يوم نحس في حياتي

[ذنـيـنـي]

دائما نشوف مواضيع مثل
اجمل يوم في حياتك,
اطرف موقف صارلك,
موقف ما تنساه و اشياء من هالنوع


في هالموضوع كل واحد يقولنا عن ظرف صعب مر فيه,
أو يوم نحس مر عليه
و حتى مواقف مضحكه و فكاهيه لكنها صعبه

قولولنا شو صار له بالضبط بالتفصيل الممل...

[مايهزك ريح]

يوم نحس .. اليوم اللي وصلت فيه لسنغافورة في العيد .. كانوا ملخبطين لنا في الغرف .. :mad:

بيني وبين الصغاريه اكثر من عشر غرف .. بلعت السالفة ..ودخلتهم حجرتهم واطمنت عليهم .. وسرت غرفتي ..أول ما دخلتها .. جان ألقى واحد فيها .. طبعا انا تميت جيه :k_shock_1:

سكرت الحجره .. والحمدلله انه مالاحظ اني دخلت :k_harhar1:

سرت للمسؤول اللي في الفندق .. وقلت له عن اللي استوى .. عطوني غرفه ابعد من القبليه :7:

وبعد ربع ساعة اتصل لي المدير يتعذر عن اللي استوى .. وقال لي بعطيك ليموزين ايكشتك في البلاد أو اسوي لك late check out ..بس انا طلبت انه يعطيني غرفة connecting عشان عيال اختي ما يكونون بعيدين عني .. :thumbup1:

بس كان يوم نحس من اوله .. لأنه الطياره اتأخرت عن موعدها .. ويينا الفندق ولقينا اللخبطة ..
وما لحقنا على أول Tour ..واضطريت اني ازيد يوم .. عشان الحق اشوف الأشياء ..

وبعد اول يوم الوالدة انخفض عندها السكري وايد .. وتمت تعبانه طول الليل .. واعتفسنا .. :fa55:
بس كانت رحلة حلوه .. صح اني شفت الويل .. لكن يله .. تغيير :bye2:

[طير الحب]

يحليلك ما يهزك ريح...بس أكيد استمتعتوا بباجي السفرة..

[صدى جوفي]

الـسـلام عليكم،،

كـان يوم نـحس بالقو ..

كـان عندنـا عرس ربيعتي وهي أساسـاً وحدة من الأهل والعرس كـان فراس الخيمـة..

مرت عمي نست موبيل عمي الآيميت فالبيت فدقت لي أييبـه معاي.. والآيميت قد القفعـة فمـا وسعتـه الشنطـة .. فكنت شالتنـه وفالسيارة عطيتـه أختي تحطـه فشنطتهـا..

@ ظهــرنا سيـارتين من عيمان - ومـا كنت مرتاحة من الروحـة - .. وأول ما خلصنـا من شارع الامــارات الا السيـارة وقفت عــلينــا :fa39: - نحـاسـة ..!- مــا عليـه السيارة الثانيـة موجودة وركبنـاهـا للقاعـة ..

@ فـالقـاعـة يت مكـالمـة لموبيل عمي .. ظهرته من الشنطـة - شاشـة الموبيل منكسرة ..!!!- :bye2: >>>>> تميت متلومـة طول الوقت

@ عقب العرس ركبنـا مع عمي وأختي بحظنهـا عمور .. وعمي يسوق انتبهت أن عباتـه ظـاهرة برع .. بطلت الباب والسيارة تتحــركـ :6: وسحب التـاير عباتهــا :7: وعمور بحضنـهـا .. بس الحمدلله الله ستر :fa54:

مـا تسوى علينـا الروحـة والله

[ألم ترى]

بسم الله الرحمن الرحيم
هلا ناصر
:fa41:

اليوم الحزين
مداوم ع الاسعاف فوصل لنا خبر عن حادث وحالة وفاه
ونحن سايرين واول ماوصلنا شفت واحد ملحف بشرشف ابيض
والله كان قلبي يدق بسرعه وانا من النوع اللي ما اخف من هاي السوالف كونها مني وفيني كـ خدمه 9 سنوات
المهم سميت بالرحمن وشلت الشرشف عن ويهه ف طلع رفيجي الروح بالروح !
:wow:
اللهم يرحمه وتجاوز عنه

اليوم النحس
كنت اكلم لماح يوم كان اسمه المنحوس وهذا اول يوم اكلمه تقريبآ وهو كان يكلمني عن النحاسه هههه
جان ادعم باب البيت وخبرته عن السالفه فقالي ها شو قلتلك !
وانا بعدني اكلمه وصلت لـ الملعب جان ادوس هوز مال ماي وانطر واتعصب عليه الشغاله ههههه
عاد ف هالسالفه امنت بأن المنحوس منحوس فديتك يا احلى منحوس
:a010:

اليوم المضحك
كنت اعايب رفيجي وانا يالس امثل واضحك الشباب عليه جان ينطر ادريس ههههه
عاد تعال اسمع الضحك وين واصل ياريال صدق لوااامه !
مرت الايام وجان يصير له نفس الموقف اللي صار ليه
وامسات كان مارلي البيت ويالس يضحك ع عمره ويذكرني بالموقف
:b015:

اليوم الاجمل
بشكل خاص انا احب اتوفق ف شغلي وخاصه ف الحوادث
لما اشوف شغلي صح والمصاب مرتاح من شغلي ف والله اني ارتاح كل الارتياح
عاد لما اوصل الدوام والله ربعي يلوموني وكل شوي واحد يقولي الاسعاف مايسوى من دونك !
وانا مول ما احمر واخضر من هالرمسه واخاف اخيب ظنهم فيه مع ان سمعتي واصله لـ مراكز ثانيه
وكم مره حاولوا ينقلوني لـ الافضل بس المسوؤل عني مايرضى ابد حد ينتقل من عنده !
:boxed:

شكرآ ع الطرح
:8:

[مــهــابه]

اممم يـوم نحـس ، واحس انه فـعلاً نحس..
يــوم عرس اختـيه ، يـقول لكـم رحـت الصـالون ورجعـت وكشخـت
وخـلاص بسيـر الصـاله يادوب البس الفـستان واتوكـل..
تـخيلوا ، مـاعرفـت البس الفسـتان عدل ، لأني كـنت مســتعيلـه
وفـ الاخيـر انقص الفســــتان ، اتوهقـت شو اسوي الحين..

مـاباجي ع العرس إلا سـاعتين ،اممم وفسـتاني فيـه حركات وربشه هب حيالله خيـاط يعدلـه
ألف وألف ادور خيـاط عدل ، والكل يقول ماعرف

وخلاص الكل سـار الصاله ، وانا دمعـتيه فـ عيني شو الحل.؟؟


الفسـتان مب منه فـايده، اممم شو اسوي

قـلت خلاص مابسير العرس، اشـوي وجان ايي اخـويه ويقـول لي طوفي بنسير نشتري لج فسـتان

مارضيـت ، كيف اطلع فـ السناتر بالمكياج والتسريحـه

المهم راح اخويـه واشـترى الفسـتان يحليلـه ع ذوقــه ، ولبسـته رغم انه كـان طويل علي بس ماكـان امبيـن لأنه منفووش شوي..

ووصلـت الصاله مـتأخرة ، الكـل يضحكـ علي ، بس ذاكـ اليوم

صـدق حسيـت هب انه يومي نحـس لا بل انـا نحسـه


ذنيني:
ثـانكس ع الموضوع

[طير الحب]

بو عبدالرحمن موقف وايد صعب...أكبر من انه الكلمات توصفه

[مايهزك ريح]

ألم ترى.... قلبي عورني يوم قريت اليوم الحزين ..

طير الحب .. استمتعنا .. بس لازم اتكون اشوية تنغيصات ..

مهابة ..يحليلج .. كله ولا الفستان .. مصيبة .. انتوا يالله يالله اتحصلون حد يخيط لين يوم العرس ..وين لو نفس اليوم ..يخترب فيه شي وادورين حد ايصلحة ..

[الثعلب الرمادي]

في احدى الروايات المشكوك في صحتها يروى ان الثعلب الرمادي و قبل الامتحان الكبير في الجامعة ذهب ليشتري بعض زجات الماء و نسى مفتاح شقته في السوبر ماركت و لم يعرف ذلك الا عندما وصل الى شقته التي تبعد نصف كيلو متر عن السوبر ماركت فضغط على ازرار بعض الشقق في العمارة التي يسكن فيها عل احدهم يجيبه و ياخذ زجاجات الماء منه فاجابته احدى الفتيات و الثعلب الرمادي يعرفها جيدا (يتبع) ...

[عنود الريف]

عاد ما بغيت الا انا اتذكر .. انا ام سلوم .. ما اذكر
وااايد مواقف انساها ومعرووفة بالنساية ...
بس بستمتع بمواقف الاعضاء الباجين ..

[ولد الحكومة]

:a049: وحليلج عنود الريف انتي بعد تنسييين !!! أكيد ناسيه انا منووووه ؟؟؟

امممم انا الصراحه ما كد حصل موقف ..:m_afaker: .

عالعموم استمتعت بمواقف الاعضاء.


والسموووحه




اخوكم / قايد الريم

[ذنـيـنـي]

صارلي موقف لا أحسد عليه يوم سافرت السنه الي طافت, كانت نحاسة على مدى يومين و اسميني اضحك على عمري يوم اتذكر الي صار في هاليومين
=========
القصه كانت على يومين, الجمعه و السبت قبل ما اسافر ألمانيا

الجمعه, الساعه 8 و نص الصبح نشيت و تريقت كالعاده و و يلست ويا الوالده الله يطول عمرها
على الساعه 9 سرت اجيك على شنطتي و اشوف شو ناقصني و اكتشفت, اني مضيع جيس ثياب فيه 4 تيشيرتات و هذه هي بدايه القصه

قلت بطلع و بسير السيتي و باخذ ثياب بدال الي ضاعت, يوم وصلت هناك طلعت ناسي فلوسي في البيت, الي انقذ الموقف انه بطاقه البنك كانت في السيارة,, سرت سحبت و دفعت لهم. و عقب ما خلصت من محل الثياب مريت باريس جالاري و اشتريت عطر دنهل اليديد و طلعت من السيتي

رديت البيت و تغديت و عقب الغداء سرت وديت اخواني الحلاق عسب يترتبون قبل السفر, يوم طلعت من الحلاق ييت بدق السيارة سلف,, افففف ابطاريه اختربت, ياهي نحاسه جايستني :fa39: , اتصلت باخويه و ياب سيارته و جرجنا البطارية و تحركت

رديت اخواني البيت و سرت اسلم على الشباب و تميت وياهم الين المغرب, عقب المغرب سرت اسلم على قوم يدي لأنه طيارتنا بتكون الساعه 7 الصبح,, تميت عندهم الين الساعه 10 و عقب طلعت و ركبت البيك أب " اعتقد انه اغلبكم يتذكر قصتي وياه :k_harhar1: " و حطيت فيه كل الاغراض و عقب سرت بيت عمي و حملنا اغراضهم في البيك اب و سرنا انا و ولد عمي المطار عسب اندخل السامان, خلصنا من المطار و دخلنا اغراضنا و ردينا عيمان.

الساعه 4 ولد عمي مر علي و سرنا انا و هو و اخواني الـ 3 المطار لأنه الحريم بيتأخرن عسب اليهال و جي, فـ ما بغينا نتاخر وياهم, يوم دخلنا المطار و عند اول نقطه تفتيش اخويه حط الهاند باغ في جهاز التفتيش و على حظنا الجهاز الي اخترناه ما فيه حاجز ورا يقبض الشنطه و و و و و طااااخ طاحت الشنطه و انكسر الدنهل الي اشتريته الصبح:boxed: ووووووو انجب على الكاميرا :shocked: عاد انا تعقدت و مزاجي تم متعكر :pullhair:

يوم وصلوا اهلي الوالده قالت نفاد ينفدها من غرشه, سر خذلك عطر من داخل على حسابي عاد منو قالها تقولي اخذ على حسابها لوول:fa56:


المهم

استوت الساعه 7 و ركبنا الطيارة و اقلعت و حطيت راسي ورقدت,, يمكن كملت أقل عشر دقايق, ولنه الاخ ولد عمي يقولي ناصر قوم قوم, كيف يشغلون الآي بود ( اخيييييج من وين طلعلي هذا :a046: )

بغيت ارقد مره ثانية, لكن ما رمت ( لاحظو تراني من الساعه 8 اليوم الي قبله ناش و ما رقدت غير هذه الـ10 دقايق يعني 24 ساعه + 7 ساعات في الطياره, يعني 31 ساعه)
وصلنا مطار ميونيخ و خلصنا جوازاتنا و كلنا مستانسين و سرنا عسب نشل الاغراض,, كل الشنط موجوده الا وحده,, وييينها شنطة ناصر :7: ,, عاد قوم يا ناصر و سر و سو بلاغ بفقدان الشنطه و تم في المطار ساعه و نص :wacko: عقب ما خلصت من مشكله الشنطه, سرنا نستلم سياراتنا و حملنا فيها الاغراض ( صارت 33 ساعه متواصلة بدون نوم )

ركبت السيارة و صديت ورا, ولنه الجماعه ناقع بينهم البكس و قاموا يتضاربون على الاماكن عسب يرقدون,, طبعا كل واحد منهم ماخذ زاويه و راقد, عاد نحن كلنا خمسه في السيارة و السيارة ام 9 و محد واعي غيري انا و اخويه الصغير -مايد-
انطلاقنا كان من مدينة ميونيخ في ألمانيا, الي بلدة زيل آم سي في النمسا و الطريق في الظروف العاديه ياخذ 3 ساعات من القياده كـ حد ادنى و في اوقات الزحمه تستوي 4-5 ساعات (:fa48: انا مب راقد)


قبضت الدرب و الجماعه الي وياي رقود مع انهم راقدين فليل, و راقدين في الطياره, قبضت الدرب بروحي و اسمع اغاني المانيه على الـ FM مالهم و مايد كان يالس جدام و يسولف وياي مرات ( اصغرهم لكن اريلهم:m_atmasha: )

سقت لمدة ساعة بدون مشاكل, و على الساعه الثانية بديت اسطل و اشوف الشارع شارعين قمت ارش على ويهي ماي عسب ما ارقد ( والله انه من كثر ما كانت عيني تغمض كنت ابطل حلجي عسب اير ويهي و اتم عيوني مفتوحه, بالضبط شكلي كان جي :shocked: لوول ) عاد يوم شفت عمري مول مب رايم اسوق, اتصلت بالوالده في السيارة الثانيه, اللووو امييه اقفوا في اول استراحه, قالت لييش, قلتلها اوقفوا, مالكم خص ليش :a046:

نزلت من السيارة و تميت اركض شرات الخبله عسب اتنشط, و سويت حركات هبله و غبيه بس اهم شي عندي اني اصحصح, خلصت من الركض و الحركه و خذتلي ريدبل عسب يعطيني جوانج و اصحصح و اوصل بالسلامه

كملت دربي الحمدلله بدون مشاكل و وصلت زيل ام سي و لقينا الفندق الي حاجزين فيه
طلعت ويانا العيوز مال الفندق و راوتنا غرفنا, عاد اخويه اول ما وصل دخل الحمام -و انتوا بكرامه- و انا كنت انتظره على السرير على اساس اني ادخل عقبه و غفلت من كثر التعب و ما وعيت بعمري الا و انا ناش ثاني يوم الصبح و ثياب السفر علي, تخيلوا حتى الجوتي و انتوا بكرامه ما فصخته :3:

الوالده قالتلي اني رقدت 15 ساعه تقريبا خخخخخخخخ

اول ما نشيت سرت ادور شنطتي و تذكرت انها ضاعت, :a116:
عاد الحمدلله,أنا و أخويه نلبس نفس القياس, سرت تسبحت و بدلت ثيابي و نزلت السوق على اساس اني باخذلي ثياب, افففففففف
اليوم الاحد و كل شي مبند, في نفس اليوم اتصلت بولد عمي في البلاد و قلتله ياخذلي 3 جنزات و 5-6 تيشيرتات, لأنه كان بيلحقنا عقب يومين

قزرت عمري بثياب اخويه الين ما يابلي ولد عمي ثياب يديده



و الحمدلله عدت المشكله على خير
من اتذكر هالسالفه اقول يا عساها ما تستوي لا لعدو ولا لصديج

[طير الحب]

نا صر ذكرتني بزيلامسي وايامها متولهه اروحها بس تعال زيلامسي مافيها محلات لبس (المحلات الي فيها غاليه اكثرهم يروحون ميونيخ للشوبينج) منطقه جبليه مشيء الي السوبرماركت كنا ساكنين مجابل مكادونالد...الله يكتب لنا نزورها مرة ثانية هالمرة مع عبادي ان شاء الله

[شوق القلوب]

السلام عليكم..


نـــاصر..





أنبني ضميري..


حرام كنت مضايج و انا يالسه اضحك...


..


آآسفه و الله ..
^_^



عسى ربي يرزقك بأيام.. حلووووووووه... تذكرها كل وقت و كل وقت و كل ساعه .. ^_^

[ذنـيـنـي]

شي محل عقب الكنيسه الي صوب الساحه
خذت منه 2 برمودا و polo-shirt لأني ما بغيت البس وايد ثياب من عند اخويه,

كلهم طلعوا بـ 20 يورو لوول

[ذنـيـنـي]

شوق القلوب

كل الي اقولهم السالفه يضحكون علي لوول

عسى الرحمن ما يفارق البسمه عن ويوهكم (دنيا و آخره)

[طير الحب]

والله زين...تعرف نحن نفكر نسيرها بس عن طريق سالزبورج بدل ميونيخ...احلى شيء يوم سرنا القمة اول مرة في حياتي اشوف ثلج صدق...من كثر ما انا مستانسة تذوقت الثلج...وبعد دخلنا البحرية بطراد وغرزنا ...انا صورت عملية الانقاذ..هههههههه

تعرف انا ما اذكر شيء نحس بحياتي احاول اجلب النحس لفرح حاولت اتذكر شيء ضايقني ما تذكرت

[مايهزك ريح]

يحليلك يا ذنيني ..

ذكرتني بسالفة اخويه يوم كنا مسافرين كلنا البحرين .. اخوية مأجل على اختي الصغيرة تشل اغراضه .. هو وحرمته وتحطهن في السياره وهي نست ( كنا سايرين بسيارة ) .. ويوم وصلنا البحرين اكتشفوا انه اغراضهم في البيت .. ونحنا سايرين ثلاث ايام .. وكناديري ما تيوز عليه .. اسميني ضحكت عليه لين قلت بس ..
كان يغسل نفس الكندورة كل يوم ويلبسها .. لا وبعد الكندورة اللي لابسنها كانت حق السواقة يعني كجرة ومشنقله .. تميت امشي بعيد عنه فشلني .. هيهي

[عيون الليل]

لـوول مواقف وأيام نحسه بس يوم الواحد يتذكرها يضحك والبعض منكم يزعل . . الله يبعد الزعل

اخويه ذنيني . . المحل الي عقب الكنيسه زين يمدحونه الي اييك ع اليمين والكنيسه اتكون ع يسارك . .

شكلكم كنتوا نازليين ف البوست :thumbup1:

أما انا ف عندي يوم ما انسـاه طول عمري. . .

يوم ما سويت حادث واتكنسلت سيارتي وحطيت لكم الموضوع . . . والحمدلله اني ظهرت من الحادث بسلامه . . .

أما لو أتذكرت شـي ثاني ف بقولكم إن شالله

شكراً يا ذنيني ع الموضوع ^_^ بس ما قلت لي ما حصلت الشنطه بعدين؟

[ذنـيـنـي]

ام عبادي

يالله محلاها سالزبورغ
وايد احب هالبلاد, بعكس ميونيخ الي ما ادانيها >> زحمه و ارف و ما فيها شي غير الاسواق

سوق سالزبرغ

http://static.flickr.com/25/36287641_886bef183e_o.jpg

بحيرة زيلامسي, فندق جراند

http://static.flickr.com/21/35149406_be4c745387.jpg
=============
عيون الليل, لا وين في البوست

لو كنا 4 ولا 5 مب مشكله
كنا تقريبا 23 شخص سكنا في شقق ديانا الي صوب سوبر ماركت بيلا

لا والله شنطتي ما لقيتها, حاس انه حد خذاها بالغلط, و ما ردها, لأني كل يوم كنت اراجعهم بالتيلفون و من اسير ميونيخ, انزل اهلي و اسير المطار اشوف سالفه الشنطه >> مب عسب الثياب, الوالده تحاتي السح لوول و غير هذا فيها مكينه الربو مال اخويه الصغير

[عافك الخاطر]

السلام عليكم
النحاسة اللي ف موقفي ما توازي النحاسة ف موقفك خيو :doh: > كسرت خاطري ..


امس واليوم كانوا انحس يومين ..هو بالاحرى وحدة الله يسامحها تنيحست علينا :fa55: لانه هي ما قدرت اتسير اتشوف فلم كنا نترياه .. فـ تمت اتقولي ( ان شاء الله ما اتسيرين :k_shock_1: )


انا واختي كنا مخططين نسير السينما يوم الخميس .. بعد ما اخلص من الجامعة اتمر علي ونسير .. المهم .. هي تعبت وما قدرت اتيني ..قلت يا الله مب مشكلة بنسير عقب .. رديت البيت ..جان اتقولي بنسير بعد صلاة المغرب .. وعقب تعبت زيادة .. وهي عاد ما تبا تكسر بخاطري واتقول ماشي طلعة .. فـ قالت زين خلاص بس بنسير المطعم جي ع الساعة 9 .. قلت اوكي مب مشكلة :pullhair: وقعدنا انا وهي عند التلفزيون .. قلت لها بنسدح شوي وازقريني عقب.. شوي والا انش واشوفها رااقدة .. وشفت الساعة 10 :k_shock_1: .. قلت لااا .. راحت الطلعة خلاص
اليوم الثاني اللي هو اليوم .. طلعنا من وقت عشان نروح السينما ..الفلم كان بيبدا ع الساعة 6 ... سرنا جراند سينيبلكس ..ويوم سرنا ناخ1 الت1اكر.. الحرمة قالت sorry,there is a technical problem .. wait 4 the next show انا اهني بغيت اصفع عمري :fa43: يعني ها التكنكل بربلم ما حصل الا هالفلم !و هالحزة اللي احنا سايرين فيها.!
جان اقول ل اختي ما يخصني الا نسير انشوفه ف اي مكان!.. قلنا اجرب سنتر هو وافي.. ويوم سالناهم طلع النكست شو بعد نفس الشي الساعة ثمان .!. قلنا خلاص ماشي غير مركاتو .. ويينا بنتصل الاستعلامات عشان نتصل ف السينما ونتخبرهم عن وقت العرض .. المهم .. اول شي اتصلنا ع الاستعلامات ..ربع ساعة وهم مشغوليين :pullhair: ومحد يرد .. آخر شي يوم ردوا علينا عطونا رقم not in use ..دقينا مرة ثانية عشان نتاكد .. وطلع نفس الشي !! ..عقب استسلمنا وسرنا مركاتو .. عل وعسى نشوف الفلم..وع حظنا عقب كان الفلم توه بادي :fa56: داخلين ع اول لقطة .. وختمنا النحاسة بظفر اختي اللي انكسر واحنا طالعين :doh: ..
وبس

[هزاايم]

فكرة غريبه
عجبتني الصرااحه
سلم تفكيرك الترتووبي

يوم نحييس ماينتسى:fa43:

كنا بلندن اتفقنى وياربعنناا ان رااح نروح بلو واتير موول بعيد عن الداون تاون حقتهم:doh: المهم يعني ياخذ ساعتين بالقطار وساعتين قريب الثلاث بالسياااره قلنا عسب حنا شلة عووده ونريد نعيش الأجواء والحشره وجذى فقررنا ناخذ القطاار اقنعنا الأم والخالات عسب يظهرن معانا ولا يحشرنا بألووهااتهم وتكوون السيووله متوفره:a014: خخخخ المهم مني مناك تعالوا و ونااسه ومطااعم وكوفي شووبااات وماشي عرب ولا سلام ولا حال وأحوال وعلوم فلان وعلان ومحلات حق الصوغه بالأخير اقتنعوا
صبااح يوم الثاني إلي مفرووض نروح لذاك المكان الموعود إلا اسمع ابويه متصل بأمي وامي تفتح ستااير الغرفه والفضول يذبح قعدت خلصت امي مكالمتها على طول نستجوب ها أمي بلاه ابويه تقولي ماشي طلعه انا اقول نعم والدمعه اشوي بتنزل تقولي شوفي برع وش صاااير
كان يوم 7-7-2005 يوم الإنفجااراات وحنا ساكنين قريب من اجواار روود استيشن اصلا كان الإنطلاق من هالإستيشين والوالد قايل لاحد يتحرك من الشقه لين مايرجع من االبلاد
وكل شي اتنكسل :bye2: بس لووول نمنااا نوومه ماحسينا بلي يصير حولينا خخخ على قولت يدووه نومت أهل الكهف
وانحبسناا ثلاثةايام بالشقه لايمين ولايسااار حتى تسكوو"الدكان على قولت ولد اختيه" إلي هو تحتنا ماشي :fa43: بس شي الحلو إن الأكشن صووبنا يعني دورياات وحاله ومانسمع صوت السكااارى ونسهر برااحتنا خخخخخخخ الإنجليز ضاربين حزن وحنا :doh: لعب وبلاي ستيشن وصغاااريه مأذين ييرانا الحمدلله عرب هب انجليز جان دعوا علينا
خخخخخ إلي يضحك إن ماكان عندنا حد كبير يعني رياالنا اخويه الصغير اسمي متبهدل انزل ييب هذا و الشي ثااني يوم الإنفجارات اختي مطلعه عيالها بالبلكوونه تقولهم امي وقفوا خلوني اصوركم فيديو ذكرى امحق ذكرى:doh:

ومارحنا المول مع الشله الأنس
بس رحنا يوم عايلتنا تيمعت "حنا ونسايب"
وبس

[عيون الليل]

يا خســـــاره والله . . كان المفروض تشتكي عليـهم لانه هذا أهمال منهم . .
مره اختيه صارت لها نفس الحركه كانت يايه من ألمانيا بدال ما ايطرشون شنطها دبي طرشوهن دبلن لـوول . . اسميها واجعتهم إلين يابوهن لها . . أتصدق لو طالبت بتعويض بيعوضونك ! لانه إيخافون ع سمعتهم

ديانا يمدحونها ^_^ . . وسالزبورج حلوه بس غاليه وايد وايد بالنسبه لباقي المناطق وانا بصراحه مليت منها لانه يلسنا كم يوم. . خلصنا كل الأماكن الي فيها . . بس بقى القصر الي يمشون له الين فوق طبعاً ما سرت لانه مافيه ع المشي على قولت أمايه يوم اتشوف الشواب الاجانب ايسيرون مثل هالاماكن الي فيها مشي وتعب أونه " هاييلا عفاريت ما انروم عليهم " لـوول فديتها

السموحه منك يا أخويه . .
:)

[مجموعة إنسان]

يومييييييييين ما بنساااهم

الكورس اللي فاااات كان عندي امتحان انجليزي واللي في الجامعه يعرفون اللفل 3 .. هو اخر لفل عدنا واذا نجحنا ندخل امتحان الأيلس وبنفتك من الأنجليزي ..
كنا 3 انا وربعي نذاكر وشادييين حيييلنا ( اخر شي انقطع حيلنا ) المهم .. كنا ندرس مع انا ما باقيلنا غير 6 درجات على النجاح .. نحن مواصليين قاعدييين ندرس ونحفظ وصلت الساعه 7و30 والمتحان الساعه 8 .. تونا طالعين من بوابة السكن واللى تكسي يسويلنا بوووووووووووووووووووومب .. دعمنا على الباب ..
لييين ما يت الدورية وهالكلاااام اللا المتحان فايتنا مع انا ما تأخرنا غيير 10 دقااايق ..
سرنا عند العميييد واللي في الجامعه يعرفون محسن الغيلي .. مافي حد يدانيه .. انا دخلت اول واااحد تهازبت معااااه شوي ويا ربيعي وكمل علييه ويا الثالث وزاده وماعاد الأمتحااان والسبب حادث ..
عاااد عدت الكورس والسبب الانجليييزي

..

يوم الخميس الماضي
وانا راجع من العييين وقاعد اكلم الوالده اقولها شو مسوييين غدا .. قالت احلى سمج مشوااي .. عاد انا طالع ويوووعاااااااااااان .. وفي نص الخط بين العين وبوظبي وعلى خط سويحان اللي مافي سيارة تخطف عليييه انطر التاااير .. اهاااااا
قلت ماعليييه بضرب جيييك
اشيك واللا مافي جيييك ومافي بانه .. والحل
مافي غيييره اتصلت بالدرييييول وقلتله اينيي .. عاااد هندي احمسة براااسه لييين مافهمته المكاااان .. المهم المسافه يمكن تاخذ 45 دقيقه .. وصل الدريييول وانا اللي ضربت الجيييك مافي ثقة
في الهندي
المهم الدريول الغبي واقف حذالي ومخلي سيارة ابوي شغاله وواقف يطالعني كيف اضرب جيييك !!
اوني بطلع ذكي قلتله انته تعال بسيارتي عشان ما تسرع وانا باخذ السيارة الثانية .. واول ماحركت السيارة واشوف الكيج 180 اشوف الليت مال البترووول مولع .. قلت يمكن بيوصل .. والخط مافيه ولا محطة بتروول اللا قريب البييت .. وصلت قريب الشهامة واللا الموتر يقطع وهااا بزووور وقوة ومحاولة واحط الجير على الأن وجذييي وصلني البييييت .. قلت حلو باخذ فلوس منهم لان البوك في سيارتي وبسيير وانا طالع من باب البيييت واللا رنج سبووورت يخطف وراي والحكااار مايعرف يسوووق ويشحفني وراا .. انا ماتأثرت سيارتي لأنها اول ريدي مشحووفه والمسكيييين يتحسف لانه سيارته من بمبر لين بمبر مشحوفه بس قال مايحتاي دورية (ولد حلاال )

[دانة حتا]

اممممممم اتعس يوم يكون دايما اليوم اللي اضايق فيه

واسعد يوم يوم انه الدراسه خفيفه وانا مبسوطه وربيعاتي حوالي هذا في الجامعه
وفي البيت يوم اهلي كلهم بيرجعوا ان شاء الله واخوي يتعافى


ووووووووو بس

[دانة حتا]

هواجيس هذا كله لانك طقن

وبعدين شو حكااار؟؟؟

ترجم

يحليلج هزايم هميتيني والله

[رمــش الغـــلا]

كيف طلعلي هـ الموضوع مـآدري

بس صدق ضحكككككككككككككككت وانا اقرآ المواقف

واحلى شي موقف ذنيني .. ااااه نحااسة من الخاطر لوووووووول

ههههههههه كل مواقفكم حلوة ..


انا كمن موقف عـ بـآلي ..


قبل العيد طـآلعين انا واختي العودة ... عاساس ببدل لبس اختي الصغيرة وبوديها الصالون المهم
رحت المحل بدلت وخذتلها لبس ثاني والفرق طلع لازم ادفع 15 ..!
اانا ما عندي الا نوط بو 1000 في بوكي .. واختي العودة كان في بوكها بس عشرين خردة لول ..!
دفعلته وطلعنا اتصل اخوي العود يبـآ اختي اتسير له شيشة البترول لانه ناسي بوكه ! وحزتها كانوا اخواني كلهم فالمسيد الباقين ..
المهم عطيت اختي الالف لانه يوم راحت تسحب بيزات من المكينة سحبت بطاقتها !!
ليش وكيف ما ندري
والقهر انه ريلها يداوم فالبنك اللي حسابها فيه ! بس كان مسافر !
ف سالفة لين كلمتهم وخلتهم يوقفون البطاقة

وعقب هذا كله انا واختي وبنت اختي فالصالون يقصون شعرهم لين اختي ترجع وخلصنا !!
وماروم ادفع لانه اختي شلت اللي عندي لول !

المهم بعد هذا كله .. وصلت اختي وخلصنا وردينا وعرفنا انه كانت نحااسة ضاربتنا لول =)

^__^ ولي موقف ثانية بعد

[شوق القلوب]

ناصر.. بعد تميت اضحك على موقفك بعد هالسنين .. كله و لا سالفه المراكض عند المحطه :)

[الهيثــم]

ههههههههههه ، رمش شو سوييتي !
أنا من ربع ساعة أشوف اسم ذنيني تحت " يشاهد الموضوع حاليا "

ذكرتييه بمواااقفه المنحوووسة ^__^

[طير الغرام]

http://oasis.bindubai.com/bin/uploaded/1184_01253720525.gif


الله يبعــد عنــكـم هـ الأيـــام !

:

أقــدر أسمـي اليـوم [ يــوم نحــس فـ حياتـي ]
والسبــه الجامعــه والدكتـور النحــس وأسلوبــه النحــس

ع أساس اليـوم لازم أقـدم بروجكـت والقهـر هـ البروجـكت من ١٠٠ !!
وأنا اشتغلت عليـه قبل العيـد ،، وطول الإجازه والعيـد كنت مريضـه ما كــان لي بارض لـ هالسوالـف
وفـوق هـذا الدكتور أذكر إنه قالي عـادي إذا تبين اتقدمين هالاسبـوع ولا عقب وأنا خـذت ع كــلامـه !!

والقهــر إنـه اليـوم يـوم ييـت بستأذن منـه عشان أأجـل لـ الاسبوع الياي أو أي وقـت ثاني ما عطانـي فرصـه أبـرر موقفيـه
أبـداً أبــداً وللعلـم أنا وخمس بنات معايـه كنا فـ ويه المدفـع !! داومنـا من البدايـه وحددلنـا المواضيـع وحددلنـا وقت التقديم فـ البدايـه بعـد
شو ذنبنـا إذا احنـا امداومين من وقـت وملتزميـن يستويبنـا جيــه !! :image005:

واااااايد وااااااايد قهرني وعقب اكتشفت إنه في بنات قبلي رمسوه ومن جيـه هو عصـب !! [ والله زيـن ما صحـت بس مسكـت عمريه ما أداني حد يرمسنـي جيـه اشوي وكنت بسوي دروب لـ الماده وأفتكـ من شيفتـه !! ] :mf_leia:

ع أساس الرمسـه اللي ما فيهـا احتـرام والإسلـوب البايـخ ،، خلاص فقـدت الأمل لنه قالي بتنقصيـن واااااااااايد إذا ما قدمتـي
وحضرته الإسبوع اللي قبل العيد ما داوم وإحنا نبى انراويـه شغلنـا لنه صـدق الطريقـه اتلخبـط وما عـرفت كيف أنهي الموضوع !! وكلاسنـا يوم الأحد يعني مافي مجـال !!

طنشـت الكلاس اللي كان عندي قبل ورديت السكـن وع السريـع ظهرت المعلومـات لين ما يا وقت المحاضره وأنا خلاص باصمـه بـ العشر إنه زفت X زفت !!

وبكـل برود شو قال الدكتـور البنـات اللي ماحضروا قبل العيـد برد أشرحلهم الرمسـه اللي قلتهـا قبل واللي حضروا يقدرون يطلعــون
والله حرق أعصابنـــــاااااا ع الفاضــــــي وبس تـرااه بعـده ع رمسـته إنـه بينقص فـ الدرجات :sad:
وآخـر شي شو قـالي عـادي أنا براعيـج لا اتخافين وتعالي عندي المكتـب عقب وبساعــدج !!

هـ الجامعــه مذلــه مذلــه مذلــه :mf_leia: أكـرهه أكـرهه وما بنسـى هـ الموقــف !!


http://oasis.bindubai.com/bin/uploaded/1184_11253720525.gif

[عهد الوداع]

:4::4::4:

[رمــش الغـــلا]

خطـآب .. شفت عـآد هههه صدق ضحكت وانا اقرآ أمس لووووووووووووووول =)


=======

طير .. حبيبتي والله >< مشكلة يوم يتناحسون الاساتذة !!

=======



موقف ثـآني استوآلنا كنا طالعين اانا وخوآتي وبنت عمي ويـآنا
المهم ونحن عـأساس وجهتنا لـ صحارى

اختي العودة تسوق وماخذتنا السوالف ما نتبهنا الا ونحن فـ دبي ..!*
قالت خلاص بنسير دبي مول !!
عأساس طالعين نتعشى ونرد ..
جان اقولها لا بيتأخر الوقت خلى نرد صحارى وعادي الا شوي درب الردة ..

وعقب ردينا مرة ثاني لي الجسر وردينا لي شارع الامارات عاساس بنسير دخلة صحارى
يوم وصلنا عند الدخلة ! اكتشفنا انها مسكرة ><؛
قمة الاحباط كملنا ووصلنا لي دبي
اختي عاندت قالت الحين بنسير من داخل دبي وبنسير صحارى وطبعا السالفة طلعت معقدة أكثر من ما نتخيل
وما وصلنا صحارى لووووووووووووووووووووووول

قالت اختي العودة خلاص اتعس الحلول بنسير حاتم اللي صوب الجمعية وبنتعشى فيه يعني انرد الشارجة بعد
بس منو قال النحاسة ضاربتنااا !!
سرنا وودشينا المطعم جان يقول اتفضلوا بس بقولكم انه ماشي كهربـآ !!

وانا من القهر تميت اضحك وخواتي شوي وبيصيحون لووووووووووووووووووول
قلتلهم خلاص نرد البيت ! ما احب انذل جيه ><

قالت لحظة بتصل في هالفندق بشوف شو عندهم مطاعم .. اتصلت في الفندق واخر شي وصلنا المطعم اوتعشينا
والله طول الوقت نحن نضحك ما قدرنـآ نتعشى لووووووول =)

[تحفه]

انا بصراحه ماعندي في قاموسي ايام نحسه لول يوم احس اني مب يالسه اتوفق في شي اباه اقول يمكن الله مب رايدنلي هالشي لانه بيضرني فما اصر اني اسويه i always go easy with life

وايام الجامعه كنت اغيب يوم احس ان مالي خلق اداوم .. و يوم ابا شي وما اشوفه يستوي اخليه وارجع له بعدين
محمد بن راشد شووو قاااال؟ .. قال "إن كنت دخلت السباق ولم تفز في المرة الأولى فلا بأس. هذا ليس فشلاً بل كبوة، وجميعنا يعرف ان لكل جواد كبوة"

وفي كتاب اسمه السر يقول ابعدوا عن الافكار السلبيه لانها ما تجذب الا الامور السيئه و في ثقافتنا دايما نقول عسى ان تكرهوا شيئا وهو خيرا لكم .... شوفو الدنيا بنظاره ورديه والحياه دايماااا حلوه ;)

ويوم حد يخذلكم او يسببلكم اجواء سلبيه في الدنيا سوو له block ! في ستين الف شخص برع محيطكم احسن بمليون مره صدقوني!

ويوم انتوا تضايجون من امور تاملوا في الي مستوي شوفو انتوا شو قدمتوا وليش وشو السبب واذا هم السبب خلاص "انسو" وتخلصوا من كل العوامل الي تعرقل نجاحكم

في وايد ناس تعيش مواقف معقدتنهم من حياتهم .. لانهم مايعرفون كيف يطلعون منها وينسونها .. طريقه النسيان تبتدي بتخاذ خطوه يديده fresh و البدء في الخطوه .. لا تاخذون سنوات عشان تنفذون الخطوات صدقوني الله ايسر الامور .. ليش تضيعون وقت؟ يمكن الضروف تسمح الحين تاخذون هالخطوه بعدين يمكن ضروفكم تتغير وماتسمحلكم من شي انتوا فكرتوا تسوونه .. كونوا دايما رقم واحد وسابقوا الزمن ;)
قال الشيخ محمد " ان لم تكن في المقدمة فأنت تتنازل عن مكانك الطبيعي لصالح منافس آخر ربما كان أقل منك مقدرة واستعداداً وإبداعاً."

افرحوا لان الله يحبكم لانكم عباده ويتمنالكم كل خير ،، مافي اشياء نحسه صدقوني

هذي مب دعوه لاغلاق الموضوع لول بس احب اشاركم بافكاري D= كل ما اشوف هالموضوع اقول ياربي كيف ما عندي شي اعتبره نحس ( قولو ماشاء الله ) لول
بس بعدين فكرت ... واكتشفت ان هالشي فيني ... وقررت اكتب هالكلام يمكن ينفع حد Pp=

[رمــش الغـــلا]

انا مب يوم كتبت المواقف معنـآته شي نحس !!
لا بس مواقف صدق احسهـآ اضحك وماشي حظ تقدرين تقولين في هاليوم ..!
وشرآت ما قلتي الله مب رآيد ..!

بس مجرد اني اشـآرك غيري بموآقف صدق ضحكتني وحبيت اشارككم فيهـآ..~

الحمدلله نحن بعد اكيد ما عندنا شي نحس !!

[ذنـيـنـي]

انا مب يوم كتبت المواقف معنـآته شي نحس !!
لا بس مواقف صدق احسهـآ اضحك وماشي حظ تقدرين تقولين في هاليوم ..!
وشرآت ما قلتي الله مب رآيد ..!

بس مجرد اني اشـآرك غيري بموآقف صدق ضحكتني وحبيت اشارككم فيهـآ..~

الحمدلله نحن بعد اكيد ما عندنا شي نحس !!


:thumbup1:
agree

[الهيثــم]

وفي كتاب اسمه السر يقول ابعدوا عن الافكار السلبيه لانها ما تجذب الا الامور السيئه و في ثقافتنا دايما نقول عسى ان تكرهوا شيئا وهو خيرا لكم .... شوفو الدنيا بنظاره ورديه والحياه دايماااا حلوه ;)

للتصحيح ، هذه تسمى آية من كتاب لله .. وبارك الله فيج ..

[تحفه]

رمش : hugsss & thats what why i always say el malafe6' sa3ad *wink wink*

خطاب : الثقافه يعني معالم ممارسات يقومون فيها مجموعه من الناس .. لهم عقيده وحده + ممارسات + اهداف يوم اقول ثقافتنا فاكيد بتكون من ثقافه عربيه + اسلاميه ... مب انجليزيه + مسيحيه او اسراذيليه + يهوديه ....

هاذي مفردات تفهمها بالمنطق وعلطاير

[الهيثــم]

محمد بن راشد شووو قاااال؟.. قال "إن كنت دخلت السباق ولم تفز في المرة الأولى فلا بأس. هذا ليس فشلاً بل كبوة، وجميعنا يعرف ان لكل جواد كبوة"


وفي كتاب اسمه السر يقول ابعدوا عن الافكار السلبيه لانها ما تجذب الا الامور السيئه


قال الشيخ محمد " ان لم تكن في المقدمة فأنت تتنازل عن مكانك الطبيعي لصالح منافس آخر ربما كان أقل منك مقدرة واستعداداً وإبداعاً."


كــلام الله جل جلاله ، هو الأولى بأن يميـز ويوضع بطريقة تميزه ، ليتبين للقارئ بأنه ليس من كلام البشر
ما ينبغي دمج كلامنا مع كلام الله عزوجل إختي الفاضلة ..
وشكرا لج ..

[تحفه]

^ في هالنقطه كفيت ووفيت .. و النعم بالله!

[شرجاوي]

يوم اسير الدوام

[فرفوش]

وعيت من رقادي قبل الجميع - ركبت سيارتي - التاير أمفسد - اتصلت بالسايق - السايق مسوي حادث - اتصلت باربيعي - اربيعي من يوصلني يباله ثلاث ساعات - خذيت سيارة البيت - الشارع زحمه - وحادث صاير كبير - خزان بترول السيارة ظاهر عندي تنبيه الخزان سيفضي - الدنيا حر - وصلت المطار - الطياره راحت - ماشي حجز ثاني لهذا اليوم - يلست وفكرت وخذت نفس وهديت وقلت ان اليوم نــــــحـــــس - بس تعوذت من الشيطان - وتوكلت على الله وآمنت أن كل شيء بيتصلح - بالصدفه أكتشف أن طيارتي أصلا وقتها بعد ثلاث ساعات وصرت فرحان ويومي فرح - تمشيت بسوق الحره - وتحوطت - واهاتف اناس - وصلني خبر حزين احزني - فلان من المعارف مات بحادث السير - الله يرحمه - الحادث هو نفسه ألي كنت مار صوبه وانا ساير المطار - موعد الاقلاع - كنسلت السفره - شغلت السياره - تحركت - في نص الدرب السياره stop - الخزان فاضي - بالصدفه السايق قريب مني وانا اكلمه - عبينا الخزان - وكملت المشوار - وصلت البيت - وحطيت راسي ونمت - على اساس بيكون غدا يوم يديد وافضل - ^_^

أخوي الغالي ذنيني - تصير عدنا هالسوالف مع أختلاف المواقف والأحداث والوصف واحد بس هناك يوم يديد وتفائل سعيد - شكرا لك على هذا الموضوع ومنك نستفيد