مشاهدة النسخة كاملة : هي ...ونظراتهم..
سبيجة
19-10-06 ||, 03:54 PM
السلام عليكم
مها فتاة في مقتبل العمر.تقود سيارة...وقد تضطرها الظروف لأخذ سيارتها للوكاله للفحص الدوري وما شابه .. ولوجود إخوانها خارج الإمارة ...تقوم شخصياً بإيصال السياره للوكاله.. والتفاوض على سعر الخدمه ..وما شابه... لتجد شاب في مقبل العمر ايضاً ينظر لها بنظرات الإستنكار.. هو وغيره من تواجد في تلك اللحظه..:k_shock_1: :fa45:
ونظراته تقول (القويه شو يايبنها تطورق بين الرياييل).. وليته قال..(حرمه عن عشر رياييل ما شاء الله عليها)... وليخرج خلفها أحدهم ..(الشيخه...ناقصنج شيء...بغيتي شيء..) لتصدق بأن الدنيا لا تزال بألف خير ..وهناك رجال بكل معنى الكلمه ... وتبتسم وترد: تسلم أخويه ...ليرد لها بإبتسامه خبيثه ... بس أنا بغيتج في شيء ... اتصلي على رقمي(*******) وبخبرج شو السالفه .. :Oo: وذلك في نهار رمضان ..(يرقم حتى وهو صايم ..)
صديقة مها... تقود ايضاُ سياره ..فتاه في قمة الأخلاق ومن إحدى العائلات التي يشهد لها الجميع بالسمعه الطيبه... وقد تضطر احياناً لأخذ سيارتها لإحدى محطات الغسيل.. لتسمع أحد التعليقات..
وين اربيعج؟؟ ليش ما اييب موترج الغسيل؟؟:a058:
قريبه لصديقة مها..اشترت سياره جديده ...وبحاجه لتأمينها...تذهب لأكثر من شركة.. بحثاً عن سعر أفضل ...لتسمع أكثر من تعليق ..ونظرات الإستنكار تلاحقها...فتضطر للجوء لأحد المندوبين ..ليخلص لها جميع الإجراءات ..حتى ولو أخذ نسبة كبيرة بالتعاون مع معارفه ... لتقول في النهاية( خل يقول مغفله أو هبله ...ولا أسمع كل كلمه وكم نظره تحسسني بتواجدي في مكان غير لائق!!):glare:
أعضاء الواحات .. بما إنكم مجتمع مصغر .من مجتمعنا الكبير..اتمنى مشاركتي آرائكم في المواقف السابقة ...والأسئلة التالية:
هل يجوز أن يتم الحكم على المرأه لمجرد تواجدها في مكان معين؟؟ أو أن يتم إستغلال ضعفها أو عدم وجود محرم معها ..للشك في أخلاقها؟؟؟ حتى وإن كانت محتشمة ومحترمة نفسها..؟؟
السموحه
المزوحي
19-10-06 ||, 04:08 PM
مب شرط الصراحة
لأنه الحين وايد بنات يعتمدن على عمارهن سواء تدرس او تشتغل وتسوق سيارتها بنفسها
فأكيد بسير تغسل موترها .. دام إنه الأخ شال العبالة كلها عن عمره .. وفوق هذا كله بعض الأخوان
يأمرون اختهم بإنها تمر المكان الفلاني تخلص له المعالمة أو تغسل موتره وتييب ثيابه من الدوبي
هو على حسب المكان اللي تسير له .. لكن إذا يت على الوكالة والمحطة ... مايخصه
لأنه في بنات مايسوقن .. ويالسات في البيت واخلاقهن مب شي ( مب الكل ) بس
للتوضيح إنه المثال ماينطبق عليهن كلهن !
فالبعض يطمع وينظر لها نظره مب زينة او يقول محد وياها شو يا يبنها ..
إذا مايقدر يساعدها يتجاهلها ولا يتدخل في شؤون الغير
مجموعة إنسان
19-10-06 ||, 04:17 PM
كلام كبير ..
أمس كان برنامج الجماهير يتكلم عن موضوع قريب عن موضوعج
كان يقول عادي البنات يحضرون المباراة في النادي ؟؟
كان الرد الشباب بس 2 قالوا نرفض .. والحريم كلهم رفضوا هذي الفكرة ..
من كلامج أن البنات يخلصون أشغالهم وما في أحد يخلص أشغالهم ..
أنا اقول حرام عليكم يا شباب مب كل البنات نفس الشي .. والله في بنات محترمات وعفيفات .. لا تكون نظرتك جذي ..
مثلا اذا وحدة يتيمة وما عندها أخوان وبس عندها خوات ,, من راح يقضي اشغالها ؟؟
يعني فكروا فيها شوي .. مب كل الأماكن للرجال فقط .. ترا للبنات بعد حق علينا .. ترا النساء أمهاتنا وخواتنا ..
قال رسول الله صلى الله عليه وسلم في خطبة الوداع ( أستوصوا بالنساء خيرا ..)
يعني مب كله تستغلوهم لشهواتكم النفسية .. ..
أعتذر أختي سبيجه متحمس شوي !!
شمعة أمل
19-10-06 ||, 04:37 PM
مايستوي يحكمون عالبنت لتواجدها في مكان معين .. سواء كان وكالة سياره ولا محطة بترول..
البنات الحين قامو يسون تقريبا كل شي الى الرياييل يسونه .. إلا كمن شيي طبعا .. ف ماله داعي يفكرون بهالطريقه.. تخلف!
تفكيرهم مب منطقي .. وبعدين مرات البنت تكون في مكان تسوي اشيا لأبوها ولا اخوها .. مب شرط حقها .. مثلا تفصل كندوره لأبوها .. مب عيب البنت تتواجد في محل كنادير ريايل .. صح شكلها غلط في غلط .. بس مب عيب .. ومب معناته انها بنت مب اوكيه .. لكن العكس تماماً .. هاي بنت تروم تشل بيت فوق راسها ..
والسموحه
قرموشة
19-10-06 ||, 07:06 PM
السلام عليــكـم ..
أنـا لـو كنت مكــان واحـد مـن هاييلـه الشبــاب بتـدور في راســي نـفس الفكـره تلقائيــااا وبستغرب جـدا مـن
هـ التـصرف كونـهـا يايـه مكـان وفيـه شغـل ريــاييل ~!
يعنـي بقـول ليـش مـاخـلت حـد مـن خوانهــا أو خوالهـا أو أعمـامـهـا يقومـون بالواجـب ..
لكـن أكـيد بعـد التفكـير والتمـعـن ممكـن أقـول برايـه يمكـن ما حـصــلت حـد يقضي لهـا أشغالهــا ..
ممممممم ما أدري بس أقدر أقـول مـن الي أشـوفــه حوالي انـه هـذا تفكـير معظـم الشبـاب سواء اللي لهـم عقليـه متفتحـه أو لا ~ !
سبييجــه شكـررررن ..و لي عـوده ان شاء الله ان لـزم الامـر =)
تحفه
19-10-06 ||, 07:31 PM
يا رب ما ابتلي بحياتي بناس تفكر جيه
ربيعتي خوانها مراوينها النيوم عز الظهر .. ناس متخلفه شو تقولين غير الله يهديهم
الرحيل
19-10-06 ||, 07:54 PM
قبل كل شي حبيت اشكرج على هالموضوع...:thumbup1:
خاصة هالايام ومن فتره تقريبا نلاحظ انه كثير بنات يسوقون سيايير:Oo:
وبنات كثير يتعلمون..موب نفس قبل..يعني لو ترد 4 سنوات تحس بالفرق عن قبل والحين..:surrender:
اصابع ايدك موب نفس الشي..والناس بعد موب كلها نفس الشي..:12:
في شباب ماخذين فكره انه البنت اذا راحت تخلص شغلها بالسياره يعني هالبنت موب زينه..:glare:
او البنت اللي تسوق يعني هذي ما عندها اهل..لا بالعكس..:k_shock_1:
خلنا نكون صريحين يعني..انت اللي قاعد تقول انه هالبنت موب زينه يعني معقوله
محد من اهللك من البنات يسوقون سيايير.....؟؟؟:k_shock_1:
الحين تغيرت الدنيا..وكل واحد يعتمد ع نفسه اذا انت اول شي مابتتفيج لاهلك..:pullhair:
يعني انت بروحك وراك مشاوير قد شعر راسك..ماظنتي انك تقدر تكفي وتوفي..:tounge:
انا عن نفسي يوم اشوف وحده تخلص شغلها بروحها موب اني اذمها او انه احط في بالي شي ثاني
يعني شي عادي..
:a070:
بس مثلا في اماكن ما اقدر اخلي اهلي يروحونها..ولازم انا اسوي هالشي غصبا عني..:a058:
مثلا انه اودي السياره التشيك..او انه اغسل السياره..مستحيل انه اخلي حد من اهلي يروح هالاماكن
حتى لو ان شاء الله انا كنت مسافر..لانه احس هالاماكن ماتليق للبنت انه تتواجد فيه..:Oo:
يعني علشان ربعي شي وقت وعلشان اهلي مافي وقت..:12:
شو بخسر لو خصصت يوم لا اهلي اقضي الاشياء اللي هم يبونها..:m_afaker:
بس تعرفون شو اللي صاير الحين بالشوارع وشو شغلة الشباب اذا شافوا هالاشياء:surrender:
السموحه ع الاطاله:thumbup1:
ألم ترى
19-10-06 ||, 08:42 PM
بسم الله الرحمن الرحيم ..
مسكينه البنت والله ! ..
مضغوطه ف كل مكان وما يخلونها ع راحتها ..
حسبي الله ع كل شخص حاول بس يحاول يتحرش فيهم وعقابه بيكون شديد ف الدارين إن شاء الله ..
ف خاطري كلام وايد والله بس ابي اختصره لـ اسباب ف نفسي وعذرآ اختي ..
دمتي بحفظ الله ..
المزوحي
19-10-06 ||, 08:46 PM
مب مشكلة نشوف الشباب يدخلون محل ملابس داخلية للنساء لكن لو هي فصلت كندورة لأبوها أو أخوها وولدها بنقول شو يايبنها ! ترى هي تشتغل من بين الرياييل .. يت على دخلتها الخياط يوم بتاخذ ربع ساعه عسب تعطيهم طلبها !
صدى جوفي
19-10-06 ||, 08:57 PM
الـسـلام عليكم ،،
هـذيلا -الأخوان- مستوحـدين بالبنـية فـيعق الرمسـة علّ وعسى يحصل مراده ،، كـأنهم مب شايفين خير:d014:
وبعد البنـات غلطـانات يسيرون أرواحهن .. عالأقل عندهـا حد أخوهـا أمهـا ، ما شي أختهـا مب
أرواحهن يسيرن - والمفروض يكون عندهـا محارمهـا فـ مكان مختلط وبعدين الدنيـا مالها أمـان....:surrender:
الأخوان والأهل المفروض يقضون هـالأمور عن البنيـة - تجنبـا لتحرشات أصحاب النفوس الضعيفـة-
.................هلا بسبيـجـة من يديد:fa46: )
صدى
مخاوية الامل
20-10-06 ||, 02:31 AM
السلام عليكم ورحمـة الله وبركــاته.. ،
ختيــه سبيجـة ..،
ع قولـة المثل .. :: اللي مايعــرفك مايثمنــك ::
الريايــيل بيقولون كل شــي ..،
بس البنت المحترمــة .. ، تسوي اقنـــور ..،
واللي تسمعه يدخل من هنيـه ويطلع من هنــااك .. ،
ع قولــة حامد زيد .. :: أحسن دوا للي يحاول يستفزك تحقـره ::
وأنا عندي مبــدأ ..،
أميــه ..، أبويه ..، خوانيــه..، راضين باللي أسويه ..،
خلااص محد له خص فيــه غيــرهم ..،
وإذا تعرضت لهالمواقف ..، مثل ماقلتلج أكبــر اقنوور ..،
وفديتج عادي الرياييل يدخلون أماكن خاصــة للحــريم ..،
بتيــ ع الوكالات ومحطاات البترول .. ! هب مالهم ومانكتب إنه هالمكان للشباب فقـط .. !
كل الناس عندها سياايــير ..،
وكل الناس تبى تعبي بترول ..،
عشـان خاطر اللي مايستحون ع ويهم نوقف الدنــيا . !
ايهبــي والله ..،
الحمدلله الواحد يوم إنه راضـي عن نفســه وواثق إ نه هب قاعد يسوي شي غلط مايهمــه شو يقولون ولا مايقولون ..،
كلام الناس امــره مايخلص ..،
والواحد لو بيلس يحاتي الناس شو بتقول عنه .. ! حياته مابتعدي ع خيــر .. !
اسمحيليه فديتج لو طولت عليج .،
نرفزني الموضوع .. !
تنينه
20-10-06 ||, 09:20 PM
الـسلام علـيكم والرحـمه :fa35:
سـبووجـه أهـنه يا هلاا والله ويا مـرحبا بسبوجتنا وبحروفها وكلماتـها وموضوعـها الجميل بـكبره:a070: ,,
حـصـه فـرحت جداً بسيارتها الجديـده وظـهرت بها لـكي تتمشى بها وبها ألا وهي السياره :tounge: السياره كانت جديده ولـم (تلحق :icecream: ) أن تـضع عـليه المخفي ,, بمجرد خروجـها للشارع والنظرات تلاحـقها والرؤوس تـكاد تـخرج من السياره والبـعض الآخـر آلـمه رأسـه من إلصاقه بـ(جامة السياره:tounge: ) وبدأت الأستنتاجات تـظهر : ويــن تـبى هـاي مسويـه عـرض لعمرها ، طـاع هـاي صدق مـب مصدقه عندها الموتر العلاني ، ولا جوف ولا طاعوا وفي النهايه الكلمتين بمعني أنـظروا :icecream: يعني LOOK :k_shock_1:
مـها وصديقتـها وحـصـه كـلهن أنـظلمـن كل الظلم بالحـكم عـليهن وما قـيل عـنهن مـن أنـاس نـظرتـهم جداً قـاصره ,,ولـكن في النـهايـه يكون ويرجـع السبب لمجتمعـنا نـحن وما تـربى عليـه الفرد وشـاب عليـه ,,
تعلـمين عـزيزتي يحضرني الآن جمله جميلـه قالها ابن رشـد قبل قـرون وانا أراها الآن متمثله في مجتمعنا ونـظرة البـعض أو الأكثريه من العقليات :a058: ::
يقول ابن رشد: (إن معيشتنا الاجتماعية الحاضرة لا تدعنا ننظر ما في النساء من القوى الكامنة، فهي عندنا كأنها لم تُخلق إلا للولادة، وإرضاع الأطفال، ولذلك تُفني هذه العبودية كل ما فيها من القوة على الأعمال العظيمة. وهذا هو السبب في عدم وجود نساء رفيعات الشأن عندنا. فضلاً عن ذلك فإن حياتهن أشبه بحيات النبات وهن عالة على رجالهن. لذلك كان الفقر عظيماً في مدننا لأن دور النساء فيها مضاعف لعدد الرجال وهن عاجزات عن كسب رزقهن الضروري)
لقد راى ابن رشد ما لدى المرأة من قوة قادرة لو استخدمت بطريقة معاصرة، أنْ تُغيِّر الكثير، ليس فقط في النظرة حولها كامرأة، وإنما أيضاً في دورها الفاعل في البناء الاجتماعي ,, خـروج المـرأه وقضائـها لحاجتها سـواء كان في السـوق أو الوكاله أو المـحطه تـكون من الضروريـات إن لـم يـكن لديها أخ أو أب أو زوج ولـم يكونوا مـتواجدون فـ ماذا تفعـل ، تـضع يدها عـلى خدها وتـجلس :glare: ,,
وإن كانت تـلك الأمـاكن في نـظر البعض غير مألوفه للنـساء فـ بإحتشامها واحترامـها تستـطيع فـرض نفسها واحترامـهم لـها وإن واجـهت بعض العقول المتحجره فـالحل الوحـيد ان تتـجنبـهم ولا تـعرهم أي انتبـاه فـهي أعـز وأرقـى ان تـرد على تفاهاتـهم وكلامـهم اللي ( ما يـخلص :glare: ) ,,
يسلموو حبووبتنا ع الطـرح الجميل :thumbup1:
مايهزك ريح
22-10-06 ||, 10:50 AM
اعوذ بالله من هالأشكال ونظراتهم .. :mad:
انزين انا واحد عندي اكثر من اخت كل وحده عندها موتر ..
وكل وحده تبا تغسل موترها مثلا .. في نفس اليوم اللي هو دايما ايكون بداية الأسبوع ..
اقطع عمري يعني .. :pullhair:
اودي ثلاث مواتر وموتري وياهم شجايل .. اكيد بقولهم امشوا ورايه .. ويلا بنسير .. :fa55:
بالنسبة للتشييكات .. انا دوامي لين العصر .. وهي يالسة في البيت .. اقدر اقولها .. ودي السياره الوكالة.. واتفاهمي وياهم قوليلهم شو المشكلة لأنها بكل بساطه هي تعرف شو في موترها من مشاكل ..
وبقولها ..انا ياينج في الدرب.. وباخذها من الوكاله ..
شو بيستوي يعني .. بطيح الدنيا..
وفي شي بالنسبة للمرور .. يوم انا اسير ما خلص ابسرعه .. لأنه الأولويه للبنات .. :7:
ثانيا الصبح ايكون المرور نوعا ما خالي .. فأقدر أقول لأختي سيري سوي الفحص .. وهاتي الأوراق عشان ما فيه على الطابور.. ويوم ايي العصر ..أخذ ورقة الفحص .. واكمل لها باقي الأوراق .. ( التأمين + التسجيل ) عشان على الأقل ما اظــطر اشل الموتر من البيت واوديه .. ويايه اخلص التسجيل واسير وين ما ابا .. :boxed:
حمدالله .. انا خواتي متفاهم وياهم ويعرفون انا كيف افكر .. ودايما اخطط للشيء قبل لا اسويه ..
لأنه فعلا كم بودي وكم بييب .. انا واحد .. اخوي الثاني متزوج وعنده اعيال و مشغول .. وانا الفاضي .. وكل الشغل عليه .. :7:
فلازم نتعاون .. ولا ما بقدر اسوي كل شي بروحي .. :fa54:
اتمنى اني اكون وصلت المعلومة .. ومشكورة اختي سبيجة على الموضوع .. :k_smile2:
سبيجة
23-10-06 ||, 02:30 AM
السلام عليكم
عذراً للتأخير في الرد ....تجهيزات العيد قائمه على قدم وساق :b015:
اخويه ..المزوحي
اتفق وياك ....وايد بنات معتمدين على عمارهن وشالات مسؤولية بيوت ... بس المشكله النظرة ما تغيرت ...أو يمكن تغيرت بس بنسبة ضئيلة جداً للأسف.. :mad: وإلا صدقني جان ما سمعنا كلامي يضايجنا ونحنا نخلص أشغالنا ...
شاكرة لك مرورك وردك اخويه ...
أخويه ..هواجيس مشتاق (غاوي اسمك ما شاء الله) :k_smile2:
عاد تحضر مباريات هاي وايد عوده علينا ...أنا في التلفزيون ما أحب اشوف مباريات ...
ولو كان ريلها مسافر وما عندها اخوان ,,,, ولو إخوانها مشغولين ...وفي أشياء بسيطه وممكن إنه الحرمه تخلصها بكل سهوله ..ولو ما تعرضت لمضايقات ... والله يا أخويه في مره من المرات في الوكاله ...إنه الموجودين كلهم تموا يتطالعوني انا وخالتي ... :look: جنه مسوين شيء كبير جداً ولين طلعنا وركبنا السيارة وعيونهم علينا :fa39: يمكن عسب ما كنا في دبي ...احس إمارة دبي هالسوالف فيها أخف ...عن غيرها ... الله يعين
شاكره تحمسك اخويه .. :thumbup1:
الغاليه ... شمعة أمل
شو بتقولين عاد غير تخلف وتفكير وايد رجعي خصوصاً إنه البنت المحترمه نفسها تقدر تفرض احترامها على الكل ... بس مع ذلك في نظرات ما ترحم ...
تسلمين حبيبتي على الرد:k_smile2:
الغالية ..قرموشه
عليكم السلام ورحمة الله وبركاته...
ممكن إنه هالتفكير ينوجد في عقلية شبابنا والسبب التربية والعادات والتقاليد ... بس في هالوقت بالذات البنات في كل مكان ...ممكن تكون زميلة في العمل ... في أي مكان يراجعة الشاب مثل بنك أو دائرة... غلط كبير إنه هالنظرة تستمر ... :fa39:
تسلمين حبوبه على الرد..
الغاليه...بوظبي
الإخوان .. أو الأهل ..ممكن يعطون لبنتهم ثقة كبيرة ... بس النظرة اللي تتعرض لها البنت من الشباب اللي في مجتمعها ... تخليها تتسائل عن سبب شكهم في أخلاقها ...:h_negab:
والحمدلله ثقة الأهل واحترامهم لعيالهم شيء كبير ولازم نكون قد هالثقة ... :k_smile2:
تسلمين غناتي على الرد ..
لي عودة مع باقي الردود إن شاء الله .....وكل عام والجميع بألف خير ....
الجنيه
24-10-06 ||, 01:12 AM
السلام عليكم ورحمة الله وبركاته وعيدكم مبارك وعساكم من العايدين والسالمين ان شاءالله ...
الصراحه موضوع جداً قوي وجذبني بصوره خاصه لانه يمسني نوعا ما ,,, انا بتكلم بكل صراحه نحن ست بنات وراس مالي اخوين واحد من ذوي الاحتياجات الخاصه والثاني الحمدلله بصحته وعافيته بس انا بعمري ما اتكلت عليه بشي يخصني لانه دايما يأجل الى ما لا نهايه انزين انا محتايه شي كم بصبر واترياه يقضي لي اياه ؟؟ دام اني اقدر اخلص اشغالي روحي ما فيها شي ,,
بالنسبه لغسيل الموتر يعني انا اغسل موتري في الشيشه باستمرار بس الي اسويه اني اخليهم يغسلون الموتر من برع بس ومن غير ما انزل عشان اتفادى اي موقف بايخ ممكن يصير لي من ذوي النفوس المريضه ... وعادي مره رحت افصل كندوه حق اخوي عشر دقايق وانا طالعه ما انطبقت السما ع الأرض عادي ما فيها شي بس سمعت تعليق من واحد مختل عقليا اونه يقول لربيعه هاي اكيد يايه اتفصل حق ربيعها ما رديت عليه غير بـ الله يسامحه لا همني رايه او الي قاله اذا هو مريض انا ما الومه ..
الصراحه وايد شباب يرمسون ويقولون انا وانا بس لو اتون اتشوفون الحقيقه تنصدمون يمكن شباب المنتدى محد فيهم يعترف بوجود مثل هالصفات او بعض هالصفات فيه لانه ما يبي يشوه صورته بس نحن عايشين في مجتمع وعندنا اهل وصداقات وانعرف كل بيت شو يصير فيه وايدين من الشباب ما يخصصون لو ساعه من وقتهم للأهلهم عشان يقضون اشغالهم او حتى يشوفون طلباتهم وفي منهم الي يأجل باستمرار ومن دون ما يسوي الي يبونه منه اوكي في مثل هالحاله البنت شو اتسوي ؟؟؟ اذا هي اتسوق وعندها موترها اتروح اتخلص اشغالها واشغال اهلها ؟؟ والا تتريا حضرت جناب الاخ يوم يتفيج هذا اذا تفيج وما طنش ؟؟؟؟
أنا أقول العيب مب في البنت العيب في تفكير الشباب ونظرتهم للبنت ,,,
خنفروش
25-10-06 ||, 12:13 AM
السلام عليكم ورحمة الله وبركاته
الصراحه موضوع جميل جدا و الردود رائعه فعلا
سبجهاوا اظن الافضل اننا ننظر لمسألة خروج المرأة كبداية
(( فبنحصلها في المواقف الي ذكرتيها جايزه و حتى في بعض المواقف الي ذكرها الاعضاء ))
عقب خلونا ننتقل للباس المرأة (( فبنحصله محتشم ))
عقب بنلقي نظرة على زينتها الظاهره (( بنحصلها لا متمكيجه او على الاقل مب مبالغه في مكياجها " وكل وحده و نظرتها للمبالغه " ولا عطرها ايطر الخشم و يضرب في المخ ولا انها مظهره قصتها و حتى نظارتها مب ماركه ولا انها لما نزلت صوت الله الله يالزعلان صد علينا شويه امنقع السماعات في موترها ولا شي ))
عقب بنلتفت لاسلوبها (( فبنحصلها رزينه مب اول مادشت قاعده ترمس في الموبايل و تضحك كانها ظاهره من الحجره رايحه الصاله في بيتهم ولا انها اتشوف هذا بنظرات و هذاك اتشم ريحة العطر الي متعطر به (( تدرين هذاك العطر الي شي شي مب اي شي من عند جرير خخخخخخخ )) ولا انها ترمس مع الهندي و هي تتكسر في الكلام اتطول السالفه يعني اسمعوني ارطن انجليزي لا و انكت بعد ))
و جان بغيتي الصدق الغلط من الطرفين لان في شباب جليلين حيا لو مرت ذبابه بيرمسون وياها وبيعقون عليها كلام
و جانب ثاني البنات الي يتعمدن يسيرن هالاماكن يتصيدن
هذا راي شخصي لا اكثر ولا اقل يمكن اكون غلطان فيه
عنود الريف
25-10-06 ||, 06:02 PM
الغالية سبجبج .. ولكم بااااااااااااااااااااك ..
ومباركن عيدكم وعساكم من عوادة... والله يعوده عليكم كل سنة وكل حول ..
نرجع لموضوعج..
قال الله تعالى: "إن بعض الظن إثم" صدق الله العظيم ..
والله يحاسبهم على أفكارهم .. والله يسااامحهم ..
لكن انا موافقة الاعضاء اللي سبقوني .. كل انسان عنده ظرووفه تخليه يضطر يقضي الاشغال ..
لكن الناس شوي متخلفة أعوذ بالله .. الله يعين البنات بس . .
تسلمين الغاليه على الموضوع .. والسمووحة
سلام عليكم ٌ
مسألة خروج المرأة لأماكن اعتادت أن تستقبل الرجال.. حرجة
و من الحكمة أن يرافق المرأة رجل إليها..
بخاصة إن كانت المرأة تبالي لما قد يصادفها.. لدرجة تصل إلى السرد
.
.
بمقابل الرجل الذي عرض عليها المساعدة ثم سعى لاعطائها الرقم..
كم من الرجال الذين تواجدوا لم يفعلوا ما فعل ؟!
و بالمثل لمحطة الغسيل.. و أي مكان آخر !
.
.
لا نستطيع ان نترك الاعراف و ما اعتاده المجتمع جانبا..
و المواقف المذكورة حديثة عهد لدينا.. فلم تكن المرأة ترتاد الأماكن المذكورة بأريحية كما يفعلن الآن..
بالمقابل هناك من لايبالي و هناك من يكترث ظنا بأن الحاصل خرق لما اعتاد عليه..
نقد
الشوق
27-10-06 ||, 12:26 PM
سبجبج ... عوده حميده يالغاليه
تدرين اشتقت لاسمج في هالواحه والله ..
.
.
عزيزتي ..
تدرين انا اصغر خواتي واخواني .. وقمت اعتمد على عمري في كل شي
خاصة في امور سيارتي ..
يعني اذا صار شي في السياره .. انا اوديها الوكاله .. التشيك .. التأمين ..
انا اودي اهلي السوق ... المستشفى .. بيت الاهل .. حتى ساعات اوديها الكاراج ..
باستثناء اذا صارت الحاله عويصه للسياره
والسبب :-
اخواني متزوجين .. وكل ملتهي بعياله وبحاله .. وكل واحد في بيته
انا ممكن هم يساعدوني في بعض الامور ويعطوني اقتراحاتهم .. وممكن يخدمون في بعض التوصيلات ..
.
.
لكن هذا مب معناته ان اذا الوحده خلصت امورها اب روحها معناته فصخت الحيا..
تفكير الشباب واللي فكر اب هالشي .. يكون تفكيره اعوج
لان اصلا في ناس يمكن اظروفهم هي اتخليهم يعتمدون على عمارهم ..
ومب كل وحده شافت امورها وخلصت ابروحها معناته انها صايعه لا سمح الله ..
.
.
ومثل ما قال المزوحي ..
ان احيانا الاخ ابروحه ياخذ اخته وياه في مكان عسب اتخلص اوراقه عسب ما يضطر يوقف في الطابور .. خاصة الاماكن اللي فيها ازدحام مروري ههيهي
.
.
سبجبج ..
تسلمين عزيزتي ع الطرح الرائع والمفيد
ودمتي
تحياتي لج/ الشوق
طير الحب
29-10-06 ||, 01:17 AM
سبووج...
كل عام وانتي بخير يالقاطعه...
ذكرتيني يموقف وبعدين برد اعقب على موضوعج قبل العيد بيومين دق برأسي أسير أخذ شغلات أفاجأ بها بو عبادي المهم عاد تريت لين طلعوا الرياييل ودخلت مع زوجة ربيعه المهم شوي وانترس المحل ما ادري ليش انا حسيت انه وجودنا غلط وابا بسرعه اخلص يمكن طبيعه المكلان والمدينة اثرت يعني لو كنت في دبي او الشارجه ما بتضايق بهالصورة...بس بداخلي حسيت انه عادي ومافيها شيء.
تعرفين سبوج ما ادري ليش عموما ما ارتاح لتفكير فئة من شبابنا سواء في المراكز او أي مكان .
ولي عودة
الشوق
06-11-06 ||, 06:29 PM
ينزل من التثبيت فقد اخذ حقه في التثبيت
سبجبج نبي انشوووف مداخلاتج يالغلا
لا تحرمينا من طلتج الحلوه
خويتج/ الشوق
سبيجة
12-11-06 ||, 01:55 PM
السلام عليكم
أخوية الرحيل... كل الشكر على مرورك وتعقيبك ... :thumbup1:
كلامك صحيح ,,, الدنيا مب شرات قبل والناس تفكيرها اتغير .. وصرنا نتقبل أشياء اجدادنا مستحيل مجرد تفكير إنه يفكرون فيها .... ومع ذلك التفكير الغلط متأصل في عقول البعض .. الله يستر :glare:
الله يحفظك ويخليك لأهلك إن شاء الله :a068:
أخويه ألم ترى ... مسكينة البنية دائماً يسىء فهمها:Oo:
شاكرة لك ردك في الموضوع
حيالله المزوحي .... :m_afaker: تبا الصدق ... شخصياً إذا شفت ريال في شرات المحلات اللي طريتها ...استغرب ... :k_shock_1: طبعاً إذا ما كان ويا حرمته .... تدري لأنه هالمكان من الأساس مقتصر على الحريم ...مب شرات الأماكن اللي ذكرتها مثل المحطات أو الوكاله ... اتمنى تكون الفكره وصلت ...
شاكره مرورك للمرة الثانيه .. :icecream:
اختي الغاليه ... صدى جوفي ...
كلامج على عيني وراسي ... بس احياناً ممكن تكون البنيه ما عندها أي شخص ممكن يرافقها لهالأماكن وتضطر تسير روحها ...فماله داعي إنه لازم كل اللي يشوفها يفكر إنها وحده مب زينه ... عسب جيه تواجدت في هالمكان ... :surrender:
هلا وغلا فيج :fa35:
السموحه
سفير الخيال
12-11-06 ||, 02:16 PM
هيه والله يا خنفروش صـــدقت
الموضوع لها جوانب كثيره و اعتقد إن الجانب اللي تكلمت عنه إختي سبيجه هو جانب المرأه المحتشمه فعلا ومظهرا وهيه كذلك مضطره للخروج لإنهاء بعض المستلزمات التي عجز عن آدائها أبوها أو زوجها أو أخوها...
موضوع مثري,, واستمتعت كثيرا بقراءة جميع الآراء :yes:
شكرا سبوووج على هذي الفرصه :thumbup1:
المزوحي
12-11-06 ||, 04:31 PM
للأسف
مب بس نظراتهم مقتصره على هالأماكن .. بتتغاضين ..
لكن بعض الشباب ... من يشوفون وحده داخله الجمعية .. بدوا بحركاتهم مع إنه تقدر تميز الوحده إن
كانت رزينه .. فإذا بادرت انته بنظرة غضب عليهم وخلوها في حالها .. يردونك بنظرة .. عيل شو يايبنها
في الليل ... ماتقدر تي في النهار ..