قرار تنظيف البلاد [الأرشيف] - -:: واحات بن دبي ::-

بنت النوخذه

30-11-06 ||, 03:54 PM

السلام عليكم
كثير من مرتادي الشوارع او الاسواق او لاي منطقة في الدولة يقومون برمي المخلفات على الطرقات مجرد فتح النافذة ورمي زجاجة الماء او العصير او حتى علب الماكولات والشيبس
هل سالتو أنفسكم منو اللي بيشيل الوسخ اللي انقط بالشارع مب هذا المسجين اللي يداور من الصبح للمسا عشان يشيل الوسخ اللي تفضلت يا اخي برميه في الشارع وياريت راتبه يستاهل بتلاقاه محصل 600 درهم يالله بتكفيه يعيش روحه منها ويطرش حق اهله في بلاده وانتو تعرفون شقا الصيف حار ويانا
انتو تقولون اماراتنا الحبيبة زين شو قدمتو للامارات اقل شي تسوونه انكم تحافظون على نظاافتها الامارات ما بتطلب منكم اكثر من جي انا الصراحة أأيد اي قرار ينزل فيه عقاب لهذي الفئة من الناس
انت اخي القارئ وانتي اختي القارئة اذا ما كنتو من هالفئة فالنعم فيكم ويكثر من امثالكم بس عليكم انكم تنصحون اي واحد يرتكب هالشي جدامكم
مجرد رمي حبة كلينكسة هذا ممكن يؤثر في جمالية المنظر لان انا بقط وبقول ما بتأثر وغيري بيقط وبيقول نفس الجلام وهكذا بتستوي عندنا مزبلة على الشوارع وفي البلاد
لبيئة نظفية ودولة جميلة لازم نحافظ على نظافتها

المزوحي

30-11-06 ||, 04:19 PM

انا الصراحة هالحركة تنرفزني .. وماحب حد يسويها سواء مواطن او وافد ...

وأكثر المواقف اللي شفتها .. إنه تكرموت سلة المهملات تكون موجودة جريبة منهم ...

بذكر موقف .. مره كنت على شاطي جميرا اتفسح بالموتر ... والناس مبسوطة ..

شفت عايلة هندية هم كذلك مبسوطين ... ركبهم سيارتهم ... عسب يروحون ..

المهم شفت فتحوا الدريشة وعقوا يلاف الموز على الأرض .. هه

بسكت .. قلت لهم لو سمحتوا .. شل اللي عقيته .. ليش جيه .. قال آسف

قلت له لو ماعندك كيس أنا عندي وبعطيك .. بالصدفة عندي كيس المحطة ( ميني مارت )

وموقف ثاني بعد في جميرا ... وبالتحديد عند كافتيريا الإجازة ... طلبت عشا وأشوف عايلة من الجنسية

الهندية ... ام وولدها وحرمه وياهم .. اتعشوا عند الكافتيرا وعقب ماخلصوا فتحوا باب السيارة

وعقوا الأكياس وعلب العصير على الشارع وسارت .. لحقيتها .. وقلت حاولت أوقفها أونه مب

مستوعبه .. عند الإشارة نزلت الجامه قالت نعم .. ليش تضايقني .. قلت لها ليش تحتي الأكياس ..

قالت أنا آسفة .. بس طبعا هي قطعت كذا إشارة وماردت .. صح أنا مابصلح الكون بهالطريقة ..

لكن لازم في رادع .. مثل ماسو حملة ولك القرار عسب المواتر ..

من يوم نحن صغار وأنا أشوف غرامة 500 درهم ... والناس عدال هاللوحة تفر ... اللي تباه ..

وجريب من مركز بوهيل .. هندي .. واقف ... عدال بقالة يشرب عصير وياكل سندويتش والزبالة

العودة ( وانتوا بكرامه عداله ) يعني يمد إيده بيوصلها .. عقب ماخلص فر الوصخ على الارض ..

قلت له ماتشوف الزبالة ... شل اللي فراه وفرهم في الزبالة ..

ومن أيام عند الإشارة .. واحد من الجنسية الباكستانية .. فتح باب السيارة وبصق .. ضربت له

هرن .. فتج جامته وقال نعم .. قلت : ليش وست جيه .. قال شوووووووو انته ماتفهم انا مريض

مريض .. تعرف شو يعني مريض .. قلت له المريض مايحط كلينكس .. قال ماعندي ..

قلت له لاتعصب .. انا قلت لك وانته بكيفك .. لو حد شافك بيخالفك .. ابتسم وسار ..

وهالشي ما اقتصر على الوافدين .. حتى المواطنين ..

شارع الضيافة .. نوع السيارة مرسيدس اس ال .. هالسيارة اللي تعيبني وااااااااايد

وكنت أشوف الشابين مستمتعين بالجو لأنه مخلين الموتر كشف .. شويه وأشوف علبة الجيقارة

على الشارع ... بس طاف عني .. واللي يسوي جيه أديم له ...

والبارحة شباب عندهم رنج ... يتعشون في الموتر .. قلت وناسة .. طالعين الربع مع بعض

ومحترمين ... خلصوا ودق الموتر سلف وسار ... وأشوف شي يطيح من الموتر ...

طبعا .. الكيس على الشارع .. ومب بس هذا .. وايد مواقف وهذا اللي يحضرني الحين ..

زين لو يخالفونهم ..

بنت النوخذه

30-11-06 ||, 06:28 PM

تشكر على مرورك وردك الكريم اخوي المزوحي
المشكلة ان بعضهم يوم بتقوله لاتقط الوسخ بيعاند فيك وبيقط و لا عنده اي اهتمام او بالاصح ما عنده اي وطنية او انتماء للوطن
اتمنى من الجهات المختصة يسنون قوانين تردع هالاشكال ورقم تلفون للخط الساخن عشان نفتن عليهم ويتادبون

دموع قلم

01-12-06 ||, 07:17 AM

وعليـكم السـلام ورحمـة الله وبركـاته

تصـرفـاتـك مـرآة لشخصيتـك..

التصـرفـات التـي يقـوم بهـا المـرء تعكـس صـورة واضحـة لشخصيتـه..
فالشخـص الذي يهتـم بفـن الإيتيكيـت المـأخوذة بالأصل من آداب الإسلام..
عليـه أن يحـافظ على نظافـة أرضـه سـوا أكان من المخلفـات أو البصـق
على الأماكن العامـة.. كما اهتمـامه بنظافـة مظهـره..

تسلميـن أختي بنت النوخـذة على الإفـادة
وننتـظر المـزيد من المشاركـات

:smile:

بنت النوخذه

01-12-06 ||, 11:44 AM