آآآآخ يالقهررررر

[قرموشة]

مـا اعرف كيف أبدا .. وهاي أول فضفضـه لي هنه ..
انا مب من النوع اللي يحـب يخـبر الناس باحـاسيسه .. وماجـد جـربت هـ الشي ..
ما أدري كنت أحـس انه اللي يسوي جذه معناتـه انسان ضعيييف وما عنده شخـصيـه وما يقدر يحـل مشاكـله بنفـسه
لكـني تشجـعت .. بعد ما شفت وايد غيري فضفضوا ولقوا الحـلول عندكـم ..
وخصوصـا اني عشت هـ اليوم وفـعلا ما لقيت الحـل عند نفسي ... واكتشفت اني أضعف من ماكنت أتصـور ..
مـشكـلتي هيه طيبـه قلبي .. ووايد ناس حـذروني منها ..
كـم مواقف تعييسـه ما أحـب أذكـرها وطحت فيها والسبـه طيبتي الزايده .. كـم غلطت وسهيت وكانت الطيبه أساسها ..
يمكـن مب طيبـه .. يمكـن عبط وعدم ادراك !
مـرت على الغلطـه يمكــن شهور و أعــرف اللي سويتـه غلــط .. واعترف لكـن في المقابل قدرت أصـحح غلطتي .. وأكـبر في عيون الناس.. لكـن ليـن ألحـين أذكـرها لا .. انا أحـاول قدر الامكـان اني انـساها وأتخـادى عنها .. لكـن للأسف يذكروني فيـها .. بالرغـم من هذا احـاول أقنـع نفسي بأن اللي سويتـه صــح ..
أنا متـأكـده انه صـح .. لان المـوضــوع انتهـى على خـير ..
لكــن القهـر لمـا أشخاص و من أعز ناسك يذكـرونك بــها .. رغـم انك تثق فيـهم الثقـه العمـيا اللي ما جد عطيتـها لحــد
للأسف المـوضـوع انذكـر يدامي أكـثر عـن مـرة وحـاولت أغلق السالفـه .. ووحطيت في بالــي اني انا لمـا بكـون مستعـده بقـولها ومـن دون تردد لانها لين الحـينه تضايقني .. ومـا أداني أييب طارييها ..
لكـن للأسف ! يستمـرون ويستمـرون ولا كنـه الموضـوع يعنيني انا أو انـه يسبب لي المغثـه !
والله يا جمـاعه الخـير هـ الناس ما يهـونون عليـه ومـا أروم انـي آخـذ بخـاطري لنـه لان الدنيـا ما ترزى !
بس هـ الشي يقهرررني ويغصص فيني .. وزياده عـن جـذه اني ما أعرف شو القـصد من هـا كـله ! بس هو تذكـير بزلـه مضت وندمـت عليها شهور بأيامهـا ولياليـها ! والا شي ثاني ..

والله الدمـعه مـرسـومـه في هـ العيـن وهذي حـلفـه ..
ولين الحـينه تراهـا محـبوسـه .. وبتظـل مـرسومـه لين ما ييها يومها وتنزل
واسمحولي أحـس كلامـي ملخبط بس هـ اللي قدرت عليـه وإيديني ترجـف ..

كـل الود
:)

[خيال الحب]

السلام عليــكم


افا عليج اختي قرمووشه

خلج قوويه الشيخه :)

ولي رجعــه ان شاء الله ..

:yes:

[مجموعة إنسان]

افا عليييج قرموووشه ..
ما عااش من يضايقج ..
الحيااه حلوه والله
وما يحتااي تضايقين نفسج عسب نااس ما تستاااهل ..
صدقيني انا واااحد مثلج تقريييبا .. طيييب واايد
واايد ناااس يستغلوون طيبتي او يطلبوون مني شي وانا انفذه لو كاان صعب علي .. واخر شي يتكلموون من ورااي اني انا ما ساعدتهم وانا ما احب الخيير لأحد ..
بعطييج مثاال .
انا قدمت على شركه وقبلووني على اني اتفرغ في الجامعه .. بعدها في واااحد يقربليي حيييل سار وقدم في نفس المكاااان .. انا من نفسي بدوون محد يقوولي سرت وحااولت في الموضووع عسب يقبلوونه بس هو نسبته في الثتنويه مب عاليه .. ف مااقبلووه
تخيلي ان هو واهله شبهوني باليهوودي لأن احب الخير لنفسي وما احبه لغيري ..
وطع وايد كلاام عني ان انا اللي خربت عليييه ..

يعني هذا مثاال من اقرب النااس لي ما بالج من ناس تجمعج معااهم صدااقه او علاقه اخويه ..!!

نصيحه
خذي الحيااه بسهوله ولا تضاايقيين من هالنااس ..

والسموووحه اختي ..
يمكن فسرت موضووعج بطرييقه خطأ
او اني ما فهمت الموضوووع ..

[طفلة من هذا الزمان]

ابــــدي من لا شيء .. من اللحظــة هذي اللي تمرين فيهـا و ابني على احساسج ،،
انتـــي .. نفســج .. شخصج .. أهم ما في هالمــوضوع ..

أختــي قرمـــــوشة ،،

انتي الشخص الوحــيد اللي يحق لـه يقول أو ما يقــول اخطــاءه بصـوت عــالي .. حطي في بــالج انج موب مطالبـه بتفسير حق أي شخص .. و مب محتاجـه لتبرير أخطائج لأشخـاص هم مب طـرف في المـوضوع مهمـا كانت درجـة قربهم منج ،،

أخطـــــائج لــج وحـــدج .. و أســــــرارج لج بـروحج .. خذيهـا من اختـــج ..

أبـــــــدا لا تعطين سرج لأي شخص .. في مثل ما يحضرني بالضبـط بس بما معنــاه
أعدائج تعرفين انهم أعدائج لكن أصدقائج ممكن ينجلبون في يوم ألــــد اعـدائج ..

معنـى كلامي .. أوثقـــي في اللي تبينــه .. هذي طبيعــة بشريـة .. محتاجـه تكونين محاطـه بأشخاص يفهمـونج .. يعلمـونج .. لوايـد أسباب ... إلا أســـرارج لج وحــدج ،، وصدقيني نحن البنــات نكبر المواضيع كل شي عندنـا عادينه أســرار .. لكن لو ركـزتي بتلاقين انها أشيـاء ممكن تنقــال .. و أشيــاء لا ....

كـلامي أعــلاه سببــه هالسطــر قدرت أصـحح غلطتي .. وأكـبر في عيون الناس و أشيـاء أخرى وصلتني من سطورج ،،

عــزيزتي ،،
كـوني طيبــة .. طيبـة جــدا بعــد .. لأن ربـج يحبج ،، وخصج بهالصفــة ..
فقــط كوني حــذرة .. إذا طيبتج وصلتهم لحــد الاستغــلال ،، هني قولي لنفسج Stop ..
أبــدا لا تبررين لنفسج أفعالج بجملـة " يمكن انا عبيطـة " مبين عليج انج ذكيـة و فاهمـــه ...
و على فكـرة كونج تتكلمين عن مشاعرج مب معناتها انج ضعيفــة .. اللي يقدر يتكلم عن مشاعـره قوي جــدا لأنه فاهم نفسـه عزيزتي

لي عــودة عشان اعطيج الخطوات الست للتفــوق العاطفـــــــي يمكن تفيدج بشــي و تخفف عنج ،،

دمتــي بــود،،

[الاسطوري]

السلام عليكم ..

اللي يفضفض مب انسان ضعيف ولا شي بالعكس كل انسان يحتاج انه
يتكلم ويطلع اللي فخاطره لأن كثر الكتمان يولد الانفجار بقوة
في يوم من الأيام وبطبيعة الانسان بمجرد
مايلقى بس حد يسمعه
يحس براحه
نفسيه ،، وبني آدم خطآء ومب معصوم والشاطر اللي يتعلم من أخطائه
ويستفيد من تجاربه اللي يمر فيها ويطلع منها بخطوة إيجابية
نحو الأفضل في المستقبل بس الأشطر اللي
يتعلم من أخطاء غيره وهالنوع
نادر لأن نحنا مانتعلم
إلا يوم نغلط ونتعور ونحس بالألم ودايما نحب نجرب حتى لو كنا نعرف إن
هالدرب فيه أشواك ،، إرضاء الناس غاية لاتدرك ومهما تسوين
وتحاولين ترضين الناس اللي حولج لازم بتلقين
حد منهم مب راضي واذا كانوا
يضايقونج بكلامهم
وصعب انج تمنعين هالشي بسهوله الاحسن انج تواجهين الموضوع بقوه
شويه وتثبين على موقفج وماتخلين هالأشياء الصغيرة تهزج
أو تأثر عليج سواء من قريب أو بعيد ألين ماتبرد
السالفه وتوقفين على ريلج مره ثانيه
وتكونين شامخه رغم
كل الظروف
:ttmasha:

السموحه منج

الاســـطـــوري
أخوكم

[لمّــاح]

السلام عليكم ..

بصراحه لو كان عندي رد ماضني بيكون احسن عن رد الاخت طفلة من هذا الزمن ..:yes:


اذكري الله .. و بكون متواصل في هالموضوع ..

لـي عودة بإذن الله ..

[قرموشة]

خـيال الحـب
أترقـب عودتك يا خوي :)

هواجـيس مشـتاق

وما يحتااي تضايقين نفسج عسب نااس ما تستاااهل ..
لا يا هـواجـيس .. الناس هاي لو ماكـانت تهمنـي ما كنت بكـتب هـ الكلام .. كنت بفـر كلامـهم بحـر
وبسويلهـم طااف .. لكـن صداقتي معاهـم قويـه .. وعلاقـه الاخوه اللي امبينـا أقـوى
هـواجـيس شكـرا على وقوفك معاي .. تواجـدك هنه أسعدني شكـرا :)

طفلة من هذا الزمان

ويـنج عنـي من زمــــــاااااااااااااان
أقرا كـلامـج هذا للمـره الرابــعه .. وكـل مـرة أكتشـف اني قلـت وصـرحـت بأشيـاء كـثيره ما كنت المـفروض أقولـها ..
لكـن صدقينـي لولا الحـايـه ما كنت أجـهرت بها ..
الطيبــه .. هاي مـشكـلتي ما أقدر أقول stop .. أعامـل النـاس على أسـاس انهم مثلي طيبيــن
ما أفرق بين هاي وهاييج .. كـلهم بالنسبـه لي انـا واحـد .. ساعـات أسوي الشي وانا عارفـه انه غلط من البدايـه لكـن أستمر بـه .. عـل وعسـى ينتهي في أي لحظـه !!
كـلامـج يا طـفلـه مثل البلـسم لي في هـ الوقـت .. برجـع لـه كـل مـا حسيت بالقهـر
لـج جـزيـل الشكـر والامتنـان واترقـب عودتج بفارغ الصـبر يا اختيه :)
أحـس اني ما اعطـيتج حـقج في الرد .. بس صدقيني كـلامـج ريحـني وااااااايد

[طفلة من هذا الزمان]

عــزيزتي ،،

ما قصدت بكلامي أبــدا أقـول انج بالغتي في كلامج اهني .. بالعكس .. انتي ما قلتي شي في موضوعج وضحلنـا شو المشكلـة .. و خفتي الحينه تكونين واضحـة و الوضوح بالنسبـة لج يعني ضعف و حساسيــة ،، صح؟
لا تندمين انج فضفضتي .. و لا تحسسين عمرج بالذنب لأنج تكلمتي .. هذي حاجــة كانت بتلبي نفسهــا بأي طريقـــة كانت .. يعني الواحات طريقــة لا اكثــر ..

بقـولج ســر ..
أنا مثلج عانيت فترة مب بسيطـة بسبـة طيبتي الزايــدة .. و لأني أبــــــــدا ما كنت أعرف أقــول "لا" لحــد ،،
بس الحينـه محد يقدر يفرض علي أي شي .. لأن "لا" قــرار انتي تتخذينـه .. انتي تقررين انج بتكونين غير .. و بتعرفين تقولين ستــوب متى ما بغيتي و لأي حد ،،

أمـــــــانة .. لو بغيتي شي أختج طفلـة موجــودة ،،
لي عــودة بعد ما ارجــع من المستشفــى ،،

طفلـــــــة ،،

[عافك الخاطر]

عزيزتي
انثري همـومكِ..أوجاعكِ .. كل ما تشعرين به هنا
كلنا آ1ان صاغيـة ..
كوني قوية ..

موفقة ان شاء الله

..
.

[قلم احمر]

اخـــ ــــــ ــــ ـــتي قرمــ ــ ــوشه


لما قريت موضوعج شفت ان سالفتج نفس سالفتي (طيبه والناس يقصون عليج ويفسرون كل الي تسوينه عن طيب نيه بشي مب زين )


انا سالفتي نفس سالفتج .. سويت شي عن طيب نيه بس اقرب الناس لي يتمون يعيدون ويزيدون في السالفه لين ما كبرت وسوت حاجز كبيـــــر خلا ان نحن نبتعد عن بعض
بس صدقيني اعطيج الدرس الي تعلمته من هالسالفه
لا تعطين اســـــــرارج حق اي انسان لو بتقوليـــــــــن هذا اقرب الناس لي انا درس وتعلمته وانقرصت منه .. خلي اي موضوع بيصيرلج تحسين انه ممكن يسوي مشكله او انه محرج خليه بينج وبين نفسج وانا جربت هالشي وتفاديت مشاكل مع ناس وايد .. وعلـــــــــى فكره خلي الكلام الي بيتمون يعيدون ويزدون فيه ويضايقج خليـــــــه مسألت تعود (جنهم يقولولج هلا اشحالج ) صدقيني حرق الاعصاب والقهر ما يفيد لان بتم السالفه فتره طويله واخر شي ما بتتحملين خذيها مني نصيحه خلي الكلام الي ينقالج جنه موضوع عاااااادي ولا تزعليــــن وما بقولج ترا مافي شي يسوا لا لان في ناس يسوا انج تتضايجين عشانهم ... والسموووووووووحه اذا طولت عليج

اخــــــــــــــتج قلــ ـــ ـــ ـــم احمر brgll:

[ولد الحكومة]

السلام عليكم
مسموووحه بالحل الشيخه ..بالعكس ظهري الي بخاطرج ترى فيه ناس اتقدر الناس الطيبين من امثالج وهذا حاااال الواحد :sadwalk: دووووم الي قلبه طيب مظلوووم .. ومحد يقدره ... بس ما اقووووول غير الله يعييينج .. ويسعد ايامج ..

والسموووحه عالنقل



قايد الريم

[المزوحي]

إذا وصلتي لحد إنج مقهورة وتبين تبررين لفلان وعلان ... فألزمي الصمت واشغلي نفسج وبسج آلام وقهر ... انت لج أحاسيس مب بس اللي حواليج تخافين تجرحينهم وتضغطين على نفسج ...

[قرموشة]

الاسطــوري
شكـرا يا خويـه وما قصـرت في كـلامــك
صح بنـي آدم خــطـاء وانا أخطيـت واعترفت وندمـت وأعتقـد اني تعلمـت من هـ الخطـأ درس
ما بنـساه .
شكـرا أخويـه الكريـم

لمـاح
لا الـه الا الله
وجودك هنـه يكفينـي :)
شكـرا


طـفلـه
مـا كنت أقـصـد كلامـي هنـه لو انـي حـسيت بها الشعور في البدايـه ..
حسيت اني ضعيفــه مـع اني انا القـويـه وما يهزني كـلام النـاس لانهـم ما يعنوني ..
ترددت كـثير بس ما قدرت أحـبس وظهرت اللي فـيني .. وصدقيني أحـس براحـه
تروحـين وترجـعين بالسلامـه عزيزتي
وما بتواني في طـلب المساعده منج مـرة ثانيـه شكـرا :)


عافـك الخاطـر
نثرت حـروفي هنـه وعبرت عـن القهـر اللي فيـه
وصدقيني حـسيت براحـه لكـن مهـمـا سويت جـزء من اللي فيني بيظـل فيني
شاكره لج وجودج اختي الكريمـه

[الهيثــم]

لي عودة لـ التعقيب ،،

[تنينه]

ياااا عمرررري قـرموووشه:sad4: ,,

مــره من المـرات وفي فـتره من الفـترات مـريت بنفس الـقهررر ومــن انـسانه عـزيزه وقـريبه مـني ,, دووم كــانت أتذكـرني بـغلطـه مـرت وانتـهت ,, بـس هـي كانت اترددها عـلي ,, وهــي أقــرب النــاس لـي ,, كــنت أتضاايج ودوم كــنت أكتــم الضيج ,, في هاللـحظه صـدق انـصدمت منها وكنت استغرب كيف هالنـاس ما يحسوون:puppyeyes: ,, وصــدق بــعد هالموقف أللي مـر فــيني عـرفت أنــه مـب كـل شي ينقال ,, شــي أسرار وخـصوصيات حــتى لأقرب النـاس ما تنقال وشرات ما قالت طفله أعدائج تعرفين انهم أعدائج لكن أصدقائج ممكن ينجلبون في يوم ألــــد اعـدائج ,, خــلج مثل ما أنتي قـرمـوشه الطـيبه المتفائله الدووم :fa35: ,, بــس كـوني حـذره وحـطي حدود لـكل شي حـتى لـطيبتج وثـقتج لا تتسرعين ف منـحها لأي شـخص عـسب ما تندمين عـقب :sad4: ,,


ربــي يحـفظج ويبعد عــنج كل هــم وضـيـج يا رب :kcl:

[الهيثــم]

بسم الله الرحمن الرحيم

اختي العزيزة قرموشـة
تحية طيبة وبعد ،،

في البدايـة أحب أهنيـج على إنـج قدرتي اتفضفضيـن بـ الي فـ داخلج
ولا تسميـن طيبـة قلبـج مشكلـة ... لأن في ناس يفتقرون هـ النعمة ويتمنونها ومب محصلين عليها

طيبة قلوبـنا هي الي اتحبب الناس فيـنا .. أكثر من انها اتخلي الناس يستغلونا ..
واستغلال الناس لنا وحبهم لنا .. نحن نقدر نفهمه من اول كلمة تصدر منهم

واتعرفين إذا هـ الشخص كان يستغلـج أو إنه يخاف عليـج

ومثل ما قالت الإخت طفلـة ... أسرارنـا لازم محد يعرفها غيـرنا ..
لكـن يمكن في إنســان يخـاف عليـنا أكثر من خوفنـا على أعمـارنا .. لأن وايديـن ما يعرفون مصلـحتهم
ويحتـاجون لـ من يوجههـم وينصحهـم

والموقف الي مريـتي فيه يـا إختي الكريـمة ، ما هو إلا اختبـار ودرس المفروض تتعلمين منه
ولا تظلـمينها ... يمـكن الي سوتـه معـاج يكون خوفـا ً عليـج .. ومن صـدمة الموقف إنتي اتحريـتيها تتشمت فيـج ... وإذا كـانت يا اختي تستمر معـاج في الكـلام ،، فـ هذا يـدل إنهـا مازالت اتفكـر فيج وفـ الموقف الي مريتي فيه ، والي يخليـها تسأل وتقول .. لأنـها تبا اتـعرف كيف صـار وكيف استـوي ، ويعتمـد من موقف لـ آخر ...

وفي نهـاية المطـاف .. أحب أقـولج يا إختـي
فـ هالزمن صعـب إنحـصل الإنسـان الي يفهمنـا ونفمهمه .. ونفضفض له ويفضفض لنا
وإذا حصلــناه ... لازم ما نتنـازل عنـه منه والدرب

والسمووحة

[قرموشة]

فارس
فضفضـتــي هنـا فعـلا أزاحـت عني هـم .. لكـن بعض اللي في الخـاطـر بيظـل محـبوس
ارادتـي وعـزيمـتي قـويـه وهـذا اللي خـلاني أعـرف أتصـرف
شكـرا لتواجـد يا بومهـا .. والله يحـفظ لك اياهـا :)

قـلم أحمـر
هممم .. أنـا من النـوع اللي ما أخـبر النـاس بأسراري لكـن ساعـات
أحـس اني بحـاجـه لحد يسمعني ويخـفف عنـي مش يزيد علي ..
ختيـه شاكـره تواجـدج :)

قايـد الريـم
شكـرا يا خويـه

المـزوحـي
كـم بلـزم الصـمت .. أحـس اني لو تمـيت أكـثر عـن جـذه بنفجـر ومـا بتحـمل ..
شكـرا عـ التواجـد .. :)

[قرموشة]

تنيــنــه
تعرفـين يوم أعرف انـه في حـد شراتي .. واستوى فيه اللي استوالي .. أقول الدنـيا ما بتوقف عند هـ الحـد
شكـرا عللى النصيـحـه تنيـنه .. وشكـرا على الاهـداء بعد :)


خـطـاب
أخويـه :)
طيبـه قلبـي خلتني أسوي أشيا انا كنت في غنى عنـها .. أحـس الناس كـلهم شراتي
ما كنت أدري اني ممكـن في يوم هـ الطيبـه تنجـلب ضدي
في ناس ما تعرف مـصلحـتها صـح .. لكـن في ناس غلطـت وعرفت مـصلحـتها .. وتعلمـت من الغلطـه مليون درس ..
اللي تخـاف علي يا هيـثـم ما تـرد وتـزيد على الكـلام وكـأن الامـر عادي وما يعني شي .. قلـت لهـا ان الموضـوع يضايجني ويغثنــي .. وقلـت لها انتي مب فاهمـه السالفـه صـح ويوم انا بحـس اني بقـدر أتكـلم بخبرها السالفـه وما فيـها ..
لكـن الاصـرار هذا فعلا ضايجنــي وقهرني .. وكـأنـها تـقولي انتي ما تثقين فيـه وانا بعـد ما أثق فيــج..
والله ما بخبي عليـك .. حـسيت ساعتـها بانـي انسانـه بلا مـعني .. ووضعيـفه لأبـعد الحـدود ..
ما أدري جـانها فاهمـتنـي أو لا .. ما أعرف اذا كـنت بقـدر أخـبرهـا بعـد اليوم باللي فينـي و باحـساسي اتجـاه أي شي مهمـا كـان ..
صـح اني ما بقـدر أتـنـازل عنـها .. بس بعـد هي المـفروض تـراعـي مشاعري مـثل مـا أنا أراعـيها ..
شاكـره لك تواجـدك يا خويـه ولا هنت .. :)

[حلم الطفوله]

السلام عليكم

آآآآخ يالقهر ! :narr:

الطيبه هاي مشكلتنا الأزليه ! ويترجمها الناس بمتضادين ! :fa36:

إما عفويه مرادفه للغباء....أوقلب كبير مرادف لمفهوم اجرح وبينسى!:no0:

الانسان منا ساعات وعلى الرغم من الحرص الزايد يسوي أشياء ما يكون مقتنع فيها:kkk:

يمكن طيبته الزايده يمكن عفويته يمكن غباءه يمكن ويمكن ! بس يصير هالشيء :yes:

لكن فيه شيء داخلي يقولنا استوووووووووووب يا بو قلب طيب:fa39: طيبتك زادت وطفحت:doh:

المهم ...إنا تعلمنا ....وتجربتنا رسخت مفهوم يديد فينا .... مب كل مره تسلم الجره

كل الناس تخطئ ...ولكن ما نخلي الخطّأ يزيد عن حده ونرجع ونقول نحن أخطأنا وكل الناس تخطئ!

لا طبعا .... كل ما كانت أخطائك معدوده وما توصل لحد تخليك تفقد ثقة الآخرين فيك ....نقدر انصححها

بس تجاربنا وأسرارنا ملكنا بروحنا ....بنفضفض للقريبين منا بس بعد مب كل شيء ينقال !هاي طبيعتنا

قرموشه ادري هذربت وايد ويمكن محد فهم على كلامي ...لكنني مقهوره وبغيت أفضفض بعد:nono:

[رعد]

................ قرموشة.........

- إن الحياة تجارب ...... وكلنا نخطيء ... لنتعلم من تجاربنا السابقة !!

.. وأعلمي أيضاً أن هناك أموراً لابد أن يحتفظ بها الإنسان لنفسه .. وليست كل الأمور تقال !!

............. " قرموشة " انظري للامام .. ولا تفكري في شيء قد يضايقك !!

................ رعد ............