يخطب بنت خالته ( مواطنه ) رفضوا لأنه أبوه سوري

وطبعا رمسته عدله ..

انا ما أذم البنت .. لكن الواحد يدخل في مشاكل في غنى عنها ...

وإن شاء الله يصرف النظر عنها ...
دهن العود
07-04-07 ||, 06:57 PM
::

المـزوحـي..

انزيـن قـولـه شـوي يفكر بـعقل

غيـر انه هـو يحبـها.. خـله يفـكر شـوي بالمسـتقبل

حيـاة عيـاله كيـف بتكـون.!

الاب مواطـن والام وافـدهـ.!

خليـه شوي يفكـر بالمستقبـل..


لـي عــوودهـ


:::
المزوحي
07-04-07 ||, 07:56 PM
قلنا له هالرمسه ..

وقلت له الحين ماتشوف شي غيرها .. ولأنه تباها ... تحس الكل واقف ضدك ونحن مانحبك

وندخل بحياتك وتتحرانا مانبغي ساعدتك .. شو مصلحتنا نخرب عليك ؟!!

نحن نقولك ..لأنه عقب بتستوعب ...

يقوووول إذا جبرتوني اتزوج مواطنه بعرس عليها ..

نحن ماجبرناه ياخذ وحده معينه ... اللهم تكون مواطنه ومن نفس المواخيذ ..
دهن العود
13-04-07 ||, 10:38 AM
::

هلا مـزوحـي

هـمممـ.. مب مشكـلهـ.. لاتيأس

وحاول ويـاهـ لو مية مره ماعليـه

ويـاريت لو تخبـرنا شـو بيستـوي ويـاكـ



:::
المزوحي
13-04-07 ||, 11:06 AM
امويم هاليومين .. والله اقول الواحد يدوس على قلبه ويزعل شهر ولايندم عقب ويزعل دهر ..
نور الإيمان
13-04-07 ||, 09:37 PM
الله يعينكم الصراحة ...

بس ان عاند و يباها بياخذها خير شر !!

و اتمنى انه يفكر مليون مرة قبل لا يتخذ قرار يندم عليه ندم ع قد شعر راسه!!

المفروض يفكر لعقب شو بيصير و كيف!!

يعني عقب .. بيكون تحت صرفة اهلها .. " بدي أروح الشام و ازور إمي " ولا " ابن خالتو مريض و بدو فلوس " ولا " ما بدي اتحجب ... و انا تربياتي هيك مش متلكون كلو اسود بأسود "!!

ترا العادات مختلفة و عوار الراس بزيادة!!

هي السالفة مب الظن بالسوء ف الناس ... لكن الحذر فقط
نور الإيمان
13-04-07 ||, 09:40 PM
غير جي ...

خله يصلي الإستخارة .. ان ما صلى و يتعوذ من الشيطان الرجيم و يطلب من الرحمن الرحيم ان ييسر له اموره ..

و مب حلوة ياخذ وحدة و الأهل كلهم مب مقتنعين فيها !! كيف هي بتعيش معاكم؟؟ و كيف هو بيكون!!

يعني ما فكر بعياله .. كيف حياتهم عقب!!

احنا ما نقول لأنها وافدة نقوم نتهجم عليها .. لا .. لكن حلاة الثوب رقعته منه و فيه ...

يعني ان ياخذ وحدة و لو يحبها و بنت البلاد ما عليه خلاف .. اما وافدة و غير جي الأهل مب راضيين اهني العلة كلها ..

ادعوا الله .. و ان شاء الله يتراجع
المزوحي
13-04-07 ||, 09:42 PM
نور الايمان

اليوم حشر البيت ... نحن لأنه رافضينها ... مب راضين نخطبها له ...

مليوووووووون مره قلنا له .. نحن مانقصد هي سيئة لكن العادات غير وما بعيبها شي عقب

وبتدور ابسط الاشياء وبتسوي مشاكل .. يقول لاااا نحن متافهمين .. ماكمل سنة من عرفها

وهو متخبل يبغيها .. نور الايمان ... هم يفتكرون الحب كل شي ...

ومن جيه نحن ننصحه لكن يقول هاااي حياتي ....
المزوحي
13-04-07 ||, 09:45 PM
نور الايمان ... نفس الكلام اللي تقولينه قايلنه له قبل ..

قال: ليش ترفضونها وتظنون بالناس

قلنا : نحن مانظن فيها ..

بس محد راضي يحضر عرسه .. وكفايه إنه الأم مش راضيه ...

يعني معقوله نحن مانبغي سعادته عسب يفكر بهذا المنطق ..

هل نحن متعمدين نرفض عسب نخرب عليه ...

انا اللي اعنيه .. إنه يدوووووس على قلبه ويزعل شويه ولا يتوهق بها ويتم ندمان طول عمره ..

ومع هذا عطيناه مليوم مثال على وايدين نعرفهم متبهدلين ومن بينهم أخويه الكبير

لكن مب راضي يقتنع ويقول انا غير

بس في خاطري اعرف شو اللي غير ؟؟؟؟
نور الإيمان
13-04-07 ||, 09:52 PM
غير بأنه يحبها وايد لدرجة انه ما يشوف شي غيرها هي!!

هذا هو الغير ..

و انا معاك انه يدوس على قلبه شهر ولا انه يندم طول العمر ...

هو يعاند الحين .. و اللي يعاند يباله مسايسه شوي ..

و غير جي قولوله .. كيف بتعرس او تسوي حفلة زفاف و محد من الأهل بيحضر!!

و غير جي لو هي صدق تحبه و تحبه و تحبه ما كانت اصلا و من اساسه بتطيع ان ترتبط فيه دام انه امه مب موافقة .. اما اذا ما هامنها غيره هو ومب مسوية اي اعتبار لأهله .. فاسمح لي اقول انها انسانة مش صالحة!! هاي قمة الأنانية ..

يعني ما فكرت - هي الزوجة المزعومة - كيف راح تعيش مع زوج يفكر ليل و نهار بأمه و اهله!! و ان كان راح يكابر جدامها او مع نفسه بأنه اهله مب هامينه ...

و غير جي عيالها .. ما يبون يتربون مع اعمامهم و عماتهم !!؟؟؟

قول له هالكلام ..

قول له : انت قول لها انه الأهل مب موافقين و شوف ردة فعلها ..

اظني انها تعرف .. و المفروض تحاول تهدي اللعب شوي!!

ان كانت تباه بتقول له اهلك ثم انا .. و هذا هو الصح
المزوحي
14-04-07 ||, 11:34 AM
نور الايمان

نحن كلمناه بكل الطرق وبكل أساوب .. تعرفين يوم تقولين مايسمع ومايشوف، هذا هو حاله الحين

قلت له محد بيحضر عرسك وحتى لو فكرت تملج بس ... أمك مب راضيه ولو هي قالت سير

أخطبها أنا مايخصني .. كيف بعيش يومه ومحد بيقوله مبروك ... حتى لو هو اتحدانا الحين

بيتم متشتت وأحس يكون متوتر يوم بيعيش وياها لأنه الحين هو يعيش ويانا مشكلة عسب

اللي يباها وعقب بيعيش مشكلو وياها لأنه نحن مب راضين ...

ياما نحن شفنا شغلات في الدنيا نبغيها ... لكن نجبر أنفسنا على الاستقامة ... ونصلب أعمارنا

وهي عرفت إنه أمه مب راضيه، بس ماعندها كرامه ... تفرض نفسها والحين طالبه تتعرف

علينا ...
قرموشة
14-04-07 ||, 12:49 PM
^
أسميهـا قـويـه !
الله يعينكـم بس
والله يهـدي أخـوكـم ويـصـلح بالـه ويفجج عيونـه عـ الصـح


ذكـرتوني بـولـد خـال أبويـه
خـذ لـه سـوريـه ومـاكمـلت 3 شهـور وطلقهـــااا
المزوحي
14-04-07 ||, 01:28 PM
يابوج زين إنه طلقها وإلا الغربااال عقب

الله يبعدها يااااااااااااارب ياااااااااارب الله يبعدها عنه يااارب

زلزال في البيت منها .. مادري عاد مني هي ؟؟؟!!

اعنبوا الواحد يشوف في الدنيا بنااااااااات مب جيه .. الله يبعدها عنه ياااااااااارب

قرموشة .. تلعوزنا ...
نور الإيمان
15-04-07 ||, 05:19 PM
هههههههههههههههه

ويهها لوح والله!!!

لا إله إلا الله ..

شقد لاعبة بمخه ...

بعد تموا حاولوا .. و اللي الله كاتبنه بيصير ..

و ما نقول غير قدر الله و ما شاء فعل ..
دهن العود
17-04-07 ||, 07:01 PM
::

اسميـها قــوويـه..!!

لهـالدرجـه لاعبـه فـ عقلـه..

قلـت لكـ بالمـزوحـي هذا اخوكـ وكلموهـ اكثر من مية مرهـ

او خـــل اخوكـ العـود.. اللـي عاش التجربـه ومنهـ وفيـه يقولـه

باللـي مـر فيـهـ عــل وعسـى يحركـ فيـهـ شويـة مشـاعر!!



لـي عــوودهـ


:::
المزوحي
22-04-07 ||, 12:21 AM
دهن العود الكل كلماه، لكن مب مقتنع بكلامنا وبما فينا أخويه الكبير، لكن يقول حياتي وانا اللي أقرر
المزوحي
22-04-07 ||, 12:22 AM
الله يبعدها عنه بإذن الله ... وما يتم العقد