دروس الاسـطـوري

[الاسطوري]

السلام عليكم ..


بما إن بعض الأعضاء ماعندهم لا شغله ولا مشغله ويالسين في بيوتهم بطاليه ويسهرون
على النت (مثلي) فكرت أشغل وقتهم بدروس خفيفه ومسليه
وفيها معلومات حلوه ويمكن
تكون غريبه على البعض وإذا شفت في تفاعل بكمل ويمكن أسوي إمتحان عليه
درجات في النهاية .. أدري تحبون الدراسة
والإمتحانات وايد
:k_harhar1:


المحاضرة الأولى


"خلفية تاريخية حول الدراما"


أول شي بعرف لكم (الدراما) وهي كلمة مشتقه من الفعل اليوناني (دراو) بمعنى إعمل والدراما طبعا
مثل ماتعرفون نوع من أنواع الفن ولابد أن تتوفر فيها مقومات عشان نقدر
نقول هذي دراما ، وهو فن قائم على تصور الفنان
لقصه تدور حول شخصيات
تتورط في أحداث معينه والقصه تروي عمرها عن طريق السرد أو الحوار المتبادل بين الشخصيات
في شكل كلمات ولازم هالكلمات توحي بأكثر من الحديث بين الأشخاص
يعني يكون في مغزى من الكلام وله علاقه
بالقصه ، وبالكلمات
يرسم الكاتب الدرامي الشخصيات ويوضح الأحداث يعني مثلا لو كانت شخصيه وهميه ممكن
نتخيلها ونرسمها في بالنا ونعرف تاريخها الكامل بدون مانشوفها
أبدا في القصه ولا يكون لها وجود وكذلك
الأحداث لو كان
شي صاير في الماضي وماتطرقت له القصه بأي مشهد وهذا كله يكون بالكلام ،
والأحداث تاخذ شكل حبكة لها هدف وتلتزم بالخلفيه والزمان
والمكان اللي صارت فيه مثل ما
تصوره الكاتب


الملهم وعاشق القلم بسكم سوالف باقي شويه ونخلص أول محاضرة وبعطيكم
بريك تريحون فيه شويه سولفوا فيه قد ماتبون بس
الحين ركزوا وياي
:vertag:


وتشمل الدراما بعد توضيح الأفعال اللي تقوم بها الشخصيات والعلاقات الدرامية بينهم
وغالبا يكون على شكل صراع وهالصراع مايكون بس بين
الأشخاص بل يمتد إلى علاقاتهم
بالقوى المختلفة المحطية فيهم ومن أبرز الشخصيات في الدراما (أرسطو) أبو
الفلسفة وأبو الدراما وأول من وضع أسسها ويعد من
الرواد الأوائل في نقد وتحليل
الدراما


هني تكون أول محاضرة إنتهت واللي عنده أي سؤال يتفضل لايستحي وأتمنى إنكم تكونون إستفدتوا
منها شي يديد وحاولت ماثقل عليكم من البداية عشان تحبون المادة وتقولون
هالدكتور فنان وتخلون البقية يسجلون عندي هالسمستر
وتراني مارسب حد الكل ينجح
وبمعدلات أوكيه
:a033:


أشوفكم في المحاضرة اليايه
مع السلامه


للحفاظ على الحقوق ترا المعلومات الأساسية ماخذنها من الملزمات اللي كنا ناخذهم
في الجامعة ومابعطيكم أي مرجع عشان ماتروحون عند
غيري وأكون أنا مرجعكم
:icecream:


الاســـطـــوري
أخوكم

[الملهم]

خليتني مشاغب الله هداك .. ^__^

هناك كلمات تمر علينا كثيرا
ولكننا لم نسأل يوما عن معناها ومن أين اتت ..

درس جميل وسلس في نفس الوقت ..
معلومات اول مرة اعرفها .. وطريقة إلقائك في المحاضرة جميلة .. ^_^
ننتظر منك المحاضرة الثانيه .. يالله بسير اخذلي بريك .. ^__^

[الاسطوري]

هــــــــــلا ..

"الملهم"

صح شكلك في الواقع مب مشاغب بس ياخي جرب هالدور في الخيال مب خسران شي وبعدين دام
عاشق يالس صوبك في هالمحاضرة ماأضنك بتفلح أنصحك تغير مكانك
عشان تقدر تركز لأنه 24 ساعه يسولف
وإذا ماحصل حد صوبه يسولف وياه يطرش مسجات ومايخلي حد في حاله أو يلعب سنيك (مال أول
هالإنسان) وأنت كيفك إذا تبى تحرمن عندي مابقول لأ وشكرا على الحضور
وأتمنى تكون متواجد في المحاضرة
الثانيــة
:yes:

لا تنسى ترا البريك بس 10 دقايق مب تتأخر ولا بحطك أبسنت
تراني ماتساهل في هالموضوع
:k_harhar1:

الاســـطـــوري
أخوكم

[شوق القلوب]

السلام عليكم...


موضوع حلو و فكره أحلى د. الاسطوري..

اسمحلنا داخلين انوايج.. احيد هالقاعه دووومها فاضيه.. بس الاكيد انا بنكون من الحضور ان شاء الله .. ^_^

..

[مايهزك ريح]

ما شاء الله عليك .. استمتعنا بهالمحاضره .. ونتريا محاضراتك اليايه .. :thumbup1:
على الأقل ..تعلمت معلومه يديده .. وانا ما عندي شغل ومتملل في الدوام .. يالس احوط في الواحات :14:

[الاسطوري]

هــــــــــلا ..

"شوق القلوب"

مسموحه إختي وأنا بسجل إسمج ويانا وأتمنى تستمتعين بالمعلومات في هالمساق
الطريف الخفيف ولاتنسين يوم بتشوفيني في أي مكان ازقريني
د.الاسطوري >> عيبته السالفه
:14:

"مايهزك ريح"

ان شاء الله المحاضرات اليايه تكون أحلى وماتتملل بعد اليوم
وإحتمال أكاديميـة الاسطـوري تنزل
السوق قريب
:icecream:

الاســـطـــوري
أخوكم

[جيز كيك سنيكرز]

عليكم السلام والرحمه.....


احلى فضفضه هــــذي ^ـــ^


عندي سؤال شو يعني حبكة ؟؟؟؟

وفي انتظار المحاضره الثانيه


من شفت العنوان :surrender: ....يالله بلاه الاسطوري والعنوان دروس الاسطوري اسميه هذا الانسان شايف بلاوي الدنيا وياي يعلمنا كيف نتعامل وياهاالله يعينه

:fa46:


السموحه

[الدلووووعة]

هاي سير ^_^( ذكرتني فيهم )

تسلم اخويه الاسطوري عالموضوع
وان شاءالله بنكمل وياكم اذا بقينا متواجدين فالوحات ^_^

انزين البريك بس 10 دقايق شوي ( اهم شي عدها البريك هههه)

[الاسطوري]

هــــــــــلا ..

"جيز كيك سنيكزر"

لا هاي مب فضفضه بس ماعرفت وين أحطها ونزلتها هني وعقب حسيت إن مكانها الأنسب
واحة الجامعات والمدارس وقلت لـ عقب يصير خير وبينقلونه
المراقبين مايقصرون
:yes:

بخصوص سؤالك تراك مستعيل على رزقك شويه وأنا بوصل للحبكة في المحاضرات اليايه
وبشرحها بالتفصيل وبذكر أنواعها وجيه بس حاليا بجاوبك بشكل
عام عشان تفهم الفكرة وعقب ماتابعنا
بتعرف التفاصيل

الحبكة طولي بعمرك هي فن ترتيب الحوادث وسردها وتطويرها بحسب منطق الحياة
وتحمل المعنى الاساسي والهدف الرئيسي للقصة وتمثل
عملية نمو وتطور الاحداث
وتفاعلها بين العناصر السابقة كلها وتقدر تقول هي العمود الفقري للموضوع
كله وبدونه ماشي قصة أو خلنا نقول بتكون القصة
مالها مغزى أو هدف
معين

إذا حسيت بشوية غموض حاليا عادي طوف لأنك بالتسلسل في
شرح الدروس بتتوضح لك الرؤية
:yes:

الاســـطـــوري
أخوكم

[الاسطوري]

هــــــــــلا ..

"الدلووووعة"

نورتي الكلاس بس تعالي وين سايرة لا يكون ناوية تاخذين المساق
عند حد ثاني ترا بزعل منج وإذا البريك شويه
بزيده لـ ربع ساعة
:yes:

الاســـطـــوري
أخوكم

[بوزايد]

تسلمـــ دكتور

متابعينـــــ

[بنت الدلع]

وعليكم السلام والرحمه

تسلم استاذ على هذي المحاضره
استمتعنا فيها ^_^

[جيز كيك سنيكرز]

علقت عند هذي الجمله




والأحداث تاخذ شكل حبكة لها هدف وتلتزم بالخلفيه والزمان



وتميت اسير وارد عليها واقول يمكن معنها القصه اوكي ليش كتب حبكه ماكتب قصه

ويوم نزلت تحت شفت



واللي عنده أي سؤال يتفضل



جان استانس :fa46:

والحمد لله فهمت :14:

وشكراً ^ـــ^

متابعينك ان شاء الله

السموحه

[الملياردير]

احم احم

والله الصراحه محاظره جيده نوعا ما يا دكتور الاسطوري و انشالله نحظر معاك باقي المحاظرات

طالب يدرس عندك (الملياردير)

[الاسطوري]

هــــــــــلا ..


"بوزايد"


ماتقصر بو زايد ونباك تحضر دايما عشان
ترفع معدلك شويه
:thumbup1:


"بنت الدلع"


شكرا لج اختي وأتمنى تكملين ترا المساق
سهل وايد ومسلي بعد
:a033:


"جيز كيك سنيكرز"


شوف القصه هي عنصر من عناصر الحبكة ومابزيد أكثر عشان
ماتضيع في هالأمور خل التسلسل يوضح لك
أحسن وحياك اخوي
:yes:

"الملياردير"

حاول تاخذ شرح المحاضرة اللي طافت من الشباب عشان مايفوتك
شي ولاتنسى تتواجد في المحاضرة اليايه
ولا تتأخر


الاســـطـــوري
أخوكم

[بوميثه]

اوووووووووووووو ..

الاسطوري صار دكتور جامعي لحقو عليه ..

ياويلي ويلاااااااااه ..

وينهم ناس احم احم خلهم يجوفون الي اجوفه :k_smile2: ..

ياحيك اخويه ..

بس اخيج عااااااااد انته قلت حق الناس الي ماعندهم شغله (( انا 24 ساعة مجابل الكتب :fa46: ))

داش هالكلاس بس حذه مروور الكرام ..

بس فديتك تسلم لي على هالمعلومات الصغيرونات الكبيرونات بمعناهن :thumbup1: ..

وصدق يباااالي اتتددرم ( هع هاوي دراما ) :k_smile2: ..

وطال عمرك انته طريت ارسطو ..( ونسيتني انا .. الله يسامحك :glare: )

تسلم اخويه على ما طخطخت يمناك الغالي ..

ولا تحرمنا من يديدك وابداعك الرهيب ..

كل احترامي ..



الكــــــــــــــــــــــ ـــــــــــــــــــــل ثابت ( هههههههههه :a033: وينهم العسكرية )

[الاسطوري]

هــــــــــلا ..

السلام عليكم .. شحالكم شخباركم إن شاء الله طيبين .. كيف كان البريك ؟ وكيف حسيتوا المحاضرة
الماضية سهله ولا صعبه وإذا في حد مب فاهم يتفضل يسأل قبل مانبدأ في
المحاضرة الثانية هاااا محد يبى يسأل على العموم
المجال مفتوح في أي وقت
ونسيت أعطيكم توصيف المساق وبتحصلون على البلاك بورد موجود واللي عنده مشكله في اليوزر أو
الباسوورد يراجع قسم الإرشاد وبيساعدونه والساعات المكتبية بتكون يوم
الأحد والثلاثا من الساعة 2 الظهر للساعه
4 في الرسايل
الخاصة وللحالات الضرورية هذا رقمي 9999999 واللي بيطرش مسج أتمنى يكتب اسمه واسم
المساق عشان اعرفه واللي عنده اي استفسار يأجله لنهاية المحاضرة
لأن وايد تأخرنا والمحاضرة هاي
دسمه شويه

المحاضرة الثانية

"نشأة الدراما"

اختلفوا المؤرخين حول هذا الموضوع وتعددت الآراء ولكن معظمهم قالوا إن نشاة الدراما لها علاقة
وثيقة بعبادة الاله (دينيسيوس) لأن المسرحيات ماإنعرضت إلا في أعياد هالاله
كـ طقس من طقوس عبادته وكانوا طبعا يعرضون
كل من التراجيديا والكوميديا
ويرجع أصل التراجيديا إلى (الاثرامبوس) وهو عبارة عن نوع من الرقصات الغنائية تقوم بها
الجوقة أي (ممثلين بزي معين) بمصاحبة الناي وهذا مثل ماقلنا يكون في
مهرجانات وأعياد الاله دينيسوس وكانوا
أفراد الجوقة
يرتدون أثناء تلك الرقصات جلود العنز (تراجوس) ومن هني أطلقوا على أفراد الجوقة إسم
تراجودي أي المغنين العنزيين وأطلق على الأغنية نفسها إسم تراجوديا
أي الأغنية العنزية وهي الأصل في كلمة
تراجيدي ، وطبعا
من أول اللي كتبوا عن التراجيديا هو (ثيبس) اللي يتعبر أبو التراجيديا وكان هذا في القرن
السادس قبل الميلاد وكان مصدر التراجيديا الاساطير اللي تدور حول
الشخصيات القديمة والالهه في التاريخ
اليوناني القديم

شباب وعوا ذنيني أشوفه راقد لا يكون يتحرى عمره في البيت ، دكتور السموحه بس أمس
كنت سهران شويه ، وعلى شو سهران ، دكتور كنت سهران
على منتدى واحات بن دبي عشان
أنزل موضوع عن تجربتي ويه المعاقين ، انزين بس لازم ترتب أولوياتك وماتخلي
شي يأثر على شي قوم روح أغسل ويهك وتعال
عشان تتنشط
:yes:

انزين الحين بندخل في الكوميديا واللي هي عكس التراجيديا ولكن هني الموضوع محوط بالغموض
أكثر من التراجيديا ولكن الأرجح بإن البدايات كانت في الأزمنة القديمة تكون
في حفلات ومهرجانات معروفة بإسم (كوموس)
ويكون على شكل
جماعات مرحة راقصة ويلبسون أردية ساخرة تمثل وحوش او طيور عشان يخفون ملامحهم
وهالاحتفالات تكون تكريما لبعض آلهة الاخصاب وعلى رأسهم دينيسوس
اللي رمسنا عنه في التراجيديا ، وكانت الكوميديا
القديمة أسلوبا للتعبير عن
التهكم والسخرية والهجاء وعقب بدت تناقش بعض المشاكل الخاصة بالناس من خلال طابع المرح
ويعتبر (أرسطو فانز) رائد الكوميديا وأنوه عشان محد يخربط بإن هالشخص
يختلف عن أرسطو اللي رمسنا عنه في
المحاضرة الماضية

هااا كيف للحين متابعين بسلاسه ولا تحسون الكمية وايد ، حلم الطفولة : لا دكتور
الكمية بسيطة كمل كمل مندمجين وباقي وقت على نهاية
المحاضرة ، اوكيه بكمل
:yes:

الحين بندخل في موضوع ثانـي وهو بدايات المسـرح واختلفوا الناس بعد في هالموضوع وظهرت
نظريتين الأولى تقول بإن البدايات ظهرت في الطقوس اللي كانت تحتفل بإنتصار
قوة الحياة على الموت يعني لأنهم عايشيـن
وماماتوا يحتلفون على
أساس إنهم منتصريـن للحين اما النظرية الثانيـة فـ تقول ان النشـأة كانت من خلال الطقـوس اللي
يكرم فيها الموتى لينال الأحياء الأبدية وطبعا مانقدر نجزم ما إذا كانت إحدى
النظريتين صحيحه والثانية لأ ، وبعض المؤرخين
يأكدون ان الدراما كانت موجوده
في مصر في الفترة مابين سنة 4000 إلى سنة 3000 قبل الميلاد واللي أوحى بالشي هذا الرسوم
الفرعونية اللي جرى تفسيرها على إنها تمثل الكهنة وهم يرتدون أقنعة على شكل
حيوانات ويقدمون عروض بالاهرامات وهناك اتفاق على
أن قصة (ابيدوس) مثلت فعلا في
مصر وهي تروي قصة مقتل (اوزوريس) وبتر وتشتيت أعضاء جسمه ولكن للحين ماحصلوا نص
المسرحية وهذا اللي يخلينا نرجح ان بدايات المسرح كانت يونانية وان اللي
صار في مصر ماهو إلا بدايات صغيرة وماخذت
الشكل الفني التكنيكي

هني تكون محاضرتنا اليوم إنتهت وأتمنى تكون المعلومات خفيفه عليكم واللي عنده أي
سؤال أو إستفسار يتفضل وقبل ماأنسى من المحاضرة اليايه أبى كل واحد
يكون عنده كتابه لأني أشوف وايدين لا دفتر ولا كتاب
ولا قلم يعني ولا جنهم طلبة
جامعيين
:k_icon9:

أشوفكم المحاضرة اليايه
مع السلامه

الاســـطـــوري
أخوكم

[بنت الدلع]

استاذ الاسطوري ممكن اتكلم ؟

اكيد ممكن ^^

جيز كيك :
الحبكه هو المكان الي تتأزم فيه الامور
وهو شي اساسي في تغيير احداث القصه
والقصه بدون حبكه مابيمشي حالها ابدا

[بنت الدلع]

المغنين العنزيين

ههههههههههههههههههه
حلوه هذي

يعطيك العافيه استاذ على الشرح الوافر
بس المشكله وااااااااايد اظيع في المثلثات مالك ^_^

[الدلووووعة]

شكرا استاذ عالشرح
باجر برد اراجع على الدرس مره ثانيه ^_^

يله بنات نشو بنسير عدنا بريك ^_^

[الجديدة]

ما شاء الله عليك يا الاسطوري
محاضرات جدا نافعة لاني معظم هالكلمات اعرفها بس ما اعرف اصلها
راح اكون معاك في الكلاس نستفيد منه
خاصة انه فيه اشياء مفيدة جدا

بانتظار بقية المحاضرات
الله يعطيك العافية على هذا الجهد

[الاسطوري]

هــــــــــلا ..

"بوميثه"

حيا الله الطالب المستجد ، مابغيت تسجل عندي ماده وييت والله يابك وياك الموت ياتارك الصلاة لا
سوالف وياك أنا مافرق بين حد وحد والقردنه ماتفيد وياي كل واحد
ومستواه اللي بيحدد درجته مب سوالفه
واسلوبه أو غيره
وعن هالمحاضرة تراها خفيفه تتسلى فيها عقب الدوام مايبالها وايد والبروجكت في النهاية بيكون
سهل ان شاء الله بس انت حاول تلتزم بالحضور تراه اهم شي عندي عشان
مايفوتك الشرح (اللي مادري يقول في
مسآئل وانا مادري)
:k_harhar1:

"بنت الدلع"

خذي راحتج وحلو انه يكون في تعاون بين الطلبه ويساعدون بعض عكس بعض الشطار اللي حتى
شرح كلمه يستخسرونها في ربعهم عشان محد اييب درجه مثلهم
او على منهم ولاتستعيلون
ان شاء الله في المحاضرات اليايه بتكون المعلومات احلى بس اهم شي الواحد يراجع اول بأول
عشان الماده ماتتراكم عليه وعن طريقة كتابتي تعودت
عليها شو اسوي
:d010:

"الدلووووعة"

لا شكر على واجب وانا والمبنى والادارة وكل اللي يشتغلون موجودين هني عشانكم ولولاكم
ماكانا ولا بنكون وعاد لازم تقدرون قيمة الدراسه وتعطونها حقها وانا
لازم اشرح وافهم واعيد عشان يكون
راتبي حلال
:yes:

"الجديدة"

إن شاء الله بشرح لكم أغلب الأشياء اللي تخص الدراما بس طبعا خطوة خطوة لأن الكمية بيتاخذ
وايد محاضرات وهالشي يتطلب متابعه دايما عشان ماتتراكم الكميه مثل ماذكرت
قبل واذا حسيتوا بإن في شي مافهمتوه خبروني وبشرحه
وبوضحه مره ثانيه وشاكر لج
تواجدج الطيب
:yes:

الاســـطـــوري
أخوكم

[خيال الحب]

:m_mar7ba:

الطالب: خيال بن الحب:nerd:

الرقم الجامعي: 2002000000:k_harhar1:

عاش دكتورنا الاسطوري:osama: ..

مشكور دكتور على هذي المحاضره

دكتورر كم رقمك عشان نتصلك:k_harhar1: >>> قردنت اهل العين:k_harhar1:


دكتور تامرنا على شي:k_harhar1: ماتبا شي من الكانتين:k_harhar1:

وبانتظار يديدك ^____^

[خيال الحب]

عيبتني المحاضره الثانــيه..

يعطيك العافيه دكتور:fa42:

دكتور متى الكوز:k_harhar1:

[الاسطوري]

هــــــــــلا ..

"خيال بن الحب"

مادري أحس إنك دارس عندي قبل وحرمنـت ولا ؟ على العموم انا سجلت اسمك وبجيـك على الكشف
الاخير ولازم تكون مسجل عندي واذا الشعبة مغلقه برفع لك السقف وعن
الرقم تراني حاطنه فوق وماعليك امر هات لي
وياك جبن سليس وقوله
يحط دقوس وكابريسن منجا اذا تقدر اوني عاد ماتشـرط ويسعدني ان المحاضرة عيبتـك واتمنى تكمـل
ويانا وعن الكويز تراني بخبركم قبله بفترة وفي النهاية بوهقكم وبخلي كل واحد يختار
فيلم نكون شايفينه ويطلع منه كل الاشياء اللي بشرحها
عقب ولا ترا مابنجحكم
:k_harhar1:

اللي يبى يحضر ترانا بناخذ ألوان الدراما
في المحاضرة اليايه
:yes:

الاســـطـــوري
أخوكم

[خيال الحب]

:fa55: يوم الاحد بناكل جبن سلايس وكابريسن برتقال:fa55: >>>للاسف الشديد:k_harhar1:

ياحيك انته يا دكتور:k_harhar1:

لا دكتورر هذاك اخوي التوام كان عندك:k_harhar1:

وعن الافلام..هيي زين عشان نستفيد عدل من المحاضره..

ونحن بانتظار المحاضره اليديده ^__^

[تنينه]

دكتوووور دكتوووور:surrender: انا عـندي سؤاال صغنوني ممـكن :fa46: بس شوي خارج عن نطاق الدرامـا ممكن :ohboy:

[الاسطوري]

هــــــــــلا ..

"خيال الحب"

الله يعينك محد قالك تدخل هالتخصص جان ييت صوبنا وافتكيت من
الهم والغم وتصوير الاوراق والمذاكره
وحياك دوم

"تنينه"

حياج اختي آمري مايحتاي تاخذين اذن ترانا يالسين نسولف مب وقت
المحاضرة بس لاتدورين سؤال توهقيني فيه
تراني إعلامي صغيرون
:m_m7tar:


الاســـطـــوري
أخوكم

[تنينه]

ههه لا دكتور سؤال ما يـخصه بالإعلام :fa46:

هممم بـغيت اعرف دكـتوور كييف هـاجه تـظهر رمستـك :Oo: على شكل هرم ولا مثلث مجلوب :fa45: كيف جي اتسوو ؛؛ شي خاصيـه يعني ولا كييف :ohboy: مـن أول ما دشيت الواحـه وانا أبى أسألـك بس انسـى لول :fa46:

[الملهم]

فهمت الدرس 70% ..
وان شاء الله باجر بعد بقرا الدرس وبفهمه مرة ثانيه ..
الدرس مشوق وجميل .. شرحك احسن عن اساتذة التاريخ المملين .. ^__^

[الاسطوري]

هــــــــــلا ..



استاذ الاسطوري ممكن اتكلم ؟

اكيد ممكن ^^

جيز كيك :
الحبكه هو المكان الي تتأزم فيه الامور
وهو شي اساسي في تغيير احداث القصه
والقصه بدون حبكه مابيمشي حالها ابدا

اممم احنا فاهمين معنى الحبكة بشكل مب صحيح 100% واللي ذكرتيه هو عنصر
من عناصر الحبكة وإسمه (الأزمة الأخيرة) وهي نقطة في
الرواية اللي يوصل فيها الصراع إلى
أعلى درجاته يعني وقت الذروة والحبكة تتكون من المشهد الإفتتاحي والتعقيدات
والأزمة الأخيرة والحل وكل هالنقاط بشرحها بالتفصيل
بس يوم بوصل عندها
:a108:

"تنينه"

الموضوع سهل وبسيط أكثر مما تصورين وهو إني من دخلت الواحات صادف إني كتبت كم
مره والفقرات طلعت بشكل مشابه وعقب عيبتني السالفه وقمت أتخذ
هالنمط كـ شكل دايم لردود الاسطوري
ولليوم متعلق
فيه مع اني لقيت الاكثريه يستصعبون قراية الكلام بالطريقه هاي وعن كيفية كتابة الردود
جيه فـ هي لا خاصيه ولا شي كل مافي الموضوع إن زر الانتر
اللي كان فترة طويلة مخترب عند
خنفروش ويرص
الكلام رص كنت أنا أستغله بإني أشكل الفقره على الشكل اللي تشوفينه الحين وطبعا
تعودت عليه مثل ماذكرت قبل شويه وماياخذ مني وقت وبس ،،
احم احم انزين الحين دوري أنا بسألج
دامج دخلتي القاعة
مالفت إنتباهج الموضوع أو حبيتي تاخذين فكرة عنه ولا مالج ميول ومب فاضيه حق
هالسوالف ومكتفيه بالمواد اللي عليج ومالج خلق قراية
معلومات ودراسه ومتابعه قولي
ترا عادي ؟
:bye2:

"الملهم"

زين انك فهمت ولو جزء بسيط على الأقل في فايدة من اللي أسويه وإذا تحس في نقطة فيها
غموض قول وبحاول إني أوضحها قد ماأقدر وعن التاريخ لاتقول جيه
عن باجر يطلبوني أدرس في المدارس تراني
ماحب هالمهنة مول
:pullhair:

الاســـطـــوري
أخوكم

[مايهزك ريح]

متابع وياكم ..ومتحمس للمحاضرات اليايه ..
تسلم اخوي الأسطوري ..

[بوميثه]

يالله يالله نترياااااااااااااااا الوان الدراما سيييييير ..

فدييييييتك والله صدقني لا اقردنك ما بتروم علي هههههههههههه ^_^

[تنينه]

ولا مالج ميول ومب فاضيه حق
هالسوالف ومكتفيه بالمواد اللي عليج ومالج خلق قراية
معلومات ودراسه ومتابعه

:fa46:

بـس متااابـعين واذا عـندي اي استفسار ولا سؤال مـا بقصـر :fa46:


وتـسلم ومجهود جميل منك :fa35:

[مزن هتان]

مسا الخير دكتور

بحق المحاضره الأولى مره قصيره بس
ما حس اني فهمت شي :fa46:
بس المحاضره الثانيه كانت عن جد شيقه
واحس استفدت منها

يعني التراجيديا والكوميديا
كانت رقصات للـ الآلهه
ومع تطويرها من اليونانيين دخلو فيها الحبكه؟ :surrender:

يا أعضاء لا تقرون ردي اخاف اخربطكم

يعطيك العافيه د. الاسطوري

[شمعة أمل]

بما أنك تعرف الدراما .. عندي سؤااال .. شو سالفة الداايلمااا؟؟ كنت اتحراا معناته مشكله بس غلط .. ف شو سالفة الديلاماا بالضبط؟؟؟

[أتمنى]

موضوع أكثر من رائع ما شاء الله :)
كفكرة و كطرح و اسلوب
تسلم يا الاسطوري ..
و متابعينك بكل تأكيد ..
:nerd:




وعقب حسيت إن مكانها الأنسب
واحة الجامعات والمدارس وقلت لـ عقب يصير خير وبينقلونه
المراقبين مايقصرون

تامر يا اخوي :smile:

[الاسطوري]

السلام عليكم .. شحالكم اليوم ان شاء الله أحسن من أمس .. الجو متغير شويه
والأمراض تظهر في هالفترة والله يستر أكيد حد منكم
بيعديني بس ماعليه منكم ولا
من الغريب
:14:

نقول بسم الله ونبدأ

المحاضرة الثالثة

"ألوان الدراما"

في البداية لازم تعرفون إن الدراما لها عدة ألوان وأنواع وهم الكوميديا والميلودراما والفارس
والتراجيديا والحين بنبدأ في تفاصيل هالأنواع وفي البداية بناخذ (الكوميديا)
وهي محاكاه لأفعال أناس سيئين لا من كونهم
متصفين برذيلة أو ماشابه
بل من ناحية كونهم مضحكين لأن الضحك نوع من أنواع النقص أو العيب لكنه لا يؤلم ولا يدمر
وطبعا الكوميديا تختلف عن التراجيديا بإن لها نهاية سعيدة وتختلف عن
الفارس (بفتح الفاء وتسكين الراء) في إنها
تتطلب مهارة في الحبكة
وفي تصوير الشخصيات ، وجرى العرف على تقسيم الكوميديا اليونانية القديمة إلى ثلاثة أشكال
وهم الكوميديا القديمة والكوميديا الوسطى والكوميديا الحديثة 1- أما
الكوميديا القديمة فهي أكثر الأشكال قدما
وتتميز بإستعمالها
الكورس والتمثيل الإيمائي والكاتب الوحيد لهذا النوع هو أرسطو فانز الليتضمنت كوميدياته
الغناء الموسيقي وامتاز أسلوبه بالقوة وروح الهجاء العالية 2-
والكوميديا الوسطى وكانت تهتم بمعالجة
المشاكل الإجتماعية
ولكن لم يتم العثور أية نصوص 3- والكوميديا الحديثة قدمها (مناندر) وتناولت موضوعات
محلية شائعة وحبكة أساسها الخديعة ، ولا يوجد في تاريخ
الدراما مايشير إلى أن الكوميديا تهدف
إلى مجرد الإضحاك
فـ الكوميديا تتجه لمخاطبة العقل أما التراجيديا فتتجه لمخاطبة العاطفة واحنا مابنتعمق
شوي أكثر إلا في الكوميديا الحديثة وبنعطيكم أنواعها
حسب الملعومات المتوفرة
عندي

خيال الحب أشوفك يالس تاكل ضوافرك شكلك يوعان وعليه بعدما تخلص
هالمحاضرة بسير اليحر شوف منو من الشباب بيي
وياك ترا الحساب علي ويمدحون
الوجبة الجماعية
:icecream:

الحين بندخل في أنواع الكوميديا الحديثة ولازم تركزون على ان هالأنواع مب قاطعة بل متداخلة
نوعا ما وهم كالتالي : 1- الكوميديا التهكمية : عندما يكون هدف الكاتب
هو السخرية أو الإستهزاء 2- الكوميديا الشخصية :
عندما تكون السخرية
مركزة على شخصيات معينة 3- كوميديا السلوك : أي السخرية من التقاليد الإجتماعية 4-
الكوميديا الإجتماعية : تختص ببناء المجتمع 5- كوميديا الأفكار :
السخرية من بعض الأفكار أو الفكر التلقيدي
6- الكوميديا
الرومانتكية : عندما يكون الهدف التغلب على المتاعب وإنتصار الحب في نهاية سعيدة
7- كوميديا العاطفة : عندما ينحو الكاتب نحو إستغلال المشاكل
الجدية من الناحية العاطفية المحضة دون
أن يطرق فعلا موضوع
العاطفة الحقيقية وأكيد اللي كان مب مركز وياي بيستصعب هالأنواع ومابيفهمها إلا إذا
حد منكم تشطر وياب لي في المحاضرة اليايه بعض الأفلام اللي
تنطبق على هالأنواع وشاكر لكم حسن
إنتباهكم وإلى اللقاء

ملاحظة : زادت نسبة الغياب وإنذارات الـ
5% بتبدأ مجراها
:fa36:

الاســـطـــوري
أخوكم

[العجيبة]

ما شاء الله ..
معلومات جدا قيمة ، وأسلوب جميـل ..



شوف القصه هي عنصر من عناصر الحبكة


ما أدري ليش أحس إن المعلومة اللي مرت علي قبـل تقول : الحبكة هي إحدى عناصر القصة ..!!!
أصدق منو ؟ :fa46:

بخصوص المحاضرة الاخيـرة .. كان ودي أشارك في إني أكتب أفلام كوميديا ..
بس أعتقد إنـي ما أتابع أفلام كوميدية بكثـرة عشان أقدر أصنفهم في الانواع اللي ذكرتها ..

في المحاضرة الثانية .. لعوزتنـي الأسامي اللي في التراجيديــا ..
عيل حد يسمي عمره دينيسيوس ! ههيهيهييي

[ريم العين]

يوم قريت اول محاضرة
حسيت اني بصف ثالث اعدادي ايام القصة الحبكه وكيف حل الحبكة ودري شو

مب احين الله يعين هالفصل ابلتنا مال مصخره هههههههه

خيال الحب تراه حاط فالدرج اكل ما عليك منه يبين لك اونه يكسر الخاطر لايغرك الشكل خخخخ

متابعين لك خيووو
وتسلم عالموضوع الحلو

[أتمنى]

و عليكم السلام و رحمة الملك العلام

ممتع كثيراً يا الاسطوري
في معلومات كثيرة كنت أجهلها ..
الله يعطيك العافيه .. :)

.
.

لكن في شي توقفت عنده و استغربت منه
بس يمكن انا فهمته بطريقه مغايرة عن المقصد ..

كيف يعني ..


وهي محاكاه لأفعال أناس سيئين لا من كونهم متصفين برذيلة أو ماشابه
بل من ناحية كونهم مضحكين لأن الضحك نوع من أنواع النقص أو العيب لكنه لا يؤلم ولا يدمر

:confused: :confused:

[الاسطوري]

هــــــــــلا ..

"مايهزك ريح"

حياك اخوي ولاتغيب وايد عن تفوتك
المحاضرات الأخيرة
:yes:

"بو ميثه"

بنشوف جان قدرت وترا الرسوب لك بالمرصاد
ولاتنسى الحضور مهم وايد
عندي

"تنينه"

ذكرتيني بموقف صار قبل لشخص (الله يستر عليه) عقب الميدتيرم الدكتوره قالت لواحد أنت وينك عنا
طول هالمده وأنا للحين ماسمعت صوتك ولا مره ومابى هالشي يصير عندي
وأسألج عقب الميدتيرم انتي ويانا في الكلاس
مثل بعض الدكاتره

"مزن هتان"

عن المحاضرة الأولى مافيها شي إلا خلفيه بسيطه ومعلومات عامه تقريبا ولاتضيعين حد
اللي قلتيه هو اللي انا شرحته وإذا مب مصدقه أجلي المعلومه
هاي لعقب ومع الشرح بتتوضح لج
أشياء ثانية

"شمعة أمل"

شوفي طولي بعمرج هاي ماخذناها على طول دراستي في هالمجال ومادري إذا لها علاقه بالإعلام
ولا لأ بس حسب معلوماتي البسيطة إن معناها قصة مأساوية أو قصة
تعرفين إن نهايتها مب أوكيه هذا
والله أعلم
:fa36:

"أتمنى"

شكرا على النقل أولا وثانيا هذا من ذوقج اختي وكلامج أحسه فخر لي وعادي باجر أحطه في توقيعي
ومتابعتج تزيد من حماسي للمحاضرات ولاتنسين الأكل ممنوع أثناء الشرح
لأني أشوفج يايبه كيك وعصير وحاطتنهم
على الطاوله
:biggrin:

أما بخصوص سؤالج .. فالضحك نقص للهيبه ومميت القلب ولكن هالكلام مايخصني فيه هذا من
المرجع اللي درسناه وإذا انتي تضمين صوتج للأطباء اللي يقولون الضحك
مفيد للصحه ويبعد الأمراض انا احترم رايج وخليني
محايد في هالمكان أحسن وشكرا
للتواجد ولاتحريمنا
هالتواصل

"العجيبة"

شوفي اختي المشكله في اختلاف المفاهيم لا أكثر ، انتي فاهمه القصه على اساس انها الموضوع
من أوله لآخره يعني مثل القصص اللي خذتوها وانا هالشي أقول عنه
(الفيلم) عشان نكون واضحين من البداية
والقصه اللي انا
تكلمت عنها هي فكرة القصة بس تعودنا نقول عن الفكرة القصة وأظن البعض يشوفون هالشي
غلط يعني مثلا عقب ماتشوفين فيلم يسألونج شو قصة الفيلم ولكن
المقصود بالمصطلح الدقيق شو هي
فكرة الفيلم

"ريم ريم "

حلو انزين أذكرج بأيام أكيد كانت حلوه بالنسبه لج وعن
الأكل تراني توني أشوفه أكيد انتي
حاطتنه أعترفي !

وعقب ما البقية يقرون هالمحاضرة بنزل الرابعة عشان ماتتراكم عليهم
وبتكون تكملة للجزء اللي بدأناه وشكرا لكل
من رد أو دخل
:a070:

الاســـطـــوري
أخوكم

[خيال الحب]

:k_harhar1: لاعت جبدناا من اكل اليحر:k_harhar1: ... حولناا الحين على الروضه:k_harhar1:


محاضـــره حلوووه.. استمتعناا فيهـــا.. بس احسهااا تخربـــط شوي..

انزين سؤال: هالانواع الي شرحتها لنــا.. كلهاا ممــكن تكون كافلام.. او تكون كمسرحيات.. ولا البعض منهم؟لاتضحكون علي:k_blush-anim-cl:

[الاسطوري]

هــــــــــلا ..


"خيال الحب"


عادي تكون جيه أو جيه بس أنا يمكن أميل في الشرح بالتركيز على الأفلام عشان توصل
المعلومه أسرع وماأخربطكم وبعض الافلام الكوميديه اللي
تشوفها او الموجوده حاليا
في السينمات نوعها مذكور وفي نوع ثاني بشرحه لكم عقب (الفارس) وهو شويه غير
عن الانواع هاي وله مثال واضح ومشهور وان شاء الله
بالتسلسل كل شي يكون واضح
:yes:


الاســـطـــوري
أخوكم

[عافك الخاطر]

هلا ..
كشخة الموضوع .. مع انك كاتب حق البطالية .. بس انا وراي عشرين طعش شغلة .. ودخلت وقريت :fa46: > هاي شو يسمونها :Oo:

المهم ...
أنا من عشاااق الدراما..التراجيديا خاصة > غاوية نكد :glare:
..
وعن الكوميديا ..
الكوميديا الرومانتيكية ... أغلب الأفلام الهندية جي .. صح والا :fa46:
والباقي عصرت مخي .. وما طلع شي ...وساعات يطلع بس ما ا1كر اسم الفلم !
...
.
انا اشوف لو آخر شي تعطينا اسامي افلام ونشوفها ... وعقب نتناقش فيها ..
انا شخصياً احب اسوي جي يوم اكون فاضية.. بعد ما اشوف اي فلم .. لازم اسير افصفصه تفصفيص.. خاصة ا1ا كان عايبني وايد ..

...
دكتور ممكن اجاوب الاخت شمعة أمل :redface:
ا1ا قصدج Dilemma فـ هي معناها ان الشخص يكون فـ مشكلة .. وعنده خيارين .. وكلاهما صعب .. فـ هني هو يكون محتارر ... فـ الديلما هي مشكلة اتخلي صاحبها محتار ..
مثال : شخص اكتشف انه عنده (ايدز) .. وهو متزوج ..
فـ هني هو في حالة ديلما.. يا انه ما يخبرها.. وها الشي مب زين و ممكن الاثنين يمرضون ..
او انه يخبرها و تستوي مشاكل و ممكن يفترقون ...
وها على حسب معلوماتي ...

واسمحلنا دكتور..
متابعين ان شاء الله
:14:

[الملهم]

محاضرة موفقة ..

في جملتك : الضحك نوع من أنواع النقص أو العيب لكنه لا يؤلم ولا يدمر ..

تميت افكر في هاي الجملة وكنت بسالك .. بس زين لقيت اتمنى سألت وجوابك كفى ووفى .. ^__^

من المتابعين ان شاء الله .. ( انا كليت في الكلاس وما شفتني :k_harhar1: )

[الاسطوري]

هــــــــــلا ..

"عافك الخاطر"

ماكان قصدي إن اللي وراهم دراسه مايدخلون او يشاركون بس يعني قلت يمكن يستثقلون إنهم يزيدون
معلوماتهم بشي خارج التخصص مثلا واللي مشغولين وايد ووراهم الف
شي ومشين ومتابعين بنقول عنهم دحيحه
او زلمــات
:k_harhar1:

اختي التراجيديا لاتاخذينها بمبدأ إنها للنكد لا خذيها مثل ماقلت قبل إن التراجيديا تخاطب العاطفة مثل
يوم نتعاطف ويه شخصيه مظلومه او غيره والكوميديا تخاطف العقل مثل
يوم تطرح مشاكل بشكل مضحك لأن القصد
إثارة القضية بس
بشكل مسلي ، وعن أنواع الكوميديا في أمثله بس ماتحضرني حاليا وبخبركم عقب عشان
أوضح لكم أكثر وزين يوم انج طلعتي تعرفين الدايلما وفدتي
اختنا وبعتبرج توج ضايفه المساق فـ
ماعليج أي غياب
:thumbup1:

"الملهم"

في أشياء تكون غامضه وأنا ذكرت هالاشياء من البدايه والله يستر من رواد التراجيديا
أتوقع محد بيفهم شي ويمكن اوقف اسبوع بس عشان اوضح
لكم لأن الامور متشابكه وفيها
مقارنات واللي مايركز عدل بيضيع وعن الاكل منو قال اني ماشفتك وتراني
حطيت لك ماينس 5 بالاحمر عند اسمك ومابشلها
إلا إذا شفتك إلتزمت
:fa56:

على العموم اللي ماقرا المحاضرة هاي يحاول يقراها ويه اليايه
لأني اليوم بنزلها وبتكون تكملة عن
ألوان الدراما

الاســـطـــوري
أخوكم

[الاسطوري]

السلام عليكم ..

بما إن الجد بدا وكل حد مشغول بعمره ومب ملحق من كثر التقارير والامتحانات
وغيره قلت بخبركم عشان محد يتعذر بعدما نخلص
من التراجيديا يعني بعد ثلاث
أو أربع محاضرات بعطيكم تيست 1 وبيكون خفيف عن الدروس اللي خذناها
واللي بناخذها واللي مب فاهم شي يسأل من الحين
لا يخلي الماده تتراكم عليه
:a108:

يالله افتحوا كتبكم عشان نبدأ

المحاضرة الرابعة

"ألوان الدراما 2"

(رواد الكوميديا في اليونان)

1- أرسطو فانز
وكان يعتبر عميد الكوميديا القديمة بلا منازع وولد عام 450 ق.م ومن ملاهيه (قصص
كوميديا) استقى المؤرخون معلوماتهم عنه وهو كان متشائم وشكاك
في الطبيعة البشرية وعدو للمرأة وكثير
النقد لها يعني يابنات
لأنه كان عودكم لازم تحفظونه من ايي في الامتحان اسمه تعرفون انه كان ينتقدكم ،
وطبعا كتب مالا يقل عن 40 كوميديا وأول ملاهيه ضيوف هرقل
وانتقد فيها التربية السائدة في عهده
للشباب يعني ياشباب
انتوا بعد حطوا في بالكم انه كان ينتقد الشباب ومافي شي يعيبه مول وظهر في
كل ملاهيه بمظهر الاديب المحافظ الذي يكره الخروج عن
التقاليد أو التنكر للعقائد والعادات
القديمــة
:k_mad_argue:


2- ميناندر
هو من أشهر الكتاب اللي على ايدهم تطورت الملهاه من بعد ارسطو فانز وبدأت تعني
بالضحك أكثر من النقد وولد عام 340 ق.م وكتب أكثر من 100
ملهاة وتميز بقدرته على تصوير
الحالات الاخلاقيه واستطاعته إثارة العواطف والضحك والسخرية ولكن اللي لازم
تعرفونه إن في رواياته إختفى الضحك الصاخب ليتحول
إلى بعض الإبتسامات بس
:yes:

مادري منو اللي علم البنات الرسم ياشوق القلوب أشوفج مندمجه بالرسم وشكلج ترسميني بشكل
كاريكتوري ولا هذا دكتور ثاني يالله ماعليه دام هاي موهبه مابقولج شي
إستمري فيها يمكن في يوم توصلين للعالميه بس
طبعا مب في وقت المحاضرة لو
سمحتي يعني
:k_harhar1:

(الميلودراما)

هاي طلعت في القرون الأخيرة وتعني الدراما الموسيقية وظهرت كـ شكل مسرحي في القرن
التاسع عشر وأوضح معالمها مراعاة العدالة الأخلاقية بدقة شديدة
فهي دائما تكافأ الفضيلة وتعاقب الرذيلة
ومن ملامحها وجود
شخصية ثانويـة لإحداث الأثـر الكوميـدي إما لأنها شخصية بلهـاء أو صريحـة صراحـة غير
مألوفة ويتطور الحدث في الميلودراما ياأعزائي من خلال أفعال
الشرير وتقدرون تقولون ان الميلودراما
هي الأحداث غير المبررة بين
الشخصيه وماتقوم به من أفعال يعني عادي نشوف فاجعه بدون مايكون لها مبرر واضح
وهذا يبين أن جانب الحبكة يكون متغلب على جانب رسم الشخصيات
والميلودراما تهتم بالموقف ولا تهتم بتحليل
سلوك الأشخاص
:m_afaker:

(الفارس)

مب الفارس الملثم لا بفتح الفاء وتسكين الراء مثل ماقلت قبل وهو نوع متطرف من الكوميديا
يثار فيه الضحك على حساب الاحتمالات وعلى الأخص الحركة المبالغ
فيها أو الإشتباك الجسماني والفكرة الأساسية
له هو إستعراض
غباء الانسان عندما يواجه مفارقات بيئية وكان قائما منذ الدراما الكلاسيكية في اليونان
ولو انه لا يوجد تاريخ مكتوب له وهالنوع كان منتشر في فرنسا
في القرن التاسع عشر وتطلق كلمة الفارس
في الاستعمال الحديث
على مسرحية كاملة تتعامل مع موقف سخيف أو غير معقول وطبعا إذا تبون مثال
على هالنوع (مستر بين) وفي ممثلين المتين والضعيف
نسيت اساميهـم هو بعد يدخلـون
تحت نفس النوع
:doh:

وبهذا تكون محاضرتنا اليوم إنتهت على امل اللقاء بكم في المحاضرة اليايه
واتمنى ماكون ثقلت عليكم بالشرح أو بالمعلومات واللي
عنده أي سؤال يتفضل وشاكر لكم
حسن المتابعة
:b015:

الاســـطـــوري
أخوكم

[الملياردير]

اسمحلي يا دكتور الاسطوري عن تغيبي في المحاظره الثانيه و الثالثه بس افا عليك قريتن

و البنسبه للرابعه شوفني توجدت اول واحد

يلا انشالله المحاظرات اليايه دووووم اكون من الاوائل

[الاسطوري]

هــــــــــلا ..

"الملياردير"

شكرا على التواجد في هالمحاضرة بس أنا ماباك تحضر شكليا أباك تستفيد
من الدروس وتربطها بالواقع عشان تلمس الفايدة
ولاتحرمنا هالتواصل
:yes:

الظاهر المعلومات مب واضحه أو جو الملل طغى على الفكرة
وإذا جيه بكتفـي بالقـدر هذا عشـان
ماثقل على حد
:bye2:

الاســـطـــوري
أخوكم

[شوق القلوب]

و جـــــــــــــان يجكــــووونــــي.. :Oo:

..بصراحه يا دكتور.. في حياتي ما دخلت محاضرات عن الاعلام الا مره وحده و كانت عن التيكيت و البروتوكولات " اضني جي " الرسميه.. كون العلاقات العامه تندرج تحت الاعلام..

..

بس والله صدق حسستني بجو المحاضرات .. خاصه يوم انه هالماده موووووول ما يخصها في تخصصك..

بحــــــــــــاول يا دكتور اندمج و اركز اكثر.. ترى و الله الماده دسمه .. :Oo:

[شوق القلوب]

عفوا دكتور.. بالعكس الفكره حلوه..

بس نوعلنا في المحاضرات.. ^_^

[الملياردير]

افا عليك يا دكتور المنتدى (حلو اللقب)

انشالله بستفيد منهم

[عافك الخاطر]

الاسطوري : شو صار ع المحاظرات :fa45:

في انتظار التكملة
:)