سطـل مـاي

[منصوري الدوله]

مــاعــرف يمكــن هيــه محــاولــه لألــوّن عيونـــي بأبيــض شفــّــــاف ؛ ولـو أقــدر كــان صبـّـيــت ( سطـل ) مــاي على هالاشيـــاء المتسخــه بالســواد حولــي ....


دفتــــر مذكـــرات

فـي ( العيــن ) كنــت مهـووس كوووره ؛ أحـب ألعــب ؛ وابــوي كـان يخــاف علي ومايحبنـي ألعـب ؛
كــنــت اشــرد من البيــت واذا حبسـونـي اسوّي منـاحـه ؛؛ لازم اطلع لازم أطلـع ؛ اللعـب مع ( الاقـران ) لذ ّه وشهــوه لا تــُـشـبـع بالنسبــه لــي ّ ... أجمـل مافـي الامــر ان ابوي مـاكان يخلـّـيني اتـم برّع بعـد العشـر ليــلا وربعــي ماكـانـو يقدرون يطلعـون الا بعـد العشره !! لان اهاليهـم يجبرونهم ع الدراسه قبل اللعب ؛؛ فكـنـت من العصـر اطلع واحاول اجمـّـعـهم عشـان نلعب كـووره ولمــّـا يتجمعـون الساعـه عشـر ؛ ايي ابوي ويزقـرنــي عسب ادخل البيــت ... !! ( مـــب قهـر ) بس والله اضحـك يوم اذكـر هالشي ؛؛ يعني انا اللي ألمهـم للعب وآخـر شي انا اللي ما ألعـب ...


كــنــت غبــي ..

كنت ف الاعداديــه .. وانا بطبيعـة الحال ماعندي اخوان اكبـر منـي .. انا الراس العود ف هالبيت
ابـوي مـاكان يخليني ارووح ( شـارع خليفـه ) اتمشـى مـع اليهــّـال لي ف الفريج ؛؛ وانا كنت انقهـر ؛؛ ساعتهـا
كنت ارووح أصلـّـي وادعو الله وانا سااااجد انــّـي ألقـى حرّيتــي .. خخخخ يا شيــخ لو دعيت لك في شي مفيد والله ماكان أحسـن !!

طبـعــا مــاحد يوم يـاهــل ما انضــرب ...

انا انضـربت مره ف شهر رمضــان !! ومن ابوي !!

كنت طالع العصــر وسـايـر ألعـب كوره ف منطقـه اسمهـا ( الغزلان ) ف العيــن ؛؛ وانا كنت اسكـن ( المناصيـر ) يعني كانت المسافـه كبيـره شوي لانه اتعرفـون ماشي سياييـر توصــّـلنــا ...
المهم انا سرت وماحطيت ف بالي اني اخبــّر ابوي ؛ والحبيب الله يطول بعمره قلـب الدنيـا علي ْ ؛؛
ويفتـر بالسيـاره من مكان لمكـان ليـن ماحصلنـي ف ( الغزلان ) .. خخخخخ ركــّبـني شرات الهوش في
دبــّـة ( الاستيشـن ) وقفــل علي ْ المقلــّـط ( غرفة الطعام ) ويلـس يضربني بالهوز !!
يوم كان يضربني انا كنت أترجــّـاه واقول: ( وراس صوامك وراس صوامك لا تضرب ) ولين الحين انا ما عرف شو يعني ( وراس صوامك ) خخخخخخ

اوكي مناسبـه ثانيـه انضــربــت بهــا ..

كـنـت ألعـب ف الدوّار وابوي كالعاده محرّص علي ْ اني ما العب هنـاك ؛ يخـاف علي من السيايـيـر لا تدعمني ؛؛وانا ماقدرت اقاوم رحت ولعبــت ؛؛ اشوف الحبيب يأشـّــر لي من بعيـد بالهوز خخخخخ
وانا شردت وابوي كان يلحـق وراي .. المهم اني سبقتـه بس ماقدرت ادخل البيت لان الباب كان مش مفتوح على آخـره فقلت آخذ لي دوره حوول البيت عشان يمكـن الشيبـه يتعــب ؛ المهم يوم خذت اللفـه الشيبه طـاااااااااح !! والله كسـر خاطري ؛؛ بس انا اعرفه لو زخني بيذبحنــي لذلك كمـّــلــت الشرده ويوم دخلت البيت !! قفلت عليــه الباب وتخيــّـلــو ويــن انخشــّــيـــت ؟؟
.
.
.
في حمـّـــام حجــرة الوالــد .. !! صدق اني غبـــي .. يعنـي خلــّــصــت الحمـامات ...

ذاك اليوم انرفســـت تبـون الصدق ..
.
.
.
انزيــن شبعنـــا من الضرب وسوالف الضرب خل نحوّل ع سوالف الاحــراج .. :kcl:

مره كنــّـا رايحيـيـن حديقـة ( بنـي ياس ) ؛ وانا كنــت ساعتـها ف الثاني الاعدادي ؛
كنـت حـاط ورقـه ف جيبي عشــان سوالــف ( الترقيــم ) و والله اني اذكر اني كنت كاتب بها :

( حبـّـيــتــج مـن أول نظـره وقلبـي اتـّــيــّــم بج تـتـيــم )
وتحـت هالكلام كنت حـاط رقـم بيتنــا لانه ماكان عندي موبايل :boxed:

وللأسـف انا خلــطـت تذاكر الالعــاب مـع هالورقــه ؛ واشــوف ابوي مطرّش واحد من اخوانـي عشان
يبـى تذاكــر الالعـــاب خخخخ وانا بالغلط عطيتــه ( ورقــة الترقيــم ) ؛؛ والله للحيــن اتخيــّـل منظر ابوي الله يطول بعمره يوم يأشــّـر لي من بعيد بالورقــه خخخخخخ بصـراحــه :boxed: وااايد ...

بصــراحــه انا اعذر الوالد على عصبيتـه ذيــج الايــّـام يعني كانت الدراسـه الجامعيــّـه والاعبـاء الماديـّـه بالاضــافـه الى مشكلـة السكـن وايد تأثــّـر عليـــه ؛؛ والله يلوم اللي يلومـه ؛؛ وصدق انا الحين افتخـر فيـه وايد ع رغم الاختلاف الحاد ف وجهات النظــر ايام ( الطفولـه ) ؛؛

اوووه تذكــرت شي ..

اذكر مره كان يبى يضربني وانا ادور حوول السياره عشان مايروم يمسكنـي .. خخخ عاد اتذكــّـره يوم يقول لي :
انته الحيــن كبـرت واستويــت ف الصف الرابــع :nono: وبعدك تسوي هالحركـات ...

خخخخ بالله وين كبـرت وانا بعدني ف الصف الرابـع !!!! :fa38:


انضربت وايد ليـن وصـلـت ثالث اعدادي بـس عقبـهـا الوالد تخـرج من الجامعه وصارت اموره طيبه
والحمد لله عايشيــن ..

.................................................. ..........................

أكتشفــت ان سطـل ماي لا يكفـي كل هذا العالم المتسـخ لذلك قررت ان اصبـه على رأسـي فقط ؛؛

.





ملاحظه: (اغتصاب الباكستاني ) و ( كذبات الطفوله ) عباره عن تكمله للموضوع الرئيسي والاجزاء موجوده في (ردودي) في هذا الموضوع...

[وحي القلم]

منصوري الدوله

مشكور اخويه عالموضوع

محتاجين لمثل هالمواضيع و الله

و سطل الماي صبه عراس الى يقرون موضوعك و ما يردون brgll:

(( لا تحرمنا من يديدك ))

:)

..

[منصوري الدوله]

شكـرا اختـاه هيه فضفضه بعد ان قرأت فضفة الاخت ( أليمـه )

[هزاايم]

طوول الفضفضه وانا اقرااها ماتفارقنيbrgll:
ذكريااات وسطل المااي لازم ينصب علينا عيل
أنا مره انضربت من الوالد وصدقت ماانساااها وكنت استااهلهاا >>العنااد طبع من اطبااع الوالد وعلى حظه طلع بيه
ضربتيه كاانت بعصاايه إلي كانت أمي >>أم الوالد<<تتستند عليها
كانت قويه بس اصطلبت من بعدها
مرحبابك أخوي..صدق استمتعت وعسااك ماتقطعنا

[قرموشة]

الله يا منــصوري الدولــه ..
صدق لمـا قالـوا .. من طـول الغييبــات جاب الغنايــم ..
الصـراحـه فضفــضـه حـلوة .. استمتعــت بقرااءتهــا ..
عيبتنـي سالــفه التــرقييم يؤيؤ ..

ولا تطـول الغيبـه يا خـوي .. :)

[عفاريتووو]

هههههههه حليلك brgll:

استمتعنا ياخوي و احنا نقرا هــ الذكريات
فضفضة حلوة ^_^

[تنينه]

الــسلام عـليكم :fa35: ,,


لــو نــغرق الأشيا المتسخه بالسواد حــولنابالمـاي بتــرد تـطفو ,, يـعني لا سطل مـاي ولا فيضان حتى ينفع ,,

فضفـضـه كـلها براءه وشطانة brgll: ,, اســتمتعت بـقراءة سـطورك أخوي منصوري:yes: وأبتسمت ومـا أخفـي عليك أني ضـحكت حـتى يوم وصلت للنهايه الحـلوااه لسالفة الترقيم brgll: ,,



لا عـدمنـاك يا خوي :kcl:

تنينه:gof:

[منصوري الدوله]

هلا خواتي اللي ردّن أول ردود الى أخر وحده ( تنينه ) ؛؛ سالفـة الترقيـم جدا بريئـه والله لأن كنت جدا (طفل)...ماتتوقعـن كم كنت صغيـر؛؛ أحـس اني طوّلـت وايد ف السرد لكن ماعرف ذبت ف (علي) اللي كان ف الاعداديـه وعمره ف الطعشـات ( ههه فسرورها هاي طعشات ) ... الوزن خمسين والطول160 ؛؛ يابـس جنـّـي احطبـه ؛؛ واستحي ألبـس شورت يعني اذا ألبـس شورت لازم تحته يكون ( بنطلون ) !! شفتو كيف الدنيا جلب عندي ؛؛ هو جميـل انك تغرق ف طفولتك يعني كل الاشيا الغلط اللي كنت تسويها ف طفولتك وكنت تنضرب وتبكي عليها ؛؛ الحين لو تسويها والله ماراح تحس بتأنيب الضميـر لان كمية السواد اللي امتصصناها من بعض أعمتنــاااااا وخدّرت قلوبنــا ....

خاطري أكمــّـل الفضفضـه :

انزين هذا كله كان صياح بسبب ألـم او ضرب من حد ثااني ؛؛ شو رايكم اني صحت من نفسي وايد؛؛

ثلاث مرات اذكر اني صحـت بها عدل عدل عدل ؛؛؛

الاولى كنت ف الثالث الابتدائي وكنت مشارك ف مسرحيه ف المدرسه ؛ وللاسف ضيـّــعـت ورقـة الحوار اللي كنت لازم احفظها وماكانت منسوخه بل مكتوب بخط الاستاد يعني ( ماشي غيرها )
والله للحين اذكر المكان اللي كنت ادورها فيها وكيف كنت قصيـر اركب فوق الشبريــّه عشان اشوف راس الكبت خخخخخخ والله صحت صياااح لاني حسيت اني فشـّــلــت المدرس ذاك اليوم بس والله مدري شو سويت مع المدرس حينها ؛؛؛
ياويلي االله ...


مـره ثانيــه صحت ابها صياح مـن نفسي : يوم كسرت عقارب ساعـة اخويه ( خالد ) اليديده خخخخخ
عقب ماكسرتها كنت ألف العقارب ناحية اليسار واقول لو ان الزمـن يرجع يسار ؛؛ ( جان مابكسرها مره ثانيه)...

مممم المره الثالثـه اللي طلعـت فيها اعيوني من البكااا : يوم توفـّـى ربيعي ؛؛


استغفر الله ؛؛؛

ع فكـره : ردودكـن جدا اسعدتني وقرأت تعابيـر وايد حلوه ؛؛ عن ( طفحان ) السواد والاتساخ وغيره
واللي رحـّــب اقول له الله يرحب بك على زوود فضلـه ....


علي.

[حبوبه دبي]

فضــفضتــك حلــوه
استمتعــت وانا اقــراهــاا

:fa35:

ايــام الطفــوله محـد يقـدر ينســاها

بحلاهـا ومـرهـا

..


فــرحت من شفــت نـكك
طــولت عليــنــا
:fa35:

والسمــوحه

[خيال الحب]

سلامي عليك بوحســـن


هاااع من صغرك ترقم هااا خخخ

الله يعين الي بالامريكيه الحين لوووول ^__* باللاب توبات الترقيم شغال خخخ

فديـــتك والله اشتقنالك واشتقنى لطلتك ويانا بالواحات بن عمـــي..

اتمنى انك ما تقطعنا بالغالــي

[قرموشة]

لوول شووفوا بن الحب في شوو يفكرر ههههه

منـصووري الدولــه ..
متابعيين لكـ أخـوويــه ..
حبيييت الفضفــضه الثانـيه ..

ونتريا الثاالثه لوول ..

[العجيبة]

هههه ..

ابتســامة تشق الأفــواه مع كل الذكريــات ، مؤلمـة كانت أو سعيدة ..

وذكــريـاتك اجبرتنـا على الابتسـام خاصة مع سـردك المميــز :yes:

وخخخ وخليتنـي أتذكـر حديقـة بنـي ياس اللي على المـرات المعـدودة اللي رحتها إلا إنه وفي كل
المـرة لازم تسـتـوي كـارثة ، يا انه نتضــارب عنـد حـد ، او نشـوف مأساة لطفـل عنيـد سقط من
مكان عالي ، أو آخــر بريء شجـت رأسه الصغيـر أرجـوحـة منطلقة بعنف !!


.
.
استمــر ، بنتابع ..،

[لمّــاح]

الســلام عليكم ..

منصــوري الـدولة .. اشتقنا لمواضيعك ياخويه و مثل ماقالو من طول الغيبات ياب الغنايم و يارب اتكون آخر الغيبات ..:yes:

اسجل اعجابي الشديد كعادتي في مواضيعك .. استمتعت جداً بالقرائه ( اسلوبك يعيبني ) ..

و سلم على احلى منصوري :harhar1:

[عذبة الروح]

السلام عليكم والرحمه

سطل ماااااي ...
عيبني العنوان .. وقلت بـ شوف اللي فيه
ومن بعد ما قريته
وبين موقف ضحكني
وموقف غمظني ...
وموقف كان يجمع الاثنين .. على غرار
][ شر البلية ما يضحك ][ <---- العتب على الخيال
ترى كنت اقرى ... واتخيل اللي تقوله جدامي brgll:

عيشتني لحظات حلوه بـ طفولتك
وعيشتني لحظات حلوه بـ طفولتي
ويمكن .. هي السبب الوحيد على الحياه فـ الوقت الحالي
الله عليها من ايام .. حتى لو تذكرت ايامي اللي بكيت وزعلت
وانظربت من الاثنين ... ابوي وامي :fa43:

احسن شي .. مب اني اصب الماي على عمري
احسن شي .. اني اصب عمري في البحر :yes:

تسلم يمناك اخويه .. وربي يعطيك العافيه
الفضفضه ... عيبتني بـ روح الطفوله اللي فيها
ربي يديمها عليك ذكريات طيبه ...
ويطول بـ عمر الوالد .. ويديمه ذخر لكم
ويسلمووونيشن منصورينا

اختك
عـذ الـروح بـة

[منصوري الدوله]

هلا اخواني خيـال الحب ولمـّــاح ؛؛ وعذبـه والكــل ؛؛
حقيقـه خاطري اكمـّـل الفضفـه لان ماعرف اتحس بالياهل اللي داخلك يبى يطلـع ( لاتفهموني غلط ) ..
خاطري ارمـس عن الكذبات ايام الطفولـه خخخخ والله كنـّــا أغبياااااا ؛؛؛ خاطري ارمس عن الخوف
شو الاشيا اللي كنت نكذب ابها وشو الاشيا اللي كنا نخاف منها ؛؛ حقيقه والله اني ماكنت اخاف من ابوي ع كثر ماكان عصبي ويضربنا لاني كنت اشوووف طيبته دووم والعصبيـّــه فيـه هذي مثل المس او الحاله اللي اتيي له فتراااات وتـرد ...

تخيـّــلو كنــت اخا ف من راعي التكسي ( أي تكسي ) وكـنت اخــاف من انيي اييب الشهاده واكون طالع (الثاني) خخخخ كنت اخاف انه حد من اهلي يرفض لي طلب ويوم يكون هالطلب وايد داش بخاطري(يعني) متعمـّــق..

ودي اكتب عن كـل هالاشيا بس المشكله احس ماحد بيقرا اذا طوّلت الموضوع ان شاء الله ( أكيد ) ف موضوع ثاني بس نتريا الغيباب والعوده ...

شي ثاني : تصدقون ماتوقعتكم بهالجمال ( كلكم) ..

ملاحظـه: اللي يحقـد ع الناااس ويستحقـرها عيونه تضيـق!! ... حـــِــب الناس .. عشان ( تحلو ْ ) .. يالخسف

الله يحفظكم ...

[لمّــاح]

منصــوري الدولة ...

اكتب و بإذن الله بتلاقي التجاوب المطلوب من الاخوة ..

[وحي القلم]

منصوري الدوله

كمّل الموضوع

نحنى امتابعين و الله

:yes:

..

[منصوري الدوله]

هــلا و حـلا

ممم الطفولـه جميلـه ؛ من فتـره فتحــت الكبـت ماعرف شو كنت ابى بس المهم اني تفاجأت بصورتي واان في الصـف الاول الابتدائـي ؛ خخخخ شكلـي موو شي يعني مع الراس الصنقيحـه ( شو يعني صنقيحـه) :harhar1: والصوره كانت لي مع استـاذ ( طالـع ) وباقـي عيـال الصف ؛ ( أوّل جيم )؛؛
مشكلتي اني اكبر اخواني يعني اذا بيتضاربون اليهال والله اتم انضرب بروحي لين ماجبدي تلووع ؛

اذكر مره نسيت فلوسي ف البيت ( درهمين) .. و يلست احاتي شو بااكل ف الفسحه ؛؛ والله ولد خالتي اللي اكبر مني بس بسنه عطاني فلوووسه ؛ فديته والله ؛ بس اتصدقون اللي كسب هو ؛ لاني احبه كأخ حب مب طبيعي وما استبعد سبب هالحب والمعزه من الدرهمين اللي عطاني اياهـن .. واتذكر والله الحركه اللي طلــّـع ابها فلوسه من شنطته يعني جذا من طيب نفسه ؛ اموااااح ع خشمه..
ع فكره هالانسان الحين ف آخـر سنه جامعيه له ويدرس شريعه وقانون ...
و ع كثر ماحقدت ع ناس ما اذكر اني حقدت عليه ..

(اغتصاب الباكستاني) خخخ

هيـــه خلــّـو الصوره ع ينب ؛ بسولـف لكم عن الاشيا اللي كنت اخاف منها ؛ اول شي كـان راعي التكسـي ؛ مـره ف الثالث الاعدادي اتضاربت مـع حد من اهلي وركـبت تكسي ورجعـت البيت ؛ عاد كان الوقـت ليـل وانا تبون الصدق الشيطان لعـب في ( عبـّـي ) ؛؛ والله يهديها الوالده كانت قبل مصوره لنا راعي التكسي جنـّـه ( دراكولا ) يشـل اليهال ويقطعهـم ويفرهـم ورا البيت !!! (ماعرف اي بيت) ..
عاد انا كنت متأثـّـر من الضرابه واايد لأن ذاك الانسـان سـب أمـّـي واايد بشكل فظيـع ؛؛ فانا كلما كنت اتذكر كلامه تضربني الغبنـه واصيـح و ف نفس الوقت واايد نااس تلـمــّو علينـا ؛؛ فقلت خل استغل هالحدث واصيح ف التكسي وأكسـر خاطر البتـّـاني واقول له ان امي (ماتت ) او انها مريضه والله ما اذكر بس اذكر اني كنت ( نذل ) خخخخ يعني حد يفاول على امه عسبــّة مايتقطـّـع وينفـر ورا البيت شرات مممم والله مادري شرات شووو لكن شرات اي شي يتقطـّـع وينفر ورا البيت !! :fa38:
و والله اني اتذكر الخـان يوم مسكني من ريولي خخخ والله اني ( نقـزت ) يعني تخيلو انا اصيح عسبـّـة مايقربنـي هالخـان ولا يمسنــي والخـان اونننه بيهدأ من روعي خخخ زين ماقلت له لا انا مافيني شي وخلـّـك بعيـد ...

مممم

الكذبـات ..

هههه ماعرف ليش احس اني لين الحين شكلي غلط يوم اجذب ؛ عشان جذا دووم اتييني الضحكه يوم اجذب او انه اغمض عيوني وادعي الله ان الوقت يمر بسرعه .. مممم انا من جذباتي مابقول لكن اذكر ربيعي (زلمه) كان دووم يقص علينا انه هو كلــّـه يضرّب اليهـال اللي في فريجهـم القديم وخخخخخ يوم تستوي ضرابه عندنا والله هوه اول شرّااااد ..
هذا نفسه هالانسان اذكر اني تضاربت وياه خخخخ اذكر اني عضـّـيتـه وجنـّـه (تسمم ) :boxed: الاخ جلب وانتو بكرامه :bow: .. واذكر ان امه يتني ف وسط الفريج وعطتني محاضـره انها بتشكتي وانها بتاخذني المخفر ويمكن يعدموني .. الخ

الله يسامحكم يا لمـّـاح ويا وحي القلم خلطتو عصبيتي باشيا ماكان ودي اقولها بضحكه ع منصوريكم..

انتو اللي مشكوريـن ...

[منصوري الدوله]

يا جماعه اكتبو عن طفولتكم وعن الشقاوه خل نقلبها روضه شو المانع !

[الدلووووعة]

ههههههههههههههههههههههههه ه


صدق من اول ماقريت الموضوع لين اخر شي وانا فاجة ثميه
عجيبه سوالفك


ان شاءالله بكطتب بعض طفولتي الرهيبة ^_^

[بنت الدلع]

السلام عليكم

موضوعك وااايد وااايد عيبني

سردك في غاية الروعه

عنوان الموضوع يجذب
ولكن يوم تقرا الموضوع ماودك تسكره وادّور غيره

عيشتنا بجو طفولتك الممتلئه بالمواقف الجميله
اقرا الموضوع والابتسامه ماتفارقني ويوم اظحك اكتم ظحكتي >> اخاف اظحك فليل ^_^

وانا اقولك استمر ولا توقف وان شاء الله بنكتب عن طفولتنا( البريئه والشقيّه )

اخي العزيز ..
استمتعت كثيرا بتواجدي في موضوعك
وننتظر التكلمه بفارغ الصبر

[حلم الطفوله]

السلام عليكم ورحمة الله وبركاته

من شفت كاتب الموضوع دخلت سيده ....لا هوووود ولا هداااا:fa34:

ومن قريت العنوان حسيت بشيء مميز ...ولما تعمقت بالفضفضه عرفت إنه النكهة المنصوريه طاغيه

ذكريات ولا أروع ماي برذر .... ورجوعك أبهجنا يا راعي النظاره الورديه:smartass:

على فكره عيبتني هذه الملاحظه وااااايد وااااايد ....مثل ما يقولون يت على العوق وبالصميم:boxed:

ملاحظـه: اللي يحقـد ع الناااس ويستحقـرها عيونه تضيـق!! ... حـــِــب الناس .. عشان ( تحلو ْ ) .. يالخسف


يمكن أرجع فذاكرة الطفولة تحوي الكثير والكثير ! بس الحمد لله ما شيء ضرب!:doh:

[هزاايم]

منbrgll: ------->إلي:hist:
حليل حالك يا منصوري والله اياام لاتنسى
وكسرت بخااطري عن سالفة الخاان خخخخخخ اسميكم



ملاحظـه: اللي يحقـد ع الناااس ويستحقـرها عيونه تضيـق!! ... حـــِــب الناس .. عشان ( تحلو ْ ) .. يالخسف

صح لساانك:fa42:

نحن بانتظاار
ومن يقوى على نسياان طفوولته

[روح الغراشيب]

فضفة رائعة ذكرتني باللي مضى وانقضى ... ونتريا جديدك أخويه منصوري الدولة..





سوالم

[مجموعة إنسان]

ههههههههه
والله انك فنتك
عاااد من المناصير لين الغزلان عسب لعب ..

واللا التكسي اونه بيراااضيك جذيه
الله يستر

[منصوري الدوله]

يالله حيـّــه ؛؛ انتو كلكم تقصون علي ْ ؛ وين اللي بيكتب عن طفولته وشقاوته هـا !!!
يبالكم ( ... ) ..
ع العموم : وهناك من البشر من تظل تعليقاته محفوره في الذاكره ؛ حقيقه جدا سررت بهواجيس مشتاق
وهزايم واخوانهـم ؛ اعذروني ف التاخر المتعمد ف الرد لأني أرى اسمائكم اكثر اغراء من (منصوري الدوله) فقصدت ذلك ؛؛ لكم التحيه ولكم قلبي كلكم..

[شمه]

لووووووووووووووول
فضفضتك وايد وايد حلوووه..

يوم انك من المناصير لين الغزلان.. عشان بس كوره..

ذكرتني بسالفه ..
يوم كنت اصغيره في الروضــه ... كانوا اعيال عمي اكبر عني .. اللي صف اول واللي صف ثاني ..
فكانوا ماخذين في العلوم ان الكره الارضيه تدور حول محورها ..فجان يقولون لي هالمعلومــه وفوقها اضافات اونج لو تميتي تركضين في الفريج ووصلتي فريجنا ..(يعني من فريجنا لين فريجـهم تقريبايعني المسافه من المدينه الجامعيه لين الشهباء او حلوان).. انزين ف لو انا مشيت كل هالمسافه بحصل نفسي عند نقطة البدايه يعني عند باب حوشنــا لان ع قولتهم الارض تدور حول محورها.. وكانوا مستبدين لازم نسمع كلامهم.. فانا ولد خالي الصغير .. هو صف اول وانا في الروضــه اونه عاد كبار وفاهمين .. خلونا انسير نركض في الفريج عشان يطبقون الدرس..هم ساروا يشوفون رسوم و انا ولد خالي دقينها مشيــه .. والناس محتشرين يدورونا وهذيلاك خبر خير ..يشوفون الرسوم..و الشمس قربت تغرب ونحن انصيح في الشارع تعبنا من المشي وطلعنا من فريجنا وما وصلنا باب حوشنـا .. اسميه شافنا راعي الدكان (كنا مسمينه دبل كولا) .. وركبنا ع الموتر سيكل .. وردانا ..يوم وصلنا البيت ..من خوفهم علينا ضربوا عيال عمي اللي طبقوا الدرس علينا (القصه باختصار)..

[منصوري الدوله]

هلا و حلا

ههههه والله احلى شي في مشاركة الاستاذه شمـه انها حسستني اني انا ماكنت الغبي الوحيد في طفولته ؛ تصدقون على الرغم من اني كنت وايد شاطـر ف طفولتـي وااايد لكـن لو خيروني ف كلمة اوصف بها نفسي فطفولتي بتكون ( غبي ) هيه الكلمه ؛؛
ع طاري شطـارة اليهال انا كل ما أسأل حد كم كنت تطلع ف الابتدائيه يقول لي : الاول
بتخبركم وين هاييلا اللي يطلعون الثاني والثالث ؛ والله بديت اشك ف السالفه تراني :kkk:
شمـه : سلمي ع ولد خالتـج اللي طبـّـق وياج الدرس ؛ الحين شوو حاله ؛ اكيد معررس وعياله تنطبق عليهم الدروس خخخ سبحـانك يارب
بقول لج شي :
امس اتصلت بربيعي وكنت قاطعنـّـه تقريبا من سنتين يعني من سنتين ما رمسته ؛ أحيده ( قبل سنتين) كان يشكي من ( الزفت ) خخخخ يقصد بها جامعة الامارات ويبى يتخصص ويشتغل وكان يشكي من الواسطات والتمييز واشيا كثيـره ؛ اتصدقين امس يوم اتصلت به الحبيب اغتنى وتزوّج وتخـرّج ويمكن الحين يستوي وكيل ف النيابه ( او شي جيه ) ... مدري والله ليش استانست صدق ان عمر البني آدم قصير يا شمه يعني سنتين جيه تغيـّــر ؛

يالله قولي آميـن ؛؛ ان شاء الله ألقاج بعد سنتيـن كاتبه لي في رد : (( ثلاثخهلا ضخة ثصحبتل ))
ويوم أسألج : شو هالخربشه والخربطان ؟
تقولين لي : هذا ولدي ( جعفـر ) يحــب يدقدق ع الكيبورد خخخخخخ :boxed:

الله يحفظج وريحـة التواجد مألـوفـه سـســتــــر ... :fa35:

[قرموشة]

متــابعيــن بصـمـت لفضفضتكـ يا منـصوري الدولــه .. :)

[شمه]

شو جعفر انت بعد.. :(

اممممممم .. جان تبى بعد.. بقولك سالفة..

يقولك ترى انا كنت البنيــه الوحيده ف يوم يجتمعون عيال عمي وخالي والله مقصه اصغر وحده فيهم..
المهم ..

اتعرفون الطائرات النفاثــه اطلع دخان في السمــا..

فلما انكون في الحوش.. يوم يشوفون طياره نفاثــه .. يقولون لي هذا صاروخ مال الفضائييـــن.. لو ما يبتي البروش وخميتي السمــا (شوفوا العقل).. بيون بيتكم في الليل و بخطفونج .. و بعدين انتي بنيه ما بترومين ادافعين عن عمرج..
ف اربــــــــع ايب بروش .. و اوني اخم السمــا .. يقولون لي لازم اتخمين لين ما الدخان يخوز.. اونه هذا دليل طريجهم يوم يشوفون بنت صغيره يحطون علامه ع بيتهم..

انزين عاد اتم انا في الحوش و اخم السمــا (اكيد اتقولون في خاطرك كيف اتخم السمــا) ترى الدخان شوي شوي يخف .. و انا عبالي انا اللي اخمــه.. ومرات يوم ما اخلص (شغل البيت لوول اقصد تنظيف السما).. اقعد اصيح .. و اونه ايي ولد عمي يساعدني .. (عاد هذا لو قلت لكم اسمــه الحين الكل بيعرفه .. وحليله يوم صغير يخم السما وياي)..

والله معانــاه مع اولاد العايله قاصين علي..

(لا تقول جعفر .. يا خي قول احمد قول محمد ..عمر .. خالد ..دور اسامي حلوه لو سمحت جان تباني ارد ع موضوعك لوول)..


:)
شمــه...

[عافك الخاطر]

استمتعت بالقراية :)
دايماً لفضفضاتك طابع خاص خيو ..
استمر..نحن متابعين ..
وا1ا حصـلت شي حلو فـ طفولتي ما ببخل ان شاء الله ..
موفق خيو ..
..
.

[منصوري الدوله]

فيني الصيحـه عليج يا شمــّه ؛؛ كل هذا استغلال تخمين السما ويطلعوونج من يوم السبت تربعين من المدينه الجامعيه لحلوان الى دوّار الكتاب وتاخذين لج فره ع البحيـره وتردين يوم الاربعاااا من الاسبوع اللي عقبه ؛؛
والله حرااام... خخخخخ
ع فكره انا حتى هالخط مال الطيايير النفاثه كان شاغل بالي بس كنت افكر ف الطيار انه بالعماله جيه يسوي عسب ما يضيـّــع الدرب يوم يرد ... ( يهــّــال ) وش حلاتنا يوم يهــّـال ...
الله يحفظج ام جعفـر ... ؛

قرموشه : سستـر ما اعتقد اني اقدر اكتب زود ؛ احس الياهل خلـّـص او انه طلـع خلاص ... ماعرف حتى اسلوب الكتابه ف هالموضوع او ف الردود شوي كبـر عن علي لي ف الاعداديه والابتدائيـه ...
اوعدج بالمزيد ويااااااااااارب اشوووووفج ف جنه عرضها السموات والارض أعدت للمتقين...
شكرا ع الاهتمام والشكر موصول للماح وكل من رد.

[وحي القلم]

منصوري الدوله

سالفتك ويا راعي التكسي ذكرتني ابراعي الدكان

ما جد سوا شي بس كنت أزيغ منه

لانه بنت خالي كانت اتقول أنه يصرق اليهال

(( كانت قدوتي في الحياه

يعني لو الناس كلهم يمشون فطريج و هي فطريج بلحقها و ما عليّه من الباقين ،،

مادري ليش كل هالحب مع انه محد كان ايقص عليّه كثرها brgll: ))

المهم.. أحيد مره كنا سايرين الدكان فقالتلي لازم انغير أشكالنا عن ايعرفنا

انتي غمظي اعيونج و أنا ما بمشي عدل ( بتعري )

أونه ما بيعرفنا جذيه؛؛

ما كنت أشوف شي بس سويت الى قالته عن ايعرفني

و أظني أنه ما انتبه و لا درا بنا brgll:

..

و يوم أنا فثاني ابتدائي كان ويايه واحد فالصف

ما يكتب الواجب

يعطيني دفتره عشان أحل بداله

يعني أكتب الواجب مرتين

مادري شو هالذكاء brgll:

..

انتريا تكملة موضوعك :)

[هزاايم]

شمه حليل حاالج

أنا احيد بالرووضه كنت مش شريره بس اتفلسف عليهم .......كنت ايمع الصغاريه أونيه انا الدكتوره ..وحده كانت معايه بيدها شي ثالول..كنت اربطه بالعشب اقولها بتصيرين طيبه و ثاني طايح وينزف دم من ريله وانا روضة ابويه كل الكلنكساات حطيته عليه حتى خخخخخخخ مدري ليه قلت عض يدك عسب الدم يقل والذكي عض عمره:hist: ...
وأحلى حااجه إن المدرسه كانت تحبنيه مدري ليه:fa35: كنت اشك إنها امي..دوم اقول حق امي إنتي مش امي ابله شيخه أمي دووم تقول آمري أمي إنتي ماتقولين ليه كذى:harhar1: >>فديتها امي وتولهت على ابلتيه:fa35: ...
انزين ليه كنت احبها...عسب يوم نطلع رحلات مش يوقفوونا اثنين اثنين..ف بالدور يعتمد على ترتيب الأسامي من يكون بوجه المدفع قصدي مقدمه الطابوور أنا>>مافيها رمسه كتكووته الصف<< وثاني عااد وحظه وترتيبه باللستهbrgll: ..بس الصرااحه كنا حلويين بالرووضه كلنا أهل ومعاارف

بخااطريه ارد اشوف روضتنا ومدرستيه صدق تولهت على ذيج الأياام
على قولتهم
أياام لاتخشووا من اللهو نااهيه:yes:


الجميع أنا متابعه معااكم
واسمحليه أخويه منصوري

[طير الحب]

الصراحه أنا من احتاج لسطل ماي عله يساعد في إزاحة اكوام الغبار المكدسة برأسي التي تحجب ذاكرتي....فلم اعد قادرة على تذكر اي شيء من الطفولة.

[بنت الدلع]

Back

السلام عليكم ورحمة الله وبركاته

بكتب عن بداية طفولتي في المدرسه :fa35:

احيد اول يوم داومت فيه الصراحه يوم ما اقدر انساه
هالشي على طول في مخيلتيه
الوالد الله يحفظه خذني اول يوم للمدرسه
>> في الصف التمهيدي <<
طبعا انا ماسرت الروضه ,, عطاني راحه سنه كامله في البيت
اول يوم المفروض يكون انه احلى يوم بس للأسف بالنسبه لي ماكان واايد حلو :no0:
دخلت المدرسه وبابا كان وياي وداني صوب ساحة التمهيدي
وقالي يلسي هني ويوم بتخلصين انا بييج
وروح عني :bye2:
وانا يحليلي ماعرف شي لابسه اللبس الوردي والــ lunch box في ايدي
وتميت يالسه واطالع الناس ,, اجوف شي غريب اول مره اجوفه
الكل مطقم في اللبس ,, البنات لابسين وردي والاولاد ازرق
وانا يالسه على رصيف الساحه اتريا ,, بس ماعرف شو كنت اتريا بالظبط
كنت اتمنى اجوف بابا واسير وياه ,, واقول فخاطري مابا اتم هني ,, ماعرف حد هني
شو المكان اللي اول مره اييه

:: دق الجرس::
كل الي في الساحه ركضو وسارو بعيد عني ,, وانا يالسه اطالعهم وافكر .. وين سارو كلهم
شو الي استوى
وتميت يالسه بروحي ,, بس جفت المدّرسات يأشرون ويقولون دشي داخل
مشيت وسرت وراهم ,, وكنت اخطو ببطئ :sadwalk: لقد تملكتني الرهبه
الكل دخل في صفه وانا تميت واقفه في الممر وين اسير ابا ادخل الصف
بس اجوف حريم كبار يالسين >> امهات الاطفال << ,, ياترى انا في المكان الغلط !! :kkk:
تميت واقفه مكاني ,, انتابني الخوف الشديد :no0:
وبدأت في البكاء ,, واشتدّ البكاء ,, اين أبي ؟ اين ذهب
لقد تركني وحيده في هذا المكان الكـــبير الممتلئ بالناس
وبعد عدة دقائق ,, خرجت المدّرسه من الصف فوجدتني ابكي بالقرب من الجدار
ارادت ان تمسك بيدي لتدخلني الى الصف ,, ولكني أبيت ,, لم ارد الذهاب معها
وبعد عدة محاولات فاشله , حملتني بيديها وادخلتني الى الصف وكنت ابكي بشده
اريد الذهاب الى البيت ,, لا اريد ان ابقى معكم
صمت الجميع عندما رأووني ,, عندما رأو طفله بريئه تبكي لاتعرف هي اين
فكانت انظارهم تراقبني حتى وصلت الى اخر الصف وجلست في اخر مقعد ,, بالقرب من ولد مصري :nono:

لم ارتاح لوجودي معه , لا اريد الجلوس بجانبه ,, حسيت اني كرهته
والي زاد الطين بله انه الـ lunch box ماله كان شراتي:boxed:
ويوم رديت البيت قلت حق اميه مابا هذا الــ lunch box ابا واحد يديد
والحمدالله انها خذتلي واحد ثاني ,, وفرحت كثيرا عند امتلاكي lunch box يديد :fa34:

دق جرس الذهاب الى البيت ,, حملت حقيبتي وذهبت لانتظر أبي
وعندما وجدته واقفا بشخامته ,, لم استطع ان اتمالك نفسي ,,هرعت اليه وحظنته بشده
> وكأنني لم اراه مدة اسبوع كامل <<


مااا أجمل هذه الأيام

اشكرك اخي منصوري الدوله على اعطائي هذه المساحه لأفضفض عن طفولتي
واعذرني على اطالتي

:: اسمحوليه اختلطت عندي اللغه العاميه بالعربي الفصيح ::
لقد تعمقت كثيرا في سرد طفولتي

[منصوري الدوله]

بنت الدلـع : كلــّـه كوم ويوم تملـّـكـتـج الرهبـه :harhar1: كــوم ؛ ياختي والله فديتج يوم ترمسين مكسيكي ؛ ع طـاري الافلام المكسيكيـه أحـس فهمنا لـهـا يتدرّج من ايام الطفولـه ؛ يعني يوم كان أليخاندرو يبى يجتـل ماريا مرسيديـس كنـّــا نحـن نطالع المسلسـل ومعانا مخده عووده عشان نحطها ع ويوهنا ولا نشووف ماريا يوم تتأوّه لكـن يوم كبـرنـا شوي واستوينـا ف الاعداديـّـه الشيطـان بدا يلعـب بنا ونتريــّا أي لقطـه جريئـه ونتم امبحلقيـن اعيونــّـا ومانحب حد يطالع ويانا المسلسلات المكسيكيـّـه ؛ يعني بروحنا بس نطالعـهـا ؛؛ كأولاد والله كنـّــا سبـلان ؛ البنـات كـانن العكـس يعني قبل عادي يطالعـن المكسيكان مسلسليشـن بس انفعالهـن مع كبـرهـن يزيد يعني تلقى البنت تصيـح ع المسلسل اذا وصلت الاعداديه يوم ستيفـانـو يموت و بـاوليتــا يحب له سوفيــّـــاااااا ؛؛


طيـر الحــب : راسج انظـف منـّــه ماشي ؛؛ والغبـره لو بس هي اللي ع روسنـا كان اوكي مانبى غير ( نفخـه ) وتطيـر كلهـا ؛؛ نحـن يا بنـت الحلال محتاجين عمليـّــه نستئصـل بها أجزاء من أدمغتنـا حتى غسيل المخ يا بنتي ماعاد ينفـع معـانا ؛؛

وحـي القلـم : والله والله والله ضحكت يوم اونـّـج تغمضيـن عيونج عسب مايعرفـج الاخ راعي الدكـّـان
وع طاري قدوتج ف الحيـــاه قولـي لي عسـاهـا ليـن اليوم قدوتج أم انج وجدتي لنفسج خط حيـاة ْ بروحـج
وحي القلـم محفوووظـه بدعاوي اللي يحبوووونج وووووووو شكرا ع الابتسامه والضحكه ...


هزايم : الله يهداج ياربـّـي ع شووه اسمح لج ؛؛ بالعكس ماقصـّـرتي والله ؛؛ بس توني اكتشفت انج دلـّـوعتهم ؛ اتعرفون يعني لكل شخصيـّـه ف الوااااحات نرسم لها صوره من النك من الرد ماعرف يمكن من اشيا غير بعد قد تكون قريبه من الواقع وقد تكون ( مايخصـه ) .. توقعـتج شي ثاني ف طفولتج ؛؛ يعني كـان يركب عليج دور ( ســـالي ) مال الرسوم اذا كنت ي تحيدينهـا ؛ هاي اللي دشـّـت المدرسـه وهيه غنيه وعقب ابوها توفـّـى ( بعيد الشر عنكم ) وخلتها مديـرة المدرسـه تشتغـل خدّامـه
وكل حيـاتهـا بؤس ومدري شووو حتى نحن يوم كنـا نطالع هالرسوم ويا باجي اليهال كان البيت ينقلب هادي وصخـّــه ؛؛ يا ويلي عليج ياخوج ان شاء الله حياتج كلها فرفشــــــــــــان .. آميــــن ...


قرموشـه و عافك الخـاطر : انتـو والله ف القلــب ؛؛ المتابعـه لها أكبـر واجمـل الاثـر ف نفس المنصوري

[شهوووودة الأمورة]

مرحبا الشاااااااااااااااااااااا اااع :harhar1: :mar7aba:

خخخخخخ طفووولتك روووعة صراحة :ice: .... مممممم للحين ماكملت قراية الباقي.. بعدين بكملهم..

ممممم أحس لو كان عنوان الموضوع ( طاش ما طاش مال أول :harhar1: ) بس بعد حلوو ( سطل الماي )
خخخخخ .. تدري سطل الماي هذا ذكرني يوم كنت صف أول 1 كنت املي السطل الكبير ماي وادخل داخله ههههههه أوني اسبح :hist: :hist: ( انزين روحي البحر وفكي عمرج :hist: :harhar1: ) فدييييييييييتني والله :hist: :harhar1:

ان شاء الله بحط سوالفي يوم كنت نونو صغنونه :harhar1: :fa35:

[الغاليه]

الموضووع وااايد حلو .. والاسلوب وااايد ممتع .. طريقة الكتابة دمها خفيف

اسمتعت جدا جدا بالقراءة ... brgll: ...


شكرا

[هزاايم]

تفاول عليه ياأخوي ..أفااا ماهقيتها أفاا..لا بعد سالي هذي انا قصة الإنسان...كنت انقهر منه لأن صيحتني وم أبوها مات..كله ولا آنسه منشين..وين رحت ..تشبهنيه عليها أفاا..سوالف أخوي

بس امس صار لنا موقف وتذكرت أياام الأوليه
أحييد قبل يوم انتقلنا كان الفريج فاضي كله عراقيب حولينا..وسط الصحرى..فالأخ الbig brother متولينا انا بوحسن وإختيه بوسالم وأخويه الأصغر بوشهااب..ونلعب معه على اساس حنا بو الفلاني..وكله بالصوب ولعبة الدسه>>الكوك اسمها وش كانت<<يوم انخشيت بالخزاانه وولد خالتيه فتح بابها بغيت ايود راسه قبل لايطري اسميه بوحسن..سج الباب على يدي مجرم الدب
وألحين الله يخليهم الصغاريه امسات الوالد ينادي ولد إختيه يقوله بوسليمان تعال.يقرب صوبه ويقول لأبويه..انا مش بوسليمان انا فاارس سليمان من ..؟؟

اياام ..الله يعين هذوول الحشااكل

[مجموعة إنسان]

انا فتحت دفتر مذكراتي اللي مخزن في مخي ..

مره كن انا وبنت عمتي وهي اكبر مني بسنه ..
شفنا عصفووور مسكييين متكسر ورقبته مكسوووره .. شليييناه اونه بنعاالجه ويبنا قطعة قماش ولفيناها على رقبته ( عاد مب انا الدكتوور هي الدكتووره ) ..عاااد هي شوي طلعت دفشه ولفت القماش بقوه ليش ما يمووت المسكييين ..
عاااد نحن خفنا .. اونه سرنا ندفنه عقب هي الكبيره قالتلي لازم انصلي عليييه .. انا كنت غبي بعد اوني هييه احسن عشااان يدخل الجنه .. هي الامام وانا واقف وراها ونصلي على العصفوور المسكييين ..

اياااام حلوه
..

[منصوري الدوله]

هلا والله فديت روحك يا هواجيس مشتاااق ؛ ياخوك يبت لي الطاري انا اذكر مره كنت ابى اصيد عصفور وكان طايح ع الارض ؛ اتعرف يبت طابوقه عوده وعقيتها عليه خخخخخ وسرت اربع ازقـر اخواني و ولد جيرانـّــا ونسيت العصفور تحت الطابوقه ؛؛
عاد انته اتعرف شو الباقي ...
الله يرحمه كان عصفور زين ..

[خيال الحب]

:fa34: احم احم


تبوني اكتب لكم بعض من مقتطفات حياة خيال الحب يوم صغير:harhar1:



اوكـــي..


نبداااا..


الله يسلمكم يقولكم خيال الحب يوم كان بالروضه,, كنت ماداني شي اسمه روووووووضه وكان وياي ولد عمي,, وفي وقت الفسحه كانو يطلعونا برع عند الالعاب :fa34: ,, عاد انا كنت احتقر الالعاب اتم قاعد ويا ولد عمي نخطط كيف نشرد من الروضه:harhar1: >>> خيبه يالشرررر


المهم قعدناا ندور حوالي السووور لين ماحصلناا ربع دري:fa34: > > درج>> يعني سلّــم بالفصحى:harhar1:


فحطيته انا ع اليدار واتريا اليهال يدخلون داخل يوم يدق الجرس
واول مادق الجرس يالله اصعد ونط:harhar1: .. كنت خبره بهالسوالف لاني ما مخلي يدار في الفريج الا وركبت عليه:fa34: ,, وولد عمي قزم شوي راح وطلع من الباب ...:harhar1: الحارس شكله كان راقد ...


المهم وطلعنااا نتمشى ,, بحكم انه الروضه قريبه من البيت يعني 5 دقايق بالسياره و15 ساعه مشي


ويلااااا امشوو يا عيال العم:harhar1: ,, لا احلى شي انه كنا نمشي بنص الشارع ياسلام عليكم:ice:



وفجاه والا اشوف حد يزاعج عليناااا:nono: وجان يطلع الدريول خخخخخخ :fa34:


واركض ماتركض خخخخ والدريول وراناااا لين ما زخنااا


وحصلنااا هاك الكف السنع:harhar1: خلانا نقعد بالسياره مانقول " أق"


لين ما وصلنا الروضه


وانهزبنااا هزاب هااك اليوم الله لا يرويكم اياه


بس الحمدلله ابوي ماعرف بالسالفه ولا كنت بتعلق باللوزه لين اليوم الثاني:fa34:



هاي السالفه مستحيل انساهااااا


بكمل لكم باجررر


تراا عندي سوالف وعلوم


:harhar1: بن عميي يقولك خيال الحب رش بترول فوق راسه عسب يتذكر:harhar1: خخخخخ


لاتنسى تسلم على بوخــلّـــي:kcl:

[دمعة شوق]

الســلام عليــــــــكم


يـامــرحبــا السـاع والله
مرحبا ملايين في ذمتيه ولا يسدن بـ شيبة الواحات
وشحالك ياخوي علومك ربك بخـير.؟!!
وين هالغيبه يابوي طولت تراك
يالله ماعلـيـه الغايب عذره ويـاه
:fa35:


أول شـي : على سالفـة الكـوره ، قهـر قـهـر ياخوي انك تلم ربـعـك بتلعبون وآخـر شي
تضربها خيانه ووتسـير عنهـم ، بـس انتـه ليـش ما كنت تـدرس يوم هم يدرسون ؟
يعـنـي بـشكل أصح مستغربه ليش ماتروح تدرس يوم محد كان متفيج لك خخخ ؟!
:sad4:
؛؛


سـالفـة شـارع خليـفـة : خخخخ اسميك ضحكتنيه اونه حريتـيـه ؛ جيه شو مستوي عنـدك
حرب وأسـر وأنـا مـا أدري لوول ؛ هنيـه ذكـرتنيـه بشيبتيه يطوليه بعمره يوم اقوله شي ابا شي من السوق يـقوليه بتخلينيه اتعنى واضرب خط صوووب الزحمـه والمشـاكـل عاده انا هنيـه احتـج كيف وابا شي ضروري والله ماعليه الشيـبـه يضربنيه بـولبـاس وانا ارمس اروحيه خخخخ ؛ ولا شبيبة البـيت يوم نـكـون ظاهرين السـوق ويكون يعني وقـت عشـى فـ اقوله ابا عشاء من صـحـاري
يـفـجـليـه محاظره عن هالسالفه وآخـر شـي يـاخـذلـيـه يأ من الروضـه ولا من راشـد علــي
:fa56:
؛؛
سـالفـة الـغزلان والمنـاصـير : خخخخ وراس صومـك خخ شو يعنـي يالشـويـبـه ؟!!
اسمـيـك ياخـوي مصرقـع ويـن تبـا يـوم تـحيـد عمـرك بتنضـرب ؛ لا لا خلك من ها السـالفـه
وخلـك ويأ سـالفـة الـهـوز خخخخ اسميـك دباسـه ما لـقـيـت مـكـان تــنـدس فـيه ألا حمام شيبتـك
:hist:
؛؛
سـالفـة التـرقيـم : وووين تبـا يـابــوووي لااا وبـعـد رقـم بيـتـكـم خخخ اسمـيـك مغبـر
:harhar1:
؛؛


والله سـوالفـكم حلـوه
هـواجيـس مشـتـاق
ياخوي الا شراتك ترا الخبال مورث
انا جيه قاصه على خوانيه الصغاريه مره كان عندنا عصافير
وكنـا جيه العصـر نسـبـحـهـن ومادري كيـف يتغيرن شكلـهـن
فـ شـلهـن خـويـه الصـغـيروني وحطهن فوق الدفايه اونه عسب ينشـفن
لوووووووووول خبله اسميه ونسـاهـن لـين ما تيبسن العصافير واشتون
ويوم دريت والله انيه صحت من الخـاطـر وعقـب قـلتـهم يالله روح ، ونسـير
وندفنهن ويبنا صلب جيه عود ( متأثـرين بالمسلسلات المكسيكيه )
وحطيناه على قبر هالعصافير
وصلينا عليهن وقرينا الفاتحه ورحنـا
:harhar1:
صـدق انا كنـا مخبـل ويـهــال / وأذكـر مره طاح ضرسـيه جان تقوليه أمايه العوده روحي
يبنيـتـي ودفنيـه وبالباجر بيظهرلج ضـرس غـزال ؛ وحليليه انا صدقت دفنته وكنت كل يوم اسقيه بمـى ( ماي ) وبعد جيه فتـرة سـرت ونبشـت الـقـبر ؟؟
خخخ واشوفه الضرس ماتغـير ؛ شليته ووديته لـ أمايه وقتـلهـا هيه تقصين عليه تقولين بيظهرليه ضرس غزال ابـيـض وهكووه ماظهـر ؛ خخخخ اسميها هزبتنيه من الخـاطر
:bye2:
؛؛
واايد سـوالف ياخوي بس مافيـه اهـذرب عليـك زود
خوفيـه ألا تقـوليه بـس خـلاص مافيـه اقـرا بعـد؛
كمـل ياخوي طفولتـك ظهر اللي في الخـاطر إمره لا تخلي شـي
واضحك على عمـرك على أيـام زمـان
brgll:
والسمـوحـه منـك طويـل العـمـر
والحمدالله علـى السـلامـه
أسعـدنـي وجودك من بينا مره ثانـية

[الشوق]

هيههيه اول مره اقرى الموضوع رغم اني ما افوت مواضيعك يالمنصوري ..

سوالف حلوه وسوالف شمه احلى وبنت الدلع كلنا لها لايام التمهيدي ..
تدرووون عندي سوالف لين قد شعر راسي يوم كنت اصغيره ولين احينه اتذكرهم .. بس شو بتقولون ههيههي ما فيا تضحكون عليا ..
اتم ساكته احسن
ههيههي
سلمت الانامل كلها اللي كتبت الموضوع
اختكم/ الشوق

[حبوبه دبي]

ســــوالفكــم حلـــــوووه

:fa35:

[الونه]

مره كنــّـا رايحيـيـن حديقـة ( بنـي ياس ) ؛ وانا كنــت ساعتـها ف الثاني الاعدادي ؛
كنـت حـاط ورقـه ف جيبي عشــان سوالــف ( الترقيــم ) و والله اني اذكر اني كنت كاتب بها :

( حبـّـيــتــج مـن أول نظـره وقلبـي اتـّــيــّــم بج تـتـيــم )
وتحـت هالكلام كنت حـاط رقـم بيتنــا لانه ماكان عندي موبايل

وللأسـف انا خلــطـت تذاكر الالعــاب مـع هالورقــه ؛ واشــوف ابوي مطرّش واحد من اخوانـي عشان
يبـى تذاكــر الالعـــاب خخخخ وانا بالغلط عطيتــه ( ورقــة الترقيــم ) ؛؛ والله للحيــن اتخيــّـل منظر ابوي الله يطول بعمره يوم يأشــّـر لي من بعيد بالورقــه خخخخخخ بصـراحــه وااايد ...


زقرت :a049:

خل عنك سطل الماي

لو ما كانت الذكريات غبيه و محرجه
عمرها ما بتكون ذكرى حلوه

[حبوبه دبي]

هههههههه

والله ضحكتنــــي

:birgits_giggle:

يالسـه اتخيـــل شكلــك كيـف كـان !!
:fa46:

[ملاك الليل]

اخي الكريم منصوري لدولة يسعد لي مساك وايامك بــ كل الخير

ماشاء الله يعني كل سوالفك من الكورة ؟؟باين عليها عاملة عمايل معك بس تعبت الوالد ربي يحفظه لك
من زود الهواش والضرب يلا يقولون كل ضربة بـــ تعلومة

يحفظك ربي ويخليك وبجد سرد موفق جدا عســـــــــــــاك عــ القوة
مودتي

(
0
)

الملكة

[مزن هتان]

الله يرحمه كان عصفور زين ..
:hysterical:
وناااااسه

***
أنا كنت وااااايد هاديه
حتى بالتمهيدي الاولاد كانوا مستحيل
يقعدون عنديه لأني كنت
اقرصهم
:a049:
واااايد هاديه

احممم نطمح بالمزيد أخوي

[قرموشة]

حـلوة سوااالفكـــــم
استاانـست واايـد وأنـا أقـراااهــا

=)

[فنجان قهوة]

ههههههههههههههههههههههههه ههه
احس انها ايام عجيبه خالص
و الله و ذكرتني بايام العدادي و الشطانه

[وعد]

اول شئ احسدك علي ذاكرتك الحديده
ثاني شئ انا مت من الضحك علي موقف الترقيم :4:

تكبر وتنسي خيو ,,,بس شكلك تكبر وتذكر :biggrin:

[وعد]

ههههههههههههههه

ذبحتوني من الضحك

والله سوالف تبرد القلب

تكبرون وتنسون
لا شكلكم تكبرون وتتذكرون :biggrin:

[وعد]

تسلمون علي هالذكريات الي توسع الصدر

تكبرون وتنسون,,,قصدي تكبرون وتذكرون:4:

[منصوري الدوله]

هههههه مب للرفع بس لي انا ؛؛ احبكم

[بريد ألكتروني]

موضوع شيق وجميل وحلو وممتع ..

وفي النهايه الموضوع طويــل مثل راعيــه :P

اشكر فنك يا بو سنيد على موضوعك التحفه

[المنصوريه]

هههههههههههههه

فضفضه حلـــــــــــــوه


ويحليـــــــــــلك شكثر انضربت

وكشششششخه سالفه الترقييم


اشكرك خويه

وارقب يديدك


ختك
انا

المنصوريه

[بنت الدلع]

انا فتحت دفتر مذكراتي اللي مخزن في مخي ..

مره كن انا وبنت عمتي وهي اكبر مني بسنه ..
شفنا عصفووور مسكييين متكسر ورقبته مكسوووره .. شليييناه اونه بنعاالجه ويبنا قطعة قماش ولفيناها على رقبته ( عاد مب انا الدكتوور هي الدكتووره ) ..عاااد هي شوي طلعت دفشه ولفت القماش بقوه ليش ما يمووت المسكييين ..
عاااد نحن خفنا .. اونه سرنا ندفنه عقب هي الكبيره قالتلي لازم انصلي عليييه .. انا كنت غبي بعد اوني هييه احسن عشااان يدخل الجنه .. هي الامام وانا واقف وراها ونصلي على العصفوور المسكييين ..

اياااام حلوه
..

ههههههههههههههههههه
هلكتني من الضحك
اونه نصلي عليه
كيف تخلي البنت اماام ؟ :a116:
ههههههه عجيب انته

---

في يوم من الايام كنت في بيت بنت خالي
والعب ويابنتها وولدها
وكان وقت القايله
كلهم راقدين
ونحن نخمس في الحوي
نلعب ونحن حفاااي
المهم انا كنت اشرد من علي عشان مايزخني
ييت بنخش بين سيارتين
والا احس بشي في ريلي
على بالي حصاه علقت
ظربت ريلي مرتين ماطاحت
يلست وشفت شو الموجود في ريلي
الا اشوووف مسماار شكله غريب:boxed:
من فوق جيه شكل الحلزون وكبيير
وبدت ريولي تنزف
اول ماشافني علي حط ايده على ثمي عشان ما اصيح واوعيهم وايون ينازعونا لول

كان الم فظيييع
وعقب حليله تم يحاول لين ماشل المسمار الكريه من ريلي
وشاد حيله ومستوي دكتور
حط لي ديتول ونظف الجرح وآيدين حمر
وحطلي لزقه

ومن بعدها تبت ادور في الحوي حافيه :surrender:

[شهوووودة الأمورة]

---

في يوم من الايام كنت في بيت بنت خالي
والعب ويابنتها وولدها
وكان وقت القايله
كلهم راقدين
ونحن نخمس في الحوي
نلعب ونحن حفاااي
المهم انا كنت اشرد من علي عشان مايزخني
ييت بنخش بين سيارتين
والا احس بشي في ريلي
على بالي حصاه علقت
ظربت ريلي مرتين ماطاحت
يلست وشفت شو الموجود في ريلي
الا اشوووف مسماار شكله غريب:boxed:
من فوق جيه شكل الحلزون وكبيير
وبدت ريولي تنزف
اول ماشافني علي حط ايده على ثمي عشان ما اصيح واوعيهم وايون ينازعونا لول

كان الم فظيييع
وعقب حليله تم يحاول لين ماشل المسمار الكريه من ريلي
وشاد حيله ومستوي دكتور
حط لي ديتول ونظف الجرح وآيدين حمر
وحطلي لزقه

ومن بعدها تبت ادور في الحوي حافيه :surrender:









اووووووووووووووف .. شو ها بنت الدلع .. شو مسويه بعمرج .. يتني قشعريره :m_9admah:

ذكرتيني بأخوي ..
يوم كان ياهل.. يشتغل كل المهن .. ( نجار, إمام, مؤذن, شرطي ...... كل شي )
فيوم.. أونه كان يسوي كرسي.. وله بالغلط دخل مسمارين في ريوله ..
أول ما شفته ع طووووووول صرخت ويلست اصيح .. :wacko::m_9admah:


اييييييييييي احس مادري كيف ..

اشطن عن اليهال ماشي ..:: بس حلوه هالأيام :inlove:

[منصوري الدوله]

((اليكم مع التحيه )) هذا اسم برنامج كان يطلع الظهر الساعه 2 و ممل وايد خخخخ

[منصوري الدوله]

تخيلو أرد ع اللي مارديت عليهم ! عادي ؟

[خنفروش]

عادي




سطـل مـاي عادي

[حلم الطفوله]

عادي ...عادي

[المنصوري]

كــل شـــي عاااادي .. الا الفراق

[فرح]

الله ياخذ شرك يالمنصوري

استانست على عمري وايد يوم قريت هالموضوع

ذكرتني بايام السكيك والنوامات

كلنا انضربنا ..... الله يجويهم خير اهالينا على الضرب وحسن التربيه

والله يرحم الاموات منهم

يسلم المنصورى