سؤال للبنات ومن يرغب من القبايل

[بوزايد]

السلام عليكم ورحمة الله وبركاته

هالسؤال للبنات ولمن يرغب من الشباب

ونتمنى الصراحه

ليش البنت مثلا تتغشى عن المواطن والهندي ( الاجنبي ) لا ؟

اممم

انا من رايي

انه الهندي ما يقول

هلا وغلا

هلا بالشيخه

هلا بالزين

او صوبنا

او او ....الخ


بس لو فكرنا بالاخير تراهم كلهم رياييل

[أمواج]

.
.
امممم
مادري ليش
:a116:
.
.

[الثعلب الرمادي]

يمكن تحب تشوف جمالها في عين الدريول او هندي العزية او راعي البقالة ... يمكن انها ما تعتبر الهندي ريال ... يمكن تحس بالراحة اكثر اذا ما تغشت ... بوزايد احب اسمع رايك!!!

[أمواج]

يمكن تحب تشوف جمالها في عين الدريول او هندي العزية او راعي البقالة ... يمكن انها ما تعتبر الهندي ريال ... يمكن تحس بالراحة اكثر اذا ما تغشت ... بوزايد احب اسمع رايك!!!


اول شي
بعض الشبااب مب شايفين خيرررر موليه
من يشوفون وحده مب متغشيه إلا لازم يشووفونها حتى لو كانت خســفه ومايتبرق فـ ويهها

[الثعلب الرمادي]

انا اشوف كل البنات متشابهين الا نوعين البنت القبيحة جدا هذي تعلق صورتها فبالي و البنت الحلوة بشكل متفوق بعد نفس الشي تعلق صورتها للابد من يشوف الفيراري و ينسى شكلها لكن ما اشوف البنات عن قصد و ما اتخيل واحد من الشباب يسوي هذا الشي الا لو كان مدمن بنات يشوف بنات و يكلمهم و يكتب كم قصيدة يتغزل في جمال البنت و هذي حالات نادرة جدا فالتعميم في حالة خاصة هو اجتراح على الواقع الفعلي و المعاش لحظة بلحظة.

[بوزايد]

يمكن تحب تشوف جمالها في عين الدريول او هندي العزية او راعي البقالة ... يمكن انها ما تعتبر الهندي ريال ... يمكن تحس بالراحة اكثر اذا ما تغشت ... بوزايد احب اسمع رايك!!!

رايي يمكن يستحن منا نحن وحليلهم خجولات

:whistling:


لازم هم يقولون رايهم

[مزن هتان]

انا ما اتغشى
يعني ما اقدر ارد عليك
حتى أنا ابي اعرف ليش :fa52:

[الدمعة الحزينه]

امم

انا ما اتغشى

بس انا ارفض ان الوحده تتغشى من ريال وريال لا مثل ما قال اخوويه بوزايد من الهندي عادي ما تتغشى ومن المواطن تتغشى... ليش يعني انا بعد ابى اعرف؟؟

وواذا بتفكر انها تتغشى تتغشى عن كل الرياييل


يسلموو بوزيوود
الدمعة الحزينه

[أنامل قلب]

امممم ...

؟!؟!!؟

اللي يحضرني الحين وأشوفه ..

إن في من المتغشيات ما يتغطون إلا بأماكن الزحمه .. واللي ممكن تتبهدل أو ينبط جبدها فيه ..
مثل المراكز والأماكن المزدحمه .. <<< يعني المكان المكتظ بالشباب ؟!؟!

^_^

وهذا عشان تبعد روحها من اللويات اللي مالها أول ولا آخر ..
وماتكون سبب لبعض الفتن ..

أما بالأماكن الخالية .. مع الأهل .. الدريول .. بعض المحال اللي مالها خص
بأمور الشباب والمعاكسات وهذي الحوسة .. فتشوف إن مالها داعي تتغشى ..
وهذا إذا كانت ماخذه حكم الغشوة فرض في حال خشية الفتن ..

والله أدرى وأعلم ..

؟!؟!؟

...

مشكور أخوي بو زايد عالملاحظة اللي فعلا تمر على كثير من الناس ..
والسموحة ..

كل الاحترام .. اختك أنامل قلب ..

..

[شمعة أمل]

مــادري .. ماتغشــى ..

[أيامي حزينه]

لأنه الهندي أو الاجنبي ما يشوف البنت بنظره مب زينه وخبيثه

أما المواطن طبعا يطالعها بنظره ثانيه من فوق الى تحت و لا انتو شو رايكم طبعا مب كلهم

ولو كان كل مواطن يطالع البنت بنظره عاديه فما بتحصلون البنات يتغشون عنهم

[أمواج]

لأنه الهندي أو الاجنبي ما يشوف البنت بنظره مب زينه وخبيثه


أما المواطن طبعا يطالعها بنظره ثانيه من فوق الى تحت و لا انتو شو رايكم طبعا مب كلهم


ولو كان كل مواطن يطالع البنت بنظره عاديه فما بتحصلون البنات يتغشون عنهم

.
.
حــلو الكلام
.
.
:a108:

[بوزايد]

لأنه الهندي أو الاجنبي ما يشوف البنت بنظره مب زينه وخبيثه

أما المواطن طبعا يطالعها بنظره ثانيه من فوق الى تحت و لا انتو شو رايكم طبعا مب كلهم

ولو كان كل مواطن يطالع البنت بنظره عاديه فما بتحصلون البنات يتغشون عنهم

اصلا الهندي ما تدرين بالي داخله في شوه يفكر

وثاني شي ما يتجرا

جان عطوه بنعال فعشان جي يمكن هو يشوف بدون ما تلاحظون

والله العظيم اني يوم ايلس مثلا ابدل تواير او اصلح سياره

حتى بالحلاق

الهنود او الباكستانيه اي وحده اطوف يرمسون عنها اقصد يعني من الجاليه العربيه

يعني هم جدامنا ما بيرمسون عنا بس من ورانا اكيد

[أيامي حزينه]

اصلا الهندي ما تدرين بالي داخله في شوه يفكر


وثاني شي ما يتجرا


جان عطوه بنعال فعشان جي يمكن هو يشوف بدون ما تلاحظون


والله العظيم اني يوم ايلس مثلا ابدل تواير او اصلح سياره


حتى بالحلاق


الهنود او الباكستانيه اي وحده اطوف يرمسون عنها اقصد يعني من الجاليه العربيه



يعني هم جدامنا ما بيرمسون عنا بس من ورانا اكيد




شوف على الأقل الهندي يخاف يقول جدامنا أي شي فيقول من ورانا


بس المواطن فيه قوات عين يقول كل الي يخطر في باله جدامنا ومن ورانا ولا يستحي مع انها من أهل بلاده ولا يتلوم


هذا الفرق بينهم

[الدلووووعة]

انا ماتغشى يعني ماعندي فكره
بس هاك اليوم اخويه كان يسئل ها السؤال
وحتي ككان يقول انا الصراحة انقهر يوم اشوف وحده تتغشى واول
ماتدخل المحل عقت الغشوة ويوم تشوف شباب دخلو حطتها
ليش الهندي ماله رب

كان منقهر اونه يستهبلون فالغشوه هيل ولا شو

يقول يا انهم يتغشن ومايعقنها او انهم مايتغشن ويفكن عمرهن من الصدعة

[الجنيه]

بوزايد الصراحه سؤالك في محله وانا عندي رأيين بخبركم بهن

الله يسلمك النوع الأول من البنات تتغشى بس جدام المواطنين وهذا عشان سبب في نفسها احم يعني يمكن يكون غير شريف ما بحط في ذمتي بس من حركاتهن هالشي واضح ,,,

النوع الثاني تتغشى عن المواطن لأنه الصراحه الشباب هالزمن مستوين مره ما ينعطون ويه ابدن ما يحشمون ما يفرقون بين الي تبا تلعب واتسايرهم وبين الي حاشمه عمرها وما تبي شي منهم فعشان جذه من اتشوف مواطن تغشت لانه خلاص كلنا ماخذين فكره عن الشباب المواطنين انهم مغازلجيه ادري انه هالتعميم خاطىء بس ما باليد حيله لانه من بين كل 100 شاب مواطن 3 او 4 منهم المحتشمين وما يخصهم ببنات الناس وهذا رأي اتمنى ما يثير الفتنه بس وجهة نظر لا أكثر ....


وانا عن نفسي ما اتغشى الحمدلله متحجبه وما اتمكيج يعني ماله لزمه اتغشى وفديتني مب وايد حلوه بس امشي الحال يعني ما اعلق في البال ع قولة بعض الناس *_*

بوزايد انت مشاكل

[الثعلب الرمادي]

انا يشوف وايد حرمه في الشارع بس هذا حرمه في غير و قلب مال انا يحب هذا حرمه

انا يسال صديق مال انا منو هذا حرمه و صديق مال انا في معلوم كلش حريم ... فضفضة واحد هندي

في العين كل الحريم يتغشون عن الهندي و عن اللي مب هندي و شخصيا ما يهمني اذا كانت الحرمة مسلمة او لا اللي ما تتغشى في نظري ما تفرق عن اي وحدة اجنبية لا تصلي و لا تصوم في نظري هم شي واحد و السموحة على الصراحة الزايدة ...

[هزاايم]

يمكن عسب تعودنااا:fa55:

بس :3: الكل مثل مثل
والكل له عقل وفكر ومشااعر ويفكر ويطاالع ويرمس ويعلق

[فنجان قهوة]

السلام عليكم

و الله على حسب الموقف

يعني في ناس يتنقبن في السناتر و انا ساعات اسويها
لان ادري شيء مفاليع ياذون الي ما يتاذا

مثلا يوم يدخلن البنات المحل يرفعون الغشوه عشان يشوفون .. انا اشوف انهم يلبسن نقاب احسن و بدون رسم العين لوسمحتن بنات
و يوم يتقولون كيف ما اتشوف ترا المتغشيه يبين ويها اصلا .. البس غشوه و عقب ارمس

و في بنات يتغشن منكر عقولت امي العوده تتحرا الي بيغازلها بياخذها بدون ما يشوفها

و سلامتكم

[الجنيه]

الثعلب الرمادي

استوقفني تعليقك الأخير بشكل فضيع يعني الحين انت الله يهداك اتساوي الي ما تتشغى بـ الأجنبيه الي ما اتصلي وما اتصوم ؟؟؟ هذا رأيك واحترمه بس مثل ما انت عارف اظهار الوجه والكفين جايز ومش محرم اما الغشوه والنقاب فيتعبر قناعه شخصيه بنضري ,,,

تعودنا ع صراحتك وياريت تستمر بها عشان انعرف تفكيرك كيف

[نور الإيمان]

سلام عليكم

بالنسبة للموضوع ..

انا ما اتغشى .. اما في حالات الزحمة يعني مثلا اذا كنت بروح سناتر و ايام الويكند .. فأتنقب ... لأني ما اشوف بالغشوة و احس الغشوة تفتن اكثر .. المهم ..

اما عن اللي يتغشون من عيال الديرة و لا يتغشون من الهنود و الأجانب .. اهني في افتراء و سوء الظن بعيال الديرة ..

لأنه الريال ريال .. سواءا كان هندي .. صيني .. او اماراتي .. أكيد له قلب و مشاعر ولا شو رايكم؟

شكرا :a074:

[الدلووووعة]

اخويه الثعلب الرمادي ( قويه الصراحة تشبها بالاجنبيه )
بس انت حر وجهت نظرك هاي

[قصايد غلا]

اللي تتغشا وتكشف عن ويهها عند الهنود والأجانب هاي بصراحه في نظري ===> "مكـــاره " (آسفة على هذي الكلمة) ، والغشوة تكون بإختيار الحرمه نفسها

ما أعتقد إنه الغشوه تعتبر من الفروض على الحرمه ولا نزلت آيه تفرض علينا الغشوه ، لو هالشي موجود غصبا علينا كلنا بنتغشا ==> لأننا بنتحاسب من ربنا في هاي الحاله
وكلن له رايه ، يسد إن نكون متحجبات لأنه المعروف إنه الشعره بجمره

و لو كان الويــه يفتــن لدرجة إنه الكل يلتفت من تخطف هالبنت هذيج الساعه لازم تتغشا البنت

أنا الحمدلله متحجبه وما أتغشى ومقتنعه بهالشي ، واللي بيتم يطالع بنات الناس بدون سبب ويفج عينه وثمه غادي غير بقرة هذا عاد صدق مستلغث وله رب يجازيه :3: لأن كل شي نحن محاسبين عليــه ...

[الثعلب الرمادي]

يمكن تفكيري بدائي لاني من العين كل الحريم تقريبا يلبسون الغشوة و النقاب و نادر ما اشوف وحدها بويها اعرف ان كل البنات سواء فدبي او الشارجة يكشفون ويهم الا بعض البنات وهذيلا البنات يسمونهم متدينات زيادة عن اللزوم او يسمون الوحدة مطوعة ... يمكن يكون راي متطرف لكن في المقابل اتمنى المعذرة على صراحتي لان اللي يصير فدبي او الشارجه ما يهمني لاني من العين و لان اغلب اعضاء هذا المنتدى من دبي او الشارجة فبتكون وجهة نظري بالنسبة لهم غريبة لكن مثل ما يقولون الاختلاف في الراي لا يفسد من الود قضية ...

[أمواج]

يمكن تفكيري بدائي لاني من العين كل الحريم تقريبا يلبسون الغشوة و النقاب و نادر ما اشوف وحدها بويها ..

دا كــان زمـــان
الحين كل شي تغير
:whistling:

[مهيريه]

السلام عليكم جميعا
أنا ما اتغشي بس لي وجهة نظر بنسبه للغشوه الصراحه مافي فرق بين ريال مواطن ولا هندي الريال ريال فالى تتغشي المفروض تتغشي عن الجميع ولا لا تتغشي من الاصل.

حبيت اعلق على راي اخويه (الثعلب الرمادي) أنا احترم رايك بس لي تعليق بسيط انا اخالفك في الراي انك اتشبه الي ما تتغشي بالاجنبيه لا تصلى ولا تصوم الصراحه حرام اذا البنت لابسه حجاب محتشم اظن هذا كفايه و ما اتصور حد بيتعرضلها.

الشي الثاني كيف تقدر اتعمم انه كل بنات العين يتغشن وهل كل غشوتهن ما تلفت النظر وشو رايك في البنت الي غشوتها تجذب الشباب الها اتساويها ببنت بس متحجبه بس احجاب محتشم.

اخر نقطه المفروض ما تقول انه مالك خص بالي يصير بدبي ولا الشارجه و بس اتهمك العين المفروض ما تفرق في النهايه انته اماراتي لو شوه اتكون الاماره الي انته مولد وعايش فيها غيرتك و محافظتك لازم تكون على الجميع ما تفرق بين حد. وعلى فكره ارائك مش غريبه على دبي و الشارجه
عاداتنا وتقاليدنا وحده بس يمكن تتفاوة من اماره لاماره.

السموحه منك اخويه اذا كان ردي صريح (الاختلاف في الراى لا يفسد في الود قضيه)

[الـيـاه]

همممم
مــــادري !! أنـــا ما اتغـشـى


بس يمكن لانـه المواطـنين عيونهم زايغـه عفاني الله :k_harhar1: لول مب الكل طبعا ً

فـ إذا كانت خاطفه فـ مكان
اكيد لعيون عليها وين ما تسير لكـن ( الاجانب ) ما يفتكرون في هالسوالف
:k_special2:

والسموحــه

.
.
.

[سفير الخيال]

لكل وحده نيتهـــا في الغشوة وما نقدر نجزم الآراء على إنهن كلهن على خطـــأ :smile:



الرجل رجــل وإن كان أعمى, ولا ننسى إن للإنسان حواسه الخمس والشيطان يضرب بهن فرادى أو جمعا. ومـــا كان من العيـــن ما غــاب عن القلـــب او غاب عن الإذن أو غاب عن الأنف, وإن كانت قضيتنا تصب على العين فلا ننسى قضية العـــطر وما هي إلا أدهــى وأمــــر وكذلك الضحك أمام الرجال, فلا نبني أساسا ونسى أساسا وإلا أصاب بنياننا الإعوجاج فـــهوى...


والمرأة المسلمة لا تضع قدما على درب والأخرى على درب بل إنها تمشي على طريق ٍ واحد, وكما قلت ما بالنيـــة لا يعلمه إلا الله.



المعذره!

[الثعلب الرمادي]

my friends let me clear up my mind a little bit :icon_rr: ....

أمواج ...

يمكن لاني مب مهتم بالحريم و بنات الناس بشكل كبير فصرت ما اقدر افرق بين حياة الماضي و الحاظر لان كلهم متشابهين بالنسبة لي ... لكنها مسالة صغيرة راي فيها ثابت و ما يتغير اكيد ما بقبلها لاهلي و اي ريال مستحيل يقبل بهذا الشي (مكياج و ميك اب و تطلع بويها في الشارع) و تخلي كل الشباب من كومار لين تيسير فهمي و محمد عبد العزيز يشوفونها ,,, عاد جي البنت ما خلت شي ,,, بالنسبة لي بنت اجنبية تطلع بميك اب كامل و ميني سكيرت ارحم من هذي البنت مليون مرة.

مهيريه ...

ما اشوف من الدنيا الامارات غير العين و من كل هذي الدنيا العين و الدوحة و المانيا ... اكيد فيه وايد شباب في العين يشاطروني الراي نفسه لكن مثل هذي الاشياء الواحد ما يحب يتكلم فيها بصراحة لان الدين و العادات و التقاليد تتدخل فيها و لاني انسان صريح بطبعي لكن بحدود و لان هذا منتدى لا اكثر و لا اقل فالواحد على الاقل يستغل الفرصة و يقول اللي فقلبه لكن برع الواحات اكيد لو احد سلني عن هذي المسالة فبكون صريح و بقوله اني ارفض الهالشي دون تفاصيل اضافية ...

[سفير الخيال]

عزيزي الثعلب الرمادي :smile:

رأيك نقبلـــه لأنك تملكه ولا نملكه نحن,, ولــكن مــا أزعـــج البعــض الخصخصه والإجمــاع,

فلا يحق لي أنا أن أخــص قـــوما بذكــر ٍ و أجمــع قــوما على ذكر , ففيــها تصبح الآراء الخــاصه ---> عـــامه,,, وهنـــا ينزعج البعض ولهم الحق بذلك :smile:

قــل "البعـــض" يــا أخي ولا تكتفــي فقط بقـــول "أهل العين وأهل الشارقه وأهل دبي" :yes:


لك ما أردت قوله بالنية ولهم ما أرادوا قوله على ما كُــتب


شكرا لكم :yes:

[أيامي حزينه]

في فرق بين البنت الي تحط مكياج وتتغشى عن ابن البلاد و ما تتغشى عن الأجنبي
أما في بنات ما يحطون شي و يتغشون عن ابن البلاد و ما يتغشون عن الأجنبي

في فرق من بين الحالتين

[فركوشه]

من ناحيتي انا.. البنت سواءا متغشيه او لا اهي اللي بايدها اتخلي اي ريال يقرب صوبها او لا وحتى لوكان هندي..

اعرف بنيه تتغشى ودومها حاطه الغشوه.. وآخر شي اكتشفت انه عليها سوالف خايسه.. الله ستر عليها..

وانا عن شخصي ما اتغشى واصلا ليش اتغشى دام اني حاشمه عمري..؟ واذافكرت اتغشى بسمعلي

كمن تنغيز من العايله.. تدرون محد يتغشى عندنا غير المتزوجات..

ومثل ما قلت البنت اهي اللي اتخلي الشباب او الهنود او حتى الزلمات..يتمادون وياها ولا لا..

سواءا كانت متغشيه او امرزه عمرها بمكياااج..

[الجنيه]

أنا عن نفسي اتغشى يوم اتميج وبما اني ما اتمكيج الا لمناسبه مثل العرس فـ الغشوه بالنسبه لي مؤقته ونادره جدا لاني الحمدلله حاشمه عمري بس مره ندمت ع الغشوه يوم طحت وانا طالعه من صالة العرس والحمدلله محد شافني غير اخوي الي ياي ياخذني *_*

[بنت النوخذه]

انا وبكل صراحة اسوي جي مرات مب دايما بس مرات
انا بالاماكن المزدحمة استحي واتغشى مب عشان فتنة بس لاني احس اني بالمكان الغلط فاتغشى اما الاماكن اللي احسها فاضية ما اتغشى
بخصوص اني اتغشا من المواطن ومن الهندي لاء يمكن لاني ابا اشوف السلعة او لانه الهندي ما ينظر لي بنظرة المواطن ولو الهندي تتطاول انا اعرف اوقفه عند حده ان كان مواطن او هندي ما عندي كاني ماني اجلع عيونهم بنت ابويه والنعم فينا هههههه

[بنت النوخذه]

أنا عن نفسي اتغشى يوم اتميج وبما اني ما اتمكيج الا لمناسبه مثل العرس فـ الغشوه بالنسبه لي مؤقته ونادره جدا لاني الحمدلله حاشمه عمري بس مره ندمت ع الغشوه يوم طحت وانا طالعه من صالة العرس والحمدلله محد شافني غير اخوي الي ياي ياخذني *_*

هههههههههههههههههه

[دكتور الحب]

ترى بعظ البنات في هاالزمن يوم تتغشى ما تتغشى خوف من ربها....تتغشى علشان الناس ما تقول شي و ترمس....


يعني كلام الناس عندها أهم من طاعة ربها......

تعرف أن الهندي وحليله ما بيرمس ولا بيقول شي علشان جي عادي عندها.....


والسموووحة

[تحفه]

ما اتغشى :Oo:

[وحيد الدرب]

مرحبا أخوي بوزايد
من يومين صار وياي هالموقف كنت ف السيتي ودخلت محل عطور وكان ف المحل بنتين كاشفات عن ويوهن واول مادخلت تغشن بصراحه هههههههه ضحكت شو تباني أقول
والله قهـــــــــــــــــــــــ ـــــــــــــــــــــــــ ــــر :fa32:

[زمان أول]

امس ياي من السفر كنا ففندق الغرفه الي في نفس الطابق في ناس من الامارات عاد لا تخبرون عن البنات وعند غرفتهم هندي مال التنظيف يالس لانه مسوول عن تنظيف الطابق الي نحن فيه البنت لابسه قصير يعني نص ريلها طالعه ومااعرف شو وتمر حذال الهندي اتسير الغرفه الي حذالهم وعاد انا طلعت فجاه اجوفها جدامي تقول جافت يني بسرعه بسرعه دخلت الغرفه والا الهندي يالس الحبيب عادي ولا جنه موجود سايره وراده ليش يعني يوم جافت اماراتي جي سوت الهندي مب ريال ...؟.؟؟؟

وايد لاحظنا هالشي ؟؟؟

[امير الشجون]

اولا بالنسبة لوجوب النقاب من عدمه .. الاصل ان الواجب على المراة هو الحجاب الذى يستر جميع الجسد الا الوجه والكفين .. لكن اذا كانت المراة او الفتاة جميله بدرجة تفتن الرجال والشباب فيصبح النقاب فرض عليها حتى لا يفتتن بها الرجال خاصة فى هذا الزمن الذى كثر فيه خروج النساء من بيوتهن
اما بالنسبه لارتدائها النقاب امام المواطن وخلعها له امام الهندى والاجنبى فهنا لى وقفه .. قد تدافع مثل هذه المراة او الفتاة عن نفسها بالقول ان المواطن يفعل الافاعيل ويقول الاقاويل لكن الهندى او الاجنبى لا يفكر فى هذه الاشياء وما يقدر يسوى شئ او ينطق بشئ .. اقول ان الهندى او الاجنبى لا يفعل ذلك لانه محترم ولكنه يفعل ذلك لانه يخشى من فقدان عمله وهذا شئ طبيعى .. وبالتالى فانه مثله مثل المواطن حتى وان كان لا يستطيع ان يعبر عما بداخله بالقول او بالفعل ولذلك لا يعلم نواياه الا الله سبحانه وتعالى .. الرجل رجل سواء كان هندى او اماراتى او مصرى او اى جنسية .. وانه خطا كبير ان ترتدى الفتاة النقاب اما رجل وتخلعه امام اخر بحجة انه هندى .. بل ان خلعها للنقاب امامه هو ادعى لان يسير الفتنه لانه يحمل معنى انها تاتمنه ان يرى وجهها بينما هى تحرم ذلك على ابناء بلادها خاصة اذا كانت فى احد المحال ودخل عليها احد ابناء بلادها وراها تعيد النقاب الى وجهها مرة اخرى عند دخوله .. للمراة مطلق الحرية فى اختيار ان ترتدى النقاب او ان لا ترتديه ( طالما ان جمالها لا يمثل فتنه حيث يكون النقاب مفروض عليها ) لكن اذا ما قررت ان ترتدى النقاب فيجب عليها ان ترتديه امام الجميع دون تفرقه .. لان ارتدائها لهذا النقاب امام البعض وخلعها اياه امام البعض الاخر هو وحده سبب كافى لاثارة الفتنه .. فالرجل رجل ولا فرق بين عربى واعجمى او او ابيض او اسود الا بالتقوى

[بنوتة جميرا]

مرحبا اخوي
وشكرا ع الموضوع..

انا عن نفسي ما كنت اتغشى قبل الا في الاماكن المختلطه واللي يكون فيها زحمه وايد بس
وليش كنت اتغشى لاني اكون ماخذه راحتي اكثر ومابا النظرات كلها اتكون صوبي
بس بعد ما انخطبت ياني امر اجباري اني اتغشى ..خخخخخخخ..
وماقدرت اقول لا والا بيقصبوني..خخخخخخخخخ..
ليش مادري؟؟يمكن غيره..خخخخخخخخخخ..

اختكم.. بنوتة جميرا ..

[رويان]

.
.
وجود الهندي في السوق لغرض البيع و الشراء..
اما وجود أغلب المواطنين فلغير الاسباب اعلاه..
الهندي ما راح يتعرض لزبونته..
لكن المواطن بيتعرض لها..
فتتغشى عنه عشان ما يقول هي طالعتني وهي اللي بدت..
و تسد على نفسها باب الذرائع..
ما اشوف ان الموضوع فيه تناقض
اذا تغشت فحلال.. و اذا كشفت ويهها حلال
متى تتغشى و متى تشيلها..
هي أدرى بنفسها و اللي يناسبها ويناسب المكان اللي تكون فيه
.
.
وجهة نظر..

[محقق كونان]

خخخ موضوع جميل :fa34: بس معيود وين ما اسير اسمعه
المهم انا بعطيكم رأي سمعته من دكتورنا الي في الجامعه :unclesam:
والصراحه كان رأي حكيم :14:
يقولكم دكتورنا: احم احم البنت عندها معاير خاصه تقيس فيها الرجل الي تقابله
وعلى اساس ها المعايير تقرر هي اذا تتخشى او لا.. وهاي المعايير تتكون من
لبس.. اسلوب في التعامل.. لغته.. هويته... الخ

ممم الحين يا دوري اقول: انا الصراحه افضل انا البنت تتغشى
واستحقر البنات الي ما يتغشن (رأي الخاص) احس ما وراهن رياييل
واستحقر اكثر يوم اشوف وحدة تمشي بدون غشوه وعدالها اخويا (وجودة والعدم واحد)
خخخ ايضا راي الخاص واتمنى محد يزعل:fa46: ...
اما عن الغشوة في وحدة من الاعضاء تقول ان ما شئ آيه تفرضها...
احب اقولها سيري قري المصحف زين.. وفقهي عمرج في الدين اكثر:14: ...
يعني بذمج الحين اهلنا كانوا يتغشون بس جذي بدون سبب دقه راس :a058: ...

[الاسطوري]

السلام عليكم ..



اما عن الغشوة في وحدة من الاعضاء تقول ان ما شئ آيه تفرضها...
احب اقولها سيري قري المصحف زين.. وفقهي عمرج في الدين اكثر:14: ...
يعني بذمج الحين اهلنا كانوا يتغشون بس جذي بدون سبب دقه راس :a058: ...


ياخوي إذا عندك دليل من القـــرآن يحرم
كشف الوجه نورنا به !
:k_icon9:


بعيد عن الغشوة صار لي موقف البارحه كنت في الاستوديو ساير أصور وطبعا كان في حد داخل فـ
قالولي ايلس شويه لين يخلصون اللي داخل وتميت حوالي خمس دقايق
واسمع اصوات كراسي وماعرف شو المهم
عقب طلعت وحد كاشخه
شكلها إذا ماكنت غلطان سايرة عرس بس قبله ماره تتصور وطبعا للعلم اللي وياها ويصورها طول
الوقت ريااااال إيراني الجنسية والشيله مجرد ديكور محطوطه على الراس
لأنها يوم طلعت وشافت مواطن عطتني ظهرها
عشان تخش زينة
ويها وبس تخلي الريال يشوفها فـ راوتني شعرها والتسريحه اللي ظاهره من تحت ،، المهم دخلت
وتصورت وطبعا الحين يصورون دجتل وعقب قلته راوني كيف طلعت
صوري جان يفتح الصور ويحط ايده
يغطي على
الشاشه عشان اذا طلعت صور البنت انا ماشوف يعني سبحان الله صح فيه ذمه وضمير بس
يعني انت بروحك المفروض ماتشوفها وين تبى لو وحده تصور
بنقول ماعليه أوكيه تسوي اللي تباه
بس الله المستعان


الاســـطـــوري
أخوكم

[عمة العيم]

ماااتغشى الا يدام البـــتان و العياذ بالله :(


(الغشوه فرض لو البنت تكون متعدله و متبرجه) )))هالكلام للمحقق كونان(((

(^_^)
...

[همس الدماني]

في العين كل الحريم يتغشون عن الهندي و عن اللي مب هندي و شخصيا ما يهمني اذا كانت الحرمة مسلمة او لا اللي ما تتغشى في نظري ما تفرق عن اي وحدة اجنبية لا تصلي و لا تصوم في نظري هم شي واحد و السموحة على الصراحة الزايدة ...[/quote]



لا يا خوي شو هالرمسه مهما كان بس هالرمسه كبيره واشكرك على صراحتك


بس انت ما تعرف شو في النفوس في ألف بنت متغشيه بس افكارها كلها غلط والبنت يوم تشيل عدل ومتحشمه تكون اجنبيه او ما تصلي هاي الفكره غلط لأن الله سبحانه وتعالى ما امرنا بالغشوه اهم شي يكون الأنسان متحشم وانا بصراحه اشوف المتحشمات احسن من ألف وحده تتغشى انت شو دراك يمكن لبستها غصب يمكن هي ما تصلي الله واعلم ما في القلوووب.....




وانا عن نفسي ما كنت اتغشى بس هاي الفتره يوم انتقلنا حق بوظبي استغفرالله اكثر الشباب مب شايفين خيروخصوصا نحن في مناطق صحراويه(خليفه أ_ خليفه ب_الفلاح _الشامخه _الشوامخ _الرحبه)والباجي ما اعرفها لأني بعدني ما تعودت فرق السما والأرض من الجميرا حق الصحرا




يعني انا في الدوام ما كنت اتغشى بس والله يطالعوني بنظرات وصخه تخليني اخاف ارتجف وانا بطبيعت الحال بيضا وألفت النظر وخصوصا لأني هب متعوده على هذا الشي نحن عندنا في دبي عمري ما شفت حد شي صح في مغازل وحركاااات بس مو جي

فستويت اتغشى بس مو فكل مكان بس وانا طالعه من المدرسه ويوم اسير اماكن كلها شباب

ويمكن الأغلبيه ما يتغشون من الهندي لأن نحن تعودنا على هالشي يعني تخيل تعيش ويا دريول في نفس البيت وتتغشى وخصوصا لو كان الشخص يشتغل عندهم من هي صغيره فتكون متعوده عليه واتشوف كل الهنود مثله

بس ما في فرق لأن كلهم ريايل ان كان مواطن او هندي او غيره
وصح كلام اختي المواطن استووى قوي عين وما يفرق بين المحشومه والصايعه



وترى هاي مسأله تعود يعني انت اخوي تعوت ان كل بنات العين يتغشن بس نحن في دبي البعض منا اللي تتغشا مو شرط تكون مطوعه انا عن نفسي الهبل من ساسي لين راسي


وفي العين الشباب ماشالله ما يقصرووون والله هاك اليوم في العين مول دعمني واحد ومتعمد بعد بس جي عسب يغازل وحتى في جبل حفيت (حتى لو جيكره بيغازلونها)


وتسلم اخوي على طرح الموضوع.....

[محقق كونان]

للي يبون دليل من القرآن
فالكم طيب
وهذا هو الدليل من سورة الأحزاب آية 59
واذا عندكم تفسير للمصحف اتمنى انكم ترجعون اليه:
قال تعالى:-
"يأيها النبي قل لأزوجك وبناتك ونساء المؤمنين يدنين عليهن من جلبيبهن ذلك ادنى أن يعرفن فلا يؤذين وكان الله غفورا رحيما"
وحق الي قالوا انه الغشوة بس تكون للمرأء المتعدله
وحاطة ميك اب احب اقولهم انهم هم يوم حللوا
نتف الحواجب.. الغشوة هب صعبه عليهم

[عبرات حالمة]

بالصراحة هالموضوع موضوع شائك
مافي اي رد بيرضي جميع الاطراف
اولا على سؤال الاخ انا معاك
كل مرة اشوف بنيه اونها متغشيه وفجاة تفك غشوتها
انقهر لان هالسلوك نفاق وما يكون لهم عندي اي احترام
انا بصراحة مو مقتنعه بالغشوة عسب جي ما اتغشى
لكن اللي اونها مقتنعه ليش النفاق؟!!
الريال ريال مهما كان اصله