دبي وارتفاع الاسعار

[نجمة دبي]

السلام عليكم

دبي ..

تشكل هذه المدينه مركزاً هاماً للمال والاعمال في العالم, وفي السنوات الاخيره فقد تطورت تطوراً كبيراً, ونمت نمواً عمرانياً واقتصادياً هائلاً بحيث اصبحت وجهة لكل سائح من الغرب او الشرق.

ولكن ..

موضوعي هو :
دبي ... وارتفاع الاسعار فيها

وهجرة سكانها الى الامارت الاخرى

والمواطن خصوصا المتزوج .. ما يقدر يسكن في دبي .. يضطر انه يأجر شقه في الشارجه وعيمان

واذا طلع له ارض في دبي .. فأكيد بيتدين عسب يبني ( هو ناقص ديون !! )

الاسعار ارتفعت
البترول
الذهب
السيارات
الاراضي والبيوت
ايجارات الشقق + البيوت + المحلات ... الخ

الاجنبي يوم يي هنيه يشتغل .. راتبه فوق الـ 10000 درهم
من غير بدل السكن والمواصلات وووو .. الخ

الصراحه ..

المواطنين قاموا يهربون من دبي

شو الحل يعني؟

عطوني رايكم و وجهة نظركم



نجــــــــ دبي ـــــــــمة

[نجمة دبي]

شكرا لك اخويه الفارس ..

في اجانب عندهم شرات شهادة المواطن ..
لكن راتب الاجنبي اكثر من المواطن .

ليش؟



نجــــــــ دبي ــــــــــمة

[الحساس]

بخبركم سالفه اضحك..

دكتور اجنبي يابته الدوله عسب يمسك رئاسه قسم بالمستشفى..

طبعا راتبه اكثر عن راتب مدير المستشفى + ان الدوله تعطيه علاواة شرات علاوة غربه .. الخ..
الحبيب طمع!! ويبا يسوي نفسه فرعون... سار لهامور وقاله يساعده عسب يظهر له جواز اماراتي (الحبيب يبا يغدي مواطن عسب الفلوووووووووس) المهم حصل مراده وصار عنده جواز وجنسيه وفجأة..
:
:

:


طاح من اعلى قمة الهرم المرتبي..

لانه صار مواطن فالقنون يقول انه يعامل كمواطن .. وبما ان المواطن الدكتور معاشه على قد حاله.. فنزل معاش الدكتور الاجنبي اذا قلنا 40 الف لييييين 15 او 20 الف !!


يستاهل الطماع


لكن خلوا بالكم الفرق بين راتب الاجنبي وراتب المواطن!!!! فرق كبيييير

[خيال الحب]

اخوي الحساس .. انا بعد سمعت بمثل هالسالفه..



ومشكوره اختي ع الطرح الحلوو..

[لمّــاح]

مرحبا ..

رواتب بعض الاجانب اكثر عن المواطن لأن عقودهم اتكون عقود خارجية .. بمعنى آخر يصرفولهم بدلات وايد مثل ماتفضل الاخ الحساس ..
و بخصوص الاسعار .. هاذي فترة و بتعدي .. الاسعار بدت تنزل اصلا و عطوها وقت اكثر و بتنزل أكثر عن الحين ..
مثلا، محل من المحلات كانو بيدفعوله خلو عشان يطلع .. قبل كمن شهر كان ثمن الخلو مليون درهم .. الريال طمع و قال بصبر يمكن يدفعولي أكثر .. في وقتنا الحالي الخلو في هذاك المكان مايتعدى ال 700 الف .. و حتى الاجارات بتنزل وايد يوم بتجهز الابراج و المجمعات السكنية اليديده ..
و التضخم هذا شي طبيعي نتيجة ازدهار الاقتصاد بالاضافة الى ان عملتنا مربوطة بالدولار و الدولار ينزل مقارنة مع العملات الثانية و هالشي في مصلحة الامريكان لأن بضاعتهم الوحيدة هي الي مايرتفع سعرها .. !

[الرحيل]

الله يرحم الشيخ زايد بس هذا اللي اقدر اقوله

[ألم ترى]

بسم الله الرحمن الرحيم ..

الله يعينا ومحد يدري فالأيام حبلى ودول ! ..

شكرآ ع الطرح ..

[تحفه]

احيد مره .. قالو ان بعد عشرين سنه مستحيل حد يروم يعيش في دبي على راتبه !!

يعني ذوي الدخل الواحد .. بيهاجرون من بلادهم عشان يريمون يعيشون !!

الله يستر من الياي

[نجمة دبي]

انا بعد سمعت هالكلام ..
سمعت ان اللي راتبه 5000 واقل .. ما بيروم يسكن في دبي ..


وبعدين ؟ شو الحل يعني ؟



نجـــــــــــ دبي ـــــــــمة

[إسهر معي ليله]

السلام عليكم

الأسعار ارتفعت في كل الإمارات تقريباً،، يعني مش إمارة دبي بـس
يمكن دبي غير من ناحية الإيجارات والسكن.. مع ذلك ايجارات دبي
أرخص بـ وايد من امارة بوظبي!!.. اخويه ساكن فـ شقة في بوظبـي
ايجارها الشهري 120 الف!!.. في دبي ممكن تحصل بيت بـ نفــــس
السعر.. ويعتمد عـ المكان

::
::

اذا تكلمنا عن زيادة الأسعار بنلقاها في كل الإمارات.. وكل مواطنيـن
الدوله يعانون من هـ هالمشكله.. وما أقول غير الله يرحمك يا الشيخ
زايد،، من عقبك وايد أشياء تغيرت،، وأبشركم.. البترول بـ يرتفع :doh:

::
::

الكلام اللي نسمعه انه الواحد اذا راتبه أقل من 10000 ما يقدر يعيــــــــش
في دبي.. هـ الكلام للي يدفعون ايجار سكن.. ويبنون بيوت.. لكن اذا الســكن
متوفر فـ ما بيكون هناك الا فرق بسيط بين مواطن دبي ومواطن امارة ثانية

وهـ الفرق راح يكون في أسعار بعض السلع،، أما البترول والسيايير.. الخ
فـ ما في اي اختلاف بين اماره وثانيه..

::
::

فـ الأخير،، معظم هالإرتفاعات سببها طمع التجار.. وللأسف ما في حماية
للمواطن الضعيف،، سمعنا عن جمعية حماية المستهلك.. بس ما سمعنــا
انها سوّت شي !! :kkk:

مشكورة عـ الموضوع // الله يحفظكم

:::::
:::
:

[لبن مثلج]

اصدقون انا خاطري ابتعد عن الزحمة والحشرة (دبي) واسكن في امارة ثانية هادية لفترة معينه (استجمام ونقاهة) ،، واعيش حياة الثمانينات الي مافيها تعقيد ...

والحمدلله على كل حال

[نجمة دبي]

تطور دبي .. هل سيكون لصالحنا كلنا .. ام لصالح ( بعض الناس ) ؟

اخويه اسهر معي ليله ..

كلامك صحيح .. بس في مواطنين قاموا يهاجرون من دبي .. والسبب ارتفاع الاسعار .. صح ان الامارات كلها اسعارها مرتفعه .. لكن دبي غير ..



نجــــــــــــــ دبي ـــــــــــمة

[إسهر معي ليله]

بـ صراحه مادري ليش يهاجرون :no0: احسها صعبه

يعني اذا فرق الأسعار في بعض السلع،، فـ نقدر ناخذهم من مكان ثاني
مثلاُ افصّل كناديري فـ الشارجه،، او اي شي ثاني.. لأنه الشارجه ودبي
ما في فرق بينهم،، مرات الواحد يوصل فـ مكان فالشارجه أسرع مـــن
مكان في دبي!!

الصراحه،، أشوف انه صعب الواحد يتخلى عن المكان اللي عايش فيه
أنا عن نفسي استحاله اطلع من دبي،، لو شو كانت الظروف ان شالله
بـ نقدر عليها،، والله يعين :yes:

[نجمة دبي]

كلنا ما نقدر نترك المدينه اللي تربينا وعشنا فيها ..

لكن للظروف احكام ..


تسلم اخويه ويعطيك العافيه ..




نجـــــ دبي ـــــمة

[زامبروتا]

مـن الطبيعي جـدا أن ترتفع الأسعار في مدينة دبي نظرا للتطور الكبير التي تشهده هذه المدينة من سنة لأخرى كلما نكاد ننتهي سماع خبر في الملاحق الاقتصادية عن مشروع ضخم في دبي الا ونتفاجأ بغيره في غضون أيــام وهذا أيضا من أهم الأسباب التي بلا شك ستؤدي الى أرتفاع الأسعار نظرا لاقبال المستثمرين وبكم هائل للإستثمار في دبي وايضا إقبال إعداد هائلة على دبي على مدار السنة لمشاهدة
جنة الشرق الأوسط , الغلاء طبيعي في مدينة كدبي ولكن في المقابل أنا شخصيا أرى الرواتب الشهرية للعاملين في الدوائر الحكومية والخاصة تكتد تكون جيدة اذا ما قارنها بالارتفاع الحاصل والزيادات التي يأمر بها صاحب السمو الشيخ محمد بن راشد بين فترة وأخرى للمواطنين العاملين في دوائر دبي جيدة جدا بل وتفي بالغرض ولاتنسو ايضا مجانية المياه في دبي للمواطنين ...

سأتحدث عن تجربتي الشخصية ...
أنا اعمل في شركة نخيل العقارية المعروفة وهي صاحبة المشروعات الضخمة التي ستقوم بها دبي مثل
(جزيرة النخلية) ( الواجهة البحرية) ( مشروع العالم) وايضا مشروع ابن بطوطة مول وغيرها من المشاريع العملاقة ...
خلال سنة واحدة من عملي في نخيل زاد راتبي الشهري بمعدل40% ومع كل زيادة لإسعار الوقود
نجد ان هناك زيادة في البدلات كمثل بدل النقل أن ترتفع الاسعار وفي المقابل تكون هناك زيادة في راتبك
من 10,000 الى 15,0000 لا توجد اي مشكلة وقتها الا اذا حدث العكس ...
اذا في دبي ينطبق المبدأ ( عطني بعطيك) وكل شي بمقابل ... وهذا هو التوجه الصحيح
لايمكن أن نكون اتكالين على المنح حاول وغامر أدخل مجال التجارة حاول أن تعدد مصادر دخلك
لاتنظر اي قرار لخفض الاسعار لانه شبه مستحيل
أسعار النفط سترتفع لكنها لن تنخفض

ولكم التحية
مـــــــايد