منع المرأه من القياده بالنقاب ..

[كـلـكـلـووش]

الســلام عــليكم

اليوم و في الصفحه الاولى من جريدة الامارات اليوم منزلين خبر ان شرطة ابوظبي تمنع المرأه من قيادة السياره و هي منقبه .. !

القرار اتى بعد ما اكتشفت شرطة ابوظبي عدة حالات بأن سائق المركبة ( المنقبه ) هي ليست نفس الشخص اللي في الرخصه ..

و من الحالات ان طفل عمره 14 سنه سرق السياره و اتنقب و لما وقفته الشرطه اكتشفت بأن صوت هالطفل مش صوت امرأه كبيرة منقبه ! و ايضا حالة اخرى و هي ان امرأه عندها فحص قيادة راحت بنتها بدالها و ادت الفحص !!

و قال المقدم احمد الشحي رئيس قسم المرور و دوريات الشرطة في شرطة ابوظبي ان القانون اللي الزم المرأه بكشف وجهها اثناء التصوير لرخصة القياده ملزم ايضا بعدم تغيير اي شيء بالوجه اثناء قيادة السياره ليتعرف رجال الامن هل هي صاحبة الرخصه ام لا !

ما اعرف هل القرار صحيح ام لا ! و مهما يكون في ناس يستخدمون النقاب بشكل سلبي لكن في ناس تستعمله لتستر !

فـ هالفئه من الناس ما يخصها اذا في فئه ثانيه اسائت استعمال النقاب !

انتو شو رايكم !؟

ســلام
كـلـكـلـووش

[كـلـكـلـووش]

على فكرة نسبة المواطنات اللي يسوقون عندنا في الدولة هي 18% من مجمل السائقين في دولة الامارات

[الـيـاه]

بس سخافه صراحــه ..
يعني كل هاييلا المتنقبات لازم يعقون النقاب يوم يسوقون ! شو ها .. وكله عسب هالفئة اللي سوت جي

احين المب متنقبه يوم تسوق مايتم حد مايلعوزها
ويبون هايلا يعقون النقاب فـ بتستوس مشاكل من صوب ثاني .. يعني ها مب سبب عسب يحد للمواقف
اللي نذكرت (أبـد) .. لانك تخفف من شي بس يطلع شي ثاني

صح إني ما أتنقب
لكن صراحــه أشوف فيه تعدي على حقوق المرأة أكثر من ماهو إيجابي

ومشكوووووور كلكلوش ..

[كـلـكـلـووش]

احس ان هالفئة اللي تتنقب و تسوق قليله بالنسبه للناس اللي تسوق عندنا في الشوارع ..

و بعدين اللي يبى يسوق تراه بيسوق سواء بنقاب و لا بدونه ! فـ يوم بيطلع هالقرار ما بيمنع المخالفين من السواقه و مثل ما يقول المثل .. اللي يبى الصلاة ما تفوته و بيطلعون اشيا يديده و بيسوقون و بنفس الوقت المظلوم هي الحرمه اللي تبى تتستر و تتنقب !

[عبرات حالمة]

انا بصراحه مع الشرطه
صدج في شوية تعدي بس هذا في مصلحة الجميع
يعني لو الحرمة عقت نقابها لثانيتين ماراح تموت
اما في لو تم الحال جي ففي حوادث ممكن تستوي

هذا رايي من دون مجاملات وسوري اذا اهنت احد

[الـيـاه]

ترا جي .. اللي بيسوي شي ما بيمنعه هالقرار ! مب حل هو

نحن نقول جي .. أنه عادي عندها ما بتلبسه في السياره بس بالنسبة للمتنقات يحسون أن هالشي وايد كبير .. بس امبلا نسبة المتنقاب وايده بالنسبة للحريم ( اللي يسوقون طبعا ً ) خاصـة قوم التربية وشوف كم عاد أنت


لا وبعد وين مانعين هالشي .. في بوظبي .. عز الله فلحوووا لول

شرطة بوظبي روحها مب عارفه شو تسوي بشبابهم عفاني الله ( سوري لمال بوظبي يعني ) لول بس هاي حقيقه ! مافي شي يوقفهم
آخر شي بيصدرون قرار بمنع إنجاب الأولاد

اتمصخر ههههه

[كـلـكـلـووش]

هي فئه كبيرة .. لكن اذا بتقارنينها باللي يسوقون في الشارع فـ بتلاقينها صغيره .. نسبة المواطنات اللي يسوقن 18% .. يمكن المتنقبات يكونن 10% او 9 % فـ تعتبر نسبة صغيره ..

احسه قرار مستعجل فيه .. يباله دراسه اكبر و لازم يشوفون حلول افضل ..

[تحفه]

مع احترامي الشديد للبس النقاب كـ وسيله للتستر وجيـه . . .

بس احس ان مادام البنت مب متمكيجه ومتحجبه النقاب مابيكون له لزمه ..

وهالشي مش مشكله للمتنقبات الي ما يحطون ميك اب فليش مسوينها قضيه

[كـلـكـلـووش]

يا تحفه .. يمكن ما تكون مشكلة لج و هذا رايج ,, و احترمه لكن .. في ناس متعوده على شي اسمه نقاب ,, و ما تتقبل ان تفصخه ..

القضيه مب هني يا خوج .. النقاب يعتبر لبس و من حق كل انسان ان يختار لبسه .. على حسب تفكيره و عقليته و تربيته و دينه .. فـ هالقرار ما راح يكون رادع للناس اللي تتخفى بالنقاب تهربا من القانون !في وسايل افضل لهالشي .. و المفروض ان يفكرون فيها و يدرسونها اكثر ..

و تبقى وجهة نظر ..

[وحي القلم]

ما يستوي يقول لها الشرطي تكشف عن ويهها عشان يتأكد.. إذا كان شاك فالسالفه يعني

ولا لازم يمنعون النقاب ؟! :fa55:

(( الله يكون فالعون ))

اللى يقهر انه محد يقول شي لهالأجانب اللى وايد ماخذين راحتهم فاللبس :mad:

.
.

[العجيبة]

يعني نفس ما منعـوا الموظفـات من النقاب في مقر العمـل ..

أشوف هالشـي عـادي دام يصب في المصلحة العـامة ،

ودام الوحدة قبلــت تصور صورة الليسـن بدون نقاب ، خلهـا تسوق بدون نقاب بعـد ..

وأصلا مب فارقة .. يعني اذا وقفها شرطي بيشوف ويهها في الليسن ، وشو المانع انه يشوفه عالطبيعة بعد ؟ عادي ترا الويه هو نفسه ما بيتغير..

وأســاسـا الويـه مب من العـورات ..! فـليش من الأساس هالتشدد في لبسه ؟

وبس .. خطوة موفقة من شرطة أبوظبي أحييهم عليهـا ..،

[رويان]

.
.
الموضوع طرح للنقاش.. و احترام الأعراف الخاصة بأي مجتمع واجب
و مسألة أن كشف الوجه حلال.. فلا خلاف
و لكن للنقاب عند بعض الحمايل من المذاهب..
خطأ أو تجاوز البعض و استخدامه ممكن يتعالج باستصدار دوريات نسائية مثلا أو أي حل آخر لا يثير تحفظ أصحاب هذه المذاهب..
.
.
تحياتي

[وحي القلم]

العجيبه

اللى تتنقب تستحي تكشف ويهها جدام الرياييل

و شي أكيد انه يفرق .. يعني إذا كشفت ويهها جدام واحد غير عن يوم انها تكشفه جدام الكل

هذا اللى أتصوره

.
.

بس طبعا ما أنكر أنه شي منهم يستغلون النقاب لأشيا مب زينه

..

[الجديدة]

و عليكم السلام و رحمه الله و بركاته
أنا قرأت الخبر مثلك اليوم في الجريدة
بصراحة انصدمت و أنا أقرأ التحقيق
أنا مش منقبة بس مرات لما أسوق ألبس النقاب
لوجود الشباب في المكان اللي أروحه

بس الامر معي عادي
بس مثلا زوجات اخواني متنقبات
من المستحيل انهن ما يلبسن النقاب و يلبسن النقاب لما يسوقن و في المدرسة
فصعب القرار عليهن

في الأخير هذا يعتبر حرية شخصية
بس بعض الناس استغلوه بشكل خاطىء
فيحاسب الجميع على ما فعلت هذه الفئة

قرارات لا نعرف هل هي صحيحة اما لا

[شوق القلوب]

الســـلام عليــكم..


قرار جــــــــداً متسرع..

الحين .. غالبيه اللي متنقبات و يسوقون اسمحولهم اهلهم / ازواجهم بالسواقه بشرط انهم يتنقبون و ذاك حفظاً لها و لسمعتها.. بس الحين شو بيسوون هالبنات..! يعني خلاص.. ماشي سواقه ..؟؟

..

النقاب بصفه عامه هو ستر للمرأه.. صح انه مب واجب و كشف الويه مافيه اي مشكله بس في تفكير البعض يعتبرونه شي كبير و مهم و مستحيل يتخلون عنه سواء من البنت نفسها أو من أهلها.

و بعدين يعني هم لو هالكثر متأزمين انه صارت كم حاله في اشخاص اتنقبوا منتحلين شخصيه غيرهم.. ليش ما دوراو حل للشبـــاب قوم بــو 17 سنه و تحت اللي ما يخلون مكان مايسيروله بدون لياسن ..؟؟؟

..

للاسف.. حتى القوانين صارت ما اتراعي المرأه
:smile2:

[ولد الشحوح]

ابسط حل انها تكشف ويها حق الشرطي او انهم يخصصون حريم حق هالشغلة وما يحتاي تعق النقاب مرة وحدة ... انا قريت فالجريدة اونه النقاب يعيق الرؤية هخهخه الوالدة يحفظها ربي تسوق من خمس سنوات والحمدلله ما لعوزها النقاب ... قرار مش مدروس كـ غالبية القرارات

[اخت اختي]

أنا أؤيد الشرطة.. دام إللي يسوقن شوية بس المخالفات تكثر ما شي مشكلة.. هذا كله في سبيل أمن الدولة. وأنا أجوفه قرار منطقي..

[الدلووووعة]

اممم

يمكن هم ماسوو ها القرار إلا يوم شافو اكثر عن حاله هب وحد او ثنتين

يعني اوكيه من الله مستحيييييل حرمة تسوق سياره من دون مخفي قوي ( مادري عن الامارات الثانيه بس انا ارمس عن بوظبي ) يعني محد بيشوفها فماله داعي النقاب
لاكن بعض الحريم خلاص استوت عدهم عاده سالفت النقاب يعني يمكن يكون
القرار صعب عليهم يعني لو انا كنت متنقبة واسوق ( يحليلها تحلم تسوق ^_^)المهم ونزلو ها القرار وانا متمسكة فالنقاب
اكيد بعارض ها القرار بس اكيد هب مانزلو القرار إلا في اكثر عن حاله مستويه من ورا ها النقاب

[عنود الريف]

الصرااااحة انا اشوف ان القرار يخدم أمن البلاااد أكثر ..
وانا اشوف ان الحريم بيتعودن على عدم لبس النقاب وهن يسووقن .. مثل ما تعودن انهن يلبسنه وهن يسوقن ....

مجرد رأي

[ولد الشحوح]

خواتي الكرام انا أحترم وجهة نظركم بس لو كنتوا منقبات نظرتكم للقرار بتكون مختلفة وماله داعي انها تسوق بدون النقاب يا عمي اذا شك الشرطي تكشف له عن ويها وانتهى الموضوع مش انها تكشف ويهها للناس كلهم ...؟!؟

[كـلـكـلـووش]

يخدم امن الدولة ما قلنا لأ .. لكن في حلول ممكن تكون مشابهه و تخدم امن الدولة ايضا ..

ممكن الحرمه تخلع النقاب للشرطي عسب يتأكد اذا هي نفسها في الصورة و لا لأ .. و تنتهي المشكلة و تنحل ..

يعني الشرطي بس يشوفها و لا كل الخلق يشوفونها ( خصوصا ان نحن ما نعرف كيف الاعراف الموجوده لدى هالمرأه و عايلتها )

و اذا عن النقاب يعيق المرأه في السياقه فـ هالشي اول مره اسمع فيه انا !

و شكرا لتعليقاتكم و ارائكم ..

[وحي القلم]

النقاب يعيق الرؤيه !!

شو هالعذر !! :crazy:

الغشوه يمكن .. بس النقاب ما يأثر

لأنه ما شي يغطي عيونها أصلا :7:

[جنون امرأة]

السلام عليكم و رحمة الله و بركاته ..

الموضوع مب سهل لها الدرجة ..

قريت كل الآراء ..

و في منهم اللي يشوفون أن عادي المنقبات يعقون النقاب ..

كل حد يحط نفسه في هالموقف قبل كل شي .. عقب بيعرف اشكثر هالشي صعب ..

كل انسان له مبادئ و أعراف و قيم .. ما بيتخلى عنها ,.,

و طبعا هاي حرية شخصية و خاصة في دولة اسلاميه و عربيه ..

((الحرمة اللي قدرت تحط صورتها ف الليسن ,, ما تقدر تعق النقاب)) ,,

أتصور أنها يوم فكرت تسوق .. أكيد كانت محتاجة حق هالشي لكن مع الحفاظ مبادئها ..


اذا على الصورة تراها مجبورة على هالشي مب حق الليسن بس .. حق الجواز و البطاقة الصحية و غيره ...إلخ

أعتقد أن هالقرار مش سليم .. لأنه يخدم جانب واحد من المشكله مع خلق مشكلة أخرى !!!!!!

[العجيبة]

الحين .. غالبيه اللي متنقبات و يسوقون اسمحولهم اهلهم / ازواجهم بالسواقه بشرط انهم يتنقبون و ذاك حفظاً لها و لسمعتها.. بس الحين شو بيسوون هالبنات..! يعني خلاص.. ماشي سواقه ..؟؟


غريبــة .. اللي اعرفه ان السواقه لا هـي عيب ولا هي حرام عشان ايي النقاب ويحفظ سمعة اللي تسوق ! يعني لو شايفينه عيب وحرام فالأفضل ما تسوق .. وبتكون حافظت على سمعتها وعلى عمرها وما عرضت نفسها لقانون مثل هذا ..


النقاب يعيق الرؤيه !!

يعيق الرؤية لو كانت تلبس نظارة شمسية ومخفي في السيارة ..
وعلى فكرة أكثر من مرة نحن بنندعم والسبة المنظر نفسه " منقبة ولابسة نظارة شمسية " ولا دارية عن اللي حواليها .. تعفد في سياييـر خلق الله .. :fa55:



أنا وياكم في ان النقاب ستـر .. بس مب لكل الحريم ..
وكـ حــل لأي منقبة تأثرت بالقرار .. تسوق في سيارة فيها مخفي ويوم تبا تنزل مكان تلبس النقاب .. محد بيشوفهـا ولا حد بينقد عليهـا ..


وفيه حل ثانـي بعد .. لا تلبسون النقاب اللي ما يخصه في اللبس المحلي .. البسوا البرقع .. شكله أحلى ويعطي رونق أجمل وفي نفس الوقت الويه ما يبين ، ولين الحين ما نزل قرار يمنعه ..

[شوق القلوب]

الســـلام عليـــكم...


مب كل النــاس لها نفس التفكيــــر عزيزتي.. في ناس اجبرتهم الظروف ان يخلون بناتهم يسوقون.. و في ناس اتغار على بناتهم من الرياييل اللي في الشارع.. و في ناس تعتبره ستر للبنت..

.. .. ..

على فكـــره اللي مب متنقبات ما بيحســون بمدى تأثير هالقرار.. لانهم بالاساس مب مقتنعين بموضوع النقاب نفسه.. فكيف بيتعاطفون..؟؟!

[تنينه]

^ صــدقها شوووق شي طبيعي ان اللي مب منتقبات ما بيحسوون بتأثير هالقرار لأنـهم في الأساس مب مقتنعين بالنقاب نـفسـه ؛؛

قـرار مـتسرع جـداً :fa55: ؛؛ والمـصلحه الـعامـه ما بـتتعدل إذا كل الحريم صاروا كـاشفين ويـوهـم :fa55: ؛؛ هـي حـريه شخـصيه وسـتر ومبدئ وقيـم بالنـسبه لكثير من الحريـم المتنقبات؛؛ الله يهديهم بس شرطـة بوظبي :fa55:

انزين والـبرقع ممنوع بـعد ولاا :a116:

[همس الدماني]

بصرااحه اشوفه قراار خاطئ

لأن نفس ما قاال اخوي كلكلووش

ان في نااس يستخدموونه لستر

ثانكس...

[العجيبة]

أقــدر لكم مشاعركم ..

بس القرارات عمـرهـا ما نزلت وهي مدروسة عاطفيــاً !!!

لو كنا ننظـر للعاطفـة فـ وايد أشياء بنكون ضدهـا ونعارضها ..

[وحي القلم]

يعيق الرؤية لو كانت تلبس نظارة شمسية ومخفي في السيارة ..

معناته العيب فالنظاره الشمسيه و المخفي

لانه النقاب ما يغطي العيون

.
.

[كـلـكـلـووش]

اختي العجيبة ..

يوم قالو حفاظا على سمعتها مش لإنها تسوق لأ ! .. حمايتها من طيش الشباب و فئة الشباب اللي بس اذا شافو ( وجه و شيله و عباه ) لحقووه .. حتى لو البنت ما اعارتهم اهتمام ! و ع قولة البعض ( ميوعين )

الريال بيكون ضامن حرمته و بناته .. بس مب ضامن الجو او الناس اللي بيكونون في الشارع ..

و جدامنا استوى حادث في منطقة حلوان في الشارجه قبل سنه تقريبا .. واحد يلاحق وحده ( ام عيال ) دعمها من طيشه و ركب فوق الرصيف .. ( طبعا ليلته كانت سووده خصوصا لما ريلها وصل مكان الحادث )

فـ ارد و اقول .. ممكن يتعدل القرار لـ كشف وجه المرأه عندما يطلب شرطي المرور للتأكد ان الشخص ( قائدة المركبه ) هي نفسها صاحبة رخصة القياده .. و كان الله غفورا رحيما ..

[جنون امرأة]

أقــدر لكم مشاعركم ..

بس القرارات عمـرهـا ما نزلت وهي مدروسة عاطفيــاً !!!

لو كنا ننظـر للعاطفـة فـ وايد أشياء بنكون ضدهـا ونعارضها ..


عزيزتي .. نحن تكلمنا عن المبادئ و القيم و الأعراف ..

مب عن العاطفه ((مع أن لها دور)).. و هذا حق لهم و نحن ما نقدر نسلبهم حريتهم !!!

واذا النقاب مسوي مشكله .. في ألف طريقة ممكن يتخذونها عسب يحلون المشكلة ,,

مب يحلون مشكلة بـ مشكلة ثانيه !!!

ف الاخير هذا رايج و أنا أحترمه .. لكن حبيت أوضح لج النقطة اللي انتي قلتيها .. ((عن العاطفه))

[راعي الزعـامه]

شرطة ابوظبي اتحاول اتعالج مشكله من المشاكل

ولازم تتقبل راي و اعتراض الناس

الكل يعطي رايه ولكل حل سلبيه اشياء سلبية وايجابية ،،

الله يعين اصحاب القرار

[ولد الشحوح]

ممكن أستفسر : انا اذكر ان الشريعة الاسلامية صالحة لكل زمان ومكان بالتالي الله ما بيحلل شي اذا كان فيه ضرر للمسليمن ... واذا عن اللي يستخدمونه بشكل غير قانوني اذا بنحل مشكلتهم بالمنع عيل انحرمنا من كل شي لان كل شي ممكن تستخدمه فالزين والشين ...

[الـيـاه]

بس غريبـه إذا النقاب يحجب الرؤيـه ( المخفي والشامل ) ما يحجبون الرؤيـه ؟

وإذا صدق صدق مصرين أنه يحجب الرؤيـة
ليش الدكتور واللي هو دكتور ويسوي عمليات خطيرة جدا ً يحط شي على عينه
مع أنه في هالحاله المفروض يركز أكثر ( معقول ممكن يمنعون هالشي ؟ ) ..


لول
ماعليكم مني أخربط
قرار وصدر شو بيسووون .. وأنا شلي فـ بوظبي اصلن هههه .. أنا لو الشور شوري أمنع شبابهم يطلعون من لبيوت

اووه قمت اخورها
باي

[كـلـكـلـووش]

بإختـــصــار ..

القرار سيطبق لأيام و بعدين راح يكون قانون ميت و مهمل !

مثل قانون الاحتشام في امارة الشارجه .. طبقوه لأيام و بعدين نسوه ..

مهما يكون فـ الانسان حر في لبسه .. و اذا انا البس غتره و غيري استخدمه بـطريقة خاطئه شو دخلني انا !

[الـيـاه]

^

أنت فنان D=

[العجيبة]

جنون امرآة ..

شكلج ما شفتي هالجملة اللي كتبتها أختي شوق القلوب

على فكـــره اللي مب متنقبات ما بيحســون بمدى تأثير هالقرار.. لانهم بالاساس مب مقتنعين بموضوع النقاب نفسه.. فكيف بيتعاطفون..؟؟!

على أساسها تكلمت عن العاطفة :fa56:

اليـــاه .. كفاية أبوظبي هي العاصمة .. وعـاد شوفي شلـج فيهـا :8:



كلكلووش

القرار سيطبق لأيام و بعدين راح يكون قانون ميت و مهمل !

:fa42: عين الصواب

[الـيـاه]

^

Duuuh ! أعرف أنها العاصمه .. بس so what شو لي في قرارتهم .. حمدالله إني مب هناك
بس اكتشفت إني يلست أعارض على شي مالي خص فيه لول

[تحفه]

بعد تفكير :

صح كلامك .. المفروض ما يعاقبون فئه بكبرها عسب كمن حاله تعدت على القانون !!

[طير الحب]

السلام عليكم...

أحس المسألة مسوية ضجة...وتقريبا كالعادة بتكون مجرد زوبعة بفنجان.

ما أشوف حرج انه المرأة ما تلبس نقاب وهي تسوق لأنه الحين مع المخفي وهالسوالف ما اعتقد بيقدر أي شخص يحدد ملامحهم...وعموما كل النساء مضطرات لخلع النقاب في الحج والعمرة...

وجه نظر لا أكثر.

عموما لجميع المتحاورين...لنكون دائما متاكدين أننا نمثل دولة بنائها رجل(الشيخ زايد رحمه الله) وهي دولة الإمارات العربية المتحدة وجميعنا ننتمي لها.

[صدى جوفي]

السلام عليكم،،

غريب القرار ينبني على مثل هالحالات.. وعسب يتــأكدون من توافق السايقة مع ليسنها يحق لهم يطلبون منها تكشف عن ويههــا بس يعممون خلع النقاب << ما يحق لهم الصراحة ..

وعندي حل وسط >> السيايير اللي يسوقها متنقبــات يحطون استكرات ((متنقبة تقود السيارة))>> نفس مال الـ pets inside :birgits_giggle:

شكراً ع الطرح.. صدى