المساعد الشخصي الرقمي

مشاهدة النسخة كاملة : تـــجهيز الـــكفن ....


المزوحي
07-05-06 ||, 04:11 PM
السلام عليكم

من فترة سمعت كلام ... عن تجهيز الكفن .. يعني الأنسان يشتري لنفسه كفن .. مستعد لهذا اليوم ... مثل ما الأم مثلا تزهب ملابس وأغراض للمولود اللي في الطريج لانها تعرف إنه بيوصل خلال شهر أو أسبوعين على سبيل المثال ..

كذلك يوم بتدخل تتسبح ( وانتوا بكرامه ) تزهب لبسك ... وعقب تدخل الحمام ...
قبل السفر .. الكثير يشتري لبس للسفر أو حتى يطلع لبس السفر يغسلهم يكويهم عسب يستعد للسفر ..

فهل نحن مستعدين لهذا اليوم ؟؟؟ المــوت الــمفاجأ ...
أمواج
07-05-06 ||, 05:26 PM
:mar7aba:
.
.
.
وعليــكم الســلام
.
دايمــا ً نقــرن المــوت بالمــرض . . .
يعني كــله حاطين في بــالنا إنه الانســان المريــض هو اللي يمــوت . . .
ونظــن كبيــرين الســن هم اللي يمــوتون قبــل . . .
واذا قــالوا لنــا فــلان توفــى قــلنا حرام صغيــر وماعاش حيــاته . .
وماندري إنه الموت مايعــرف لا صحيــح ولا مريــض ، لا كبيــر ولا صغــير . .
في مــوت مفاجئ ماله دخل لا بالعمر ولا بالصحــه . . .
.
.
أتذكر يدي محمد الله يرحمه كان مجهــز كفنـــه . . .
صح كان كبير في الســن بس كان بخيــر وبصحه وعافيـه . . وهالشي مامنعه من إن يجهــز كفــنه . .
لأن مؤمن بالمـوت المفـاجئ. . .
.
.
انا عن نفســي أبدا ماجهــزت نفســي للمــوت . . .
فكــرة المــوت بحد ذاتهــا تخوفنــي . . وماحب أبدا أفكــر فيها . .
.
:bye2:
الله يرحــمنا برحمــته
تحفه
07-05-06 ||, 07:26 PM
بسم الله الرحمن الرحيم .. والله الموت حق .. بس اسميني زغت يوم قريت العنوان ..

مشكور اخوي على التذكير ..
المزوحي
07-05-06 ||, 07:42 PM
نعم الله يرحمنا برحمته ويحسن خاتمتنا ... وعنوان الموضوع يخوف .. عيل كيف بعد الموت يوم يبتدي الحساب في القبر ..؟!
قرموشة
07-05-06 ||, 07:46 PM
أحــيد اني كتبت هـ السالفه قبل .. بس برد وبذكــرها ..
في الثنــويــه .. كانت عدنــا أبلــه .. وأول مرة تتعين ..
" مدرســة لغه عربيه " وكنـا نحــن طالباتــهــا .. وأتذكــر انــها قالت لنــا ..
انه أول معــاش استلمــته .. اشترت فيه كــفن .. لان الموت حــق ..
وما في قبله تنبيه أو اشاره ..
اممممم .. والتجــهيز للموت مش بس تجهـيز الكــفن ..
لازم انــه يكون جاهــز بأعمــاله جدام رب العالمين ..
:)
راعي الزعـامه
07-05-06 ||, 09:13 PM
شراء الكفن وتجهيزه يذكرك بالموت ويبعدك عن فعل المعاصي
الله يرحمنا برحمته
ويهدي الجميع ..
المزوحي
07-05-06 ||, 09:24 PM
بارك الله فيج قرموشة .. وصح الواحد يكون باعماله كذلك .. لأنه بنتسائل بعد الدفن ( في القبر )
ماينفع لا مال ولا ولد .. بس العمل اللي بينفع ( عمل الخير ) الحسنات ..
اللهم ثبتنا عند السؤال ..
المزوحي
07-05-06 ||, 09:24 PM
عاشق القلم شكرا على المرور .. ربي يرحمنا كلنا الأموات والأحياء ...
ألم ترى
07-05-06 ||, 09:42 PM
بسم الله الرحمن الرحيم
بصراحه انا واحد مني مش متسعد !
:fa36:
ضيعني شيء اسمه :
تسويف !
اللهم ارحمنا فوق الارض وتحت الارض ويوم العرض
صاحب الطرح
:fa35:
جزيت خيرآ لطرحكم الكريم لئنه بالفعل يغير ما في الضمير
المزوحي
07-05-06 ||, 09:53 PM
محب الشيخين ... آمين
المزوحي
07-05-06 ||, 10:20 PM
كل يوم..يموت إنسان وإنسان..ويولد ألف طفل !!
كل يوم نشتري ملابس وفساتين للطفل
القادم..وآخرون يعدون كفناً لراحل!!
كل يوم نضحك ونحتفل..وآخرون يبكون ويتقبلون التعازي
في فقيدهم !!

والحياة تستمر....


يولد الإنسان باكيا والناس يضحكون من حوله
تتلقفه الأيدي..تحنو عليه وتربيه وينشأ وينمو..ثم يموت
يموت ونفس الأشخاص الذين ضحكوا بالأمس
لقدومه..هم نفسهم اليوم يبكون رحيله!

والحياة تستمر..


يخوض معارك الحياة بصعوباتها..وقساوتها
ويعيش للأيام بمختلف أشكالها وصورها
يتخاصم مع هذا..ويهجر ذاك..
يودع صديقا..ويفارق حبيباً..ويتعرف على آخرون وآخرون


والحياة تستمر..


يكبر..وينسى من رحلوا عنه ومن ماتوا..ينسى أولئك
الذين دفنهم بيديه ويمشي في زحمة الدنيا على دروب
لا يعلم منتهاها ,يشهد مآسي الآخرين..يشاركهم
أفراحهم وأحزانهم..يختلط معهم
نجمة دبي
07-05-06 ||, 11:24 PM
الكفن جاهز ..


لكن ...


هل نحن جاهزين لهذاك اليوم ...


ليوم ...


ينتهي كل شي ..



ليوم تناسبه كلمة " النهايه "


للموت ؟؟



نجــــــــــ دبي ـــــــــمة
المزوحي
07-05-06 ||, 11:29 PM
الكفن يكون جاهز بحيث يكون عندج في البيت .. اما إن كان القصد زاهب وسهل نشتريه ...
فبقى تجهيز أنفسنا وهنيه مقصود الأعمال ...
نجمة دبي
07-05-06 ||, 11:36 PM
اقصد انه جاهز عندي في البيت .. وكل ما اشوفه اشعر بقشعريره في جسمي ..

الله يعينا على هذاك اليوم .


اللهم نسألك حسن الخاتمه ..



نجــــــــــ دبي ــــــــــمة
قلوب دبي
07-05-06 ||, 11:41 PM
اللهم نسألك حسن الخاتمه ..
يزاك الله خير يا خويه ..
لمّــاح
07-05-06 ||, 11:42 PM
السلام عليكم ..

صدقت في كل الي قلته، ذكرتني بالشباب ربعنا .. تخيل تشوفه اليوم وباجر تدفنه ..

الله يرحمهم برحمته .. و مثل ماقالوا الاخوان الواحد لازم يتجهز لهذا اليوم بشيئين، العمل الصالح و الكفن ..
الله يرحمنا و يرحم امواتنا .. :)
المزوحي
08-05-06 ||, 03:27 PM
آمين يارب ....
تصدق لماح ... يوم توفى زوج الموظفة اللي ويانا وهي مصدومة إنه مافيه شي ... سبحان الله ..
ممكن تفقد الانسان بأي لحظة وماتتوقع ...
عذبة الروح
09-05-06 ||, 05:00 PM
وعليكم السلام والرحمه

اول شي ..
اشكر اخويه لـ طرحك مثل هـ الموضوع الحساس

وثاني شي ..
اذكر اني من اول الاعضاء اللي شفت الموضوع
وكان في شريط المواضيع اليديده فوق
قلت بـ شارك بـ ردي .. وعقب قلت ما في داعي

ثالث شي ..
بعد متابعتي لـ ردود الاعضاء
تشجعت اني ارد واشارك وياكم بـ مداخلتي والموقف اللي صار وياي
لاني انا وحده من اللي مجهزين كفنهم


منكم اللي يعرف .. ومعظمكم ما يعرف
انه في الصيف الماضي عرفت اني مريضه بـ سرطان الدم (Leukemia)
ويوم سافرنا ويا الاهل كان مقرر انه ابدى العلاج
لكن والحمد الله ... تيسرت الامور وحصلنا متبرع وقرروا الاهل اني اسوي عمليه زرع النخاع
وقبل العمليه ... طلبت من امي انها تييب لي الكفن
واول ما سمعتني ..
تمت تصيح .. وقالت ما بتيبه واسكت عن هـ الرمسه

وعقب ياني الوالد .. وطلبت منه نفس الشي
حسيت انه ياته غصه ودمعت عينه .. ولكن وافق ...
ويابه لي بعد يومين اللي هو موعد العمليه
والحمد الله نجحت العمليه .. وهذي نعمه من ربي

ولين الحينه والكفن عند ابويه .. ومحتفظ فيه وين ما ادري
طلبته منه اكثر عن مره اخليه عندي .. وما طاع:no0:
ولكن .... بـ عون الله ، تم تجهيز كفني
والسموحه عـ المداخله


وتسلم يمناك اخويه
وربي يعطيك الصحه والعافيه وطولت العمر
ويعلك ذخر لـ دينك ووطنك واهلك
والسموحه مره ثانيه
ويسلمووونيشن مزوحينا

اختك
عـذ الـروح بـة
المزوحي
09-05-06 ||, 08:06 PM
عذبة الروح أشكرج على المشاركة والله يعطيج العافية يارب ويوفقج ... الحمدلله إنه في حد مزهب كفنه وأمس سمعت إنه للكفن أنواع .. بس وين يبيعونه وش الانواع هاااي ؟؟؟
نجمة دبي
10-05-06 ||, 12:28 AM
اللي عندي يايبينه من السعوديه .. بس شو نوعه ماعرف .. هو موجود عندي في الكبت .. لكن ما احب اشوفه ..


اللهم نسالك حسن الخاتمه ..




نجــــــــــــ دبي ـــــــــــمة
تحفه
10-05-06 ||, 07:14 PM
نجمة دبي .. شريتي كفنج!؟!؟!؟!
نجمة دبي
12-05-06 ||, 10:38 AM
شريته يوم كنت مريضه قبل 3 سنوات .. الدكتور قال اني ما بعيش اكثر من 6 شهور .. لكن الظاهر هذا ما طلع دكتور .. كان خاطري اشتكي عليه ..

تخيلي نظرات اهلي .. وعيونهم اللي مليانه دموع .. ما انسى هذيج الفتره طول حياتي ..

حياليا والحمدلله انا بخير واشقح بعد هههههههه


نجــــــــــ دبي ــــــــمة
المزوحي
12-05-06 ||, 10:40 AM
هو الواحد يزهب الكفن ومب شرط يكون مريض .. بس نجمة دبي ... هالدكتور مايصير يحدد موعد وفاتج لو كنت مريضة ...
نجمة دبي
12-05-06 ||, 10:48 AM
عسب جيه بغيت اشتكي عليه ..

اللهم نسألك حسن الخاتمه .. اللهم نسألك حسن الخاتمه




نجــــــــــــ دبي ـــــــــــمة
المزوحي
12-05-06 ||, 10:54 AM
آمين ...
عذبة الروح
13-05-06 ||, 11:42 AM
المزوحي

العفو يا خوي ..
والله يعافيك من كل شر

وعن سؤالك
اذكر ابويه مره رمس انه انواعه له صله بـمذهب المسلم
يعني شافعي .. مالكي .. حنبلي أو حنفي

وكلهم يرتبطون بـ سنه النبي محمد - صلى الله عليه وسلم
والطريقه اللي كانوا يكفنون بها الميت
والسموحه .. ترى ما اعرف اكثر عن جي:no0:

...+...+...

نجمة دبي

ٍسبحانه وحده اللي بـ ايده الاعمار
والحمد الله على سلامتج ولو انها متأخره
وخطاج الشر يا الغلا
نجمة دبي
13-05-06 ||, 03:03 PM
الغاليه عذبة الروح ..

الله يسلمج اختي والشر ما ييج ..

وربي يعافيج ويبعد عنج كل سوء ..

:)


نجــــــــــ دبي ــــــــــمة