سلطان بيعتدل !

[حلم الطفوله]

السلام عليكم ورحمة الله وبركاته

عفوا .... ولكنه الواقع بأبسط تفاصيله !

ابن العم لبنت العم .... عند البعض تقليد معترف فيه وموروث عائلي يلتزم الكل بتنفيذه ! :fa39:

ربما تكون نسبة نجاح هذا الزواج 100% قبل عقد من الزمان ...ولكن الآن أشك بالتزام الاطراف بتطبيقه؟

المهم ... مريم قومت البيت كله على صريخها .... كانت حلمانه الاخت فلا تخافون ...كابوس جاركم الله منه:shock:

طبعا هالحاله تتكرر يوميا من عقب ما فاتحوها بخطبة ولد عمها سلطان لها ...هم ما فاتحوها طبعا !

هم خبروها بإنه الملجه والعرس عقب شهرين ! ولد عمها من دمها ولحمها ! وأولى من الغريب !

في الصعيد نحن!!:kkk:

سلطان...ولد وسيم جدا ...الكل يتمناه لشكله ...

بس كأخلاق خارج نطاق دائرة العايله... ما يسوى بيزه ! :sadwalk: :no0:

لعووووب جدا .... لاعب على بنات الخلق .... وماله هدف بالحياة .... والعرس يمكن يعدله ؟ :boxed:

هالنظريه الحين صح ؟؟ يعني إلي عجزت عنه الحياة بتقدر عليه الحرمه ؟؟ سبحان الله

سلطان... لا ادورونه وااااايد ...لانه مكانه معروف ... على قهوة:mar7aba: ......! بتشوفونه متفيزر

طبعا يشيش معسل التفاح .... إلي سمعت عنه معلومه مهمه ؟ إنه تفاح مقطن ويدخنونه ! :nono:

والله الفكس احسن منه بوايد ....شموه بس ... يمكن يفتح عقولكم اشوي وترد لكم الحاسيه طشونه!

المهم ....يمكن العرس بعد يخليه يبطل هالعادة المضره بصحته ! :kkk:

سلطان.... فاشل بشغله .... لأنه وبكل واقعيه ...مب مال شغل ولا يداوم إلا متاخر ...هذا جان داوم أصلا!

الإنذارات تعدت حدها الوظيفي ... ولو ما إنه خاله مدير الشغل جان امفنش من زمان !

يقولون والله أعلم ... يمكن العرس يخليه يلتزم بشغله عشان يوفر متطلبات بيته وحرمته وعياله مستقبلا!:doh:

سلطان.... ما خلا بقعه بالعالم ما سار لها .... طبعا لهدف ثاني غير فوائد السفر السبع !

امطيح بتايلند والمغرب وووووووووووو ويا شلة ربعه الفاشلين مثله ...بس فيه أمل !

يوم بيعرس يمكن يصطلح حاله ...ويرد لعقله ؟ ليش هو مينون؟!!!!:harhar1:

سلطان.... قابضتنه الدوريه بيوم من الأيام يترنح جدام باب البيت ! مبتلش مب عارف يفتحه

لأنه وبكل بساطه ناسي المفتاح بالسياره المفتوحه أصلا وإلي صوت الأغاني فيها وعى أهل المنطقة !

بس يقولون يمكن بعد العرس بيبطل هالشرب وبيعتدل ؟!! :unlock:

سلطان.... ما يحافظ على صلاته دوووم ! لأنه أصلا ما يصلي....

بس ما عليكم لا تخافون من بيعرس أكيييد بيعتدل عقب العرس !؟؟ حفظناها:ice:

كله عقب العرس بيعتدل ؟ كأنه الحرمه ملااااك وتقدر تغير شخص ما قدروا عليه أهله إلي ربوه !

سبحان الله يستوي .... لكن لكل قاعده شواذ ... وبنت الناس مب حقل تجارب لعيالكم ؟:narr:

هاي حالة مريم ...مشكلة سلطان الكل يعرفها ... وهي ما اداني طاريه أساسا ...

لكن الوالد ما قدر يكسر بخاطر اخوه إلي اختار بنته زوجه لولده ...واكيد هيه أقرب له من الغريبه

بنت عمه وبتصلحه .... وين نحن يا ناس ..؟ والبنت ضاربتنها حاله نفسيه من طاريه !

يهدونها ...يحاولون يقنعونها ...عقب العرس بينصلح حاله وبيعتدل لا تخافين كلهم جيه!!

شو رايكم ؟ صدق بيعتدل حاله كله عقب العرس!!:fa36:

[قرموشة]

ييت أبـا أحجـز لي مكـان وأسجـل اعجـابي بهـ الموضـوع ~ سلمتي يا حـلم على هـ الاسـلوب
وأكـيد لي عـودة :kcl:

[تحفه]

عليكم السلام والرحمه ..

المغازل يسببه وقت الفراغ .. واذا إنقضى وقت الفراغ .. انقضى ع المغازل لول

اما بالنسبى للاخلاق .. فالريال اذا بيتغير .. أقصى تغيير بيكون بس 40 % ( هذا اذا الحرمه ذكيه )
بس بعد الزواج معظم الرياييل يتغيرون من 10 لين 20 % والباجي يتم مثل ماهو

والله يعينها لول

[الثعلب الرمادي]

السلام عليكم ...

الحين أختي حلم الطفولة كل هذي الأشياء في الريال و البنت مافيها شي أبدا أبدا ... ما أعتقد في ريال يسوي كل هذي الأشياء طول الوقت ... شرب و بنات و ما يداوم و لا يصلي وين هذا :) ... يمكن الريال يسكر في الإجازات لأنه مب متزوج و ماعنده أحد ... و يمكن سكر مرة و شافوه ناس بالغلط فقالوا يسكر طول الوقت ... يمكن في ناس ماشافوه يصلي في مسيدهم إللي هم يصلون فيه ... فقالوا خلاص الريال ما يصلي :) ... إنزين فيه مسايد ثانية يعني مافيه غير مسيدكم بس :) ... لو فرضنا إن الريال يسوي كل هذي الأشياء خمر و بنات و ما يصلي و لا يداوم :) ... أنا مستغرب ليش يسافر على حد كلامج حتى يسوي الأشياء الثانية و هو أصلا مسويها هنيه و خالص :) ... أختي صدقيني كل هذي مجرد إفتراضات و الكلام وااايد ... أكيد يوم البنت بتسمع كل هذا الكلام بتخاف تتزوج و بتكون حالتها النفسية سيئة ...

شو رايكم ؟ صدق بيعتدل حاله كله عقب العرس!!

أكيد بتعتدل حالته مافي أي مجال للشك :)

[تحفه]

اصلا سالفة انهم يغصبونها مب على كيفهم .. جي وين عايشين

[المزيوونه]

جذبني العنوان .. وشوي شوي .. حسيت الشخصيه وايد قريبه من مخيلتيه .. والاسم!!
والأفعال..!!

اسجل حظوري .. وتسلمين اختيه ..

[حلم الطفوله]

السلام عليكم

قرموشته ........أكيييد أنتظرج يالغاليه ...بس لا اطولييين:fa35:


بوظبي... مثل ما قلتي يمكن تغيره الحرمه ويمكن يتغير هو ؟ بس بنعيش عاليمكن ! شاكره مرورج

على فكره تفكيرج يعيبني

الثعلب الرمادي ....شفت عاد أثر هالكلام على البنت ! حالتها حاله وهيه تسمع عنه كل هالكلام !

بس أكيد أنا ما أقول الريال فيه كل هالأشياء مجتمعه ...أنا عطيت مثال ! بس يقولون الشين اير الشين

انا سؤالي يقول .... هل فعلا يعتدل الريال عقب الزواج !

انته قلت يستوي ...ووجهة نظر باخذها بعين الاعتبار أكيد خيوووو.... ما شيء كثير على ربنا

بوظبي... تستوي الغاليه يستوي ... على حسب العوايل والتفكير القبلي !:boxed:

المزيووونه .... وانا أقول إش معنى اخترت سلطان ؟؟ كله من القصه إلي عيشتيني احداثها !

الحين زين جيه ....كل حد راعي سوالف بسميه سلطان:doh: يحليلهم السلاطين:kkk:

[هزاايم]

أنا ماراح اعلق بس اريد أوضح نقطه
إن للأسف صار زوااج الأقاارب يتعدى الخياال,,يعني احتمال كبير تقدر البنت تغير ,,لكن مش كل بنت,,ليش.؟!
لأن للأسف صارت البنت لولد عمها وهي عمرها من 16-18 حلال عليه بالبركه:5: واقاموا واحتشروا ويوزووا البنت,,إلي اقصده مش كل بنت عمرها 18 ملاك وعاارفه أمور الدنيا وسوالفها وقااادره تستحمل وتتوالم مع العيشه الجديده>>>يقهرني هالتفكير:narr:

لكن انا اشهد معااج ليش البنت ملاك تقدر تقلب الرياال لحاله,,صحيح في الكثير إلي قدرن يغيرن مساار حياة أزوااجهم,,لكن ماننسى في الكثير منهن ضاعن مع أزوااجهم,,المشكله يوم تتشكى عيب هذا ولد عمج ترضيت تغلطين على عمج:no0: ,,

مااقول غير متى السلطاات العليا تطبق المعنى الصحيح والمقصود للجمله إلي على لسانهم:"الأول تحول"...>>غيروا هذي العاده :3:

حلم الطفوله>:fa34: انا اقولج ترقيعااتج لنا بهاالوااحه تعجبنيه,,سلمت يمنااج لاهانت وربيه لاتقطعين عنا هالإبدااع,,شكرا ليمنااج المبدعه عساها ازود,,حيووهاا:fa34: :fa34:

[المزوحي]

الصراحة بغض النظر عن زواج عيال العم ... واحد اتقدم لخطبة فلانه ورفضته لأنه صارحها عن ألاعيبه قبل مايخطبها وإنه الحين دام إنه نوى يخطب .. ودر هالأمور ... فخطب غيرها وأتزوج ..

لكن مب كل زواج ناجح لعيال العم حتى لو ما سوى هالامور اللي ذكرتيها ... ومن واقع أعرفه ..
إنه واحد خطب بنت عمه ... وما عنده ألاعيب ورغم سنتين من زواجهم اتزوج عليها ...
يمكن قاعده شاذة ... والشي الثاني إنه في موضوع غيره ... واحد متزوج بنت عمه وعقب 10 سنوات اتزوج عليها وخذ بنت خالته ( عندهم عيال ) .. والشي الأخير .. في واحد متزوج بنت عمه ( عندهم عيال ) ألتزم ربى لحيته واتزوج على حرمته ... (عندهم عيال ) ...

بسى أتمنى يعتدل قبل مايفكر يعرس أو ما يسلك هالطريج من الأساس .. وفوق هذا كله ... وبشكل عام
ومب خاص ... وفئة كبيرة من الأزواج لهم علاقة ... سواء حرمته ماتعامله عدل أومهمله في نفسها وعيالها أوحتى فيه هو شخصيا أو العكس .. نسبة كبيرة منهم يردون على سوالفهم اللي الحرمه تتغاضى عنها حتى أيام الملجة ...

مب كأني دخلت في متاهات ..... وايدين من اللي بيعتدلون عقب العرس استمروا ...
والحين بيردون يقولون من الحريم السبب .. ليش ما تعالج الموضوع وتخليه يتغير
الله يعينكم يالحريم

[عافك الخاطر]

وعليكم السلام ورحمة الله وبركاته..


شو رايكم ؟ صدق بيعتدل حاله كله عقب العرس!!:fa36:
هيه.بيكون فيه تغيير ؛ لأنه داخل مرحلة يديدة في حياته تجبره انه يتغير .. اما التغيير الشامل يعتمد بشكـل كبيـر على الحـرمـة .و بما ان هي وصلت لمرحلة مب قادرة ترفض هـ الزواج .. فـ خليها ترضى بالواقع وتحاول مثل ما قالت ام خدود ب1كائها انها تعدل الريـال وتكسـب فيه اجر.


اممم ومن اللي اشوفه في عايلتي .. اخواني اللي عرسوا اعتدلوا .. خاصة عقب ما يابوا يهال وجي .. اتحسين الريال يستوي انسان ثاني :puppyeyes:
يعني باختصار الزواج في حالة سلطان اول خطوة للتغيير .. والبنية لازم تحط في بالها ان هالتغيير ما بيكون بين يوم وليلة ..يباله صبر و طولة باال.. و في رايي انا ما اشوف البنت حقل تجارب في هالموضوع .. صدقيني الحرمة الزينة اتسوي بلاوي في الريال :fa35:


وتسلم دياتج حلم :)
..
.

[الحساس]

السلام عليكم ورحمة الله وبركاته..

تحية للجميع مسبوقه لصاحبة الموضوع الي عجبني اسلوبه وطريقه طرحه..

الزواج ... صنفه الاسلام انه نص الدين ... جد حد سال عمره شو يعني ان الزواج نص الدين ..

الزواج وما يترتب منه يعتبر حياه جديده للانسان .. فالاعزب يتزوج ويرزقه الرحمن بمولود ويصير اب وتتولد فيه احساس الابوه ( هذا تغير) ، غير عن ان هذا الاب يكن لحرمته كل تقدير وعرفان انه انجبت له هذا الولد ( هذا تغيير) ، يكبر الطفل .. والاب يجتهد بان يدخل ابنه احسن المدارس واييب احسن العلامات ويوفر له معظم مطلبات النجاح - اهتمام يعني ( هذا تغير ) .... الخ

الي كتبته مثال لاي شخص ممكن يكون متهور وصايع قبل الزواج وبعد الزواج صار مثل ماوصفت.. وبالتالي تغيرات كبير بشخصيه الانسان وسلوكه حصلت مقارنه بقبل الزواج.

بالمختصر .. نعم الزواج يغير وتغيرات كبيره .. لنسبه كبيره من البشر .. بس ماننسى انها هب قاعده لان في نسبه ماياثر فيها.. المهم التغيرات يمكن تكون للاحسن ( وهذا الغالب) ويمكن للاسوء (وهذا النادر).

زواج بنت العم من ولد عمها عاده في مجتمعنا بس يالسه تقل لكبر مجتمعنا.. لكني ماحبذا لو اتفق الاهل قبل لا الطفلين يمشون على ريولهم والله الولد للبنت..

الله يعين ..

سلمتوا

[لمّــاح]

الســلام عليكم ..

ذكرتيني بمقولة عن المرأة و الشيطان و الرجل:ice: .. الشيطان أستاذ الرجل ولكنه تلميذ المرأه ..:harhar1: من توقيع الاخ منصوري الدولة ..

اختيه مثل ماقال الاخ الثعلب الرمادي مافي انسان بهذا السـوء و لنفترض بأن الشاب الي تقدم للزواج هو بهذه المساوي، انا شخصياً اتوقع بأنه بيتحسن بعد الزواج ..
معظم الشباب اذا مب كلهم يتغيرون عقب الزواج .. و الي اعرفهم من هالطينه أو اقل يعانون مثل ماتفظلت الاخت بوظبي من الفراغ بكل انواعه و اذا البنت هاذي عزمت على انها تغير ريلها صدقيني بتقدر لأنه مافي شي اسهل للبنت من انها تتحكم بالريال ..

انا شخصياً اعرف شاب من نفس هالطينه الي ذكرتيها فوق ... ملج و خلص و تغير 360 درجه و التزم .. !

مافي شي مايتغير في هالدنيا .. نحن بشر و الله انعم علينا بنعمة الاسلام لو كان الاسلام ظعيف في نفوس البعض لكن تذكري بأن الله يهدي الدنيا لمن يشاء ولكنه يهدي الاسلام لمن يحب فقط و بما ان الله اختاره ليكون مسلم فبإذن الله بتقدر تغيره ..

و بخصوص الاهل .. هممم انا شخصياً مب ضد فكرة الزواج من الاقارب لكن مب بالغصب و في نفس الوقت يعتمد هالشي خصوصاً و ان هناك بعض السلبيات من هالزيجه لكني مازلت من المؤيدين نسبياً بس بشرط انهم يعطون البنت حريتها في الموافقه مب مثل ماتفظلتي في الموضوع .. :yes:

السموحه على المداخلة ..

[قرموشة]

السلاااام عليييكم :fa35:

في مـثل يقـول ( ذيـل الجـلب دومـه معواي )
هذا مـثل سمعتـه على لسـان وايدييين بس مـش كـل مره يضبـط .. يامـا ناس تغيرت لأسباب كثيره ..
والريـال دام انـه رضـى بالعـرس هـذا مـعنـاتـه انـه مـل مـن سواالف الخـربطـان واللعـبان وحـب انـه يستقر
ومـالقى غـير بنـت عمـه اللي بتحـاول تغيـره ..
بس مـن ناحـيه ان البنت تنـغـصب على ولـد عمـها هـذا الشي ما أوافق عليـه أبـدا
اذا كـانت البــدايـه غلط فكـيف بتكـون حـياتهـم ..
صـح انـها هـ الطريـقه مـشت في المـاضي ووايد غيرنـا توفـقوا فيـها:unclesam: .. بس دوام الحال من المـحـال والزمـن تغيير وحـاجـات الانـسان تتغير ..
وألف بالالف انـه هذا القانون تغير .. يامـا زيجـات تعرضـت للطـلاق والسبـه هـ الفكـره اللي قايمـين بها الاوليين ..

في نقطـه جذبتـني
أو بالاحـرى شخـص لفتني لهـا


سلطان.... قابضتنه الدوريه بيوم من الأيام يترنح جدام باب البيت ! مبتلش مب عارف يفتحه

لأنه وبكل بساطه ناسي المفتاح بالسياره المفتوحه أصلا وإلي صوت الأغاني فيها وعى أهل المنطقة !

بس يقولون يمكن بعد العرس بيبطل هالشرب وبيعتدل ؟!!

وكـانت وجـهه نظـره بعد المناقشـه ان الريـال اذا شرب ممكـن يبيـع حرمتـه ويلف بها الشارع جدام الخـلق ! :no0:
ما أعرف اذا هـ المعلومـه صـح ..
بس اعتقـد ومـثل ما قـالوا انـه الي يشرررب ييسوي أي شي عشان يحـصل اللي يباه مـثل المخدراات

تـعـرفيـن كـان في بالـي كلاااام ثاني مخـالف جـدا .. وهو انـي اكـون ضد هـ الفكـره تمـامـا
ومـستحـيل أوقف مـعاهـا !! وهـذا لسبب واحـد اني شفت هـ الموقف في وحده من أهلي .. لكـن للأسف ما اعتـدل الريـال وفعايلـه زادت وبالنهـايـه كـان الطلاق !:narr: مـع ان هذا الشخـص كـان طيب لأبعد الحـدود للأسف .. وفعـلا طاح من عيني بعد ما عرفت
بس تجـارب النـاس في الحـياه ورؤيتـهم للمـوضـوع من جـوانـب ثانيه غيرت طريقه تفكيـري

soOo

هـل ممكـن سلطـان يتغير على يد مـريـم
هيـه نـعم ممكـن وهذا يعتمـد على شطـاره مـريـم بالتأكـيد :daleel:

شكـرا يا حـلـم مـرة ثانيـه عـ الموضـوع
:)

[حلم الطفوله]

السلام عليكم

هزاااايم .... نورتي الموضوع بوجودج :fa35: ...

تدرين الحرمه هاي ما يغلبها شيء ! إذا كانت ذكيه طبعا ... تقدر تغير ريلها مع مرور الأيام !

ودامه ولد العم أكيييد بتحاول وياه .... والله يعينها ويوفقها للخير:fa38:

هزاايم ... هالتشجيع خلاني أحس إني فزت بالمونديال:doh:


المزوحي ... أشكرك صراحه يوم قلت الله يعين الحريم على الرياييل:yes:

بس بعد مب دوم ! والله الدنيا فيها الزين والشين ! الله يوفقك واطيح بالزين:fa35:

شاكره لك مرورك ورايك عجبني أكيد


عافك الخاطر.... يحبج الخاطر ورايج عجبني أكيد ...

الريال أكيد يتغير عقب العرس لأنه حياته تغيرت يمسؤوليه يديده لازم يتحملها ...وأحس إنها بحالة سلطان مب أي مسؤوليه ...هاي بنت عمه ..عمه إلي زوجه بنته وهو عارف بسلبياته المعروفه !

الواقع يشهد بهالتغير ... ومثالج أكبر تجربه تثبت إنه الحرمه اتسوي بلاوي يا إختي ! ويمكن الريال بروحه بعد من نفسه ينضج تفكيره يوم يشوف مسؤولياته وعياله !

شاكره مرورج خيتوووو

[الاسطوري]

وعليكم السلام ..


موضوع شيق بصراحه وحبيت أقول رايي فيه ،، أول شي الزواج قسمه
ونصيب ولو الوحده مكتوب لها تاخذ واحد ملتزم ودين بتاخذه
ولو العكس بعد بتاخذه ومانختلف في هالنقطة
وطبعا كل شخص منا يتمنى
ان شريك حياته
تكـــون
فيه بعض الصفات اللي هو
حطها فباله وكل يوم يزيد ويعدل فيها وشي أكيد
مستحيل أو أقرب للمستحيل إن الواحد يلقى الشخصيه المثاليه
اللي هو رسمها فباله ولازم عشان يعيش وتستمر
العلاقة ويكون أسرة سعيدة إنه يتنازل
عن بعض الأموروالطرف
الثاني كذلك
ولا بيوصلون لطريق مسدود ماله تكمله وبيي يوم بتنتهي فيه العلاقه
بالطلاق ،، ندخل في الموضوع عن نفسي مب ضد زواج
الأقارب بس ماأشجع هالشي لأنه يجلب
الكثير من المشاكل في الغالب
وأي مشكلة صغيرة
بين الزوجين ممكن تكبر وتصير مشكلة بين الأهل ومايبقى حد مايتكلم
عنها وهالأيام نادرا مانشوف بنت تنغصب على حد إلا في أضيق
الحدود وإذا هي ماتباه خلاص المفروض محد
يجبرها وهو يدور له بنت الحلال
اللي ترضى فيه
وماشاءالله بنات حواء وايد وهي الله يرزقها بالشاب اللي يسعدها وترضى
فيه بس بعد ماننسى إنه فيه بنات يحطون شروط تعجيزيه عشان
محد ياخذها إلا ولد ملايين مهر نص مليون وبرج
بإسمها وفريج في المرابع حق
ربعها في الويك
اند و6 شهور مسافره و6 شهور تريح عمرها يعني طلبات مب منطقيه
أبدا واللي يرضى بشروطها ماعنده سالفه هاي تصبر لين
ياخذها واحد عمره فوق الـ 80 ملياردير وعقب
شهر يموت وتورثه وتتضارب ويه
اعياله في المحاكم
وبعدين الواحد يوم يبى يتزوج مايفكر فلانه بتعدلني هو يختاره من بين
العشرات أو المئات ومخطط ألف مره قبل مايقدم على
هالخطوة إلا إذا أهله اختاروها وهو بس
يقول اوكيه مايدري عن
شي لاهي
في طلعاته وسفراته هذا موضوع ثاني ،، نرد لمحور الحديث الزواج لازم
يكون بنضج الطرفين ومعرفتهم للي ينتظرهم من مسؤوليه
وبيت وأسرة واعيال و و و ويمكن المظهر
الخارجي لأي زوجين يبين
التفاهم والموده
والمحبه بس ماتدري كيف هم ويه بعض عايشين يمكن ماودهم حتى
يشوفون بعض لأن الشيطان داخل بينهم ولاعب لعبته وطبعا
هالشي يرد في النهاية للزوج والزوجة ومدى
توافقهم ويه بعض ومدى قوة
العلاقة مابينهم فكل
ماكان التفاهم والإحترام سيد الحوار والنقاش قدروا يندمجون ويه بعض
أكثر وماننسى الصراحه اللي بدونها ممكن تسبب شرخ
كبير في الأسرة اللي يبنونها في أي لحظه
وأتمنى مريم قبل ماترفض
سلطان عشان
ترضي الناس تتعرف عليه عن قرب في البداية دام إنه ولد عمها وإذا
شافت إنه مايصلح للزواج وماتقدر تعيش وياه أبدا عقب
تحط النقاط على الحروف وترفضه للأسباب
اللي هي بتكتشفها بروحها
إن وجدت يعني
:yes:


الاســـطـــوري
أخوكم

[تنينه]

الـسلام عـليكم والرحـمه :fa35: ,,

سـرد جـميل ومحتوى ومـضمون أجـمل :smartass: ,,


ذكـرتيني بـوحـده من صديقااتي ,, مـن صـغرها وهـي محيرينها لـولد خالها ,,و دووم في عايلتهم وبين أفراداها من صغيرهم لكبيرهم فلاان لفلاانه وفلاان لفلاان ,, بــس مـتى العرس؟!! يوم هـي بتخلص دراستها وهـو بـعد ,,

اتخرجت البنت من الثانويه و دخـلت الجـامعه وف يــوم من الأيـام كانت يالسه حذال وحـده من بناات الكلااس وفجـأه لــمّــحت فـ لااب توب البنت صــوره أجبرتها أنــها أترد النـظر مـره ثاانيه وبسررررعه وأتدقق ف الصوره أكـثر ,, أنـصدمت مـا عرفت شو أتـسو هـو لا لا مـب هـو يخلق من الشبه أربعين لا لا هـو بس ليش الصوره عـند هالبنت ومنو هالبنت ,, مـب من أهلـنا ما أعرفها أنـا!! همم ياا ربي شسووي ,, دارت الدنيا فـ البنت وارتبكت ,, بس تمالكت نفسها عـسب ما أتلااحظ البنت ,, جــان تسألها بـكل بروود والإبتساامه على ويهها عـسب ما أتلااحظ البنت,, صــورة منوو هـاي ؟! جـان أترد عليها البنت : هههه شو هالفضول هااا لـهدرجه غـاوي مــيوود فدييته ,, ومـن قالت البنت ميوود,, ربيعتي خلاااص شو أسـمه ميوود شرات أسـم خـطيبي بـعد ويشبه واايد لا لا هـو نفسه( في نفسها ) ,, عـيل أسـمه ميوود ما شاء الله ,, أترد البنت هـي ميوود شوو رايج فـيه مب غااوي ,, جـان أتقول ربيعتي هممم مـا أدري ما جفت الصوره عـدل خـليني أجوفها مـره ثاانيه ,, وبعد ما جـافت الصوره أتـأكدت أنـه هـو ,, سألت البنت بكل عفوويه مـن وين هـو ما شااء الله ,, شكله ظبيااني قاال لها البنت هيييييييييييه فديته من بووظبي :no0: واتأكدت البنت المسكيينه أنـه هـو بدون أدنـى شك وتمت البنت تـرمس عـنه وأتقوول وين يدرس وجـم عـمره ,, هالبنت كاانت واااايد تـرمس ومن النووع أللي عـادي يعني بايعتنها بشرف ,, أول مـره تيلس مع ربيعتي وقالت لـها كـل شي عـادي :nono: ,,

انـصدمت مـا عرفت شـو أتسوو ,, لا ما أصدق ميوود أللي الـكل يحترمه والكل يتحسبه شرريف مـكه ظـهر يرمس بناات مـا أستبعد أنه يظهر معاهم عـادي ,, بس ما علي مـع مرور الأياام بـعرف أكـثر ,, تـمت حيرااانه ما أتعرف شـو أتـسوو ,, أنــكسرت صوورة فارس الأحلاام الخـطيب أللي كانت فـ عينها ,, وحـست بكرااهيه واشمئزااز مـنه وكـل ما تتذكر صورته عـند البنت وكيف ترمس عـنه البنت ,, اليووم الثاني وف الكلااس كالعااده ,, ييلست حذال البنت ,, تـموا يسوولفون وجـي ,, وسألتها ربيعتي كـيف اتعرفتي على ميوود هـذا ,, قالت لها عـن طـريق الجاات هــو عــاد دوومه مطييج ف الجات !! صــدمه ثـانيه ,, وعقب آذااني يبى يرمسني وكلمته ,, حلييله واايد طيب وحنوون ,, وقلـب البنت يغلي أكـثر والكـره يزداد فـ قلبها اتجاه الخطيب والبنت ,, عييل شكله يحبج صدق ومتعلق فييج واايد واذا هـو جي يحبج يمكن بياخذج عقب ,, البنت يااارييت والله ,, هـو واعدني انه بيتقدم لي بس مأذني يبى يجوفني أول ويظهر معااي ,, أنــصدمت البنت ما قدرت تتكلم ولا شوو أترد عليها ,, بــس انا لااااااء ما رضييت ولا جت ظهرت معاااه يعني ,, بـس مـره ع السريع عـزمني على جاي كرك ف المـمزر ما كملنا نص سااعه ورديت :hist: ,, مـا عرفت البنت شـو اتسوو تمت سااكته وجان تسكت البنت الثانيه ويرن تيلفونها لاا إرادياً صدت عليها ربيعتي منوو ميوود ,, جان تضحك البنت هييه وتظهرمن الكلااس ,, تمت حيراانه مـب عارفه شـو أتسوو ,, ردييت البيت والضيج فـ قلبها مب قاادره تكتمه أكــثر ,, وقعدت أتفـكر كييف بـعيش معااه ,, صدق طـلع أنــسان لـعاب ويـقص على بنات النـاس ,, و مـب بس يتكلم معاهم ف التلفوون لا ونـيته شي ثااني ,, أستغفر الله ياااربي كيف بعيش معااه ,, وااحد ما حـفظ وصاان بناات النااس ,, أكـيد هالشي بينرد لـه يا خواته أو بناته هااا لااا بسم الله ,, ما أبى ما أباااه صدق ما أبااه ,, راحت البـنت لأخوها العـود ,, وأخوها أنساان متفهـم ووايد طيب مـع أخته ,, ساارت له أتقوله السالفه وهـي أتصييح:bye2: ,, أنـصدم أخوها من أللي سـمعه ,, قاال لـها دام أنـج مب مرتااحه لـه وهذاا سواياه ,, فـضل عـنه من رياال ما بغينااه ,, واذا انتي مب قاادره أتكلمين أمـي انا برمسها وبقولها ,, ارتااحت البنت وحـست بفرحه ,, ييت الأم وخبرها أخـوها السالفه ,, عـصبت الأم شووو هالرمسه بــعد ,, ألحين هـذا ولد خالها بدال ما تـستر علـيه أتسيير تـفضحه :boxed: ,, وبعديين هذا ولد وسااتر عييبه بااجر يوم بيعرس بيتغير ,, وانا مــستحييل أقوول لأخووي عن هالرمسـه ,, الولد بتاخذينه بتاخذينه ,, البنت أتصييح اتقول ماااااا أبااااااه ما أطييجه كرهته كيف بعييش مـعاه ,, الأم بس ولاا كلمه شو هالكلااام بععد ,, سرتي الجامعه والبنات قلبووا مـخج ,, غـصب طيب بتاخذينه وانتي صغيره وما اتعرفين مصلحتـج نحن أدرى بـها ,, الأخ احتاار بين دموع أمـه وأختـه ,, مـا عـرف شو يـسوي ,, وهو عـارف أمـه عـدل وشكثر معزتها لأخوها وولدها الخطيب المحترم ,, الأخــو قال لأختها ,, أستهدي بالله اختـي ,, أنتي يداامـج 4 سنوات درااسه ألين ما أتخلصين درااستج ,, وما أتعرفين فـهالأربع سنواات شو بيصـير يمكن يتغير ويمكن أيووز عـن هالسوالف ,, وبعد أربع سنوات بنسأل عـنه وبنجوف كييف واذا سـمعنه عـنه شـي ولا لاحظنا شـي ,, ساعتها أنا بسير لــه وبقوله أنـه نحن ما نبااك,, البنت أترد عـليه وأنت كيف بتعرف شدرااك طول هالفتره ما عـرفتوا عـنه كيف بتعرف عـنه عـقب ما ابااه خلااص وبو طبيع ما أيووز عـن طبعه ,, تمت البنت أتصيح وأتصييح وحاااسه بضييج طوول اليوم,, رن تـلفونها أتجوف أخت الخطيب مـتصله ,, كانت ربيعتها وواايد معاها بنت خالها ,, بس كانت أكبر عنها يمكن بـ 4 سنواات ,, لااحظت بنت خالها صوتها كيف متغيير والضيج أللي فيها قالت لها شوو فيج صوتج متغير ,, مـا قدرت تتمالك عمرها وقالت لها عـن السااالفه كلهاا ,, أنحرجت البنت من رمستها واايد واتضاايجت من أخوها ,, أخوي جـي ما أصدق ,, وساارت البنت محررجه عـند أخوها وقاالت له السالفه ,, ما عـرف شو يسووي شو يقول ,, أتـضايج واايد وأعـترف باللي سـواه ,, وقالها انا مستحيييل آخـذها كنت أسوولف وياه كيف آخـذ وحده ارمسها وغريبه مستحييل بس لعب وخربطان وعـن سالفة الظـهره أنكر هالشي ,, وقال هـاي بنت خاالي ما تسواهم والله ,, وانا غـلطت وندمااان وقولي لها هالرمسه ,, خبرت بنت الخال الخطيبه اللي كارهه الدنيا وما فيها ,, بس كلاامها ما آثـر فيها شـي ,, صــورة الخـطيب المـشووهه فـ بالها ,, ومـب قاادره تستحمل حـد يذكر طااريه ولا أييب أسمـه تتضاايج بشكل كبير,, ويـوم أتجوفه بالصدفه ينزل رااسه وما يقدر يواجهها بعد أللي صـار ,, والبنت أللي كانت تيلس حذالها بس يمكن أسبووع يلست حذالها وعقب غـيرت مكانها ,, وكـل ما أتجوفها ,, تتذكر الخطييب ,, هــيه أكييد بعده يرمسها واذا ما يرمسها بيرمس غيرها وبيوااعد غـيرها وبييلس يقص على بنات النااس ’’ آآه شو هالـحظ ما أبااه والله ما أبااه بس شسوي مب قاادره أتكلم ولا أرفضــه واذا تكلمت :no0: ,,


حلييلها ربيعتيه ,, غـمضتني صـدق :no0: ,, يااا تـرى لو أتغير خطيبها مــاايد عقب الزواج ,, رااح يتم الشـك ف قلب البنت ,, لأنـه تعرف عـن مااضيه ولـو حاولت تنسـى كـل ما رااح أتجوف البنت تتذكر ,, واذا تــم ماايد على حركااته ما رااح أتـغير البنت شـي فييه لأنه أصلاً كااارهتنه ومجرد أتجووف عليـه شـي رااح أتكون البداايه لمشااكلهم ويمكن لأبـغض الحلال عـند الله :no0: ,

شــي شبااب بـعد ما يعرسون يتغيرون صـدق وشي شبااب يتغيرون وبعد فتره يردوون لطبايعهم وشي شبااب موول ما يتغيرون ,, يعني البنت المسكيينه أتجرب حـظها ويا ولد خالها شـو أتسوو بـعد أتضحي ولااا أن الأم المصوون أترد بكلمتها أللي عـطتها من سنيين لأخوها وولده العـزييز ,,


وعــن زواج الأقـارب انا ما أعــترض على هالشي أكـيد لأنه من عادتنا وتقاليدنا أصلاً وناادر عـندنا البنت ف العايله تـاخذ من برع العايلـه ,, بـس أللي أعـترض عليه سالفة أنـه البنت من صغرها يحيرونها وعــقب اذا اكـتشفووا شـي يقولون ولد خالج وبيتغير بعد العـرس أكـثرهم جـي عادي:ice: ,,


ووالسموحه :kcl: ,,

[الغاليه]

أول شي .. انا ماعرف كيف وليش اتدافعوون عن سلطان وعادي عندكم مريم تاخذه :boxed:

انتوا ماجفتوا سلطان كيف ؟؟

سلطان يشرب ومايصلي وفاشل فشغله وراعي سفرات مشبوهة وبنات .. لاتقوولوون نادرا حد يكون بكل هالسوء ! .. لانه شي طبيعي اللي يشرب مايصلي واتكون فيه كل الصفات السابقة ..

برايي من حقها وألف حق بعد عندها جانها مابغته وجلبت الدنيا فوق راسهم وسوتلهم حريجه بعد .. ولا إنها تاخذه على احتمال انه ينصلح عقب العرس !! .. اعتبرها مغاااااااااامره كبيره تضحي فيها بنفسها وبعيالها .. وزمن المغاامرات انتهى مثل مايقوول حسني مبارك :doh: ..

وبعدين .. يوم يختارون الريال .. يسئلون عن دينه وخلقه .. وسلطان شو عنده من الزين والدين عشان يبلشوون مريم فيه غير شكله الحلو !! وهم يعرفون بكل سواياه الشينه .. اممممم اهل ماعندهم مخ بالنسبة لي وياووويلهم من الله جان جبروها تاخذه .. لكن ان كانت موافقه برايها هي بتتحمل نتايج قراراتها .. لكن ان كانت مجبورة بترد اللوم طول عمرها على اهلها في حالة كانت حياتها سيئة ولا انتهت بالطلاق ..

ومن واقعي المحيط اشوف انه هالنوع ممكن يعتدل سنة سنتين 3 وعقب 7 او 10سنين اتصيرله انتكاسه .. ماعرف بس اللي مثل سلطان هذا احس يباله اعادة تأهيل وتدريب وتطوير وترميم عشان الوحده تقدر اتعيش وياه ..

وعلى فكره اعرف بعد انه هالفئة دووم الناس يردوونهم ومحد يقبل فيهم يوم يخطبوون .. من جيه يزيد انحرافهم واتزيد مشكلتهم وياخذوون أجنبيات بدال المواطنات .. و تنتج عنهم مشاكل أكبر من مشكلتهم العادية .. لكن يوم ياخذوون المواطنه يمكن الوضع يتحسن شويه !! ويتحسن الريال ..

لكن مع كل الأحوال .. ماأحبذ فكرة انه الوحده والأهل يقبلون بواحد مثل سطان ( على أمل ) انه ينصلح في يوم من الأيام ..

وسلطان قد ينصلح حاله ويعتدل بعد الزواج .. لكن الحياة الزوجية أكبر وأهم من انه الواحد يدخلها ويبتديها ويعتمد فيها على ( قد ) ..

ولو تبوون الصراحه قلبي عورني على سلطان ما أحب اني اكون بكل هالهجوم ضده .. لكن أفعاله تجبرني أخذ هالموقف منه ومن كل اللي شراته ..

وقبل كل شي وعقبه ماانسى طبعا انه كل شي قسمة ونصيـــــــــــب ..



حلم الطفولة ..

مااشاالله عليـــج صدق .. اسلووبج رائع وسلس في طرح وكتابة المواضيع .. ولا تنسين انه ممتع بعد :yes:


شكــــرا

[ريم العين]

المشكلة الاولى يوم يحيروون للبنت وهي ماتباه

يعني احين مثلا البنت ماتبا الولد اذا كان الولد اوكي ولا مب زين ماتباه ليش يغصبونها! او ماياخذون رايها او انهم يشوفون الكبار فالعايلة توفقو قالو بعد هذي بتتوفق وما يدرون عن الريال شي ولازم من الاساس يسالون عنه ربعة وكيف يرضون للبنت تعيش ويا واحد راعي بنات ومنحرف

بس لو كنت مكانها بصلبة و وبربية من اول ويديد

المشكلة الثانية فأهل الولد لازم اتكون تربيته زينة عسب يكون معتدل

يعني الاهل لو كان من الصغر مربيين الولد بين اهله وشافوله الربع الحلوين بيكون معتدل وتكون تربيته حلوه عسب يكون ريال صدق

المشكلة الثاثة العادات والتقاليد

ليش يخلون البنت تاخذ ولد من اهلها لازم يخلون البنت على راحتها عسب ماتكره هالحال ...

وبعد لازم يفتحون عقول امهم وابوهم عالولد وعالدنيا ...

وفالاخير..

وكل واحد ونصيبة

[طفلة من هذا الزمان]

بغض النظــر عن مساوىء سلطــوون ،،يوم بيعتدل بقول سلطــان :fa34:

صعبــــة جـــــــدا على أنثـــى ما تحس بالفخـــر كل ما ينذكر اسم او طاري الشخص اللي بيكــون زوجهـــــا ،،

بغض النظـر حـال سلطــوون بيعتدل أو لا ..

أنــا بنظري مريم يحقلهــا تنكسـر مليون قطعــة من الداخــل .. لأن سلطــوون نظـرا لتاريخـه العريق , يعد سيء الذكـــر .. مب من الأشخاص اللي اطريه و انا رافعـه راسي او أحس بالفخــر أن فلان زوجي ،،

بنظـــري ضروري الزواج يبدا بهالشعــــور من الذكـر و الأنثــى ،، ولاّ؟ :kkk:

الحين .. اجاوب على ســؤالج يا حلــــم ،، هل سلطـوون بيعتدل؟!

جـايز هيه و جايز لا .. ما في أساس بيعتمد عليه .. الزواج مب داعي :kkk: .. الحرمـة مب سبب :fa36: ..
بس سلطـوون القادر يحدد .. هل في داعي للتغيير ؟!! و لا الحــال يبقى على ما هو عليه لأنه عايبنـه!!
المهم إن كل إنســان في حياته محطــة يا إنه تصحيه و تعدل سلوكياتـه:cop: .. او إنها ترده لقــاع ما بيطلع منها جريب :shock: ،،،،،،،

يوم بشوف سلطووون بخبرج تغير او لا ....
بس على فكرة :: سلطونين .. هيه الزواج غيرهــم .. مب في بدايتــه :no0: .. و لا لأن الحرمــة سوبر وومن فقدروا عليهم :boxed: ..
لأنهم ببساطــة قرروا يتغيرون ..
الأول تغير بعد ولادة ولده الأول و اكتشافه ان ولده فيه عيب خلقي " يمكن حس ان هالشي عقــاب من رب العالمين :kkk: "
الثاني بعد ملجتــه .. يمكن لأن توه مــالج و بعدها ما راحت السكــره :hist: ،،

المهم بتيكم الأخبـــــــــــار
مراسلتكم
:ice:

[لمّــاح]

عدنا ..:ice:

انا شخصياً اشوف الزواج بالذات هو اكبر موقف يخلي الانسان يتغير .. الزواج عبارة عن النقلة النوعية في حياة الانسان عشان جيه معظم الآمال و الاحلام مرتبطه بالزواج و مابعد الزواج ..

معظم الردود الي قريتها هي من عند البنات و الامثلة من واقع البنات و الاخت تنينه ذكرتلنا موقف جداً حلو ولو الواحد يتمعن فيه بيشوفه واقعي و منتشر وايد لكن يمكن الخطيبه ماتدري بأن خطيبها أصلا يرمس ..

بالمقابل .. شي وايد شباب ينغشون في البنيه ( يعني الادوار مثل ماهي لكن الشخصيات تختلف الولد مكان البنت الطيبه و البنت مكان الولد الصايع ) و خصوصاً البنت صعب ان الواحد يكشفها و يااامااااا سمعت عن بنات طلعو ويا شباب قبل العرس بيوم اونها آخر طلعه قبل الزواج وياما سمعنا وياما سمعنا ..
و بخصوص الشاب الي في مثل حالة سلطان انا احس انه بيتغير .. صح مب 100% لكن هناك فئة لاباس بها بتتغير، هذا على حسب الي اشوفه ..

[حلم الطفوله]

السلام عليكم

دكتورنا الحساس.... كما ذكرت بردك....

بالمختصر .. نعم الزواج يغير وتغيرات كبيره .. لنسبه كبيره من البشر .. بس ماننسى انها هب قاعده لان في نسبه ماياثر فيها..

المهم التغيرات يمكن تكون للاحسن ( وهذا الغالب) ويمكن للاسوء (وهذا النادر).

يعني سلطون يمكن يتغير ويمكن يحول حياة مريم لجحيم لا يطاق ....

والسبب الأول الأهل إلي وافقوا إنهم يزوجون بنتهم لواحد عارفين عيوبه ....

بس أملهم يغيره الزواج ! الله يعينهم هم الاثنين

أخوي لماح

المقوله تقول : الشيطان أستاذ الرجل ولكنه تلميذ المرأه ...هذا توقيع منصوري دولتنا:smartass:

وجهة نظرك وااايد عيبتني وطريقة تحليلك للأمر من كل أبعاده أكدت لي إنك متفهم للموضوع

إنك لا تهدي من أحببت ولكن الله يهدي من يشاء ....شيء أكيد ..ولكن الانسان لازم ياخذ بالأسباب بعد

يعني هالتفكير القبلي الموجود بسالفة ولد العم لبنت العم ....

وممنوع حد يقرب صوب لبنيه إلا لما يرخصها ولد العم ! :nono:

هذا التفكير انا ما أعترض عليه يمكن لعيال يوافقون على بعض ويتياوزون

بس لما نشوف هالعيوب كلها بسلطون ونشوف الأهل وهم يجبرون مريوم تاخذه أكيد ما بنداني هالتفكير

المشكله يا لماح إنه الكل الحين عايش على أمل إنه سلطان يعتدل ؟ وإنه حرمته والحياه تغيره للأحسن

بس لو ما استوى هالشيء من بينظلم بالنهاية ؟ حياة هالاثنينه بتكون عذاب ! :fa36:

نظرتك لحرية الاختيار وبأخذ راي البنت جدا أحترمها فيك ....شاكره مرورك

[لمّــاح]

المقوله تقول : الشيطان أستاذ الرجل ولكنه تلميذ المرأه ...هذا توقيع منصوري دولتنا

وانا اقــووووول وين ماره عليه هالجملة ثره من هنيه .. لأني دورتها مالقيتها في الكمبيوتر عندي قلت اكيد سامعنها عيل :harhar1: أسميييني


المشكله يا لماح إنه الكل الحين عايش على أمل إنه سلطان يعتدل ؟ وإنه حرمته والحياه تغيره للأحسن


اختيه هالجملة مقتبسه من ردي الثاني و اقدر اعتبرها أيضا رداً على آخر تعقيب لج ..


شخصياً اشوف الزواج بالذات هو اكبر موقف يخلي الانسان يتغير .. الزواج عبارة عن النقلة النوعية في حياة الانسان عشان جيه معظم الآمال و الاحلام مرتبطه بالزواج و مابعد الزواج ..

و صح في النهاية هو مجرد أمل مب شي اكيدين منه انه بيستوي ..

دمتي بود اختيه حلم .. :yes:

[حلم الطفوله]

السلام عليكم

الفارس 2000 ....اسمحولي أكيد برد للباقين:yes:

ما شاء الله عليك فارسنا بو مها ....دومك راعيهاااا:fa35:

مريوووم بروحها يبالها موضوع على سوالفها ! بنسميه ...مريوم بتتغير!

أكيد لو بدلنا بالأدوار بنشوف هالنتيجه بعد موجوده بمجتمعنا ...

مشكلتنا الحين مب بين سلطان ومريم ... ومن فيهم الزين والشين ...ومن بيعتدل ومن بتسوء حاله

المشكله موجوده في مجتمعنا .... وطرحها واجب علينا عشان نعرف وجهات النظر ونحاول نتوصل للحل

شاكره مرورك أخي الكريم ...

[حلم الطفوله]

السلام عليكم

إختييه قرموشه ....

وجهة نظر أعتز فيها صراحه وتغييرج رايج فجأة يدل على تفكيرج بالموضوع اكثر من مره ...

وكانت الخلاصه النهائية لحديثج ...

هـل ممكـن سلطـان يتغير على يد مـريـم
هيـه نـعم ممكـن وهذا يعتمـد على شطـاره مـريـم بالتأكـيد

شاكره مرورج وما ننحرم:fa35:

الأسطوري

ما شاء الله عليك ذكرت عدة مواضيع في ردك ... كل واحد منهم يباله موضوع مستقل بذاته
آرائك للموضوع بشكل عام منطقيه ... شاكره تواجدك ومرورك أخوي

[منصوري الدوله]

هــلا والله اختــاه حلم الطفولــه :

والله يا بنتي صدقتـي يعنـي والله والله البنـات مظلومـات يعني الريـّـال عقب مايشبـع ويربـع ف ارض الله الواسعـه يبى بنت ( كيوت ) ومسكينـه وطيبه ومـا جد رمـّــســت قبـل !!!!

بنتي يا حلـم : برايهـم اللي يجبـرون بنت على بن عمها ؛ بعض الناس يعايـرون البنت ف الانســان اللي ارتـاحـت لــه ويتمـون يقولون لهـا ف كل مناسبه تختلف فيها مع زوجهـا :

( لو خذتي لج ولد فلان والله جان احسن لج ) ؛؛

بصراحـه بالذات موضوع الزواج الاجباري وبنت العم لولد العم هذي تخلـّـيني انفعـل واعصــّــب واقلب الكيبورد ع بطنـه واضربـه بعد !!

والله وايد هالمسأله تخرّب ع نــاس يعني حتى نحـن الشباب ( المحايديـــــن ) نتوهـّــق يعني اذا بغينــا وحده ؛ يروحون اهلها يسألــــون ولد عمها : هــا تبى مريوم ترى فلان بن فلان يخطبهــا ؛

وعاد تعالي يا ( حلم ) شوفـي كيف نفسيـة هالـــ(ولد عم ) يعني اذا كان من النوع الخايس اللي يبى يخرب ترى والله يروم ونحن ساعتها ناكل تبن ( شي نفس الكورن فليكــس لاتشغلون بالكم بـه ) ؛؛




( برجع وايد ) ..

[منصوري الدوله]

ليش يعتمد ع شطارة مريم ليش ما الاخ سلطان يعتدل روحه ليش الاخت مريم مصلح اجتماعي ولا زوجه ولا شو هو نسى انه بياخذ بكر عذرا مايخصها ف الحياه وين بتعدل ريـّـال ذوو خبره ؛

نسيتو المثل اللي يقول :
الخيال من خيالهـا والحرمه من ريـّـالهـا ؛

مش الريال من حرمـتـه ؛؛

عصبتوبي تراكم ؛

[حلم الطفوله]

السلام عليكم

تنينه في موضوعي ...يا مرحبا يا مرحبا:kcl:

إختيييه قصة مايد وبنت وخالته تعتبر قصه عاديه جدا ....قولي ليش؟

أغلب الشباب يكلمون بنات :boxed: ....

ودام هو ما أنكر معرفته بهالبنت وخبر اخته بالموضوع وأكد إنه بنت خالته ما تسواهم كلهم!:fa35:

يعني هو متمسك فيها ....لأنه تفكير الولد شوي مختلف ... يكلم عادي بس ما ياخذها ...

وصدقيني بعد العرس بيصطلب وبيعتدل وياها ... لأنه ما بيتفرغ لهالسوالف وهيه وشطارتها:yes:

قوليلها لو سرتي فوق ورديتي تحت بتاخذينه .... وأكيد ميود بيعتدل:doh: ...

شاكره لج مرورج ورايج إلي أسعدني

الغاليه

الصراحه حطيتي حطه على سلطون ....بس ما عليج دواه يستاهل ...عشان يعتدل عقب العرس :qor9anah:

ومثل ما قلتي كل شيء بالنهاية قسمه ونصيب:fa35: شاكره مرورج أكيد ومشكوره على ردج


ريم ريم ....شيخة البنات والحريم:ttmasha:

ذكرتيلنا ثلاث مشكلات للموضوع ...

بس بعلق عالثانيه ...بخصوص تربية الأهل ...

الأهل ساعات ما يقصرون ويحاولون يربون عيالهم أحسن تربية ...بس الولد يتأثر برباعته وبمحيطه وايد ....فمستحيل يلاحقونه وين ما يسير ....

الله يهديهم يا إختيه ...وشاكره مرورج وردج

[حلم الطفوله]

السلام عليكم

لحظه لحظه يا طفلة رادتلج ...بس خليني أهدي من أعصاب أبوي منصوري الدوله:fa38:

أونه قابضلي بنتي:kkk:

منصوري الدوله في دارنا .... ولا ومعصب بعد ...تفضل:ice: هد أعصابك ...

صدقني لا سلطون ولا مريوم يستاهلون انعصب عشانهم ! :puppyeyes: بيعتدلون عقب العرس

فيك الخير يا أبوي يوم وقفت ويا مريوم .... غمضتني ... عقدوبها بحياتها ...وأنا وياهم:boxed:

بس إن شاء الله تطلع هالمريم هاديه وكيوت وما رمست حد ....عشان نوقف وياها ونشد من أزرها:doh:
شاكره مرورك ماي برذر ....

[منصوري الدوله]

تنينـه عجيبــه ؛
سجلي اعجـابـي هنـا والموضوع بصراحـه ياحلـم وايد وايد زيـن ؛؛
بس قلـّـبـتـي علينـا المواجـع ؛؛
ماقلتي لي شو اريج ف سالفة الاستشاره لولد العم يعني البنت يوم تنخطب يسيرون لولد عمها ويشوفونه اذا يباها ولا لا ؛؛
يعني لو كان يباها اختربت السالفه
واذا مايباها ترى العرب تقول ( لو فيه خير ماعافه الطير )
حيـــــــــره هالبنـــات 0 ماي سستــر 0

[نبراس الليل]

السلام عليكم ورحمة الله وبركاته



طرح جميل منك اختي الكريمة وشدني كثيرا



أولا اللي مايصلي مايجوز نوافق عليه لأن حكمه بيكون حكم الكافر لأنه تارك الصلاة والفرق بين المؤمن والكافر الصلاة


وثانيا ...مب كل لعاب بعد الزواج إعتدل ياما ناس إختربوا بزيادة ودمروا




ثالثا ماتلاحظون شي إذا الولد كان ولد العم أو العمة الأبو يبيع بنته برخص الأثمان لولد أخوه لو كان فاجر

وإذا الولد ولد الخال أو الخالة الأم تبيع بنتها بأرخص الأثمان لو كان فاجر


الإعتدال والتوبة لازم تكون قبل الخطوبة والزواج



وعلى حسب علمي التوبة والإعتدال يبنيان على الإرادة مش الزواج



والطيبون للطيبات والخبيثون للخبيثات


وعن نفسي إذا أحد خطب عندنا وكان مثل سلطان نجوم السما أقربله حتى لو كان ولد عمي




والسموحة على الرد السريع الغير مرتب




طارق

[الشوق]

السلام عليكم ورحمة الله وبركاته
موضوع جميل وطارحته اجمل ..
المشكله ما تكمن في بيعتدل حال سلطان او حتى لو جلبنا الايه بيعتدل حال مريوم
المشكله في ...
تقاليد بعض الاهل المتزمته منذ الصغر ...
لازم البنت تاخذ من الاهل
اوكي وين المشكله في هذي ..
المشكله ان( الولد وين رايه في الموضوع من اساسه ) ..
يعني لو البنت ما رامت اتقول لا خوفا من معارضة الاهل ..
لو الولد ما يباها ... ليش في الاصل ياخذها
انزين
.
.
.
سؤالي يقوول ((معقوله في رياييل صدق ينجبرون ع الزواج هالايام )) ..
.
.
المشكله ان
في واحد كانوا محيرينه لبنت خالته ولكنه كان يحب وحده ثانيه
واتزوج بنت خالته (( يقولون من غير ارادته )) وتكاليف الزواج كلها كانت ع الاهل (( لان اصلا من الاساس ما كان يباها .. واهله عارفين هالشي ...
واتزوج اللي بغاها بعد شهرين من زواجه من بنت خالته ..
وقام يعدل في الحالتين ...
لكن عقب ما صارح اهله عن زواجه بالثانيه اللي هي حبيبته
قامت الدنيا ولا قعدت ... الزوجه الثانيه تنتظر المولود في الطريج
واهله مصرين على طلاق الثانيه
وحرمته الاولى ربت .. وهي مصره يا انا يا هذيج
.
.
الريال علق زوجته الثانيه
مايروم لا يطلقها ولا يروم يردها
محتار بين امه وخايف على صحتها ..ومتأمل رضاها
.
.
والحل ..
سواء حال مريوم او سلطون يعتدل او هذا غير هذيج او هذيج غيرته
او رامو يسوون شي في تعديل الوضع او لا
في النهايه كل شي مقسوم مكتوب
محد راح يفر من المقدر والمكتوب
.
.
حلم تراءى قلمي للكتابة لفترة
لكن موضوعج وردود الاعضاء بعث بحبر جديد لانعاش ما قد مر بي من زمن في الاختفاء ..
تحياتي / الشوق

[أتمنى]

بصراحه اعتبرة تخلف
لا يرضى به الدين و لا العقل ..

~

و اذا الارادة ماهيب موجوده للتغيير
فما أتوقع ان زواج أو امرأة ممكن يغير شي

مريم تقدر توّصل للرجال بأي طريقة
انها غير راغبة فيه و أتوقع مهما كان اصرار كلا العائلتين
اذا كان الرفض من البنت و الولد فمستحيل يرضون فيه

يعني برايي البنت أو الولد اذا كانو غير راغبين بهذا الزواج
مو المفروض يسكتون على أمل ان حاله يتغير !!
أو انه بيعتاد على الوضع !!! هذا زواج ماهوب مغامرة

للأسف ان المواضيع هذي ما زالت موجودة في الخليج بشكل عام
قلت بنسبة كبييييرة نعم
لكن للأسف ما زالت موجوده

~

يسلم قلبك الغلا

[تحفه]

وحده من الي اعرفهم وياي في الجامعه .. كانت تحب واحد بس هالواحد يقولون لكم مايروم يكسر رمست امه .. ودر هالبنيه .. وتزوج وحده امه اتنقتها له .. بعد شهرين بالظبط من ملجته و طبعا يوم حبيبته عرفت انه ملج قطعته معنه كان يبغي "يواصل" علاقتهم جنه والله مب صاير شي!! .. مادري اشايف بنات الناس لعبه
الموهيم

يقولون لكم يوم شاف انه مستحيل يتواصل معاها .. سار يترجى ابو البنت الي كان يحبها قبل لا يتزوج بانه يسمح له يخطب بنته .. وطبعا اختها عرفت ان "حبيب اختها الي خلاها واتزوج الي امه تباها" موجود في الميلس وي ابوهم .. فقامت وقالت حقها ان أكوه تحت في الميلس يقولون يبي يخطب .. بس وين الي يرضى عليه بعد عشرة العمر يبيعها .. قامت ودخلت الميلس وظهرته وطردته من بيتهم جنها تكش قطو

والله الزواج مرات يصير مصخره .. ألله يهدي الجيلين

[تحفه]

اصلا شو هالتخلف .. شرط من شروط الزواج موافقه البنت من دون اجبار على الزواج .. واذا هالشرط ما صار يعتبر الزواج باطل ولا؟

[حلم الطفوله]

السلام عليكم


إختي طفله من هذا الزمان ...


سلطون ! يمكن يعتدل ويستوي أحسن من ناس وايد تغيروا بعد الزواج للأسوأ :fa36:

سلطون جدامه الدنيا بكبرها وواقع أكبر وبنت عم لازم يراعي ربه فيها ... يمكن يعتدل ليش لأ؟!

ويمكن على كثر مالناس تطريه وتتغمض على مريم إنها بتاخذ واحد مثله ينتكس زياده ...يمكن ليش لأ!

مريوم ... بنظري ما تستاهل ... مب لأنه ولد عمها ينفرض عليها فرض ...

ولا هيه تجربه بنعرف عقبها جان سلطون بيعتدل وإلا لأ؟

ها البنت انسانه وهالأفكار إلي سمعتها عن هالولد وإلي عايشتها طوال هالسنين بتنفرها منه!

البنت منا لما تنخطب ... ما تنعق منيه والدرب ...الأهل طبعا يسإلون عن هالولد ...

بعد ما يكونون أهل الولد سئلوا عن البنت كذلك ....

البنت منا تحس بالفخر بريلها ... هالانسان إلي بتاخذه ...ولكن مع سلطان تحول الفخر لخزي وخوف !

صدقوني ...حالة سلطان ومريم موجوده في واقعنا .... وحالة الأهل إلي ايوزون عيالهم على أمل يعتدلون عقب العرس بعد موجوده ....

بس إلي مب موجود هو التصور لهالزواج ؟ شو بيكون مصيره!:unlock:

بيعتدل الولد وإلا بترد مريم مطلقه .... لأنه كل محاولاتها فشلت مع سلطان !:kkk:


طفله لا تنسين:ice: ...خبريني عن سلطون الثاني إلي ملج ....عقب العرس بيتم معتدل وإلا لأ؟!:qor9anah:

منصوري دولتنا ....

من أيام تحديدا .... انتهت مهزلة هالتعصب القبلي مع وحده أعرفها :boxed:

البنت درست وتخرجت وتعينت ... وإلي يتقدم لها يكون الجواب ....البنت امحيره لولد عمها ...وهكذا دواليك ...

بس ولد العم ولا سائل ... مع إنه يقدر يعرس اليوم قبل باجر .... بس بعد امطنش !

المهم ... الأبو بروحه شاف حال ولد أخوه ....صحيح إنه الولد ما ينعاب والكل يشهد فيه ...

لكن بآخر مره اتقدم لبتنه ريال زين ...عطول الأب وافق ....وخبر أخوه بإنه بنته انخطبت ! :puppyeyes:

الكل اندهش ...بس احترامي لهالأب الحين زاد ...

يوم أدرك أخير إنه بنته مب عنز بتتريا ولد العم لين يفتكر ويتقدم رسميا !

فهمت قصدي يالمنصوري ؟؟؟

فيه ناس عدهم شريعة الغاب:boxed: :bow: البنت لولد عمها ...

والبنت أول من تعلم وآخر من تشاور ! يعني مثل القيد :sadwalk: .....

مصيرج ولد عمج حتى ولو ما تبينه ولا هو يباج ! المهم منا وفينا !

وفيه ناس اتشاور البنت .... حتى ولو بقرار البنت بيخسر الأخو اخته أو أخوه ...المهم قرار البنت !

وبعدين الحياة قسمه ونصيب .... ودامها مكتوبه لك بتاخذها بتاخذها ورجلك فوق رئابتك:doh:

[حلم الطفوله]

السلام عليكم ورحمة الله وبركاته

أخوي طارق ...نبراس الليل

زين يوم شدك الموضوع أخوي ...مستوي كاسبر ما تنشاف بالواحات:kkk:

رايك هو عين العقل ....يعني الانسان لازم يفكر بعقله ويسأل عن الولد إلي متقدم للخطبه ...

وأكيد محد يرضى يزوج بنته ولد مثل سلطون :boxed: حتى ولو كان ولد عمه أو خاله

شاكره مرورك

الشوق ....يا صاحبة الذوق

أولا : فرحانه لأنج رديتي للواحات ورديتي على هالموضوع:fa35:

ثانيا : والله القصص هاي منتشره بواقعنا .... والمشكله اجبار الولد ياخذ وحده من أهله وهو ما يباها

ذكرتيني بسالفة وحده الله يذكرها بالخير ..عدها ولد صغيرون :doh: ...

تقوله من الحين دورلك وحده .... ويوم بتكبر خبرني عشان أخطبلك إياها وتفكني من غصة التدوير:boxed:

أوبن مايند هالحرمه:ice: الله يعطينا العمر وأشوفها وأحضر عرس ولدها إن شاء الله:fa38:

ثالثا: شاكره مرورج :yes: والله يوفقج واتمييين بالواحات

[حلم الطفوله]

السلام عليكم

عدنا مع سلطان ! ما أدري ليش أتذكر سعاد عبدالله يوم تقرأ الجريدة وتشوف صورة ريلها بمسلسل خالتي قماشه وتقول ,,,سلطان تزوج:boxed:

هالكثر امعلق المسلسل بعقلي:kkk:

المهم عدنا ما ردودكم ...

العزيزة أتمنى ...

هو تخلف أكيد ...بس موجود بواقعنا ... وإلي بتحاول ترفض هالشيء بتواجه صعوبات

يا تنحل يا تغرقها وادور فيها وبالأخير بتاخذه غصبا عنها سواء رضت أو انرضت:doh:

الزواج حياة ..وبالشرع لازم شرط القبول ...وبالنهاية هالذنب الكبير بيتحمله الأهل أولا وتعاسة عيالهم ثانيا

مشكلتنا الثانيه ... لو البنت قالت وأصرت ما تباه ... يشكون فيها أحيانا ! أكيد حد ببالها:boxed:

ولو اصرت وقالت ما أباه لأنه فيه كذا وكذا وكذا ....ووصل الخبر لعريس الغفله ...

يمكن يعاند عشان يأدبها على هالكلام يوم بياخذها :puppyeyes:

ولو أصرت ووافق المعرس ولد العم المصون .... محد بياخذه لسيرته السيئه !

يعني نحن عرب وبنحط كل الإحتمالات الزينه والشينه ! بس كله على حسب تفكير وعقلية الأهل :yes:

شاكره تواجدج ولج كل الغلا يا الغلا:kcl:

بوظبي ...

جان عن تخلف هو تخلف ! بس صدقيني يصير وبأعقل العايلات جان تدرين:qor9anah:

[انامل]

عليكم السلام جميعا
موضوع روعه مثل هذا كيف فلت من أناملــــــــــي:doh:
حلم يخرب بيت شيطانج
انتي وين عنج برامج التلفزون والإذاعه
عليج اسلوب تبارك الرحمن يخبل
حليلك يا سلطان:boxed: طاخ أقصد حليلج يا مريم:boxed: :boxed: طاخين حليلج يا حلم:qor9anah:
يا عزيزتي يقال ان الانسان ضحية بيئته
مالوم كل اللوم على هذا الوسيم سلطان
كل ها النواقص فيه عيل وين كانو هله
باباته
ماماته
ربعه جيرانه خلانه اخوانه
لا انكر ان امثاله حالة يرثى لها
محد كامل
ولكن لا شي مستحيل في هداية سلطان:boxed: اخ زين لا تقرصين:nono:
حلم
اذا تهاونا وابتعدنا عن سلطان بس لانه فاسد ما منه فايده فهنا المشكله الاكبر
ربما سيكون مستقبلا آفة تفسد العديد العديد من الجيل القادم
ترك الحبل على الغارب لسلطان
والحين عقب ما فات الفوت ما ينفع الصوت
لا ينفع من قال ما ينفع:boxed: اذا قطعنا الامل راح سلطان وراح مستقبل فرد في المجتمع اذا وقفنا معاه ربما صار ها الفرد نبراس ينور حوله ويهدي امثاله
وكثير هي قصص الشبان والشابات اللي كانوا ضحايا الظروف وسقطوا في افخاخ الخطا ولكن سبحان الله
الهداية من الله واسبابها بعض البشر
ومريم بتلقى غيره ربما احسن من سلطان
بس ولد العم سلطان وين بيروح ان تخلينا عنه
اذا ابتلى عضو من جسدنا سيده نبتره يا حلم والا نبدا بالعلاج
يا قمر موضوع حلاته سردج
عجبني
وايد
وايد
لا خليت منج
مريم يا بنت العم ادعي لسلطان وامثاله
الله يهديهم قولوا آمــــــــــــــين
كلي ود وحب
أنامــــــــــــــل:kcl:

[أمواج]

ثانيا : والله القصص هاي منتشره بواقعنا .... والمشكله اجبار الولد ياخذ وحده من أهله وهو ما يباها



. . .
.
.
مرحبــا وسهــلا . . .
حــلم الطفــوله
لازم اخبــر ســلطان عليــج و أقــوله في وحده قاعده تحــش فيــك
أنــا ويــاج إنه هالقصص منتشــره عدنا بس ماوصــلت لها الحد إنه الواحد ينجــبر على وحــده مايبـاها صح هالكلام يصيــر بس مب فـ وقتنا الحـالي ، قبــل كان الواحد من يقـوله أبوه فلانه بتاخذها ينجعم و يسرط لسـانه ولايقول لأبوه لا . . . بس الحين الوضع تغيــر

ومشــكله ســلطان عويصــه وايد . . بس مب جنــج زدتي الجيــله . . ؟!
يعني في خراب بس مب لهالدرجـــه . . خيبه هذا خربان من راسه لين صبع ريــله مافيه شي زيــن . . .
فكيـــف أبو ســلطان يرضى يزوج ولده وهو بهالسؤ لــ بنت اخووه . . والله مابتهوون عليــه ولو هانت عليــه وين أهـــل البنيـه ليش راضين عن هالموضووع و لا كـأنه بنتهم ويخافون عليها . . .؟!
وبعدين فــ لنفرض إنها تزوجته وطاح الفاس فـ الراس بإمكانها تغيــره ياما ناااس كانوا خرباانين وعقب العرس اصطلبوا و قاموا يعرفوون درب المسيــد واصطلح حالهم ، كل شي بقدرة قادر .
.
.
سايره اخبر عليج سلطان

[حلم الطفوله]

السلام عليكم

:puppyeyes:

أونه! انامل في ديارنا :fa34:

صدق الله يخرب بيت شيطاني عافد عفده عالواحات هالأيام:boxed:

شو أسوي يا انامل ....سلطان عقد بمريم ومشكلتهم عقدتني وشكلي عقدتكم فيها :doh:

وأتمنى من كل قلبي يعتدل ويصطلح حاله عشان هالمريوووم إلي من تسمع طاريه تصيح صياح !

الله يهديه يارب ...واكيد ماشيء مستحيل على ربنا ...والواحد ما بياخذ إلا نصيبه المكتوب له

:fa38: إن زين لا تقرصين .... مشكوره يمامتنا على العوده والمرور:fa35: ....

ما ننحرم إلهي من وجودج:yes:

[حلم الطفوله]

السلام عليكم

أمواج ...او كما يطيب لي مناداتك دائما ...المتفيزره على العرقوب ...يا حيها والله:fa35:

لا تخبرين علي سلطان ولا تتعنين ! ناويه علي بنيه قشرا! :narr: روحج شايفه حالته مب صاحي

إختييه ...يمكن أكون بالغت بصفات سلطان ...بس حطي ببالج الشين يتبعه الشين

الله يهدي هالنوعيه من الشباب والأهالي ....

بس ما أوصيج جنة السلاطين منازلهم ! يعني خلي سلطان مرتاح ولا تخبرينه:boxed:

شاكره مرورج والحمد لله على السلامه

[انامل]

أفا عليج حلمنا
كم حلم عندي أنا:kcl:
لا خليت شطانتج:ttmasha:
الله يعين مريوم ويصلح سلطون
من يدري لعله خير
وياكثر السلاطين والمرايم بها الحال يا قمــــــــــر
حلم
مالي بد عنج فديتكم
آخ ياربي قرصتج تعـــــــــور:boxed:
مساء الحب والألفه:sad4: :kcl:

[مملوح الوصايف]

السلام عليكم
أسجل إعجابي بالموضوع ولي عودة :)

[دلع امونتي]

سلطان في عالم الخراب والبنت فعالم الطهاره

فحرام تضيع البنت حتى لو بيعتدل حرام يسووبها جي

البنت لها راي بعد عيل ليش يابوها لهالدنيا عسب يفروها لواحد ما يسوا

الله يعين البنت اللي بتكون من نصيب هالاشكال

[اصايل]

هلا و الله حلم تسلمين على الموضوع الغاوي
اذا كانت مريم ذكية و ترووم تغير صفاته النص كم (الشينة) ممكن يمشيها شهر شهرين ثلاث بس هو متعود على هذي السوالف هذي lifestyleماله يعني ما بيتحمل يعيش طول الحياه بدونها..اذا اهله ابوه و امه ما ربوه على الصلاة و تحمل المسؤولية من هو صغيرر الحييييين بتيي الحرمة و بتعلمه على هالحيااة
اكيد قلبه و فكرة متعلق بهالسوالف و سوالم

[ألـم]

الصراحه الموضوع وايد حلـو ..
بس وجــهت نظــري أنه الحرمه مستحيل أتغير في شخص عنده عادات منغرسه في قـلبه ..
ألا أذا كان الريال يــسوي هالشيء وهوه أصلا مب مقتنع فيــه يــعني بــس مجرد تــسليه ..
والا اذا كان الريال تفكيره مب ذاك التفكيــر الصــحيــح يمكن ..
أما الحرمه عمرها ما بتقدر أتسوي شيء ,, الا أذا الحرمه تقــنع في هاي الحرمه يمكن تقدر أتسوي شيء ..
وأصلا في وايد حريم ما يهمهم ريايلهم شو يسون أهم شيء هي عايشه مرتاحه وعيالها عايشين مرتاحين خلاص عند هااه الحد أنتهت عندها الدنيا ** ( عافان الله ) ** ..

[أمرين]

تسلمين على الموضوع الحلووو