المجتمع

[المزوحي]

منو الزين فينا ؟؟؟

سؤال يطرح نفسه .. لا بالله ... مجتمعنا

إذا يت تتكلم بشكل عام ... بتقول المصاروى بكاشين وكذابين وحراميه .. وإن هالكلام قلته لمصري
بيقولك لاااا حرام ( موش كولهم ) لأنك انته تعمم عليهم مثل ما الشرطة يعممون على راعي النيسان

وإن ييت تقول والله الهنود مايعرفون يسوقون ... بس أكيد في فئة زينة .. فالشين في التوووب ..
والحين موضوعي عن الشباب والبنات .. اللي دايما ننتقدهم في المجتمع ... إذا قلتوا البنات فيهن وعددتوا اللي يسونه ... فهم جزء من المجتمع .. فأكيد في فئة شباب مب شي .. لكن في الأخير نرد نقول الولد ماعيبه .. والله إذا ترك صلاته .. الله بيغفر له لأنه ولد وهي بنت ...

وايد شباب يقولون البنات اختربن والبنات فيهن ... بس بعد مانقدر نظلم .. لانه اللي أشوفه بعيني من فئة الشباب .. الله أكبر .. من مشيتهم ولبسهم وكلامهم ... وخريطهم ...
انصدمت يوم شفت شاب واقف عدالي في ستار بكس ويتكلم والله اتحرى اخته اللي تتكلم ...
ولااااااااا فوق هذا كله مستحي مني .. بغيت ازغده .. وعطاني درب وهو يبتسم ابتسامة الموناليزا
بس أنا ما أبالغ ...

يبغي يطول شعره بكيفه .. لكن كلهم مستوين نفس الاستايل .. اعنبوكم امعه ... إذا واحد سوى شي بتسوون وانتوا مغمضين ... تشوفهم كلهم بكاباتهم ... ونفس الاستايل في الشعر واللبس ..
اوكي اتبع الموضة لكن لو قلت لك تعال ركب لمبه في البيت ... بتصيح ..

البنات ... اصبحوا نفس الاستايل ... في كل شي ولازم اطقم مع ربيعتها ... هاي عندها والثانية ماتقدر
شلي شنطة تقليد ... صدقوني .. إذا انا اتكلم عن البنات والشباب مب يعني هذا إني أنا زين .. لا ..

بس الانتقاد مايكون من طرف واحد .. خلونا نشوف الخلل والسبب ..!
عيل من سنتين استوى موقف .. إنه فئة بنات كانوا يتصلون بالشباب ويكلمونهم إنه نباكم تتبرعون لصالح المكان الفلاني وهم يدفعون ... ظهر آخر شي عسب يفصلون شيل من ماي فير ليدي ..
طبعا على أيامه ... استغربت وانصدمت ... والموضوع من شخص موثوق به وعاجل واشتكى للجهات العليا .. البنات قالوا لا تخبرون أهالينا أرجوكم ...

على من نرد اللوم .. تراهم في النهاية يمثلون المجتمع ...

ومرات تشوف البنت اتدخن يوم تقول للأم .. تقول بكيفها بنتي ونحن أحرار .. عيل انته اسكت لاترمس ولاتدخل في شي مايخصك ...

والشاب .. يركب موتره روسيه وفلبينيه .. ومحد يتكلم هو ريال وثانيا هو مب متزوج عسب تقولون ليش مركب فلانه .. يعني ما بيكون شي اسمه خيانة زوجية دام إنه هو أعزب ..
والامراض اللي بينقلها عقب والحرام اللي يسويه .. هه في الهوى ..

وفوق هذا كله اول مايشتغل يبتدي يلعب ويشتري سيارات ويوم يبغي يتزوج يقول والله ذبحونا بالمهر باخذ وافدة أبرك .. اللي بتغصص عليك خلاف يوم بتيب هلها وعيال حارتها ..
الدنيا من استوت في مهور .. لكن كل واحد عايش بزمانه ..

والبنت .. اللي تلعب براتبها .. اووه كيفها هي تعبانه على الراتب ومحد له حق .. مايخالف ..
لكن ... يوم تتزوج ومن أبسط خلاف من بينهم .. تقوله ماتباني طلقني ... كانها تقول اشتري لي دبة ماي الطلاق سهل تنطقه ... لانه راتبها في إيديها والموتر عندها شو تبابه الخمام بعد ..
مب قبل الحرمة لو الريال يعطيها كف تسكت .. وتعيش وياه .. همممم

يعني البنت تقول الريال مب مثل قبل .. والشاب يقول البنت مب مثل قبل ...
يباها مثل أمه ويدته وتباه مثل أبوها ويدها ... هممممم

[الجنيه]

السلام عليكم ورحمة الله وبركاته ...

ماشاء الله عليك حاط لي موضوع اطلع حرتي فيه صح .. انت تدري أني من أكثر الي يحطون ع الشباب والبنات وطبعا انا ما اقول اني 100% بس الحمدلله أحسن من غيري بوايد

الله يسلمك ما يغايضني شي كثر رمسة الشباب يوم يقولون البنات اختربن ... :fa36: انزين منو سبب هالخراب غير الشباب ؟؟؟ انا ما بقول أنه 100 % من البنات المختربات ع قولتهم بسبة الشباب بس في فئه لا يستهان بها كانت ضحيه لشاب تلاعب بمشاعرها وبعدها بشرفها و شي يجر شي الى ان وصلت البنت للهاويه صح انها عاقله وفاهمه وعقلها براسها واتعرف خلاصها بس هذا ما يعني انه نلقي بالوم عليها مره وحده ..
يعني انا بنفسي شهدت تحول بنت عفيفه شريفه محترمه مربايه احسن تربيه لوحده اعوذ بالله سيرتها ع لسان كل شاب ,, هالبنت كانت مثال للبنت المحترمه الصالحه ان صح القول .. غلطت في يوم وتعرفت ع شاب ونشأت بينهم قصه حب حبته من كل قلبها رغم انها تدري انه هالشي غلط وياما حاولنا ننصحها بس باسم الحب تجاوزوا الحدود واقترفوا معاصي لها اول وما لها تالي .. وع وعود الزواج الكاذبه سوت له كل الي يباه لين ما اخذ غايته ورماها مثل ما يرمي الكلب العظمه الي مل منها .. شو الي صار ؟؟ هالبنت قررت تنتقم وللأسف الشديد بغباءها وتفكيرها الخاطىء انغمست في هالعالم لدرجه انها مستحيل تتركه ومن كان السبب ؟؟؟؟

وسالفة العرس عاد هاي مره خلها ع صوب يوم بنقول لهم عرسوا وكملوا نص دينكم كلن بيتحجج أونه المهور غاليه وتكاليف العرس تكسر الظهر بس ما يفكر بهالمصاريف يوم يفسفس فلوسه ع سفراته لبانكوك والا المغرب ما يستخسر هالكمن الف الي يشتري بهن موبايل توه نازل قيمته 3 او 4 الاف ما يقول بمد ريولي ع قد لحافي وباخذ سياره اقضي بها اشغالي اتوديني واتيبني لكن من ايي طاري العرس قال بدفع 10000 االاف وباخذ وافده او اجنبيه وايد ارخص

الله المستعان ...

المزوحي فتحت علينا باب ما ينسد

لي عودة قريبا ان شاء الله وبحط ع البنات عسب محد يقول اني انحيازيه

[ولد الشحوح]

معظم هالسلبيات يتحمل مسؤوليتها الجيل السابق ... ثرا الاخلاص مثل الفطرة تكون في الانسان بس قابلة للانحراف ... التربية .. جو البيت .. التلفزيون .. العصبية الزايدة ... الحنية الزايدة.. عدم المبالاة
كل اخطائهم بدت تظهر لها ردود فعل وتنمو وتنمو وجوف الحال الحين ...
لي عودة
مجرد رأي

[المزوحي]

الجنيه .. حطيتي على الشباب وإلا البنات .. تراهم ( المجتمع ) وبهالطريقة المجتمع دامر إذا 99% من الشباب و 99% من البنات بهالصورة...
عشان ماتي وحده من المنتدى باجر تحط لي موضوع وتكتب عن الشباب فيهم ولا واحد من المنتدى يقول البنات فيهم وينقهر منهم .. كل هم نفس الشي .. في الزين والشين من الطرفين ..

[المزوحي]

ولد الشحوح أشكرك على الراي .. وحياكم أي وقت بالموضوع ..

[الحساس]

على رمستكم باب انفتح ومايتسكر..

في المول اشوف واحد مرب لحيته ومقصر كندوتره ويبين عليه مطوع وياي يتسوق او يتمشى مع حرمته!! لين هني عادي
بس الغريب ان هالفئه شفت منها واايد يتمشون وزاخين يدين حريمهم!!! وين قاعدين بالشانزليزيه؟؟؟؟

والله هالموقف يخلينا بداع الفضول نسويلهم scan بكبرهم

مادري شو حكم هذا الشي ... بس اشوفه زاد اكثر في هالفئه من الناس بالذات رغم ان المفروض مانشوفه عليهم هم بالذات!!

[شرجاوي]

الحساس ... اعرف واحد وياي فالدوام .. نفس ما قلت .. كندوره قصيره .. و لحيه شو طولها .. و كله يتكلم عن الدين .. و آخر شي اكتشفت انه راعي بنات من الدرجه الاولى خخخخخخخخخخخخخخخ ..

[الهيثــم]

بـ النسبـة لـ موضوعك أخـوي المـزوحي .. ما بنخــلص إذا رمسنــا فيـه
ب إختـصـار شـديد ..

كثيير من الشبـاب هـ الأيـام ما همـه إلا يـرقم هـاي ويرمس هـاي ويواعــد هــاي ..
وفــوق هـا يوم تتمــشى فـ مــركز من المـراكـز .. يــا خي شو هـا الي قمــنا نشووفـه
والله شيــاء تـدمــع لهــا العيـــن .. ما دري هـ البنـات شو نسميـهم .. هل هـن مسلمـات
هـل هن بيكوونن أمــهات في المستــقبل .. هــل بيــظهرن اجيــال صــاحلة وذرية طيبة !!
هــل ! وهـل ! وهــل !

والله إني البــارحة كنـت فـ مــركز من المـراكـز .. وشـفت حـرمة متنقبـة وسـاترة عمـرها
وويــاهـا ثـلاث بنــات ... يــا خي والله اني استـغربت من الي شـفته ..أوكي لابسين الشيلـة والعبـاه
لـكن بـ طريــقة توحي لـ الشبـاب إنهـن بنــات راعيــات حـركات وسواالف .. الميـك أب فــل ..
والمشية غـير .. يعنـي مــا قدر أوصـف أكثـر .. بس اعتقـد وصلـت الفكـرة ..

يعني يــا خوي وصلــنا لـ مرحلـة .. البنــت صــارت رخيــصة .. وعـادي تنـصاد بـ سهووله ( إلا من رحـم )
وبقـولك سـالفة استوت لي في المعهـد .. وااحد من الشبـاب الله يهـديه .. رقم بنـية في المعهـد ..
واتصلـت به .. وعقب يا يخبــرني .. هيثــم اتــصدق انا أعـرف أبـوها .. وعمـها .. كانـوا فـ فريجنـا ..
يعني ل هاللدرجـة .. ( ما احط اللوم كله عـ البنات ) يعني شوف الشبـاب لين وين وصلـوا .. عادي عنـدهم .. وين حق الجيـرة .. ووين الشرف .. ! ماااا شي .. كلـن همـه شهـوته وارضـاء الغريزة الحيوانية ..

وغير سواالف الموااعـد .. والبنيـة إتــرخص عمـرها .. لـ أبعـد الحدوود
كيـف ترضيـن على عمرج إنـج تركبين ويــا واحـد غـريب .. وين احتـرامج لـ تربية أهلـج
ويــن دينـج .. ووين عـاداتنا وتقاليدنـا .. !! ووين ووين !! كيف بتكــونين يدام ريـلج عقـب وانتي كانت عندج علاقة مع شاب ثـاني
واهنـه انقـول كمــا تدين تدان .. أكيـد الريـال كــانت عنده هـ السوالف مع بنات النـاس لين ما حصـل حرمة عنـدها سـوابق مع شبــاب ..

امووت من القهر يوم اسمــع سوالف الشبـاب عن الموااعد .. يااااا نااس شو صااار بالدنيااا !!
بنييييية ترضى على عمرها انها تركب ويا وااحد غرييب وما تعرفه !!!

وهالشاب الحقير .. كا عنده اخواااات ما يخااف علييهن وعلى سمعتهن .. !!
ترى والله كما تدين تداان .. وهـ الشي بالذات ما يضيع .. وبيتم ديين فـ رقبتـك .. وبتسدده فـ حياتك
فـ أمك .. فـ أختك .. فـ زوجتـك .. فـ بنتك ..

والله لو شبــابنا يفــكرون بهـالطريـقة وبهـالقاعـدة جـان ما وصلـنا للي وصلـنا له الحين
وما انقـول غير الله يهــديــهم ويستـر عليــنا وعلى بنــاتنا ..

وهذي من عــلامات الســاعة .. اقتربت نهـاية العــالم ..
فـ ليـصح الغـافل من نومه ، وغربة الإنسان ليست في بعده عن أهله
إنما الغربة حين ما يجد نفسه يوم الحساب بلا حسنات ..

ويـزاك الله خــير أخوي المزوحي على موضووعك وعلى غيرتك الطيبـة
ولله يعطيـك الصحة والعافيـة ...

:yes:

[المزوحي]

الحساس مثل مذاكرت انا بعد شفت اللي شفته .... ماسكتنه كأنه بيطير من ذراعه ...
وتلقاهم في البيت ماشي احترام ...

[المزوحي]

شرجاوي ... أنا اللي عرفته إنه واحد مطول لحيته .. وفي دوامه البنات حول حواليه في مكتبه ضرب سوالف ... حممم مادري الغلط من البنات وإلا منه ...

[الحساس]

اقولكم شي بس لا تعفدون عليه ولا تعصبون ...

كل هذا بعد يهون رغم ضخامه الاثنة ... لكن الشي الي صدق لين الحين بس ابا استوعبه بس ابا استوعبه هو:

ان وحده متزوجه ويمكن عندها عيال وتغازل وترمس بالتلفون .. واذا ييت وسالتها عن السبب بتفولك والله ريلي مايوفي حقنا وبالتالي نحاول نشبع عمرنا برع البيت..

هذا الشي واااايد خطير... لان معناه .. خلاص وصلنا لاخر الخيط الي المفروض والي نتوقعه صالح بس حتى هذا ظهر طالح...

وزادت هالفئه من ابشر للاسف...

الريال الي مايوفي حق البيت لا ايي يصيح ان حرمته لعابه ... لانه هو السبب الا باستثناء اذا كانت البنت من اصلحها خربانه..

وسلمتوا

[دلع امونتي]

موضوع جدا جميل

شو بقول اكثر عن اللي قلتوه عندي وايد مواقف استوت

بذكر بعضها

واللي هي من كم من يوم كنت فمول الامارات شفت وحده ماشالله عليها ماشي ميك آب وعباتها وشيلتها مب ملونه او شي شكلها محترب بس الاخت مواعده ف سكي دبي حتى الريال متخبل عليها
وهي تصوره وهو شوي وبيحضنها الموقف يسكت الصراحه
............
كذا مره اخوي يا لي يقولي تعرفين بنت ....... اقوله هي اعرفها ربيعتي يقولي ما يخصج فيها ولا ترابعيها هذي ترمس شباب ومره طلعت وياهم و................ الخ انا انصدمت صح انها تحط ميك آب فالمدرسة وتتكشخ وجي بس معقولة انها تطلع وياهم قلتله منو قالك يقولي كل الشباب هني يرمسون وتحملي تروحين وياهم وحليلي انا اقوله حرام عليك البنت بريئة ويمكن مطلعيين رمسة عنها
قالي لا زغووها الشباب يوم ركبت سيارته واستوت مشكله بس احين انا كاسره خاطري هالبنت مادري ليش وفي مره المدرسة ودونا حديقة الصفا انزين وجان تغني للريال وانا كنت حذالها جان اقولها اسكتي قالت عادي جان اروح عنهم وفالباص قلتلها انتي خربااااانه ......

وفي كذا مواقف استوت بس الله يستر عليهن انا احين رمست تقريبا عن البنات

وااحين برمس عن الشباب

الشباب لعابين من الدرجه اولى

اذا رمسوو وحده قالولها احبج وبعرسج وطلع وياها وسوا اللي يباه وراح ويا وحده غيرها

باختصاااااار مفيد لعاااااااابييييييييييييين كلهم نفس الشي

واذا حب بصدق وهي بعد تحبه بصدق بيستوي شي وبيودروو بعد

والله يستر على الجميع ويعين الجميع
وفالاخير اقول
اللي تبا تستر على عمرها ما بتروح هالطريج تقتدر تغير المسار
ونفس الشي الولد لو يبا يصلب يترك البنت بحالها
والسمووحه من الجميع

[المزوحي]

الخطاب

كتبت رد طووووويل .. وامتسح ........... اووف يالقهر

[المزوحي]

الحساس ... هالشي عندنا وانا عاشينه ومرات اقول مالوم الحرمة .. من القهر ..
يوم تي الحرمة كل شي تسويه وتعرف إنه زوجها يغازل وهو ينكر ... وينكر ..
بوالصدفة يتصلون بها رياييل بيكلمونها تسد الخط في ويهم وتخبر زوجها ..
وهو يسكت .. ممكن هو يختبرها .. لكن الاهمال والتجاهل زيادة عن حده ينقلب ضده
الحرمة شريفة ووفية لكن آخرتها إذا تم على حاله الزوج .. بتسوي شي بينصدم منه وبيطيح في العناية المركزة ...

[المزوحي]

شكرا دلوعة البابا .. هنيه اقدر أقولج اختاري ربعاتج .. واتحملي ...
والشاب كذلك ... أشوف واحد وايد زين .. أخلاق وكل شي لكن مادري ليش ينحرف
وهم يخربون عليه صدق إتك مب ريال لو مادخنت وغيره من هالكلام ... طبعا بتقولون الصلب ولاشي ..
مادري ضعف بالشخصية ولا شي ثاني ..

[تحفه]

تعميم فكره على فئه او مجتمع كامل يُسمى في علم النفس إسقاط .. والإسقاط مرض يُمرض الشخصيه .. وشي مش حضاري وقبل لا يكون شي حضاري هوّ شي مب من مبدائنا الاسلاميه ..

[المزوحي]

بوظبي ... نحن نبغي نرتقي .... ومب الحضارة هاي إنه نصيع ونضيع ونقول ... يالله ..
لكن قصدي إنه الشباب والبنات تراهم المجتمع ...
وعلى أساس مب أي وحده تحط لي موضوع تحط على الشباب .. أو واحد يحط على البنات ...
كل مكان في العالم فيه الزين والشين مهما كان ..

[تحفه]

بصراحه اسمحلي الرد الاول رديته ونا بس قاريه الجزء الاول من موضوعك ! ..

بس بعد ما قريت الموضوع كامل .. اكتشفت اني اوافقك الراي الفين بالاميه ..

صح أفكاااارك !

[حلم الطفوله]

السلام عليكم


تدري يالمزوحي إني محتاره برد أقدر أطلع كل إلي بخاطري فيه :kkk:

لكنك كفيت ووفيت ... يمكن ما نقدر نصلح هالمجتمع كله ..بس نقدر نقول ..الله يهديهم ويصلح بالهم

ويحصلون حق الرعايه الكامله من والدينهم إلي هم بالبدايه والنهاية أساس نشأتهم

[الجنيه]

عــــــــــــــوده جناويه


الحساس : الصراحه هالشي انا بعد ملاحظتنه بشكل فضيع يعني صدق ما ادري شو الحكمه من هالحركه واتلاقي الحرمه اشوي وبتموت ع ريلها متقبضه فيه بكل قوتها عنبو استحوا ع ويهكم هالحركات مالها لزمه يقدر الريل يمشي عدال حرمته حاله حال كل البشر

خطـاٌب : لو من بين كل عشره شباب شي واحد منك جان الدنيا بألف خير
يزاك الله الف خير ,, وان شاءالله يتعضون منك الشباب


احم اما عن البنات فـ الله المستعان .. صرنا في زمن يتفاخرن بـ عدد الشباب الي يرمسونهن والي يطلعون وياهم .. البنات راخصات عمارهن والشباب ما يصدقون وكل واحد يحاول يتصيد بكل ما اوتى من دهاء وخبره

الله يستر علينا وعليهم ويصلحنا أجمعين

[المزوحي]

مسموحه ( بوظبي ) ولو !

[المزوحي]

حلم الطفوله .. من جيه مابغي الشاب يقول البنات فيهم وفيهم لأنه ماشاف جانب الشباب ..
أو البنت تقول الشباب فيهم وفيهم وماشافت جانب البنات ..

[المزوحي]

الجنيه .. تقول .. أنا ما اكلم الشباب .... بس بصراحة كل شي عادي استوى

[تحفه]

لازم نبتدي بأنفسنا .. حمدلله عن نفسي اعترف اني (" مرااااااااااااااات ") اعق من باب "التمصخير" بس حمدلله وبدون خقه انا مش من النوع الي ينافق او يعني يعاكس تفكيره

[تحفه]

لازم نبتدي من عمارنا .. علشان المجتمع يتحسن من هالناحيه

[المزوحي]

أكيد .. كلامج صحيح .. وإن بدر شي مني .... أعرف إني واحد من المجتمع ...

[حلم الطفوله]

السلام عليكم

والله يالمزوحي اليوم انقهرت واااايد حتى شوف شكلي :narr:

موقف لأول مره يستوي جدامي ... بنتين طالعات عرس مب سوق:mar7aba: ...

سوالف وتكركير والمشكله صوب الخياييط ... مرن من صوب سيارتنا ...ووقفن ...وأنا جيه:puppyeyes:

ما أشوف إلا واااااحد يفتح دريشة سيارته ويعق رقمه لمصفع شكل ويهه ...

أتوقع الكل حفظ رقمه حتى لهنود كانو امبهتين...عاده كمن مره والبنات مستانسات:shock: ...

إن زين الحين من انلوم بهالموقف:kkk: ...

هالبنات المتخلفات عقليا وأخلاقيا ...

وإلا هالولد إلي شافهن جدامه سهلات ....

وإلا نحن إلي ابتلشنا بالشبهات بوقوفهن حذال سيارتنا :doh: ...

كلهم دامرين .... الله يهديهم ويهدي الجميع ويستر عليهم دنيا وآخره:sadwalk:

[المزوحي]

حلم الطفوله .. الصبي هذا يوم نضج .. قال خلني اجرب افر رقم وبالصدفة لقى مصفوقات ..
يعني لو انت حاشمه عمرج الشاب مابيعبرج .. لكن ممكن تستوي 1% إنه انت مالج خص والشاب يرقمج ... انت هنيه دورج اتنطنشين أو تحفظين الرقم وتتصلين .. إذا هو صفعون وهي ملقوفه ..

[ولد الشحوح]

نزين محد ناقش اسباب هالمشكلة
هل البنت تبحث عن عاطفة فاقدتنها فالبيت
هل البنت تبحث عن حب تعيشه بعد ما جافت الفلم والإغنية الفلانية
هل البنت من باب الفضول دخلت الجااااااات وشي يجر شي لين ....
هل وهل كثير من الاسباب اللي يبالها حل
وهل الشاب يبحث عن شخص يكون له قريب
وهل الشاب يبا يسلي عمره
هل وهل .....
للأسف صاروا شباب الإمارات وللأسف منحطين اغاني رقص فسق بالسناتر والله شي يقهر مب ها شعب الامارات المعروف هايلا اللي بيتحملون مسؤولية البلاد والله شي يقهر
مجرد رأي

[مخاوية الامل]

اللهــ يعيــــنـــا ويصــلح بــاالنـــاا .. !
.
.
.
مشكوور يالمــزووحـــي ..، وكلامــك والله إنــه الوااقــــــــع .. ! ..
حالــياا .. ماعندي شــي أقولــه .. ، ولو طراليــ شي بكتبــه لكمــ ..،

متاابــعــة ..

[المزوحي]

ولد الشحوح نتريا مشاركات الاعضاء ..

[المزوحي]

مخاوية الامل أي وقت ..

[صدى جوفي]

صدقكـ المزوحي .. وعلى ’المجتمع‘ السلام........:bye2:

مرة سرنـا السوق وكنـا أربع بنات مع أخويـة .. وطول الدرب و وحدة تلاحقنــا :boxed: .. شفتها بادي الأمر مستــانسـة ع عمرهـا تهدي ابتسامات وأقول فخاطري الحمدلله والشكر ويوم وصلنا البيت يخبرني البنات أنهـا حتى السنتر دخلته معـــانا .. أسميهــا يبالها :qor9anah: عنبوه مع أهله ولاحقتــه؟؟؟!!

تسلم المزوحي عالموضوع

[حلم الطفوله]

السلام عليكم

صدى جوفي:boxed: اسميها امطيره هالبنت ! لا حيا ولا مستحى :nono:

الله يهديها:fa36:

[المزوحي]

اعنبوا ... وياكم وتلحقكم .. !
متطورة هاااي

[حلم الطفوله]

السلام عليكم

المزوحي ... يمكن مستغربه حليلها ...وتبا تضمن وااااحد يوديها السوق عقب العرس:boxed:

[المزوحي]

حلم الطفولة .. شكلنا بعدنا ماشفنا شي ..!

[الهيثــم]

بيي دوورك لا اتخــــاف ..

[الهيثــم]

ولا تستعيـــــــــل على رزقـــــك ...

[شمعة أمل]

موضوع لفت انتباهي ^_^

لي عوده ..

[المزوحي]

شمعة أمل ... انتظر عودتج

[شمعة أمل]

هممممممممممممم

كل شي يبدى من البيت .. اذا محد يسويلها سالفه في البيت .. بتسير مكان ثاني ادوره .. اذا محد يراويها انه يحبها في البيت .. بدور الحب في مكان ثاني.. وبعد رفقاء السوء >_< ونفس الشي للشباب بس الفرق صغيــر انه شي من الشباب يغازلون لانه يحسون انه هالشي يخليهم كول .. مع انه العكس صحيح يخليهم وايد CHEAP وقحط

وبعد
لازم الوالدين يفتحون عيونهم شوي .. يعني ساعات تجوفون البنت تسوي حركات بس يوم تخبرون الأم تنكر هالشي وتقول لالالا هاي بنتي حبيبتي ماتسوي هالسوالف .. لازم الوالدين مايعطون عيالهم كل الثقه .. لازم يثقون في عيالهم .. بس مب 100% .. لانه هالشي يخربهم

[المزوحي]

شمعة أمل ... التربية لها أسلوبها .. لانه ممكن يرصون على البنت بزيادة ويخليها تسوي هالشي .. يعني ممكن يخلونها تسوي شي لكن تحت نظرهم ... مب يقفلون عليها ويعطونها لاب توب .. تخيلي شو بيستوي ..

وأحيانا الأهل هم يخربون الشاب .. على سبيل المثال لو صدر منه تصرف مب زين يقولون مب مشكلة هو ولد .. ويكبر على إنه هو ولد وله حرية اللعب بطريقة غلط ..

[شمعة أمل]

^
هيـــه
اخس شي سالفة الولد .. الأهل بروحهم يضيعون الولد ..

[المزوحي]

أقولج عااااد