..أنا في الروضه .. ويا أصحابي ..

[الشوق]

http://img.123greetings.com/events/kids_schooltalk_backtoschool/1070-007-08-1074.gif

انــــــا في الروضـــــــه ويا أصـــــــــــحابي
ســــــــاعه الــــــعب ســــــاعه كتــــــابي
اعـــــــرف اصــــور .. وارســـم صـــــوره
فيـــــها شـــجره ..وفيهــــا عصفـــــــوره
:11: :9admah: :11: :9admah:

السلام عليكم ورحمة الله وبركاته
أكيد الكل عارف هالاغنيه ... وسامعنها... أيـــام حلوه ما تنتسي,, وذكريالت ومواقف طفوليه ..
بدايات غريبه .. وجوه بريئه .. طفوله رائعه ... ولعب ومرح .... بين الحين والاخر
بجانب بعض حصص الرسم والموسيقى وبعض المواد البسطه اللي نتعلمها واتعلمناها ..
الروضه .. مكان جميل ورائع ابصراحه شهدته لمدة سنتين ..
قد تكون نلك الذكريات زائله عني بعض الشي .. لكن ما زلت احتفظ بصورة لي عندما كنت في الروضه ..

أيـــــــــام .. والله .. :hist:
اكيد الحينه عيشتكم هالجو صح !!!:ttmasha:
مشاغبات طفوليه بين البنات والاولاد .. صدقات رائعه . ومشاركات جدا جميله ..
. ومع ذلك مرح وضحك ولعب .. وفي النهايه .. دراسه على الطاير ...
طبعا الدخول في الروضه يكون في سن معين يعني تقريبا اربع سنوات وخمس سنوات ..
فيا ترى يا هل ترى .. كل واحد يخبرنا:-
كيف كانت بدايتكم مع الروضه .
يعني شو موقفكم من بعد ما تركتوا البيت ودشيتو الروضه ..؟؟؟ كيف كانت ردة الفعل ؟؟
شو هي الاشياء اللي كانوا يعطونكم في الروضه ؟؟؟
اذا ما تذكرون اي موقف من مواقفكم .. اسالوا عن مواقف اخوانكم الصغار ؟؟ اذا حبيتو هالمرحله ؟؟ فشو سر تعلقكم اب هالمرحله ؟؟؟
تعتقدون ان الروضه مفيده للطفل او لا ؟؟ وليش ؟؟؟
.
.
من ضمن فعاليات العودة الى المدارس اترككم ويا ذكريات الطفوله الحلوه والجميله :ttmasha:
بس ها لا تنسون:doh: في انتظار مشاركاتكم اللي مالنا غني عنها
http://jrnas.org/uploader/uploads/m-B2S.gif
وحقوق الطبع محفوظه عند الشــــ:fa35: ـــــوق في واحات بن دبي 2-9-2006
:fa35: :fa35:

[تنينه]

الــسلام علـيكم والرحــمه :fa35:


انــــــا في الروضـــــــه ويا أصـــــــــــحابي
ســــــــاعه الــــــعب ســــــاعه كتــــــابي
اعـــــــرف اصــــور .. وارســـم صـــــوره
فيـــــها شـــجره ..وفيهــــا عصفـــــــوره



يالله هــالاغنيه :kcl: ,, الــروضه أيامـها أذكـربـعضها ,, وطبـعاً بـعضها أللي أذكرهـا هـي المميزه والأحداااث العجيبه الحلووه brgll: ,,

أتـذكر قـبل ما أدش الروضه كنت واااااااايد متحمسه لشي أسـمه مـدرسه :fa34: وكـنت شارتلي شـنطه ومقلمـه وأقلام وألوان وكـل شي :fa34: ,,

أول يوم دوواام سـرت مـع أمي ودتني ,, أتـذكـر أنـه أمي دشـت مـعاي ألـين الإداره ,, وعـقب يت أبله ما أدري ولا أخصائيه كانت ,, وجان أتـزغ من أيدييني عـسب أتوديني للصـف ,, أنـا من جفت أمي أتقولي سيري ويا الأبله وأجوفها مبتعده ,,

واصييييييييييييييييييح وأزاعـــج ماااااا بااااااااا :waa: ,, كنت زااايغه الروضه كانت جـي كبيره والساحه مـحد فيها ما أعرف زغتتتت ,, وأمي ما شي تبتعد عـني أكـثر ,, جـان أعض أيدين الأبله واركض صووب أمي :hist:




بس لا تضحكون :harhar1:


وأمـي عـاد خلااص صدق حـرجت عـلي ,, واتقولي بلاا هالدلع وسيري ويا الأبله ما بتسو فييج شي بتروحيين صـفج والبنات مـعاج وبتسااانسين وشي ألعاب وحلاو و و و و ,, وانا ما ابى شي بس أبى أمي وهالأبله ما اباها كان شكلها ما أدري كيف جـي عصبيه :boxed: ,,

جـان تـمشي معاي أمي ألين الصـف ,, ما رضيت أدش ميووده بعباة أمـي ماا أبى :waa: ,,

جـفت بنت جيراننا كانت يالسه وبـكل أدب :doh: جـان اتقولي أمي جووفي حـصه يالسه مؤدبه ما أتصيييح شراتج ,, سيري يلسي معاها ,,

مـا أدري كيف حسيت عيوني كانت منتفخه من الصياح ههه :hist: وكل اليهال يجوفوني بـنظره وخخ :puppyeyes: ,, اوني عـاد بغيت أراوي عمري اني بطله ما بصييح وخخ ,, دشيت الصـف ويلست حـذال بنت جيراننا كانت ربيعتي وألعب معاها مـرات ,, وأمي قالت لي انها ما بتظـهر من المدرسه بتترياني الين ما أخلص دوام ,, حلييلي انا صدقت بعد وخخخ قصوا علي :hist: ,, يعني يوم بيخلص الدوام أكييد بتيي وراي وبجوفها خخخخخخخ ,,

والله الرووضه ذكريااات حـلوه ,, ما كننا ندرس ولا واجب ولا شـي ,, أللي أتذكره كانوا يعلموننا الألوان والحروف والأرقام ,, واللعب كان ماخذ النصيب الأكبر من وقتنا :fa34: ,,


الـروضه مـفيده للـطفل ,, أول شي أتهيأه للدراسه عـقب وجوو المـدرسه ,, يعني علمونا أشياا حلوه مثل النظاام والارقام وكانوا يراوونـه رسووم :fa34: مـفيده واشيييا حلووه :kcl:


أحلى شي في الرووضه أنـه ما كان شي كويزات وبحووث وامتحانات وخخ :fa34: ,,


أياااام حلــوووه :kcl:



عـزيزتي الـشوق تسلمييييييين على الموووضوع الحلوووووووو:fa35: ,, صدق رسمتي البسمه على ويههي وانا أقـرىمـوضوعـج الحلو:fa34: ,,


لا عـدمناج يااا رب :kcl:


موفجه دوووووووووم


تنييينه :qor9anah:

[لبن مثلج]

السلام عليكم

:ttmasha: انا مادشيت الروضة :ttmasha: بس حفظت الاغنية :harhar1:

سالليني عن المدرسه الي ماكنت احبها لي يومج هذا :smartass:

[الشوق]

تنيـــــــــــــنه
لحظات حلوه ومفرحه .. يالغاليه
عشناها ونتمنى ان انعيشها ..
وموقفج يضحك ..
انا بنت اخوي اقولج اول ما ركبت الباص شلت الدنيا ع راسها .. وامها اتقولها انا يايه احينه
زاخه امها وتبيها تركب الباص وياها
هذا ثاني يوم طبعا .. لان اول يوم اختها كانت وياها .
.
.
رغم ان اول يوم اتحصلين اليهال مستانسين اب شله اشنطه ودبة الماي على جتوفهم ..
لكن يوم ينحطون جدام الامر الواقع يتغير الحال
والله يعين لين ما يتأقلمون
شاكره لج مساهمتج
خويتج/ الشوق
:fa35: :fa35:

[رومانسي الأطباع]

السلام عليكم ورحمه الله

الصراحه يا الشوق ذكرتينا بالماضي

انا اول يوم لي بالروضه دخلت الصف واذا بي انصدم بالمدرسه ما شاء الله عليها مصريه ووزنها فوق

150

وكانت يالسه على الباب ومن الخوف كان انط من فووقها واشرد واروح لامي وقلت لها والله ما درست

عندها ودوني عند وربعي هذه اخافها تاكلني اذا يااعت

ههههههههههههههههه


وفعلا قامت الوالده ونقلتني من الصف


واذاكر اول شي اتعلمته بالروضه وهو طريقه صنع قارب من ورق

والله ذكريات حلووووه

[الشوق]

اوكي الغاليه لبن مثلج..
بما انج ما دشيتي الروضه
خبرينا عن اول سنه لج دشيتي فيها المدرسه كيف كان شعورج فيه
وشو السبب اللي ما خلا اهلج يدخلونج الروضه ؟؟
.
.
.
وتسلمين عزيزتي ع التواجد
ها شرف كبير لنا ؟؟
وجان على الاغنيه وايدين حافظينها ..
من الوناسه اغاني اول محد يروم ينساها لانها تدووووم وتدوووم وتدوووم ....

[قصايد غلا]

ذكريـــــــــــات صياحـــي والحفله اللي كنت أسوّيها كل يوم الصبح :fa34:

أنا الله يسلّمج لين ثالث ثنوي وأنا أخاف من المدرسه ، لدرجة إني أقول حق ربيعتي أنا كل يوم الصبح بمر عليج والظهر أنا بردج بيتكم بس المهم اتّمين ويايه لين آخر الدوام (مادري ليش أنا جذه خوّافه ، بس لساني طويـــل لووول):kcl: "فديت روحي والله"

المهــــــــــم .. أنا الله يسلّمج يالشووق طبعا من أول يوم في الروضه وأنا ميته من الزيغه ومرة أقول بطني يعورني ومة راسي ومرة ايديه وكل شويه أظهّر لهم شي
وأميه فديتها من ناحية المدرسه ما تتفاهم :hist: يعني لازم لازم أداوم وأنا أخـــااااااف :waa:

طبعا أول يوم في الروضه كنا سايرين أنا وأميه وأبويه، وأول ما وصلنا عند المدرسه قالت أميه لأبويه: لا تنزل (لأنها تدري به إذا شافني أصيح بيردني البيت "فديته يحبني و ما أهون عليه:sad4: لأني آخر العنقود")
عاد أول ما وصنا عند الصف عيني انمزرت دموع ، جان أقول لها : أميه أبا ماي ولازم يكون من عند أبويه ، سرنا وياب لي ابويه ماي
ويوم دخلنا الصف تميت أصيــــــــــــــــــح وتميت أباغم :waa: لأن الأبله قالت : اللي بيكون مؤدب وما بيصيح بوديه بيتنا عشان يلعب عندي ، وانا من سمعت هالرمسه تميت أزاعج وأصيح ههههههههههه
مالت عليها تتحراني بستانس يوم بتقول باخذكم ويايه ،
وكان أبويه كل يوم ياخذني الساعه 11.30 أو 10وشي :fa34: (عاد انا أتخقق على اليهال لأني أروّح بسرعه) ونحن دوامنا يخلّص على الــ12 وشي

والرحلات الله يسلمكم ما أسيرها :harhar1: والسبب: "أقول لأميه: أنا ما بسير الرحله عشان ما ينسوني في الحديقه :hist:

وكان واحد من الأولاد الله يذكره بالخير إسمه "علي" ، يوم يرد لااازم اييب لي شي من الرحله :harhar1: حتى لو كانت ورده :kcl:

بس الخوف لازمني ليـــن الثانويه العامه لدرجة إنه والله إن أميه توصلني لين الصف (لين خلّصت الثنويه )
وهاي هي ذكرياتي :yes:

وتسلمين يالشوق على موضوعج الحلو :yes: ...

[الشوق]

رومانسي الاطبا ع...
هيههيه حسبي الله علي ابليسك شطانه من اولها ...
وانا اقوول بنتك طالعه على منوا في الشط،،ـــــــانه اتاري على ابوها ههيه (( الله يحفظها يارب ))
المهم ..
يااخوي زين والله في الروضه يعلمونك اشياء مفيده شي حلو .. وناسه ..
.
.
.
ريم ريم ..
ليش يالغلا حذفتي ردج ..
اسالي الوالده عن اول يوم لج في الروظه وردي علينا خبر
خويتج/ الشوق
:fa35: :fa35:

[الشوق]

قصايد غلا ...
اويييييه من يوم انتي اصغيره وانتي صرتي اتخافين :nono:
بس سؤال كيف شخصيتج احينه بعدج والا خلاص الحياه علمتج انج تاخذين موقف ..
.
.
.
ايام قبل كانت حلوه .. يالغاليه :hist:
كنت احب يوم يودونا رحلات .. بين فترة وفترة امطيحين في رحله معين ..
يا سلاااااااااام صراحه شقاوة اليهال ماتتعوض ..
واتحصلين دايما الانسان يقول اياليت الزمان يعود يوما ..
.
.
قصايد غلا....ماشاء الله عليج حتى اسم الطالب حافظتنه :daleel:
هيههي تدرين اتذكر شهادتي المدرسيه ..
مره كنت يالسه اشووف الازراق الجديمه في شنطة اخوي
وانا يالسه اطالع جان اشووف شهادتي من يوم كنت اصغيره
قلت في بالي ... اويه ماكنت ادري ني شاطره في الرياضيات واييب ممتاز .. طبعا على ايامنا جي كان التقييم ..
جان استانس .. :fa34: لاني خير شر مااداني شي اسمه رياضيات ..
لكن شو انقول ..
تواجد رائع منج .. والله يحفظلج والديج يالغاليه
تسلمين
اختج/ الشوق
:fa35: :fa35:

[قصايد غلا]

:kcl: لو تدرين يالشوق اشكثر استانــــــست يوم رديتي عليه :kcl:
لأني من يومين أدش وأقول حراام ليش ما ردت عليه وردت على غيري :fa36:

الله يسلمج أنا السنه هذي متخرجه من الثانويه العامه ، ولسوء الحظ ربيعاتي اللي أنا وايد وياهن نسبهن في الــ60 وانا نسبتي أكثــر :no0: يعني نو ويـــي نكون ويا بعض في مكان واحد للدراسه
لذلك تميت في البيت ومابا أدرس في مكان بروحي

وبعد لأني أخـــــاف من شي إسمه إبره وفحص طبي ===> عشان جي من يومين سوّيت حفله في الصحه المدرسية واميه والنيرس وخالوه و وحده من العياده مستغربات:puppyeyes: ==> بس فزت وما عورتني الإبره :fa38: لأني مديت إيديه وحطيت إيد أميه على ويهي وقريت قرآن :fa34:

لوووووووول أنا عكسج أموت في الرياضيات brgll:
أنا كنت خقاقه بعلاماتي من يوم في الكي جي مع إنه كان في الكي جي التقييم مثل ما قلتي :yes:

لازم بذكر إسم الولد لأنه الوحيد اللي يعبّرني بشي من عقب الرحله:fa46:

مادري ليش أنا الخوافه بس مع إنه (أميه وابويه واخويه مووول ما يخافون) بس أنا غيـــر مثل : "جدّه غيـــــــــر" :fa44:

ويسلّم كل من تغلينه وتعزينه يا شوّاقـــــ:fa35: ــــــه

[طير الحب]

أنا الي أذكره من الروضه...طفل اسمه أسد من كثر ما ضربني ما حبيت الروضه وطلعت بس درست ثلاث شهور يعني ما عندي ذكريات إلا هالأسد الي كرهني بالروضه.

[الشوق]

طير الحب:)
هالاسد هذا من كثر ما ظربج .. حتى اتذكرتي اسمه ماشاء الله عليج
احلى ما في الروضه اللعب ... والرحلات ... ياويلي عاد ع الرحلات ...
.
.
.
. تحياتي لج/ الشوق

[العجيبة]

هههه أنا بعـد ما رحـت الروضة .. بس تعيبني وايد تعيبنــي ..

أول مرة دشيت الروضة .. كنت صف ثاني ، طبعا سايـرة ويا أخوي اللي ناوي يتخرج من هالروضة ..

أكثر شي عيبني طاولاتهم الصغيرة اللي كانت تناسب حجمي .. جنها مفصلة لي .. بعكس طاولات المدرسة اللي أضطر أوقف عشان أكتب .. وطبعا طول اليوم أنا واقفة في المدرسة ..

بس بشكل عام أنا أحـب الروضة ومكانها الحلو ، بس ما أحس انها تصنع طفل يبا يدش صف أول ( طبعا أتكلم عن الروضة الحكومية )
الياهل بعـد ما يطلع منها تكون عنده مهارات عادية كان يقدر يكتسبها من أمه وأبوه في أول أربع سنوات من عمره ، مثل الاحترام والنظافة والنظام والترتيب + بعض السور الصغيرة والحروف والأرقام وكيف يكتب اسمه .. هاي أشياء المفروض تعلمها من بيته ..


وبس ..


تشكراااات الشووق عالموضوع الحلو

[الشوق]

العجيبه
اضافتج مميزه يالغاليه ..
صح الروضه لها ايجابياتها الجميله والممتعه...
رحلاتها المدرسيه .. حفلاتها الممتعه . المعلمات الحنونات ..
صحك ولهو . ولعب . وفرح ومرح ..ايضا ..
كتابات ورسومات .. واعداد وارقام كانت لها ميزه خاصه وطعم خاص
.
.كنا صغارا وفي مرات كثيره
اقووول ياليت ارجع لايام طفوله لان ما تحمله تلك الايام .. الكثير من البراءه والشفافيه

.
.
تحياتي/ ودمتى
اختج /الشوق

[اليازية]

السلام عليكم

والله سوالفكم اتونس .. أما بالنسبة لي كان شي ثاني

طبعاً انا الروضة ما دخلتها لاننا كنا مسافرين هاييج السنة و عاد طولنا شوي في السفرة .. يعني راحت علي .. لكن بخبركم عن أول يوم في المدرسة .. بصراحة كان شعور ممتزج .. كنت خايفة و متحمسة بنفس الوقت .. و من كثر ما كنت متحمسة .. أول ما نزلت من الموتر صكيت الباب على صبعي :fa46: هههههه .. يعني نحاسة بالقو!