سؤال للشباب ومن يرغب من القبايل [الأرشيف]

مشاهدة النسخة كاملة : سؤال للشباب ومن يرغب من القبايل

بوزايد

21-10-06 ||, 01:41 AM

بسم الله الرحمن الرحيم

السلام عليكم ورحمة الله وبركاته

من زمان ما نزلت موضوع هنيه

المهم موضوعي اليوم للشباب والي يرغب من البنات

مثل ما نعرف انه الحين الحريم يشاركن الرجل في كل المجالات

السؤال هو

هل بتخلي حرمتك تشتغل في مكان فيه رياييل ؟

والله انا تميت افكر في هالسالفه وايد وتوصلت الى

اذا كان شغل حرمتي في مكان كله حريم مش مشكله بس لو كان في مكان فيه رياييل برفض هالشي

اول شي غيره عليها وما في حد ما يغار ع حرمته -- انا بقولكم شي --- صح اني انا بكون واثق منها وكل شخص بيكون واثق من حرمته بس في اشياء مثلا انا ما ارضى لحرمتي انه مثلا الشباب يلسون يتحرشون فيها --- اكيد هيه ما بتسكت --- بس ليش انا اييب العوار لراسي ولحرمتي

ثاني شي -- انا ما اقبل بانه مثلا شباب يدشون للمكان الي في حرمتي ويقعدون يرمسون شوفوا حرمة فلان --- سعوود شوف حرمة فلان وين هذييييييييج هي ... والله مب حلوه ابدا ... صح انه الناس كلامهم ما يخلص بس بعد ليش اييب الرمسه لاهلي .

ثالث شي -- انا ما ارضى لنفسي اني انا ايي من الدوام وتعبان وبدال ما ايي واسبح واتغدى --- اشوف المدام بعدها ما وصلت وانا الي اسويلها الغداء

رابع شي -- انا ما اقبل انه عيالي تربيهم خدامه -- يعني لازم امهم تربيهم

خامس شي --- مثلا انا لو كانت عندي اجازه -- ابغي استغلها باني اطلع ويا حرمتي -- وبالاخير هيه تي وتقول انا ما اقدر عندي دوام اليوم

وبس اذا يا في بالي شي بخبركم

يالله خبروني عن رايكم

والسموحه

ألم ترى

21-10-06 ||, 01:50 AM

بسم الله الرحمن الرحيم ..

هلا بو زايد ..

العنوان ذكرني بسباق الأرجاب ههههه :14: ! ..

والله انا مع الدين إذا وافق فلا رد عليه وإذا رفض فأكيد وبدون تردد برفض ..

ردي هذا مش تزكيه لـ نفسي وإنما بـ المنطق وخير الكلام ما قل ودل ! ..

شكرآ ع الطرح وعذرآ ع الرد البسيط ..

دمت بحفظ الله :fa35: ..

المزوحي

21-10-06 ||, 01:55 AM

كلامك حلو بو زايد

بس اعرف شباب كانت هااي رمستهم وعقب ما اتزوجوا كل شي تغير

هو اللي يقولها اشتغلي لانه ماقدر على المصاريف .. يقولها سيري اتعلمي السواقة كم بوديج

واييبج .. تقوله المكتب وايد في رياييل .. يقولها زين شو بيسون بج ..

يعني كلامك حلو

شمعة أمل

21-10-06 ||, 02:43 AM

هل بتخلي حرمتك تشتغل في مكان فيه رياييل ؟

اذا كنت ريال طبعا بخلي حرمتي تشتغل

وقريت رايك وليش انته رافض .. وانا ضدك تماما في تقريبا معظم الأشيا الى قلتلها..
بس بتناقش وياك في نقطه وحده
دايما يوم يقولون الحرمه تشتغل في الاخير البشكاره تربي عيالها .. لكن هذا مب دوم صح .. الحرمه الى تعرف تنظم وقتها هالشي مابيستوي
انا اعرف وحده مديره تطبخ كل وجبه لعيالها وزوجها .. حتى عيالها مايحبون يحتكون ويا البشكاره في البيت ولا يحبون طبخها .. كل الطبخ هي تسويه .. مثلا تجهز الأكل الليله الى قبله وبس الى عليها تسويه تطبخ يوم ترجع .. ولا مرات تخلي البشكاره تحرره ..
وثانيا عن التربيه .. اذا الياهل بيبي .. تروم تخليه في بيت ابوها ولا بيت ابو ريلها يربون الياهل لين ما هي تخلص من شغلها *وهالشي وايد يستوي خصوصا ويا الحريم الى عرسو يوم هم صغار ويالسين يكملون دراستهم * ف نفس الشي ويا الشغل .. اما لو اليهال يكونون في المدرسه .. ترا بيردون من المدرسه .. تروم تاخذ بريك تمر عليهم تغديهم بعدين تهدهم شويه وتردلهم بعدين ساعتين .. مافيها شييي
فكر في حرمتك .. اذا هي وحده تبا تسوي شي في حياتها .. تبا تقدم شي لبلادها .. تراك يالس تحرمها من هالشي .. الا اذا هي تبا تكون ربة بيت.. وها موضوع ثاني ..

والريايل في الشغل مب نفس الريايل في المولات .. في الشغل يحترمون كل شخص موجود بصفة زميل عمل ولا غيــر .. ويوم يبدون يشتغلون معظمهم يعقلوون .. ومايتفيجون يحشون في الناس لدرجه انه يرمسون عن حرمه متزوجه وهي ليش موجوده في مكان عمل ..
ترا صار هالشي عادي .. ووايدين يشتغلون .. الحرمه استوت تساعد ريلها في اشيا لانه الحياه غاليه!
مرات الريال بنفسه مايروم يسرف على اهله .. مثلا .. اذا كان في بيت اجار .. البيوت اسعارهم نااااااااااااااااااااار ..والبترول كل شوي يرتفع .. ونفس الشي عن الأكل .. وبعدين الثياب والأشيا الضروريه .. وبعدين المدارس ..
موظف عادي صعب عليه يدفع كل هالاشيا .. صدق صعب..

*واختلاف الراي لايفسد للود قضيه* :fa46:
والسموحه

بوسلطان

21-10-06 ||, 02:46 AM

هلا والله بـ خـوي بوزايد ..

موضوعك حـلـو و كثيــر الناس لهم اراء و مفاهيم ..

بداية حتــكـلم عن نفسـي و رأي :

طبعا اذا ربنا طول في اعمارنا و تزوجـنا ان شاء الله .. عــن نفســي ما بخليها ابــدا تشتغـــل في اي

عمل .. مب لانــي ضد عمل النساء او ضد حقوق المرأه زي ما يقولون .. ما بخليــها تتعب ولا تحــتاج

لشــي . كل شـــي ببكـــون تحتها و جاهز .. * ان شاء الله * بشقى حتى لو توظفت في الصحــرى و

بتعب ولا اخليها تشتغل بغض النظر عن مكان غملها (كله نســاء-او رجــال) ..

مكـان عملها فقط ومقرها في بيتــــها * ربة بيــت *.. مع اطفالها و زوجــها .

====================

في حاله انـي محتاج للمال او علي ديون او ما شابه ذلك وكان هناك عمل متوفر لزوجتي وقد

يســاعدني في محنــتي * فتره معينه * لين ما تنحل محنتي.. قد في الحاله هذي حرضى ولكن العمل ما

يكون كله رجال .. الافضل ان يكون العمل كله نســاء .. اقل شي ان يكون رجال ونسـاء ..

مستحيل تكون لحالها وكلهم رجال .

فــــــــــــــقـــــــــ ـــــــط

====
أخوك بوسلـــطـــان

بوزايد

21-10-06 ||, 04:15 AM

محب الشيخين

انزين شو يقول الدين

تسلم ع مشاركتك عزيزي

المزوحي

كلامك واقعي

بس ما دام الريال بيعرس يتحمل الي بييه ههه

يسلمووو ع المشاركه

شمعة امل

انتي المثال الي قلتيه مديره

يعني تقدر تطلع اي وقت

ومب كل شخص بيتزوج مديره

ثاني شي

اذا مثلا انا كنت ساكن وين مكان شغلي وهذا الي يصير دايما

الا بالاجازه ترجع لمكانك الاصلي

وطبعا مكان شغلي مب شرط يكون نفي المكان الي هلي فيه

العيال كيف بتوديهم ام العيال يعني بيتربون ويا الخدامه

تسلمين ع المشاركه حبوبه

بوسلطان

دايما تفكيرك نفس تفكيري

يسلموو عزيزي ع المشاركه

الـيـاه

21-10-06 ||, 05:14 AM

انا ماعرفتلك
يعني انت مب بس تمانع ان الحرمه تشتغل مكان رياييل !! انت بعد تمانع انها تشتغل

لان نفس الوقت اللي بترد فيه البيت سواء كان تشتغل ويا رياييل والا لا !!!!!!!!!
وقلت فالبداية اذا ويا حريم بوافق

فـ كيف يعني ؟

بوزايد

21-10-06 ||, 05:30 AM

انا الاسباب الي محطنها آخر شي عشان اصلا من الاساس ما اباها تشتغل

واصلا في هالايام وين بتحصلي شغل ما فيه رياييل

الا اذا بالمدارس

الـيـاه

21-10-06 ||, 05:41 AM

بس انت قلت

والله انا تميت افكر في هالسالفه وايد وتوصلت الى
اذا كان شغل حرمتي في مكان كله حريم مش مشكله بس لو كان في مكان فيه رياييل برفض هالشي

اوكي فلنفرض انك وافقت ؟
كيف بتتفادى الاشيا الاخـيره اللي ماترضاها دامك بتوافق انها تشتغل

بوزايد

21-10-06 ||, 05:47 AM

يا طويلة العمر

لو انا وافقت

طبعا حرمتي ما بخليها تيب عيال

لانه ما في فايده

ويوم بتفكر انها تبا عيال تخلي الشغل

او انها توقف لفتره وبعدين ترجع

ريم العين

21-10-06 ||, 08:39 AM

المكان فيه شباب او فيه حريم

المهم تكون الحرمه ساتره على عمرها وما يكون شي مكشوف من ويهها او ايدها او اي شي يلفت النظر ومحد بيي صوبها ..

وانا من رايي انه مافيها شي لو اشتغلت الحرمه بين الرياييل لانها طبعا مثل ما قلت بتكون ساتره
هذا اولا
وثانيا
التربية تقدر تتصرف فيها مثلا لو كانت تشتغل ترقد ولدها متاخر عسب يقوم متاخر وفي اشيا وايده بعد
بس يكون الشغاله تربيه هذا شي هي ما ترضيه انا بالنسبة لي يوم ولد اختيا يكون فبيتنا ما اخلي الشغاله تيي صوبه دوم اخليه بعيييد عنهم ما احب يكون ويا شغالاات

الحريم فالمدارس لو كانو حوامل يوم يربون ياخذون اجازه شهرين

يعني فاي حال من الاحوال تقدر الحرمه تتصرف وعن التاخير تقدر بعد تاخذ لها وقت محدد ترد فيه البيت بشرط تكون هي قبل ريلها عسب ترتب له وتحط الغدا وجي
اما عن الاجازه فهي بعد تقدر تاخذ اجازه بس قويه تيي وتقول عندي شغل خخخ ما اتخيلها الصراحه

والسموحه منك اخوي

بوسلطان

21-10-06 ||, 09:46 AM

شمعة أمل

21-10-06 ||, 09:47 AM

بوزايد

يوم قلت مديره .. ف هي فعلا مديره .. مب مديره مال اي كلام.. الى حاطينهم ك ديكور في المكتب
ولاء.. ماتقدر تطلع متى ماتبا..
الموظف العادي يقدر يطلع على كيفه اكثر منها هي

صدق اعتبرها قدوه ^_^

وانا عند رمستي
حتى لو حرمه قابضه شركه كامله وتعرف تنظم وقتها بين البيت والشغل بتكون موظفه وأم مثاليه!

وانا ماحطيت عن الموظفه العاديه لانه الموظفه العادي اوقاتها في الشغل اقل وبريكاتها اطول ف ماعندها سبب تهمل بيتها .. اما المديره .. صدق تكون قدوره للناس في العمل والبيت

شمعة أمل

21-10-06 ||, 09:49 AM

يا طويلة العمر

لو انا وافقت

طبعا حرمتي ما بخليها تيب عيال

لانه ما في فايده

ويوم بتفكر انها تبا عيال تخلي الشغل

او انها توقف لفتره وبعدين ترجع

بوزايد
انته بعدك ماشتغلت .. انته بس تسمع اشيا وتبني رايك عليها
يوم تشتغل انا متأكده انك بتغير رايك في هالموضوع..

المقاتل

21-10-06 ||, 10:47 AM

:a010: بو زايـــــد خشمكـ اخوي ..

شحالك عساك بخير وسهاله .. مرتاح يطولّي فعمرك ..

:k_harhar1: عن نفسي ماباها تشتغل .. وبشترط على إي حرمه باخذها قبل الزواج وبكون شرطي الاساسي بأنها ما تشتغل .. واحب تكون وظيفتها ( ربـة بيت ) .. الوظيفه إلي وايد حريم اعلنوا الأستقاله من هالوظيفه .. وهبّـوا للعمل بين الرجــال و اؤيدوا الأختلاط بإستثناء الحريم إلي يشتغلون في أماكن النساء فقط ..

:a116: الشي إلي ما يدخل راسي .. كيف اقدر اخلي حرمتي .. ترمس ريال وتيلس في اماكن لابدها تتعامل مع رياييل وانا هب معاها ؟؟ .. ولا تيلس في على ما شي إسمه Meeting .. وتناقش وتؤيد وتشرح جدام الرياييل .. بالله كيف هالشي عادي .. كيف هالشي توافقون عليه ؟؟ .. كيف انا بقدر أرضى .. :a046: بالنسبة لسؤالكـ يا أخوي بو زايد .. اولا غيرتي ما تسمحلي اني اخليها .. ثانيا شي يعارض الدين ××××× .. ( وإلي يقولي ما يعارض الدين الله يهديك بس هوه الدليل واضح في القرآن بس انته تلف واتدور وتحاول تقنع نفسك ) ..

البنات لأسف يعتقدون نحن يوم نرمس ونعارض هالفكره إنّــا نحن ناخذ حق من حقوق المرأه .. بالعكس نحن نطبق شرع من شرايع الله .. والمفروض انكن اتشجعونا على هذا المبدأ .. وإلي وايد من الرياييل بدا يتغير تفكيرهم إلى الموافقه على عمل المرأه في اماكن بها رجـال .. وصارت نظرة البنت لهاي الفكره لي أنا جاهل و متقيّد مثل ما الأجانب ينظرون هاي النظره احينه .. يوم سألوني في لكلاس وقالولي انته كيف تحب حرمتك .. قتلها احبها متعلمه ودارسه وعندها بكالوريوس بس ماحبها تشتغل .. بققوا عينهم وخصوصا البنات :boxed: وقالوا .. تدرس وتاخذ بكالوريوس وآخرتها ما تشتغل .. قتلهم نعم ما اباها جاهله وبخصوص الشغل انا بصرف عليها .. اتطالعوني بنظرات تعبر بأني شخص جاهل .

لأسف .. انا ما اعتقد ان طلب المرأه بيحتكر بس بأنها تطلب العمل بين الرجال .. بل المطالب بتزيد .. والله اعلم من الياي .. وأسأل الله الستر على بنات أمة محمد .

:b015: بعدين الحريم فاجّيلهم راسهم .. الله سبحانه وتعالى جعل القوامه للرجل .. والسلطه للرجل لحكمة من الله سبحانه وتعالى .. :cool: بس احينه المرأه وزيره ومديره و و و و و .. واعذرني طلعت وايد عن موضوعك ورمست وهذرب كتير كتير .. لووولز

:b015: .. المقاتل ..

نور الإيمان

21-10-06 ||, 02:05 PM

بسم الله الرحمن الرحيم

السلام عليكم و رحمة الله و بركاته اما بعد ..

الموضوع جدا شيق و قد قرأت آراء معارضة و اخرى مؤيدة لعمل المراة في مجال مختلط ..

بالنسبة لي و كوني امرأة .. لا احب ان اكون ضمن المجال المختلط حفاظا على حيائي ^_^ اجمل ما في المرأة هو حياؤها و خجلها .. و الوجود في الأماكن المختلطة قد تزعزع صفة الحياء في المرأة و تجعلها متبلدة الحس .. كأن يكون الأمر عاديا تماما من ناحية التحدث مع الرجل فلا يحوشها الخجل بأن تضع عينها و تنظر إلى وجهه عندما تتحدث معه!!

فالمرأة ليست مهانة في الإسلام .. و ما حاجة العمل الآن إلا للضرورة في الحياة .. قد يحتاج الرجل في ان تعمل زوجته .. و لكن كغيرة تعتري قلبه فإنه يحاول جاهدا إما ان يوفر لقمة العيش او ان يحاول ان يجد لها العمل ضمن المجال النسائي فقط و هي صفة جميلة جدا ان وجدت بين الرجال :8:

و لكن و كما يقال لكل مقام مقال ^_^ و الله الموفق

الهيثــم

21-10-06 ||, 02:24 PM

بو زايــد ، المقــاتل

كــلامكــم عـ العيــن والراس
وأنــا عن نفســي ما ابـاها تشتغــل للأسبــاب إلي ذكــرها المقــاتل

واذا تبا تشتغــل .. تشتغــل فـ مدرسـة بين البنــات
وما احب ان شغلــها يكــون بين الريــاييــل

وما ابا اعيــد وازيــد .. الأخــوان المعـارضين ما قصــروا
والله يهـــدي بنــاتنا والتفكيـر الي وصلوا له .. وللأســف الأهل قاموا يشجعون على هالشي

لا تقولون لي ثقــة .. مب كل شي بالثقـة
زخيــتوا الثقـة ونسيــتوا ديــنكم ،، ما يصيــر جي
الاسـلام ما امرنا بالاختـلاط ..

بذمتـكم عايبنـكم وضـع شبــابنـا وبنـاتنا الحين ( مب الكل طبـعا )
الأجـانب أحسن عن هالفئـة بعد

هالحرمـة الي بتشتغـل .. متى بتتفرغ لبيـتها
واختـي شمعـة مل المثال إلي ذكـرتيه ممكن اتكـون وحده من 500 حرمـة أو 1000
مب كل النـاس جي

أعـرف حريـم يداومون من الســاعة 7 ونص لين الساعه 4 وخمس
هااي متى بتتفرغ لبيتها .. اتشوف الرياييل في مكان الشغل أكثر من ريلـها

والسموحــة

ريم العين

21-10-06 ||, 04:34 PM

طبـــــــــعــــا لازم تــكــون المرأة ساتــــــره نفســها في جمــيع الإحـوال
.. بالعبـــائة - بتصــرفــاتها - بطريقة حــديثــها .

بــســألج سـؤال أختي العزيزه* يم يم * ترضيـــن أختي زوجج يشتـغل في مكتب كلهم بــنــات وهو الوحيد الرجال , .. ولماذا !! ( الشيطــان شارطر)

أنا ما اقول ان الزوجه قد ترتكب شي غلط .. حاشا لله .. ولكن الرجال( الشيطان بيسوس لهم كل ما تروح وتــرد).

إولاً : قد تأتيهم من الأفكـــار قد لا نستيطع تخيــلها .. كاميـرا الجوال, اقل شي .

ثــانيــا : انا ابـــــــدا ما بكون مرتاح .. حيــــــكون بالي مشغــول عليها و تفكيــري فيها

* الإنـــســـان يـــغـــــار *

* أختي انتي بتكوني طول الوقت مع ولد أختك ..!! يعني لازم هناك دور للخادمه إتجــاه الطفل

ويبدأ تعلقه بــها .. مين تأكـــــــــلـــــــــه * مين تأكله مشكله ثانيه, وحتى اللي ما يشتغلون يخلون بشــكارتهم تأكــل اطفالهم .

* نقـــطــة أخيــره :

فرضاً اشتغلت الزوجه وتقولي ان لازم الزوجه ترد قبل زوجها عشان الغدا الخ ..

العلاقه اللي بينهم مب مجرد اكل وبس .. او تريــــب البـــيـــت.

طبعا الزوجه بتجي تعبانه .. واذا جا الزوج تقوله : أطلــب إكل .. المطاعم كثيره ..

والزوج يحتاج واحد يسمعه و يشكيله و يحكيه عن شغله .. طبعا اول ما يتكلم تحصلــها * خخخخخخخخ*

في سابـــع نومه ..

ومن الممكن اذا الزوج حس انها ما تراعيه او ما تحس فيه يمكن يتزوج عليها .. و بعدين تقول * شوو قصرت معاك *

* الأفضل بالنسبه لي هو بيتها و اعيالها و زوجها أولى بها معــــــززه مـــكــــرمه *

هــــــــذا رأي .. والإخــتلاف في الرأي لا يفســد للود قضيه

:k_smile2:

مــــعـــــاك يـا بـوزايــــد

الحرمه تختلف عن الريال يعني بقولك مثلا الريال لو يلس فمكان كله حريم تراه لا عباه ولا شيله ويبين شكله وفكل مكان فهالزمن بنات يخربون .فبتيي وحده وبتحاول وياه وهني بتبدا وساوس الشيطان يعني هالشي مب من ريلها لاهذا يا من البنت .بس لو كانت الحرمه تشتغل وساتره ولابسه احسن العبي اللي هي مال الراس وتشتغل بشغلها وبس ما تشوف مني ومني حد بيي صوبها ؟ هي محترمه نفسها بس اكيد هالريال بيحترم نفسة ولو تجاوز الحد هي طبعا ما بتسكت بتخبر عليه

احين انا وضحت انه الريال غير عن المرئه بالشغل وهذا اول شي

وعن الكيمرات لا هي بتكون لابسه نقاب او متغشية تراها معرسه .. ادري مب كل من عرس تغشى بس لو هي تبي الستر فالشغل بتتغشى او تلبس نقاب ..

وولد اختيا غير حتى امه ما تحب الشغالاات ايوون صوبه ..
بس لو كانت حرمه تشتغل هناك بتكون اهل ريلها بيتكفلون به لين ما ترد واكثر الناس تسوي جي

هذي الحرمه اللي قلت عنها تقوله اطلب من المطاعم وجي هذي مب حرمه هذي وحده ما تهتم بريلها
وانا يوم قلت الترتيب والغدى ما كنت اقصد هذا بس كنت اقصد كل شي
والزوجه اللي هي صدق زوجه تسوي كل شي فاكمل وجه من حيث الزوج او العيال ..

يمشي كل شي على حسب الضروف ^_^

الجنيه

23-10-06 ||, 03:37 PM

السلام عليكم ورحمة الله وبركاته ...

الصراحه موضوع جداً قيم وشيق .. شفنا آراء الشباب ووجهات نظرهم في هالموضوع .. بوزايد انا احييك الصراحه ع هالافكار الطيبه والخطط المستقبليه القيمه ... بس بعد بقولك شي انت للحين ما تزوجت ولا دخلت في مجال العمل الفعلي اقصد ما عشت في جو العمل ويمكن بنيت هالافكار ع هالاساس هو صح انه الحرمه مكانها بيت ريلها اتربي عيالها واتداري بيتها بس يا اخوي انت نسيت شي وايد مهم وهو صعوبه المعيشه الحين وغلاءها يعني وايد شباب مثلك قبل لا يعرسون كانوا يقولون ما بنخلي حريمنا يشتغلن وان كان لا بد من هالشر ف تشتغل في مكان فيه حريم بس لكن الظروف اتقول غير جذه ...
الحين الواحد يتدين ويعرس ويصرف الي عنده والي ماعنده عشان العرس ومن يخلص العرس يبدا يفكر ابـ بيت الزوجيه وهني ينكسر ظهره من الغلاء وما عنده حل غير انه حرمته تشتغل وياه واتساعده واشوي اشوي ينبي البيت وعقب البيت اتي مصاريف العيال والمدارس الخاصه كل ياهل يبيله اقل شي عشر الاف وبعد المدارس كل هذا يبدا بعد الزواج واحيانا حتى قبل ..

بالنسبه للشباب الي في الشغل انا ما انكر انه فيه شباب نياتهم غير صافيه وخبيثين بس صدقني من تجربتي الخاصه اقدر اقولك انه الشاب مهما كان صايع او من غير اخلاق ما يتجرأ ع وحده حاشمه عمرها بالعكس يعاملها بكل احترام وهالشي المهم واذا من وراها بيرمس عنها فـ رب العالمين عارف ويشوف كل شي وما بيخليه من غير ما ياخذ جزاه ..

نحن كانت ويانا بنت الله يهديها ويستر عليها صدقني انا البنت كنت استحي يوم اشوفها بلبسها وحركاتها وسوالفها محد من الشباب يحترمها وعادي يعقون عليها رمسه مثل السم بس عمرهم ولا واحد منهم تجرأ وغلط ع وحده منا ليش ؟؟ لنه نحن حاشمين عمارنا وما نتجاوز الحدود الي بينا مهما صار
وبالاخير هذي قناعتك وان شاء الله تثبت عليها *_*

انا ما اعارضك بالي تقوله وانا اذا باجر عرست وريلي طلب مني اودر شغلي بودره لانه الشغل بعد مرحله في العمر لها وقتها بالنسبه للحرمه ...

السموحه ع الاطاله

ألم ترى

23-10-06 ||, 05:44 PM

محب الشيخين

انزين شو يقول الدين

تسلم ع مشاركتك عزيزي

فسآلو أهل الذكر إن كنتم لا تعلمون

قــبقــوبـه

25-10-06 ||, 01:55 AM

شكـلي استــوى جــذه يــوم شفـت الــردود :boxed:

أولاً شكـــراً اخــويه بـــو زايــد ع الطــرح ..
موضــوع جــداً شيــق ومحــزن فــي آن واحــــد بســبب آراء أغــلب الأعضــاء عــن شــغل المــرأه ..

فالبـــدايه ..
أي شــغل ممكــن تشتــغله المرأه بـرع بيتــها فيــه اختــلاط بــ الريــايل سواء فمــدرسه ولا حتــى فــ مركز تجــاري ..
فالمــدرسه فـي اختــلاط بــ الريــايل ســواء أوليــاء الآمــور أو العــمال ..
soOo حــتى لـو قــلتوا المــدرسه ما فيــها اختـلاط بـرد وبقــولكم انـه الاختـلاط مــوجود ..
بــس هالــشي ماا يمنــع انــه الحــريم يشــتغلن مــدرسات صــح ..
لييــش ماقــلتوا انه الاختــلاط مــوجود فالمــدرسه ..
:a046:

انا اعــارض فكــرة انه الحــرمه اتكــون فنفــس المكتــب وي ريــال بــس ..
هالشــي مايمنــع انهــا تشتــغل فمــكان فيــه احتــكاك بالريـــايل بـس مب بطــريقه مبــاشره او دائمــه ..
اووكــيه صــح انهــا بتــرمسهم وبتتعـــامل ويــاهم بــس هــ التعـــامل بيكــون لفـترات محـدده
ووايــد من المؤسســـات ماتقــوم بالخــلط فــ المـكاتب ..

بــالله عليــكم يعنـــي الحيــنه وحــده دارســه بكالــورويـس وماجيستــير وآخــر شــي تبــروز الشهــايد وتعــلقهن ..
حـلوو انــه الانســان يطــور ســواء فمــجال شغــله او دراســته ..
تفكــير المــرأه دايمــاً فـــي تطــوور ..
يعنــي تفكير الحــرمه الي اتــزوجت وهيــه بثنــوويــه بــدون ماا تكمــل غيــر عن تفكيــر الي كملــت وخذت ماجيستــير واشتغــلت بشهــادتها :thumbup1: ..

واذا قــلتوا انــها مابتقــدر اتــوفق بين شغــلها وبيتــها ..
اي حــرمه تقــدر تــوفق بين الاثنيــن بالعقــل الراجح والتفــكير الصائــب ..
وشــي واايــد أمثــله شــرات المثــال الـي ذكــرته شمــعة أمــل ..

مااعتــقد انــه فــي حــرمه ممكـن أتــوافق على هالنــوع من التفكيــر ..
انــه ادرســي واتعبــي وخلاف ايلســي فــ البيــت .. :surrender:
والقــرار الي انــا من زمــان ماا خذتنــه انــي بخــلص دراستــي وبشتغــل وخــلاف بعــرس ..
عــسب محــد يفــرض علييــه شي انا مابــاه ..

شكــلي واايــد اتحــرطمت ..
:b015:

..
.
:h_negab:

الثعلب الرمادي

01-11-06 ||, 02:43 PM

اشوف انها تشتغل و تساعد في مصاريف البيت فيفتي فيفتي مع ريلها و الريال في هالحالة بيوفر فلوس عمره ماكان يحلم فيها و تستمر الحياة

أمواج

01-11-06 ||, 02:50 PM

.
.
انا بفــك ريلي
لاني مافكـر اشتغل
:k_harhar1:
.
.

بوزايد

01-11-06 ||, 03:37 PM

انت للحين ما تزوجت ولا دخلت في مجال العمل الفعلي

منوه قال اني مب متزوج ولا اشتغل :k_harhar1:

يسلموو ع المرور

طير الحب

01-11-06 ||, 09:00 PM

شمعة امل حبيت المديرة الي تكلمتي عنها احسها نفس شخصيتي...حبيت طريقة تفكيرج...بس لهالدقيقة بعدني رافضه اشتغل...بيتي يحتاجني اكثر

أمواج

01-11-06 ||, 09:08 PM

.
.
طير الحــب
ذكرتيــني بـ إخوي
مرته قبل مايتزوجها كانت تشتغل
ومن عقب العرس قالها ماشي شغل
تبين تشتغلين اشتغلي فـ بيتج احســن
والله افك لهـا ترتااح فـ بيتها احسن
.
.

قرموشة

01-11-06 ||, 09:49 PM

حـراااااااااااام !
:bye2:

لــيش تمنعـوونهــا مـن الشغــل ! وعلى أي أســاس ! :crazy:
صـح انـه بعـض الريــااييل يغاروون على حـرريمـهم بس بعــد ..
يعنـي الحرمـه كـم بتشتغـل في البيــت.. واذا خـلصت الشغـل .. شو بيتم لهــا .. بتم مـلانـه في البيت
لا شغلـه ولا مـشغلـه .. ! :fa54:

هـ الزمــان البنت أو الحرمـه تغيررت مـفاهـيم الشغـل عندهــا ..
صـارت تحـلم بمرااتب عاليــه وطـمووحـهـا صار أكـبر وأكـبر ..
يعنـي أنـا شخـصيــا
تفكيري أكبر عـن جـذه .. دخلت التخـصص اللي دخلتــه وهدفـي مـب وااحـد !
هدفـي ما كـان ولا بيكـون انـي أتخررج وأشتغل بس
طموحـاتـي أكـبر عـن جـذه .. أخـدم بلادي وأرفـع راس امـي وأبووي وأكـون عـضـوه وانـسانـه مهمـه في المجـتمع :a050:
والنــاس تنظـر لي بمنظـور ثاانـي .. وتقول هيه شوفـوا بنت فــلان وين وصـلت .. وشو منـصبهــا وشو سوت خـلال هـ الفترره !
وغييره وغييره مـن الاشيــااا اللي بقدرر أسوييهـا اذا وصـلت للمـستوى اللي أبــاااه :thumbup1:

دووم وأنــا صغييره ما كنـت أكتب اسمـي .. ( قررمـووشـه بنت فلاااان )
كنت أحـط عند اسمـي عـلامـه وأكتب ..
م \ قرمـوشـه بنت فلان
والمـيم هــاي تعنـي المهندسـه
أبا النـااس تزقنـي م \ قرمـوشـه
مـب قرررمـوشـه وبس !

:

.. أبــا ريلـي في المستقـــبل يووقف مـعاي في كـل خطـوه صغييره أو كـبيييييييره
أبــاه يشجعنــي .. وان فشلت يقولي حـاولي مـره ثانـيه وانـا معااااج ..
وهـذا أبــدا مـب معنــاتـه انـي أهـمل بيتـي واهـلي وعيــالي !
بالعكــس بكـون نعـم الام لهــم .. واذا في فترره حـسيت انـي ما أقدر على الاثنـين
شي طبيعــي انـي أترك الاقـل أهمـيه واتجـهه لبــيتـي وعيــاالي .. :fa41:
وشـي أكـيد انـي ما بتوجـه لمـجــال ( في الشغـل ) ياخـذ منـي أكـثر مـن وقتـي حـيث انـه لكـل شي وقته المعيـن والمخـصص !!

:
:

المـووضووع ما حطمنــي ..
بس خـلانـي أفكرر بطرييقـه ثاانيه !! وأعررف تفكـيير بعـض شباب المنتدى !
شكـرا بوزاايـد ..ما قصررت طـال عمرركـ عـ الطـرح

قررمـوووشــة
:fa41:

قرموشة

01-11-06 ||, 11:32 PM

شمعــه أمـل ..
حـبيــت المـثــال اللي حطيــتييييـه بس تعرفيين صـعب تتوااجـد حرمـه بهـ الارااده
أو بالاحـرى وجوود ريــال يتقبل هـ النوع مـن الحرييم !

طير الحب

01-11-06 ||, 11:34 PM

هلا بو زايد...

أنا بعقب على نقاطك الخمس الي ذكرتهم

أول انا من ضمن اولوياتي أسرتي والشغل شيء ثانوي في الحياة بالنسبة لي انا أقدر احقق ذاتي من خلال أسرتي واهتمامي فيها ويمكن من طبيعة شخصيتي ما احب ارتبط بدوام رسمي....وبالنسبة للعمل مع الشباب أفضل لو حبيت اشتغل يكون بعيد عن الشباب والنساء يعني جان زين يكون لي مكتب بروحي مع عندي اشكال اتعامل مع رجال ونساء من العملاء بس ما احب احتك وايد بالموظفين والموظفات الشغل يعني الشغل بالنسبة لي.

ثاني شيء صدق مب حلوة الريال ينتظر زوجته لين ما ترد من الدوام...واهم شيء العيال اكبر غلط انه الام تتخلى عن اهم اولوياته لأجل شغل وراتب بينصرف في اشياء تافهه اكثرها على المظاهر في الدوام وهذا واقع..فأنا ليش اودر عيالي عشان كماليات الحياه.

وخامس شيء ذكرته جدا مهم عندي وعند زوجي يوم الاجازة شيء مقدس لازم يكون عائلي فتخيل يأخذ اجازة وانا ما اقدر نفسيا بنقهر وهذا نتيجة تجربة يوم كنت اشتغل وانا مالجه كنت انقهر لاني ساعات ما اقدر اطلع اغدى معاه لاني عندي دوام ولا يضطر ينتظرني...

أختك ...أم عبدالله

أمواج...أنا استقلت بطيب خاطر...لأني ما قدرت اوفق...واليوم هو يقولي على راحتج قدمت في مكان حبيته بس لليوم ما قبلوني...الحمدلله مرتاحه بيسله البيت واااااااااااايد ومالي خاطر اشتغل لليوم

قرموشة...شيء انا من النوع لو حطيت شيء ببالي اتم لين ما احققه ..والحمدلله بالصبر والارداه مرتاحه بأسلوب حياتي.

المزوحي...انا الحمدلله قبل الزواج كنت اسوق واشتغلت يعني جربت فحبيت عقب الزواج اتفرع لأسرتي ..ومن البداية في شغلات لازم يتفاهمون الزوجين عليها يعني انا ضد انه الزوجه تكون مسؤولة عن انها تشتري اغراض البيت بروحها انا اسوق به بمزاجي يوم خاطري اسوق لاني ما احب السواقه كحاجة ... يعني روحات الجميعه لازم يكونون الزوجين مع بعض في شغلات صغيرة المفروض ما يتركونها الا لظرف بس ما يكون اعتماد كلي...وهذا شيء يتغير على حسب شخصيات الزوجين