,,,المدارس الحكومية والا الخاصة ,,,

[الشوق]

الســــلام عليــــكم ورحمــــة الله وبركـــــاته .
اليوم وانا رايحه العيادة ...... كنت قاعده اقرى في الكتيب اللي موجود على الطاوله .. قلت اقزر اب حالي اشويه الين ما يزقرون اسمي .. واشويه بدأ النقاش من بين الحريم ... ( كانت وحده سودانيه والثانيه مغربيه ) التقوا في العياده ودار من بينهم هالحوار .... ؟؟ عاد انا يوم شفت الموضوع يشد قلت في بالي ... يا الشوووق ودري عنج هالكتاب وخليج مستمعه جيده ... لهم لان الموضوع يشد .. :kkk:
وبالمره اكتبيه في الواحات وخذي شور الاعضاء .. ويا بخت من علم واتعلم هيهههيهي :fa34:
شو رايكم ؟؟ :hist:

طبعا هم كانوا يتكلمون في مواضيع شتى الين ما وصلو في كلامهم عن اليهال .. ومستوى الجرأه والذكاء والتعلم .. ومشوا صوب الاوقات اللي راح تتغير في بدايه شهر تسعه ...

ف ..............اسمعوا الحوار عسب ندخل في الموضوع :-

السودانيه :- اقولج ليش كم انتي عيال عندج
المغربيه: عندي بنتين .. بس تدرين وحده شاطره ما يحتاج اذاكرلها والثانيه لازم ايلس وياها بس تدرين وايد اتعبني .. في الدراسه ..
الشوق :- ليش بنتج كم عمرها
المغربيه : والله هم عمرها سبع سنوات لكن تدرين شطانتها اكثر عن المذاكر اللي اتذاكره
الشوق: اها ..
السودانيه : يعني هي شاطره في المدرسه جد رسبت قبل
المغربيه : المشكله انها شاطره في التحريري لكن في الشفهي .. دومهم المدرسات يشتكون منها .. يقولون كل ما نسألها سؤال اتم ساكته
الشوق: انزين في بنات جي هم شطار في الاصل . .يوم انج اتقولين ان امتحاناتها اوكي معناته انها ذكيه .. ولها القدره في الحفظ لكن تنقصها الجرأه في الكلام ( طلعت البنت حياويه )
السودانيه : انزين وايد اتحصلين ناس جي ما يحبون يشاركون في الشفهي لكن شطار في التحريري .. يمكن هي طالعه جي على ابوها
المغربيه : ترى ما رحتي ابعيد ابوها دوم هادي .. عسب جي (( يعني الوراثه لها دور ))
الشوق: اهاااااااااا بس انتي حاولي وياها وفهميها ان للشهي له دور في تغيير الدرجات
السودانيه : انزين يعني انتي الحينه امودتنهم مدرسه خاصه .. هي
الشوق : انزين والمدرسه هذي اتعلمهم بس انجليزي والا بعد عربي
المغربيه: كله انجليزي
الشوق: يدرسونهم دين
المغربيه : هيه بس الاساسيات انجليزي .. بس تدرين انا افكر يوم بتدش البنت صف خامس .. افكر اني انقلها مدرسه حكوميه
السودانيه : بس اذا نقلتيها حكومي بعد هالسن راح اتحصل صعوبه في الاستيعاب والفهم لان بيفوتها الاساسيات ..
المغربيه : شو اسوي . ماابيها اتدش مدرسه حكوميه الحينه . من اللي اسمعه عن المدارس الحكوميه :kkk:
السودانيه : عيل اذا جي فهي ما راح تستوعب المواد اللي راح يعطونها في المدرسه الحكوميه يا انج اطلعينها من الحينه .. يا انج اتخلينها اتكمل ع الخاصه :no0:
فجأه نادو اسمي .. واستأذنت من عندهم وتركتهم اشووف الدكتور
.
.
.
اعزائي .. اعضاء واحات بن دبي :ice:
الحينه بتقولون لي .. ونحن شو لنا في كل هذا ... :doh:
اخي العزيز - احتي العزيزه ..
- هل تحبذون المدرسه الحكوميه ام الخاصه ؟ ولمذا ؟
- تعتقدون هناك اولويات في المدارس الخاصه او الحكوميه وماهي؟
- ليش المغربيه قالت ( مااحب ادخلها المدرسه الحكوميه وهي في هالسن ) خاصة على اللي نسمعه الحينه ؟ شو كانت تقصد اب كلامها؟
- وانتوا اب رايكم شو الفرق بين المدرسه الحكوميه وبين المدرسه الخاصه
.
.
http://jrnas.org/uploader/uploads/m-B2S.gif
اسبوع فعاليات العوده للمدارس -- ترقبوا الجديد منا ...
يلا في انتظار تفاعلكم ... على وعسى تعطوني اجوبه على استفساراتي
بس ها لا تنسون حقوق الطبع محفوظه عند الشــــــــوق وفقط في واحات بن دبي
:fa35: :fa35:
خويتكم/ الشوق
:fa35: :fa35:

[هزاايم]

أول حااجه,,سلامات الشيخه لووول كيفي,,وربي موضوعج يحتااج له نقااش

- هل تحبذون المدرسه الحكوميه ام الخاصه ؟ ولماذا ؟

لو عن الدرااسه,,رااح أقول الحكوومه:yes: ,,لأن أغلب المداارس الخاصه يشوفون التلميذ ولد من ,,يدفع ورااح يكوون عون للمدرسه,,راح ينجحون الطالب حتى لو كاان فااشل,,والحكوومه مش ماعندهم هالسوالف بس مانشوفها منتشره شرااتهم,,ولو ببتكلموون عن الإنجليزيه ياما خريجين من مداارس الخاصه بلبل في الإنجليزيه لكن بالقوااعد مييييييييح,,هم بس بالخااص يعلموونهم الجرأه وبالحكوومه يدبسوون الطلاب مع معلمين نطقهم للكلمااات مش مفهومه:doh: ,,وأحب أوضح اغلبية طلاب الحكوومه تعلم الإنجليزيه بذااتهم:fa38: ,,يعني لعبت الحكومه دور وهي مش دااريه:harhar1:

- ليش المغربيه قالت ( مااحب ادخلها المدرسه الحكوميه وهي في هالسن ) خاصة على اللي نسمعه الحينه ؟ شو كانت تقصد اب كلامها؟

وش سمعت:puppyeyes: ,,يابووج الدنيا تخوف,,والله يستر على صااير بالمدااارس:no0:


- وانتوا اب رايكم شو الفرق بين المدرسه الحكوميه وبين المدرسه الخاصه؟؟

يمكن مش أكيد الخاصه بعضها لعب,,والحكوومه وراها مشاااكل,,يعني واحد مايكمل دراسته احسن:doh: >>>امحق اقترااح

[المزوحي]

الجيل اللي تخرج من المدارس الحكومية استوا طيارين ودكاتره وعباقره بعد ..
لكن المدارس الخاصة السنة زادت بشكل كبير .. يعني في كل فريج 3 مدارس خاصة ..
صح يمكن بالنسبة للغة الانكليزية أقوى .. لكن وايد ناس ماتقدر تدفع ماصريف هالمدارس
اللي اصبحت بالنسبة للروضة فوق 15 ألف .. يتسلفووون عسب هالمدارس ..

في مدراء مثلا يعطونهم ( يدفعون لهم نسبة معينة ) شركتهم ويكمل شي جليل ..
كل من المدرستين لها إيجابيات وسلبيات
وماظن المدارس الحكومة لهذه الدرجة فيها شي
لا إنه الشواب قاموا ياخذون من برع بلادهم ويكودون عيال ويدخلون المدارس الحكومية
وماشي اهتمام من صوب الوالدين .. ماشي توعية .. فنحس إنه الحكومية مب شي

[راعي الزعـامه]

- هل تحبذون المدرسه الحكوميه ام الخاصه ؟ ولماذا ؟

سؤال صعب ،، كلا المدرستين فيها سلبيات وايجابيات ،، اذا تبا تتقوى في الانجليزي فمالك الا الخاصه ،، اما عن الطلاب في المدرستين البعض يقول ان طلاب الخاصه مؤدبين و متربيين غير عن طلاب الحكومه اللوث عيال الشوارع ،، يعني اذا دخلت ولدك مدرسه حكومه اخلاقه بتخترب واذا خاصه اخلاقة بتطلع توب ،،، في هالنقطه المدارس الخاصة نوعا ما نفس الحكوميه .. يعني الطلاب نفس الشي و لاتنتظر ولد اخلاقه عالية لو دخل خاصة طبعا هذا بتأثير اصدقاء السوء ،،

- ليش المغربيه قالت ( مااحب ادخلها المدرسه الحكوميه وهي في هالسن ) خاصة على اللي نسمعه الحينه ؟ شو كانت تقصد اب كلامها؟

يمكن تقصد نفس الكلام اللي قلته عن نوعية الطلاب في السؤال الاول ،،

[تحفه]

أنا اشوف ان المدارس الحكوميه ما تعلم الطالب ولا تجهزه للـ دراسات العُـليـا ابدا ..

وفي فجوه كبيره بين المناهج الحكوميه وخاصه " الثنويه " وبين التعليم العالي " الجامعات"

وما انصح اي حد يودي عياله حكومه اذا كان حاب إنهم يواصلون تعليمهم بـ سهوله

[وحي القلم]

عليكم السلام و رحمة الله و بركاته

- هل تحبذون المدرسه الحكوميه ام الخاصه ؟ ولماذا ؟

و الله ما تفرق عندي.. خاصه ولا حكوميه لانه للهنتين سلبيات و إيجابيات

- تعتقدون هناك اولويات في المدارس الخاصه او الحكوميه وماهي؟

أتصور أنه من أولويات المدارس الخاصه إرضاء أولياء الأمور ولو كان على حساب الطالب و تربيته و هالشي سمعته كمن مره..
يعني وحده تقول لي نحنى نروم نسوي الى نباه لانا دافعيلهم من بيزاتنا فما يرومون يقولون لنا شي..

ما أعمم على الكل بس بعد هالشي موجود

ولا عن المدارس الحكوميه صح أنهم يشدون على الطلاب بس أعتقد أنه هالشي لمصلحتهم

- ليش المغربيه قالت ( مااحب ادخلها المدرسه الحكوميه وهي في هالسن ) خاصة على اللي نسمعه الحينه ؟ شو كانت تقصد اب كلامها؟
- وانتوا اب رايكم شو الفرق بين المدرسه الحكوميه وبين المدرسه الخاصه

ايقولون أنه المدارس الحكوميه وايد فيهن لوث..
صح كلامهم لانه هالشي أشوفه جدامي بس بعد في نفس الوقت شي ناس زينين..

عالعموم أخلاق الطالب تعتمد على تربيته يعني من الأهل مب لانه يدرس في مدرسه خاصه ولا حكوميه..
و هو الى يحدد .. بيرابع منوه

و هذا مب معناته أنه المدارس الخاصه ما فيها هالنوع من الناس.. أكيد أنهم موجودين بس يمكن يكونون أقل عن الحكومه

..

و السموحه
وحي القلم
:fa35:

[تنينه]

الـسلام عـليكم والرحـمه :fa35:

أول البادي سلمااات الغاليه الشـوق وما أتـجوفين شـر :kcl: ,,

أتـصدقين هالنقـاش وهالموضوع بالذات دوم نـسمع عـنه وحتى نحن بييننا البنات أنسولف عـنه,,

الأكـثريه ألـحين يفضلوون المـدارس الخـاصه صراحةً ,, والسبب الرئيسي هـو إنـه تعلييمـهم أقوى ومـناهجـهم أحسن ,, كـيف :kkk: ,,

المـدارس الخـاصه تـهتم باللغه الانجليزيه والمواد الـدراسـيه عـندهم في المدرسه باللغه بالانجليزي كلها مـا عـدا التربيه الاسلاميه والعربي ,, فـ طلاب الـخاصه يوم يتخرجون من المـدرسـه أتكون لـغتـهم االانجليزيه أقوى ,, وألحين طبعاً الدراسات العلياا أهـم شي عندها اللغه وتهتم باللغه ,, فـ أنلاحظ أنـه طلاب الخاصه في الجامعه لـغتـهم أتكون أقـوى عـن طلاب الحكومه ,, وهذا أللي جفته يوم سـرت الجامعه ,,

لـكـن شي طالبـات متخرجات من الحكومه وتكون لـغتهم الانجليزيه ممتازه ,, لأنـهم هـم طوروها بأنـفـسهم وبالممارسـه ,,

لـكن أعـتقد من سـنه ولا سنتين غـيروا مـناهج الانجليزي في الحكوومه واايد , وأتطورت أكـثر عـن قبل وهـم يحاولون يطوورونها أكثر وأكـثر ,, يعني بعد سـنه ولا سنتين بتـكون مـادة الانجليزي ومستواها أعـلى ودفـعات الخريجين في السنوات المقبله بتـكون انجلزيتهم ممتازه وشرات الخاصه بـعد ,,

يـعني أنـا أجوف الفرق الوحييد حالياً بين الحكومه والخاصـه هـو قـوة مناهج الخـاصه في االلغه الانجليزيه واهتمامـهم بـها ,, ومـا أعتقد بيكون شي فرق ثـاني غـير ان الخاصه تستلم رسوم والحكومه لااا ببلاش ,,

أمـا عـن المشاكل والأخلاقـيات ,, تـرى الزين والشين في كـل مكان في العالم ,, سواء في الخاصه أو الحكوومه ,, يـاما سمعنا بلاوي عن المدارس الخاصه ونفس الشي الحكومـه ,,


المـدارس الحـكومـيه ,, قـامت أتغير في مناهـجها من سنتين وتـحاول أتحـل مشاكلها وأتطور أساليب الدراسه هـذا أللي أجوفـه واسمع عـنه لأن أختي مـدرسـه ,,


وشـرات ما قال المزوحي :: الجيل اللي تخرج من المدارس الحكومية استوا طيارين ودكاتره وعباقره بعد ,,

نحن ما أنشك بـقدرة وكفـائة المدارس الحكوميه بالعـكس أصلاً ,, قيـادات الدوله ألحين والوزرا والسفرا ,, كلـهم متخرجن من مـدارس حـكوميـه ,, وهـم ألـحين يحكمون ويديرون البلاد :yes: ,,


يـعني أنـا عـن نفسي ما تفرق عـندي المدارس الحكوميه عـن الخـاصه دام إن الحكومه قاموا يغيرون بمنهج اللغه الانجيزيه ويـطورونه ,,



ومشكوور الشوق ع الموضوع الجمييل :fa35:

[منــاوي]

- هل تحبذون المدرسه الحكوميه ام الخاصه ؟ ولمذا ؟

ما تفرق عندي ..لان كل وحده منهم فيها الزين والشين ..

- تعتقدون هناك اولويات في المدارس الخاصه او الحكوميه وماهي؟

لو سألتي قبل سنتين ولا ثلاث هالسؤال ..كنت بقولج هيه في منهج اللغه الانجليزيه
بس شرات ما قالت اختي تنينه الحين ما شاء الله بدوا يطورون المنهج ..واحس انه مافي فرق بينه وبين المنهج في المدرسة الخاصه ..

- ليش المغربيه قالت ( مااحب ادخلها المدرسه الحكوميه وهي في هالسن ) خاصة على اللي نسمعه الحينه ؟ شو كانت تقصد اب كلامها؟

لان الكل حاط في باله ان المدرسه الحكوميه ما فيها الا اللوث وان اخلاقهم مب لين هناك ..
وخاصه في مدارس الاولاد ..بس الصدق ان في كل المدرستين الحكوميه ولا الخاصه انحصل الزين والشين..وها الشي يعتمد بشكل اساسي على تربية االاهل لعيالهم ..

- وانتوا اب رايكم شو الفرق بين المدرسه الحكوميه وبين المدرسه الخاصه

الصراحه اللي اشوفه الحين ان مافي فرق من بينهم ..

ومشكوره اختي الشوق على هالطرح الرائع:fa35:

[راعي الزعـامه]

المشكله في المدارس الخاصه ان الطلاب احيانا يتحكمون في الادارة والمدرسين على اساس انهم دافعينلهم وكل شي يتسير على كيفهم ،،
ربيعي فمدرسه خاصه ،، وخبرني قصصهم اونهم يشردون ييلسون في الكافتريا اللي جريبه من المدرسه واييلهم المدير يقولهم وهو يترجاهم انهم يدخلون المدرسه وهم رافضين ،، وطبعا المدير مايروم يفصلهم لان هو الخسران ،،
و بعد ربيعي بما انه مستواه ضعيف ،، قالي اونه انا ادفعلهم عشان ينجحوني ،،، ،، :boxed: وهاي روحها بلوه :doh:

[الشوق]

السلام عليكم ورحمة الله وبركاته ...
هزايم .. وينج يالغلا عن موضوع امثال ومواقف ااعضاء الواحات ما قمنا انشوفج اهناك ..

عدنأأأأأأأأأأأأأأأ:fa34:
الكل :- وضح ان الشي الحلو في المدارس الخاصه ان تعليمهم واعطاء الطالب اللغه الانجليزيه بشكل كبير ومكثف وهالشي .. الايجابي اللي ممكن يستفيد منه الطالب في مرحلة المستقبليه ...
وهالشي الجميع يشهد له ..
اما بخصوص من دفع اكثر ابصراحه وايد سمعت عن هالاشياء .. ان اللي دافع فلوس لمدرسه خاصه اكيد ومن سابع المستحيلات انه يرسب .. (( بس معقوله انهم ما يهتمون لمستوى الطالب وهمهم هو الحشو وذلك بسبب المصاريف المدفوعه من قبل الطالب )) .:doh: .
الصراحه هالشي معناته ان الطالب ما راح يستفيد من دراسته ...
رغم اني اشووف ان في مدارس مهتمه عدل بمستوى الطالب واتذاكرله اول باول
.
.
على العموم شاكره لج النقطه اللي اثرتيها يالغاليه
:fa35: :fa35:

[الشوق]

المزوحي ...
صح انا معام ان المدارس الخاصه زادت بشكل ملفت وطبعا اللي يبي الربح راح اتحصل الزيادات بشكل ملحوظ .. في المستقبل اكثر واكثر
لكن يااخوي ما فهمت منك هالنقطه ممكن اتوضحها لي ؟؟
لا إنه الشواب قاموا ياخذون من برع بلادهم ويكودون عيال ويدخلون المدارس الحكومية
وماشي اهتمام من صوب الوالدين .. ماشي توعية .. فنحس إنه الحكومية مب شي
.
.
شو اللي ياخذونه من برع !!! :kkk:

[الشوق]

عاشق القلم
ممكن الواحد يتقوى باللغه الانجليزيه .. لكن وين باقي اللغات عن اللغه الانجليزيه وين لغتنا الام .. وين لغة الضاد في هالمدارس راح اتحصلها مفقوده واذا حصلتها.. راح اتشوف انها مب هاك الزووود ..
يعني تدري ان في الحوار اللي صار بين السودانيه والمغربيه اكتشفت الحرمه اتقووول ...
ان بناتها الارقام باللغه العربيه ما يعرفون يكتبونه .. ولا يعرفون يقرونه .. لانهم يوم يقرون يقرون الارقام باللغه الانجلزيه . حتى في مسائل الرياضيات يكتبونه بالانجليزي .. (( طبعا اتوقع هالشي في بعض المدارس ))
.
.اتخيلوا هالشي مستقبلا .. عيال دولتنا .. ميح بالكتابه باللغه العربيه .. والتنقيع عندهم اب بيزه .. يخلطون الحابل بالنابل .. :boxed:
كيف جي ؟؟؟
.
.
لكن تدري الغلطه احسها مب من المدرسه .. الغلطه في ولي االامر يوم انه ما يشوووف شو هي المناهج اللي يدرسوون عيالهم .. وييتابعونهم في هالامور ..
اوكي تبي اتودي ولدك مدرسه خاصه .. مب مشكله وده لكن !!! تابع اموره شوف شو هي الاسياسيات اللي يحتاجها .. (( وجهة نظري )) لان اللي نسمعه هالايام الصراحه نستغرب منه .. :shock:

عاشق القلم اشكرك ع صراحتك
بالنسبه للفلوس اللي تندفع عسب اتمشي الامور يوم ان هالكلام يا من عند اربيعك وعلى قولتك انه يعطيهم فلوس عسب ينجحون .. عيل ما اروم انلوم الطالب يوم مستواه الفكري يقل ..
بيطلع خايب خايب .. البيزات اشترت الضمائر هالايام
والسموحه
خويتكم/ الشوق
:fa35: :fa35:

[الشوق]

بوظبي ..
اوكي ...........انا معاج واتفق وياج ان الخاصه اتعلم الطلب الانجليزي بمستوى اكبر عن المدارس الحكوميه .. لكن
وين اللغه العربيه من كل هذا ..
شو يكون شعورج يوم اتشوفين الولد بلبل في الانجليزي .. ويوم ايي يناقشج يدخل مصطلحات انجليزيه في الحوار بشكل كبير ومكثف ..
اوكي ممكن يناقشج انتي وتفهمينله .. شو بيكون شعور اولياء اموره اذا ما كانوا يعرفون عالانجليزي .. ( سواء كان اب / ام / جد جده )
اتخيلي الموقف وياي .. انا ما ارفض طريقة الاسلوب اللي يعطونهم
لكن ارفض انهم يكترثون بالمواد الاساسيه الباقيه
لانها مهمه في الحياه :yes:

[الشوق]

وحــــــــي القـــــــــلم :-
انا معاك في هالنقطه ان أخلاق الطالب تعتمد على تربيته يعني من الأهل مب لانه يدرس في مدرسه خاصه ولا حكوميه..و هو الى يحدد .. بيرابع منوه
بس بعد رفقاء السوء لهم دور في الاختيار .. وولي الامر من حقه ان يتابع امور عياله
.
.
بس يااخوي سمعت في برنامج (( بو راشد )) اذاعة عجمان
عن المدرسه الخاصه اللي حتى بعد خارج الدوام الدراسي .. ما عندهم باص خاص للبنات او للاولاد .. بل هم جامعين البنات والاوزلاد ويا بعض .. والمشكله ان هناك الطلاب والطالبات ياخذون راحتهم في القيام ببعض السلوكيات الغير اخلاقيه . ( سواء من تدخين وغيرها من الامور )
يعني اذا ما شي رقابه على تصرفات الاولاد .. بسبب الفلوس اللي ياخذونه .. على الاقل المفروض يكون شي رقابه على سلوكياته ..
قلنا خلط لكن هذا مب معناته ان الواحد ياخذ حريته في كل شي ..
والسموحه
تسلم يااخوي اثرت في نقاطك نقاط اكثر .. لامور يمكن البعض يكون غافل عنها
خويتكم/ الشوق
:fa35: :fa35:

[وحي القلم]

الشوق

بس بعد مهما كان.. الانقليزي مب كل شي

المفروض الواحد يحسب حساب كل شي قبل ما يحدد بيدخل عياله أي مدرسه

و بعدين شي طلاب متخرجين من مدارس حكوميه و ممتازين في الانقليزي

و في نفس الوقت شي منهم يتخرجون من مدارس خاصه

و ما يكونون فنفس مستوى هاذيلاك

لانه اللغه تعتمد على الممارسه بشكل أساسي

و الى يبى يتعلم بيتعلم .. يعني ما تفرق درس في مدرسه خاصه ولا حكوميه

و عن الاختلاط

تبين الصدق.. أنا أدرس في مدرسه حكوميه

بس بعد أعرف بنات يدرسن ويايه ايرمسن شباب

مع أنهن في مدرسه كلها بنات و ما يحتكون بالشباب

و شي من البنات في المدارس الخاصه من نفس هالنوعيه الى تكلمت عنها

بس بعد شي منهن يدرسن فمدارس خاصه و ما عندهن هالحركات

هذا يثبت أنه التربيه هي الأساس.. و من عقبها أصدقاء السوء

يعني الواحد يوم بيحط عياله فمدرسة خاصه ولا حكوميه المفروض أنه يسأل و يشوفهم امرابعين منوه

..

و السموحه
اختج/ وحي القلم
:smartass:

[الشوق]

تنـــــــــــينه :fa35:
الله يسلمج من الشر يالغلا .
شي حلو ان المدرسه الحكوميه اتطور من مناهجها ..
لان وايدين اسر فقيره ما يرومون على مصاريف واعباء المدارس الخاصه ..
.
.
تدرين وين المشكله في طريقة التدريس عند الحكومه
يعني لو يغيرون من الروتين اللي في التعليم
راح اتحصلين ان حصة الانجليزي اتكون حلوه عند الطالب ..
.
.
بعطيج مثال يعني بالنسبه لي انا .. كنت اوكي في الانجليزي لكن ما بروم انكر ان من يوم ما دخلنا الجامعه ونتيجة التعامل مع الاساتذه والبحوث والبروجكتات .. والحوار والتفاهم كان بالانجليزي .. فكنا مجبورين نتحاور ونتفاهم بالانجليزي .. ولا تنسين ان من بعد التخرج والحمدلله المجال اللي اشتل فيه الحينه بخليني استخدم اللغه الانجليزيه خاصة مع الاجانب والهنود .
.
.وهالشي هو اللي خلا لغتي الانجليزيه تتطور ..
واب هالاساس . وازنا بين المواد اللي اتعلمناها في المدارس الحكوميه وبين المواد اللي علمونا اياه باللغه الانجليزيه في الجامعات ..
.
.
تسلمين يالغاليه
على ما ذكرتيه من نقاط
ودمتي بود
خويتج/ الشوق
:fa35: :fa35:

[الشوق]

منــــــاوي
تسلمين يالغلا ............ على التواجد ..
شي فرق يالغاليه .... يمكن الفرق مب في المنهج .. لكن اتحصلين باقي المواد اللي ياخذونها .. ياخذونها باللغه الانجليزيه .. (( زين يوم ما شلو التربية الاسلاميه عنهم ))
وشي الفرق الكبير اللي من اسمه ينقال عنه ان مدرسه خاصه اللي هو (( الفلوس )) ادفع بتنجح ..
مبدأ المدارس الخاصه اللي نسمعهم هالايام ..
.
.
على العموم تسلمين يالغاليه
على تواجدج ومشاركتج الطيبه
ولج تحياتي / الشوق
:fa35: :fa35:

[عفاريتووو]

.
.
.

السلام عليكم


احبذ المدارس الخاصة
- في هالزمن الانجليزي هي لغة اساسية
و هي اللغة اللي الطالب بيدرس فيها في الجامعة ,,, فــ غالبا طلاب المدارس الخاصة
ما يتعبون من هــ الناحية في الجامعة
- عدد الطلاب في المدارس الحكومية وايييييد ,, اما في الخاصة (مب كلهم ) اقل
اذكر صفنا ما تعدى الـ 16 طالبة ,, فــ الطالب بيحصل اهتمام اكثر من قبل المدرس
و بيفهم اكثر ..
- صوت الطالب في المدارس الخاصة مسموع ,, ياخذون راي الطلاب و اولياء الامور قبل ما يصدرون اي تغير ع النظام
- نظام التدريس اقوى ,, جربت امتحانات الحكومة و الخاصة
امتحانات الخاصة وايييد اصعب و وتنمي الجانب الفكري
اما امتحانات الحكومة اغلبها اختبار للذاكرة !

بس اكيد مب الكل المدارس الخاصة زينة في منها المادية و منها اللي تهتم بالانجليزي وتتجاهل الاهم
اللي هو العربي و الدين

و في نقطة ثانية واييد اسمعها من الناس ان المدارس الخاصة ادفع و ينجحونك
هو شي موجود بس مب في كل المدارس الخاصة
في المدرسة اللي كنت فيها واييد كانوا يرسبون ,, واللي يرسبون اكثرهم عيال فلان وفلان !
مادري ليش هــ النظرة عند الناس :kkk:


تسلمين الشوق عــت الموضوع الحماسي ^_^



.
.
.

[الشوق]

عفاريتو . تسلمين حبيبتي ع الشماركه القيمه منج
بس اقولج بما انه لج تجربه شخصيه مع المدرستين
الخاصه والحكوميه ....
بس عطي الاعضاء فكره عن المدرسه الخاصه اللي كنتي تدرسين فيها
كيف نظامهم .. اي مدرسه كنت ؟؟ وشو المناهج اللي تدرس ..؟؟
.
.
.
وفي انتظار تعقيبج يالغلا
خويتج/ الشوق
:fa35: :fa35:

[قصايد غلا]

تسلميـــــــــن يالغلا على الموضوع الحلو

اممممممم أنا بالنسبه لي كل شي يعتمد على الأهل سواء الطالب كان في الحكومه ولا في الخاص ترى في كلتا الحالتين بيفلح وبيكون متميز على قد إهتمام الأهل و"الطالب نفسه "==> هو أساس النجاح
و كل مكان وله سلبياته وإيجابياته والطالب له دووور كبيـــــر (أكبر من دور الأهل)، مثلا : بنت خالوه عمرها 8 سنوات ، ماشا الله عليها في قسم إنجليزي وعلاماتها عااااااااااليــــه ، لكن أخوها يحصل نفس الإهتمام من أمه لكنه هو من النوع اللي بسرعه يطفر ويحب العناد ودرجاته بعد زينه لكن مب مثل أخته (واثنينتهم في نفس المدرسه الخاصه) ،

فــ أنا برايي إن الطالب الشاطر لو يحطّونه في أخس مدرسه وهو مهتم ويخاف على مصلحته وأهله وراه ومتابعينه ويسألون عنه ويراقبون مستواه ودراسته بيفلح وبيتميّز

والطالب اللي مب في باله الدراسه هذا الواحد يغسل إيديه منه لأنه أساسا مايبا يهتم

وما حد الله خلقه غبي ، لكن القدرات تختلف من شخص لشخص
وإذا على اللغه تراها ما تي من المنهج والصعوبه ، ياما ناس حطوهم في أحسن المدارس لكن ما يعرفون التين من العنب:hist:

اللغه تبا لها ممارسه وبس ، وانا بالنسبه لي اللغه المهمه لغتنا فديــــتـــها هي "اللغه الأم"
وبالدرجه الثانيه هي اللغه الإنجليزيه ، نهتم فيها لأن الناس قاموا يعتبرونها شي أساسي :yes:

شو فايدة الطالب يوم هو يغرّد في اللغه الإنجليزيه ، وما يعرف يفسّر كلمه بالعربي أو يترجم كلمة بسيطه من العربي للإنجليزي :fa36:

كل الشكر لج غاليتي " الشوووق"
والسموحه منكم :yes: ...

[عفاريتووو]

عدنا

اليوم البث المباشر كان يرمس عن هالسالفة
و في واحد من المتصلين واييد قهرني قال " المدارس الخاصة محد يقيم طلابها
دوومهم ناجحين ,, مايرسبون لان الوزارة ما تتدخل في التقييم "

مادري ليش دووم يقولون انتو تاخذون الدرجات ببلاش :no0:


في المدارس الحكومية عادي الواحد ييب 100 كمعدل
بس تعالي قولي هالكلام يدام حد من المدارس الخاصة بيستغرب !!
لانه ماعنا 100 نحن
الطالب ما ينعطى علامة كاملة في التعبير لا العربي و لا الانجليزي
ولا في التلاوة و التجويد

وعن الرسوب
تقريبا السنة هاي واييد طلاب انطردوا من المدرسة لانهم رسبوا لثاني مرة
كيف مافي رسوب !!

و عن الامتحانات
امتحانات الحكومة ,, الاسألة من الكتاب نفس ماهو .. يعني اي شخص يدرس الكتاب بيجاوب
اما الاسألة اللي كنت اجوفها في الخاصة ,, اكثرها تعتمد ع الفهم و الاستيعاب
يعني مب direct ,, و ها النمط اللي يستخدمونه في الجامعات

و اكثر الامتحانات يكون فيها سؤال Bonus
و ها السؤال يكون صعب ,, يباله تفكير و ذكاء
بس واييد يفيد يمكن اول مرة ماتقدر تجاوبه ,, بس مرة ع مرة السؤال ها بينمي ذكاءك
و طريقة تفكيرك

و عن المنهج في المدرسة الخاصة
الكتب تقريبا كل سنتين او ثلاث بالكثير تتغير
يمكن هالشي واييد اولياء امور يشتكون منه ,, بأنه يضطرون يشترون كتاب يديد كل سنة
بس ها المفروض ,, لانه العلم يتطور

و بعد شي ثاني عن الكتب
يبالي اصورلكم كم من كتاب من كتب اخواني
الكتاب بروحه يشجعج انج تدرسين ,, كله الوان و صور
مب نفس كتب الحكومة اللي تسد النفس :no0:

و عن المدرسة اللي كنت فيها ,, مابا اسوي دعاية للمدرسة :harhar1:

بس الناس اللي يقولون المدارس الخاصة فيها سلبياتها اكثر من ايجابياتها بقولكم
انتو اخترتوا المدرسة الغلط
في مدارس خاصة وايييد زينة :yes:

و شكلي بيكون لي عود ثانية
ادافع عن مدرستي :harhar1:

[الشوق]

عفاريتو ..
تدرين شفت البرنامج هذا اليوم مب البث المباشر هذا الله يسلمج اسمه ( قبـــــل النشـــــــر)...
امممم ليش تنقهرين من الريال هو قال جي من اللي يشوووفه ..وثاني شي لا تنسين انه العموميه الناس ياخذون عليها ...
ع العموم انا اللي عيبني في كلام احد الطلبه في البرنامج
يوم قال :-
انــــــــــا طول عمري اطلع من الأوائل ..وفي الانجليزي كنت اييب 100 .. ويوم سرت الكليه
انصدمت وحسيت نفسي اني غبي واني راح ارسب ...واكيد ..
شو اللي خلاه يحس اب هالاحساس ...
.
.
هذا اللي راح انشوفه في موضوعنا الياي اللي راح نتناوله في المدارس ..
ترقبي الموضوع .. يمكن سمعتي الريال ..
بس بعد بقولج اترقبي الموضوع لان محتاجين لمثل هالمواضيع في الجامعات
هيهيه وتسلمين الغاليه ع التواجد الحلو منج ..
.
.
السموحه
خويتج/ الشوق
:fa35: :fa35:

[الشوق]

هلا الغاليه
قصايد الغلا .. في البدايه حبيت ارحب بج على هالتواجد المميز ويانا في الواحات وان شاء الله تستانسين دووووم مو بس يووووووم ..
المتــــــــــــابعه .. ..
سبب رئيسي في نجاح الطالب او فشله ..
وهاي المتابعه اتكون ثلاث اطراف
- المدرس
- ولي الامر
- الطالب نفسه ( متابعته لدروسه )
.
.
ونموذج ولد خالتج هذي مرت عليه يوم كنت ادرس عيال بنات اختي .. واحد فيهم يطفر .. اقولج ما كان يعرفني الا يوووم الامتحانات والايام اللي تحتاج متابعه وياه .. ييسلس يلعب كره وماادري شو ..
في النهايه اتبعت وياهم طريقتين ...
عسب تعرفين شو هي الطريقه
ادخل الواحه القيمه .. موضوع اختنا مشغوووب بعنوان كشكووول .. وراح تعرفين شو اللي صار
وتسلمين ع التواجد
وخليج ويانا دووووم يالغاليه
اختج/الشوق
:fa35: :fa35:

[قصايد غلا]

تسلميــــــــن غناتي على الترحيب (وجان أستحــ:kcl: ــي لأنه محد رحّب بي غيـــرج أو بالأصح ما كتبت موضوع ولا خبرتهم إني يديده وأبا ترحيـب :harhar1: )

يسلم غاليـــج يالغاليه ...

[شمعة أمل]

انا مجربه المدارس الحكوميه والمدارس الخاصه .. وأفضل الخاصه

انا بتكلم عن أحسن المدارس الخاصه .. يعني مب المدارس الخاصه مال أي كلام
وعن المدارس الحكوميه .. هممم .. بس اقدر ارمس عن المدارس الى انا كنت فيها


الدارسه في المدرسه الخاصه واااااااااااااايد صعبه .. ومب سالفة الانجليزي الى صعب .. بالعكس.. نفهم كل شي .. بس الدراسه صدق صدق صعبه .. ماتتخيلون شو يعلمونا وماتتخيلون كم بروجكت وواجب يكون عندنا في الإسبوع

يوم كنت في مدرسه حكوميه .. ابدا ماكنت احس بالضغط الى احس فيه وانا في خاصه لدرجه اني أمرض لاني مب متحمله الشغل .. وصدق يذلوووناااااااااااا ذل بشكل فضيــــــــــــع .. لكن الشي الى عيبني انه يعاملونا كلنا نفس الشي .. يعني لو تيبون بنت شيخ ووحده فقيره بيعاملونهم الاثنين نفس الشي .. عكس المدرسه الحكوميه >_< .. احيد يوم كنت في الابتدائيه ايام الامتحانات .. البنات كلهم يتمون في المدرسه بعد الامتحان .. اما انا لاااا امي تمر علي وارد البيت:harhar1: .. مره كنت في 6 مادري 7 .. اونه بندخن الصف *لكن يهال شو عرفنا في هالسوالف* شوي والصف بيحترق! الاداره يوو الصف وقالوو منوو سووا هذاا .. جان انا اوقف:harhar1: مع انه مب انا الى كنت بحرق الصف .. لكن عرفت انه مابيسوولي شي .. وكمن بنت وقفو ويايه .. تعرفون شو سوو؟؟ هددووو كل ربيعاتي انه بيفصلونهم وانا قالولي خبري ابوج انج كنتي شيطانه اليوم:hist: واونه يوم شي محضارات الأخصائيه تسحبني عندها وتفرقني من ربعي

في الخاصه .. الدراسه كلها بالانجليزي .. له ايجابيات وسلبيات .. يعني الحلو انه ادشين جامعه بدون تعب .. بس الشي البايخ انه تبدون تنقعون في العربي من الخاطر احم احم :hist: يعني صدق .. من سرت مدرستنا كله انقع بالعربي ومن الخاطر صدق ماعرف ارمس عدل .. تخيلو انا كيف ارمس؟؟ مارمس كله عربي .. ارمس عربي ويا انجليزي .. مستحيل اقول جمله كامله كلها بالعربي:narr: كلهم يحرجون علي في البيت لاني انقعععععععععع بس شو اسوي .. المدرسه اثرت فييه:no0: سألو بنت ناس وعرب ولا الياه:hist:

الى يعيبني في المدرسه الحكوميه الدواام .. من 8 لين 2 ولا 2 ونص .. اما مدرستنا .. من 7:35 لين 3 >_<


ويوم تدرسون في خاصه .. ادشون الجامعه بدون تعب .. وتحسون انه الجامعه والمدرسه نفس الشي .. يعني مثلا .. يوم ارمس ربيعاتي في جامعة زايد .. يخبروني انه الجامعه بالضبط نفس المدرسه غير انه منهجها امريكي .. لانه نحن اولريدي المدرسه امعودتنا نسوي رييسرج وبروجكتس وجي
في مدرستنا .. يعني يوم نيي البيت .. مانقول "بسير ادرس" نفس بنات المدارس الحكوميه .. لانه هم معظم الوقت يدرسون ويراجعون ولا يحظرون درووس .. نحن نقول" بسير اسوي واجبي ولا بروجكت" .. نحن ابدا ابدا مانحظر عمارنا لدرس .. لانه مانعرف شو بيدرسونا لانه يدرسونا من كتب مختلفه .. يعني نحن ماعنا كتب خاصه فينا الا في العربي والدين ..نحن بس يعطونا واجباااات وواجباات بشكل فضييييييييع .. والمشكله .. مانروم نهمل في هالواجبات لانه يطلعون 20% من العلامه النهائيه .. كله ولا بروجكت الآي تي .. 60% من العلامه O_o عذاااب

واخس شي عندنا العربي والدين . يعني صدق لعب في لعب في معظم الصفوف .. نحن الدين عنا كان اوكي لانه الأبله اوكي .. بس العربي .. ياربي كيف لعــــــــــب .. اول ربع ساعه البنات يتضاربون ويا الأبله ويسون حشره .. بعدين .. يوم يقررورون يسكتون .. يقولولها يله بسرعه بسرعه .. وانخلص الدرس في 15 دقيقه عقب اخر 30 دقيقه لعب .. بكل صراحه .. الشي الى صدق ماكان يعيبني انه معظم البنات ماكانو يحترمون مدرسات العربي والدين .. لانه هاييل يصدقون اي شي .. لو تقولولهم والله انا بنت فلان وان جي سويتي بخبر عليج اهلي وبنسفرج بلادج يزييييييييغون .. لكن لو رمسو الابلوات الانجليزيات بهالشكل سيده بيودون الطالبه عند المديره وبيحطونها في detention
نقدر نقول لو الأبله عربيه البنات مايحترمونها .. مادري ليش .. اتوقع لانه ينقص عليهم بسرعه =s


وعن الحكوميه
الشي الى صدق مكرهني في المدارس الحكوميه هم البنات المستريلات:fa39: .. لو اكون ام مستحيل احط بنتي في مدرسه فيها هالاشكال:no0: NO WAYYYYYYY .. انا يوم شفت وحده في القريه العالميه صدق لاعت جبدي وزغت .. صدق البنت الى تدرس ويهالأشكال تكون شجاعه:fa38: .. هالشي الى صدق صدق صدق مخلي المدارس الحكوميه مب شي >_<

[الشوق]

شمعة امل .........
في البدايه حبيت اشكرج على هالحظور الرائع ........وجودج وااااااااااايد اسعدني .. تدرين,,,
.
.
ذكرتي في كلامج :-
تخيلون شو يعلمونا وماتتخيلون كم بروجكت وواجب يكون عندنا في الإسبوع!!!
وهالشي اشوووفه وايد حلو لانهم يعودون الطالب على عملية البحث ... خاصة في عمل البروجكتات .. وهالشي بيكون لصالح الطالب مهما كانت صعوبته .. راح يتعود على هالصعوبه .. فيو بيخوض المرحله العليا راح يكون بالنسبه له وااايد سهل .
.
.
.

وبعد قلتي ...مارمس كله عربي .. ارمس عربي ويا انجليزي .. مستحيل اقول جمله كامله كلها بالعربي!!!
ترى هاالمشكله ان لو الطالب راح مدرسه خاصه مايتعلم شي من المواد العربيه .. واتكون اللغه العربيه بالنسبه له شي فرعي مب اساسي .. رغم انها لغة الام ولغة الضاد ولغة القران الكريم ..
وهالشي اللي حاولت اوضحه يوم سمعت الحوار ان الاطفال بدوا يكتبون الارقام باللغه الانجليزيه وهم بالاساس مب حافظين الارقام اللي باللغه العربيه (( الله يستر من الياي ))
نصيحه شمووووعه ... حاولي .. انج تقرين قصص عربيه ,،، روايات عربيه .. اي شي يفيدج .. وكثري من القراءه راح تنفعج .. مستقبلا يالغلا ..
.
.
(( ذكرتي نقطه مهمه يمكن غابت عن الكثر من الاعضاء وما ذكروها الا وهي ظاهرة البنات المستريلات .. الله يعافينا منهم ويهديهم يارب .. هذيل اتحصلينهم اب شكل كبير في الجامعات)) ...
.
.
اشكرج يالغاليه على النقاط اللي ذكرتيها .. والمقارنه الجميله اللي اثريتيها في موضوعنا ... وراح يعطي الاعضاء فكره عامه عن الفروقات بين الخاص والحكومي ..
..
وخلونا انشووف وانتابع يمكن حد يكون له وجهة نظر مختلفه غير اللي ذكرتيها ..
والسموحه
الشوق
:inlove: :inlove:

[شمعة أمل]

همم عن سالفة عربي
تراني اقرا عربي .. معظم كتبي بالعربي لاني *مليت* من الانجليزي:k_harhar1:

بس عن الارقام .. صح صح صح ذكرتيني في نقطه نسيتها

بخبركم شي يستوي عنا تقريبا كل يوم في صف العربي
المس: بناااات افتحوو صفحه مئه وثمانية عشر طيـــب؟؟
طالبه 1: شووو whaat شو قالت
طالبه 2: فتحي صفحة ميه وثمنطعش
شمعه : it means 118 DUH:k_harhar1:
طالبه : اهاا .. انزين كيف شكله:boxed:
طالبه 3: what r u stupid تراه .. واحد .. واحد .. ثمانيه


والله العظيم عنا بناااات ومب اي بناات يعني وحده الى لاحظة هالشي عليها اكثر شي بدويه:boxed: اقولها كيف ماتعرفين الارقام صدق اسخف شي .. تقولي ماعرف .. حتى لو اراويكم كيف يكتبون عربي بتضحكووووووووون ..

والغلط العود الى يستوي في حصص العربي انه المس تخلينا نرمس بالانجليزي .. حتى ساعات نرمسها بالانجليزي .. مره خخخخخخخ .. مس مال عربي قبل سنتين شرحتلنا درس عربي بس نص الدرس يلست ترمس بالانجليزييي وكل شوي تقولنا do you understand ههههه تحفه!!!

بس تعالو الصف الى فيه ابله انجليزيه .. لو حتى ارمس ربيعتي بالعربي تعصب .. ولو رمست بالعربي اكثر عن مره عادي تشتكي علي ويودوني عند المديره:boxed:



وتذكرت شي ثاني
كم مره في السنه .. يعطونا *تعبير* في العربي .. بالنسبالي انا سهــــــــــــل .. تدرون اني انا العام في امتحان اخر السنه سويت امتحان التعبير وانا مدوخه وردوني البيت سيده عقب الامتحان ويبت اعلى علامه في السنه يعني كنا في 11 .. ف اعلى علامه في 11 وهذا وانا مدوخه:boxed: .. مع انه انتو ملاحظين انه العربي الفصحى عندي مب شي

معظم بنات صفنا يوم يكتبون تعبير بالعربي يرمسون باللغه العاميه هههههههههههه:fa39: :fa52:



همممممممممممممممممممممممم م

بس هاللي اعرفه


اوه هييه

يوم يي للكمبيوتر

نحن بس 3 بنات في كل 12 نروم نطبع بالعربي عالكمبيوتر:a049: .. العام .. كان بس انا:k_harhar1: .. ماشاءالله .. سنه ورا سنه نزيد:k_harhar1:

[قصايد غلا]

ههههههههههههههههه الله لا يبلينا بعيال من قوم طاخ طيخ ، عافانا الله والله فضيـــــــحه
لو شفت حد جذه على طول أقول حق أميــه : "هاييلا عيـــم :hysterical: ؟" أدري إنه لا فرق بين عربي وأعجمي إلا بالتقوى لكن أنا أطري التنقيّـع

امممممم أحيد ربيعة عموه كانت دوم تي بيت عموه وعيالها اييون وياها "وهي من الشيوخ" لكن ولدها الصغير عافانا الله ما يعرف كلمة بالعربي ===> شي محرج بالنسبة لي :3:
اونه شيـــخ بعد ، يوم بيكبر أعتقد يباله مترجم حق العربي:fa46:

[الشوق]

شمعة أمل ..
اشكرج يالغلا
قلنا ان الانجليزي مطلوب يالغاليه .. خاصة في مجال العمل في المستقبل
لكن المشكله اذا هاللغه اثرت مستقبلا على عيالنا في التعامل مع الناس ..
مش مجال العمل وبس
.
.
يعني العربي والانجليزي مكملين لبعض
مااعتقد اذا دخلنا عيالنا مدرسه خاصه اندخلها في مجال كله مختص بالانجليزي
وتاريكن لغة الضاد وتاركين لغتنا الاسلاميه في عالم اخر ...
.
.
تسلمين عزيزتي ع التواجد الاكثر من رائع
تبين الصراحه اشكرج ع النقاش الجميل والحظور المتألق
دمتي يالغاليه
استفدت من نقاطج
اختج/ الشوق