ماذا تفعل اذا وحده مدت أيدها تبغي تسليم عليك أو العكس ؟؟؟؟؟؟؟

[مداوي الروح]

السلام عليكم

شخباركم وشمسوين

اليوم يايب موضوع للنقاش

شو بيكون موقفكم لو:


وحده مدت ايدها تبى اتسلم عليك ، يعني يمكن اتكون زميلة في الشغل او مديرة الجامعه او دكتوره او ا و الخ ،


هل راح اتمد ايدك واتسلم عليها وله تكتفي بالسلام بدون مااتمد ايدك ؟


وللبنات اذا مد واحد اييده بتسلمين عليه ولا؟؟


؟؟؟؟؟؟


سواء من الاقارب ... بس ما يكونون من المحارم
<< ولد العمه وولد العم والخال ...

او


زملاء العمل


والسمووووووحه:k_smile2:

[الملهم]

سؤال مهم ..

لو في الشغل او اي وحده غريبة علي مدت ايدها ..
امممممممممممم ..

طبعا فشله يعني وحده اتمد ايدها وانا اقفطها .. مش حلوه ..
بس ممكن اني اشل تلفوني ابسرعه وانسحب بسرعه بعذر اني ابا ارمس تلفون .. وبتجاهل ايدها وهي على ما اظن بتقدر الموقف بدون اي تعقيد .. ^__^

شكرا على السؤال .. ^__^

[الدلووووعة]

والله عني انا مابسلم عليه

شو يعني زميل عمل اصلا هو المفروض مايسلم علي
بس ان سلم مابسلم عليه عسب مره ثانيه يفهم ومايرد ايمد يده

واذا حد من اهليه ( وانا دوم الظحيه في ها الشي ^^)

وخاصة الكبار فالسن يعني اللي فال30 واكبر
يعتبروني صغيره اونه ( معقديني فهالسالفه خخخخ)

بس مرات احاول اني اتجنب ها الشي بس عسب مايسلمون عليه

وتسلمين عالموضوع

[المحاق المشتعل]

هل الموضوع جميل جداً وانا بكون متواجد للقراءه =)

شكر خاص لطارح الموضوع

وللردود الطيبه

محاق

[قرموشة]

:h_mar7aba:

مـوضــوع حـلوو ..
انــا وبكـل صرااحــه من اللي يعانوون مـن هـ السلام .. وخـاصـه ويا الاهــل
يمكـن لانـه الكـل متعود عليــه ! ومـب منقـود عندنا مـثـل الباقـي :boxed:
مـثلا يـوم أشـووف عيـال خـالتي وأكون بين جمــاعه .. الكـل يسلــم سواء بالايد أو الخشـوم الخ .. ! فـ اضطر اني أســلم ..
وأحـيد مـره مـا مديت ايدي حـق ولد خـالتي اللي أكـبر عني .. يدوتي قالت بلاج ! ما بيااكـلج :fa46: فـ مديت ايدي غصب
بس الحـين .. ومـن فتره تعــودت انـي مـن أشـوفــهــم يايين ويبوون يسلمـون أنشغل بأي شي يداامي عـشان ما يتقفطــون :fa44:

ووووبس
.
.

[طير الحب]

أنا الصراحه ضد اني امد يدي واسلم واذا كنت بموقف محرج احط الوقاية على يديد واسلم


اذكر مرة في الجامعه من باب التمثيل مد الدكتور يده يسلم كان يبا يشرح شغله وانا كنت بويهه مديت يدي بس عقبها ما حسيت بيدي وتضايقت فترة طويله اني ما فكرت بس عقب سامحت نفسي:)

حاليا ما اسمح لحد يمد يده ويسلم...حتى بالعيد مرة انا ما انتبهت يقوليلي انه خال ريلي مد يده بيسلم وانا طنشته بس انا فعلا ما انتبهت زين من الله.


وبصراحه اتضايق من انه المصافحه باليد صارت عادي في وقتنا الحالي في اكثر الدوائر والاجتماعات

[جنون امرأة]

شكرا لطرح مثل هالموضوع ..



سأكتفي بالمتابعه ..

[المقاتل]

:thumbup1: .. ببساطه ووايد حصلت لي هالمواقف وحتى مع الأهل .. اسلم بالكلام بس ما امد ايدي لإي حرمه غير المحارم .. !!

وحصلت لي وايد مواقف .. ومواقف جدام الناس الحرمه تمد لي إيدها وتكون جنسيتها غربيه = اقولها انا آسف بس إسلامي ما يسمح لي إني المس حرمه .. وساعات يصادف إنهن يسألني انتوا ليش دينكم جذه ؟؟ اقولهم .. نحن ديننا دين تعامل .. يحافظ على شعور الحرمه ويحافظ على شعور الرجل وأيضا دين يحافظ على مكانة المرأه والرجل .. !!

احيد واحد من الربع ( سعودي ) قالي إنته جرئ .. قلته جرئ ؟؟ بالعكس انا طبقت الدين وهاي هب جرأه .

.. المقاتل ..

[تحفه]

اذا كان شيخ كبير مب صغير عادي بسلم عليه :tounge: .. بس ولد عمي وولد خالتي .. زميل في العمل ع قولتكم اشحقه اسلم عليهم :a032: ليكون على راسهم ريشه ونا مادري :icecream:

[الـيـاه]

المشكلـه ..
إنـا نفكر فـ الشي ع شكل عـاده .. مب أنه حرام والا حـلال وأغلب الأهالي جي يفكرون ..

صح مايكون قصدهم ! .. وهالاشيا تستوي بنية وايد زينـة لكـن بعد مايستوي شرعا ً .. وللأسف نحن عنـّا هالشي إنا نسلم بالأيـد مبين الأهل - عيال خوالي عيال عمومتي - ( بس مب زملاء العمل )

وهالشي اسويه حق قوم الثلاثينات
لكن الحشاكل اللي من عمري وطالع ماسويلهم سالفـــه XP .. لكن مرات فـ الأعياد وهالمناسبات أسلم غصبننننن عني

اصلن نحن ما عنـّا وايد أن البنت تاخذ ولد عمها وألا فلان لـ فلانـه .. نادرا ً مايستوي زواج جي
ممكن يكون من الأهل بس مب ولد عم وألا ولد خال ( لأنـه وايد قريبين من بعض فـ كل واحد يجوف الثاني ع اساس أنه أخ أو أخت مب أكـثر ) ..

لكــن بعــد ( غـلـط وحــرام ) اللي نسويــه .. وأن شاء الله أحاول أعدل هالشي من صوبـي

[بنت الدلع]

اذا مد ايده انا بابتعد
وبرد عليه بالكلام
عشان مره ثانيه يعرف ان هالشي غلط ومايكرره

وحصلت لي مواقف ان حد كبير يسلم علي
بس احيانا من القفطه الوحده ماتعرف شو اتسوي


موضوع حلو
نستمر في القراءه ^_^

[مــهــابه]

عــليك الســلام والرحمه

اممم أنـا واعـوذ بالله من كلمة أنا ، وبما ان نحن عايشين مع عيال عمتيه ، واغـلب اوقاتهـم هم ف بيــتنا ، واعــتبرهم شرات اخواني واكثر ، فكنت أسلم وأسولف واضحك وجيه، يـعني كـ أنهم أخواني
وكنـت دايمـاً أسلم عـليه بالأيد وكـأن الأمر طبــيعــي



ولكـن !!..


الحين أحاول اني ما أســـلم ، يـعني كــذا مره ولد عمتيه مد ايده يسلم ، قلــت له ، لاتمد ، حرام
حـاولـت أييبها له بطريقـة سوالف وجيه ، !! وأحاول ادخل الصـاله لو كانوا موجودين ، يوم الكل ملـتم بحيث اني ما أسلم ع حد ، مجرد أقول السلام عليكم وادخــل

والحـين أبد ما اسلم على أي حد من عـيال عمتيه أو خالـتيه بالأيد

يمكن يداتنـا وجيه ، يقولون ليش ماتـسلمون وجيه ؟ بحكم انهم كبار وياخذون السلام من نظرة عاداتنـا وتقاليدنا مش من الناحيـه الإســلاميـة

ولكـن يبقـى شـرع الله ، فـوق العـادات والتـقاليد ، وفوق حشرة يدتيييه يوم تشوفني ما أسلم:fa56:

[بريد ألكتروني]

بالنســبه للبــلاد .. بصــراحه الله يعين اللي بتمد ايدها تسلم علي .. لانه بتوايه نـظرة جدا حقيره مني .

بالنسبه للخارج وبالذات الثقافه الانجليزية تعلـمنا شــي انه الريـال ما يمد ايده يسـلم على وحده .. الا اذا هي مدت ايدها فلازم تبادرها بالمثل .

[إسهر معي ليله]

من مد لي يمناه مديـت لـه خمــس.. ومـن صـد عني عفـت شيـفت بــلاده :whistling:

مشكور عالموضوع،،

المفروض انه الريّال من نفسه ما يمد ايده لـ بنت وهالشي تعودنا عليه
بس احياناً تكون البنت فيها جرأه وتمد!

عشان جيه،، اذا الواحد فينا يبا يتجنب هالأشياء،، قبل لا يمد الطرف الثاني
ايده احرك راسي يوم اسلم.. وايدي اخليها بعيد شوي.. ويفهمها الطرف الثاني بدون احراج

[بنوتة جميرا]

موضوح حلوو
وبالنسبه لي اذا حد مد ايده
من عيال عمومتي وماشابه اكيد ما امد ايدي
عادي عندي لو اقفطهم
وبس ارد عليهم بالكلام

بس كبار السن مثل ماقالت الدلوعه فوق الثلاثين يعتبرونا صغار
ولازم انسلم عليهم
مثل ريل خالتي العوده ريلها كبير في السن
ويوم كنا صغار كان يشلنا ويلعبنا
ويوم ايسلم لازم انسلم عليه لانه شرات ابونا
بس انا ماحب جي

شكرا مره ثانيه ع الموضوع

[ألم ترى]

بسم الله الرحمن الرحيم ..

بعيد عن حكم الإسلام ف هالشيء المفروض الواحد يخيل ع ويهه وما يمد ايده سواء ذكر ام انثى ! ..

هالشيء منتشر ف كل مكان وللأسف وامسات يالس اشوف الأخبار وجان احصل وحده لها مركزها تسلم ع واحد من الشيوخ ! ..

عن نفسي انا فمن الله اطلب إن ما يمر عليه شرات هالموقف لجل ما ألوم غيري او اني أتلوم من غيري ..

الله المستعان ..

دمتم بحفظ الرحمن ..

[العجيبة]

بعيــد عن الأهـل أو الموظفيــن اللي تكلمتوا عنهم ..

مـرات أيــام التكـريـم أو التخـريـج ، بعض البنـات إذا مب كلهـن ، عـادي عندهم يسلمون ع اللي يالس يكـرم ، هالشي بعــد حـرام ، فمهما كـان يتم هالشخص غـريب وما يحـل لهـا تمسه ..
والبعض حجته ، لا عـادي هذا منصبه كبيـر ، هذا ( **** ).. انزين ويعني ؟

البعض يقـول : انزين هو اللي مـد ايده ..
انزين انتـي لا تمـدين ايدج اليمين ، مدي اليسار عشان تاخذين الشهادة والهدية وتوكلـي ..


أحلى شي في الجيش ، يا ويله اللي يتجـرأ ويمد ايده على وحـدة ، والعكس صحيح
جان زيييين لو يطبقون هالشي في كل الدوائـر الحكومية ..


ولا أقــول .. القوانين ما تسوي شي .. هالشي من ذات الانسان نفسه ..
اذا هو يبـا هالشي ما شيء بيغلبه ، واذا ما يبـا بيسـوي مثل ما سوى المقاتـل وأنا أحييه على هالشي ..
شو المـانع ان الواحد يتكلم ويقول لا ما أبا أصافحج !

أعتقـد مب عـذر إنه هـي مـدت ايدهـا .. هـو مد ايـده ..

عيـل لو هي فرت عمرها في النار .. بتروح وراهـا ، ولو هـو عق عمـره في الجحيم .. بتسيرين وراه ؟

الله يهـدي الجميـــع ..

لحظة قبل ما اروح .. أستغرب من البنـات أو حتى الشباب اللي ما يسلمون على اخوانهم وخواتهم بحجة انهم دايما معاهم في البيت ، بس عيال الخال وبنـات العم يسلمون عليهم بكـل حب وود وفرح !! شو السالفة ! خلصوا طاقاتكم في اخوانكم وخواتكم وما بتحتايون حد غريب تسلمون عليه


<< شوفوا قمت أقترح بعـد خخخ


وشكرا ع الموضوع

[تحفه]

بعيــد عن الأهـل أو الموظفيــن اللي تكلمتوا عنهم ..

مـرات أيــام التكـريـم أو التخـريـج ، بعض البنـات إذا مب كلهـن ، عـادي عندهم يسلمون ع اللي يالس يكـرم ، هالشي بعــد حـرام ، فمهما كـان يتم هالشخص غـريب وما يحـل لهـا تمسه ..
والبعض حجته ، لا عـادي هذا منصبه كبيـر ، هذا ( **** ).. انزين ويعني ؟

البعض يقـول : انزين هو اللي مـد ايده ..
انزين انتـي لا تمـدين ايدج اليمين ، مدي اليسار عشان تاخذين الشهادة والهدية وتوكلـي ..


هلاوز اختي الكريمه

الحين مثلا لو محمد بن راشد ولا خليفه بن زايد سلمو عليج انتي مابتسلمين عليهم؟ :tounge:

[أمواج]

.
.
عادي بســلم ببســاطه
.
.

[المقاتل]

عندي مداخله بسيطه بخصوص الرد إلي ذكرته اختي بوظبي ..

اولا - الدين دين يسر ... وإذا انجبر الانسان .. الاسلام دائما يرفع الحرج ويخفف على المسلم .

ثانيا - عندي مثال حقيقي .. اختي انا كلمت المسؤولين بأنها ما تسلم على الشيخ .. وقبلوا .. وشي آخر .. أختي انا كلمت المسؤولين بأنها ما تبا اتسلم على مدير الجامعه وقبلوا !! ( بمعنى ما اتمد ايدها ) .. إلي يبا الصلاه ما تفوته اختي بوظبي ..


ثالثا - وهالنقطه ما تتعلق برد اختي بوظبي :fa46: .. الي تبا اتسلم أو الي يبا يسلم .. خلييهم يسلمون .. لكن الله فوق بحاسبنا على كل صغيره وكبيره .

وسامحوني على هالمداخله .

[العجيبة]

هلاوز اختي الكريمه

الحين مثلا لو محمد بن راشد ولا خليفه بن زايد سلمو عليج انتي مابتسلمين عليهم؟ :tounge:

هييييه نعم ما بسلم ..

هي قناعة وما بتخلا عنهـا ...

وان شاء الله ايي يوم اشوف فيه محمد بن راشد وأتمنى أقـدر أعزمـج تشوفيني ساعتهـا :mf_leia: أو أكيد بيصوروني وشوفيني في أخبار الامارات :k_harhar1:

[المقاتل]

http://up.9q9q.net/up/index.php?f=24zABaFCb

شوفوا هالفيديو .. وبتشوفون إن المرأه قادره حتى انها ما اتسلم على الملك .

[أنامل قلب]

السلام عليكم والرحمه ..

موضوع تشكر عليه أخي وفعلا هذي الغفله منتشره بستر مسمى بـ " العادات والتقاليد "
ومن الصوب الثاني >> موضوع الحرج والقفطه .. !!

وطبعا ما قصرو اخواني وخواتي بالحديث عن الموضوع ..

أما بالنسبة لي .. كل ماحسيت بإني ممكن اتعرض لهالموقف مع الاهل غير المحارم اشغل نفسي بأي شي
وأبعد قبل لا أحط نفسي قبل ما احط الطرف الثاني بموقف محرج ..
لكني بنفس الوقت مادري اذا كنت بقدر اعتذر ممن يمد يده هذا ان كان من الاهل الكبار ..
أما بغيرهم فلم يحدث أن اضطررت للاختلاط مع الجنس الآخر .. لكني اهني متأكده ان من الطبيعي البنت بتعتذر عن المصافحه ..
يعني الموضوع بديهي .. >> ما أتخيل الصراحة انها تجرا وتصافح :Oo: ..

بس عندي نقطة احب أوضحها ومريت ابها شخصيا ..
اللي هو موضوع السلام على غير المحارم من الاهل .. وأخص بكلامي كبار السن منهم ..
حبيت أسأل بالبداية عن حكم ذلك شرعا .. وإن جاز ذلك فلمن ؟؟ >>
>> يعني بأي عمر واي وضع ؟؟

وبالنسبة للنقطة ..
الحينه لمن البنت تشوف واحد من الاهل مد يده ويسلم " أخص كبار السن " تصاب بالاحراج لكون اللي ماد يده ريال عود ..
ويكون رد فعلها انها تصافحه " شبه مصافحة " لأن بالعاده البنت اللي ماتعتبره شي عادي تستحي من ذلك وتكره الفعل ..
لكنها مع ذلك تجيب المصافحه منعا لاحراج الرجل " او حتى لا تشعر بإن فعلها قلة احترام " لكون الرجل عود ..

لكن مرة مريت بموقف جدا بايخ وكريه لتكرر موضوع السلام لمن يقال عنه " كبر أبوج " ..
فزوج عمتي " كبر أبوي واجتاز الـ 60 سنه " لكنه بكامل صحته ويعتبر بالنهاية رجل حاله حال من يصغره ..
اللهم الفارق الوحيد خصل من الشعر الابيض ؟!؟! .
كالعاده احاول اتهرب من السلام دائما لكني مع الوقت أخذت بقول " إنه ريال عود وبحسبة أبوج " ..
وصار رد فعلي اني أمتنع عن الاعتذار واصافحه مكرهه ..
خاصة ان الاهل " كبار البيت " يطيحون في البنت لما تمتنع " ليش ماتسلمين .. قلة احترام ..
شو هالخربطان ..كبر أبوج .. نيته ماتتعدى السلام .. والخ " ..
لكني تفاجأت بيوم مع العلم ان علامات عدم الرغبه في السلام بادية والتكشيره ظاهره علي ؟!؟!
لكن مره قبل لانسافر .. واحنا نسلم عبعض وطبيعي نحب بعض عالخد .. يعني البنات والمحارم ..
شفته بكل بساطه سلم كالعاده وياه حاله حال المحارم حبني عخدي وانا أبعد والموقف كان جدا بايخ ..
وطبعا تميت مصدومه .. واحساسي يومها ماينوصف .. جدا كريه .. >> لكن فعله خلاني أفكر بالموضوع بشكل أكبر ..
والحمدلله من بعدها صرت آخذ الموضوع بتشدد وصلابة أكبر .. وما يهمني كلام الاهل " هذا عود ونيته ومادري وشو الخ "

وماتطرقت لهالأمر اهني إلا لأني أحب ابين شغله ..
إن الأمر ممكن ما يتجاوز نية السلام صحيح .. لكن تكرار اباحة هالامر يسبب تمادي قد يكون لا إرادي من الطرف الآخر ..
وغير مقصود منه شيء .. لكن شفتو كيف الريال حط بباله فعلا انه بحسبة محارمي ويجوز له ما يجوز لهم .. !!

وأحب اقول كلمه ..
إن الانسان مهما كان يميل لأشيا .. واباحة شي يجر شي .. وهكذا ..
واذا انتي نيتج ومقصدج من عدم الامتناع عن المصافحة سليم .. ما بتقدرين تظمنين هالشي بالطرف الآخر .. ولا باللي يدور بنفسه !!
واللي تعدونه مجرد سلام ممكن يسبب مبالغه غير محسوب لها وقد تكون فعلا غير مقصود منها شيء ..
لكنها إلا وتتمادى .. بالغالب ..

وسبحان الله بعد هالموقف لقيت اكثر من بنت مكلميني بهالأمر .. ومواقف كثيرة تحصل لهم ..
يعني مب إلا أنا اللي أتبهدل :3: ..

.
.


أتمنى ما يتم اهمال سؤالي ..
لأنه أمر يسأل عنه الكثير ..

ولكل من شارك بهالموضوع احترامي ..
وجل الشكر والامتنان ..

والسموحة عالاطالة والقصور ..
إختكم أنامل قلب ..

[ريم العين]

انا عند اهلي عادي ارد السلام باليد
حتى اني عادي ابتدي بالسلام
ويا الكبير او اللي اصغر عني

اما عند الغريب ولا مره جربت
ولا اتوقع اني بجرب



وتسلم اخوي عالموضوع:thumbup1:

[بنت الدلع]

وان شاء الله ايي يوم اشوف فيه محمد بن راشد وأتمنى أقـدر أعزمـج تشوفيني ساعتهـا :mf_leia: أو أكيد بيصوروني وشوفيني في أخبار الامارات :k_harhar1:

:thumbup1: تعجبيني