تســــويها ولا !!

[بوزايد]

بسمـــ الله الرحمنـــ الرحيمـــ


السلامـــ عليكمـــ ورحمة اللهــ وبركاتهــــ



من زمان ما كتبت موضوع هنيهــ

طبعا العرس اهمــ مناسبهــ لاي شخص فينا اقصد عرسك او ــج


وفي هاليومـــ فرح وناسهـــ

وانتهــ تتوقع اي شخص قريبـــ منك شرات اخوك او اكثر وانتهـــ عازمنهـــ يحضر العرس

بس الكارثهـــ

لما الضيوف يحضورونــ وانتهــ بس تتريا هالشخص يحضر يهنيكــ بهذا اليومـــ

وتتصلـــ فيهـــ يقولكــ اسمحليـــ ما اقدر

يعنيــ ما كلف ع عمرهــ حتى يتصلـــ يعتذر

ويا ليتــ في سبب ولا شيـــ

تنقهـــر ولا ؟


بســـ مب هذا سؤاليـــ

هلــ يومــ بيعزمكــ ع عرسهـــ بتحضر العرس ولا ؟؟

لا يروح بالكمــ بعيد هههه


اتمنى التفاعلـــ

[الاسطوري]

السلام عليكم ..

موضوعك حلو خوي
بو زايد

شوف طولي بعمـرك أعرف وايدين مايحبـون يحضرون أعراس وإذا اضطروا تراهـم بس يحضرون
يسلمون ومع السلامه وهم طالعين من الباب الثاني يعني مابقول إنطوائيين بس
هم طبعهم جيه وماتقدر تغيره وإذا وصلوك وسلموا
عليك خلاص تراهم أدوا
الواجب وأنا ملزم عليهم من الحين ومب على كيفهم أصلا بيوقفون وياي قبل الحضور واللي مايحضر
يعرف إني بسحبه من خشمه ومابقبل أي عذر إلا إذا كان فوق التوقع وهذا شي
ثاني ،، احم احم ندخل في صلب الموضوع شوف مع
احترامي للحريم وسوالفهم
بس أحس هالحساسيه تكون عندهم أكثر أن فلانه ماحضرت عرسنا ومابنحضر عرسهم وزعل وعتاب
ومادري شو وأنا عن نفسي دام الشخص عزيز علي أو حتى لو كان عزيز
علي في يوم لازم بحضر عرسه حتى لو بس
أتواجد وأفرح له وهالشي
مابينقص لا من قيمتـي ولا من مكانتـي بالعكس بكون أحسن من غيـري وللعلم ترا وايديـن من اللي
مايحضرون يكون السبب أن بطايق الدعوة ماوصلت لهم فـ هم يتحرونك
ماعزمتهم وأنت تتحرا أنهم ماحضروا
ولا أعتذروا !
:k_special2:

الاســـطـــوري
أخوكم

[الملهم]

في حديث عن الرسول صلى الله عليه وسلم : "إذا دعي أحدكم إلى الوليمة فليأتها " ..

يعني اذا انته معزوم لازم انك اتلبي وتحضر ..
واذا طبعا عندك عذر قوي عليك بالاعتذار ..
ومش من اداب المسلم انه يتجاهل الدعوة ..

وانا عن نفسي اذا حد عزمني اكيد بحضر ..
اولا امتثالا لاوامر الرسول عليه الصلاة والسلام ..
وثانيا طبعي اني احب احشر عمري بين الناس .. ^__^

شكرا على موضوعك ..

[مايهزك ريح]

مرحبا بوزايد .. :a070:
انا من النوع اللي تكلم عنهم الأسطوري .. :14:
يعني ما أحب سوالف الزحمة .. واللي ما شفتهم في حياتك تتلاقى وياهم في عرس..ويلا عاد استجواب وينك ما شفناك .. وايلس قول قصت حياتك .. فبصراحة ما أحب اسير .. واذا بسير ..بسلم وبطلع ..
بس اذا هو ما يا عرسي بعذره .. و ما بحط في بالي اني ما بسير عرسه لا .. على حسب ..
انا عادة في اخر لحظه اقرر ..
عادي الصبح متعذر واقول مب ساير .. وتشوفني اخر الوقت في عشر دقايق لابس .. وساير ..
لازم ما تستغربون انا دايما جي .. اغير رايي بسرعه .. مشكلتي اني مزاجي ..
وبعد دايما احتاج حد يشجعني .. يعني لازم ساير ومار على واحد من ربعي ولا اخويه عشان اتشجع اسير .. ما احب ادخل روحي .. وايد استحي :a058:
والسموحه منك :icecream:

[الدلووووعة]

حلو الموضوع
عن نفسي مره كنت بسويها في وحده من اربيعاتي
وكنت مابسير خلااااااص بس على اخر شي اقتنعت وسرت قلت
حرام يعني هي يحليها كم مره اتصلت وخبرتني وانا اول وحده باركتلها يوم وصلت بطاقة الدعوة
قلت اذا ماسرت بتكون حركة نذاله وسرت ^_^

بس لا لو هي مايت بكون احسن عنها وبسير
بس يمكن اول شي بتم اقول مابسير ومابسير بس اخر لحظة اغير راي دوم جي خخخخخ

[بوزايد]

لالالالالالا مب هذا قصدي


قصدي لو اعز واحد من ربعك ما حضر عرسك بدون سبب بتحضر عرسهـــ


مشكورين ع الرد

[إسهر معي ليله]

السلام عليكم

والله انا عن نفسي ما ازعل في هالسوالف،، شو خلينا حق الحريم؟

وخصوصاً انها ليلة عرسي.. والله مابفتكر منو موجود
ومنو مب موجود.. البال بعييييييييد :fa46:

واذا هوه عزمني على عرسه عقب.. بروح له،، لأنـه اذا
كل واحد ما ياني اقول اني ما بييه ما بروح عند حد عقب!

فيه ناس اتيهم ظروف ومايخبرون.. فـ مب معناه اني اقاطعهم
اذا هوه عزمني بروح له واءدي واجبي :m_bye:

و مثل ما قال الإسطوري،، هالسوالف اكثر شي عند الحريم
تقول فلانه ما يتني وانا ما بسير لها،، وكل يوم وحده ما اتيها
يعني تخيّل.. عندها 20 صديقه،، وفـ كل مناسبه وحده منهم ما
اتي،، بالتالي عقب 20 مناسبه وفي الغالب هالـ 20 في اقل من
سنه خخخ بتشوفها خلاص انقطعت عن صديقاتها كلهن،،، وتقول
هاي ما يتني انا ما بروح لها.. :icecream:

فـ اذا فكرنا بهالطريقه ما بنشوف حد،، وبنتم في بيوتنا روحنا
والسموووحه

[الـيـاه]

لا طبعا ً بسير عرسها .. لانه مادام هي ربيعتي وطول هالأيام كانت قريبه مني ها روحه يسد ..
وصدقني مافي حد يسويها في ربيعه الروح بالروح ومايحضر عرسه بدووون نص سبب !

لانه ماله مصلحه في هالشي يعني
هو لا بيدفع عنه ولا شياته لول اللهم بييه العرس

[الملهم]

يمكن ازعل اذا ما حضر ..
بس طبعا بحضر عرسه وما بحط اي شيء في خاطري ..
هذا اعز اصدقائي وما اظن انه يكرهني .. لازم يكون في ظرف ما خلاه يي عرسي ..

^__^

[عنود الريف]

ما شاء الله قطعتوا الحريم تقطييع ..

بس صدقتوا هاي السوالف اكثر عند الحريم ..
لكن انا ما عندي هالسوالف ..
اذا ربيعتي الروح بالروح بتعرس انا بتزهب حق عرسها قبلها ... خخخخخ .. جني مب مصدقه انها بتعرس ..

تسلم اخويه

[اسيرة خاطرته]

انا للاسف سويتها مرة في ربيعتي
بس والله الظروف ما خلتني
وهي الله يخليلي اياها ماقالت شي و تفهت
لو ما تفهمت مابتكون اعزصديقه!!

[الدلووووعة]

هيه انا اللي كتبت فالرد اللي فوق
من اعز اربيعاتي
بس الحمدالله سرت
لنه لو ماسرت جان من اصغر واحد لين اكبر واحد
فعايلتها بسبوني سب ومابيرمسوني ^_^

بس الحمدالله سرت

[همس الدماني]

بصرااحه انا لو ربيعتي سوتها فيني بزعل من الخاطر لأن ما عندها سبب يقنعني

وبندم على اني يوم من الأيام سلمتها كل شي في حياتي

يعني هي ما قدرت تسوي جي إلا وانا احتاجها تكون عدالي تساندني في هاي اللحظه


اما اني احضر عرسها ؟؟

اكيد بحضره حتى لو كان في خاطري شي

لأن هاي ربيعت عمري وانا مو من طبعي والحفد ورد الشي والله غفور رحيم

وبعدين هي ممكن ما تكون حاسه بكبر الجرح اللي جرحتني اياه (بس يوم بحضر عرسها هي بينها وبين نفسها بتحس بتأنيب الضمير وبتدم )...

تسلم اخويه على طرح الموضوع ....

[نور الإيمان]

احتمال وارد جدا اني ما احضر عرسها !! بس ان قالت لي قبل العرس بأسبوع او شهر ان عرسها بيكون في القاعة الفلانية و في اليوم الفلاني .. فأكيد بحضر .. اما انها مثلا ما علمتني ولا قالت لي و اسمع تلاطيش كلام من فلانة و علانة .. ف 99% مب حاظرة .. و ان حضرت لتغيير جو فقط :14:

و بشكل عام انا مزاجية شوي .. و على حسب المووود مثل ما يقولون .. بس عادي عندي اسويها ولا حتى بهتم .. :thumbup1:

[شمعة أمل]

علـى حسـب

لو البنت قريـبه مني وايد وأهلي يعرفون أهلها طبعا بسـير .. لانه اهلي بيخلوني اسير هالعرس + لانه نحن كلووس..

لو ماكانت قريبه وايد مني .. مابسـير .. لانه مب عادي..

لو كانت قريبه شوي وأهلي مايعرفون أهلها عدل .. مابسيـر لانه مابيخلوني أسـير..


كله يعتمد على اذا امي وابويه يعرفون امها وأبوها xD ..


انا من النوعيه الى ماسير الاعراس وايد وماحب اسير .. من غير انه اهلي مايخلوني اسير اعراس اي حد .. ف مب متوعده .. واذا البنت مب وايد قريبه منيي بسأل اهلي اذا عادي واذا قالوو لا يعني لا .. بس اذا قريبه وقالو لا بحتشر شوييه عشان يقولون هييه

اذا كلووس .. مستحيل ماسير عرسها الا بسبب مقنع .. ومابزعل لو ماتيي عرسيي .. لانه مستحيل اي وحده من ربيعاتي الكلوس مايون عرسي الا بسبب مقنععععععع .. وذا كان مقنع .. طبعا مازعل لانه عندها عذر

[الدمعة الحزينه]

ابوي بوزايد

الغايب عذره معاه


والسمووحه منك باباتي

الدمعة الحزينه

[هزاايم]

هب راايحه
ليش أروح
أصلا السلطات بتخلينيه اروح عرس ربيعتي

لو خلوني برووح شو إللي يمنع افرح لها
ماانسى ربيعتنا عرست وكنت عاارفه "السلطات"ماراح يخلوووني وعلى حظها صادف سفرتنا+عزى المرحوومه

معليه نفرح للغير

بس هب حلوه
يعني قصدي مايشااركهم فرحتهم

[بوزايد]

تسلمون ع المشاركه

بس عني انا مستحيلــ احضر


لو حد مر في هالموقف يمكن يغير رايهـــ

[أمواج]

.
.
يا حبّـك لمـواضيع الاعراس يابوزايد
:fa46:
.

[بنوتة جميرا]

تسلم اخوي بوزايد ع الموضوع

اذا اعز ربيعه عندي مايت عرسي صح اني بزعل وبحط في خاطري
بس يمكن يكون عندها سبب ما خلاها اتي ويمكن يكون عذر مقنع
واذا هي عرست اكيد بسير لانها ربيعتي وانا بكون احسن منها

اختكم.. بنوتة جميرا ..

[الارستقراطيه]

يوم عرسي توقعت اشوفها ، خاصة انه كانت تجمعنا مقاعد الدراسة سواء في المدرسة او الجامعة واشتغلنا في نفس المدرسه ، ويوم العرس اتصلت بها وانا في الفندق ، ها فلانة وينج ، ردتي علي تعرفيني ما احب اسير اعراااااس !!! ولازم تعذريني

طنننننننننننننق جنه طابوق طاحت على راسي

بعد سنة تقريبا او اقل وصلتني بطاقة عرسها ..
ما رحت .. مش عشان شي بس ما كان لي بارض (امي سارت)
ويوم كلمتها قالت وايد من ربيعاتي ما حضرن ،،،
قلت لها كما تدين تدااان ،،،