شعبة التفكير بالزواج في قسم الحياة الزوجية

[المزوحي]

كثير ماتكلمنا عن الزواج .. عن البنات والشباب ... عن إقامة علاقة قبل الزواج ومن ثم الارتباط

في زواج يستمر وزواج يفشل وينتهي بالطلاق ..

عن راينا بشاب لو تقدم ... هل يوافقون عليه الأهل .. والفتاة مقتنعة ويكون الرفض من صوبهم ..

اهلها موافقين .. امه معارضة .. الخ من هالكلام ...

لكن يوم توصل الوحده أواخر العشرين (28-32 ) ما اتزوجت .. وهي على خلق ومن عايلة

شو اللي منع إنها تم بيت هلها للحين !!

مايا نصيبها ...

اما الشاب بمقدرته يتكلم ويقول أريد الزواج وطبعا عيب على البنت تقول اريد ان اتزوج

حتى لو رمدت ..

لأنه في مجتمعنا ماعندنا البنت تفكر إنها تتزوج وتسير تبحث عن الزوج ، بغض النظر عن

علاقة حب مثلا وتتفق مع الشاب يتقدم لها ...

لكن الشاب يوم يفكر يرتبط .. يقول ابحثوا لي عن عروس ... سواء عمره 17 سنة أو 30

بس شو اللي يمنع الشاب من الزواج وهو عمره 30 سنة وماعليه قصيره ... راتبه ممتاز

عنده بيت او حتى عنده مكان عند هله مؤقت ... وظيفته مرموقه ... ومتردد يخطب ويؤجل ؟؟

في رايك شو السبب ؟؟

[شوق القلوب]

السلام عليـــكم..


الشاب اللي يوصل للـ 30 .. وهو رافض فكره الزواج بالرغم من توفر كل الامكانيات له..

عزوفه نابع من حبه للاستقلاليه و تعوده على هالشي.. امحصل كل شي في بيت اهله و مرتاح.. و غير مضطر انه يكون مســـؤول عن عايله..

..

هذا اللي ع بالي. .

[الجنيه]

السلام عليكم ورحمة الله وبركاته ...

المزوحي سؤالك في محله واعذرني ع هاي المداخله ...

وايد من الشباب الي تجاوزا الثلاثين من العمر عزاب والسبب عند الأغلبيه انهم ما كونوا أنفسهم وطبعا هذا عذر اقبح من ذنب والبقيه عذرهم بعدنا ما شبعنا من اللعبان ,,,

ويوم الواحد فيهم يفكر يتزوج بيقولك أبا وحده صغيره يعني قوم الطعش والا أول العشرين وعشان جذه اتزيد نسبة العوانس في البلاد

[المزوحي]

شوق القلوب اسعدني وجودج والرد اختي ... خطر على بالي نفس الراي ...

[المزوحي]

الجنية .. يبون يحلون مشكلة العنوسة مثل ماقلتي وياخذون كتكوتة ...

يمكن البعض يقول ... انا مرتاح جيه ليش صدعة الراس وقالت وعيالك يصيحون

بس مب منطق .. تفكر بنفسك بس .. هاذي هي الحياة .. في نظرك ..

[قرموشة]

ممممم .. عايبتنـه عيشــه العـزووبيــه .. ويقـدر يعتمـد علـى نفســـه
مممم يظـن انـه ما يقـدر يتحـمـل مـسؤوولــيـه يهاال وبييت وحـرمـه !

هـذا اللي يا عـلى باالي يالمـزوحـــي .. :fa51:
تسـلم ع الطـرح

:

:fa41:

[المزوحي]

قرموشة

تتريا تتخرج من الجامعة .. خلاص شهادتك فرها ( عفوا على الكلام ) بس مب عذر مثل ما قالت الجنية

ياترى في سر في الموضوع .. سيارة عندك ومصرف عندك ... !

اللي ماعنده يتزوج ويحب يكون أسرة .. شو بلاااك يا صاح ؟؟

[طير الحب]

يمكن يكون تخوف من المرحلة الياية...ويمكن الفكرة الي وصلته عن الزواج خاطئة...ويمكن خوفه من القيود الي اكثر المتزوجين يتكلمون عنها.

[الاسطوري]

السلام عليكم ..


كل الحالات اللي ذكرتوها موجوده وممكـن بعد إن الواحد يتأخـر بسبب
رعايته لأهله إذا كان الوالد عاجز عن العمل أو رعايته
لإخوانه إذا كانوا أيتام وكان هو
الأكبر أو كثر ما
يخطب يرفضونه لأنه مب مكمل دراسته أو وظيفته متواضعه أو ظروفه
تعبانه ومايقدر على تكاليف الزواج في هالأيام وفي
الحالة الأخيرة يلجأ للزواج من
وافده عشان
يصون نفسه وهالشي صـح إنه منتشر بس بعد نلوم البنات اللي يبون
يطلعون من قصر ويدخلون قصـر ومايراعون شـي
ويرفضون لهم 20 واحد بس عشان
يبينون لربيعاتهم
إن وايدين يبونهم وفي النهايـة تطيح علة على قلوبهم واللي ما ياهـا
نصيبها أو شخـص يحمل أقل الصفـات المطلوبـه
تدعي ربها وعسى الله يرزقها
بولد الحلال


الاســـطـــوري
أخوكم

[مــهــابه]

المـزوحي:
يـمكن هـالإنسـان اللي أنـت ترمس عـنه ، عـنده المـال ، والوظيفـه ، والسيـاره ، والبيـت وكل شي
لكـــن، فـي أحـد وراه يـ حاول يـبعد عـنه هالـفكره ، أو انـه فـ بالـه انسـانه مخططـ انه يـاخذهـا بس ينـتظر الوقـت المناسب، ،،
أو أنـه يحس بأن الزواج مسؤوليــه هو مـب قـدهـا ، ويحـس بأن الزواج راح يـقيده وهـو مب قد المسؤوليـه
لأن الزواج مب محـتاج لـ وظيفه وسياره وبيـت
لا محـتاج انسـان فاهم وعاقل وقـد المسؤوليــه

وحـتى لو هو سـنه 30 لـكن يمكـن يحس انه ماراح يقـدر يـتحمل المسؤوليـه

[بوزايد]

امممم انا اعرف ريال جي

يوم اساله يقولي وش لي بعوار الراس خلني عايش حياتي

وفي ناس عندهم كل شي صح بس فيهم مثلا مرض بس مش خطير ويخافون انه حد يرفضهم فعشان جيه ما يتقدمون لحد

وفي ناس ما يكون عندهم حب للحريم

وبس هذا رايي

[سبيجة]

السلام عليكم


صبحكم الله بالخير ... :tongue:

بصراحه ... شبابنا وايد دلوعين ...وبطرانين :fa44: كل شيء متوفر عنده ...وخصوصاً دلع الأمهات ..

يرجع من الدوام أكله زاهب ... يرقد بدون أي حشرة أو صوت .... والكل يراعي ...اخوكم ياي من الدوام تعبان .... خلوه يرتاح:k_santa_1: ينش .. سبح ..ثيابه زاهبه .... ظهر استرغد ويا ربعه أو خلص أشغاله عسب ما تقولون وايد حاطه عليكم :d014: وإذا اتفيج ...قضى شغله وحده بس للبيت .. أو حق حد من خواته ... :a018:

ومحصل ...أكيد اربيعه ...تدلعه وتوعيه ... وتهديه ... وتحاتيه ...غير دلع الوالده .. لا تقولون أبالغ ... لأنه هاللي حاصل .... عيل ليش بيفكر في العرس ...والخسر والصدعه ...وهو محصل كل شيء بدون قيود ولا شروط :11:

البنات الحين مثل الهم على القلب ... بأشكالهن وأنواعهن ... المواطنات والغير مواطنات ..ولا تقولون إنه شبابنا ما شاء الله غاضين بصرهم ... وماشين جنب الحيطه .... :10: طبعاً وأكيد أنا ما اتكلم عن الكل ... بس الأغلبيه ...

وعلى فكرة في وايد بنات ما يبن يعرسن.. وأغلبهن للسبب نفسه ...تطلع وترجع ,,,وتسمع كلام حلو ... تقول ليش أغث عمري بعيال وبيت مسؤوليه .....

في واحد من إخواني وصل عمره 34 ولين الحين ما خطب ..وكل ما نسأله ليش .؟؟ يقول بعده وقت ..مره سمعت صوت وحده يرمسها في التيلفون .. :icecream: استانست قلت يمكن اخويه يحب وبيعرس جريب .... سألته ... منو هاي؟؟؟ :m_afaker: انصدم لأنه كان يرمس على اساس إنها واحد :icecream: قالي وحده ... من إماره معينه ...قلت له ..يعني بتعرس جريب ؟؟ رد عليه ..ما يخصه تربطين ... وبعدين هاي مجرد صديقه :doh: يعني هالصديقه ما تنفع حق عرس .. بس تمضية وقت ...وسد رغبات ... وممكن كان يستبدلها بحرمته ..لكنه فضل حريته على قولته ... :d014:

وأكيد الأسباب اللي ذكروها اللي سبقوني في الرد .. تكون جزء من عزوف شبابنا عن العرس ... بس أنا وايد استبعد سالفة الفلوس لأنه أحلى السيايير يسوقونها ... واللي تكون فوق ال 200 ألف ,,, يعني يفضل السياره على العرس... والبيت ... يعني إذا شاف وحده مظهره سياره كاشخه وأغلى عن سيارته تشوفه بتطنز ,,,على لونها أو أي شيء فيها ... لو حتى سواقة البنت ... بس ما فكر إنه هالبنيه ما وراها لا مهر ..ولا بيت ... يعني من حقها تستمتع براتبها ... :a032:


وآخر أكيد ,,, إنه الكلام اللي ذكرته ما ينطبق على الكل ...

تسلم يا المزورحي ,,,


السموحه

[خنفروش]

مرحباااا المزوحي \\ تدري هالموضوع كنت اتناقش فيه مع واحد من الشباب الي دوم بيني وبينه حوارات ماتنمل \\ وكنت أفكر أطرح الموضوع بس وقفت عند الطريقة \\ طريقة عرض الفكرة \\
لأني ماكنت بطرح تساؤل وبسكت لا كنت بقول أسرار الشباب من خلال إختلاطي بنوعيات مختلفة من العزاب \\ و طبعا ً أنا كاتب رؤوس أقلام فبحط الي أذكره منها

(( و أعذروني على كلامي ))

.
.
.

1 - للحين ما تزوج ولا يبا يتزوج .. لأنه كل إجازة يقضيها في .. فوكيت بتايلند .. أو المغرب أو مصر .. و أحيانا ً لبنان لكنه يكون سار لها عن طريق البر بعد ما نزل سوريا ..

(( إذا شفتوا الشاب مب ناقصنه شي ولا فيه عيب خلقي ولا خُلقي وللحين ما عرس ))

شوفوا وين يسافر ... لأن الإحتمالات وايد ... يمكن شاك في عمره (( عنده الايدز )) أو مسحور (( بالمغرب ))

2 - للحين ما تزوج ولا يبا يتزوج .. لأن عنده لكل يوم ربيعه ... إلا روسيه (( عفوا ً كازخستانيه لالا أرمينيه )) و إلا فلبينيه ... و إلا لبنانيه ... و يمكن عنده وحده (( لوكل )) و الـ لوكل غير مصاريفه زياده

(( إذا شفتوا الشاب مب ناقصنه شي ولا فيه عيب خلقي ولا خُلقي وللحين ما عرس و ماعنده سفرات خارج الدوله ))

شوفوا اكتفائه بالصديقات اشكثر .. بتعرفون ان الريال مافيه شي بس عنده تشبع
(( عاطفي و غيره ))

3 - للحين ما تزوج ولا يبا يتزوج ... شوفوا علاقته مع الخدامه (( هي نعم الخدامه الي فالبيت )) كم خدامه عندهم ... كيف يتعامل معاها ... كم عمرها ... شو جنسيتها ... وين تنام ... متى تصحى ..
شوفوه مع كل خدامه جديده .. شوفوا منو يختار الخدم وليش و منو يدفع الراتب ومتي .. وليش هالخدامه سافرت قبل وقتها .. وليش هذيج سافرت بالكتمان

(( إذا شفتوا الشاب مب ناقصنه شي ولا فيه عيب خلقي ولا خُلقي وللحين ما عرس و ماعنده سفرات خارج الدوله \\ ولا عنده صديقات داخل الدوله ))

اسمعوا التحركات تالي الليل .. و أول الصبح ..


4 - في دراسه تقول أن الرجل إذا تجاوز الـ 30 قلت رغبته في الزواج ... فكرت فيها ليش لأن الأخ تعود على نظام معين طول 30 سنه
(( قولوا 20 سنه لان قبلها كان ياهل وطبعا كل واحد على حسبه ))
انزين تعود على نظام معين يحس انه بالزواج ...

أ ) راح يربك هالنظام

ب ) منو متفيج حق ولدك مريض قم وده المستشفى (( الساعه 3 الفجر )) مرتك بتربي ودها المستشفى (( حالات الطواري العائليه أغلب الشباب يحبون التهرب منها سواء كانوا في الثلاثين او قبله -
لين ما يفهمون أن هالشي مب ضريبة الزواج و الأسرة لالا هاي المواقف هي الي تزيد الروابط و تخليكم عائلة و اتخلي الريال عائل ورب اسرة ))

ج ) طلبات الزوجه .. و متطلباتها .. و زعلها و شوقها .. (( ربيعته إذا زعلت صكر التيلفون في ويها والا هي صكرته .. سار البيت و نساها و نسى وجودها يمكن ..
بس هاي وين يشرد عنها هو امحرج وهي جدامه اتصيح .. و يتم المكان البيت متكهرب لين اليوم الثاني .. ويتم الضيج ... بعض الشباب يظن أن هاي حالة كل زواج و أن النكد طبيعه في كل الحريم أو يحلم بزواج مافي إختلاف وجهات نظر -
حتى في الافلام شي اختلاف هذيل شو يتوقعون بالضبط ))

وترى سبوج معاها حق في كل الي قالته وبقتبس منها هالعباره

(( وهو محصل كل شيء بدون قيود ولا شروط ))

بالفعل ترى الزواج يربط الريل (( الرجل " بكسر الراء )) والعيال يربطون الايد وهاي مقوله معروفه \\ وغالب الي يكون مانعهم بس هالجانب اتحصلهم يتزوجون إذا حصلوا من يعقلهم او يلح عليهم من اهلهم


5 - هالي تذكرته و عصرت مخي لين ما قدرت ارتبه أكيد في تكرار لكلام أعضاء سبقوني و هذا شرف لي طبعا وإن شاء الله أكون قلت شي جديد أو مفيد و ترى هذا ما يتعدى كونه رايي شخصي أ و خربطه خنفروشيه لا اكثر و السموحه

[المزوحي]

طير الحب ... ليش يسمع كلام الغير، جيه ماله شخصيه !!
كل شي بالتفاهم زين .. يعني لو حد من ربعه قال لاتتزوج ياخويه .. الحرمه بلى ...
انته سو لها يوم .. وباجي الايام تراها لك أو تقدر تكون في البيت ...
بعد هي آدميه ...

فهو من البادية مابيترك المجال او إنه يعزف عن الزواج !

[المزوحي]

الاسطوري حياك ...

كلامك اللي ذكرته في البداية انا وياك فيه وفعلا في شباب دينين ومحترمين ... وقد المسؤولية
واللي يؤخرهم في الزواج إنهم مسؤولين عن عايلة ..

أما يسير يتزوج الوافدة عسب الرخص .. خل يحط في باله إنه بيتبهدل عقب سنين ...
وإييب كل هلها هنيه ويشتري لهم هدايا .. الخ
مب عوقنا بس مجرد تذكير ..

[المزوحي]

مهابه .. مرحبا

همم .. ممكن حد في باله وينتظر يفاتح هله او ينتظرها ... لين ماتخلص كلية أو شي هم متفقين عليه
ونحن نجهل أسباب هالشي ...

لكن فكرة إنه الزوجة بتسجنه ... همم على حسب الوحدة كيف ... هو يبغي يكون أسرة مب داخل حرب ..

[المزوحي]

بو زايد ... 2 من هلنا ... عمارهم تقريبا 40 سنة ومب راضين يتزوجون بعلثة إنه الحرمة بتيب لهم الأمراض ... عاد جان هم مرضى ومعقدين .. أمر آخر ...

[المزوحي]

سبيجه .. وينج من زمان ... ولو بقول إنه مب الكل جيه .. لكن الصراحة قلتيها ...
لابنحاز للبنات ولا الشباب والحق يقاااال ...

يداوم كل شي متوفر له وحتى البنت يكلمها واصبح هالشي من ضروريات الحياة ...
لالا كانت ويانا في الكلية .. في الشغل .. تبغي تسأل عن شي .. وهالمكالمات تطول

[المزوحي]

خنفروش .. ماكنت اتوقع يوم بتعصر مخ .. هذا اللي بيظهر منه ..
الصراحة كلامك .. ميه ميه على قولت المصاروى ..

تدري !!
فعلا يحسون بإنه الحرمة حياتها نكد وشكاوي ومايبغي يسمعها ...
وانا أقول الاختلاف يحصل بين أي شخصين أو حتى اكثر
بين هلك وربعك .... وزملاء العمل .. الخ

[ولد الحكومة]

السلام عليكم ورحمة الله وبركاته ...

موضوع مميز جداً ياخوي المزوجي :1:

اكثر الشباب ايعرسون واتكون اعمارهم تتراوح ما بين 30 - 35 ، ايقولك ليش اعرس وانا صغير ، أو يقولك كل شيء غلا اللحينه ، أو يتحجج بأشياء ثانيه مثل انه عليه ديون ( والحبيب مظهر موتر كشخه على البنك :m_afaker: ) وفي بعض الناس ايقولك خلني اتمتع بشبابي ويوم بوصل 30 بعرس :pullhair: طبعاً هالمقوله خاطئه جداً في نظري ، في نظري انصح كل واحد يعرس في حدود 25 سنه. يعني عقبال ما اكون عريس :tounge:

اتمنى التوفيج للجميع

[المزوحي]

قايد الريم لو في هبة عرس يالله .. عن يقول اتمتع .. يتمتع في الحرام ... يقول لالا

الله بيغفر لي ... بسوي اللي أباه وعقب بتزوج يوم الله بيريد

( ملاحظة ) .. مب كل الشباب .. والكلام ماينطبق على الكل ...

[ولد الحكومة]

قايد الريم لو في هبة عرس يالله .. عن يقول اتمتع .. يتمتع في الحرام ... يقول لالا
الله بيغفر لي ... بسوي اللي أباه وعقب بتزوج يوم الله بيريد

( ملاحظة ) .. مب كل الشباب .. والكلام ماينطبق على الكل ...

أكيد شيخي مب الكل . . .

[شهوووودة الأمورة]

مرحب..

اخو ربيعتي.. عمره 30 وللحين مب متزوج.. وحالته الماديه وااااايد أوكيه.. وريال والنعم فيه.. يوم يقولون له ليش ما تتزوج.. يقول ما أبا اظلم بنت الناس وياي.. تعرفون ليش يقول جي..؟؟ لأنه صراحه دوااااااااااااااااامه واااااااااااااايد أرف..
اذا الواحد يغيب عن أهله بالشهووور .. وحتى في الإجازات ما شي رااحه .. وحتى في الأعيااد يداوم.. وشغله مرات فيه سفرات.. بالله عليكم في بنت بتوافق عليه.. !!!!!!!!!!!!!!!
صراحه ما أظن وحده بتوافق عليه ...... هذا رايي..!!

الزوااج مسؤوليه صح.. واذا هو تزوج مثلا ما اظن انه بيقدر ع مسؤولية الزواج.. وكل هذا بسبب داومه.. وبنت الناس ما أظن انها تكوون مرتاحه معاه لأنه أغلب الأوقاات مش موجوود... فليش يتزوج؟؟

انا معاكم انه الزواج نص الدين.. بس في أشيا تمنعه.. شو بسوي؟؟ !! يقدم استقالته مثلا ؟؟!! يمكن..
بس داام هو مرتااح من دوامه شو بتقولون له..!!! ؟؟

ع قول ربيعتي برااايه :h_waa:

واذا عندي شي لي عوده .. يسلموو ع الموضوع :icecream:

[أمواج]

.
.
:fa46:
انا لو كــنت male
مابعــرس إلا اذا تخطيـــت الــ 30
أبغــي اعيش حيــاتي اول وعقب لاحقه على العرس
:glare:
.
.

[المزوحي]

شهوووودة الأمورة

هممم فكرت بكلامج .. قلت صح .. بعيدن قلت لا .. مب عذر

أولا يقدر يقول حق اللي تقدم لها ... عن ظروف شغله .. وغن وافقت واتزوج .. وقت الشغل شغل

ويوم بيكون عندها خلاص .. يتفرغ لها .. مب يتجاهلها وعقب يقوول شغل .. او إنه يغير شغله

اللي يبغي الصلاة ماتفوته

[المزوحي]

امواج :look:

شو هالحياة اللي يطرونها ويبون يعيشونها :k_harhar1:

[أمواج]

امواج :look:

شو هالحياة اللي يطرونها ويبون يعيشونها :k_harhar1:

.
.
الجواب بتلقــاه فـ اخر شي فـ رد خنفرووش
:fa46:
.
.

[اخت اختي]

وممكن يكون الريّال لعّاب.. وتفكيره وصخ.. يمكن والله أعلم..

[المزوحي]

الريال ما قام يهمه شي .. قبل يدس شغلاته يوم يتزوج .. الحينه اشكره !

[الرحيل]

هلا وغلا..الصراحه موضوع مهم ومنتشر في بلادنا..

انا اعرف واحد يوم كان عمره 21 سنه تقدم لوحده وخطبها..

وخلاص كان بيملج عليها..بس بعدين اهل البنت رفضوا وماعرف شو االاسباب بالظبط

كان ريال والنعم فيه..كان بعده مب مخلص دراسه بس كان يشتغل ويدرس..

المهم انتهى كل شي بين الولد وبينه وبين البنت

الحين عمر الريال 35 سنه ولين الحين مب متزوج

يت فتره كان يقول ما ابى اتزوج..بس الحين شكله ندمان على كل اللي راح من عمره

ويبى يتزوج..بس صدقوني مرات يكون الغلط من البنت مش من الولد

مثلا هالريال الحين راتبه مايقارب ال 22 الف وعنده شقه ع حساب الداوم وكل شي

والحمد الله مرتاح

بس فيبه عيب انه مايوفر بيزات..يعني دايمن يحب يسافر في كل اجازه

وهو مب من النوع اللي من قوم بانكوك وهالخرابيط

بس يعني هواايه عنده انه دوم يحب بروح اماكن يديده

الحين كل ما يروح يبى يتقدم ع وحده

طبعا نبى جي وجي وجي...ليش يعني؟

مب جنه هالريال بيعيش معا البنت؟

الحين اذا تزوج بيطر انه يدين ويلعوز بعمره طول حياته...

انا وياكم انه صح في بنات مايهتمون بالمظاهر وعادي لو واحد يتزوج ويدفع المهر 20 الف راضين


صدقوني بس قليل منهم

الحين انت لو تحط موضوع بالمنتدى عن البنت يهمها المهر او لا

صدقوني كل البنات راح يكتبون انه اهم شي اخلاق الولد واهله وشهادته

بس صدقوووووووني والله انه الاكثريه يحاتون هالاشياء وكلهم بس كلام

همهم ولد منو وهمهم شو عنده من سيايير وهالشغلات الزايله

احس الحين كل شي تغير..والله الواحد يوم يشوف الاشياء ويسمع عنها يكره شي اسمه زواج

نحن الزواج ماتعلمنا انه يكون بهل الطريقه

مرات اقول اتزووج وحده ماتعرف الدنيا احسن..تكون بدويه وماتعرف شي اسمه ماركه

جي وااايد احسن من وحده كل يوم مطفره فيني يايه تقولي والله ريل ربيعتي ترى اشترى لها جي

ريل ربيعتي ترى عنده رنج وانت عندك كرولا

في ناس يوم يسمعون هالاشياء يقول شو ابى بالزاوج

دام ربيعي اللي كان وياي بصغري الحين كيف متعذب

واخوي اللي اكلت وياه من صحن واحد كل يوم رايح المحكمه

يقول خلني عايش جي ولا كل يوم هم

في ناس ماتقدر الحياه الزوجيه واكثرية البنات من هالنوعيه..

اكبر دليل بالبنات ادخل الفكلر

وشوف المصاخه اللي هناك..

كل وحده محطيه صورة ريلها واللي محطيه صورة يدها وشفايفها...

يعني ليش هذا كله..؟

انا واااحد ومب محطي صورة غرفتي او شي مني

وهم حتى الحوش بيحطون صورته وحتى راعي البقاله اللي بفريجهم

اشياء تقهر..كل شي تغير..

زمن الماركات الحين...

زمن الكشخه

انا ماجمعت البنات بس الكثير منكم جي..

والسموحه ع الاطاله

الــرحــيــل

[المزوحي]

الرحيل

البنات يذمون الشباب والعكس الشباب يذمون البنات

في بنات يقولون مابنطلب مهر كبير .. وبمجرد مايتقدم يبتدون بطلباتهم ، لانه في نظرهم

إلا ليلة في العمر .. وفي منهم يقولون بنطلب عليه وايد عسب مايفكر يتزوج عليّه ...

وفي شباب ماحبون يتزوجون لأنه عنده كلووووز ... ربيعه اللي 26 ساعه وياه ومب 24 ساعة

انصدمت من واحد يخبرني اليوم .. يعرف واحد مالج .. وعنده ربيع .. يسأله عنه بشكل فضيع

وين ساير وليش ومع من ويزعل وخرابيييط ..


ومب شرط البدوية ماتعرف شي بالعكس البدو تغيروا ...

ومثل هالبنات اللي حاطين صورهم في فلكر الله يهديهم .. ماتحب تعرف إنه مجتمعنا بهالصورة

وفعلا في شباب يسووون حركات ( بصبعهم ) أونه عاااااد .. انا شاب وعاادي

يمكن البنت ماودها ترتبط بإنسان جيه ... وتقول كل الشباب نفس الشي ..


منو يبغي يعرس يا عالم ... خبروني ... ؟؟؟

الشك قبل العرس .. انا احيد الفحص قبل الزواج ..........

[قصايد غلا]

صـــدق إنه الزمــن تغيّــر

البنات استخفّن في هالزمــن والشباب لاحقينهم (مب الكل لكن الغالبيــه العظمى)

فلكر لو يسكرونه أبــرك لأنه دمـــار ،

أول مرة أسمع عن اللي تطريهم يالمزوحي (قوم بو 26 ساعــه) ===> هاييلا لا يعرسون أبرك لهم

عافانا الله صدق إنها دنيــا كلهــا عجــايـــب ...

[الرحيل]

احلى شي بهالدنيا يوم الزواج


مستحيل اي حد يقدر ينسى هاليووم...

اول شهر يكون شهر العسل:11:

وبعدين يبدا شهر البصل..:a058: :d010: :pullhair: :fa32: :d014: :fa43: :frown: :g_aloof: :h_waa:

امممممم

انا عن نفسي ابى اتزوج..بس انت تعرف شو اللي صاير هالايام...

ما اريد ادخل بعمري متاهات من الحين..

لازم الواحد قبل لا يخطي تكون الخطوه صح..


ولازم يكون الاساس صح بصح..

اذا بديت غلط اعرف انه بيوم من الايام كل اللي بنيته بينهدم

[الرحيل]

ترى بالبدايه اقولك مافي بنت بتقول ابى المهر 100 الف

بس انت روح دق باب بيتهم..

عقب بتشوف الاخبار الطيبه..

[نور الإيمان]

stereotype


هذه الكلمة تعلمتها من الكلية التي كنت ادرس بها ^_^

الذي لاحظته من الردود هي وجهات نظر .. البعض منها صنفها إلى انواع و مقتنع بصفة معينة او شريحة معينة من المجتمع من فيها العلل بغض النظر عن محاولة اكتشاف او اعطاء اسباب عن وجود مثل هذه العلل ..

إحسان الظن بالآخرين هذا ما نحتاج إليه .. فلسنا بحاجة إلى امور اخرى تعقد لنا حياتنا و الحمدلله رب العالمين على نعمة الإسلام ..

اما قصة الزواج فهي حكمة رب العالمين ... و فيها يزداد النسل الذي يعبد الله و يعتنق الإسلام و الله غني حميد و الحمدلله رب العالمين ..

كثير من الناس من الشباب ان صح التعبير يتردد كثيرا من ناحية التقدم للزواج .. ولا اخفيكم بأنها مرحلة انتقالية من حياة الإنسان و عليه ان يرسم خطة معينة يجب ان يلتزم بها لأنه مُلزم بذلك و واجب عليه كفرد مسلم يؤمن بالقدر خيره و شره ... لأنه من يعزف الزواج بغير سبب يحتاج إلى عملية تنقية ذاتية من تلك الهلوسات التي يسمعها من هذا و ذاك .. ممن يتذمر من اقل الأمور!!

اتذكر كيف انه اخي يحرض بقية اخوتي في عدم الزواج!! و بذلك يؤثم على فعلته .. لأنه لربما يكون سبب في اقدام اي احد على الحرام بسبب تنفيرهم من الزواج!!

و هل الزواج كله علة كما صورها الكثيرون؟؟ سبحانك ربي .. و هل يأمرنا الله بشيء يضر بنا؟؟ سبحانك ..

ابدا فالزواج نعمة ربانية جليلة علينا ان نشكر الله على ذلك .. فهي عبادة و فيها كسب اجر في تحصين الزوج لزوجته و الزوجة لزوجها ... و في كل امور الحياة تبقى هنالك بهارات حتى مع اهلنا و اصحابنا لطالما تحدث مناوشات و شجار و تعلو فيه اصواتنا و لكننا نغدو قريبين من بعضنا لأننا مرتبطين .. الأخ مع اخته و الأم مع ابنائها فلا غنى عن احدنا عن آخر و هي الحال نفسها بين الزوجة و الزوج .. و ليست قصة عناد و عدم تحمل صفات الآخر ... فلا احد كامل لا انا ولا انت .. و كل منا له نواقص .. و ما خلق الله حواء إلا لكي تؤنس آدم في وحدته .. فهي الصديقة .. و الحبيبة و الزوجة و الأنيسة .. و لطالما يطغى الشوق بين الزوج و زوجته رغم - المناقرة - و المشاجرات بينهم .. فلا بد ان يعتذر احدهما للآخر و ترجع المياه لمجاريها ..

و ان وجد الأبناء ازدادت المسؤوليات و قل الترفيه - ايام العزوبية - لأنه ليس الرجل فقط الذي يشتاق لأيام شقاوته و عزوبيته .. يدخل و يخرج ولا يسأل عنه احد ... كذلك المرأة .. تشتاق لأن تجلس امام التلفاز و تثرثر فيها مع صديقاتها ولا يطالبها احد بأن تطعم ابنها .. او تنومه .. او تبكي على مرضه .. او تغلق الهاتف عند وصول الزوج .. او ان تنظف او تغسل!!! - لربما البعض من الفتيات بدأن هذا العمل منذ الآن ^_^ - فالضغط التي تتعرض له المرأة تجعلها في حالة توتر .. توتر مزعج .. فهي قلقة .. قلقة بتغير شكل جسدها بعد الحمل و الولادة .. قلقة و خائفة ان يتغير عليها زوجها بسبب شكلها .. هي متوترة و تبدأ درجة الحساسية لديها ترتفع ان لم يرمقها بنظرة حنونة تبقى تفكر في كل هذه الهلوسات .. و تعانيه احيانا لوحدها و بصمت كبير ..

هي فقط مشاركة وجدانية بين الزوج و زوجته .. و هو امر غير جائز في الإسلام في ان ينفر مسلم اخيه المسلم عن الزواج !! لأن الزواج نصف الدين .. اي 50% و الشطر الآخر هي العبادات الأخرى من صلاة و قيام و صيام و حج و زكاة و غيرها من العبادات .. فكيف للمسلم ان يكون سببا في شقاوة غيره؟؟؟ سبحان الله ..

يُقال انه يجب ان يبتعد الإنسان من اصحاب النكد و البؤس!! كي يعيش سعيدا و هي مقولة صحيحة تماما .. و كلن يُرزق على نيته .. فالطيبون للطيبات و الخبيثون للخبيثات .. و المنافقون للمنافقات .. فلن يأخذ احد رزق الآخر .. و من اراد منكم الزواج فليصلي الإستخارة و يتوكل على رب العالمين و يخطو الخطوة .. و الله الموفق ..

جزيتم خيرا

[أيامي حزينه]

مرات اقول اتزووج وحده ماتعرف الدنيا احسن..تكون بدويه وماتعرف شي اسمه ماركه

الــرحــيــل

أخوي الرحيل منوه قالك انه البدوية ما التعرف الماركات ......يمكن انته اتقول جذه و غيرك بعد ..... بس البدوية تعرف تفرق بين التيس و العنز و الناقة و البعير و غيرها ما يعرف ..... صح و لا لا ؟؟؟
و البدوية تراها ربت بييت أحسن عن غيرها

[المزوحي]

الرحيل .. اعرف شباب

يلعبون قبل الزواج بحجة إنهم مش مرتبطين .. لكن في منهم يسون لهم كبسة عسب ياخذ اللي

ظهر وياها وعقب تلقاه متغصص ..

[المزوحي]

نور الإيمان كلام جميل اللي قريته ..

البنت ترفض عسب تعيش بحريتها مثل ماتقول .. ماترفض لسبب في المتقدم لها ، ولكن

مثل ماتقول ابغي اعيش حياتي !!

الشاب ... يتزوج ويكون مية مية .. وعقب يقول أصلا أنا مابعطيها ويه عسب ماتتمرد ..

ويبتدي يعاملها بجفوة عسب تتروع منه .. وهذا غلط ولكن هي تنفر منك ..

[الرحيل]

أخوي الرحيل منوه قالك انه البدوية ما التعرف الماركات ......يمكن انته اتقول جذه و غيرك بعد ..... بس البدوية تعرف تفرق بين التيس و العنز و الناقة و البعير و غيرها ما يعرف ..... صح و لا لا ؟؟؟
و البدوية تراها ربت بييت أحسن عن غيرها




ايامي حزينه

افهمي انا شو اقصد بالكلام..

انا ماقصد انه البدويه غبيه او شي من هالكلام حشى علي والله

انا لي الشرف اتزوج وحده بدويه لانه مب شرات غيرها..

وبعدين يوم تفرق بين التيس والعنز هالشي بفرحني واحسن من انه تفضل Dior عن D&G

[أيامي حزينه]

ايامي حزينه


افهمي انا شو اقصد بالكلام..


انا ماقصد انه البدويه غبيه او شي من هالكلام حشى علي والله


انا لي الشرف اتزوج وحده بدويه لانه مب شرات غيرها..



وبعدين يوم تفرق بين التيس والعنز هالشي بفرحني واحسن من انه تفضل Dior عن D&G




أنا أعرف شو تقصد بس حبيت أفهمك تراها البدوية مو مثل انته فاهم ..... أصلا البدوية روحها داهيه
وقوية بعد لا تقرك المظاهر ( مب كلهن طبعا)

[نور الإيمان]

نور الإيمان كلام جميل اللي قريته ..

البنت ترفض عسب تعيش بحريتها مثل ماتقول .. ماترفض لسبب في المتقدم لها ، ولكن

مثل ماتقول ابغي اعيش حياتي !!

الشاب ... يتزوج ويكون مية مية .. وعقب يقول أصلا أنا مابعطيها ويه عسب ماتتمرد ..

ويبتدي يعاملها بجفوة عسب تتروع منه .. وهذا غلط ولكن هي تنفر منك ..

سلام عليكم :1:

اعذرني اخي لكنك لم تفهم المقصد من كلامي الذي كتبته:icecream: ..

لي انني أبرر رفض الفتاة للزواج او رفض الرجل للزواج .. لكنني وضحت كيف انه مثلما الرجل يرفض - البعض منهم - فكرة الزواج خشية ان يفقد ايام العزوبية .. كذلك الفتاة لديها فترة من حياتها تعيش بحريتها تحت كنف والديها الكرام ^_^ و لكنها توافق على الزواج ..

و بالنسبة لي فتاة ترفض الزواج فلديها علة عقيمة يجب ان يتم تنقيتها :fa32:

اما اسباب رفض الرجل في الإرتباط فلقد ذكرها الأخوة .. و لكن اقول ايضا علينا ان نظن في الناس الظن الحسن .. كأن نعطي لكل مسلم اعذارا كثيرة .. و سبحانك .. فنحن لا نعلم الغيب ..

اما تصرف الزوج بعد الزواج و تغيره فهي امور تختلف من رجل لآخر و كذلك الحال مع الزوجة .. ف لا نستطيع ان نعمم او نجزم تماما نفور الزوج من زوجته فهنالك امور عدة تنفر الزوج من زوجته و هنالك امور كبيرة اخرى تنفر الزوجة من زوجها و لا يسعني رصدها كلها هنا .. فهي تحتاج إلى فتح موضوع آخر تماما .. لهذا اكتفي بهذا القدر من الحديث .. و الحمدلله رب العالمين على كل حال ..

جزاكم الله خيراً

[المزوحي]

فهمت قصدج

لكن اشوف نسبة الطلاق عندنا كبيرة

[نور الإيمان]

من ناحية الطلاق هاي قصة طويلة عريضة :a052:

انا سبب دخولي الموضوعي اني شفت ردود كثيرة سلبية و فيها تحديد نوعية معينة من الناس .. و حبيت احبب الناس بفكرة الزواج و انها مب نهاية الدنيا ان لم تكن بدايتها ^_^ و الأفضل ان نحرص ان نزين هالأمور لأنها من سنن الحياة و الحمدلله على كل حال ..

ذكرتني اليوم بوحدة من المدرسات تنصح البقية الباقية من اللي مب معرسات بعدم الزواج :a058: و تحرص على هالموضوع !! سبحان الله ..

اما بالنسبة للطلاق .. اول سبب لها : عدم الصبر ^^

هذا واقع .. الناس الحين قل فيهم الصبر .. الزوج ما يتحمل هفوة من زوجته .. و على طول الطلاق و المحاكم .. و يتدخلون الأهل و تستوي قصة سبحان الله ..

و البنت نفس الشي .. على طول ابا الطلاق و ما اتفكر شو بيصير لها عقب هالكلمة!!

الطلاق يعني الفراق .. يعني بعد ما عشتي قصة حلوة مع هذا الزوج ايام الملجة ايام الزواج الأولى تطلبين الطلاق؟؟؟

الوحدة لازم تفكر بعمق كبير .. و خاصة المطلقات مظلومات بهالمجتمع ..

هذي من ناحية التسرع في طلب الطلاق ..

اما اسباب ثانية فهي كثيرة .. اما بوجود علة في احد الطرفين و يستحسن فيه الطلاق درءا للمفاسد .. او انهم ما اتفقوا و التسريح بالإحسان شرع الله و الطلاق رغم انه حلال لكنه بغيض ..

لكن مفتاح الحياة الزوجية هو الصبر ثم الصبر ثم الصبر ...

و الله الموفق

[المزوحي]

نور الايمان شكرا على الطرح ... وننتمنى إنه الطرفين يعقلون عسب مانرد اللوم على طرف واحد فقط

الله يهديهم ... الصبر ثم الصبر ثم الصبر

[الغاليه]

شكرا يالمزوحي على طرحك هذا السؤال اللي داااااايما ولا زال يدور في بالي .. واللي هو ليش الشاب الثلاثيني واللي كل الامكانيات متوفرتله مايروح يتزوج ؟!!!!!!

عالأقل من خلال الردود قدرت اتوصل لمجموعة من الأجوبة اللي بعضها مايسر مثل ماتوقعت ..

لأن الاجابة المتمثله في .. والله مابغي اعرس عشان اعيش حياتي .. مااااااااااااتقنعني ابدا

طبعا في حالة اذا المقصود بـ ( أعيش حياتي ) يتخللها أشياء حرام ..

لكن إذا أعيش حياتي .. جملة برئية يقصد فيها بس يروح ويرد ويتغدى ويتعشى ويا ربعه وجيه بس عادي ممكن اعطيه سماح عليها ..

لكن الشي الصعب في الموضووع انه كيف بنعرف اذا هو من النوع البريء او النوع الشرير

في حل واحد بس انه نعين مراقب ملازمله يعرف وين يروح ووين يرد وبنعرف كل قصة حياته...


شكرا عالموضوع

[المزوحي]

الغاليه

شكرا على المشاركة

السؤال للبنات، إذا حد اتقدم لج، ممكن يكون من الأهل، وممكن توافقين اوترفضين ...

ووممكن مايكون حد من معارفكم، وتسألون عنه، والرد يكون إنه انسان زين ...

صح انتوا ماتعرفون عن الريال، والناس تقول زين، إلا يوم الزوجة تعيش وياه ...

هل وحده منكم فكرت في يوم، إنه لو تقدم لها واحد، إنها تسأل عن بشكل دقيق ؟؟؟؟ وليش ؟؟

[تحفه]

طبعا لان ابغض الحلال عند الله هو الطلاق XD

ومحد يحب يجازف بنفسه يعيش باجي عمره مع انسان مايعرف عنه شي!

لازم نعرف علشان ما يطيح الفاس في الراس وبعدين يصير مشكل كبير على قولتهم لوووول

[تحفه]

والله وايد حلوه مشاركات الاعضاء فالموضوع

اول مره اقرى الردود كامله

[الهيثــم]

عيبني كلاام الرحيـــل ... الله يذكرك بالخير يا خوي ..

[المزوحي]

تحفه، من تعليق البنات ...

إنه نحن نسأل عنه، وأول شي يقولونه هو يصلي وانسان زين، صح إنه الواحد مب كامل ... لكن يوم تعيش وياه

تكتشف شغلات تخليها تصيح على إنها تزوجت، و بالعكس‘ إنه الشاب ( مب كلهم ) يقول حق هله إما هاذي وإلا

مابغي اتزوج، وبعد المعركة وابغيها وغيره، وانا قد المسؤولية وشو تبون فيّه وهاي حياتي ...

يتغير 180 درجة بعد العرس مب شرط من أول 3 سنوات

[تحفه]

ماعتقد

انا احس ان كلمايتقدم الانسان بالعمر يدرك الامور اكثر ويخاف من العواقب ويفكر وايد

عسب جي الي يتاخرون فالزواج يترددون ستين مليون سبعين تسعين مره قبل لا يقدمون بخطوه

[المزوحي]

تحفه تقصدين من, الحرمة وإلا الريال ؟؟؟

[عمة العيم]

اعذريني تحفه برد عنج

المزوحي انا اقولك (الحرمه)


موضوع حلو و هالسؤال كان يدور في بالي من فتره

و الشباب و البنات ماقصروا في الردود

بالعكس انا عن تجربتي احس الزواج استقرار و بالعكس الخلافات تكون بسيطه لو الحرمه تعرف كيف تتصرف و كيف تتعامل مع ريلها... طبعاً التفاهم و التقارب الفكري اشوفه اهم شي في الزواج و نجاح العلاقه....و الحمد لله بعدنا ماشفنا النكد.......و عن هالمشاكل البسيطه تراها تستوي بين اي حد مش شرط الزوجين......يقولك دوام الحال من المحال...و الانسان مابيحس بالاوقات الجميله و الحلوه لو كانت دايمه و ماكان في شوية زعل و شويه مشاكل و شوية خلافات..... اكيد كل هالمشاكل اللي يمرون فيها الازواج اختبار من رب العالمين و العاقل اللي يعرف كيف يتصرف في مثل هذه الامور....

وانا اقول اللي مب قد المسؤوليه لا يتزوج احسن....لان في وايد بنات يكسرون الخاطر يقولك الريال ولا مفتكر في حرمته ولا جنه معرس عايش حياته الحرمه تشتغل عنده يعني خدامه (اعذروني على هالكلمه بس هذا هو الواقع)

و اقول للبنات اللي مب قد المسؤوليه لا تتزوج.... لأن في وايد عوايل انهدمت و عيال ضاعوا بسبة الحرمه اللي كلما تكبر في السن عقلها ينقص كيف مادري بس انا هاللي اشوفه...


بكتفي لي هني...

تحياتي

(^_^)
...

[المزوحي]

تسلمين والله على الرد والمشاركة الحلوة

صح كلامج اللي مب قد المسؤوليه

لكن الشاب ممكن يقول عسب ما امشي بدرب غلط بتزوج، لكن هالحرمه مايسوي لها اي اهتمام، صح ممكن الريال

احيانا لازم يعامل الحرمه جيه ، لأنه في حريم يبالهم الشدة، لكن في حريم، عاقلات ومتربيات وغيره، ويسمعن

الرمسه، لكن الرياااال مايعاملها عدل، والغير يحس إنها هي مرتاحه طالما هي متزوجة لكن مايدرون عنها إنها تعاني

ف حياتها الزوجية، انا ما اتكلم عن الخلافات اليوميه العادية واللي تحصل بين احد، ولكن التجاهل من الزوج اللي

يحسس إنه الزوجة مب آدميه، ويخليها مركونه، ويهتم في ربعه وناسه ويخليها هي جيه ماتعرف عمرها متزوجه

او بعدها بنت في بيت هلها، هالله هالله فيها ...

ونفس الشي بالنسبة للحرمه اللي تيييب عيال وماتهتم فيهم، وغيرها يتمنى طفل واحد اللي يعاني من عشر

سنوات مايابت طفل واحد، وانت همدج جنه مب عارفه كيف تتعاملين مع اطفالج ...

الزواج مب لعبة الزواج مشاركة وتفاهم ولو فيه خلافات ما اخالف هالشي الصراحه ...

[غلا الوالد]

لأنه لعّاب

[المزوحي]

غلا الوالد شو التحليل الدقيق ؟؟ :look:

[لبن مثلج]

المزوحي:: على فكره هالعينه موجوده في كل بيت والمعاناه :b050:

يمكن لاسباب مادية او كنوع من التضحية ( لانه هو المسؤول عن العايله) او التهرب من القيود..

[المزوحي]

لبن مثلج ويييينج انت اعنبوا منقطعه عن العالم ....

يعني الواحد يزيد الطين بله !

[لبن مثلج]

المزوحي:: انا اذوب في الصيف واطلع في البراد :a100:

وبعدين مافهمت عليك ،، تراني عيزت :fa39:

[مزايا]

أمس في سؤال إنطرح على الحضور ف برنامج أوبرا على MBC 4
وهو : ليش نحن نتزوج ؟!
المزوحي شو رايك تجاوب هالسؤال ؟
عموما هالسؤال موجه للكل

[بنوتة جميرا]

اول شي بجاوب على سؤال المزوحي

من اللي اشوفه في حياتي وشباب عايلتنا في منهم اللي يتزوج قبل 25 سنه واللي ما يتزوجون الا لما يوصلون 29 او 30
ودايما عذرهم يكون والله نبا انكون عمارنا من ناحيه الشغل انهم يوصلون لمكانه معينه
واللي يقولك والله انا مب مستعد ومافيني على عوار الراس من الحين
خلني استانس في حياتي عقب لاحق على العرس
ومن يفكرون انهم يعرسون ياخذون كتاكيت يعني 18 19 وبدايه العشرين
يوقلولك ياهل احسن اتربيها على كيفك، اتروم تعطي اكثر، بتعيش معاه فتره كبيره من حياتها وهي صغيره ودلوعه
وحطوا تحت دلوعه مليون خط وايد يحبون الدلع
والريال يوم يوصل هالعمر يكون لزقه

وعن سؤال مزايا
ليش نحن نتزوج؟؟
لي انا كبنت
اشوف البنات معرسات ابغي اجرب هالشي..خخخ
اكيد مافي وحده ما تتمنى الاستقرار
انها تكون مسؤوله عن زوج وبيت وعيال
شعور حلو والله
وخاصه لما ترزق بأول طفل
اتحس صدق انها لها دور في هالحياه
ما في حد يحس بطعم وحلاوه الزواج الا اللي مجربين

سوري ع الاطاله
بنوتة جميرا

[المزوحي]

مزايا الزواج فطرة ...

[المزوحي]

بنوتة جميرا ... هالشي مايدخل بالي يوم إنه الواحد يقول بعدني .... والاسباب هاااي ..

إلا إذا واحد بادي يشتغل وقال على سبيل المثال بيمع لي بيزتين وبزوج مثلا عقب سنتين او ثلاث ..

هنيه تعذرينه .. لأنه يبغي يرتب عمره حق تكاليف العرس او السكن او مثلا حياته عقب الزواج ...

ووايدين للأسف يلعبون بالمادة لعب .. وعقب 5 سنوات مثلا .. ماعنده شي ويقول والله ابغي اتزوج لكن تنقصني

المادة ... يعني الواحد متى يستوعب ؟؟؟؟؟ يوم يعرف السنوات اللي فاتت ضيع راتبه على اكل وشرب ولبس وطلعات

وصح الواحد ينبسط .. ومايكون بخيل .. بس على الاقل تخلي شي من راتبك في حساب التوفير وانساهن

بالنسبة للبنت .. تفتكر إنه الحريه ممكن تكون عند الزوج، طالما أهلها يمنعونها من وايد شغلات ... وتدعي ربها

يوفقها ... بالزوج ... انا ما اصدمها بالحياة الزوجية، ولكن هالحياة مسؤولية قبل ماتقولين حرية ...

[مزايا]

المزوحي : أبغيك تتعمق فالاجابه على هالسؤال

[المزوحي]

الزواج فطرة وعفة وإحصان ومودة و سكن ورحمة وللتكاثر البشري .. وقبل كل شي سنة الله في الارض عسب نعمرها

[بنوتة جميرا]

المزوحي
ادري ان الزواج مسؤوليه
ومسؤوليه كبيره بعد
يعني البنت في بيت اهلها ما تكون مسؤوله عن حد وعايشه حياتها عادي
بس من تتزوج خلاص عندها مسؤوليات لازم اتأديها بالشكل الصحيح كزوجه وكأم في المستقبل

وتكون حريه بعد واستقلاليه من بيت الاهل
وهذا على حسب الزوج
في مسؤوليه وفي حريه بنفس الوقت
اتروم اتسوي اشيا كثيره ما كانت تقدر اتسويها في بيت اهلها
مثال
وحده من البنات يوم كانت في بيت اهلها قبل العرس ممنوع اتزور ربيعاتها، تطلع واتروح السينما مثلا او اي مكان
بس بعد الزواج اتغير وضعها
تقدر تتواصل مع ربيعاتها واتزورهم، وريلها بروحه يحب السينما يعني ياخذها دوم معاه
وطبقا كل شي على حسب الزوج

سوري ع المداخله مره ثانيه

[جنة عدن]

:k_blush-anim-cl::k_blush-anim-cl::k_blush-anim-cl:
شكرا على الموضوع والله في العمق مثل ما يقولون
-المشاكل متعدده وكثيرة ولو حصيناها والله طويلة وما تنتهي
مثل ماقلت اذا كان كامل المواصفات من الناحية الماديه يكون ناقص من النا حية الدينيه لانو ما يعرف انو الزواج نصف الدين
و كملن يكون مشيو بطال او هيك سيء (اعوذ بالله)
وكمان لو تسالي الشباب ليه ما تتزوجون يقولون وش لينا من عوار الراس؟
واكثر شيء هو الفقر لانو صاير الزواج كثير مكلف وش حيل لي ما عندو؟
صايره الوحدة يوم تفكر انها تزوج ما تفكر في بيت ازوجية والاولاد والحياه الحله
صايره تفكر شلون تقيم عرس فاخر او اسطوري ما لاحد مثلوا
والله الزواج يوم ينبنى على اساس قوي ماينهد ولا يطيح

[المزوحي]

بنوتةة جميرا خذي راحتج وردي كثر ما تبين ... المجال مفتوح للكل وبأي رد ..

كلامج صح وممكن العكس بعد .. أحيانا الوحده تطلع مع ربعها لكن يوم تتزوج ممكن هي تقطعهم، لانها تنشغل

وأحيانا الزوج يمنعها منهم ( من غير سبب ) وممكن كذلك تتعرف على غيرهم بعد الزواج ...

بس الحياة الزوجية مشاركة ...

[المزوحي]

[جنة عدن ...

االامور اللي تترب قبل الزواج من حفله وغيره مب مهمه، كل شي يبتدي بعد الزواج، من أول يوم ..

[شمعة أمل]

بس شو اللي يمنع الشاب من الزواج وهو عمره 30 سنة وماعليه قصيره ... راتبه ممتاز

عنده بيت او حتى عنده مكان عند هله مؤقت ... وظيفته مرموقه ... ومتردد يخطب ويؤجل ؟؟

في رايك شو السبب ؟؟

شي شباب مب مال عرس .. هاييل يسمونهم بوورن باتشلورززز
يحبون الاستقلاليه .. والاكتشنن .. مايحبون يرتبطون ويا حد
ومرات السبب انه لانه هالشخصصصص بزنس مان معروف وجي ف ماعنده وقت لأي شي .. ويخاف اذا يعرس مابيكون عنده وقت لحرمته .. ف مايعرسون لانه مايبون يقصرون في حق حريمهم المستقبليات:fa46: الشخص يفضل يتم عازب طول حياته ولا انه يكون طالق

[المزوحي]

شمعة أمل ... أعرف ريال معروف، وعنده أعمال ... اجتماعات وغيره ... لكن في الصيف مخلي وقت حق هله يسفرهم

لا وكذا دوله بعد ... وفي البلاد، كل نهاية سبوع يطلع حرمته بس ...

اللي يبغي الصلاة ماتفوته ...


وازيدج من الشعر بيت، نعرف واحد .. من وعينا على الدنيا وهو يرفض يتزوج، وقولي وصل عمره الحينه 46 سنة

ريال مقتدر ماليا .. بس دايما يرفض، يقول ماقدر اظلم الحرمه ويايه كوني انا مريض .. يقصد يشتكي من معدته

مادري ليش هالسبب مادخل بالي ... المهم .. من يومين ياني خبر إنه بيتزوج ...

[شمعة أمل]

مايخصه .. انت مافهمت قصدي
انا الى كنت اقوله انه مب كل شخص يقدر يتزوج .. ومب من ناحية ماليه .. لكن من ناحية نفسيه
مب كل شخص يقدر يكون زوج صالح .. حياته أحسن يوم هو عازب من انه متزوج .. لاني في ناس جي .. مايقدرون يعرسون.. ويوم يقولون انه يخافون يظلمون الحرمه .. هم فعلا يقصدونه .. لانه يعرفون انهم مب ويه عرس .. وبتلاحظ وايدين منهم بس يتزوجون عشان خاطر امهاتهم .. بس في الاخير زواجهم يكون فاشل لانهم اصلن مايبون يكونون معرسين

اذا الشخص جي فـ حياته أحسن ك عازب من متزوج .. كـ بنت أفضل ما أكون متزوجه ولا اني اتزوج واحد مايبا يكون زوج ومايبا المسؤوليه .. لانه شو الفايده من هالزواج؟؟ ولو تفكر .. شو بيستوي في العيال؟ الزواج يعتبر فاشل وفيه مشاكل غير انه اليهال مابيكون عندهم اب كـ قدوه .. ف صدق شو الفايده اذا هالزواج مابيب غير المشاكل؟

[المزوحي]

صح .. ممكن تكون فجوة كبيرة في العلاقة الزوجية، بسبب اهماله لزوجته وحتى لو عنده عيال، وعدم الاهتمام فيهم ..

ويكون أناني .... لأنه من الأساس مايبغي الاستقرار ..