مــشكلــتي ..!

[المزوحي]

هي مــشكلتي ... قبل ماتقرون المكتوب ...

واللي بينتهي من القرايه بيقول لي : مـــشكلتك

مــشكلتي إني ما أثق باللي حواليّه ...

بكـيفك عالج عمرك .. انته تعيش هالشي انته تصرف ...

الزبدة إني ما أثق بأي مخلوق على وجه الأرض ...

وليش ثرني شفت كل المخاليق ... مخلوق من بني آدم ..

وليش تعرف كل البني آدمين ..

أقصد اللي عرفتهم بحياتي ... اللي حواليّه .. هلي ..

طيب انته قلت لنا الزبدة ونحن نبغي الموضوع ..

كيف تبغوني أثق ... يوم واحد منكم يقول لي والله ربيعي اللي ويايه من صغرنا ( أكثر من عشر سنوات )

يكلم خطيبتي ( يمكن العيب من البنت )

كيف أثق يوم واحد منكم يقول ... ربيعه وااااااااايد وياه ويكلم حرمته ... بعد ما عطاه الثقة

والحين طلق حرمته لأنه ربيعه خانه .. ( المشكلة من اللي عطى الثقة ! )

كيف أثق يوم وحده تي وتقول ربيعتي من 10 سنوات وماكنت أتوقع منها إنها بتطعني ..

بتقولون أنا ماعرفت اختار ..

الحين بتقولون هاي مشكلتك يالمزوحي ...

مشكلتي إني أفضفض في الواحات ..

مشكلتي إني بعد ما كنت أعاني من وجود صديق أصبح صعب إني أبوح له بأي شي بعد ما حصلته ..

مشكلتي يوم ولد عمي من لحمي ودمي ... وربيع أخويه في نفس الوقت ... عنده صديق ... وواثق منه

يسير يبوح لأخويه بكل شي ومن وراه .. لو ولد عمي عرف شو موقفه ... هالأمر جدام عيني

لكن ماقدر اتكلم ..

مشكلتي يوم

خلاااص ماقدر أكمل ....

هل أنا محتاج لمعالجة نفسية .. هل بحصل حد آهل للثقة ؟؟؟

ما أثق ..

ربعي اللي في الدوام ... ناس طيبين ... لكن ماحبيت ينقال لي سر واحد منهم .. لواحد عطاه الثقة

عيل أنا وسبق تكلمت .. هل هذا إنه اللي قلت له انذاع ..

هيه .. الحين واحد منكم بيقول لي أصابع إيدك مب سوى ... أكيد مب سوى ...

لكن يبالي أحل المشكلة عسب ألتفت لأصابع اليد ...

[ألم ترى]

بسم الله الرحمن الرحيم ..

المصايب يابوك دوم اتي من القراب ! ..

الله يفك همك وغمك وكربك ويسعدك ف الدارين دوم مب يوم قول امين ..

اعذرني ع الأضافه اللي ولا شيء لـ اللي ف قلبك ..

المعذره ..

[اللولوه]

اذا ما كنت تثق في أحد ، فانت سالم من حديث البشر و تناقلهم لاخبارك.

اكتم سرّك في صدرك ، و ارح بالك و ابعد شكوكك .

[أمواج]

.
.
كونــك ماتثــق فـ حد
انا من راي إنها مب مشكــله
.
في نـــاس من دوون ماتعــاشرهم ولا تعرفــهم تحــس إنهم يستحقون إنك تثــق فيــهم بس مجرد احســاس
وفي نـــاس لو ويااهم من سنين وبنين تحس ماتقدر تعطيهم الثقـــه
.
.
ومن خلال قرائتي لـ موضووعك حســـيت إنك تأثرت بالمواقف اللي تصــير حواليــكـ
:fa46:
بس إنت اعط لنــفسك الوقــت
وصدقني بتــلقى اللي يستــاهل تعطيــه الثقــه إن شاء الله لو عقب 10 سنين
بس فالاخيــر بتــلقى حد
.
.

[مــهــابه]

الثـقه..
كلـمه لـهـا معـاني كـثيـره ، نـحن نقـدر نثق بـأشخـاص ثـقه عميـاء
ليش؟
لأنـا ماجد شفـنا فـ حياتنـا شي ، يـهز هذي الثقـه ، ويمكـن
لـ مجرد مـوقف أو مواقفـ نـمر نحن فـيها ، تـخليـنا نفقـد الثقـه فـ النـاس

المـزوحي:
بـ أعتـقادي انـت مرتـ عليكـ وايـد مواقف ، خلـت ثقتكـ تهتـز بالنـاس ، أو بالأحرى ماتثق فيـهم أبـد
لأنكـ شفـت هـ الشي فـ الواقـع

لكـن المفروض منكـ انـته

انكـ ماتـعتقد ان النـاس كلـهم شـراتـ بعض ، لأن لـو الأصابع تشابـهت جان تشابهـوا البشر

لازم يـكون عندكـ يقين بأن هناكـ ناس يجب انك ماتثق بـهم ، وناس تـعطيـهم الثقه لـمجرد انكـ تحسـ بأنهم هـم قـد الثقـه

النـاس اللي يسـتحقـون الثـقه موجـوديـن ، وبـعدها الدنيـا بخير يـاخوي..

[المزوحي]

حتى اللي ... أثق فيه ... عقب فترة وصلني كلام من شخص بدون مايقصد .. عرفت مصدره

اللي وثقت فيه .. وطبعا انا سكتت .. لابقول حق الأول ولا الثاني ..

[صمت الدموع]

السلام عليكم

محد ينوثق به بهالزمن

ماعليك من حد ..

" خل اللي في القلب في القلب يجرح .. ولا يظهر ويفضح "

والسمــوحه

خويتك
صمت

[المزوحي]

انا مابوثق بحد .. وماببوح بأسراري مثلا ..

لكن يوم تشوف اللي وياك ... يسوي أشياء أخجل ذكرها وماودي يتصرفها ....

[بنت النوخذه]

اخوي المزوحي الصراحة معاك حق باللي تقوله لكن الغلط مب على اللي يخونون الثقة الغلط منا نحن ما عرفنا نختار الصديق الوفي الل يحفظ السر
تمر بالانسان اوقات مريرة يحس ان لازم يفضفض عن اللي بخاطره وما يلقى احد يسمع له يلجأ لأي وسيلة لاي شخص سواء صديق او زميل او حتى من خلال الشبكة العنكبوتية عشان يفضفض ويرتاح

[نور الإيمان]

اهلين اخوي المزوحي :1:

الله يسلمك انا تشابكت عندي كلماتك و مب فاهمة هل انت مقصدك انك ما تثق ف احد نهائيا ام انك تشوف الغلط بس ما تعرف كيف تتصرف؟؟؟

و السموحة

[المزوحي]

قصدي

إني ما أثق بحد نهائيا منو ماكان ...

[قصايد غلا]

المزوحي كلامك يا أخويــه صـــح 100% ، كل ما أقرا واحد من مواضيعك اللي في واحة الفضفضة أحس إنه كلامك كله واقعي

وعدم ثقتك بالناس هاي مب مشكله لكن المشكله هي ===> إن الناس بذاتهم ما يقدرون يحفظون أسرار الغيــر

والله أخير وأبرك لك إنك تكتم سرّك ، لأنك إذا بحت به يمكن يفضحك اللي بحت له (هذا إذا كـــان يسمعك أصلا لأنه في هالأيام صعب تلقى اللي يسمعك)

لكن هذا مب معناته إنه مووول ما بتلقى إنسان تثق فيه ويستاهل هالثقه ، بالعكس بتلقى لكــن لازم تصبـــر لأنه مب بالسهولة إنك تلقاه :smile: ...

[المزوحي]

ترى هااي هيه .. من بوني ما أثق ... ويوم حصلت " شخص " بديت أثق به

اتسرعت بإني أقوله وايد أشياء .. بصراحة .. في الفترة الاخيرة استويت كتوم معاه ..

انسان طيب ... يسمع .. مايتسرع في الرد على كلامك .. بس أنا ما اتكلم مثل أول ..

[قصايد غلا]

إذا حسّيت إنه هالشخص يستحق الثقه ، لازم تثق فيــه بس بحدود

وبعد في نظري إنك لو حصلت إنسان تثق فيه وترتاح له لازم ما تبيّن له إنه مووووول ما لك غيره في هالدنيــا ولا تقدر تستغنى عنــه ===> عشان ما يصدّق عمره ويتحرّا إن عادي تذل عمرك عشانه في يوم من الأيــام :ohboy:

[المزوحي]

هو يستحق الثقة .. لانه مب من النوع اللي يتكلم بوجود الغير :look:

لانه في نوعيه ... تخبره بشي .. نهار ثاني يرمس جدام الكل وانتوا يلوووس ...

لكن صار موقفين عرفت إنه تكلم ... فحسيت بإني انـقرصت منه :fa43:

... هممم .. لا ماببين .. باخذ بنصيحتج :fa42:

[الجنيه]

مممم الثقه .. الصراحه صعب جداُ اتلاقي شخص تقدر تيق فيه واتمون متأكد انه مستحيل يطلع الرمسه الي مبينكم لثالث ما أقول أنه مستحيل بس صعب ومحتاي تاخذ وقت كفايه قبل ما أتآمن بشي ع هالشخص *_*

بس تبي نصيحتي الاخويه الجناويه ؟؟؟؟!!!!!

خلك واثق بنفسك واعتبر نفسك هي الصديق الي اتبوح له بكل الي في قلبك وبجذي ما راح تحتاج لاي حد صدقني وهاي نصيحة مجربه *_*

ربي يحفظك ويسعدك وين ما اتكون

[المزوحي]

الجنيه

واحد ويايه في الدوام

يقول .. عنده صديق لكن فوق هذا كله مايعرف كل شي عنه اقصد عن اسراره او كلام محتفظنه

لعمره .. لكن في حد لو عرف شي منك عقب سنة بيقول ليش ماخبرتني من قبل .. !

يعني اقدر اقول إنج ماتثقين بسهولة ؟

[وحيد الدرب]

مرحبا اخوي المزوحي
بصراحه الثقة لها حد وبعدها تصير غباء من الشخص نفسه حتى لو انك تعز واحد وتعرفه من سنين وتثق فيه المفروض لازم تكون حريص معه....
ومثل ماقال حامد زيد

أثر المصايب ماتجيك الا من الناس القراب وبهالزمن حتى الخوي اللي تثق فيه أحذره

يعني ماتخبره كل أسرارك لازم تحتفظ ببعض الاسرار لنفسك.....

[الجنيه]

أنا اصلا ما اثق بحد غير نفسي وبسسسسسسسسسسسسسسس

للحين ما لقيت انسان اثق فيه مثل ما اثق بنفسي عشان جي مسمايه الكتومه ,, اسرار الكل عندي بس محد يعرف شو الي في قلبي صح مرات اتضايج واتمنى لو في حد اقوله عن الي في قلبي بس بعد اقول جذي احسن

[المزوحي]

وحيد الدرب ... لا .. الحين أدرب عمري إنه أحفظ الأسرار .. مب قبل كنت أذيع .. لكن

بكون حريص بزيادة ...


الجنية ..

صدقج .. جيه أحسن ... مرات تحسين بقهر ليش محد يسمعني .. الناس بتسمعج وبترمس بعد

عيل أكيد بتفضلين السكوت عن الرمسة ..

[شمعة أمل]

مب لازم يكون عندك صديق تثق فيه =) .. لو تفكر انه لازم يكون عند ربيع الروح بالروح بتتعقد
الأهل مايقصروووون..they're always there for you

[الدلووووعة]

والله انا سوت بينا سالفة ويا وحده من الشله
وهي وثقت في وحده بعد من شلتنا فالبيت كانت تقول لها كل شي وهي أتي تخبر الشاله عن اللي تخبرها البنت يعني هي وثقت فيها لاكن اربيعتنا خانت هاي الثقة

وانا وايد ويا اربعاتي وبنات شلتي هن اذا يبن يخبرني عن شي اوكيه لاكن انا ابد ماخبرهم عن اي شي خاص فيني

ان بخبر بخبر اخويه ولا اختيه لاكن ماخبر حد برع من بيتنا لنه محد بيحفظ السر إلا اهلي بس

يعني انا وياك انك ماتثق في حد لنه نااااااااااااااااااادر ماتحصل ح
تثق فيه

والسموحة

[بسمة الروح]

أسئلة كثيرة حاول أن تسأل نفسك وتتوصل إلى الحل…كن صريحا مع نفسك .. ولا تحاول تحميل الآخرين أخطائك، وذلك لكي تصل إلى الجذور الحقيقية للمشكلة لتستطيع حلها ،حاول ترتيب أفكارك استخدم ورقة قلم واكتب كل الأشياء التي تعتقد أنها ساهمت في خلق مشكلة عدم الثقة لديك ، تعرف على الأسباب الرئيسية و الفرعية التي أدت إلى تفاقم المشكلة .







مشكور أخوي ويعطيك العافية
وكم جميلة تلك الكلمات وكم تحوي من معاني وحكم رائعة

صدقت فهو إحساس الشخص بتركيز الأخرون
عليه وعلى أخطاؤه وسلبياتة
وعل كل فرد سواء كانت ثقتة بنفسة كبيرة أم ضئيلة
عدم إحتقار نفسة وتقليل من شأنة لأنه لن يجني منه إلا كل ماهو رديء
كاليأس والإحباط والتشاؤم وفقدان الأمل

كم سعدت بقراءة كلماتك الراقية
وملاحظاتك على كل نقطة وتوضيحها
سلمت لنا أخي الكريم
وربي يبارك فيك وينفع بك
حفظك الله ورعاك



تحياتي لك مــن بـــســـمـــة الـــــــروح

[نجم سهيل]

مثل ما يقول أحد الفلاسفه "ليس من الصعب أن تضحي من أجل الصديق و لكن الصعوبه بأن تجد الصديق الذي يستحق بأن تضحي من أجله"


صراحة أخوي المزوحي موضوع الثقه موضوع واسع مثل ما تطرقو فيه أخواني و أخواتي من قبل. و قد يبوح الواحد منا بأسراره الى صديق عمره ظنا منه بأنه قد يساعده في محنته أو يتعاطف معه فيحزن لحزنه ويفرح لفرحته. ولكن كثيرا ما تحدث بأن نجد أسرارنا أنتقلت حتى غدت عالعلكه بين أسنان الشامتين الذين يفرحون بمصيبة الآخرين في زمن صارت به الثقه بالآخرين شبه معدومه. و مما يبكي النفس هو عندما تعاتب هذا الصديق لبوحه بالسر فيجيبك بأنه كان يجب عليك أن تخبره بألا يخبر احدا وان لم تفعل فسرك غدا موضوعا من "السوالف المتداوله"


فيا أخي المزوحي أن الثقه بالناس ليست معدومه كليا ولعل بعض الأصدقاء قد نال حظا في محنة قريبه من محنتك فأظنه أصبح صاحب خبره و ملما بوضعك ولربما يجعله الله عونا لك في مصيبتك.

بس أهم شي خبره ما أيخبر حد :k_unlock:

[المزوحي]

شمعة أمل --- الدلوووعة ..

همممم .... ترى بتقولون لي " مــشكــلتك " !

[المزوحي]

بسمة الروح

يعني أول خطوة إني أنا أثق بنفسي عسب أثق بالغير ؟!

خلنا نقول سبب واحد ... إنه أنا وثق بناس ... حسيت إنه الكلام يوصل للغير

وكذلك نفس الناي يوصولون رمسة الغير .. قلت لاااا .. عيل اطمئن انته ..

لا ترمس أحسن لك ..

[المزوحي]

نجم سهيل .. البعض يتضايج يوم تقوله بس هااا لاتخبر حد

يقولك عيل ليش تي تقولي ..

ومب شرط يشمتون بالسر اللي أقوله

ولكن بعطيك مثال .. يعني أنا أعرف واحد جريب مني .. وهالواحد هو كذلك عنده غيري أنا جريب منه

هو .. تمام ؟؟؟ بعد ما أنا أبوك بسري له ( على أساس مصدر ثقة ) يسير هو ينقل رمستي عند فلان

اللي هو وياه وايد ... بالتالي ما أصبح سر ..

[تحفه]

فعلا .. الثقه مسئله صعبه !

[اصايل]

الثقة في الناس في هالزمن واييد صعبة يوم ان الناس ما يرمسونك الا اذا يبون مصلحة منك
انا اعرف بنت فرقت بين ربيعتها و خطيبها و هم ربع من 12 سنة تقريبا و الحين حتى سلام ما في بينهم
الواحد يطر يكلم النا س للمصلحة فقط يوم يسمع هالقصص
شمعة امل صح كلامج الاهل ما يقصرون بس مرات لازم يكون شخص تحبين تكلمينه و تقولين له اللي في خاطرج لانه اكثر عن اختج او امج لانه مرات الاهل يقصرون او ما يكون كونيكت بينهم
الله يكون في العون يا المزوحي

[المزوحي]

اصايل

ربي يعيني ...

أصابع اليد مب سوى .. لكن بعدني ماقدر أثق .. !