زمـــن الفلـــوس !

[ألم ترى]

السلام عليكم ورحمة الله وبركاته

زمن الفلوس !

تاير منطر
من كم يوم كنت عند البنشر اصلح تاير السياره
وبعد ما خلص الهندي قلت له كم حسابك ؟
قالي المبلغ الفلاني !
قلت له ليش جي غالي انته ؟
قالي اللحين يوم نقول لك ادفع يعني ادفع !
:a046:

والله نحن شعب طيب وما نقصر ف أي شيء
لكن الطمع للأسف والهم الأول والأخير هو الفلوس !
:sad:

ليت محترق
ليت سيارتي محترق هههه فقلت بغيره عند الكهربائي
المهم رحت تعشيت ورديت له وقلت له كم تبي ع التصليح ؟
قالي المبلغ الفلاني !
قلت له اشوفك بطران هاليومين يلا ماشيء غير هالمبلغ
:boxed:
قالي لأ انته عندك بيزات ادفع !
جان اضحك وقلت والله ما اعطيك اللي تبيه عااااد
فقالي انته بخيل واليوم حق الليله !
:fa52:
عجييييبه امرك والله

ادري مواقفي ما تطلع شيء ع المواقف اللي عدكم
ولكن دام هالشيء ف قلبلي ليش اكتمه !
:shutup:

ياترى شو الأسباب اللي تخليهم يطمعون جي ؟
وهل ياترى شيء رقابه عليهم او لأ ؟
ومن السبب ف هالأشياء اللي تصير وليش بالأساس تصير ؟
والله يرفعون الضغط و السكري
نحن ولله الحمد عدنا فلوس
ولكن مب عايشن نكد ونتعب عشان نصرف ع هاييل !
:sad:

محب الشيخين
17/9/2006
3:00 م

بحفظ الله

[المزوحي]

في منهم يقولون انتوا عندكم وااايد فلووووس

على فكره سعرنا غير عن سعر الاجانب ... اللي مثلهم ... إلا إذا كان السعر ثابت للكل .. شي ثاني

ومثل ماذكرت أي مكان تسير له نفس الشي

أقولهم .. بس من كل صوب تنهبونا .. يقولون لاااااا .. من عشر سنوات

في سوق الخضرة ... بايوعنا صندوق الطماط بعشر .. والعشر وااايد عاد وللمصاروى 3 دراهم

والمصرية تقوول يغلوون عليكم انتوا بس !!

من ايام اشتريت عصير من الدكان ( درهم ) قال درهم ونص .. قلت له ليش اونه لااا هذا غالي ..

بغيت ازغده ووين مانسير نفس الشي .. بغيت اغسل موتري في برجمان قااااال 25 زين ماصفعته

انا اسير المحطة الكبرى يقول 25 وانته بس من برع والفوطة خايسة ... قلت له ليش جيه ..قال سيارة

كبيييير .. قال اووكي آخر 20 ودرته ...

نسير نفصل للصغارية يضربون ضربتهم اونه لاااااا الحين هذا استوى كبير شوووف كم وااار ياخذ ..

وغيره وغيره وكم بنعد

[مايهزك ريح]

مرحبا اخويه محب الشيخين .. ما شاء الله مواضيعك كلها تقطيع .. :a049:
على العموم .. كل واحد يتعرض لها المواقف .. ربيعك ساير ايركب مخفي + عازل حراري .. وعليه ضمان سنتين ..صكوني بمبلغ محترم الله لا يواريك ..كل ما اتذكره انقهر .. :fa52: :7:
حشا مب مخفي تذكره دبي -قطر- دبي ..لا وعلى طيران الإمارات بعد :k_harhar1:

[بوزايد]

اكيد هم يبون فلوس اكثر واكثر لانه كل واحد محطي في باله بجمع هالمبلغ وارد بلادي ليش اعيش هنيه

فيستغلون المواطن والله يعينا بس


تسلم محب الشيخين ع الطرح

[دانة حتا]

الحين كل شي بفلوس
ما شي اسمه بلاش
ويطمعون في اي مواطن
لانه ع بالهم المواطن دوم عنده بيزات
الله يعينا الصراحه
مشكوور ع الموضوع محب الشيخين

[ألـم]

ياترى شو الأسباب اللي تخليهم يطمعون جي ؟
امممممم انا أقول بسبب فــقرهم يــسون جي .. والله أعلم
وهل ياترى شيء رقابه عليهم او لأ ؟
أنا أشوف ما شيء رقابه الا أذا انته أتكلمت ..
ومن السبب ف هالأشياء اللي تصير وليش بالأساس تصير ؟
أتصير وايد مواقف أكبر عن هاي فلا تستغرب ..
والله يرفعون الضغط و السكري
نحن ولله الحمد عدنا فلوس ( محطين في بالهم أنه المواطن هاكي هوه اللي متسبح بالبيزات مثل ما يقولون ,,.,, ما يدرون بأحوال أهل راس الخيمه خاصــة ً ** )
ولكن مب عايشن نكد ونتعب عشان نصرف ع هاييل !
غصبن علينا أصلا ً أذا بغينا الشيء الزين لازم أنســير عند الغالــي والا بيرد يخترب ..

والله يـعينكم أنتوا اللي أتسوقون سـيايــر ..

[الرحيل]

الحين كل ماتروح مكان غالي ليش مادري..

انا مش دايمن بالامارات وكل 3 او 4 شهور ارد الامارات..

بس يوم ارد لازم يكون كل شي متغير فيها مادري ليش..:boxed:

من الزين الى الشين...:crazy:

بس الحين كل ماتروح مكان غالي:shocked: ..يعني سعره غير عن قبل..كل هندي يبى يستغلك:surrender:

ماظني انه هالشي له خص بالبترول:6: ..يعني غلى البترول والشاي يغلى بعد..ليكون

يسوون الشاي من البترول ونحن ماندري..:m_afaker:

والله حتى السندويشات بالكفتريا..

انا قبل مستحيل هندي يقص علي.:b015: .ايام كنت لحف..اخذ الشي باقل من سعره :a049:

سوا بالكهربائي ولا الكراج..اما الحين ما اقدر ارد نفس قبل..يعني ابدل ليت يقولي عشر اقوله انقص
درهمين غير عن قبل يوم كنت اعطيه 3 دراهم لتبديل الليت...

حتى يوم تروح تبدل ايل للسياره..:boxed:

اكثر هالاشياء بدبي..يعني اي شي بدبي غالي وباقي الامارات الحين تلحقهم:fa39:

السموحه ومشكور محب الشيخين ع الموضوع

[غرشوب]

السلام عليكم

اسعار الايجارات و الشحن و البترول الخ ارتفعت يعني راعي الدكان الي كان يبيع شي بـ 10 قبل سنتين الحين لو باعه بنفس السعر اليوم بيكون خسران.. فـ من جيه تحصله رافع سعره


اما بالنسبة للوافد الي يبيع على المواطن فقط 3 اضعاف السعر التقليدي الي يبيعه لـ باقي الجنسيات فـ هذا موضوع ثاني وما انصحك تتعامل مع هالصنف من الوافدين الحقودين.

[المزوحي]

غرشووب يابببوك إذا نصيحتك نبتعد عن هالنوعية فــ 99.9 % جيه

[غرشوب]

غرشووب يابببوك إذا نصيحتك نبتعد عن هالنوعية فــ 99.9 % جيه




يوم انته وانا وفلان وعلان بنبتعد عن هالنوعية بتستوي 10% عقب..

[هزاايم]

السلام عليكم ورحمه
تحيه طيبه لك,,كان على باالي هذي الفكره وانا اتذكر هالمواقف ال..مش حلوه:shutup:
العرب عند الغرب يالسين على بير بتروول يعني في بيتنا وبيتكم وبيت ييرانكم والفريج بكبره حقوول نفط وكل واااحد عنده كنز,,,
تاكسي لندن لو تقووف له عسب يرد لك باوندين أو ثلاث يعطيك بوااند وبينساات ويضربها شرده:boxed: ليش 15 أو 25 درهم بشاارع لاقينها
وحناا وااايد مدلعينهم,,نعطي البخشيش مدري الإكرااميه بالهبل,,ماانكر يمكن فينا هالطبع لكن يوم الواحد يعطي خمسين درهم إكرااميه:boxed: وين عاايش هذاا,,

نحن علمنااهم هذي الحركااات وخلينااهم يطمعوون إبنااا
يعني الغلطه غلطتنا وغلطة من تحكم بالزمن وفرض هالأشيااا
والأسعاار ترتفع بدوون رقيب,,يقولك البتروول والبنا و مدري وشو مرتفع والحيااة ماترحم,,يا الله عااد حنا مش عاايشين معهم,,انا اقوول في نااس بطرانين هم من فتحوووا عيوون بعض النااس علينا
و هذي دنيااا و وش رااح نسوي بهاا

:shutup: واايد هثربنااا

سلمت يمنااك يا الشيخ لاهنت
والمعذره

[قــبقــوبـه]

:h_mar7aba:


الدنيــا كلها قامــت الحيــنه تمشــي بفــلوس .. يتحسبـون عيال الامــارات محصليـن البيـزات فالشــارع !!
اذا طــرينا للأجـانب انه نحن من الإمارات .. اول شــي بيطـري على بالهـم البيـزات والبتــرول والنفــط ..
امممممم واذا استنـكرت سالفـة زيـادة الفــلوس ..بيقـولون لـك ..
انته مــواطن المفـروض تدفـع وانته ســاكت شحقه مكــود هالبيزات تحتـك ومتفيــزر علييـــهم !! :fa46: ,,


من يــومين سألت راعـي البــاص
.. هااه فــلان كم تبــا هالشــهر قالي 270 والعــام كان يطـلب 250 .. قلتـله شحقـه قال البتــرول .. >> أحــس ماايخصـه :doh: ..
يعني الحيـنه من العـام زايــدين سعر البتـرول الحينه اتفيــجت ازيــد ..


المشــكله انه التجـار يقـلدون بعـض اذا واحـد منهم زاد البـاقيـن مايقصـرون ..


ياتـرى شــو الأسبـــاب اللــي تخليهــم يطــمعــون جــي ؟


اعتقــد لانـه ماافــي رقـابه عليـهم .. فهم يـزيدون عـ كيفــهم وينقصـون عـ كيفــهم ..
يعنــي لــو فـي رقـابه عليـهم جـان ما إتجـرؤا انهـم يزيــدون الاســعار بهالطــريقه :a046: ..
والـي الحيــنه بعــشر باجــر بيكـون بعشــريين ..


دكتـور الـ FINANCIAL :vertag: قـال انه ارتفــاع الاســعار شي طبيــعي ..
هــوه طـرح عليــنا مثـال انه قبــل بـ دولار كنت تــروم تشـتري برجـر ..
وعقــب بـ دولار كنت تـروم تشتـري نـص بـرجر..
وعقــب بـ دولار كنت تـروم تشـتـري ربـع بـرجر..
وعقـب بـ دولار تـروم تـروح البـرجر بـس..


أحــس اني واييــد اتفـلسفــت ..
عالعــموم شكــراً محــب الشيخييــن عـ الطــرح :k_blush-anim-cl: ..
والله يعيييــــنا ..


...
..
.
:bye2:

[أمواج]

.
.
شكـلكم وايد متــأزمين
:fa46:
صح إنه اسـعار البترول ارتفـعت بس بالمقــابل المعاشات زادت
يعني علاقــه طرديــة
فطبيعي يكون كل شي غالي
.
.

فهم يـزيدون عـ كيفــهم وينقصـون عـ كيفــهم ..
مب على كيــفهم
بعطــيج مثـال
مره اشتريت غرض من محل عادي و بالصدفه لقيــته فـ وافي و طبـعا السعر دبل
سألت راعي المحــل ليش عندكم الســعر دبل ، شو ردوا علي إنه أجار المحــل وايد مرتفــع وهم من وين بيبـون بيزاته فلازم يرفــعون السعــر
أدري بتقــولين محد قالهم يفتـحون محلات عووده بس هاللي صار
في منهـم طماعين وفي منهـم ظرووف تجبرهم إنهم يزيدون فالســعر

.
.

[لمّــاح]

السلام عليكم ..

موضوعك حلو ..

مثل قالت الاخت امواج هناك سببين .. أول سبب ضروفهم و ثاني سبب الطمع ..

السبب الأول معروف .. مثلا عندك محل و فاتح في مركز معروف لازم يكون سعره اغلى عن برع و هالشي انا دايماً الاحظه حتى الكنادير في المراكز يفصلك الكندوره على 200 و برع على 140 !
او العطورات مثلاً انا اشتريهن بأسعار رخصيه ماتتخيل كم، يعني عطر في السوق على 300 اشتريه ب100-120 بس لازم اتكون شاطر يوم اتكاسرهم ولا بيغلبونك..

اما السبب الثاني الي هو الطمع .. انا شخصياً صادفتني بعض المواقف احيد مره كنت في محل من المحلات و السعر ماعيبني لأني نفس الغرض هذا خذته قبل يومين بالسعر الفلاني و عقب بيومين ارتفع السعر 50% و راعي المحل يحلف انه ماباعلي اياه قبل يومين بهذاك السعر ...الخ
طبعاً ماتسويله واحد ثنين رديتله الاغراض..
ولا أكثر ناس يقهروني و اعتبرهم استغلاليين هم اصحاب مواقف السيارات .. نحن وين انداوم ماشي مواقف غير مواقف البلدية ( و دايماً زحمة ) وعدال هالمواقف شي ارض ممسوحة و مسوينها كمواقف .. قبل كان اليوم الكامل ب 15 درهم و الحين رفعو السعر الى 30 .. و الشهر اذا بتاخذه كامل يعطونك اياه على 300 و قبل كان ب 200 .. يعني في السنة 3600 !!
المفروض تكون هناك رقابة على كل كبيرة و صغيره صح صعبه لكن لازم تكون هناك حماية للمستهلك مثل باجي الدول ..

وبخصوص التضخم نحن النسبة عندنا مب طبيعية و مب منطقية ابداً لكن هالاشيا كلها بتتصحح عقب كمن سنه يوم بتجهز المشاريع و بتهدا البلاد ..