ماذا ستفعـل لو كنـت وزيـر التـربيـة والتعليـم ؟

[العجيبة]

بسم الله الرحمن الرحيم


هلااا :2:

شحالكم ، وشو اخباركم ؟


عساااكم بخيــر ومستانسيين ويا الاجازة الجميلة اللي ما فيها طلعـات :glare:

إنزين .. خلكم مفتحين عقولكم وياي وانتبهوا للكلام في الأسطر التالية ..

في يوم من الأيـام ، كنـت راجع من دوامك إلى البيـت ، صليـت ، تغـديـت ، دخلـت غرفتـك ، يلسـت فوق كرفـايـتك ( سريـرك بالعربي ) ، تتأمـل لون غرفتـك ، يمكن بعضكم لون غرفته فاتـح ، ويمكن البعض الآخر ألوان غرفته غامقة وقاتمـة، ما يهم ، بس بغيت أحسسكم إن كل واحد غرفته غير عن الثاني، اتطالع يمين يسار، كل هذا عشان تنـام شوية، ولكن كله ما فادك، ما صار في إيـدك إلا تعـد الخرفان، تبـدأ العـد 1 - 2 - 3 -4 -4-4-4-4 ..... خ خ خ خ واستغرقت في نوم عميييييييييييييق جدا جدا ..

أثناء نومـك ، واول شي شفته كانت لوحة سودة ، وبدأ الدخان يتلاشى عنها ..
لتظهر بعد ذلك صورة لك.. يالس في كرسي كبيييير وورا مكتب عرييييض كتب في مقدمته
" فلان الفلاني .. وزير التربية والتعليم "

صرت مسؤول مهم جدا جدا في البلاد ..
صار وراك أو يمكن أمامك ( على حسب نوعية قيادتك ) أعداد كبيرة مصيرهم متعلق بقرارتك..
صار عندك القلم والورقة تنتظر توقيعـك لتنفيذ قرارتــك ..


بمــا إنك وزيــر التربيـة والتعليم ...

خبـرنا شو هي قراراتـــك اللي بتوقع عليها آمــراً الجميع بتنفيذهـــــاااا ؟!

طلعوا كل اللي في خواطركم وقولوهـا دامكم تعيشــون لحظات في حلم لن يتكرر :tounge:

[المقاتل]

:a034: فكره حلـــوه والأروع هو أسلوب الطرح :fa46: جان أتخيل إني وزير التربيه والتعليـــم و أول شي بسويه بنجـح جميــــــع الطلبه بدون إي استثناء :icecream: وبعـــدين بفنقر كل المدرسين إلي يرسبون وبسوي عملية التوطين لأستاذة المدارس .. وبعدين اممم .. هيه بسوي مواقف للطلبه في الخارج عسب سياييرهم ما تخترب بسبة الشمس ووو اممم شو بعد .. :a070: بغير المناهج السخيفه وبييب مواد مميزه .. :glare: وبنحفظ اليهال القرأن الكريم ولازم يكون إجباري عسب ينجحون أولا وأخيرا ولأسف الشي إلي ما راعته التربيه والتعليم هالشي ونحن نطالب بهالشي .

وشكرا هيهيهي :a033: مقاله مقاله هب رد خخخ ثانكس

[العجيبة]

المقاتـــــل ..

شو هالتناقض العجيب اللي عندك ،

في أول سطر تقول " بنجـح جميــــــع الطلبه بدون إي استثناء "

وفي آخر سطر تقول " وبنحفظ اليهال القرأن الكريم ولازم يكون إجباري عسب ينجحون "

معناته في سطرك الاخير توضح لنا ان هناك في نجاح ورسوب ، لكن كيف يكون فيه رسوب والسطر الأول يقول إن الكل بينجح ؟ :fa45:


مع ان عندك بعض القرارات جيدة، إلا إن التناقض في قراراتك خلاني اعتمد انك ما تصلح وزير للتربية والتعليم :tounge: حاول تكون وزير لشيء ثاني .. وشكرا على مشاركتك الحلوة :fa34:

[المقاتل]

:a068: اوووييه .. ابيييه .. زخوني .. خخخخ .. صدق والله تناقض :1: انا ابوي احسن لي يالس على لابي لا وزير ولا شي ههه ثانكيو .. :glare: بس وين المشاركات يعني بس انا مشارك يبالهم ضرب .

[المقاتل]

مايهزك ريح << جيه ما شاركت ؟؟, , خــّطاب شو عذرك ؟؟ , , عفاريتووو << لماذا , , عافك الخاطر Why ?? , , طير الحب إكس يوزمي ؟؟ , , دلوعة دبي هالوووو ؟؟ , ,>> لا هاي ما يخصها كاتبة الموضوع العجيبة , , الدلووووعة , , المقاتل , << انا بس ..

[عفاريتووو]

امم شو بسوي ؟

بسوي نظام المدرسة الاكترونية :fa46:
بدل ما يروحون الطلاب المدارس يحظرون الحصة من النت و هم في البيت
وكل شي يكون منقول بالصوت و الصورة


و المناهج لازم تتغير
بسوي شي يكون تعليمي و ترفيهي نفس الوقت
يعني مب اشياء جامدة
و كل شي ياخذونه لازم يسوونه بايديهم او يجوفونه بالواقع


هاييلا بس اللي في بالي الحين :fa46:

[بوزايد]

خوزوا عني


بوزايد


وزير التربية والتعليم



:a068: :a068:


اول شي طبعا التوطين

ثاني شي التجنيد اجباري من صف رابع لين 3 ثانوي

ثالث شي الدوام الساعه 9 لين 3

رابع شي الثانويه العامه النسبه مش شرط تعتمد ع الدرجات بالامتحانات تعتمد بعد ع تقرير الاستاذ للطالب

خامس شي الثانويه العامه يمتحنون ثلاث مرات للماده والنتيجه الاحسن يحطونها بالنسبه طبعا مع تقرير الاستاذ


وبس


يالله منوه بيرشحني وزير

[العجيبة]

المقاتل

ههه ضامن مستقبلك الوظيفي ما شاء الله ، فصلناك من الوزارة اشتغلت في الدعاية خخخ
أشكرررررررك الصراحة :vampire:


عفاريتــوووو
هههه انزين في الوقت الحالي لو تم تعيينج وزيرة للتربية والتعليم بتشوفين إن قرارج الأول يتعارض مع الإمكانيات الموجودة ، لإن مب كل الناس يعرفون يستخدمون النت ومب الكل عنده مقدرة يوفر هذه الخدمة لعياله، يعني وايدين بيتمون جهلاء وما بيدرسون وهالشي ما نباه !! إلا في حال اتفقتي ويا اتصالات عشان ترخص الخدمة وهذا مستحيل يصير وقبلها علمتي الكل على استخدام النت !
بس القرار الثاني ممكن إنه يتنفذ وتقريبا هو منفذ حاليا بالمناهج اليديدة اللي محتاجة فقط للأدوات والأماكن المناسبة لدراستها عملياً ، وهالقرار بعد يتعارض ويا اللي فوقه ، كيف بيدسون الكترونيا وفي نفس الوقت يطبقون العملي ؟!!
تقريبــا ربــع وزيــرة .. :icecream: وشكرا لتواجدج وردج :14:




بو زايــد
حي الله طويل العمـر ،
أول شي قرار جميل جداً
ثاني شي من صف رابع عااد :Oo: الكل بيكره المدرسة ، قول من أول اعدادي بنبلعها .. بس شو نسوي وزيــر ..
ثالث شي ، فال الله ولا فالك .. تبا خلق الله يخيسون في المدرسة !! بس بعد شو نقول وزيـر وما بنردك
رابع شي .. وهالشي هو اللي حاصل هالسنة .. :glare:
خامس شي .. ههه قرار وايد حلووو :a033: بنحفظ المناهج من الفهرس لييييين تم بحمد الله ..!

واسمح لي ، أنا أحمد ربي لانك ما استويت وزير التربيــة والتعليم :fa46:
ومشكور على تواجدك وردك ،،

[المقاتل]

:glare: إنزين العجيبه إنتي شو رايج في الموضوع لو كنتي وزيره ؟؟

[ولد الشحوح]

اول شي بسويه بغير نظام الثانوية الزفت اللي ابتلينا فيه
ثاني شي من صف ثاني ثانوي يبدا الطالب يدرس مواد مخصصة حسب التخصص اللي بيدخله بالتالي تقل عدد سنوات الدراسة الجامعية واذا ما طبقت هالنظام بفرض على الجامعات انها ما تهتم بالنسبة بشكل رئيسي وتهمل درجات المواد يعني مثلا انا ابا اكون مهندس كهربائي ونزلت نسبتي مادة الأحياء حرام ما انقبل علما بأن درجاتي بالفيزياء والرياضيات عالية حد فهم ؟!؟

[الـيـاه]

ألعن أصل مناهج الحكومه الزفته وأطرها في ويه اللي سواها - بسستم من برع يليق بعقلية عيالنا -
بدال الدفاتر والنسخ اللي يكسر الأيد ويخلص الحبر اسويلهم لاب توبات تحتوي على المنهج كله
لكل الكتب شرات المواكب الله يطول في عمر من سواها لول

بالنسبة لـ حصه الانجليزي
بييبلهم مدرسين أجانب بدال المصاروه ( حمير بالعاميه ) اللي الانجليزي مالهم خرطي

امم شو بعد شو بعددد
بسويلهم اكتيفيتي في المدرسه مب كله دراسه دراسه
اممم بسفر المتفوقين كل سنه بس جي رحله ترفيهيه وفي نفس الوقت مفيده + مكافأة

و واايد اشيا لول
وإذا أي مدرس غلط على طالب بقصد ( بيشوف شو بسويبه ههه )

[العجيبة]

المقاتل
اممممم لا أنا مب وزيـرة ، أنا يالسة أحدد منو ينفع يكون وزير ومنو لا :tounge:


ولد الشحوح


انا ابا اكون مهندس كهربائي ونزلت نسبتي مادة الأحياء حرام ما انقبل علما بأن درجاتي بالفيزياء والرياضيات عالية حد فهم ؟!؟

اذا مادة وحدة نزلت نسبتك يعني نسبتك مب أقل عن 85 وأكيد هي أعلى .. في الهندسة يقبلونهم من السبعين فما فوق أظن
تفاءل خيـر باجي عندك الفصل الثاني وطلع كل قدراتك فيه
وللأسف مع انه عندك قرارات زينة ، إلا إني ما أقدر أوقع على إنك وزير للتربية والتعليم
لإن طموحك أعلى ويصل إلى مهندس كهربائي .. الله يوفقك ..



اليــاه
وزيــرة وتلعن ؟ أستغفر الله ، شو خليتي حق الطلاب؟ :tounge:
تغيـرين المناهــج ، هذا هو اللي حصل الحين ، وأعتقد بيطلعون عباقرة الجيل اللي بعدي .. لأن اللي ياخذونه في صف رابع أنا خذته ثاني أو ثالث إعدادي !!

بدال الدفاتر والنسخ اللي يكسر الأيد ويخلص الحبر اسويلهم لاب توبات تحتوي على المنهج كله
لكل الكتب شرات المواكب الله يطول في عمر من سواها لول

تتكســر ايدينهم ولا تذوب عيونهم من صغرهم ، وبهالطريقة انتي تقضين على الخـط العربي وفنونه
الحين الكل يعرف يمسك القلم ، وعقب محد بيعرف يستخدمه ، مثل اللي ما يعرف يرسم .. ما يعرف يستخدم الألوان والفرشاة !! تخيلي !!

بخصوص الاكتفيتي أو الانشطة بالعربي ، هالشي موجود في كل المدارس من الابتدائي الييين الثانوي ..
ونفس الشي بخصوص السفر، كل سنة يودون الطلاب للعمـرة ، ويودون رحلات خلال الاجازات وللمتفوقين بعد عشان ما تزعلين ، ويكرمونهم كل سنة ، بس مب مكافآت مالية .. مجرد هدايا ..

تقريبــا ربع وزيــرة بعـد ، لأن قراراتج تقليدية وموجودة في الحقيقة ومطبقة في الواقع > ولا تسأليني شو الفرق .. :fa45:
ومشكووورة على مشاركتج الحلوة ..

[الـيـاه]

احين تسمين اللي يسونه مدارس الحكومه اكتفيتي هههه ..

هيه بلعنهم جان مناهجهم جي
عيل كانو مدرسينهم يقولولهم يا حمير ويا مادري شو ومحد سوالهم شي

عاد من زود مايعرفون عربي الحينه
لا اكيد مب مول يعني مب مايكتبون مول .. عادي شي مدارس وايد كله لاب توبات اقصد مدرستين بس لول
وعيالها يكتبون بشكل طبيعي صدقيني ههه
خل يظهرون شوي من الـ 50 سنه وهم نفس الشي , ماسكين نصهم يسيرون الجامعه ويلسون يتعلمون كل شي فالكمبيوتر
من اول ويديد

[شمعة أمل]

همممممممم
مابـسوي شـي ..
لانـه ماينيـت عشان أكون وزيرة التربيه والتعليم p= .. اخاف على عمري .. حليله حنيـف يكسـر خاطري .. من استوى وزيـر محد خلاه في حاله

ثاني شي..
الحمدالله .. الدوله عرفت انه سستمها في الدراسه من ناحية المدارس الحكوميـه أبدا مب شــــــي .. لكن كل شي بيتغيـر مع السنيــن .. لانه طبعا هالشي مب سهل يغيرونه ويباله وقت.. وسمعت بعض الاشيا الى بيغيرونها من أبويـه .. وفي تقريـبا 10 سنـين .. المدارس الحكوميـه في البلاد بتتنافس مع المدارس الخـاصه.. وكل المدارس الخاصه مال اي كلام بيطلعونهم =)

[ولد الشحوح]

مثلا انا ابا اكون مهندس كهربائي ونزلت نسبتي مادة الأحياء حرام ما انقبل علما بأن درجاتي بالفيزياء والرياضيات عالية حد فهم ؟!؟

انا ما ابا استوي مهندس كهربائي الظاهر ما جفتي كلمه مثلا هخهخهخه
طويلة العمر يمكن كذا مادة تنزل نسبة الشخص بس تكون درجاته في مواد وايد حلوة وعالية وهي المواد اللي يعتمد عليها التخصص اللي يبي يدخله بس طبعا الجامعة تبا النسبة بس مب درجاته في هالمواد !!!

[شمعة أمل]

لول وجان أرد
كنت افكر في موضوعج اليوم الصبح الساعه 9 وربع بالضبط xD

لو صدق صدق صدق صدق فجأه جي استويت وزيرة التربيه *ان شاء الله هالشي مول مايستوي لول* بس يعني .. ان استوى في يوم من الأيـام .. فكرت في اشيا بغيـرها


- أول شي كل طالب لازم يدفع 1000 درهم كل سنه *صح هم حكوميه بس لازم يدفعون حق شي على قل* .. هالألف درهم .. بتكون حق الطاولات + ستاير + اي تعديـل للصف + يونييفوورم (المدرسه بتعطي الطلاب الثياب مب هم يفصلون عشان كلحد يكون نفس الشي)

- بغيـر المواد من الخاطر .. أول شي .. لازم المدرسه ادرس ثلاث لغات والى هم الانجليزي والعربي والـ(هندي او فرنسـي) .. ويكون المستوى عالي لكل ماده .. في العربي لازم يعرفون يرمسون ويكتبون بالفصحى مب ينقعون شراتي .. والانجليزي لازم كل طالب ييب على قل 550 ولا مايتخرج .. واللغه الثانيه ماعرف p=

- بحذف الجغرافيا والتاريخ وبستبدلهم ب .. السيـاحه العالميـه + ماعرف شو اسم الماده الثانيه بس انه هم مثل التاريخ لكن مب اشيا جديمه مغبره مابتأثر في حياتهم .. بتكون اشيا مفيـده عن شخصيـات عالميه مميزه واشيا ولا احداث عالميه هزت العالم...

- كل حصه مدتها لازم تكون ساعه

- في البريـك .. بخوز كل هالخرابيط الى يبيعونها .. وبييب أكلات صحيه + عصاير فرش

- بيب طبيبه نفسـيه .. ونفس مراقبات .. لانه مابا سوالف بويات ما بويات وهالخرابيط .. ف اذا هالمراقبات شافو وحده ولا شكو في وحده يودونها عند الطبيبه النفسانيه في المدرسه xD

- الرياضه شي مهم .. واذا عن مدارس البنات بيب رياضات بتفيدهم في المستقبل .. نفس اليوغا والبلاتييس والسباحه وجي

- في مدارس البنات بحط ماده بنوتيـه .. يتكون من حصص الطبخ .. التنظيــف .. الاتيـكيـت .. الميـك أب والفاشن لول .. وفي مدارس الأولاد .. بيب كلاس عباره عن كيف يصلحون السيـاره يوم تختـرب .. كيف يكون أبو زيين .. الطبخ البــري .. ويبنون أشيـا

- بحذف طابور الصباح الى في المدارس الحكوميـه.. وكل خمـيس المدرسه كلها تتيمع في المسرح ..

- بغيـر طريقة العلامات وجي .. يعني نجاح الطالب مايعتمد على علامته في الامتحان .. يعتمد على كل شي يسويه في السنه + سلوكه

- في التربيه الأسلاميـه .. بغيـره وايد .. بخلييه وايد حلوو .. وبتتكون هالماده من قرووب برووجكتـس .. قصص الطلاب لازم يقرونها بعدين يسون بروجكت عليها .. فيديوو .. محاضارات .. بخلييه وايد حلوو..

- بخلي المدرسه وايد خضرا .. مترووسه شيـر وحشــيش .. مدارسنا الحكوميـه تلوع بالجبد شكليـا وهالشي مب زين .. لازم تكون نفس مدرستنا جي فيها نافوره ونهر وسمج وحشيش وشير .. بس مابحط طوااويس

[هزاايم]

لوصرت وزيره
بخليهم يأجزون 364 يوم
ويوم وااحد عسب يتعارفون
وكان الله غفورا رحيما
لالا انا ماارشح عمري اكون وزيره تعليم

بخااطري يدرسوون شرات السعوديه
يعني منهج التربيه الإسلاميه جمييل لكن يخفوون علينا<<يعني قوم دلع=q

[العجيبة]

اليـــاه
دام مدرستين طبقوا النظام الالكتروني ، فابشـري ، اليـاي أكثر
صدقج ، نحن خذنا مادة الكمبيوتر في أول ثانـوي ( مشروع محمد بن راشد ) وانصدمــت في بنـات
عندنا مب قادرات يتحكمن بالمـاوس !! :fa45:



شمعة أمل ( العـاديـة )
بالعكس وايدين يحلمون بالمناصب، كيف لو كنتي وزيرة التربية والتعليم !! وايد أشياء تترتب على
هالشي ، وبعدين عادي اللي ما يطول يستوي وزير حامضٍ عن الوزارة يقووول خخخ :icecream:

والدكتور حنيف حسن مب مقصر مرة في انجلترا ومرة في سنغافورة ويحاوط في مدارسهم ، يبا
يطورنــا :glare:


ولد الشحوح
خلاص عيل درجتي في الدين الحين 97 ، ما يحتاي انجح في الكيمياء والفيزيا والانجلش والعربي
والرياضيات ، بكتفي بدرجة الدين وبخليها تدخلني شريعة وقانون :a034: .. شو رايك ؟
لو كانوا جي يفكـرون من الأساس بيخلونا نختار المواد اللي تخدم التخصص اللي نباه ..!!
يعني انت لو طبقت قرارك واللي هو كل واحد يدرس المواد اللي تفيد تخصصه في الثانوية بعد بياخذون
نسبتك في هالمواد .. بس دام الاختيار مب مطبق عندنا فنحن ملزومين بنسبة المواد كلها ..



شمعــة أمل ( الـوزيــرة )
هيهيهييهي شفتـي مستحيل تتنازلين عن هالمنصب لو عطوج اياه :tounge:

- أول شي كل طالب لازم يدفع 1000 درهم
المشكلة يوم قررتي هالقرار انتي ما تدرين إن الطلاب ما عندهم دخـل ثابت !
يعني ولي الأمـر هو اللي بيتوهق بهالألـف !! وكيف لو كان عنـده 8 يدرســون في الوقت نفسه !!!
والصراحة أنا ما أؤيد سالفة اللبس الموحد اللي توزعه المدرسه ، دايما يكون غالي ما يستاهل المبلغ
اللي يندفع له والخام المستخدم رديء جداً ، وكل وحدة تفصل على كيفها يعطينا فرصة عشان نشوف
موديلات مختلفة وقمصان أشكال وأنواع :icecream:
ودام المدارس اللي تحويها وزارتج موفرة الطاولات والستاير والصفوف معدلة بعد شـ له هالألف يندفع كل سنة ؟!!
الصراحة أنا أفضل أشوف صفي أغبـــر وعـادي جدا ، لأنه كم مرة عدلنا صفنا وكنت ما أنتبه للشرح
أتم أتأمل ديكور الصف اللي عادة ما يكون بألوان عنقاشية جداً جداً خخخ :icecream:


- لازم المدرسه ادرس ثلاث لغات والى هم الانجليزي والعربي والـ(هندي او فرنسـي)
هذا معناته توفــرين أساتذة أكثـــر .. بس تعرفين المدارس الحكومية مب محتاجة للغة ثالثة وهي مب قادرة تدرس اللغة الثانية ( الانجلش ) بمستوى أكثر ما نقدر نقول عنه ( مقبـول ) !!!



بحذف الجغرافيا والتاريخ وبستبدلهم ب .. السيـاحه العالميـه + ماعرف شو اسم الماده الثانيه بس انه هم مثل التاريخ لكن مب اشيا جديمه مغبره مابتأثر في حياتهم .. بتكون اشيا مفيـده عن شخصيـات عالميه مميزه واشيا ولا احداث عالميه هزت العالم...
اممم صحيح انه هالمادتين ما أحبهم ، بس فائدتهم قيمة جدا جدا ، نحن ما عرفنا شو يعني جبل وهضبة ولا عرفنا مواقع بلدان العالم إلا من الجغرافيا ! والتاريخ يعطي الطلاب فرصة لمعرفة أمجاد القدامى وانجازاتهم وهذا بحد ذاته يدفع الطالب للإقتداء ببعض الشخصيات اللي تمر عليه ..
وأعتقد مادة مثل السياحة العالمية منفصلة مجرد ترف ، وما نقدر نقول نحذف هالمادتين ، نقدر نطورهم ونجدد فيهم بما يتناسب وطموحاتج ، مثلا ندمج السياحة في الجغرافيا ، والشخصيات الحديثة في التاريخ .. :icecream:

بالنسبة لقراراتج الاربع التالية وايد مهمة وأؤيدج فيهــااا



في مدارس البنات بحط ماده بنوتيـه .. يتكون من حصص الطبخ .. التنظيــف .. الاتيـكيـت .. الميـك أب والفاشن لول .. وفي مدارس الأولاد .. بيب كلاس عباره عن كيف يصلحون السيـاره يوم تختـرب .. كيف يكون أبو زيين .. الطبخ البــري .. ويبنون أشيـا

هالشي يصير في الملتقيات الصيفية ، ولو تطبق في المدارس بيكون نصيبه حصة وحدة في الأسبوع
يعني ما بتلقى هالحصة ذاك الاهتمـام ولا بيستفيد الطلاب أي شي، مثل مادة الفـن ، ما أحس إني
استفدت منها شي ، المكتبات كانت تستفيد من طلباتهم ونحن بكل براءة كنا نسير ونشتري كل شي يطلبونه !!


- بحذف طابور الصباح الى في المدارس الحكوميـه.. وكل خمـيس المدرسه كلها تتيمع في المسرح ..

الطابور بالغصب يحضرونه، تبين الطلاب يداومون دوام كامــل عشان لا شيء ،
حفلة الاتحاد اللي سووها يوم الخميس ، سوولهــا طاف ، مع انها واجب وطني ..
حتى أنا شخصيا داومت عشان أمتحن أداء عملي في ذاك اليوم وطلعــت !



في التربيه الأسلاميـه .. بغيـره وايد .. بخلييه وايد حلوو .. وبتتكون هالماده من قرووب برووجكتـس .. قصص الطلاب لازم يقرونها بعدين يسون بروجكت عليها .. فيديوو .. محاضارات .. بخلييه وايد حلوو..

حلووو :icecream:


بغيـر طريقة العلامات وجي .. يعني نجاح الطالب مايعتمد على علامته في الامتحان .. يعتمد على كل شي يسويه في السنه + سلوكه
هالشي مطبق حالياً



بخلي المدرسه وايد خضرا .. مترووسه شيـر وحشــيش .. مدارسنا الحكوميـه تلوع بالجبد شكليـا وهالشي مب زين .. لازم تكون نفس مدرستنا جي فيها نافوره ونهر وسمج وحشيش وشير .. بس مابحط طوااويس
ههههه عيل بنسميها حديقة **** للتعليم لول :tounge:
تعرفين هالقرار يــا لأنج ما جربتي عيـال الحكومي وكيف يتعاملون مع المرافق العامة !!
خاصة إذا كانوا عايشين في مناطق نائية وما يعرفون أبعد عن حدود منطقتهم ..!!!


مع قراراتــج هاي عزيزتي الوزيــرة أقدر أقول إنــج ثلاثة أرباع وزيــرة ..
وشكرا على مشاركتج الحلوووة .. :yes:

[شمعة أمل]

منو قـال اني ماجربت =)
كنت في مدرسـه حكوميـه قبل لأسـير مدرسـه خاصه..
والزرع يغير واايد .. كفايه انج تشميـن هواا أنظف وتسمعيـن أصوات العصافيـر يوم تتمشـين ... وايد زين لنفسـية الطالب خصوصا وقت الامتحانات..

ومن ناحيـة الطابور للحيـن أحس انه مب مهم .. يعني أوكيـه نحيي العلـم وجي .. بس سخافة تمارين الرياضه الصباحيه المنقعه مالهم؟؟ قم بو ارفع اييدك وانقز؟؟ وين يبونxD .. المفروض يعدلون حصة الرياضه في المدارس الحكوميه وياخذون هالحصه بجديـه .. مب كل وحده تييب رساله اونه ماروم اسوي رياضه ..


عن المواد البنوتيـه + شبابيـه ..بخليها حصتيـن في الأسبوع ومب حصه .. مابيكون نفس التربيه الأسـريه المعفن على أيـامي (بعد موجود ولا؟؟).. صدق كان مصخره >_< .. اما هذا لا ..بيكون وناسه

عن الانجليزي .. بغييييييييييره .. بييب انجليزيه ادرس انجليزي مب وحده مواطنه حتى اللهجه البريطانيه او امريكيه ماتعرفها وكله تنقع .. المفروض المواطنات يدرسون الاشيا بالعربي والانجلييز يدرسون لغتهم .. واللغه الثالثه .. طبعا الهندي وحده هنديه بدرسه والفرنسي وحده فرنسـيه ولا من الدول الى احتلوها فرنسي ويرمسون كله فرنسي xD

وعن الألف درهم .. انا مب معاج .. المفروض الشخص يدفع .. ولو عنده 8 مره وحده .. واجبه هوو يحفظ فلوسه خلال السنه .. مب يسرفها على اشيا ماتسوى ..
عندنا مشكله ويا المواطنيـن .. انه مايقدرون معظم الأشيـا الى تيهم .. نفس الماي والكهربا والبيوت والبعثات وكل شي .. كله يبون يبون يبون ومايعطون ..
لازم ياخذونresponsibility على قل مره في حياتهم ..وهالشي بيبدا بالدراسه .. وألف درهم مب وايد لسـنه كامله .. خصوصا مقارنة بأسعار الجامعه الى تبدا من 20 لخمسين ألف في السنه!

[حلم الطفوله]

السلام عليكم


إذا استويت وزيرة التربية والتعليم إن شاء الله يعني :fa35:

بعطيكم إجازه أسبوع كامل بمناسبة فوز المنتخب :tounge:

مب بس اللعيبه يحصلون ...حتى المشجعين يستاهلون:1:

إن شاء الله حنيف يدش ويقرا قراري ويعتمده من باجر .... ما فيني أداوم:glare:

[فرفوش]

مرحبااااا والسموحه عجيبه اعرف يمكن تعصبين موضوع جديم ولكن يقال كل شيء في وقته خخخخ وهذا وقته عاصف كان بيتكلم عن موضوع بس قال بيعرضه هنا وسؤالج عجييييييب خخخخ لو عاااصف وزير هيهيهيه اول شيء بيمع المدرسين ألي امبهدلين عاصف وبفنشهم خخخخخ وثاني شيء بفتح مجال حرية التعبير على جدران المدارس هيهيهيه وثالث شيء بكثر من الفسح وبضيف ماده يديده هي مادة فن المغازله ورابع شيء بفتح في المدرسه كراج لهواية تزويد السيارات وللبنات بحط مادة فن المكياج وخامس شيء الدوام بيكون من 10 الصبح لين وحده الظهر فقط ايهههها طبعا كله سوالف وعاااصف يمزح



بتكلم عن المدارس
1- بفتح مادة العادات والتقاليد: في الماضي كانوا أميين ولكن أخلاقهم وطباعهم حيه والآن بحثنا وأهتممنا في التعليم وللأسف أولاءك من يتعلم ويتخرج نجدهم خالون من أي عادة المسلم العربي الخليجي الإماراتي في تعاملهم أخذوا العلم ونسوا الأخلاق

2- تدريس مادة اللغه الأنجليزيه في مدارس الحكومه بتكون على نفس مستوى مدارس الخاصه

3- فقط مدرس غير عربي أنجليزي يدرس اللغه الأنجليزيه لجميع المراحل

4- تخرج الطالب من الثانويه بمعدل عالي وحسن سيره طيبه يتم بعثه لبريطانيا وإقامته مع عائله أجنبيه حتى يتعلم اللغه

5- إضافة حصه جديده هي تحفيظ القرآن كاملا والسبب أن هناك أحصائيات بأنهم الاوائل في المدارس

6- أدخال مادة لعبة الشطرنج ووضع مسابقات والسبب أن هناك أحصاءيات بأن من يلعب الشطرنج له أختلاف من الناحيه الإيجابيه في الاستيعاب والفهم والذكاء والتخطيط والفكر

7- الأهتمام بالنشاطات حتى وقت الاجازات الصيفيه طبعا على حسب الرغبه أي أن الطلبه بحاجه لنشاط بدني يفرغه بدل ما يفرغه في السلبيات

8- الأهتمام بهواية الطبخ والخياطه بالنسبه للبنات

9-من هو يكون أخصائي أجتماعي بنفس الوقت يكون دكتور نفساني ويتم الأتقان في أختيار الشخص المناسب دون أهمال
10- وجوب وضع محاضرات توعيه كل أسبوع لكل مرحله ومستوى
11- أستخدام أسلوب الترغيب والأقناع وليس الترهيب
12- وجوب وضع كاميرات في المدارس على اساس اتكون الرقابه من قبل ادارة المدرسه نفسها

13- لكل انسان هوايه فبهتم بالهوايات وميولهم كالرسم او الشعر او الخ الخ الخ (شو يعني الخ)
14- وجوب وضع وكثرة المكافأت التحفيزيه وتكثيرها

شو بعد اممممممممم اذا فيه شيء برجعلكم وشكله عاااصف يهذرب ويخربط والسموحه

[حلم الطفوله]

أونه !!

خلاص عاصف ... إن شاء الله بننتخبك في الوزاره اليايه ...

جان هاي قراراتك ...نحن والطلاب بألف خير

من هالقرارا حسيت إنك مدرس !!! صدق صدق عايش الوضع التعليمي

[فرفوش]

أونه !!

خلاص عاصف ... إن شاء الله بننتخبك في الوزاره اليايه ...

جان هاي قراراتك ...نحن والطلاب بألف خير

من هالقرارا حسيت إنك مدرس !!! صدق صدق عايش الوضع التعليمي


أيييههههههااااااا
جان زين مدرس
اتعرفين شو العلاقه الي تخلي الطالب يكره الماده والتدريس
هي معاملة المدرس للطالب
يعني لو مدرس محبوب ويعرف يتعامل مع الطلبه لكان الطلاب بأحسن حال بس هم يبون الطلبه فقط الي يعاملونهم بحب عنبوه انت مدرس وافهم واكبر عن الطالب ولك خبره في الحياة

15- أعادة دراسة أختيار المدرسين من حيث وضع اسس جديده لمن يصبو ان يصبح مدرس (شو يعني يصبو) كله علم في المعامله وطريقة ارسال المعلومه ولو حبذا ان يكون دارس في علوم النفس

16- فتح حظانه خاصه في المدرسه بحيث يتم رعاية أبناء المدرسات

17-المدرسه الحامل تعطى اجازه من اول حملها لمدة سنه


18- انشاء مدرسون أحتياطيون بحيث وقت اجازة المدرس يقوم الاحنياطي بالاكمال وبحيث ما يأثر على تدريس الطلبه

19- وضع منصب نائبة الوزير وهي تهتم بشؤون الطالبات والإنااااث بشكل عااام شرااات السعوديه

حلم الطفوله شو سالفت اسامي الطفوله متداوله عندكم في الواحات هيهيهي
انتي انتخبيني وانا بحطج نائبة الوزير اييييههههههاااااااا

[العجيبة]

بعترض لو خلوك وزير للتربية والتعليم يا عاصف عنجهي !!! للأسف جاي في غيـر زماني لول !!!


فعلا بعض قراراتك يحتاج لها النظـر من قبل المسؤولين ... انشرها في الجرايد ... عل وعسى يكون لها صدى !

وشاكرة لك مرورك المتأخر خخخ

[حلم الطفوله]

سيد عاصوف ... احلى من عاصف صح :)

الدراسه شيء والميدان شيء ثاني ... مب كل مدرس ينفع بالتدريس !!! وإلا شو رايك ؟

المهم خلنا بعالم الطفوله ... الأطفال على الأقل أحباب الله والله يزيدهم ويبارك فيهم في الواحات


وننتظر المزيد من قراراتك العادله وزيرنا المرتقب عاصف تربيه :)

[عافك الخاطر]

طريقة تدريس بعض المواد لازم تتغير .. مثلاً النحو - وها كلام دكتورنا في جامعة الشارجة اللي ما ادري ليش ما يقدم رايه للوزارة! - المهم ، المفروض النحو على كلامه ما يُطبق على انه قاعدة وتنحفظ، بل تُطبق قراءةً و كتابةً و الاولى انه تقييم هذا الجانب في الطالب يكون من خلال القراءة و الكتابة ،لأنه ها اللي يميز الطالب اللي فعلاً حافظ القاعدة مجر حفظ بدون تطبيق و بين اللي جمع الاثنين . و بعد لازم يحاولون يجمعون بين اللغة العربية و الثقافة الإسلامية من خلال القرآن .. يعني حالياً في الجامعة يعطونا نعرب آيات و ها شي طيب يعني يخليك تفهم الآيات بصورة أفضل .. و في نفس الوقت ممكن تحقق الجانب التربوي و الأخلاقي في شرح معانيها. وفوق ها كله من واجب المدرس انه يبتكر طريقة تخلي هاي الامور كلها ممتعة للطالب.

وأأيد عاصف في رايه رقم 15

و يمكن لنا عودة :14:

[فرفوش]

عااااصوووووووف عاااااد مره وحده حشى- أنا اسمي عاصف وبسمي ولدي عصوف خخخ ناديني بو عصوف هيهيهيهيه
ما قلتيلي الطفوله لو انتي نائبة الوزير والا وزيره شو بتسوين
أكيد وزيرة ارهاااااب العواصيف


الوزاره اذا تبأ تهتم بالتعليم والتربيه فلازم الاساس من البذره - الاطفال مب يوم يكبرون يقولون لهم تعالوا بنعلمكم
النحو ما يلامون من كثر الطاااخ طيخ وطقيطق حتى انا بعد عربي نو فهمي
أتفق مع عافك الخاطر خلاص- والسموحه


احم احم معاكم معالي الوزير
عاصف القطامي

[حلم الطفوله]

بو عصوف ... دام هاي قراراتك ...إنته سر وأنا من ورائك :)

تدرين إختيه عافك الخاطر .... سالفة مدرسات العربي هاي بروحها سالفه !!


عاصف شكلي بوديك بستين داهيه جان صرت الوزيره !!! صحيح من قال وراء كل رجل عظيم وزيره أعظم

[فرفوش]

لو انا وزير لغيرت نظام الاكل في المدرسه ووين الصحه لو خلوني وزير التربيه والتعليم والصحه مب احسن خخخخخ

[تحفه]

قراراتي بتكون كالتالي:

١- بغير قانون الرسوب ... الي يرسب في ماده ياخذ سمر سكول .. بوايد احسن من انه يضيع على عمره سنه!
٢- بجبر الطلاب يشتغلون او يؤدون عمل تطوعي وبيكون عليه علامات عشان يحسون بالمسؤوليه ويشدون حيلهم وياخذون فكره عن نوعيه الاعمال الي يحبونها وهالشي وايد زين في انه يبني للطالب نوع من الطموح و الرؤيه المستقبليه في مستقبله وبالتالي بيتحسن اداء الطلاب!
٣- الطالب الكسلان يخلونه يشتغل او يطوع في الويكند اذا يبا ينجح في ماده ! الكسلانين في الرياضيات يشغلونهم في سوالف حسابات الكافتريا P= والكسلان في العلوم يخلونه يساعد في المختبر والعربي يساعد في اذاعه طابور الصباح
٤- لازم مدارس دبي تستوي نفس مدارس بوظبي جنها مراكز مكيفه كككللللها .... لان جونا صصصصدق ماينطااااق
٥- يزيدون كلسات الانجليزي .. او يدرسون علوم و رياضيات وهالسوالف بالانجليزي ;)

هاللي اروم افكر فيه للحين ...

بس


عندي تعليق



- أول شي كل طالب لازم يدفع 1000 درهم كل سنه *صح هم حكوميه بس لازم يدفعون حق شي على قل* .. هالألف درهم .. بتكون حق الطاولات + ستاير + اي تعديـل للصف + يونييفوورم (المدرسه بتعطي الطلاب الثياب مب هم يفصلون عشان كلحد يكون نفس الشي)

انتي وين والشيخ زايد وين .. حمدلله الامارات فيها خير وعايشين بنتم في خير .. روحنا حبتين في بلادنا .. هالقاصر

في حل ثاني .. الطلاب الي يخربون الادوات يخلونهم مسؤولين عنهم .. احيد مره في ثالث عدادي كان صفنا صصصدق شيطان .. جان مربيه صفنا تخلي الي ما تقر في الصف توقف علبنات عشان ما يظهرون في حصص الفراغ والبنات الي يوصخون مسؤولات عن النظافه في الكلاس ..... والخطه نجحت وصفنا فاز باحسن صف وودونا رحله! اياااام والله =)

[العجيبة]

تحفـة !

العمل التطوعي ما يستـوي بالاجبـار ...
وعلى طاري التطوع المدرسي .. صار برنامج تكاتف يعطي منح للمدارس اللي بتنفذ مشاريع تطوعية ... وهالشي تقريبا موجود يعني ولو انه مب اجباري مثل ما انتي تبين .... ولا اعرف طريقة تشغيله الصراحة وهل فعلا الطلاب مستفيدين منه او لا !


عجبتني طرق مكافحة الكسل ... في المدارس صايـر العكس .. وحدة شاطرة في الاذاعـة مثلا ، بتم نفس الطالبة تقدم الاذاعــة يوميـا ... لدرجة انهم يستدعون نفس الطالبة تقدم اذاعـة لصـف مب صفها :/
احيد ايام الاعداديـة ... كان عندنا بنت صوتها جميييل في تلاوة القرآن ... يوميــــــــــا هي اللي تقـرا ... ونعرف متى تغيب اذا يـت بنيـة ثانيـة تقـرا ...!!! يعني هم بهالطريقة يهدون طموحات الباقيين ولا يحاولون يكتشفون مواهب او ابداعات ثانية !!!!


ما ادري ليش تبـون الاهتمام بالانجليـزي .... انا اشوف نهتم بلغتنـا العربيـة أكثـر ... لان حتى مدرسين اللغة العربية فاشلين نوعا ما في انهم يخلون اللغة العربية لغة مفضلة ومحببة للطلاب والطالبات ... فنشـوف وايد نااااس كبار ومتعلمين ويمكن مخلصين داراساتهم العليا وهم كلمتين على بعضهم ما يعرفون يكتبـونها ... يا أخطاء املائيـة فظيعة وعيب عليهم يسـوونها او أخطاء نحـويـة مخجلة !!
ما ادري وين قريـت ان العرب صاروا حتى ما يعرفون يستخدمون حروف الجر وأظرف الزمان والمكان : من إلى عن الباء اللام ... يخبصـون هذا في هذاك ......

فـ لـو كنت أنـــــــــــــا الوزيــــــــــــرة :

كنت بخلي ساعـة يوميــا لحفـظ القـرآن وتفسيــــره والمدرسين لازم متخرجين بتخصص يجمع بين اللغة العربية والتربية الإسلامية! بهالطريقـة الواحد يتخرج من المدرسة بعد 12 سنـة وهو حافظ القرآن الكريم كله ومتقن لغته العربيـة بطريقة تخليـه يفتخر بها مب يستحي منها ...
مب شرات الحين : سور صغيرة في الابتدائي وعقب آيتين أو ثلاث في الاعدادي والثانوي !!!! لا وبعد الامتحان يتبخـر كل شي ...!




ما أقـول ما نتعلم انجليـــزي ... بيكـون الانجليــزي مثل ما قلتـوا وشددتـوا انتـوا خخخ ..!

[تحفه]

تحفـة !

العمل التطوعي ما يستـوي بالاجبـار ...
وعلى طاري التطوع المدرسي .. صار برنامج تكاتف يعطي منح للمدارس اللي بتنفذ مشاريع تطوعية ... وهالشي تقريبا موجود يعني ولو انه مب اجباري مثل ما انتي تبين .... ولا اعرف طريقة تشغيله الصراحة وهل فعلا الطلاب مستفيدين منه او لا !


عجبتني طرق مكافحة الكسل ... في المدارس صايـر العكس .. وحدة شاطرة في الاذاعـة مثلا ، بتم نفس الطالبة تقدم الاذاعــة يوميـا ... لدرجة انهم يستدعون نفس الطالبة تقدم اذاعـة لصـف مب صفها :/
احيد ايام الاعداديـة ... كان عندنا بنت صوتها جميييل في تلاوة القرآن ... يوميــــــــــا هي اللي تقـرا ... ونعرف متى تغيب اذا يـت بنيـة ثانيـة تقـرا ...!!! يعني هم بهالطريقة يهدون طموحات الباقيين ولا يحاولون يكتشفون مواهب او ابداعات ثانية !!!!


ما ادري ليش تبـون الاهتمام بالانجليـزي .... انا اشوف نهتم بلغتنـا العربيـة أكثـر ... لان حتى مدرسين اللغة العربية فاشلين نوعا ما في انهم يخلون اللغة العربية لغة مفضلة ومحببة للطلاب والطالبات ... فنشـوف وايد نااااس كبار ومتعلمين ويمكن مخلصين داراساتهم العليا وهم كلمتين على بعضهم ما يعرفون يكتبـونها ... يا أخطاء املائيـة فظيعة وعيب عليهم يسـوونها او أخطاء نحـويـة مخجلة !!
ما ادري وين قريـت ان العرب صاروا حتى ما يعرفون يستخدمون حروف الجر وأظرف الزمان والمكان : من إلى عن الباء اللام ... يخبصـون هذا في هذاك ......

!

انا اشجع قرارج وبقوه لازم ساعه يحفظون ويقرون القران بالضبط شرات زمن اول! :8: بس الانحليزي مهم لان خلاص صار كلشي بالانجليزي الحين هاللغه ابدا ما نقدر نتجاهل اهميتها!
بس لو تفكرين في العمل التطوعي بتشوفين الفكره وااايددد حلوه ... احلى من قعدت الصف علي فكره .. علاقل يشغلون الطلاب مده ثلاث اسابيع في الكورس :vertag: الاكسبيرينس يبني الانسان ومهم!