عيني حاااااااااره ؟؟؟

[الجنيه]

السلام عليكم ورحمة الله وبركاته ,,

اشحالكم يا الطيبين عساكم بخير وسهاله ..

عجب عجاب عيني مستويه حاره خخخ ...

الله يسلمكم هالسالفه مستويه فرش اليوم كنت سايره في امانة الله بقضي لي شغله وانا في الشارع المفخخ بالرادات المتحركه هذا غير الثابت اشوف موتر ورايه يديم وطاير ع سرعة 10000 في الثانيه انزين استهدى بالله هالشارع سرعته 80 واذا زدت 81 بيجكني الرادار وبعدين هذا دربي يعني ما ابي اغيره ..
المهم الاخ استن وتجاوزني وتجدمني وجس بريك كامل عاد انا يوم شفت لوحته بوظبي احمر ( الحين بيقولون الجنيه بعدها حاطه ع لوحات بوظبي ما يخصني بس الاقدار هي الي تجمعني بهم في مواقف بايخه )من تجاوزني حسبت حساب هالحركه وتعشيت فيه قبل ما يتغدا بي وخففت سرعتي ع الاخير وبعدها زاد سرعته وطار جان اقول يعل يجكك الرادار ان شاء الله كانت دعوه مظلومه وسبحان الله ما مداني خلصت الجمله الا اشوف الفلاش الغاوي الي يسطع من ذاك البعد ههههه
جان تقول اختي ام مايد ول عثره عليج مب عين خيبه وهو فقير انصدم من الرادار المتحرك المتخشش ورا الشير وخفف السرعه بس عقب شو عقب ما صادووه ...

الله يسامحه ..

تعقدت لانه بعد هالسالفه بنص ساعه شفت بدله غاويه واختلفت ويا راعي المحل ع سعرها واخر شي قلت لاختي يعلها تتقطع ولا يتهنا فـ بيعتها
استغفر الله يوم يا بيرد يعلقها تعلقت بالمسمار وسحبها بالقو جان تنطر من صوب :d010:

:( عاد هني اختي تغشت وشردت عني

بس والله حرام انا مب قصدي يمكن لاني كنت مظلومه بعد دعوتي استجابت ؟؟؟

هل فعلا صار واستوى واكتشفتوا انه في بعض الاحيان عيونكم حاره ؟؟؟

ما ادري شو رايكم انتوا ؟؟؟؟

[قرموشة]

ههههههههههههههههههههههههه هههه
حـلوة ساالفــه البدلـــــــه .. << عيييوووونج ليييزررر :fa56:

عاااادي عاااااااااادي .. مـرات يستوي بي جـي !
لا تحـروون عيوونـي حـاااره بس دعواااتـي مستجـاابــه لوول
الجنـيه مااعلييج يا خويتــي تستوي صدقينـــــي p:

على فكـره مـرااات يعنـي أحـس أصم عمـري بعيين !
حد يستويلـه جذه شراتـي ؟ يعني تحسدوون عمـااركم ؟:h_waa:

[ذنـيـنـي]

حلوة سوالفكم

احيد مره كنا في البر نسوق دراجات
و كنا خلاص بنسير و ربيعي يستهبل, مب طايع ينزل من الدراجة
و تم يدور على السيارة , بس جي غياض

المهم قلتله يا عساك تنجلب ولا يجيس دراجتي شي

ما كملت رمستي...
ولنه الدراجه ناشبه في حفرة و الاخ طاير من عليها شرات سوبر مان :b050: :doh:

و طبعا الدراجه تمت مكانها و ما استوابها شي



موضوعج حلو و في انتظار فضايح الاعضاء لول :fa56:

[الاسطوري]

وعليكم السلام ..

الحمدلله بخير وسهاله انتي شحالج
وعلوم هالغيبه الجناويه
الطويله ؟
:a058:

موضوع أرقام بوظبي هذا مايحتاي ترمسين عنه أنا متفق وياج عليه من
زمان وبعدني على رايي مع اني ماأحب أجمع الكل بس
ماخبريتنا أي شارع تقصدين؟ وعن
العين الحاره هذا
موضوع خارج نطاق التحكم وأتوقع كل إنسان عنده نسبه من الحراره
قصدي من الحسد وفي مثل يقول (مايحسد المال إلا
صاحبه) وأعرف شباب صاروا ربعهم
مايبون يشوفونهم
من هالموضوع لأنهم حصلولهم كم أكله حلوه وأنا من بينهم دعمت في
أول أيامي بسبة إني ماسلمت على واحد والباقين كل
واحد صار له شي واللي عينه
حاره مايلاحظ
على عمره هالشي ومن آخر الاحـداث اللي سامعنـها عن واحد عينه
حاره انهم كانوا في حفل تكريم وهو ساير ويه ابوه
ووقت تسليم احد الحضور جايزه
قال هالريال بل
شو هالهديه العوده وقبل مايمسكها الريال طاحـت واتكسـرت وقالوا
الظاهر واحد عينه حاره حاط عينه على الهديه يعني
ياب اجلها في نفس الوقت وسمعت
إن اللي ياكل في
بيت الراحه وانتوا بكرامه تصير عينه حاره والحل اونه يصلون عليه
صلاة الميت يالله منو مستعد يعيش هالتجربه ؟
واللي سمعتـه طبعا معلومـات
مالها أي دليل مجرد
توقعات
:fa56:

خفي على الناس يالجنيه مافينا تختل التركيبة السكانية
أكثر عن جيه واذا حد غلط فحقج قولي
الله يهديه وسامحي
ترا لج الاجر وموضوعج حلو وموجود بينا وحبيت
أعلق بسرعه ولي عودة في
وقت ثاني
:thumbup1:

الاســـطـــوري
أخوكم

[نجمة دبي]

صباح الخير ..
قلت اخذ لفه عالواحات قبل ما اظهر خخخخخ .. صج متفيجه:h_ttmasha:

بسم الله عليج اختيه .. هالاشياء تستوي عادي ..
يمكن بالصدفه .. ويمكن دعاء المظلوم مستجابه :a052:

عندي في البيت اخويه العود الله يهديه .. :m_afaker:
من يسالني اذا بداوم باجر او لا .. مادري شو يستوي بي وما اسير :d010:

ومره الوالده كانت شاله صينيه قلاصات .. وجان يقول لها .. بل كل هذيل قلاصات .. جان تنكسر وحده منهن .. :eek:

ومره اتصل فينا ونحن برع .. وقال لنا الا تاخذون لي عشا من برجر كنج .. ونحن في الدرب زختنا دوريه .. اونه انتوا مسرعين .. بسم الله .. وين مسرعين يا ريال .. !!! :fa44:
وعطانا مخالفتين ما يخصهن بالسرعه ( الملكيه منتهيه وعدم ربط الحزام ) :d014:

وغير وغير وغير .. :a018:

بس صح اللي قاله الاخ الاسطوري ..
ان اللي عينه حاره .. يصلون عليه صلاة الميت .. :surrender:

بسم الله علينا ..

ولا تحاتين عزيزتي .. عيونج مب حاره .. والا جان ما كتبا ردود ... خخخخخخخ سوالف :fa56:



نجــــــ دبي ـــــــمة

[مزن هتان]

عليكم السلام ورحمة الله وبركاته
احــممم

أنا بعد شراتج
احيد خالاتي وعيال خالي وخالتي عزموا ع سيرت السينما
وحاولوا مع أختي المتزوجه انه تسير معاهم
و أنا قعدت ازن عراسها لاتروحين - الوالد مايحب سيرات البنات لـ السينما -
وخالاتي يقولوا لي ما مايخصج فيها اهددها بخبر عليج الوالد :d014:
اخر شي يوم اتصلوا عشان يحجزوا مالقوا كراسي زياده
وكان اخر عرض للفلم :k_harhar1:
****
وفي مره امي وابوي وخواتي اثنين صغار معاهم اختي ام سيف
قالوا بيروحوا ع اهل الوالده كويت - طريق بر-
يعني انا واختي اللي اصغر مني واخوي العود بالبيت بس
قلت حق ابوي بروح معاكم ما طاع
بنص الطريق صار لهم حادث وابوي ترقد بالمستشفى :d010:
^^^ قلبتي عينا المواجع
من ذاك اليوم وانا مستحيل ادعي على حد

حاولي ما تدعين على حد
من اللي صار لبابا تعقدت

[هزاايم]

وعليج السلام والرحمه
هلا إختيه الجنيه وينج يا الشيخه مختفيه
باااااااااااااااااااااااا اااااااال ماتتولهين وجان نصكها بالعين:fa44:


أبويه هذي مش عين هذي دعوة مظلوووم
بس صدق في نااس عيوونهم حااار
بقولج شو لي صاار
على اياااام الصيف بلندن كنا ظاهرين اياام الكونسرت إلي بالحديقه ويا أخويه العدو
طبعا مشي
فتلاقى ويا وااحد من الأهل وربيعه وكملووا معانا الدرب
مانوووعى إلا وصلنا على زحمه ونريد نقطع الشااارع
إلا ربيعهم يقول باااااااااااااااااااااااا اااااااااااااال ولازحمة البلاد
إلا شاك بوم حادث صار جدامنا وقدرنا نقطع بأماان
يعني انا هذا اقول عنه راعي عين حااره

خخخخخخخخ مره كنا قاعدين تحنى وأول وحده مخلصه حناها أنا فقعدت أحاوط من بين خواتي وبنات خالي و عجبتني نقشة إختيه فقلت لها نقشتج غاويه إلا نشووف الحنايه تحط يدها على يد إختي واختربت النقشه:fa44: والله مش مني من المحناايه المسطله لووول
هذي عين لوووول


بس صدق ذكري ربج وسامحي من ظلمج
وعن سالفة السرعه يما دعينا ربي يصيدهم برادار لكن الدنيا حظوظ

واايد هثربنا
المهم نريدج على طووول لاتختفين
وجان استانس عالموضوع:thumbup1:

[شمعة أمل]

هههههههه سالفة البدله
ذكرتيني في سالفة استوت من اسبوعين

كلنا في الصاله نجوف مسلسل قيود الزمن نتريا يأذن .. اختي الصغيره لابسه هالتراكسووتس مال جوسي كوتوور *هالبناطلين والجاكيتات السبورتيه*
المهم
ورديييي عجيــــــــــــــــــــب:f a41:
واشترته ايام لندن .. انا كان خاطري فيييه بس لانه كان يوم ميلادها يوم اشتريناه قلت ماعليه خلاها تاخذ الوردي العجيب وانا خذت الوان ثانيه

ف هاليوم

هي يالسه وحاطه راسها عجتف ابويه وتجوف تلفزيون .. وعاد انا غيوووره
مقهوره ليش يعني هي يالسه عدال ابويه وانا لا وليش لابسه هالورديي العجيييب:fa44: *وكان أول يوم تلبسه*
ويالسه اجوف البدله من الصبح وهي لابستنها وانا خلااااص مقهووره:devil:


عقب صلاة التراويج انا يلست تحت وجان اسمع صوت وحده تضححححححححك بشكل فضيع:oh:

شو السالفه؟؟

الحبيبه يوم ركعت في الصلاه بنطلونها انطر :k_harhar1:

اول ماخبرتني السالفه .. قلتلها احسن احسن استويتي دبـــــــه *تراها وايد ظعيفه*
واتم احشرها واقووللها كيييف هي متينه ودبه .. والخ:k_harhar1:

بس فاليوم الثاني .. اتذكرت .. وقلت في خاطري .. اويه عيني حاره .. عشان جي انطر البنطلون مب لانها متنت خخخخخخخخ



:devil: بس تبون الصراحه
استانست:fa56:
الحين ماعندها بدله ورديه عجيبه:k_harhar1:

[ريم العين]

مواقفكم عجييييبة

عيل يا دوري اقول مواقفي

في الاجازه كنت راقده والغرفه بااااااارده انزين وانا راقده جان يدش ابويه الغرفه عسب يوعيني
وجان يدش ويقول والخيييبة الغرفه بارده وانتي ما مرضتي ههههههه واليوم الثاني مرضت هههههه

ولا موقف ثاني عموه اختي كانت ظاهره من بيتنا وابوي شافها تراها عيوووزه جان يقول هذي باجر بتموت ههههههه ولا بغت تطيح جان تمسكها بنتها ههههههههههههههههه

وامس استوالي موقف موووول مب حللوووو خرب عليه انا مسويلي شي ومستانسه عليه جان وحده قالتلي والخيييييبة وجي وانا اقولها قولي ماشالله ولوعت بجبدها لين ما قالت بس ما كانت من خاطرها جان يستوي العكس اليوم والله انقهرت ورحت قلت لها اليوم فالمدرسه عيووونج حاره جان تقول كلهم يقولون جي هههه

بس المشكلة عيووونييي بارده اباها تستوي حاااره وادعي على الابلات

طلب من اللي عيونهم حاره قولو يارب ابلة الرياضيات تغيييب باااجر لاتردوني دخليكم

واحين اي حد يقول عني شي على طول اخليه يقول ماشالله من الخاطر لازم ههههههههه

[بوزايد]

قل اعوذ برب الفلق :k_harhar1: :k_harhar1:

اسولف خلاص انتي الزعيمه مال المنتدى

لحد يزعلها ولا يقولها شي يا ويله

مصلحه اونه

[ذنـيـنـي]

طلعوا طلعوا سوالفكم

لوول

[أمواج]

.
.
.
امم والله ساعات اشــك إنه عيني حــاره
مره من المــرات
وحده من البــنات كان فإيدها عصيــر برتــقال وانا موتي وحياتي عصير البرتــقال
انا ماقلت شي بس عيني عليــه وكنت ابغي اشــرب منه
فــ ربيعتي أول مافتحت العصــير على طول طاح عنهاا عالارض وانجــب
قلت لها تصدقين إنه كان خاطري فيــه
قالت لي أكــيد من عينج طاح
. .
بس احس بالصدف تستوي هالاشيــاء
>> يعني عيني مب حاره p:
.
.

[عنود الريف]

ويييييييييييييييييييييييي ييييييييييييييييه
ضربتي على العووووووق ...
اول شي مرحبا بج وطولتي الغيبه ..

اما سالفة العين الحارة نحن عايلتنا كلها معروووووووووووووووفة بالعين الحارة لوووول
وااااااايد استوت لي مواقف .. من انا ياهل..
اول موقف .. كنت في الحديقة .. وابا بوبكورن .. (( فرّاخ)) وكان المكان زحمه .. والهندي يحط الفراخ وهو يناقع .. جان اقول حق بنت يرانا.. عنبوه هالهندي ايده ما تحرقه .. يحط والفراخ يناقع .. وشوي فراخه طايحه على ايده وتحرقه .. ويطلع ايده فجأة .. غمني مسكين ... وبنت يرانا زاغت مني.. :hysterical:

وعندي مواقف ثانية برد لكم باجر بها ..
تسلمين الغاليه

[دانة حتا]

عينج حــــــــــــــــــــارة
الله يعينج



هههههه... لا لا عادي تراه العين حق
بس وحليله الفستان ..


ما عليج حاولي تتحكمي فعينج

[بوسلطان]

وعليكم السلام ورحمة الله وبركاته


أختي الجنيه .. صدقيني انا اكثــــر منــج .. انا وايــــد تستويلي شغلات ما تتوقعينها ..



اصحــابي والله يخــافوا مني .. والله بعضهم يظن اني احقد عليه .


لكـن أنا والله نيــتي طيبه .. بالعكس اتمنى لغيري كل خير لكن أحيــانا تضبط معاي يعني


انا اقولها مثل : بالــ عليك .. لكن تجي عفويه يعني ما اقصد شي .. وعلى طوول :fa46:


وفي مره كان عندنا حصه رياضيات وفي الثانويه العامه وكان الاستاذ يوزع العلامات وكانت درجتي مثل صاحبي لكن
:k_smartass:
كانت بعد ما زودني درجتين وصاحبي ما زوده شي .. المهم الاستاذ يلس و قال انه بيزود ردجات للي


ما زودهم والمهم صاحبي ما صدق على طوول رفع يده وسجل اسمه الاستاذ عشان يزوده وبعدين جا


عندي يقولي, رديــــت * بالـــ عليــــــــــك * بصوت عالي .:k_shock_1: . والله يمكن مافي ثانيه الا ويقول الاستاذ


خلاص بنمسح اسمك يعني مافي ثانيه :hysterical: .. و صاحبي على طووووول التــفت عندي وناظرني بنظره


قويه بينفحــــــــــر معصب نفسه يكفخــني .:a058: . والله من حقه كانت درجات حساسه في اخر سنه



في الثانوية .. المهم الحمدالله على كل حال .. ماصارلي شــي .. وليـــن الحين واحنا نضحــك على


السالفه


:a068:
ومن وقتها شوي اتعقدت .. يعني احاول ما اقول بال عليك او اي شي حتى لو كانت على حسن نيه ..

والله مادري من شنو!! .. شو السبب!! .. شو السر!! .. * عيــوني حاره *


الله يعيــــــــــــــن


بوسلـــطـــان

[شهوووودة الأمورة]

مممممممممم ماحيد صار لي شي .. مممممم يمكن صار ويمكن لأ ..
يوم بتذكر بقولكم سالفتي..

[فركوشه]

العام كان عندنا ضغط فالبحوث والبرزنتيشنات..

والمس جدمت موعد البروجكت العوود.. جان ادعي عليها بالغلط انها تتسمم..

واليوم اللي عقبه مايت.. وطرشت مسج انها كلت شي وتسممت.. وكل بنات تموا يطالعوني.. :Oo:

وربيعتي.. قالت حق امها.. جان اتنازعها وتقولها .. لا ترابعين هالبنت عقب بتدعي عليج وبنبتلش..:14:


وعن العين الحاره مرااااااااااااااااااااااا ات تصيب عيني..

مره يدتي كانت تشرب قهوه ومن جبت القهوه فالفنيان وانا اطالعها الين ما وصل حلجها جان ينجب عليها..:k_smartass:

ومره كنت يوعانه وخاطري اكل.. واخوي قاعد ياكل جدامي واباه يعطيني اشوي مب راضي.. وانا اطالعه فبراءه :a058: .. كل ما يبا ياكل اتطيح اللقمه من ايده..:14:

وسوالم.. خيتو..

[اللولوه]

بسم الله .. لا حول ولا قوة الا بالله ..

ياناس اذكروا الله .. مب زيــن ، بدل لا اتقولون بااالــ و الخيبـــبه .. اذكروا الله و قولوا ماشاء الله

مب زيـــــــــــــــــــــــ ن

حتى لو ما تقصدون انكم تحسدون اللي جدامكم ، بس ابدوها بذكر الله و لا تدعون على الناس و خلوا ماشاء الله دوم على لسانكم

[طير الحب]

موضوع حلو ولي عودة...بس من قراءاتي الولى احس الي صار لج صدفة خصوصا انه الشوارع صارت مفخخه ...وبالأخص دبي...وسالفه البدلة عادي انا كنت بضحك عليه لانه اكيد ضارب سعرها دبل

[مزن هتان]

البارحه اختي كانت تشرب عصير
حطيت عيني عليه كان خاطري فيه
شوي والا اسمع شي يطيح ع الارض
والا اشوف العصير منّكت بالحجره :fa46:
عصبت عليه :a058:

[الجنيه]

السلام عليكم ورحمة الله وبركاته ,,,

عيدكم مبارك وعساكم من العايدين والسالمين ان شاءالله ,,,

قبل كل شي اسمحولي ع الرد المتأخر والسبب ظروف خارجه عن ارادتي ,,, اتمنى لكم عيد سعيد وربي يعيده عليكم بالصحه والسلامه ,,,

قرموشة
يالله بالستر عاد محد يظلمج انتي ما رحمتي عمرج عادي اتصمينا بعين ان زعلناج بعد خخخخ


ذنـيـنـي

هههههههههههههه والله هلكتني من الضحك عينك مووووووووول مب حاره ,, حليله ربيعك اضني تأدب وسوا توبه انه يسوق دراجتك مره ثانيه فقير ما يسوى عليه يا بو عيون حاااااااااااااااره ...
الحمدلله يعني مب بس انا كلكم جي خخ


الاسطوري

هلا وغلا اتصدق من اشوف نكك اتذكر زمن الديناصورات .؟؟ اقصد لعبة السجن في ذاك الزمان :a049:
الله يسلمك هذا الشارع الي مجابل جمعية الامارات وانت ساير صوب القصيص طبعا غني عن التعرفه ودومه الرادار المتحرك مستن ع يمين الشارع
هي صدقك الي عينه حاره يصلون عليه صلاة الميت
لا خلاص الحين تعودت اقول الله يسامحه والا اقول يا ربي يجكه الرادار عاد انا ما صدقت ضبطت مره وحده وكلمه والثانيه طريت نفس الدعوه

نجمة دبي
اشهد انه عيني مب حاره الحمدلله ما جد صار لي هالموقف الا مرتين والا ماشاء الله عليه اخوج عينه اتقولين العين الفايضه من حرارتها اضني امج تغصصت ع القلاصات فقيره ادريبهم امهاتنا حبهم المواعين


مزن هتان

يمه منج :7: خليج بعيده عني ,,,
ذكرتيني بسالفه من سنتين امي واختي كانوا سايرين الكويت عند خالتي وانا احن عليهم عشان اروح وياهم وسوا لي طاف جان اقول لهم بتروحون بدون عيل ما بتستانسون واول ما وصلوا ريل خالتي سوا حادث وكان في العنايه طول فتره تواجدهم في الكويت وايد تلومت يومها

هزاايم
وانا اقول شو فيني الناس اتعايد وانا هاجمه ع الاب توب وعلى طول ع الواحات اثرج انتي الي صامتني بعين وخليتيني اتوله عليكم *_*

هذا ربيع اخوج الصراحه فن يبيلنا يصم العاطلين عن العمل بعين عشان يتوظفون حليلهم والا العوانس عشان اتقل نسبة العنوسه عندنا بس ع فكره يوم شي فيه خير ما يستوي يعني الي يحسد بقصد الخير ما يستوي

شمعة أمل
ههه حليلها والله لو تدري انه من عينج اضني بترد لج الصاع صاعين ...

بنت اختي الصغيره عمرها 4 سنين البارحه كنت اصلي العشا واتصيح تبا اتصلي ويايه لبستها شيله وعطيتها سياده طبعا اتقلدني بالي اسويه ويوم يت بتسجد ليش ما يدق ر اسها بالسيراميك بالقو طلعت لها زعروره ع قمة راسها ههههههههه

ريم ريم
هههههههههههههههههه سالفة ابوج ذكرتني بسالفه صايره ويا اميه من زمااااااااااااااااان يقولج في فريجنا الجديم يرانا عندهم بنت عمرها 18 سنه يوزوها شيبه من قطر ويوم شافته امي انصدمت جان تقول جدام الحريم هذا باجر بيموت حرام عليهم ليش ميوزينها شيبه هالكبر ؟؟؟؟ ما استوا الصبح الا وتيها ام شما الله يرحمها واتقول لها غربلج الله نفدتي الريال خخخخخخ

بوزايد
فديتني والله طبعا زعيمه .. هي خلك جي اوكي امدحني عسب ما اغضب عليك واصمك بعين هههه


لي عوده مع بقية الردود ان شاءالله

[سيدة الحب]

هلا والله بالجنيه

عادي عادي انا اي شي سيء اقوله للاسف يصير يعني مره قلت حق اختي عن محطة بترول

قلت لها بس من زمان وثاني يوم بلا فخر سكروها جان تقولي اختي خيبه مو عين سكرت محطه:a049:

وغيره من المواقف يعني احس بالشي الشين واقوله وللاسف يصير و يقولون عين ما ادري والله:b015:

[الجنيه]

أمواج

سبحان الله ع كثر ما اكرهك عصير البرتقال انتي اتحبينه ,, تدرين اني وايد انحرج يوم اروح عند حد ويضيفوني عصير بر تقال مره حاولت اجامل وقربت القلاص من حلجي بس صدق لاعت جبدي استغفر الله ليش ما ادري بس عاد من يومها لوحت ويهي اقول لهم كاش انا ما اشرب عصير برتقال :cool:
وبالفعل احيانا اتكون صدفه مش عين ,,,

عنود الريف
يالله بالستر احم اشحالج الغاليه والسموحه طويلة العمر ع الغياب القسري هي لانه مب مني من هالعله اللاب توب والا النت متعاونين ضدي مره هذا يخون ويوم يتعدل الثاني يبدا الخيانه وانا استوي :surrender: واطلب النجده خليها على الله ..
احم بس يا اميه ذكري الله لا اتصمينا بعين الله يستر عليه وعلي لاب توبي ونتي التعبان يعني أمشين الحال *_*
بس ابيج اتقولين خييييييييييييبه ليش جي النت كل اشوي يقطع عندج ( على الله ما نيقطع للأبد عقب هالدعوه )


دانة حتا

كرهيييييييييييييييييييييت ج ,, وانتي ما همج غير الفستان ؟؟؟ اتصدقين انا بعد غمضني راعي المحل لانه كان مثل المصدوم والي مب مصدق الي استوا ويتمنى لو يقدر يرد الزمن لحظه عشان يبيعني اياه لو بخساره اقلها يطلع جيمته خخخخ بس يستاهل

بوسلطان

اللهم لك الحمد والشكر صدق الواحد يوم يسمع مصايب غيره اتهون عليه مصيبته ... الله يعينك وان شاء الله تبرد عيونك وحاول تبدا اي جمله باسم الله او ماشا الله عشان ما تحسد من غير قصد *_*

شهوووودة الأمورة
بنترياج يالعيوز لا تبطين ...
عادي خبرينا عن عينج الحاره محد بيرشج بعين *__*

فركوشه
ههههه عاد مشكله الامهات ما يصدقون خبر ماشي تفاهم اونه لا اترابعينها
والا اخوج فقير صدق غمضني اتعرفين لو انا مكانه شو بسوي ؟؟؟ غياض فيج باكله اي حد بس انتي لالالالالالالالالالالالال الالا :k_harhar1:

اللولوه

والنعم بالله حبوبه عن نفسي الحمدلله دايما اذكر اسم الله بس مرات احم يعني من دون قصد او صدفه يصير شي غير متوقع *__* ويزاج الله الف خير غناتي

[دانة حتا]

وحليــــــــلي


كرهتني


بصيح

[الجنيه]

طير الحب

والله صدقج الا قولي تربل لا والمشكله امس اشوف وحده من ربيعاتي لابستنها وماخذتنها من عيمان تغصصت يعني لو اشوي كنت بقتنع وباخذ البدله بس الله ما أراد *_*

مزن هتان

هههه الحمدلله الحاله ما وصلت عندي لهاي الدرجه


سيدة الحب
ماشاء الله عليج اتنيشنين ع اشياء كبيره عاد محطه بترول مره وحده ؟؟؟!!! صدق ينخاف منج هههه

دانة حتا

ههه فديتج لا اتحطين بخاطرج اسولف غناتي

[سبيجة]

السلام عليكم


موقف طازج .... :whistling:

اليوم الصبح كنت يالسه في السياره جدام البيت .. :6: ومر باص يسوق في الفريج على سرعة ألف جان احرج في خاطري :k_icon28: وقلت خييييبه في السكيك جيه يسوق عيل على الشارع العام كم يسوق؟؟؟


وحياتج ما كملت الكلام... إلا يدعم الرصيف ... ويبنجر التاير :fa52:


احياناً الصدفه تلعب دور في هالسوالف ... بس الأهم إنه الواحد يذكر الله دايماً ... :whistling:


السموحه

[أنامل قلب]

^_^ ..

استانست عالمواقف .. :cool:

وفطست ضحك .. كل شوي أكركر :birgits_giggle: ..

لكن باذن الرحمن خواتي واخواني مايكون اللي التحجون عنه عين ولا حسد ..
أظني نصهم صدف .. وقضاء :yes: ..

والنص الثاني يمكن يكون :whistling: ..

امممم ..

وما يحضرني الحين أي شغله بهذا الموضوع .. :h_negab:

....

تسلمين اختي الجنية عالطرح المميز .. والقيٌم ولو بشكل غير مباشر ^_^ ..

والله يجعل من ذكره لزام دايم لنا يارب ..

كل الود ..

اختج أنامل قلب ..

..

[الجنيه]

سبيجة بنت امبيريج

يالله بالستر زين ما صار اسوء من البنجر ...

بس تدرين اكتشفت شي الي تكلمنا عنه ما يتسمى حسد يعني نحن نتوقع الي بيصير وع هالاساس نحكم
يعني مثلا انتي يوم شفتي الباص بهاي السرعه توقعتي انه لو كان ع الشارع العام بيسرع اكثر من هالسرعه وممكن يتضرر ليش ؟؟ لانه الباص حجمه كبير ويحتاج لحذر اكثر من السيارات الصغيره العاديه فشي طبيعي اذا تم التحكم به بطريقه خاطئه بيؤدي لمخاطر جسيمه واحداهن الي ذكرتيها *_*
يعني عينج هب حاره ارقدي مرتاحه


أنامل قلب
أوافقج الرأي

وتسلمين حبوبه يعني نحن نطمح للتميز وبمساعدتكم راح نوصل له ان شاءالله