رجييييييييم,,,,, الحقوا علي

[ذنـيـنـي]

السلام عليكم

اليوم سمعت ناس يرمسون عن رجيم اسمه رجيم الماء و هو يعتمد على شرب الماء بشكل كبير و يساعد هذا الشي على تخفيف نسبة الدهون تدريجيا

الي عنده فكرة عن هذا الرجيم, لا يبخل علينا بالمعلومات, لأنه هالسنه وزني بدأ يزيد تدريجيا و ابغي ارجع شرات قبل :kcl:

و اذا عندكم رجيم زين و ما ايوّع وايد قولولي عنه
طبعا انا بديت بـ برنامج رياضي بس احس اني احتاج الى حمية غذائية لأنه اكلي صار كله من غثايث المطاعم :fa36:
الحقوا على اخوكم قبل ما يمتن,, اخاف عقب البنات ما يسوولي سالفة في السناتر لو متنت brgll:

[الحاضر الغايب]

ان شاء الله يفيدونك خبراء الرجيم .. :)

[حبوبه دبي]

:fa37:

يـم يـــم شيــليـييييز كـوكـوززز مــاكدونــالد

نذاااله :harhar1:

مسكيــن ذنيــني انتفــخت عيــل هااا !! :boxed:

الله يسلــمك ريجيــم المــاي زيــن بعد ،،

اللــي اعــرفه لازم ع الاقــل تشــرب 7 غـرش مــاي مــن الصغــار فـ اليــوم :yes:

وتحــاول قــد مــاتقدر تشـرب مــاي بدل العصــايــر لانــه مـاشي ولا سعــره حــراريه فيه ،،

وحتــى قبــل لا تــاكــل اشــرب عشـان مــاتاكــل واايد :ice:

هــالــكلام مــن اخصـائي اغذيــه

:yes:

كــان يقــولي العكــس طبعــًاا عشــان امتــن :harhar1:

وحــاول حتــى اتقــلل من المقليــات اللــي فيهـا دهــون واايد ،، وكثــٌر من الخضــره عشــان تشبــع ،،

..

خلااص بسميــك يالدب :daleel:

[شوق القلوب]

السلام عليكم..

ذنيني.. اذا تبا اتخف ركز على هالامور..

1- اشرب ماي ع الريج الصبح.. ع الاقل دبه من الصغار.. صحيه واااايد لجسمك.

2- قلل من النشويات.. و خصوصاً الخبز..!!

3- حاول يكون غداك سلطه ، و اذا ما تصبر عن العيش.. اجبر نفسك اتحطلك غرفه وحده و ما تتعداها !! و حط من السمج و الدياي.. مثل ما يشتهي قلبك ! و طبعا كل ما كان مشوي كل ما كان أحسن.

4- حط × كبيره على اكل المطاعم !!

5- وبعد × على المشروبات الغازيه وشوي شوي عود نفسك ع العصاير الطازجه.

6- شي طيب انك بديت برنامج رياضي .. لا تنسى اتخصص لك ساعه مشي. واحلى شي انا لاحظته انك تمشي مشي رياضه ( مب تِـمشيّ )ويا شخص و تيلسون اتسولفون عشان ما اتمل بروحك و اتبطل سالفه المشي ! او انك تمشي ع جهاز المشي و حط جدامك تلفزيون و اندمج ويا واحد من الافلام.. بتحس انه الوقت يمر بسرعه و انت مب منتبه.

7- لا تاكل شي عقب الساعه 7 أو 8 في الليل.. خصوصاً اذا ارقادك الساعه 12 !

8- اتعشى شي خفيف.. فواكه او سلطه او شوربه.

9- مـــــــــــــــاشي كاكاو !!

10- لا تترى النتايج عقب اسبوع !! الموضوع يباله شهر شهرين لين ما يتحسن وضعك..

12- اتذكر شي مهم.. جسمك انته اللي اتشكله بتصرفاتك ! لو غلبت عليك ( الهلاعه ) فلا تضايج اذا شفت الكرشه كبرانه و الشحوم تتخزن.. كل شي بايدك.. و ما يسوى علينا الاكل يضيع اعجابنا بتناسق اجسامنا.

13- مافي أكل بين الوجبات.

14- اتريق في البيت قبل الدوام ، جداً مهم لصحه الجسم.

15- اتأمل أكلك.. وشوف لاي درجه أكلك صحي.

16 - امضغ الاكل لفتره طويله ، لانه غالبيتنا نبلع الطعام و احنا ما مضغناه عدل و هذا من الامور اللي اتسبب عسر الهضم. و المضغ لفتره اطول يحسسك بمتعه الاكل اكثر.

17- لكل يوم خصصلك دبه ماي عوده اتخلصها ، و كل ما شربت ماي اكثر كل ما كان احسن.

- بصفه عامه ما احبذ الرجيم ، لانه غالبا ما يكون ممل ، و اتحس انك محرووووم.

- اتذكر حديث الرسول وشوف الحكمه - بما معناه - ثلث المعده للهواء و ثلثها للماء و ثلثها للطعام ، واتوقع المعده بحجم كف اليد ( مب متأكده ) و اتخيل التقسين بتعرف المقدار اللي لازم نمشي عليه.

- الكلام أعلاه كلها ملاحظات شخصيه :)

.
.

أتمنالك الصحه و العافيه :)

[وعد]

انا ريجيم الماي اول مرة اسمع عنه الصراحه
بس والله الي عنده معلومات اكثر يا ريت يخبرنا لانه ودي اتبعه انا بعد:fa37:

[مايهزك ريح]

بالنسبة لرجيم الماي ما عندي فكره بس الرجيم اللي بحطة مجربنه انا شخصيا ..
ولازم على وجبة الغداء تاخذ فيتامين ( حبة وحدة ) مثل A to Zinc تقدر اتحصله في الصيدليات ..
أو تاخذ all vitamins for men وبتلقاه في سبينس ..
ولازم تمشي على الأقل ساعة ( أنا كنت ولازلت امشي على حديقة الصفا ) :puppyeyes:
وهذا الرجيم :
الفطور:
1 كوب من الحليب القليل الدسم
1 خبز سمون أو 1رغيف أسمر صغير لبناني أو 2 قطعة توست أسمر
2 ملاعق كبيرة من اللبنة القليلة الدسم أو 30 غ من الجبنة الدسم أو 4/1 كوب جبن قريش
2 خيار مع 1 طماطم

الغداء:
1كوب صالونة (بامية أو ملوخية أو لوبيا) أو الخضار الصينيه مع 120 غ من الدجاج أو اللحمة
2-5 كوب سلطة أو خضار مسلوقة مع 2/1 ملعقة زيت صغيرة.
2/1 رغيف أسمر صغير لبناني أو 3/2 كوب أرز مطبوخ

أو

قطعة متوسطة الحجم (120 غ) من السمك المشوي أو الدجاج أوالستيك
2-5 كوب سلطة أو خضار مسلوقة أو تبولة مع 2/1 ملعقة زيت صغيرة.

أو

1كوب معكرونة مع 0.5 كوب صلصة الطماطم و 90 غ من اللحمة
3-5 كوب سلطة أو خضار مسلوقة أو تبولة أو فتوش (بدون خبز ) مع ملعقه صغيره زيت.

أو
150 غ مشاوي أو 300غ من الروبيان المشوي
3-5 كوب سلطة أو فتوش (من دون خبز)

أو
1 كوب من شوربة الخضار مع 120 غ من اللحمة أو الدجاج المشوي
3-5 كوب سلطة أو فتوش (من دون خبز)
2/1 رغيف أسمر صغير لبناني أو 1 قطعة توست.

أو
سندويش مؤلف من:
2 قطع من صدرالدجاج أو (المرتديلا القليلة الدسم ) أو الجبن القليل الدسم
1 سمون أو 2 توست
خضار مشكلة


وجبه خفيفه:
15 قطعه من البسكويت المالح ( البسكويت المالح موجود في سبينس وشويترام في قسم اغذية الرجيم وفي نكهات منه اسمه Rice Crackers وعليه وحده يابانيه )
2 قطعه من الشوكولا أو 1 فاكهه ( الشوكولا موجوده في سبينس في قسم اغذية الرجيم )
شاي أخضر



ألعشاء:
1 كوب من الذره



الأكل القليل بالسعرات الحرارية:
خل، ملح، بهار،بصل، ثوم، أعشاب، خس، خيار، فجل، بقدونس، سبانخ، فطر، دايت بيبسي أو سفن آب (1-2علب في النهار)، شاي أو قهوة مع محلى فقط.

والسموحة منك .. وان شاء الله تضعف .. :ice:

[تحفه]

لا تتعشى بعد الساعه سبع فليل ,, العشا ياثر على الوزن بشكل كبير ..

[ا ل غ ل ا]

ييت على العوق يا ذنيني ،، والله أنا بعد من متى أبا أضعف ،، شكلي بسوي رجيم الماي ،، بس عندي معلومه ،،

اللي يتبع رجيم الماي ،، أول أسبوع يزيد وزنه من 2 إلين 5 كيلو ،، بس لا تهتم هذا وزن الماي في جسمك ،، عقب باسبوع وأنت مستمر على النظام بتشوف نتايج مبهرة ..

[لمّــاح]

مرحبا ..
مثل ماتفظلو الاخوان، هاذي احسن طريقة للرجيم و تركك للنشويات ( مثل الخبز و البطاط ) معروفه و اسمها طريقة الدكتور اتكنز للرجيم ..
انا حتى آكل في المطاعم، طول ايام الاسبوع اكلي يكون برع (ريوق+غدى+عشى) ماعدا الخميس آكل في البيت بحكم انه يوم عائلي و اتغدى ويا هليه و يدتيه ..
هناك ايضا من الاشيا الي اتساعد على الرجيم خصوصا ان الرجيم يسببلك صداع في بعض الاوقات و اكتئاب ( لنك بتحس بالحرمان ) ف مثل ماتفضل الاخ مايهزك ريح يامركب هوانا :harhar1: استخدم الفيتامينات لأنها بتعوضك عن الفيتامينات الناقصة فمابتحس بالصداع ..
هناك ايضا نوع ثاني من الحبوب اسمها ريداكتيل هاذي الغرض منها منع الشهية يعني ماتشتهي الاكل .. الدوا هذا اضني يصرفونه عادي في الصيدلية لكن افضل انك تستشيرلك حد من الدخاتره قبل لأنه يسبب مضاعفات لبعض الناس ولازم يحددلك كم مللي جرام يحتاج جسمك ..

ذكرتني بكتاب تركي الدخيل، يوميات سمين ســابق،، لازم تقراه :harhar1:

[طير الحب]

أنا قريت عن أنواع وايد من الريجيم بس أنا ما عندي إرادة إني اتبع ريجيم والحمدلله وزني ينزل بدون ريجيم بس اهم شيء ما تحرم نفسك من الأكل حاول تغير حصص الأكل يعني أكل من كل شيء بكمية أقل

[ذنـيـنـي]

الحاضر الغايب

تسلم عزيزي على مرورك,, ان شاء الله الاخوان ما بيقصرون

==============

حبوبه دبي

عاد مب دب :narr:
بعدني ما وصلت لمرحلة السمنه
بس جي مبطبط شوي :kcl:

انا من زماااااااان ما اشرب بيبسي و هالسوالف
دايما اشرب ماي و ادلع عمري بعد خخخخ, اشرب ماي ايفيان و فولفيك :fa35:

[ذنـيـنـي]

شوق القلوب

النصائح الي قلتيها وايد افادتني :yes:

العيش و النشويات بشكل عام,, اقدر استغنى عنها لو سنة كامله

بالنسبة للمطاعم,, المفروض اني اسوي X كبيييييييير عليهم, لأني تقريبا كل يوم يكون ريوقي و عشاي من المطاعم أو الكفتيريات :kkk:

و بالنسبة للمشي
برنامجي الرياضي فيه مشي سريع لمدة ساعة يوميا و اقطع فيه تقريبا 7 كيلو متر
و في نهاية الاسبوع نمشي على كورنيش الممزر من عند منزال القوارب الى حديقة الممزر و من ثم الى نهاية الكورنيش و نرجع نفس المسافة,, ناخذ ساعتين تقريبا من المشي المتواصل و المسافة بالضبط 14 كيلو :fa38:

اشكرج على النصائح اختي الكريمه,,
بخليها في بالي و بحاول اطبقها :smartass:

[شمه]

هناك ايضا نوع ثاني من الحبوب اسمها ريداكتيل هاذي الغرض منها منع الشهية يعني ماتشتهي الاكل .. الدوا هذا اضني يصرفونه عادي في الصيدلية لكن افضل انك تستشيرلك حد من الدخاتره قبل لأنه يسبب مضاعفات لبعض الناس ولازم يحددلك كم مللي جرام يحتاج جسمك ..
:harhar1:


لا لا هاي الحبوب .. نحن دارسين عنها في الكليــه تسبب العقــم.. :puppyeyes:

ودر الكاكاو و بتضعف..

و لا تشرب ماي وانت تتغدا ولا تتعشــى يظهر الكرشــه.. لووول ..


امممم.. وجان تبى طريقــه انا سويتــها بس هي شوي ضـــاره..

امم...



كنت اكل ع الغدا جبس اصابع البوبو(الحين يسمونه اصابع البطاطا) (مب كرتون تاكل ..جيس واحد كل يوم).. وعصير ليمون حامض بالنعناع من غير شكــر..


و ع العشــى كنت اكل كيوي (حبه مب درزن) او اناناس او اشرب ليمون بالنعناع ويا صمون جبن (صمونه وحده مب جيس صمون).. وبس

هيه و ع الريوق كنت اشرب كابتشينوا.. او هوت جوكلت.. حاول اتخفف الشكر ..

هذا كان اكلي طول اليوم.. طبعا هالشي ع ايام الكليـــه.. و كنا انرد البيت متأخرين فهالشي ساعد اني ما اكل شي..

:puppyeyes:

[تنينه]

brgll: brgll: brgll:

حلـــيــلك يــا نصوور عيل أنتفخت ( نصور المنتفخ:hist: ) ,,

يقولون ان الريجيم معاناه :ice:

أنا الصراحه أنصحك أنك تاكل عادي يعني الوجبات الثلاث بس اتخفف من الدهون وهالسوالف اللي أتمتن ,, ومع الرياضه والمشي أن شاء الله أترد شرات قبل أحسن ,, وعقب الكل بيعبرك وبيسو لك سالفه ف السناتر :harhar1: :negab:

أن شاء الله بس قدرنا نلحق عليك P:

تنينه :ice:

[لمّــاح]

شمــه .. !


و لا تشرب ماي وانت تتغدا ولا تتعشــى يظهر الكرشــه.. لووول

من فتره مب طويله وايد، يمكن سنة، وايد قمت يوم آكل اشرب ماي ولا اي شي سائل .. لأني وايد اغص :boxed:
الكرشه الحين لاعبه دورها، الي مايعرفني يتحراني ادردع نص الليل :nono:

و عن الرجيم الي قلتيلي عنه، بجربه اذا زين .. !

[حلم الطفوله]

السلام عليكم

كل نصايح إختيه شوق القلوب أكيده في تخفيف الوزن:yes:

يعني حافظ على الثلاث وجبات وابتعد عن لعيوش والخبز والنشويات ...

وقبل كل وجبه اشرب 3 كاسات ماي ...وامتنع عن الاكل من الساعه 7 لمغرب تماما ...

والرياضه والمشي اهم شيئ ....على الأقل كل يوم العصر أو عقب المغرب مشي لمدة ساعه على الأقل

لماااح جرب هالطريقه ويا ذنيني وبتودع الكرش نهائيا ....

[لمّــاح]

مرحبا ..

اختي حلم الطفولة، بإذن الله بجرب ليش لأ .. أصلا بديت انا من اسبوعين بس خربت مرتين على عمري..

أنا افكر في شي مؤقت له نتايج سريعة عشان الصيف قريب وماعندي وقت ..
وبخصوص الرياضة، الاوقات الي ذكرتيها هي احسن الاوقات لأن بعضهم يفضل انه يلعب رياضة فليل وهذا غلط، لأنه يخلي جسمه يتنشط و عقبها يحاول يرقد لكن بدون فايده فبيأثر على يومه الثاني بالكامل لأنه بينش وهو تعبان ماشبع من الرقاد ..

[ولد الحكومة]

السلام عليكم ورحمة الله وبركااااته

هلا وغلا بولد العم .. اشحالك وشوعلوووومك الغالي ...

اخوي والله الرجيم ما يباله شيء ، بس اتكووون عندك اراده قويه وعزيمه وبتحقق الى تباه.

والله انا من فتره سويت رجيم وخفيت وااايد وبعطيك بعض النصائح وباختصار مفيد :

1. عليك بالرياضه ... على الاقل 3 ايام في الاسبوع.

2. ابتعد عن الاطعمه الي فيهااا دهوووون.

3. ابتعد على المشروبات الغازيه + المشروبات الي فيها نسبه السكر عاليه.

4. ابتعد عن الوجبات السريعه ( مثل كنتاكي ، بيتزا ، هارديز ، ماكدلوندز ..... الخ )

5ابتعد عن الحلويات بانواعهاااا مثل ( السنكرز ، الجلكسي ، الكيت كات ، ........... الخ )

6. ابتعد عن النشويات مثل ( الخبز + المعكرونااا )

7. عليك بالاطعمه المشويه.

8. الاكثار من شرب الماء.

واسمحلي الغالي .... وهذا باختصار !!!

تحياتي :
ولد حكومتك.

[ديج الفريج]

السلام عليكم ورحمة الله وبركاته ....

الرد المنطقي الوحيد اللي قريته هو رد ولد الحكومه

ماشا الله الشباب مستوين دكاتره ويعطون وصفات طبيه :cop:

لماح ..

كل انسان عنده كتلة وكثافه معينه من العضلات والشحوم تختلف عن غيره
وبالتالي الريجيم اللي يناسب شخص ما يناسب الثاني

بعطيك وصفه سحريه ...
قال الرسول صلى الله عليه وسلم عن نسب الماء والاكل اللي المفروض انها اتكون في المعده كالتالي :
ثلث لطعامك وثلث لمائك وثلث لهوائك

فاللي قال عن ريجيم الماء راح يوديك في داهيه :bye2:
لأن الجسم البشري يحتاج للماء والفيتامينات والمعادن والبروتينات والنشويات والكربوهايدرات عشان اتمد الجسم بالطاقه
راح ينزل عندك مستوى السكر بنسبه خطيره بعد فتره من ريجيم الماء وهذا أبسط مثال

نصيحتي ...
خذ ريجيمك على أيدي متخصصين
يعني عند طبيب التغذيه

وكان رسولنا الكريم عليه أفضل الصلاة والسلام صدره وبطنه الشريفين على نفس المستوى
يعني ما كان عنده كرشه لأنه كان ياكل فقط عشان يتقوى على العباده
وكان أكله عباره عن تمر وخبز
لأن التمر يحتوي على نسبه ممتازه من السكر أي الطاقه اللي تحتاجها أجسامنا وأيضا يحتوي على نسبه كبيره من المعادن ثم الفيتامينات
وكذلك الخبز يحتوي على الحبوب والقمح وطبعا الماء
واذا كان اللحم موجود اكيد كان ياكله وخاصة الكتف

يعني كل اللي اتحبه
لأن الدراسات أثبتت ان الانسان اللي ياكل وهو متضايق أو ياكل أكل ما يحبه الجسم يحول ها الأكل الى سموم ...

الله يعطي الصحه والعافيه للجميع

وآآآآآسف عالاطاله

[ذنـيـنـي]

وعد
تسلمين اختيه على طلتج,, في انتظار رأي الي عندهم فكرة عن الرجيم

ما يهزك ريح
تسلم عزيزي على طلتك
اليوم عطوني برنامج غذائي في الـجيم مع برنامج رياضي لمدة شهر و ان شاء الله تكون النتيجه ايجابية

[الشوق]

لماح :) عسب تقضي على الكرشه عليك برياضة البطن .. تراها وايد مفيده صح اتعب اول شي لكنها مضمونه 100%

نصووور :) اذا بغيت تتغدا ابتعد عن اكل اللحم والدياي عليك بالسمج .. فهو افيد ..

خفف من الدهون والوجبات السريعه .. تراهم يمتنونك اكثر ...

المشي يوميا على حديقة الصفا مفيده .. واذا ما رمت يمدحونه بحر جميرا .. اركض هناك ..

.
.
اذا يعت عليك اب اكل الفواكه تراها مفيده ( التفاح والبرتقال وايد اوكي )
.
.
.
هاللي اعرفهم
وجربهم ..
لا اتقيس وزنك كل يوم كل يوم خلك في الشهر مره قيس الوزن

[الـيـاه]

سلاام !! :fa37:

صراحه أنا ما أأيد شي اسمه رجيم بكل أشكاله لانك تكون معود جسمك على أكل معين
وكربوهيدرات وسعرات حرارية معينه واتي تسوي رجيم تصدم جسمك في مرحلة مش متأقلم عليها

فـ هالشي يأثر على جسمك بشكل سلبي حتى لو ضعفت :boxed:
بس تختل الأنظمة ..


أنصحك بالأكل الصحي :yes: .. إذا صدق ناوي ترد لوزنك الطبيعي
وتعرف السعرات الحرارية لأي شي بتاكله والقدر اللي يحتاجه جسمك
وابتعد من أي شي فيه دهون + نشويات


.
.
.

[طفلة من هذا الزمان]

أنا لو منكم ما اسويلــه سالفـــــة :boxed:

لاااا و ادعي عليه يستوي دب صدق " حق الشماتـــــه :fa34: "

نوايـــــاه مب زينــــــــــة ،، :cop:

اسولف اخويه ..
اعتقــد أختي شوق القلــــــوب كفت ووفت في ردهــا ،،

بس الصيف فترة مب مناسبـة حق الريجيم .. لأنه متعته في الكسل والأكــل والرقــاد :fa34:

طفلـة
:ice:

[بطوطة]

hhhhhhhhhhhhhhh

[تحفه]

أقوول .. النشويات عباره عن شوه؟ اقصد شو من اكل وشو من فواكه او خضراوات!

[ذنـيـنـي]

بوظبي

النشويات هي العيش,, الخبز بأنواعه,, البطاطا

[تحفه]

بس هذا وايد وااااايد حلو .. وبصراحه هو الشي الوحيد الي يعيبني في الاكل .. واصلا انا احينه اسوي رجيم كنت سبعين واحين رديت خمس وسبعين .. وسرت اليوم عند دكتور وايد فنان .. سوالي منيو اكل وايد حلو ... تصدق اني اروم آكل باستا مرتين في الاسبوع بشرط إن في اليوم الي آكل فيه باستا العب رياضه عشان احرق الكالريز الزايدين ع جسمي و اتعشى عشى خفيف ..

بخبرك قصه واحد ريال شفته كان يايب حق الدكتور هدايا .. جي شباب عمره يمكن 23 او 24 او22 .. والله إنّــــه جمييييييييييل حتا ربيعة ماما كانت ويانا اول ماخطف حذالنا قالت ماشاء الله عليه مملوح .. بعدين يوم دخلت بعده قالي الدكتور قصة هالولد .. والله كوووول يعطي الواحد دافع يستوي fit بس الحين بصراحه شديده مش متفيجه توني الساعه وحده ونص ناشه من رقاد .. ومتحسفه لان رقادي بيخترب ومودي تعبان .. أبي آكل بندول نايت علشان ارقد .. بس لاني زاطتنلي حبتين الساعه خمس العصر "كنت مصدعه" اخاف يصير فيني شي ويقولون تبي تنتحر لووول ..

اقول حد عنده فكره اذا عادي اروم اكل بندول بعد ما مر هالوقت؟! ... حرام مابي رقادي يعتفسسسس

[مجموعة إنسان]

النشوياات ..
الخبز وانوااعه والحبووب ..

بس يقولون ان احسن خبز للرجييم الخبز الأسمر

[قلوب دبي]

^_^

احم احم

وصل صاحب الرجيم
خخخخخ
:fa37:

السلام عليكم

يا طويل العمر انا مسوي رجيم كملت شهر تقريبا

ولله الحمد النتائج عندي ممتازه
طبعا ما مشيت على كلام حد ولا شيء
حطيت في بالي اشياء معينه و قلت لا بد من اني اخف
النتيجه الكل لاحظها عليه
و خاصه اللي شايفني قبل شهر واللي يشوفني الحينه

طويل العمر كل ما في الامر اشياء معينه بقولك ..

اهداف اساسيه :
الاراده .
العزم .
نقطه ترغب الوصول اليها .

الرياضه :
رياضه ما يقارب 5 ايام في الاسبوع الى 6 ايام و جعل يوم واحد للراحه .
لابد من انك تجري 3 الى 4 كيلو يوميا ..
خلك على هذا البرنامج اسبوعين .
و بعد الاسبوعين اجري 3 الى 4 كيلو + 3 الى 4 كيلو بالسيكل .
+
مع كل التمارين اللي فوق اهم شيء تمارين البطن + تمارين الريل و الخصر .

الاكل :
الصراحه اهني يبالك اتسوي مقاطعه من خاطر .
اولا ممنوع المشروبات الغازيه .
الريوق
اول شيء قلاص ماي .
سندويج جبن واحد .
بس

طول فتره النهار خلج على الكوفي و الجاي في الدوام طبعا ارمس .

الغدا
سلطه فتوش .
و ماي ^_^
بس


العشا
اذا كنت يوعان وايد وايد وايد
كل لك سلطه فتوش بس
او شوربه
والافضل انك ما تتعشى


طبعا بين فتره و فتره اتذوق القطعه صغيره من الدياي
عن خاطري او قطعه من السمج .. بس شويه

اذا كلت و حسيت انه بطنك منتفخ حاول انك تمشى على الاقل في الفريج لفه .


برنامجي شويه صعب و لكن صدقني نفع ويايه ..
طبعا الحينه متغدي انا و مب مرتاح
بجهز شنطتي عشان اسير النادي ..
:fa38:


في النهايه


مالك الا قلوب
خخخخخخ
brgll:

[تنينه]

قلووب دبي :puppyeyes: ,, صدق ريجيييم قااسي:boxed:

[حلم الطفوله]

السلام عليكم

ما شاء الله عليك يا قلوب ....برنامج حلو ! بس احس يوعت عمرك وااااايد:kkk:

المشي واااااااايد زين ....وهو السبب الرئيسي في تخفيف الوزن لأنه يحرق الكالوريز

ما إلك إلا قلوووووب:yes:

[قلوب دبي]

صدقج يا تنينه المتينه ..
قاسي وايد .. بس الحمد الله في نتايج ايجابيه ..

حلم اليهال ..
هههههههه اكيد مالك الا قلوووووووب
تراني اقولكم ارحموني في الواحات ولا اتحطون اكلات حلوه خخخ

[قلوب دبي]

تذكرت شيء ..

حاولوا اتكثرون من السوائل ..

[تحفه]

قلوووووووب دبي رجيييييييمك واااااااااايد قاااااااااااااااااااسيييي

[تحفه]

مب زين لازم يكون اكلك متوازي وصحي ..

والي ينزل بسرعه يرتفع بسسسررررررررعه ويرد دبل ترا ;)

[نويّر]

أحلى شي النتيجة عقب الريجيم
يا سلااااااااااااااااااااااااااااام:)
راحة نفسيه :)

[ا ل غ ل ا]

قلووووب أنا لو سويت نظامك بموت ..


أنزين كم نزلت هالشهر ؟!

[قلوب دبي]

بوظبي ..
هو قاسي قاسي ..
بس وايد اوكيه .. P:

--
بوظبي
لا اتمين اتزيقيني انتي الحينه ..
شو اللي ينزل بسرعه يرتفع بسرعه و دبل ..
خيييييييييبه لا شوه دبل تبيني اتخبل نو وي :(
يااا رب انزل 5 كيلو و يا رب احافظ على وزني عقب ^_^
ادعيلي انتي بعد شو هااا

----
نوير ..
صدقج راحه نفسيه ..

---
ا ل غ ل ا
ما علي يربي طشونه خخخخ
هو طبعا يعتمد عوزن الشخص ..
والله نزلت شيء حلوو ..
يعني على طولي ووزني وايد بريفكت بستوي جريب ..

[خيال الروح]

ا ل غ ل ا

لاتتبعين رجيم قـلوب دبي

صح انج بتضعفين في وقت قصير ,, بس هالوزن الى خسرتيه

بيرد مثل ما كان

وما بتسفيدين شي

:

[صدى جوفي]

.:.
~لا ريجيم ولا هم يحزنون.......:ice: ~

تكفيني حالة نفسيـة - اكتئاب مب خبال- تنزل الكيج عندي :harhar1:
.
.
الله يعينكم

[قلوب دبي]

:boxed:

خيال الروح
:narr:
شو اتقولين انتي حق ا ل غ ل ا
:qor9anah:
ان شاء الله ما بيرجع بسرعه :no0:
بتم احافظ عليه :bye2:

******

صدى جوفي
خخخخخخخخخخخ
مفتكه من حشره الرجيم :ice:

[تحفه]

صدقني الي ينزلون بسرعه يرتفعون بسرعه لا وبعد يردون الي ضعفوه واكثر .. هاي معلومه موثقه مب من مخي إمخمختنها .. انا انصحك بالـ غذاء الصحي المتوازن

[قلوب دبي]

خلاص اعتقد جي وزني زين مستوي الحينه ..
من يوم الاربعاء ببدأ بالاكل و بنتظام ويا الرياضه ..
ما تم حد ما خوفني من صوب امايه ..
و ربعي و الواحات .. :$

[بنت الدلع]

الله يعينك ياقلوب

لا ماعليك

اهم شي انك تحافظ على اكلك

ولا تودر الرياضه

لانها واااااااايــــد مهمه

وان شاء الله مابتزيد

==

يحليله غمظني ^^ لاتخوفونه

[الهيثــم]

بو غنيــم شكلــك ناوي تنتـــحر ..

[ذنـيـنـي]

ما لكم الا عيادة الدكتور نيوترشن

امس سرت عندهم و اليوم بديت ببرنامجهم
برنامج سهل و يعطونكم نوعين من السم قصدي الحبوب
الاول اسمه سمارت دايت و الثاني اسمه سوبر بيرنر
شغلت هالادوية هي تحطيم و تذويب الدهون المتراكمة في الجسم و ازالة السوائل المختزله في الجسم

تخيلوا طلع عندي over wieght 24 kg !!
و انا مب حاس بعمري !!

على حسب كلامهم المفروض انزل في اول شهر ما بين 6-12 كيلو و ادعولي بالتوفيق عسب انزل 12 او اكثر D=

بس انا ما ابغي استمر وياهم الين آخر شي عسب ما استوي ضعيف
ابس ابغي انزل هالكمن كيلو الزايدات

يعني انا المفروض اكون 66 بس انا ابغي اكون 75، مب اقل من جي ولا اكثر من جي

و الي عنده اي سؤال عن نيوترشن يسألني و ان شاء الله بجاوبه عقب اسبوع من اليوم، عقب الفحص الاول

[مايهزك ريح]

ذنيني .. انا اللي اعرفه انه مب زينه هالأدويه .. لأنه يمكن يكون لها اعراض جانبيه ..
وهم ما بيقولون لك هالشي ..
لو كانوا عاطينك دايت بدون ادويه اوكيه .. بس بها الأدويه .. اخاف يستوي عليك شي ..
تحمل على عمرك حبوب .. راس مالنا ذنيني واحد ..
والله يوفقك ..

[ملاك الروووح]

:

هلا والله ذنيــــني


كل حد يمدحه والله ..

وأنا أعرف وحده كانت متييييييييينه ويوم راحت عنده .. ضعفت بشكل فظيع

ما عرفتها يوم شفتها :fa54:

:

لوووووووووووووول عيبتني السم خخخخخ

بس شرات ما قال ما يهزك ريح .. أحس انه مب زينه الأدويه والحبوب

أهم شي يكون ريجيمك اللي تتبعه صحي .. اخاف يكون له باد افكتس والله ماتضمنهم تراك:k_special2:

ترى الوزن هم يشوفونه على حسب الطول .. ويقولون لك كم الوزن المناسب لك ..

يعني إذا وزنك المفروض يكون 66 .. اتوقع طولك 176 .. ف هالحدود صح ؟:k_icon9:

انت روحك شوف شو اللي يناسبك ... واذا حسيت انه وصلت للوزن المثالي ..

خلاص وقف الدايت .. بس عقب عاد لازم تتبع نظام صحي عدل ..

وخل عنك أكل المطاعم :h_qor9anah: ترى هي اللي تزيد الوزن ..

:

يالله بالتوفيق لك ذنيني ..

وان شاء الله اتحس بالفرق ف ظرف هالشهر .. :a049:

بشرنــــا عاد ..

[طير الحب]

ناصر...بالتوفيق وخبرنا بأخر التطورات مع اني ما انصح بالأدوية...وفعلا اعرف وحده راحت ونزل وزنها بشكل رهيب...بس بعدني لا أؤمن بهالسوالف ...الخوف انه هالأدية تأثر على هرمونات الجسم بالنسبة للشاب او الفتاة...وشو ما صار من وجهة نظري هالعيادات هدفها ربحي.

[العجيبة]

^^ لا تكسـروا مياديـفه ..

خلوه يجـرب ..

بس صدق اسأل عن هالأدوية عند أكثـر من دكــتـور .. تأكــد منها ..،

توني شفـت الموضوع .. ولا كـنت بنصحـك بأخصائيي التغذية اللي في المستشفيات الحـكـومية
حكومية لانهم ما يشتغلون عشان يكسبون ، يشتغلون عشان يفيدون الناس ..

وأفضل حميـة من وجهة نظري هي إن أكلك يحتـوي على العناصــر الغذائية الاربع ..
لان كل عنصر يكمل العنصر الثاني .. مجـرد ما تزيد عنصــر واحد يختـل الجسم ويبدا يتأثر ..


يقــولك مرة واحد يبا يخفف وزنه ..
قام ما يــاكـل الا فواكــه وخضـروات ويشرب ماي .. بس أشياء ثانية أبــدا ما ياكلها ..
بعد فترة شاف وزنه زاد ..
تـدري ليش ؟
لأن السوائل تجمعــت في جسمه ، ما شي نشويات وكربوهيدرات تمتص هالاشياء ..

أتـوقع لو تعــدل بين الاربع وجبــات + تمارس الرياضة بشكل منتظم .. بتكون قادر انك ترد للوزن المثالي

ودامــك مب قادر تعـدل بين اربع وجبات غذائية .. باجــر كيف بتعــدل بين حريمك الاربع ؟!!
خخخخ

الله يوفقــك ويعينــك ..

[الـيـاه]

^
دايما ً الدكاتره وخاصه اللي لـ هالسوالف .. حتى مال قوم الليزر وغيره مايقولون شو السلبيات أبد
حتى يوم تاخذ بروداكت لجسمك لدكتور يصف الايجابيات بس !

والسلبيات أكثر بمليون مره

بس بنشوف يا نااااااااااااااااسررررر