إحتشام مغري [الأرشيف] - -:: واحات بن دبي ::-

ولد الشحوح

20-08-06 ||, 03:23 AM

السلام عليكم ورحمة الله وبركاته
هالموضوع ممكن يكون مكمل لموضوع المزوحي صحيح إني بحط على نوعية من البنات ولكن صدق هم قاهرين فيني ....
لاحظت ان الاحتشام بالنسبة للبنات عندنا لبس الشيلة والعبايا وبس ولو كانت
مخصرة
مزركشة بألف لون
مطلعة شوية من شعره " اذا الشعره بجمره تعال احسب"
حاطه صور وألوان
لا واذا سافروا ما يلبسونها
اظني قصدي وصلكم بس عندي عدة اسئلة ابا لها اجابات
البنت هاي تعرف شو هو الحجاب الشرعي ... إذا ما تعرف مسؤولية منو انه يوصل لها المعلومة
البنت هاي شو تبا من هالحركات ... تطلع حلوة ولا تبين انها خربانه " حركااااات وايد غريبة قامت تطلع "
البنت هاي وين أهلها وكيف رضوا بهالشي
البنت هاي ما تدري انها تلفت انظار الشباب بهالطريقة
وايد كلام فخاطري عن هاي النوعية ولكن أفضل إنه يكون خاص ....
صاروا يستغلون الإحتشام عسب يكشفون مفاتنهم
العباية والشيلة حق الحشمة مب حق التفصخ ....
مجرد رأي

الجنيه

20-08-06 ||, 03:31 AM

ــــــــــــــــــــــــــــــــــــــــــــــــــ ــــــــــــــ

سوري السيرفر ما يخصني انا

ولد الشحوح

20-08-06 ||, 03:35 AM

وحتى لو تساهلوا الاهل البنت الي تلبس عباه ما اعتقد انها ياهل عشان ما اتعرف الصح من الغلط وهالعلم الي تتعلمه وين يروح ؟؟؟

الجنية : الكثير منهم فيهم من السذاجة طفرة تقول انا ما سويت شي غلط بس ابا اكون حلوة ...؟!؟
يسرني مرورك واتمنى ان يكون في حل والله لأحااااااااااااااااااااول واشتغل فيه

الجنيه

20-08-06 ||, 03:37 AM

السلام عليكم ورحمة الله وبركاته ...

ونحن منو مغربلنا غير هالسالفه ؟؟ سبحان الله من وين اتي هالتصاميم للعبي انا ما اعرف ؟؟؟!!!!!!

قبل قالوا العباه الفرنسيه بذمتكم الفرنسيات وين يعرفن شي اسمه عباه ؟؟ انزين ونحن ع اي اساس نتبع موضه الفرنسيات هذا ان صح القول انه العباه فرنسيه والا بس عشان اسما فرنسا ملصق بها ترابعن عليها البنات

بالنسبه للحشمه ياخوي بخبرك شي ترا البنت يوم تلبس عباه تقصد بها الحشمه ما بتسوي بها هاي العلوم يعني نحن بعد انفصل عبي مطرزه ملونه بس كل عباه ولها المكان المناسب للبس يعني عباه مزركشه ومفصصه والوانها صاروخيه هاي تنفع حق عرس يعني تنلبس بين حريم مب وحده لابستنها وسايره المول وفي الاخير اتقول انا حاشمه عمري ؟؟ اي حشمه هاي وانتي تلفتين الانظار بالالوان الزاهيه ؟؟ اذا هاي الالوان بنظرج ماكانت فتنه عيل جان سوينا العبي ملونه عادي مش باللون الاسود ..

أنا برأي المسؤليه تقع ع الاهل والبنت في هالشي ..
يعني يوم تظهر البنت من البيت بهاي العباه وين الاخ والا الاب او الام ما اتشوف بنتها طالعه جذيه ؟؟؟ وحتى لو تساهلوا الاهل البنت الي تلبس عباه ما اعتقد انها ياهل عشان ما اتعرف الصح من الغلط وهالعلم الي تتعلمه وين يروح ؟؟؟

وبالنسبه للي يداومن ويلبسن هالعبي والشيل الي هي ديكور اكثر منهن حشمه الصراحه اعجبني قرار راح يتطبق من اول شهر تسعه ع الموظفات في الهجره والجوازات الي في المطار في قرار منعهن من لبس هالعبي واحتمال يفصلون لهن عبي اسلاميه وعليها شعار المطار مع شيله تحمل نفس الشعار وهالشي برايي عين الصواب والي مب عاينبها المسؤل يتريا استقالتها ع مكتبه ..

قرار حازم يستحق صاحبه الاشاده والاطراء .. اذا الوحده مب حاشمه نفسها بنحشمها غصبن عنها لانهن واجهة البلاد وعقبال ما يتطبق هالقرار ع بقيه الدوائر الحكوميه والخاصه

الصراحه اذا بنتكلم عن هالموضوع الرمسه وايده بس شو بنقول غير الله يهدينا اجمعين

نبراس الليل

20-08-06 ||, 06:15 AM

لاعتب عليهن

العتب على الرجولة

ولي عودة إن شاءالله

طير الحب

20-08-06 ||, 07:47 AM

نبراس الليل

20-08-06 ||, 07:59 AM

السلام عليكم ورحمه الله وبركاته...

موضوع مغري للرد عليه..انا بتكلم عن نفسي ووجه نظري فقط...بالنسبة للعباءة نعم أصبحنا ننحني منحنيات خطيرة كل يوم شيء من الفراشة للطاووس للوطواط...للحوت كلها انواع للعبايات التي لا تمت لنا كمسلمين...لكن نحن ما نخصص ان العباة هي اللبس الشرعي...اهم شيء ما يستر الجسد ولا يشف ولا يضيق يعني مثلا أفغانستان لبسها محتشم للمسلمات ويختلف عن العباءة عندنا.

وبالنسبة للبنات الي ما يلبسون عباءة في السفر من وجهة نظري ما فيها شيء إذا لبسها محتشم مب لازم أسود .

أحببت ان اقتبس ردك

أختي الكريمة صحيح إن اللبس المحتشم مب ملزم بالعباه

لكن صار لبس يختص فينا ولازم نتبعه

اما عن الملابس اللي تفضلتي إنها تحشم المرأة غير العباءة لنفرض صحيح لكن كيف هي الملابس الآن أليست بنطلون وقميص وتنورة هذه ملابس دخيلة علينا وتلفت الأنظار بل وتفتن لما بها من تصوير خيالي

ويا عجب لمن يقول إن لابنطلون اللي مب ضيق مافيه شي كيف مافيه شي والبنطلون بالاساس للرجل

يعني فيه تشبه بالرجال والبنطلون دخيل علينا من حيث لبس للمراة فكيف نتشبه بقوم كافر

ذكر الشيخ بن باز رحمه الله إن هناك رئيس وزراء فرنسا إجتمع في قومه والقى عليهم خطابا مفاده

إنه يطالب قومه بعدم لبس الجينز نعم يطلبهم بعدم لبسه لكن لما لأن لاجينز من صنح امريكا وهي لايريد

لقومه ان يتشبهوا بقوم امريكا

فكيف لنا نحن المسلمين ان نتشبه بكل الاقوام كاننا متخلفين في لبسنا ونسعى للتحضر والتعقل

إن مانراه في اسواقنا الكريمة لمنكر عظيم وبؤرة للفساد والفتن

نرى إمراة تلبس النقاب وكاشفة عينها الفاتنة ومايزيدها حلاوتا كحلها الذي رسم عينها كانها كوكب الارض ونرة إمراة أخرى تلبس ((الشيلة )) ويالرقتها وجمالها وهل الحجاب للزينة ام للستر كي نزينه
بالنقوش والالوان الزاهية والرائعة

أنا رجل وأخجل من النظر إليهن وكيف لايخجلن من النظر لأنفسهن وهن خارجات ويعلمن بأنهن سيفتن الرجال

ويقولن إن زينتي لنفسي وياعجبا لما تقول ألست فردا من هذا المجتمع المسلم ألا تريد له الصلاح

فكيف تخرجين بزينتك وتفتنين من تفتنين

وأردد ماقلت إن العتب على الرجال الآباء والأخوان والأزواج

أين هم عنها ؟؟؟!!!!!!!!!!!!!!!

الحمدلله على نعمة الغيرة

والسموحه على إخراج ما فالخاطر

طير الحب

20-08-06 ||, 12:33 PM

أخي الكريم نبراس الليل

بغض النظر عما ترتديه المرأة اليوم...ممكن أنها تستر نفسها سواء كانت لابسه جلابية او بنطلون او تنورة...لكن للأسف انقلبت الموازين وصارت روحات السوق كانك رايح عرس من هول ما ترى الوحدة تقعد ساعات ترسم في عينها وتنتقى أقل ما يستر الجسم والله المستعان.

سواء كان زوج او اخ أو أب ويرضى ان تخرج المراة بهذا الشكل في ديووث والأولى به أن يجبرها على ملازمة البيت إن أبت ألا تخرج إلا سافرة.

ولد الحكومة

20-08-06 ||, 12:35 PM

السلام عليكم ..

الاحتشام كلمة نسمعها دوووم على ان اساس ان يكون الشيء في نوع من الحشمة والستر ومب ضاهر بدنيا .. بس اضاهر ان الاحتشام عدنا في الامارات مش مطبق .. يعني اتشوووف ناس عراه عيني عينك .. والمشكله في المراكز التجارية :nono: ... انا الي قاهرني العبايات الي فيهن صور ورسومات باشكالها وانواعهااا ...؟ الله يرحم زمان أول ...

والسموحه عالمداخلة البسيطه مني بس فيي قهر على البنات الي يلبسن عبايات فيهن صور ...

قايد الريم

المزوحي

20-08-06 ||, 01:13 PM

مرات الوحده بدون ماتحس تفصل هالنوعية من العبي على أساس تكون أنيقة مش الغرض لفت انتباه الشباب .. والشاب الله يهداه كل شي يلفت انتباهه ... تقوولن مذنب هالي خاطف جدامه ..!

والشي الثاني إنه الآدميه هاااي على سبيل المثال تنتقد اللي يلبسون هالنوعيه من العبي ..
ماتوعى إلا هي مفصلها منها درزن ..

ولد الشحوح .. ماقدر أقولك والشباب بعد ........ إلا في موضوعي ..

صدى جوفي

20-08-06 ||, 03:18 PM

السلام عليكم ،،

خــذوا لفــة ع سوق العبي .. بتحصلون عباة عباة...!!! والله فساتين مب عبي .. تطريزات دانتيلات أشكال وألوان فكل مكان فالعباة :doh: ........ شو اللي شجع الدكاكين على هالعبي :kkk:

- والبنات صاروخ على آخر صيحـة للعبي :cop: يخافون تروح عليهم الموضة:boxed أو أي شي موجود يــاخذونهــا :fa36: هالموجــود

- وكل حد يعرف أن هالعبي ملفتــة بس >> تعرف بنوتــة .. توهــا صغيرة .. زين منهــا تحجبت ولبست عباة ومع الوقت - اذا الله راد- بتحتشم :negab: >> عذر أهلهــا:boxed:

- والا يتحججون بأن كل حــد يلبس هالعبي مو أحنــة بس............ حشر مع الناس عيد

ظــاهرة هالعبي منــتــشرة بشكل كبير.... :fa36:

ا ل غ ل ا

20-08-06 ||, 04:52 PM

تلسم أخوي على طرحك الموضوع ،،

والله أنا فيني قهر أكثر عنكم في هالموضوع ،، لأن هالبنات يفشلن البنات كلهن ،،،

أنتوا الله لا راواكم الكلية عندنا ،، لا حوووووووووول الله ،، والله يا أخواني أن نحن البنات ،، نطالع اللي عباتها ضيقة ،، أو غريبة ،، بنظرة دونية ,,

عباة الفراشه هههههههههههههههه خفاش هب فراشه ،، أنا أكره هالموديل ،، ياربي يلوع الجبد ،، ههههههه ،، هذا هين ،، تعال شوف اللي تسوي موديل ماعرف شو أسمه ،، شرات الستارة ،، العباة ميوده من كل صوب ومرفوعه ،، أونه حركة ،، قسم بالله ستارة متحركة ،، واللي تحط على الأكمام بوشات عوده ،، حشا شاله رصاص لو تيك بكف من هالكم ،، على الدنيا السلام ،، واللي تحط شي شرات الريالات مال بدل الرقص الشرقي ،، وتازم كل ما تتحرك تخرخش ،،،

أستغفر الله أستغفر الله ،،

وكله في صوب ،، ورفعه الشعر في صوب ،، كل وحدة تقول شاله برج على راسها ،، شكلها مثل الكائن الفضائي ،، عوذ بالله من هالهيئة ..
ما يدرون ان الرسول قال بما معناه "رؤوسهن كأسنمه البخت المائلة" أنهم ما يدخلون الجنة ولا يجدون ريحها !!!

وين البنات عن هالحديث !؟

عن العباة في السفر ،، أنا لو سافرت أي مكان في الدنيا ما أفضخها ،، مب لأن أهلي يعارضون لا لأن هذي هويتي وهوية بلادي وأنا أوصل هويتي وديني للباجين ،، سواء عيبهم أو لا ،، ليش الهنود يلبسون ساري وبنجابي في كل مكان ،، يعني الهنود يفتخرون بهويتهم أكثر عنا ؟!والأنجليز نفس الشي ،،، يوم أيون البلاد يلبسون كنادير ؟! لا والله بوصخهم وتفصيخهم أيوون ,,

الله يهدي الجميع ..

وتسلم أخوي مرة ثانية على الطرح المميز ..
والردود الحلوة من أخواني الأعضاء ..

والسموحة أختكم
ا ل غ ل ا

كـلـكـلـووش

20-08-06 ||, 06:15 PM

الســـلام عــليــكم

( يــــااااه من زمــان ما كتــبت في هالقسم )

المشــكلة الاســاسيه يا خــوك اظــن انهــا تقــليد البـــنات لكل جــديــد ..

و ابشــرك غير هالــعبي ظــهر نــوع يــديد من العبــي .. العــبي اللي الايــد تــكون فــيها شــفافه .. يـعني السالفه ما صارت اغــراء و بــس .. لأ .. الســالفة ســالفة تفــصخ و انت بــكرامه .. و المشــكله انــك ما رمــت تــميز الحــين المــواطــنه من المغــربــيه من العراقــيـــه كــلهم لـــون اســـود ..

و المشــكله يوم بترمــس البــنت بتقــولك الــكل يلــبس .. مب بس انا .. جنك تقــولها ارجــعي لعــصر التخــلف .. مب قــايلها اتحشمــي ..

و الحيــن طالعه عبــاه يــديــده .. اللي انا و نصــوور انسميهن الخفافيــش لوول .. هــذي اللي اتي وسييييييييعه .. و بس ترفع ايــدها لاقــي الايــد كــلها ظــهرت من الوســع !!بس هم بعــد احسن من المخــصر ..

همممم .. يمكن الــبعض يقــولون ان المســؤوليه مســؤولية الاهــل .. اوكي .. ممــكن كــلامــكم صــحيح .. لكــــن .. اذا الاهــل منــعو البــنت من تفــصيل هالعبــايــات ممــكن تلقــون البــنت تــظهر حرتها او تلفــت الانتبــاه بــطرق ثــانيــه .. وانا من رايي ان الالهل في البــدايه يغيرون طريقة تفــكير بنتهــم .. او يخلــونها تقتنــع ان هالعبــاه او هالشي بيضــرها .. لإن حــلاة الشــي يــطلع من البــنت نفســها .. مب غــصب عـــنها .. و اعتــقد ان هــذي افــضل وسـيله نخــلي فــيها البــنت تتــحشم و تتســتر من نســفها .. مب غصـــب عــنها ..

ما نقــول غيــر الله المســتـعــان من اليـــاي .. ما نــعرف الايـــام اليـــايه شو تخــبي .. والله يســتر علــى بــنات المســـلمين ..

ســـلام
كـلـكـلـووش

ولد الشحوح

21-08-06 ||, 12:40 AM

أحب أنوه على نقطة بسيطة بعد ان اشكركم على مروركم وإدلاء آرائكم
على سالفة السفر انا لاحظت التالي انهم يعقون العباية ويلبسون لبس خواتنا في الكويت اللي هو جنز وفوقه تنورة قصيرة بذمتكم هذا لبس حااااشم يقولون اونه محد يبصبص ليش مب رياييل مب اصلا ها حرررررام
مشكلة الكثير اعتقادهم ان الشيلة والعباية عادات وتقاليد مب امر ديني وما اعتقد انه ثجيل عليهم وبالعكس هو يصونهم ويحميهم
بس ودي اعرف منو المسؤول عن هاي الظاهرة ؟؟؟؟

الجنيه

21-08-06 ||, 01:31 AM

أعذروني ع العوده الجناويه مره ثانيه بس الموضوع يستحق انه الواحد يرجع له مره وهنتين ومليون ...
ولد الشحوح : صراحة ما في حد يستحق أن نلقي عليه اللوم كثر البنت نفسها اتعرف ليش ؟؟؟

لأنه البنت يوم تلبس العباه تكون وصلت لسن البلوغ وفي هالمرحله العمريه تطرأ عليها تغيرات كثيره غير الجسميه ومنها تنضج البنت وتبدا تدرك وتوعى للأمور حولها فالنسبه للعباه تنلبس للستر وهالشي الي المفروض تكون مربايه عليه وتعرفه زين حتى لو اهلها ما مانعوا هي ما فيها عقل ؟؟ ما اتعرف انه العبي من هالنوعيه اتسبب الفتنه ؟؟؟

مثل ما قال المزوحي البنت يوم اتفصل هالعباه في منهن ما يقصدن لفت الانتباه صح انا وياك بهالشي بس هي ما تدري عن الريال وفطرته ؟؟ هذا طبع في الريال ادناة الشي يلفت انتباهه في الجنس الاخر فليش اييب الرمسه حق عمري انا ما امانع انهن يفصلن هالعبي بس تراعي الاماكن الي تلبسها يعني في الاماكن العامه تلبس عباه محتشمه اسلاميه مسكره اخير والعبي الملونه والي فيها سوالف وحركات خليها لمناسبات ثانيه وبين الحريم ..

عن نفسي ما أأيد سالفه الي يسافرن ويفصخن العباه انا لو اموت ما افصخ عباتي ليش ؟؟ مب لانه هلي معلميني انه العباه ستر ولازم البسها لا لاني مقتنعه بأنها تحشمي وتسترني أكثر من أي لبس ثاني

ع العموم الموضوع مهما قلنا فيه بنكون مقصرين القناعه لازم تنبع من البنت نفسها واتحاتي آخرتها أكثر من دنياها

ولد الشحوح

21-08-06 ||, 01:38 AM

الجنية للأسف في بنات يكبر جسمهم بس العقل ...؟!؟
في هالحالة وين الأهل واذا الاهل غافلين
شو دور المجتمع
صراحة اللي لاحظته ان المجتمع هو اللي شجع على هاي الظاهرة .... بشكل غير مباشر

ولد الحكومة

21-08-06 ||, 08:37 AM

brgll: وعدنا من يديد :ice:

أذكر شفت وحده تمشي في مركز صحارى وعباتها من وراء (( كاتبة كلمة عيناوي brgll: )) وحليلهااا يمكن اسوي دعايا حق النادي ...

والحينه ظهرت موضه ايديده في العبي .. من وراء العباءة شيء حديدة ترفع العباة من فوق .. ماعرف يمكن حد فهمني ولا لا :puppyeyes: يعني شرات الستاير الي في البيوووت خخخ brgll:

والسموووحه

وعد

21-08-06 ||, 01:59 PM

السلام عليكم ورحمة الله وبركاته
لا واذا سافروا ما يلبسونها
اظني قصدي وصلكم بس عندي عدة اسئلة ابا لها اجابات

مجرد رأي

ليش لازم البنت تلبس عباية اذا سافرت؟؟؟؟؟؟؟؟؟
يعني ايش فيها البنت اذا سافرت ولبست لابس محترم ؟؟؟؟؟؟ والا بس العباية هي الاحترام :no0:
الاحترام مو بس ملابس الاحترام بعد بالتصرفات والاخلاق ,,,,لكن طبعا المهم انه الواحد تحتشم بثيابها عشان محد يتعرض لها وهالاحتشام ممكن يتمثل بعباية وممكن يتمثل بثياب عادية محترمه هذا راي

دمت بخير عزيزي

ولد الشحوح

21-08-06 ||, 07:21 PM

هلا اخت وعد
اختي انا ما اعارض ان البنت تستبدل العباية بلبس حاشم وساتر مثل الجلباب او غيره بس انا ليومج هذا ما جفت وحدة فبلاد بره عقت العباية ولبست شي يحشمها مثل العباية يا يلبسون جنز وفوقه تنورة عسب ما يبين تحديد الجسم ويبين يعني انا اجوف ان العباية هي الأحشم بالنسبة للحريم واذا بيعقونها وبيلبسون لبس يحشمهم مثلها ما عندي مانع ....
اخواني اتمنى طرح حلووووووووول لنحاول ونحاول في ايجاد الحل

راعي الزعـامه

21-08-06 ||, 10:05 PM

الأمر بسيط ..
المحــتشمه محتشمه .. ونكن لها كل الاحترام ،،
و الفاصخه للحياء نحتقرها و ننبذها
فهي مثل ما قال الشيخ محمد بن راشد في كتابه رؤيتي .. مثلها مثل السمكة الفاسده تنشر الفساد في الجو وفي الاسماك اللي حواليها ،،
فمــن يراها بالعبــاه اللي لابستنــها و الشكل اللي ظاهــره فيه ،،
يعتقــد ان هاي هيه الصح وهــي المفروض نتبعـــها ،، ويبدى التقليـــد وينتـــشر الفســاد ،،

شمعة أمل

21-08-06 ||, 10:55 PM

هممم برد على الموضوع بعدين

بس في خاطري سؤال

ليش قطعتو البنت يوم عقت عباتها يوم سافرت بس لبست لبس محتشم .. لكن سكتو عن الريال الى مايلبس كندورته؟؟؟

راعي الزعـامه

21-08-06 ||, 11:13 PM

اختي شمعة أمل ،،
الريال وعورته
والبنت وعورتها
البنت اذا عقت عباتها مفاتنها تظهر للعيان ومافي لبس يمكن يحشمها اكثر عن العباة
الريال عادي ،، واعتقد الكلام مايحتاي توضيع

شمعة أمل

21-08-06 ||, 11:24 PM

هذا من الناحيه الاسلاميه.. لكن من العادات والتقاليد؟؟

انا قلت اذا البنت كانت محتشمه ^_^ .. ف هالشي يكون اوكيه من ناحيه الدين .. بس لا من ناحية العادات والتقاليد .. بس الريال مايلبس كندورته .. يعني مخالف للعادات والتقاليد .. ليش محد قال شي؟

راعي الزعـامه

21-08-06 ||, 11:43 PM

هو صح الحين في الخارج الامر استوا صعب نوعا ما انك تلبس عباه والا كندورة
ونادرا مانشوف هالشي واذا شفناه يكون من الحريم الكبار بس ،، اما البنات ماظن اني شفت مرة ،،
ومرة شفت شباب لابسين كنادير ،، بس بعد اشوف الأمر شويه غريب انك تلبس كندورة في الخارج
بعض الشباب داخل البلاد مايلبسونها الكندوره كيف بالخارج ،،
نحن هل نخضع لجميع العادات أم فقط في مسأله العباة ؟؟
نحن اذا بنوصل رسالتنا وعاداتنا ما بنكون مقتصرين بس عالبس ،، بل عطريقة تعاملنا وياهم ،،
واذا بغينا انحافظ عدينا ،، فالبس اكيد جزء من هالشي ولازم نتقيد فيه ،،
ومثل مايقولك هالايام اذا بتتبع دينك لازم تتحمل عيون الناس وكلامهم .. والجزاء في الاخرة ،،

الهيثــم

22-08-06 ||, 12:50 AM

يعنــي بـ ذمتـكم .. لبس الجيــنز .. والحوااطــة يداام الغـرب .. ( ها من عاداتنا وتقــاليدنـا )
والريــال ما يعيبــه شي .. ( لأنه سااتر العورة )

بس البنيــة تظهـر مفــاتنـها بـ هالطريــقة . .
وانقــولها لا تلبسين الحجاب مرة وحــده .. ترى ما شي فرق بينج وبين الأجنبية ...

تنينه

22-08-06 ||, 02:32 AM

سؤاااال بـخاطري :kkk:

هو صح الحين في الخارج الامر استوا صعب نوعا ما انك تلبس عباه والا كندورة

ليييييش صــــعـــب ؟؟!! :kkk:

وعد

22-08-06 ||, 08:54 AM

سؤاااال بـخاطري :kkk:

ليييييش صــــعـــب ؟؟!! :kkk:

حبيبتي والله توني راده من مصر
تصدقين ووووووايد صعب انج تلبسين عباية او انه الريال يلبس كندوره لانه هذي وصمة انك خليجي يعني تعال شوفي كيف يضربونا بالاسعار
وبعدين لبس العباية والكندوره مو من الدين هالشئ من العادات والتقاليد
اذا الشخص لبس محترم سواء بنت او ولد احس هالشئ كفاية يعني مو لازم العباية او الكندوره وخاصة بره البلاد والا انتي شرايج غناتي ؟

الصراحه حلو النقاش :fa35:

نبراس الليل

22-08-06 ||, 09:41 AM

السلام عليكم ورحمة الله وبركاتة

العباءة والكندورة من الملابس المتعارف عليها من العادات والتقاليد لكن ......؟؟؟؟؟؟؟

هل نلبس مايلبسه الغرب ونشبه بهم

والأمر الآخر أكثر السفريات من أجل السياحة وهل هذه حجة كي نتخلى عن الحشمة المتعارفة

إذا كان المرء يتوجب علي الهجرة من البلاد الذي يرى فيها انه سيعصي ربه الجبار

ولما هذه السفرة الغير لازمة

وإذا تتكلمون إن هذه الملابس من العادات والتقاليد فلما لبس الشيلة وأينا لحجاب هل الشيلة هي نفسه الحجاب لا وربي لا قد طمسوا معنى الحجاب يا مسلمات فلكم ان تبحثوا ماهو الحجاب الشرعي

نسافر إلى الخارج ونلبس مايلبسونه مسايرتا لعاداتهم نوعا مــــــــــا وعندما يأتون إلى بلادنا يلبسون مايلبسون أتعلمون لما لأنهم يفخرون بما هم عليه من معتقدات ونحن نبحث عن أي حجة كي نرمي
بالمعتقدات والأمور الدينية على عرض الحائط إن الدين يسر صحيح لكن لانجعله لعبتا نحسب بها نخدع
ربنا الكريم فنحن نخدع أنفسنا وويلنا من عذابه الشديد

وويل الرجال من فتنة النساء

يقول ابن القيم رحمه الله إن شاءالله : إن أعداء الدين يحاربون المسلمين بسلاحين :
سلاح الشهوات لإفساد سلوكهم
سلاح الشبهات لإفساد عقولهم

صدقت ورحمك الله إن شاءالله

وعد

22-08-06 ||, 01:20 PM

السلام عليكم ورحمة الله وبركاتة
نسافر إلى الخارج ونلبس مايلبسونه مسايرتا لعاداتهم نوعا مــــــــــا وعندما يأتون إلى بلادنا يلبسون مايلبسون أتعلمون لما لأنهم يفخرون بما هم عليه من معتقدات ونحن نبحث عن أي حجة كي نرمي
بالمعتقدات والأمور الدينية على عرض الحائط إن الدين يسر صحيح لكن لانجعله لعبتا نحسب بها نخدع
ربنا الكريم فنحن نخدع أنفسنا وويلنا من عذابه الشديد

اخي الكريم انته بنفسك قلت معتقدات ,,,اذا هي شئ من صنع البشر وليس شئ الهي منزل من السماء
والشئ الثاني اين الخلل عند ارتداء شلية تخفي الشعر بالكامل مع ملابس محترمه لا تحدد الجسم
؟؟؟؟؟؟؟؟
اللباس المحترم او الحجاب الشرعي لا يشترط به انه يكون عباية او نوعية معين من القماش الي نرتديها علي راسنا,,,,,

الشيـــن

22-08-06 ||, 03:24 PM

:: متـاابعه للـردوود ::
تبون تعرفون شو بيستوي عقب كم رد ؟
بيستوي سوء تفاهم واختلاف آراء
وبينقع البكس
وبينغلق الموضوع !
لان قبل انفتح موضوع عن العبايه و شوو صااار هناااك فـ الموضوع:cop:
وآخر شي كل واحد يبي يقنع الثاني ، انزين خلاص ها رايك وها رايها
طبوا السالفه ! :boxed: ، ليما انغلق الموضوع:ice:
.
.
مب جنه الموضوع انحرف شوي وصار يخص لبس العبايه برع البلاد بس؟
.
.
* ادري ان ردي بينمسح بس مارمت اخليها فـ خاطري:ice: *
سووا أعماركم ماقريتوا شي ،

شمعة أمل

22-08-06 ||, 05:19 PM

الشين
لو يغلقون الموضوع حد ثاني بيفتح غيره

سالفة العباه والسفر وكل هذا لازم نتناقش فيها .. لانه كلحد له راي في هالشي .. بس شو الراي الصح؟؟ .. محد يعرف

اذا جي انتم .. صح ما بنوصل لحل .. لانه مستحيل هالشي .. بس على قل بنعرف راي البعض في هالشي

يعني انا ليش طرحت السؤال عن سالفة انه الريال مايلبس كندورته؟؟ لانه اجوف قطعونا نحن البنات يوم مانلبس عبينا برع .. ومثل ما قالت وعد .. اللبس المحتشم مب شرط يكون عباه .. يعني العباه عباره عن تقاليدنا .. بس بعد الكندوره من تقاليدنا .. لكن الريال مايلبسها؟؟ فليش حطو عالبنات والرييايل لا؟ .. عاشق القلم قال انه شكله غريب .. وصحيح هالشي .. بس بعد شكل البنت ملفت للأنظار وغريب يوم تكون لابسه عباه في دوله اجنبيه *الا لندن* ومرات تتعرض للشتم من اهل البلاد .. ف يوم ماتلبس العباه احسن لها

خطاب قال انه البنت اتظهر مفاتنها بهالطريقه .. بس انا ماوافقه في هالشي .. يعني الاجانب لابسين شورتات ولا تنورات قصيره وكت .. بس نحن لبس محتشم بدون عباه.. بس نحن الى انظهر مفاتننا وهم لا؟؟ ونحن الى قطعونا تقطيع ويطالعونا من فوق لتحت وهم لا؟؟ مع انه نحن ساترين عمارنا! ..

السالفه كلها ولا هي انه الشاب العربي او الخليجي ينجذب للبنت الى يجوفها مثله .. يطالعها .. الخ .. الغلط انا اجوفه ايي من الشباب .. لانهم مايحبون يطالعون الا بنات بلادهم .. نفس سالفة المغازل .. ليش يغازل البنات الى لابسين عبي وشيل في المولات بس الاجنبيات لا؟؟؟؟؟

في الأخير
كلنا من دوله وحده .. استرو على بعض ولو شويه .. البنت ماسوت شي غلط يوم لبست لبس محتشم بدون عباه .. والريال ماسوى شي غلط يوم لبس بنطلون وقميص بدون كندوره .. اذا تخاف على بنت بلادك لاتسوي هالحشره الا مالها داعي .. لك الحق تحتشر يوم البنت تتفصخ وتعق شيلتها وتركض ورا الشباب .. بس مالك حق يوم البنت ماسوت شي غلط واحترمت نفسها ^_^

والسموحه

الشيـــن

22-08-06 ||, 05:34 PM

شمعة أمل
اللي كنت أقصده

مثلا الحين وحده بتكتب رايهـا وبييها واحد معارضنهــا و كل واحد يشوف ان هو الصح
اوكي ماقلنا شي .. بس محد يسكت ومحد بيسكت ليما واحد من الطرفين يقول حق الثاني
انت الصح وانا الغلط وهاي نااادر ماتستوي ..

يتمـّوون كلمه من اهنه وكلمه من هناااك .. واللي معاارض ع ساس ان هالشي عيب مثلا
بيجـووف الطرف الثاني مسوي شي عيب وبيحط عليه وبيعق عليه كلمه
والثاني بيرد ع الأول وجـييي ..

يعني مافي شي اسمه خلاااص هي جي تفكيرها وانا العكس ..

هممم بمعنى يمكن يكون أوضح ..
مثلا انتي ييتي وابديتي رايج .. بيي انا بقولج رايي وبيكون عكس رايج
وبنتناقـش وجـيي .. خلاااص بتعدي السالفه عـ خير ..
بس يوم برمسج ع ساس انج غلط ومسويه شي عيييييب ومجرمه وياويلج من أمج
ومابوصلج مقصـدي وبنصحج بأسلوب حلـو ..
اهني اكيد مابيعيبج ردي .. وحطبه من عندج وحطبه من عندي وبنولع النااار ..

انا مارمس عن هالموضوع بس ، ارمس بشـكل عااام (=

مادري كيف أشرح لج لاني مقفله ومب راقده عدل

ان شالله تكونين فهمتي علي ..

ادري اني طلعت برع الموضوع شوي

السمـوحه من اليميع ومن راعي الموضوع

.
.
.

تنينه

22-08-06 ||, 06:15 PM

حبيبتي والله توني راده من مصر
تصدقين ووووووايد صعب انج تلبسين عباية او انه الريال يلبس كندوره لانه هذي وصمة انك خليجي يعني تعال شوفي كيف يضربونا بالاسعار
وبعدين لبس العباية والكندوره مو من الدين هالشئ من العادات والتقاليد
اذا الشخص لبس محترم سواء بنت او ولد احس هالشئ كفاية يعني مو لازم العباية او الكندوره وخاصة بره البلاد والا انتي شرايج غناتي ؟

الصراحه حلو النقاش

هلاا الغـاليه وعـد :fa35:

يـعني الجـواب على سؤال ,, أقـدر ألخـصه في نقـطتين ::

1- ما نلبس عباه بـرع >> سـبة الأسعار و وصـمه أو بمعنى هـويتنا الخليجيه بتنعرف ,,

2- مـب من تعاليـم الديـن مـن العادات والتقالـيد ,,

انزيين يـا وعـّـود الحلوه :kcl:

بـسألـج أنـا بعد سؤاليـن ,,

1- وصـمـه أنـك خـليجي ,, تعتبرين انتي هالـشي أللي هـو كـونج من الخليج شـي مـخجل ولا غـير مشرف لـج برع البلاد ,, فـعسب جـي أتحاولـين أخـفائه ؟!

2- مـب من تعاليم دينا لبـس العبـاه والشيـله ,, بـس من تعاليم دييـننا طبعاً السـتر ,, قولـي شو بـيكون للبنت لـبس يسترها أكـثر عـن العبـاه أو الجلبـاب ؟! ,, حـتى لو لبست بـنطلون ولا تنوره وسـيعه تراه بيلفت في الآخـر وبيظهر معالم البـنت صـدقيني ,, القميص بـصوب والتنوره بـصوب حتى لو وسـيعه ما أجوفها سااتره شرات العـباه أللي ما أتبين ولا تـحدد شي من جسمها,, غـير الألوان والشغل أللي ع البـدله كـل هذا تعتبريـن الإسلام سـمح بـه ولا هـذا اللي يقصد بـه الستر في ديننا الإسلامي ؟! ,,

تعالي ييبي بنت لابسـه عباه وشيله وبنت لابسه بـدله سواء تنوره ولا بنطلون وشرات ما قلتي وسيعه ,, قولي لـي منو بيـكون أسـتر ؟! ,, لـيش ما أنحاول أنـكون أفـضل وأسـتر سواء كنا في بلادنا ولا بـرع ,,

أنـا ما أبى أقـنع حـد ولا أبى أغير راي نـاس ,, لأني أحـس الكلام مـا مـنه فاايده ,, وشرات ما قالت الشين كـل واحد ورأيه الشخصي ,, بس أنـا جاسني فضول من النـاس أللي تتخلى عـن حشمتها ولـبسها برع البلاد ,, وبغيت أعرف شو هـي الحجج والأسباب أللي خـلتهم جي يسوون ,,

والسمووحه :kcl:

الهيثــم

22-08-06 ||, 11:59 PM

نبراس الليل

23-08-06 ||, 12:04 AM

شمعة أمل ..

لاأعلم لما قلتي عن النقاش إنه فاضح لبنات دولتنا ياأختي الكريمة

لسنا هنا نأتي بالأسماء ونذكر فلانة وفلانة نحن البعض منا أجمع على إنت العباءة التي تكون عليهات نقوش ورسومات غير لائقة للمرأة المسلمة

وسؤال بسيط هل العيب خارج الدولة فقط

؟؟

منبع السؤال المرأة من غير العباءة في الدولة عيب وهي لاتستحي على وجهها أما خارج الدولة فلا بأس فهي محتشمة بملابس أخرى

نبراس الليل

23-08-06 ||, 12:06 AM

الأخت وعد

دعك من الاقتباس وترك بعض الحروف وإخلاطها

أنا قلت المعتقدات والأمور الدينية

لما إخترتي كلمة المعتقدات وتجاهلتي مااتت بعدها من كلمات مكملة لها

المعتقدات الدينية والأمور الدينية هكذا ستتوضع الأمور ربما لديك

تنينه

23-08-06 ||, 12:54 AM

هـيـه صـح ,, أنـا استـغرب بـعد مـن البنت اللي دووم متـعوده تلبس الـعبـاه يـوم تـظهر من البيت ويدام الغريب أتكون لابسه عبااه ,, حـتـى أكـثر شي أتـكون عباتـها مـسكره ولا محترمه بـمعني أنـها مب مرصصـه ,,

ويـوم أتـسافر تتخـلى عـن العـباه بكل سهوولـه ,, ويـن الحيااء أهـني :kkk: ولا يمكن هي لابسه العبااه غـصب عسب الناس والعادات والرمـسه مب عسب تستر عمـرها مـن كل غريب وترضي ربها ,, شـي من سنيين متعوده عليه وتلبسينه دووم وما تقدرين تظهرين من البيت بدونه ,,

فـجـأه تتخلين عـنـه لييش ؟! ,, لااا أنـا ما أبى ألفت الأنتباه بـرع والأجانب يجوفوني بنظرات:boxed: ,, أنتي راايحه بـرع تستانسين واتغيرين جـو ,, مـا عليج من رمسة الأجانب والكـفار ,, يعني اذا مـا لبستي العباه ما بتسانسين ومـا بتكون إجازتج حـلوه ؟!

يعني بتتخلين عـن سـترج عـسب زرقـة عـيون الحـمر !! ,,

واذا كـان شي لـبس سـاتر لـهدرجه أكـثر عـن العبااه !:puppyeyes: ليش نلبس العبااه ,, بس لأنها عادات وتقاليـد ,, ترى شي وايد عادات وتقاليد تخليناا عـنها يت على العبـاه وأهـم شي الستر وأللي قال عـنه الديـن هذا أللي اتقولون عـنه صـح !؟ عـيل ليش العباه وليش أهالينا عودونـه عـليه وارتحـنا فـيه ؟!

يعني مـا تقدرين تتخلين عـنه عسب سواد عيون العرب !! ,,

أنـا ما أقول لـج أتخلي عـن عباتج بـس يوم أنـه هـان عليج ما تلبسينه شـهر ولا شهرين وتظهرين بلبسج العادي يدام الرياييل والغرب ,, فـ أجوف أنـه بيكون عـادي عـندج بـعد لو ما تلبسينه مـره وحـده في البلاد ,, عـقب الحـمر اللي اهـنه ما بيجوفونج بـعد بنظرات ويمكن يستانسون عـليج ^^",,

والسمووحه :kcl:

الجنيه

23-08-06 ||, 02:41 AM

أحسبكم دخلتوا في معمعات وحوصه ولوصه ..
باختصار مهما كان لبس البنت سارت وفضفاض تكون العباه أستر بوااااااااااااااااااااااا ايد

بالنسبه للي تفصخ العباه يوم اتسافر هاي حريه شخصيه ومحد له الحق بأنه ينتقدها بس من باب الذوق والادب أنها تلتزم بلبسها الساتر وما تتحج بحجج واهيه ,,

الله المستعان وما يحتاي حد يزعل من حد او يجرح حد برمسه النقاش حلو بس باسلوب لبق

شمعة أمل

24-08-06 ||, 12:45 AM

بابا انتوا وين سرتوااااااااا !!

أنا قصدي الجينز .. .. الجييينز الجييينز .. فهمتوا قصدي
واعتقد مب حلـوة يوم انشـوف بنت بـلادنا بهاللبس . ( وين دخلتينا فـ سالفة المغازل ) لبس الزلماات
ما نبا نطييح فيهم بعد .. عن يطلـع لنا زلمة الحين ويتفلسف .. :terms:

ولو سمحتي اختي .. انا أبا اعـرف شو هو اللبــس المحتـشم عسب اتخيلــه ..
واشووف هل هو بـ نفس الطريـقة الي انا متصورنها أو لا .. وإذا بنفس الطريـقة أقــول إنه حلو وما فيه أي مشكلة
... :yes:

أتريـه ردج اختــي .. ولا اتقولين لي انته قولي شو فـ بالك .. ترى ما اعرف اوصفه brgll:

شو الفرق بين الجينز والبنطلون غير القماش؟ كله واحد .. ليش الجينز اخس؟:fa36:

اللبس المحتشم .. او بالأحرى الى انا ألبسه يوم أسافر *وكل شي يكون وسيع يعني مب مرصص*

1- قميص كم طويل و تنوره
2-قميص كم طويل .. بنطلون .. كندوره قصيره فوقه
3- قميص كم طويل .. بنطلون .. كووت
3- بنطلون .. قميص طويل او مثل ما الكل يقول *بنجابي*

وطبعا جوتي رياضه < مايخصه ادريbrgll:

نبراس الليل
لو البنت ماتلبس العباه هني كلحد بيطالعها وبيحتقرها .. حتى لو لابسه لبس شرات الكويتيات وكل شي وسيع .. لكن يوم تسافر العكس يستوي .. كلحد يطالعها يوم تلبس العباه ..
العباه مفروض ماتلفت الأنظار ... عشان جي مثل ماقلت العبي الى عليهم نقوشات غير لائقه .. لانه هالعبي تلفلت الأنظار ..
لو الحرمه ماتلبس العباه بس ساتره عمرها ومحد يجوفها ولا تلفت الأنظار أحسن من لو تلبس العباه وكلحد يجوفها وسالفه تستوي:fa35:
وايد مواقف ربيعاتي تعرضولها لانهم لبسو عبي .. خصوصا هالسنه .. وحده ربيعتي قررت تلبس عباه هالسنه يوم هي في لندن .. يتلها وحده اجنبيه عقب سالفة المتفجرات .. وقالتلها انتي شو تسوين في بلادنا .. يايبه قنبله عشان اتفجرينا؟! < مع اني هذي لندن الى متروسه عرب .. عيل ما بالك في الدول الثانيه الى مافيها وايد عرب .. مابالك في امريكا؟؟
انا مسافره امريكا .. تدري انه كل عايله عليها Al ولا BIN مايركبونهم الطياره سيده؟ يسوولكم اكسترااا فحص؟؟ مع انه الفحص العادي لازم تعقون نعولكم وبهدله ويخشون النعال في مكينه خاصه اتجييك اذا فيها شيي .. واذا لابسين عباه عاد هاي سالفه ثانيه! :doh:
انا وايد وايد وايد أسافر .. وجايفه ردت فعل الناس ف دول مختلفه وماقدر اقول غير ..

في الأخير
انا مالبس عباه يوم أسافر .. ومرتاحه .. وأبويه راضي عني.. وهذا أهم شي ..

والسموحه

طرفشانه

24-08-06 ||, 02:20 AM

السلام عليكم

بصراحه موضوع يستاهل النقاش

فعلا صارت العباه بس مظهر مب للحشمه
لدرجه ان في بنات صغار يبين عليهن يعني مب مال العبي
لابسات العبي ويحاوطن في السناتر ولا اللي يقهر انهن يقبظن العباه من جدام ويرصنها
يعني التضاريس كلها تبين
وبصراحه احيد بنت خالتيه اول ما لبست العباه جيه كانت تسوي اسمينه قرصتها لين ما شبعت
والحمد الله في بدايه الفتره اللي كانت تلبس فيها العباه كانت وياي في البيت لانه اهلنا مسافرين(الكبار)
بس اسميها كل ما اقرصها تقولي انا ما سويت شي اصلا كل بنات المدرسه اللي يلبسون العبي جيه يسون نهايه الدوام مب بس انا ولا تراويني بنات يكونون في السنتر وجيه يمشن فتشوف عمرها صح بس الحمد الله اصطلبت
واحيد من ايام سايره برجمان ويا اخوي ومرته اسميني انحرجت لين ما قلت بس
طبعا السبب شو البنات وعبيهن لدرجه انه خطر علي ادخل محل واخذ عباه ساده جاهزه مع انه عباتي ما فيها فير لاينات على الكم والوانهن غامجه بس لانه اخوي قام يعلق على البنات وبصراحه صدقه يعني شفت بنات يعني العوده فيهن ما تتعدى ال23 بس عبيهن مب عبي مولات لا علب اعراس العباه شغلها عالظهر واليديدن وجدام يعني العباه بكبرها مشغوله ولا ياريته شغل بلون اسود لا بالوان (احمر ازرق فوشي) يعني الوانها تلفت بس شو نقدر نقول غير الله يهديهن
وبعدين على طاري لبس العباه في السفر انا اشوفه مب ضروري دامني لابسه لبس ساتر ومب فاضح
يعني بنطلون وفوقه قميص لين الركب وسيع وفضفاض ما فيها شي بس اني البس لبس مرصص لا ما يصير
وبعدين مهما لبس الريال في السفر مب شرات البنت يعني البنت اي كلمه تنقال تاثر على سمعتها
مثل ما يقولون الريال ما يعيبه شي مب شرات البنت

ولد الشحوح

24-08-06 ||, 03:00 AM

شمعة أمل انا مش ضد ان البنت تلبس برع البلاد لبس حاشم بدل العباية بس اللي اجوفه انهم ما يلبسون لبس حاشم يمكن في حد ما جفته الله اعلم ... بس ان الريال يلبس كندورة فالكندورة مب امر ديني لا عادات وتقاليد ممكن تتغير بس الاهم كل جنس يغطي عورته
وعد : "
تصدقين ووووووايد صعب انج تلبسين عباية او انه الريال يلبس كندوره لانه هذي وصمة انك خليجي يعني تعال شوفي كيف يضربونا بالاسعار"
انزين لو لبستي لبس محتشم مثل العباية اوكيك انا موافق بس لو لبستي لبس بنات هاليومين وقلتي اونه محتشم اعتقد ان حجتج هاي جدام ربج مب قوية
الشين صدقتي اختي بيتسكر الموضوع ومحد استفاد نبا حلول مب ضرابات
وبقولكم شي سمعته من ابوي كانو قبل يلبسون لبس جي مثل الجلباب او العباية بس ملونه وفي تاجر ياب عبي سود وما مشت عنده التجارة فراح لشاعر وقاله انه يتغزل فبنت لابسة العباية السوده ومن انتشرت القصيدة ما ظلت عباية سوده ما اشتروها وجي لين صارت من العادات والتقاليد بس انا اجوف جي احسن يعني اي لون ثاني اعتقد بيلفت الانظاااااااااار وايد ولو ظلوا على الملونه جان كل وحده تفننت اذا العباية سوده وما سلمنا من الحركاااااااات شقايل لو ملونة
ولي عودة ....

ولد الشحوح

24-08-06 ||, 03:26 AM

2- مـب من تعاليم دينا لبـس العبـاه والشيـله ,, بـس من تعاليم دييـننا طبعاً السـتر ,, قولـي شو بـيكون للبنت لـبس يسترها أكـثر عـن العبـاه أو الجلبـاب ؟! ,, حـتى لو لبست بـنطلون ولا تنوره وسـيعه تراه بيلفت في الآخـر وبيظهر معالم البـنت صـدقيني ,, القميص بـصوب والتنوره بـصوب حتى لو وسـيعه ما أجوفها سااتره شرات العـباه أللي ما أتبين ولا تـحدد شي من جسمها,, غـير الألوان والشغل أللي ع البـدله كـل هذا تعتبريـن الإسلام سـمح بـه ولا هـذا اللي يقصد بـه الستر في ديننا الإسلامي ؟!
عيبني رد تنبيه .....
وسؤال عطوني لبس احشم من العباية ...؟؟
طرفشانه : "وبعدين على طاري لبس العباه في السفر انا اشوفه مب ضروري دامني لابسه لبس ساتر ومب فاضح
يعني بنطلون وفوقه قميص لين الركب وسيع وفضفاض "
اول شي هاللبس مب أستر من العباية وثاني شي تدرين عورة المرأة شو كل شي ما عادا الويه والايد وانتي بالحالة هاي الريل من تحت الركبة بتكون ظاهرة ومحددة ....
شمعة أمل لبس الكويتيات لو كان واسع مب محتشم وثاني شي اذا انا باخذ على نظرات الناس الكفار شرايج ما نصلي عسب بعد ما نتعرض لمواقف سخيفة او انه حد يتعرض علينا وصراحة كل أنواع اللبسات اللي قلتي عليها حاشمه ما تحشم مثل العباية وعلى قولتج قميص لين الركب فوق البنطلون انزين ما بيغطي باقي الريل ليش باقي الريل مب عورة
يا جماعة الخير لو في لبس محتشم اكثر عن العباية والله كانوا بنات البلاد بيلبسونه لانه العادات والتقاليد صارت تنضرب بعرض الحائط ومحد ماخذ لها ....
شمعة أمل :"
الله يهدي الجميعانا مالبس عباه يوم أسافر .. ومرتاحه .. وأبويه راضي عني.. وهذا أهم شي "
ورضى ربج ما تبينه .... استغفر الله
والله يهدي الجميع...

طرفشانه

24-08-06 ||, 09:40 PM

اخوي ولد الشحوح في بناطلين ما تحدد الريل وهذه هي اللي اقصدها مب اللي تفصل ريل الوحده
وهو صح كلامك ما في شي يستر كثر العباه
بس انت تعرف يعني العباه ما تنفع اذا سرنا لحديقه ملاهي في البلاد الغربيه يعني كيف بنلعب
فما يصير احيانا اطلع بعباه ونهار ثاني ظاهره ببنطلون
شو بيقولون عنا الاجانت او العرب الموجودين

نبراس الليل

25-08-06 ||, 12:52 AM

عذرا فهناك أعذار أقبح من الذنب

ربما لأول مرة أقولها

وعن البنطلون فهو تشبه بالرجال ولعن الله المتشبهات بالرجال

و تشبه بالاجانب فمن تشبه بقومٍ فهو منهم

البنطلون في قاموسي عيب في عيب سواء كان واسع أم ضيق

ولد الشحوح

25-08-06 ||, 01:52 AM

طرفشانه إختي اذا سرتي القرية العاليمة تبين تلعبين عادي تلبسين نفس اللبس اللي تلبسينه برع البلاد لا تقول المجتمع ولا العادات والتقاليد ثرا الله سبحانه وتعالى هو اللي يحاسب وبيحاسبج انتي مب المجتمع ولا صارت الناس تعمل حساب للمجتمع أكثر عن ربها وصراحة بدون زعل فالأعذار اللي أجوفها أقبح من ذنب أنا كنت مسافر تركيا وخواتي الحمدلله ما عقوا العباية سرنا الشلالات واليبل والملاهي وعادي خلاص تعودوا اهم شي ربي راضي أنا ما امدح أهلي بس هالواقع ما يحتاي تنعق العباية والشيلة

راعي الزعـامه

25-08-06 ||, 01:55 AM

سبحان الله !!
صدق يوم القيامه جريب !!

ولد الشحوح

25-08-06 ||, 02:29 AM

والله من اللي نجوفه صدق يا اخوي والله يوم القيامة قريب

نبراس الليل

25-08-06 ||, 05:40 PM

اللعب في الملاهي

عذر جميل ان نتجرد من الحياء والحشمة

وهل أنتن ملزمات باللعب في هذه الملاهي التي جلبت لنا طرد الحياء

أين الحياء

لكل دين خلق وخلق الإسلام الحياء كما قال رسولنا الكريم محمد عليه الصلاة والسلام

والله إني لأستحي ان أرى إمرأة تتأرجح يمينا ويسارا بلعبة فكيف لها أن لاتستحي من نفسها

أين الحياء أين الحياء ويلنا من البلاء

يارجال أمة محمد أين رجولتكم وشهامتكم

أأصبحتم ديوثين كي تبيحوا لنسائكم أن تتأرجح واما أعين الأجانب وصرختها عالية يسمعها من لايجب ان يسمع حتى صوتها

أعذروني ياأخوتي فإني أثور غضبا لمثل هذه الأمور

أين الغيرة؟؟؟؟؟؟؟؟

هل وأدناها

ربما لأننا عدنا للجاهلية

الهيثــم

25-08-06 ||, 10:06 PM

حلــــو يا شمــعة امــل .. وصلــنا خير
وانا مب قصــدي عـ الجينــز بذااتــه .. قصدي البنطلــون بس طلع الجيــنز ويــاي
يعنــي قصدي البنطلــون الراص ... والضيــــج ..

وشكــرا عـ التوضيـح ..

فركوشه

27-08-06 ||, 06:01 PM

احم احم.. انتو بس تعالوا الكليه..

في وحده املصقه حديقة بيتهم فعباتها.. كلها وروووووووووووووود املونه..

والثانيه عليها شواارع ..تبا تسير بيتكم.. خذ الشارع اللي عـ يسارك..

والثالثه العبااه خلاااص بتنطر.. من كثر ما هي ضيجه..لا وياريت البنت ضعيفه.. درام ديزل..

وموضه يديده عباة الخفااش.. سنطير ..سنطير..

ولا الكشيش..

وحده حاطه برج ايفل عراسها.. عافانا الله شبااااااصه هالكبر..

والثانيه حاطه ذيل ديج..

وموضه البناطلين..

وحده لابستلك برمودة اخوها ويايه الكليه..

والثانيه.. من كثر ما البنطلون ضيج.. انا استحيت اطالع صوبها..

والمكيااااااااااااااااااا ج اوووووووف..عالمكياااج..

اتقووول مهرجااااااااااات مب بنات..

ايييييييييييه.. انتي يايه الكليه تدرسين وتزولين بيتكم .. كل هذاا لييييييييييييش..؟؟.

بعدني ابا اطلع كل اللي فخاطري..:narr:

ولد الشحوح

28-08-06 ||, 02:23 AM

والله قسم بالله يرتفع ضغط الواحد من يجوف بنت بلاده جي واللي يقهر اكثر ان اخوها وابوها او زوجها عادي تيك ايزي فركوشة تسلميلي إختي عالرد

لبن مثلج

29-08-06 ||, 11:36 AM

العتب على الاهالي (بالاخص الرياييل) لانهم سمحوا لبناتهم بهالاغراءات....

محب الحسين

29-08-06 ||, 02:48 PM

اللهم صل على محمد وال محمد الطيبين الطاهرين ..،

موضوع ذو شجون ..

وطالما نوقش وطرح في كثير من المنتديات ...

هناك التباس وفهم خاطئ عند الاخوات الكريمات بين الحجاب على اعتقادهم بأنه حجاب و بين الحرية.

فاتخاذهن لمثل هكذا موضات او اتباعهن لها يأتي تحت عنوان الحرية على حسب اعتقادهن!!:fa39:

ولي في ذلك موضوع قد تم طرحه سابقاً يحكي عن الحجاب والحرية وهو على هذا الرابط .... ونسأل الله لجميع بناتنا الحشمة والوقار...

http://oasis.bindubai.com/bin/showthread.php?t=4421&highlight=%23%C7%E1%CD%CC%C7%C8+%E6%C7%E1%CD%D1%ED %C9

http://oasis.bindubai.com/bin/showthread.php?t=4421&highlight=%23%C7%E1%CD%CC%C7%C8+%E6%C7%E1%CD%D1%ED %C9