التربية والتعليم وما ادراك ما التربية ؟

[الارستقراطيه]

بسم الله الرحمن الرحيم

كلماحاولت الكتابه والبدء بها تخونني الكلمات واعجز عن التعبير ، لماذا لا اعلم ،،
هل لاني سأتحدث عن وزارة التربية التي تعتبر من أهم الوزارات في الدولة والتي تقوم بتهيئة الاجيال للانغماس في الوزرات الأخرى ،،
ام لاني احدى العاملات في هذه الوزارة كوني معلمة أعمل في سلك التدريس؟؟

عندما التحقت بهذه المهنه(ولم اكن احلم او اتوقع بان اصبح مدرسة ) توقعت ان تكون كمادة سأدرسها في الجامعة وسأنتهي منها مع موعد تسليم ورقة الامتحان النهائي في نهاية الفصل ،، ولكن ها قد مرت علي ستة أعوام ولازلت معلمة ،، بصراحة أحب وظيفتي ، ولا اتخيل ان اعمل في مكان آخر غير المدرسة وذلك بالرغم من توفر بعض الفرص لي لتغير مكان عملي وبالرغم من تذمري المستمر في بداية كل عام دراسي ((أأأأأف شو ها ردينا للهم والتحضير والدرجات والمديرة والموجهه ووو)) الا اني لازلت اتمسك بمدرستي ،،،
ولكن،،

ما نراه في الميدان التربوي لا يسر لا عدو ولا حبيب ،، سواء من ناحية القرارات المتخبطه وغير المدروسة ، او من ناحية الطالبات ومشاكلهن التي لا تنتهي ،، او من زيادة العام الدراسي بالرغم من انتهائنا من المناهج في نهاية ابريل او بداية مايو ،،

لا اعلم بماذا أبدأ ،،
لنتحدث عن مشاكل الطالبات وما أراه في يومي منذ بداية طابور الصباح وحتى انتهاء المناوبة
تهرب بعض الطالبات عند سماع جرس الطابور ويختبئن في الحمامات اعزكم الله او وراء باب الفصل ،وقد اكتشفنا شلة تخرج عند الباب الخارجي بالقرب من الصالة الرياضية ،، لا اعلم ما هو الشيء غير الجميل في الطابور ،، ان اكثر ما يعجبني هو تحية العلم في الطابور ،، احس باحساس غريب وانا انشد النشيد مع الطالبات ((في سري )) اللواتي يحركن شفاههن او يسكتن ولا يرددن تحية العلم في اغلب الاحيان ،، لماذا لا اعلم ايضاً

ولنأتي الآن لموضوع تسرب الطالبات من الحصص الدراسية ،،طيب يا عزيزتي اذا لم ترغبي بحضور هذه الحصة وتلك المادة فلم الحضور للمدرسة ،، ولن اخفيكم قولاً باننا نجد بعض الطالبات في الحمامات ولكم ان تتخيلوا بأي وضعية يكن !! ((الله يستر علينا ))

أما موضوع البويات فحدث ولا حرج ،،فقد انتشرت هذه الظاهرة بشكل فظيييع ،، ترا الواحدة منهن وقد خشنت صوتها ورفعت اكمام قيصها ومشت مشية غريبة وتعطرت بعطر رجالي ،، وعملت لها شلة ((شلة البويات)) ويحاولن الايقاع واصطياد الطالبات من مبدأ الاعجاب والحب المنتشر في المدراس ..

وعن المستوى الدراسي فحدث ولا حرج ، بعض الطالبات يقلن باننا نأتي الى المدرسة لرؤية زميلاتنا فقط ، اما عن الدراسة فلا تسألوني عن شيء،، والذي يقهر بأن الطالبة تنجح في نهاية الفصل ، كيف ؟؟

هنا سأتحدث عن أهل الرؤوية الخرافيه واللذين يرجعون اي كشف فيه درجة 45 الى 49 ويطلبون منا ان نرفع هذه وننجح تلك بما يعرف باسم ((ناجح جوازاً)) ،سمعت مره بان احدى الطالبات تقول ولماذا ندرس نحن لا نحل ولا ندرس وفي الآخر ننجح!!

اما الادارات التربوية والتي تجلس على كرسيها وتصدر لنا قرارات فماذا عساي ان أقول ،، فتخيلوا معي مدرسة تغيب عنها المديرة والوكيلة لمدة ثلاثة أيام في الأسبوع بهدف حضور دورة في اللغة الانجليزية منذ اكتوبروحتى يونيو (من 10 لين 6) في الفصل الاول كان يومين وفي هذا الفصل ثلاثة أيام وفي بعض المدراس والتي لتم تحضر الوكيلة والمديرة منذ بداية الدورة فستكون مدتها اربعة ايام في الأسبوع !!

تخيلو معي مدرسة بدون مديرة او وكيلة للمدة التي ذكرتها ، ما هذه القرارات الغريبة وغير المدروسة من قبل المنطقة التعليمية او الوازرة نفسها ،،

يأتي لنا كتاب رسمي من المنطقة التعليمية او الوزراة باه تم تكليفك بوضوع مجموعة من اسئلة الاختيار من متعدد للاختبارات الوطنية ((والتي لا اعلم ما فائدتها حتى الآن)) ونضع مجموعة من الاسئلة ونبحث للوصول الى الافضل وفي النهاية عندما يتم تقديم الأسئلة لهم يتم نشرها باسمهم هم ((توجيه المادة الفلانية ))
اين ذهب تعبي ،، انها اسئلتي التي وضعتها فكيف تنسب لغيرنا !!

قرروا علينا دورة الرخصة الدولية لقيادة الكمبيوتر ICDL وأخذنها بالرغم من أن العديد من المدراس لا يوجد بها كمبيوترات ،، طبعا هذه الدورة وغيرها من الدورات التي تفرضها على وزارة التربية نأخذها على حسابنا الخاص دون ان تتحمل الوزارة الي كلفة مادية ،، وايضا نأخذها في غير وقت الدوام الرسمي اي ننتهي من الدوام المدرسي ونعود للمنزل وبعدها بساعة اوة ساعتين نخرج مرة أخرى حضور الدورة ،، وعندما نحصل على الشهادة لا نحصل على أي ترقية ،، لماذا لا يتم معاملتنا مثل الدوائر والهيئات لأخرى ،، يأخذون الدورة في وقت الدوام وعندما يحصون على الشهادة يتم تكريمهم وقد يحصلون على ترقية او علاوة ،، ونحن من لم تحصل على هذه الشهادة ستيم نقلها لتخدم في مدارس خارج أبوظبي !!

واللآن جاء دور دورة الانتل ، اخذتها مجموعة من المدرسات كن يعدن من العمل الساعة الثانية والنصف ويذهبن للدورة من الساعة الرابعة وحتى الثامنة مساءً!! هذه المدرسة لها بيت وابناء ترعاهم ، كما تود ان تحضر دروسها وتستعد لليوم الدراسي التالي ، وستحاسب على أي تقصير ينتج عن سهو وسط هذه الدوامة التي لا تنتهي ...

سؤال اوجهه الي سعادة وزير التربية والتعليم ،،
عندما قمت بزيادة العام الدراسي عندنا وقارنته بالعام الدراسي في اليابان وامريكا ، هل ظرونا المناخية تشبه ظروف اليابان او امريكا ، هل عقلية الطالب الياباني هي نفسها او تشبه عقلية الطالب عندنا (( مع احترامي لطلبتنا الاعزاء))،، هل مناهجنا هي نفس مناهجهم او قريبه منها ؟؟
وعلى فكرة فقد تم زيادة العام الدراسي للمعلم فقط وليس للطالب مع العلم بأننا في شهر يوينو لا نجد عمل نقوم به ،،

الحديث يطول وذو شجوون واتمنى ان لا يفهم احد كلامي غلط والله المستعان ،،،

ملاحظة((هذه السنة تم تقرير منهج يختص يتدريس فن اليولة لتدرسيه العام المقبل ،، والله يستر من الي ياي))


سبحانك الله وبحمدك اشهد ان لا اله الا انت ،، استغفرك واتوب اليك

[فركوشه]

موضوع حلو.. وهالموضوع بعد انطرح العام فرادو الشارجه فبرنامج نافذة تربويه لخميس عبدالله..

والصراحه انا ويااج فكل كلمه قلتيها..

يعني المدرس ينش من الصبح ويروح الدواام.. ويبدا صباحه مع حوالي 36 او 37 شخصيه..

من الساعه 8 الين الساعه 2 ونص امجابلهم.. وخصوصا اذا كان جدوله ممزوور..

جربت الصراحه 6 حصص فالكورس اللي طاف..3 حصص ورا بعض وعقب بريك وعقبه بعد 3 حصص..

والله اريولي تمت اتعوري 3 اياام ورا بعض.. حراام جي.. الله يعين المدرس اذا كل يوم جدوله جي..

اللمهم المدرس يحضر.. يشرح.. يربي.. يحضر اوراق الامتحان.. اذا حب يصور اوراق او شي جي من جيبه..

ابسط مثال مدرسة الرشيد اللي صوب مخبز ربيع لبنان صوب النعيميه.. اوراق التصوير من جيب المدرس..

ادري انكم بتقولولي الا هي اوراق تصوير.. كم وكم بيصور المدرس طول السنه.. ليش الاوراق مب متوفره اهناك..

والصراحه ايام المدارس.. ندفع وندفع وندفع وندفع واتخرجنا من 3 سنين والين ما سوو مضلات للمدرسه..!

مدرسه ابو هريره اللي صوب شرطة الحميديه.. من بداية السنه.. المديره محد والوكيله مب راضيه اتداوم..!!! بس ما ادري اذا داومو الحين ولا لا

وفنفس المدرسه.. ماشي مكيفااااااات.. عافانا الله كيف يبون الطالب يركز من دوون مكيف..

وخصوصا اول وثاني وثالث.. يبون رعايه من كل الجوانب.. شو هالاستهتااار..

لي عوده.. ان شا االله

[العجيبة]

وزارة التربية ، مجرد التفكير في حالها أحس بصداع ..!

يعني يزاه الله خير وزير التربية والتعليم ، يبـا يطور كل شي وبأي شيء، بدون ما يحل المشكلات اللي تعاني منها المناطق التعليمية والمدارس اللي تحويها !!

ما أدري كيف بيستوي التطوير والبنية التحتية مهزوزه ومب مستقرة ..!

أنا أقول لو بدا يعالج المشاكل اللي تعاني منها المدارس والمناطق التعليمية كان أفضل بألف مرة من إصدار قرارات متسرعة وغير مدروسة ،خاصة إنها خلتنـا فيران تجـارب نتريـا كل يوم خطوة يديدة وهم يتابعون النتايج اللي تطلع منـا !! والله مهزلة ، أونه استوت لجنة على مستوى الدولة تدرس نتايجنا في الفصل الأول وتشوف إذا نظام الثانوية العامة ينفع أو لا !! ونحن شو الذنب اللي اقترفناه عشان ننحط في موقف بايخ مثل هذا !!

الشيء العجيـب : واللي تتبعه منطقتنـا التعليمية ، إنها تطرش مندوب ، يانـا في أول السنة ، وفي أول يوم في امتحانات المنتصف ، كان يزاه الله خيــر يدخل الصف ، يسلم ، ويتم يطالع ويتأمل ويظهـر بدون ما نسمع صوت !! شو الهدف منه بالضبط ؟ بعد ما أدري !!

السؤال المهم : الدفعــات اللي تخـرجــت قبلنــا .. واللي على قولتهم خذوا نسبهم من الحفظ والتلقين ، ما ظهر منهم المهندس والطبيب والاعلامي والإداري ؟!!!! ولا نحن بنظهـر مهندسين وأطباء بدرجة عباقرة ؟

السؤال الأهم : ليش معلماتنــا اللي انتي منهم ( الأخت الارستقراطية ) ما تتكلمون وما تستغلون الفرص اللي تتيحهـا الوزارة أو المناطق التعليمية واللي تطلب فيها آراءكم ؟ ليش موقفكم دايما يكون ايجابي ؟ ليش كل الورقة اللي تكتبونها أو الاجتماع اللي تحضرونه تظهرون فيه ارتياحكم من كل شي ؟

انزين لو كان العكس ؟ وانكم انتوا تتكلمون وتطالبون وتعترضون .. ليش ما نشوف نتايج أصواتكم ؟


انزين قبــل ما أخلص : ليش ما يعيبكم حال البنات في المدارس ؟
وأصلا هذا هو نتــاج التربية والتعليم اللي طول حياتنـا يقولولنـا الوزارة اسمها تربية ثم تعليم ..
حفظنـا هالكلام ، بس ليش ما يطبقــونه ؟ وليش آخـر شي يبون طالبات مثاليات ؟ وطالبات قمة في الأخلاق ؟
أصلا كيف بيطبقونه وهم مخصصين معلمات ومعلمين وظيفتهم التعليم وبس ! وأي تعليم عاد ؟!


وبعـد شي أخيــر : تعرفين ليش البنات يتمن ساكتات وقت تحية العلم ؟
بكل بساطة .. الحس وطني معدوووم ! :glare:


وعلى فكــرة .. عندنــا بنـيـة وبداية هالفصـل بالتحـديد ياية وهي متعقـدة نفسيــا ، أظن النتيجة وايد أثرت فيهـا ( مب مهم ) بس حالتهـا أبدا ما تسر خاصة وإنها ياية فاجة شعـرها ، ولابسة قميص وردي بدل ما يكون أبيض، وفي حصة الفيزياء قامــت تهذي وتصارخ بكلام مب مفهوم ، وتفر الكتب بطريقة هسترية .. من المسؤول ؟
والحمدلله ، واللهم لا شماتة ..


ع قولتهم .. القلب متروووووسة ..
أنا أعد الأسابيع والأيـــام عشان أفتـك من هم اسمه المدرسة، وعشان أبعد عن وزارة يسمونها التربية والتعليم ، والله لا يعودنـي عليهـا لا مدرسة ولا إدارية .. آمييين يارب ..

[الارستقراطيه]

عزيزتي فركوشه،،
في البداية اشكرك على المرور والتعقيب على الموضوع
وموضوع تصوير الاوراق نقطة منبحر في بعض المدراس ـ تخيلي بانه باحدى المدراس اي شيء يريدون شراءه للمدرسة يتم جمع مبلغ نقدي من المدرسات !! سواء كان الة تصوير او فاكس او حتى هدايا للطالبات(( وقد سمعت بذلك في احدى الاذاعات )) وعن موضوع التصوير فقد مررت انا بهذه التجربه حيث كنا نصور ارواق العمل واوراق الامتحانات مقابل مبلغ ندفعه لادارة بالرغم من توفر السلفة النثرية والسلفة التشغيلية لكل مدرسة ((والمنطقة التعليمية لها خبر بس عمج اصمخ)) كما طلبت مديرة المدرسة من كل معلمة ان تدفع مبلغ 500 درهم لشراء داتا شو !! (التربية تعطيج باليمين وتاخذ بالشمال)

وعن المكيفات والصيانه فحدث ولا حرج ، طواااااااال العطلة الصيفية يغط المقاول ومعه المسؤوولوون في التربية بنوم عميق ، ولا يحلى لهم العمل في المدرسة الا عند بداية الفصل الدراسي ووسط الطالبات ((هندي هنا ، وزلمة مناك ومال المكيف ياي والنجار الصوب الثاني ))
وعن مدرستي فقد تسلمتها التربية في بداية الفصل الدراسي الأول ومن ارقى المراس واحدثها ولكن في بداية الفصل المكيفات لا تعمل ، الحمامات بدون ماء وغيرها ..

سأحكي له قصة حصلت مع امينة المختبر في مدرستنا ،، ذهبت الى منطقة أبوظبي التعليمية لطلب بعض المواد للمختبر ، وفي أثناء انتظارها سمعت هذا الحوار بين معلم كمبيوتر والمسؤل عن توزيع الاجهزة على المدراس :
المعلم : نريد اجهزة كمبيوتر للمدرسة كونكم المسؤلين عن هذا الموضوع
المسؤول: انتظر قليلاً فالكمبيوترات التي نوزعها الآن على المدراس غير صالحة للاستخدام(خربااانه) يوجد دفعة جديده قادمة قد تكون من نصيبكم !!

((طيب اذا هي خربانه ليس توزعونها على المدراس ، عشان باجر تقولون في الجرايد زودنا المدارس بأجهزة الحاسب الآلي ، واطيح في جبد المدرسة وتدخل العهدة ويتوهقوون فيها ))

اشكرج مرة اخرى على المرور :a068:

[الارستقراطيه]

عزيزتي العجيبية
اشكر لك هذا التواصل الجميل ،،

تقولين بان المعلمات يسكتن ويوافقن على ما تأتي به الوزارة ،، ل تعلمين بانه في الاجتماعات يتم توزيع اوراق على الحضور لكتابة المقترحات لتطبيقها وابداء الأراء فيما سبق طرحه خلال الاجتماعات الخرافيه ،، ولكن اين تذهب هذه الاوراق لا أحد يعلم، هل ترى النور ام يكون مصيرها سلة المهملات ؟؟

يوجد عدة غلطات مطبعية في كتاب العلوم للصف السابع وفي كل عام يتم ارسال ورقة من قبل المنطقة وتوجيه العلوم لأبداء ملاحظات على المنهج ، فننوه الى هذا الخطأ المطبعي ، ولكن وبالرغم من مرور عدة أعوام فلا زالت الغلطة في مكانها ، فبماذا تفسرين ذلك (وكنت واحدة من اللواتي ارسلن الملاحظة)


ولماذا لا يتم رؤية نتائج اصواتنا فأنا ارغب مثلك تماماً بمعرفة السبب :m_afaker:

وعن الحس الوطني فبصراحة لا أراه الى في الحفل الذي يقام بمناسبة العيد الوطني حيث ارى الحماس والنشيد الوطني بصوت عال والاعلام والصور والستكيرات ووو (وباقي العام تسحب منهن الجنسية!!)

وعن موضوع الطالبات وليش ما يعيبنا بهن شي فلي عودة(بسير اتعشى وارقد باجر دواام وعندي حصة أولى:a058: )
وشكرا مرة اخرى على التواصل

[زمان أول]

مرحبا اختي الاستقراطيه مشكوره ع الموضوع القيم صدق وزاره التربيه والتعليم حدث ولاحرج
انا صح ما لي خص ولكن عايشت هالمجال ....

والله كل وزير يا يبا يغير شي يعني يقول للعالم انا غيرت الحين فن اليوله شو يخصها بالتعليم بس عشان احم احم ...

الحين لفت نظري يوم تقولين البويات هاي الظاهر طلعت بشكل رهيب وين دور المدرسه ليش ما تفصل الطالبات ترانا نقول التربيه والتعليم وين هاي التربيه صح البيت له دور كبير بس انا الي علي بسويه بفصلهن وبسوي محاضرات فالمدرسه لان الحين المدارس مب نفس قبل يعني ع ايامنا كنا انداوم الحين الشباب يوم تتصله راد البيت يقول خلصنا يعني خراب بخراب ....

ومشكوره ع موضوعج القيم ,.,...

[طير الحب]

السلام عليكم...

تفاعل جميل

ينقل لواحة المدارس والجامعات

[الارستقراطيه]

أستاذي الفاضل البدوي

بخصوص موضوع البويات فقد انتشرت هذه الظاهرة بكثره في المدراس وخاصة مدارس الحلقة الثانية والتعليم الثانوي ، وامتدت لتصل الى الكليات والجامعات ، لا انكر بان للمدرسة دور ولكن ماذا ستفعل بطالبة اتت وهي تقص شعرها قصة تكاد تمحو معها كلمة انوثة من قاموسها ، القصة الى اسفل الاذن ان لك تكن اقصر والعطر الرجالي يفوح منها (وقاصر تربي شنبها) ، اين الام والاب عندما ذهبت ذهبت ابنتهم وقصت شعرها بهذه الطريقة ؟ المدرسة لها دور مكمل لدور البيت ، فان كان اهل البيت غافلين عما تفعله ابنتهم فكيف للمدرسة ان تتصرف ،، وهناك بعض الاهالي ممن لا يتقبلون بان نتكلم عن بناتهم ، وفي نظرهم بان ابنتهم صح ونحن خطأ ، والمصيبة عندما تتكلم وتصرح بذلك امام ابنتها ، فكيف ستلتزم مثل هذه الطالبة اذا عرفت بان امها وراءها ، تخيل بان وليةامر احدى الطالبات جاءت منذ الصباح وقبل الطابور ودخلت الادارة وقالت بالحرف الواحد للمديرة ( انا اليوم يايه بس عشان اعطي المدرسة الفلانية طراق !!)
الاحترام والاخلاق والتربية الصالحة في البداية تأتي من المنزل ثم المنزل ثم المنزل .
وعن المحاضرات والدروس الارشادية فالعديد من المدراس تستضيف التربويين والمختصين بهذه الامور ولكن كمن ينفخ في جربة مقطوعة..
اشكر لك التواصل واسعدني مرورك

[فركوشه]

على طاري البويات..

اليوم عالساعه 10 وربع.. سرنا الكافتيريا عشان نتريق.. وكانت زحمممه..

اللمهم سرنا وقعدنا صوب ماكينة القهوه.. وياريتنا ما قعدنا..

قعدنا.. ولما قعدنا انا شفت بنتين قاعدات عالطاوله.. وانا اكل ..سمعت كلام غريب عجيب..

جان اقول حق ربيعتي اللي جدامي.. اتجوفهم شو يسوون.. على اساس اني ماعطتنهم ظهري..

اتخيلوا قالتلي انه في وحده بويه ويا بنوته.. لاصقات فبعض..شراات ال.....

ما رمت اكمل اكلي يادوب انش بسرعه..جبدي لااااااااااااااااااااعت من الرمسه اللي سمعتها..

ايييي كل ما اذكر السالفه تلوع جبدي.. اول مره اجوف هالموقف صراحه..

[الارستقراطيه]

فركوووشه ،،

تخيلي انتي سمعتي ،، نحن رأينا بعيننا وفي الحمامات @_@
الله يستر على بناتنا يارب

[زمان أول]

مرحبا باخي الاستقراطيه

الحين لازم الناشئه من سن مبكر اعلمهم هالشي يالسين يعلمونهم اشياء مالها معنى صح البيت ثم البيت لو البيت دامر وخارب ومحد ينشد عن الثاني شو دور المدرسه بفصل الطالبه الي تقص شعرها ... فصل نهائي وبحذر فالاذاعه ... ولا القهر يوم تسير كليه التقنيه الطالب الي يمثل الكليه ويستقبل الطلاب في قسم خدمه الطلاب من الجنس الثالث والصوت ... يباله خيزرانه ارشه لين ما اقول بس وافره في اليعمه ما يشوف الا البقعه طايحه ومحد بيوقف وياه بيصطلب

[الارستقراطيه]

البدوي ،،

قرار الفصل النهائي اعتقد تتخذه الادارات العليا في الوزارة (كقرار فصل احدى الطالبات التي كانت تروج لاشرطة جنسية في احدى المدراس ) ولكن حتى لو فصلت من مدراس الحكومة فستجد المدراس الخاصة فاتحة ذراعيها وتستقبلها بالاحضان ، وبعض المدراس الخاصة ((البعض)) يمكن ان تعتبر قنابل موقوته ..

[زمان أول]

الله يهدي طلابنا وطالباتنا

[فركوشه]

البدوي.. العام لما سوو الموزاييك..

كانوو اموديين بنات الفاونديشن والسي دي.. تقنية الشباب اونه عشان يجوفون الموزاييك اللي امسويينه اهناك..

يقولك يالم واحد من الجنس الثالث يوزع عليهم اكل..!!

ولا وحده رضت تاخذ منه.. اونه يحيس رمسته ويعزمهم..!!

[ولد الشحوح]

اعد الايام يوم يوم متى بتخلص هالسنة وارتاح من هالهم
ابا أسأل الوزير سؤال حبيبي انت حطيت لنا نظام يديد صح وحطيت للدفعة اللي ورانا مناهج يديدة طيب هالنظام والمناهج ما يبالها ايضا انك تغير اسلوب التدريس وانك تغير طريقة الدوام " الجدول" ؟!؟ اذا بتاخذ نظام من برع خذه كامل لا تاخذ جزء وتلعوزنا والله لو تجوفون اللي يصير عندنا والذل اللي عايشين فيه والله وارد احلف بتكرهون شي اسمه دراسة ...؟!؟

[ولد الشحوح]

هالوزارة يبالها تغيير كامل ... واسمحولي اذا كان كلامي وقوي وجارح الوزير اليديد فاشل ؟!؟

[صدى الأحزان]

السلام عليكم

كرهت التدريس واليوم اللي تخصصت فيها مدرسه .... ما يسوى علينا هالشغل والله

[شواق الحلوة]

هيه صدقج والله يا صدى

ذلووووونا التربية
تونا ناجحين بالمقابلة مامدانا فرحنا الا خربوا فرحتنا و طلبوا منا نعيد المقابله

الله كريم

[ولد الشحوح]

كم ينصرف عالتعليم وكم ينصرب عالكرة والنوادي ؟!؟

[الارستقراطيه]

فركوشه،،

في السابق لم نكن نرى ما يعرف باسم البويات ،، وان وجدت فتكون حالات ناااادرة ،، اما الان فكأن الأمر صار عادي بالنسبه للمجاهرين بهذه الظاهرة

((في آخر يوم للقرية العالمية شفت واحد قاص شعره كاريه وحاف حواجبه ولابس بدي مفصص))
بس السؤال الي يطرح نفسه البنات المسترجلات انسميهم بويات ،، هذيل هل ممكن نطلق عليهم لقب جيرلات!!

[الارستقراطيه]

ولد الشحوح ،،

الله يعينكم على هالنظام اليديد ، سمعت الكثير من الشكاوي ،، بس الي عدنا يابوا الفكره وطبقوها بدون اي دراسة ،، وحجتهم بان النظام السابق لم يكن يقيس مستوى الطالب الحقيقي ،،
الله يعينكم مره ثانية وبالتوفيق

[الارستقراطيه]

صدى الاحزان ،،

بس صدقيني تعب لذيذ والله يعينج

[الارستقراطيه]

شواق الحلوه ،،

يقولون الصبر مفتاح الفرج،، والله كريم

[ولد الشحوح]

الارستقراطيه اللي مصبرنا عالنظام قليل من المدرسين الطيبين امثالج اللي يحاولون يساعدونا واللي يزيد قهرنا الاستاذ اللي ما صدق طبقوا النظام لعوزنا ...

[وحي القلم]

الارستقراطيه

مشكوره اختيه على هالموضوع

.
.

بالنسبه لنظام الثانويه

يعني هم يعتبرونه يحدد مستوى الطلاب الصدقي ..! :eek:

وايدين اللى ياخذون تقارير و بحوث و مشاريع جاهزه من المكتبات و محد يقول لهم شي

أي مستوى هذا اللى بيحددونه جذيه :d014: ..!

" نحنى نتعب و آخر شي يساوونا باللى حصلوا كل شي جاهز :k_icon28: "

.
.

و لا .. بعد اللى يقهر انه عندهم عذر لكل شي .. و ياليتها أعذار مقنعه :surrender:

يوم اشتكوا الطلاب على نظام الثانويه كان ردهم فالوزارة أنه المدرسين هم اللى قايلين للطلاب يقولون هالكلام

و عقبها بمدة اشتكن البنات فكان ردهم أنه البنات أصلا جذيه وايد يتشكن

و ما سدتهم الظرابه اللى استوت فاجتماع المدرسين و الموجهين و المسؤولين فالوزاره

كملوا فنفس الطريج اللى ماشين عليه

هم الصح و الباقين كلهم غلطانين :d014: :d014: :d014:

:pullhair:

.
.

و ما شا الله بيدخلون اليوله بعد :woot:

الحينه شو يخص اليوله فالتعليم !!

و بعدين مب هم يقولون انه السنة الدراسيه قصيره و ما تكفي المواد ..!

شو هالتناقظ ...!!!

خلهم يعلمون الطلاب شي ينفعهم دام انه عندهم وقت زايد

.
.

متى بيطوف هالكورس :7:

:bye2:

[حلم الطفوله]

السلام عليكم

والله ما أدري من المظلوم؟ :surrender:

نحن إلي عايشين الواقع والقرارات ! وإلا الطالبات إلي بالفعل متشتتين بالسالفه؟

وإلا القرارات الفجائية بمصير الأجيال ...

لما أحط السالفه براسي ...أقول مناهجنا الجديمه على الرغم من دسومة الحفظ فيها ! بس خلفت عباقره
والمدرسات إلي كانن يالسات على الكراسي ويعقدن فينا أيام أجازة نصف العام بنسخ لكتاب طول الإجازه ...إلا إنهن صدق علمنا إنه التلقين كان أولى بذور الفهم السليم ( حلم آينشتاين):tounge:
بس الحين أغلب المواد تعتمد على الفهم ! لكن دورولنا على طلاب لهم بارض يفهمون أشياء ما تنفهم أصلا!
.الله المستعان

صديقتي وحي القلم .... الحين من بيعلمهم اليوله في المدارس؟ أحيد مدرسين الرياضه وافدين؟

هل كيف بيعلمونهم وبيناقزون وبييولون:11: .....الله أعلم ! :a033:

بس أحس القرار حلو ....عالأقل تراثنا ما بيضيع ! :1:

[وحي القلم]

صديقتي :k_smartass:

الله يعلم.. توقعي كل شي يا حلم

أي تراث بالله عليج دام انه كلهم وافدين

و بعدين الميدان مب مقصر

" و لو انه تراث محرف شوي :fa46: "

.
.

المهم.. أنا وياج فانه أسلوب التعليم قبل كان أحسن

و الدليل هالبويات الى ما ظهرن الا الحينه

لو كان عندهم شي يشغلهم .. مستحيل ايفكرون فهالأشيا

و بعدين ليش حذفت الوزاره مادة التربية الأسريه ؟!!! :a058:

هالماده من أهم المواد للبنات

أكيد انه حذف هالماده له دور بعد فتكاثر البويات :fa44:

و حتى الشباب ما كان عندهم التجنيد ؟ أظني جيه ايسمونه :fa46: مب متأكده

.
.

ليش هالمواد المهمه اللى تأثير فشخصية الطالب تنحذف ؟!!

..

[حلم الطفوله]

مباركيشن ....دوامنا بيبدأ بتاريخ 19-8-2007؟؟؟؟

والله حاله !

[قلوب دبي]

الله ايكون في عون كل المدرسين والطلاب .. :)

[الارستقراطيه]

ولد الشحوح ،، تسلم اخويه وما عليك زود

وحي القلم ،،

تدرين لو بتحصلين التسمية المناسبة لوزارةالتربية فاعتقد بيكون وزارة القرارت المتخبطة، ما عمرها طلعت قرار الا وبعد كم يوم غيرته ،،
عندج مثلاً في منطقة بوظبي التعليمة الوزارة تقول لج شي واتي المنطقة التعليمية تقول شي ثاني ، ونحن ما نعرف نسمع منو ،،
اليوم مثلا وصل المدرسة عندنا اربع فاكسات عن نفس الموضوع ، وولا واحد منهم فيه نفس الكلام عن الثاني ، يعني مره يقولون شي ملتقى المشاريع العلمية الممية ، وفي الثاني يقولون ان عرض المشاريع بتاريخ 4/مارس والروفه بتاريخ 26 مارس :crazy: ، وبعد نص ساعة وصل واحد ثاني يقول انه الملتقى تأجل ، وقبلنهاية الدوام اتصل واحد من الموجهين يأكد على الموعد ردينا عليه بان الملتقى تأجل قال ما عندي خبر !!

وبخصوص نظام الثانوية العاة اليديد الكل متفق انه نظاااام فااشل الا فطاحلة التربية الي قاعدين على كرسيهم العاجي وما يحبون يطلعون عمرهم غلطانين والضحية الطلالالالالاب
الله المستعان واشكرج عزيزتي على التواصل :thumbup1:

[الارستقراطيه]

حلم الطفوله ،،

تقدرين تقولين الظلم واقع على الاثنين ،، ومثل ما قلتي والله العظيم انه التعليم قبل كان احسن مليون مره ،،

خذي عندج طلبات الموجهين الي يطالبون بتنوع الوسائل التعليمية في الحصة وما يعجبهم شي ، الحين داتا شو ، بروجكتر، مجسمات ،شفافيات وووو ويالله يالله حد يسوي لج سالفه ((الله يرحم ايام الطباشير واللوح الاسود))

وبخصوص الدوام سمعت انه الوزراة عندها توجه جديد تخلي العام الدراسي يبدأ 3/8 !!
هم من قبل يحنون انه العام الدراسي عدنا قصير ،، ويوم الله قدرهم زادوه على المدرسين وخلوه للطلاب مثل ما هو ، اذا نحن لين آخر اربعة مخلصين المنهج والبنات ما عندهم بارض لا حق مراجعه ولا شي ليش اطول العام الدراسي ؟!؟!
والله محد بيحس في الي يصير في التربيه الي الي قاعد يذوق مرها والله المستعان
اشكرج على التواصل

[ولد الشحوح]

وزارة فاشلة بكل قراراتها ...
سمعتوا القرار اليديد اونه يقدر الوافد يصير مدير و وكيل نحن وهم مدرسين مب سالمين منهم بعد يصيرون مدرسين ....
ولا المدراء وحليلهم يدرسونهم توفل ... التوفل شباب ما يابوه كيف تبا من اللي اعمارهم 35 وفوق ييبونه .... يا عمي وظفوا مواطني الإمارات ...
لو انطلع فضايحهم ما بنخلص .... خلاصة الموضوع الوازرة يبالها تنظيف وتعقيم من اللي ماسكين المناصب من الوزير لين اللي قبل الفراش مساكين الفراشيين مالهم ذنب هخهخه

[الارستقراطيه]

ولد الشحوح ،،

يقول لك عشان تقدر تصير وكيل مدرسة او مدير لازم يكون عندك ثلاث شهادات
((توفل ومعدلها 500 وفوق+ انتل+ ICDL))
مع خبرة لا تقل عن ثلاث سنوات وتقديرك فيها امتياز،،

اراهنك لو انه بعض قيادي التربية ما يعرفون الماوس من الكيبورد

[ولد الشحوح]

ما يحتاي تراهنين انا متأكد ...
المفروض هالشهادات تطلب من المدراء الجدد او اللي بيتعينون والمفروض تكون اعمارهم شويه صغيرة لان الحياة المدرسية الحين تتطلب حماس الشباب وافكارهم والمدراء الحاليين جزاهم الله خير ما قصروا بس اغلبيتهم خلاص ما يصلحون حق توفل وغيره ... ما اعمم

[وحي القلم]

حليلهم المدرسين و الله .. محد يتعب كثرهم

و بعد مب محصلين حد يقدر تعبهم

لازم يكرفون 20 سنه و عقبها يتقاعدون :fa54:

هذا من غير انهم ما يترقون الا عقب سبعين سنه :fa55:

.
.

أنا أول مره أسمع عن هالقرار


سمعتوا القرار اليديد اونه يقدر الوافد يصير مدير و وكيل

:mad:

و عقب يقولون ما عندنا شواغر.. مب المواطنين أولى عن الغرب ؟!

.
.

[ولد الشحوح]

هيه هالقرار قراه ووقع عليه مدرس عندنا ...

[الارستقراطيه]

وحي القلم ،،
واذاترقيتي شو بتصيرين وكيلة مدرسة ولامديرة ،ن والوكيله شغل المدرسة كله فوق راسها ((اذا الترقيه بتكون مع حوافز اوكيه يعني زياده في الراتب او بدل السكن او غيره ، لكن في التربية الي يزيد هو الشغل كخخخخخ))

[الارستقراطيه]

ولد الشحوح ،،
انا بعد وقعت عليه ،،لا ويقولك اذا تبا تصير وكيل وما عندك شهادة التوفل وقع تعهد انك لازم تاخذها في نهاية الفصل الدراسي القادم الي 2007/2008 واذا ما يبتها في هالفترة فالوزارة لها كامل الحق في انها ترجعك مدرس مره ثانية !! ((مصخررررررررره))

[ولد الشحوح]

زكرت يعني بداوم سنة كاملة وكيل عقب بيرجعوني مدرس زكرت اللي بيسويها بس يجرب يغير جو مدة سنة وحدة هخهخهخه ... جربيها إختي ...( وزارة مصخرة ) مع احترامي لبعض مدرسيها وكامل الفراشين

[الارستقراطيه]

ولد الشحوووح ،،
تخيل اصير وكيلة وبعدين ما اخذ الشهادة وارجع مدرسة ،، يا شمااااتة بعض المدرسات فيه ((هالحركة زينه للتشمت هيهيهيه))

[ولد الشحوح]

لا انا عيبتني الفكرة بداوم كوكيل وما باخذ الشهادة والسنة الياية برد مدرس غيرت جو لمدة سنة واذا عيبتني وظيفة الوكيل باخذ الشهادة هخهخه

[هدووء الليل]

:sad: :d010: :fa43:
الغالية
موضوع يدمي القلب لمن عاشه فقط .. واسمحولي اللي يتعاطفون معانا شو ماصار محد يحس بالشي الا اللي مربه.. الفئة الثانيه اللي تقول ... المعلمات مرتااااحااااات :birgits_giggle:
بقولكم سبل الراحة وكل ما يحصل بالمدارس :blush:

طرحتي موضوع لو أيلس أرمس عنه من الحين والله وبدون مبالغة للموت
ما بفضفض باللي فيني

>>>>>>>>>>>> الاخت معلمة شراتج

لي عودة بالموضوع

خليني ازهب كل اللي عندي ... ومقولتي المشهورة

أنقش عالحجر بس..... هذي الرمسة فضفضة لكن دون جدوى وسأثبت لكم هذا عند عودتي ومناقشة الموضوع
ولي لقاء معكم هنااا
أختكم
هدووء الليل

[أمطار]

بدينا فصل يديد ..
وكنت أقول للمديرة في أيام الصيفي "خلـّونا نرتــّب وانييب النواقص" ..
بس واللــه ما زاد شغلنا عن "الأوراق المطلوبة" هذا غير عن أن التربية ما تصرف الميزانية إلا بعد بداية الفصل الدراسي بأسبوع وزود ..
والصيفي كان بس للتباهي بين المدارس ،، حتى البنات قالوا لي انهم ما طلعوا بـ شي مفييد ..!
ولا حتــى هدايا .. الهدايا كلها راحت لـ بنات المدربات "الوافدات" كل وحده تعطي بنتها فوق الـ 3 جوايز!
والإدارة كل يوم توصلها 3 أو 4 استبيانات غير شكل.. على نهاية الصيفي تعالوا شوفوا ملفات الأستبيانات اللي طلبوا منا نمليـّهااا ، ويا ريت منها فايدة ...
^
^
ما علينا من الصيفي ..

خلوناا في الفصل الدراسي اليديد ..
لـــيــــن الحينـــة .. ما جهزوا غرفة الحاسب الآلي بالتجهيزات المطلوبة مع إني اناطح فيهم من العااام
وعذرهم .. البجت ما تكفي!
ليــــــن الحيـــنة .. وأنا كـ معلمة مادة الحاسب الآلي .. ما استلمت خطة التدريس ولا كتاب أو سي دي أو أي شي أقدر أقول عنه "منهج دراسي" .. والعجيب في السالفة أنه التوجيه لـ مدارسنا "ماخذين إجازة" ...!

المعلمات المتعينات .. ما يعرفون اريولهم من راسهم .. مب منهم .. بس لأن المناهج يديدة بالكااامل ..
والمعلمات من متى يسألون عن "التدريب الوظيفي" ولين الحينه ما عنه خبر!!!!

بالله عليـــكم .. الحينه اذا أنا كـ معلمه ما حضرت دورات تدريبية .. والتوجيه "نايم على ودانه" .. ولا عندي منهج ولا عندي خطة تدريس... شو اسوي بحصتي؟؟
البنات يبون يعرفون "ليش ما عطونا لا كتاب ولا سي دي للمادة؟! ليش الكمبيوترات ما نقدر نستخدمها الحينه؟!" .. شو أجاوبهم؟؟؟!!

أقولهم الغلط مني كـ معلمه؟! الغلط من الإدارة لأنهن مسؤولات عن تجهيز المدرسة؟! ولا الغلط من التربية اللي ما عطونا الميزانية الا قبل شوي وامطرشين لنا أجهزة وأدوات ناقصة نحن نكمّل ونرقــّع من بعدهم؟! ولا توجيه الآي تي .. اللي لين الحينه حتى هم مش عارفين شو يقولون لنا واللي ماخذ منهم إجازات ولا على باله أن الفصل الدراسي بدا "وعلى فكرة هذا أقصـــر فصل دراسي بيكون في العالم كلـــه، والسبب أن الإدارات الأجنبية المسيحية يبون يحتفلون بـ (الكرسمس) في وقته"؟!؟

بس في النهاية .. كـ معلمه حبيت وظيفتي ..
لأني أتعامل ويا طالبات مدرسة ح1 .. وبرائتهم تنسي المهموم همـّـه ..
ويكفــيني في نهاية الدوام أو بداية فصل دراسي... إن طالباتي يستقبلوني بحرارة وقولولي " نحب مادتج يا مس ، متى بتكون حصتنا؟!" ..

^_^

[حلم الطفوله]

بس في النهاية .. كـ معلمه حبيت وظيفتي ..
لأني أتعامل ويا طالبات مدرسة ح1 .. وبرائتهم تنسي المهموم همـّـه ..
ويكفــيني في نهاية الدوام أو بداية فصل دراسي... إن طالباتي يستقبلوني بحرارة وقولولي " نحب مادتج يا مس ، متى بتكون حصتنا؟!" ..

أمطار الخير :a070:

هالجمله إلي كتبتيها هيه الوحيده إلي تنسينا حرارة الغيظ وغبار المدارس وزيادة الحصص

الحمد لله على كل حال ....والله يسهل الأمور علينا :14:

[حصان طروادة]

الله يعينكم أنتو المدرسين

بصراحة يتني فكرة الإلحتاق بالكادر التدريسي ، رحت وقدمت أوراقي على نهاية شهر 6 من هذي السنة ، وبعد أسبوع تمت مقابلتي ووافقوا علي في نفس الوقت بسبب نقص الكادر .

وبعد أسبوعين بالضبط وقفت جميع أوراق التسجيل والإعتماد عندهم لأسباب كثيرة .

يمكن إحدى الأسباب ضعف رواتب المعلمين وانعدام المميزات الخاصة .

بعد أربع سنوات من الجهد والتعب تعدى راتبي والحمدلله سقف ال15000 ، مع تذاكر السفر ، والتأمين الصحي ، والرسوم الدراسية 30000، والبونوز السنوي 15000.

تخيلوا لما وافقوا علي في منطقة دبي التعليمية ، قالوا لي راتبك بيكون 10500 !!!

قلت لهم وبعد !!! :m_afaker: يحليلي انصدمت .

قالوا بس شو تبا بعد !!! اقبل وانتظر لين ننظم تحت مجلس دبي التنفيذي !!!

المدرس يتعب ويبذل كل اللي عنده لتربية الأجيال ولازالوا يبخلون في الصرف عليه .

لو قارنا أنفسنا بالدول الغربية والله بنرأف لحالتنا ، المدرس عندهم له السلطة الكاملة ، وهذا غير الراتب والمزايا اللي يحصلها .

للأسف كلياتنا وجامعاتنا يستقطبون الأجانب ويعطونهم كل اللي يبونه ، من راتب يتعدى ال20000 ، والتذاكر والتأمين والسكن والبدلات الثانية . بس اللي ناقصنهم يدفعون لهم فواتير الكهربا والماي ويعطونهم أكل .

الله يعين والله .

[حلم الطفوله]

حصان طرواده

مهنة التعليم من أحلى وأمتع وأرقى المهن بنظري بس المميزات إلي فيها يبالها إعادة نظر

1- الإجازات ....من فتره شفت لقاء بسما دبي وكانوا ملتقين بشخص ...المهم كان يتكلم بذيج اللحظه عن الإجازات التعليميه ....تخيل السعوديه إجازتهم 90 يوم والدول الاوربيه تتعدى الـ 100 !

2- الرواتب ما تتناسب مع غلاء الأسعار إلي ضارب ضربته بهالأياااام !
مب مشكله راضين برواتبنا بس لازم الأسعار تكون معقوله شوي !

3- الأنشطه والحصص المبالغ فيها يعني إلي يدرس الـ 24 حصه بالأسبوع يتساوى مع إلي يدرس الـ 10 حصص.

إن شاء الله الوضع يتعدل :)

[حصان طروادة]

حلم الطفولة

ما تتصورين اشكثر أحب التدريس ، صاير مدرس فيزياء ورياضيات في البيت

تدرين كان في يوم من الأيام حلم عندي إني أصير مدرس رياضيات ، لكن سبحان الله ما تخصصت في هذا المجال ، وودي أحقق جزء من حلمي وأصير مدرس .

حاليا في الدوام ألقي محاضرات في مجال تخصصي على الأقل أحسس عمري بمتعة التدريس .

عاد كله بصوب ويوم يكون شخص جدامج ما يفهم شي بصوب .