مصخره عمري ما شفت مثلها ولا سمعت عنها [الأرشيف]

شرجاوي

06-05-06 ||, 06:27 AM

السلام عليكم و رحمة الله و بركاته

شحالكم ؟؟؟ عساكم طيبين

اخواني بخبركم عن المصخره اللي ما بعدها مصخره

واحد من الشباب أعرفه معرفه شخصيه ... توه متوظف ما كمل شهرين ... عنده جواز سفر الإمارات بدون الجنسيه ( من ابناء المواطنات ) ... المهم جوازه و جوازات اخوانه انتهت ... سرنا الجوازات في الشارجه عسب التجديد ... هذا اللي يالس على الكاونتر شل الجوازات و سار و يوم رد ... قال اللي ما عندهم الجنسيه ما نجدد جوازاتهم لين ما ايي اليوم اللي بيستحقون فيه الجنسيه( اذا يه هاليوم ) .... سأله : ليييش انزين ؟؟ ( و الصدمه مرسومه على ويه ) .. قال : يايتنا اوامر ( !!!! ) ... و عن المكان اللي اتوظف فيه قالوا له :bye2: !!!!

هاللي يصدرون هالاوامر ما يحسون ف غيرهم .. والله لو حسوا جان ما سووا اللي سووه

هالزلمات اللي كل يوم واحد منهم يحصل جنسية.. والله العظيم ما يستحقونها .... الحين هذيله شعرفهم بــ عاداتنا و تقاليدنا ؟؟ ... حتى الرمسه ما يعرفون يرمسونها ... و اللي يستحقون الجنسيه يالسين ف بلادهم اللي انولدوا و تربوا على ارضها الطيبه مذلولين و يعاملون في كل مكان كــ معاملة الحيوانات ( كرم الله القارئين ) ... والله ظلم والله ظلم والله ظلم ...

و حرااااام اللي يسوونه

ولد الحكومة

06-05-06 ||, 10:33 AM

وعليكم السلام ورحمة الله وبركاته

هلا شرجاوووي ... اشحالك وشو اخبارك

اخوي انا معاك في هالشيء بس ما اتقدر تحكم على الموظف ،،، هو عبد مأمور .. وبعدين هاي اوامر علياااا صادرة من فووووق .... وسياسة دولة.

بس انا سامع ان الي ماعندهم جنسية الدولة .. يوم ايون ايجددون الجواز ينسحب عنهم ؟؟؟ المهم انا بتأكدلك من الموضوع وبرجع اخبرك.

والسمووحه شيخي:yes:

ولي عودة بأذن الله :puppyeyes:

شرجاوي

06-05-06 ||, 11:18 AM

صح ... سحبوا الجواز عنهم ... و انا ما الوم الموظف .. الرؤوس الكبيره ما تحس بالشعيرات

أمواج

06-05-06 ||, 11:41 AM

:mar7aba:
.
.
:nono: . . :nono: . .:nono:
عــاد شو إستــفادوا يوم سحبــوا الجواز عنــه . . .
يعطــون اللي مايستــاهلون جوازات وعيــال المواطنــات حســرة عليـــهم . . .
لو بنــرمس في هالســالفه من اليوم لين الســنة اليــايه مابتيحرك شي . . بيقــولون نحن أفهــم منــكم . . .
أمحــق قوانيــن والله . .
.
الله يرحمــنا برحمــته بس . . .
.
:bye2:

تحفه

06-05-06 ||, 12:32 PM

شو هالأوامر اليديده بعد؟

أنا الي اعرفه الشيخ زايد الله يرحمه اصدر هالقرار .. وشيوخ بوظبي ما بيسحبون اي مكرمه او هديه اويلغون اي قانون الشيخ زايد الله يرحمه اصدراه ..

صراحه السالفه مب عايبتني :narr:

شرجاوي

06-05-06 ||, 12:40 PM

والله وايدين بيتلعوزون شرا هالريال .... الله يعين بس

اختي المتفيزره & صبووووحه .. شكراً على المرور و لا حياة لمن تنادي

قرموشة

06-05-06 ||, 12:58 PM

حرام انزين .. !!
من وين هـ التخلف اليديد ..
الزلمــات قامــوا يحــصلون الجواز .. وعيال المواطنات لا !!
الله كريم .. :(

لمّــاح

06-05-06 ||, 01:01 PM

مرحبا ..

صح انا سمعت هالكلام و انسحبت بعض الجوازات و السبب هو ان مب أي انسان له حق في انه يحصل جواز ..

الي يستوي الحين هو إعادة هيكلة عشان ينضمون اصدار الجوازات لغير المواطنين و بتكون الطريقة ( على ذمة المصدر الي قال لي ) بيحسبون عدد المواليد الجدد ( المواطنين ) و من هالرقم بياخذون 30% و هو العدد الي بيستحق انه يتجنس كل سنة ..مثلا، عدد المواليد المواطنين هالسنة 10 .. بيجنسون 3 ..
أســباب اتخاذ هالقرار:
1- عدد المتجنسين ( من زلمات و اجانب ) زاد بشكل يخوف و يهدد امن و استقرار البلد بالاضافة الى ان هالشي بيهدد الهوية الوطنية ..
2- وايد ناس حصلو الجواز مع ان في كثيرين محتاجين الجواز أكثر من هاذيلا لأنهم بدون هوية .. على سبيل المثال وايد ناس من اليمن + فلسطين + سوريا + ايران و بعض الدول الخليجية ، حصلو الجواز .. نعم هم في البلاد من سنين ... الخ من الاسباب المقنعة .. لكن الي كان صاير قبل هو ان الناس نسو فئة البدون و الي هي محتايه للجواز هذا اكثر من اي انسان آخر ..
ماينتمون لأي دولة، ناس بدون هوية .. لا دراسة، لاعمل، الحل الوحيد عشان يعيش انه يسرق و يدش السجن .. ! اما اليمني او السوري عنده جوازه الاصلي و بإمكانه انه يشتغل في بلاده، يسافر، و يتمتع بكل الامتيازات الي يتمتع بها أي انسان حامل للجواز في بلاده الام ..
3- البعض من هالناس مايستحقون الجواز و حصلوه مثلا لسبب من الاسباب ..

بخصوص اربيعك ، الحل الوحيد الي جدامه ( في الوقت الحالي، و الى اشعار آخر من قبل الحكومة ) هو انه يطلعله جواز من بلاد ابوه و يدش الامارات بويزة عمل أو زيارة لأن هالريال ينتمى لدولة ابوه قانونياً بحكم ان الابن يتبع ابوه في الاسم ..

لمّــاح

06-05-06 ||, 01:09 PM

قرموشه ... !

حرام انزين .. !!
من وين هـ التخلف اليديد ..
الزلمــات قامــوا يحــصلون الجواز .. وعيال المواطنات لا !!
الله كريم

مب تخلف ولا هم يحزنون .. بالعكس هذا لمصلحة البلاد .. نحن وايد ضجنا يوم شفناهم يجنسون كل من هب و دب .. حتى انهم جنسو أفارقه !! :puppyeyes:
أحيد مره ريل خالتيه يخبرني عن زلمه يعرفه، كان يستلم راتب حلو بحكم انه زلمه و بعض الاجانب عقود العمل مالتهم اتكون عقود خارجية ( بحكم انه وافد ولازم يصرفوله بدل سكن و بدل سيارة و تعويض لأنه طلع من موطنه الاصلي ... الخ من هالبدلات الي يتمناها المواطن )
من زمان في البلاد هو، فقدم على الجواز و عطوه و استوا مواطن ..
أول ما استوا مواطن اتكنسل العقد الخارجي و عطوه عقد عادي ( حاله حال أي مواطن ) وراتبه نزل تقريبا للنص.. خل يفيده الجواز الحينه :harhar1:

و بخصوص الجوازات الي انسحبت، مب بس جوازات بنات المواطنات .. كل الي اتجنسوا و عندهم جوازات بدون جناسي انسحبت جوازاتهم ..

شرجاوي

06-05-06 ||, 01:37 PM

هالوافدين خلهم ينقعون ... يقدرون يداومون و يدرسون وين ما يبون ... بس عيال المواطنات شو يسوون ؟؟ وين يدرسون ؟؟ وين بيشتغلون ؟؟ طبعاً مافي ام بترضى ان ولدها يشتغل كولي ولا فراش .. و ولد المواطنه اذا كبر يبا يتزوج .. من وين له فلوس يتزوج بها و هو ما يشتغل ... السمووحه .. بس تفكيرهم غلط ...

اخوي لماح ... قلت من كل 10 بيجنسون 3 ... يعني واحد عنده الجنسيه و اخوانه ( 5 و اكثر ) ما عندهم الجنسيه ... الصراحه تفكير غبي

.. كفايه هالبنجالي اللي من حصل الجنسيه سار و جتل ولد ... والله هذيله الوافدين و الاجانب ما منهم امان

لمّــاح

06-05-06 ||, 02:29 PM

خوي لماح ... قلت من كل 10 بيجنسون 3 ... يعني واحد عنده الجنسيه و اخوانه ( 5 و اكثر ) ما عندهم الجنسيه ... الصراحه تفكير غبي

لأ مب جــيه ، انته فهمتني غلط .. الارقام الي كتبتها ( 10 و 3 ) مجرد مثال مبسط عشان ما اكتب ارقام كبيره و تتعقد من الحساب ..

بعطيك مثال يشبه الواقع ..

الاحصائيات مثلا تشير على ان عدد المواليد المواطنين سنة 2005 عددهم: 300,000 ( ثلاثمية ألف طفل )

في هالسنة، 2006، بإمكانهم انهم يصدرون 90,000 الف جواز .. ليش 90,000 جواز ؟؟

30% من 300،000 = 90,000 ..
و اصدار الجواز بيكون مبني على شروط، مثلا الأولوية و تاريخ تقديم الطلب ... الخ من الشروط ..
هذا معناته انهم كلهم بيحصلون الجواز :)

بس عيال المواطنات شو يسوون ؟؟ وين يدرسون ؟؟ وين بيشتغلون ؟؟ طبعاً مافي ام بترضى ان ولدها يشتغل كولي ولا فراش .. و ولد المواطنه اذا كبر يبا يتزوج .. من وين له فلوس يتزوج بها و هو ما يشتغل ... السمووحه .. بس تفكيرهم غلط ...

بـسيطة، بما ان ابوهم وافد يقدرون يطلعولهم جواز من بلاد ابوهم و هذا حقهم القانوني .. !
السبب بسيط بعد، الولد يتبع ابوه في الاسم .. بهالطريقة بيقدرون يعيشون و يشتغلون و يدرسون و يتعالجون ... الخ

نفترض اني انا خذت اجنبية على سبيل المثال بريطانية، عيالي بيكونون مواطنين و مستحيل بلاد الام (بريطانيا) تجنسهم لأنهم يتبعون ابوهم الي هو انا، مايتبعون امهم .. والي يستوي عندنا مثل مساعده للمواطنات ..

كفايه هالبنجالي اللي من حصل الجنسيه سار و جتل ولد ... والله هذيله الوافدين و الاجانب ما منهم امان

عشان جيه نزلو هالقانون، و مافي حد مضلوم بالعكس يوم بيطبقونه وايد ناس بتتحسن اوضاعهم ( خصوصا البدون ) و عن اربيعك و أي انسان ثاني ضروفه نفس ضروف اربيعك، اذا راجعهم ( حتى عبدالله بن خصيف قال مره ) خلهم ياخذون جواز من بلاد ابوهم ..

أليمه

06-05-06 ||, 04:30 PM

أليمه::

حرام والله .. مهما ايكون هذيل عيال البلاد..

قلبي عورني على اربيعك يا شرجاوي..

بس مابنقول الا الله ايعين وايسر..

ديج الفريج

06-05-06 ||, 04:51 PM

السلام عليكم

أقول ...
مب بس زلمات وأفارقه
اللي يتمخطرون ويتمييعون ويغنون " المطربين " يعطونهم
بس ليش اربيعك ما يتصل البث المباشر في دبي ولا عيمان يمكن يشوفولك حل ؟؟؟

ولد الحكومه ... :yes:
الانسان عبد لله فقط
وما ايوز انقول عبد المأمور
هاذي من الأخطاء اللي كنا نقع فيها

حبوبه دبي

06-05-06 ||, 06:41 PM

مسكيـن اربيــعك !!

:sadwalk:

شــو بيســوي الحيــنه !!

مــاشي حــل دام القــرار نــزل الا يطلعلــه جــواز من بلاد ابـوه ليــن الله ايســرلـه امــره ..

واكيــد هالقــرار الـلي صدر من مصلـحة الدولــه ،،

نور الإيمان

06-05-06 ||, 07:21 PM

بسم الله الرحمن الرحيم

السلام عليكم و رحمة الله و بركاته اما بعد ..

كنت افكر فيما تمت كتابته من قبل الأعضاء .. و حكاية الزلمات و الأفارقة و الهنود و غيرهم ممن تعشش هنا .. و اليمنين .. و المطربين .. و غيرهم ممن نعطيهم الجنسيات ..

كنت اقارن بين التجنيس بأميركا .. و كندا .. ووجود انواع مختلفة من الجنسيات من استقر هناك لأعوام قليلة فأصبح يحمل الجنسية الأميركية .. او الكندية .. لما لا نلحظ لديهم مثل هذه المشكلات في التركيبة السكانية ؟؟

النتيجة التي وصلتُ إليها هو الآتي :

أولا .. الفلسطنين .. في كل الأحوال اما يرتحلون إلى الخارج - الدول الغربية - او إلى الأردن .. اموالهم الذي يأخذونها من الدولة تودع في اماكن اخرى .. بدلا من استثمارها هنا في وطننا!!

و هكذا الحال مع الهنود ان صح التعبير - لا احب ان اقول آسيوون لأننا جميعا من آسيا !! - لهم تجارة واسعة في الدولة .. اموالهم هناك في الهند و اميركا و سويسرا .. فهم لا يودعونها هنا ..

لذا - الزبدة تقول - تجنيس هذه الأعراق التي لا تستقر في البلد مهما كلف الثمن تعتبر غلطة كبيرة في حق البلد ..

العرب و الهنود المتجنسين في اميركا او كندا او اية دولة اخرى .. يعيشون هناك .. فـ هم يفيدون الدولة التي هم فيها .. من تنمية ثقافية و علمية و صحية و عمرانية .. فنرى فيهم الإنتماء لتلك الدولة دون وطنهم الحقيقي ..

اعرف اسرة .. ذات عروق باكستانية .. ليست لديهم وثائق في بلدهم :boxed: هاجروا إلى الإمارات من 25 عاما او 30 عاما لا اعرف بالضبط .. و إلى الآن هم - بدون - فقد تزوجوا و لديهم اطفال و عاشوا حياتهم هنا .. تقول لي السيدة : لا نعرف وطنا غير الإمارات !! - لكنني اتعجب من لغتها العربية الركيكة تماما رغم عيشها هنا 35 عاما!! - و الآن يودون الحصول على الجنسية ..

لذا حكاية التجنيس يجب ان تؤخذ من منطلق - ما فائدة وجود هذا الإنسان هنا ؟ - الإستفادة من هذا المتجنس .. من ناحية تطوير العلم و النهضة العمرانية واستثمار امواله هنا .. تلك الملايين من الدراهم يأخذها الغير و يوظفها في وطنه الأم !! إذا فليتفضل بالعيش هناك رغدا ... بدل من استنزاف اموال الدولة ...

لكن .. لدي سؤال .. كيف ان يكون الإنسان من غير هوية و يُسمى بالبدون ؟؟ ماذا تعني هذه الكلمة ؟؟ و منذ متى ظهرت ؟؟

كيف ان يكون الإبن بدون .. إذا من اين اتى والده ؟؟ من اي وطن ؟؟

في كل الأحوال الإبن ينتسب إلى ابيه .. هذا امر لا غبار عليه .. ولا جدال ..

لكن الموضوع يجب ايضا ان نتفحصه .. و بدقة ..

جزيتم خيراً

نور الإيمان

06-05-06 ||, 08:48 PM

غيرتُ رايي .. لن يكون هنالك اي تعقيب آخر ..

سلام عليكم

ولد الحكومة

07-05-06 ||, 12:09 AM

السلام عليكم

ولد الحكومه ... :yes:
الانسان عبد لله فقط
وما ايوز انقول عبد المأمور
هاذي من الأخطاء اللي كنا نقع فيها

دييييج الفريج ...
صحيح كلامك ... والنعم بالله ،،
وانا ما قصدت شيء .. وشكرا عالتنويه :bow:

ولد الشحوح

07-05-06 ||, 01:05 AM

طويل العمر بس ممكن اقول شي .... إنت قلت نحن أحسن عنهم اوكيك انا وياك كونا مسلمين صحيح وهذا شي افتخر فيه وهو اصلا الشي الوحيد اللي اقدر اتفاخر فيه بس في مجالات ثانية اسمحلي ... هيه نعم في مجال الدين وكل ما يامرنا به الدين نحن أحسن إلا بشي الدين أمرنا إننا نعمل فدنيتنا ونخطط ونحن نتكل عليهم ليش لأنهم أحسن عنا في هالمجال ... تخيل أمريكا ولا اليابان تقاطعنا شو مصيرنا فأقوووووووولك للأسف في المجال الدنيوي هم أفضل عنا وما أعتقد إن الإسلام اهتم بس بالمجال الديني

مجرد رأي

ولد الشحوح

07-05-06 ||, 01:09 AM

.... إذا بقى الصمت رفيقنا فـ على الدنيا السلام ....

لمّــاح

07-05-06 ||, 01:31 AM

ولد الشحوح ..
اسلوبك في ابداء رأيك المخالف هو الاسلوب الي يخلي الواحد يستانس و يتقبله لو كان عكس الي في باله ..
اتذكرت جمله قالها واحد من ربعي، نحن مسلمين بدون اسلام و برع اسلام بدون مسلمين ( يقصد ان برع عندهم معظم الاشيا الي في الاسلام مثل الانتخابات و الضريبه الي كل افراد المجتمع لازم يدفعها و هي تشبه الزكاة ... الخ ) ..
نعم صحيح، و مازال الامريكان و الاجانب يسبقوننا في معظم مجالات الحيــاة .. و انا في ردي ماتكلمت عن التكنلوجيا و هالسوالف، لأني ادري انهم سابقينا .. ! تكلمت عن مبدأ احترامنا للغير، عن تشبثنا و اعتمادنا على مبدأ ان في الاتحاد قوة و الاخوة في الاسلام .. تكلمت عن أشيا ( نحن نشوفها بسيطة ) لكن الاجنبي يشوفها من الأساسيات و يتمناها .. مشوار الألف ميل يبدأ بخطوه و اشوف ان اول خطوه خطيناها في مشوار التألق و النجاح و بإذن الله بنرفع اسم ديننا و بلادنا فوق :)
تفاءلو بالخير تجدوه ..

حبوبه دبي

07-05-06 ||, 02:10 AM

أعصــابج يــاختيــه !!

:sad4:

لمـٌاح مـاكــان يقصــد اللــي فهمتيــه !!

يعنــي مــب حلــوه يشــوفهــا اتقــارنيــنهم بـ أبنــاء زايد الله يــرحمـه ،،

هذا مـا فــي كــل المــوضــوع ،،

والسمـوحه

فركوشه

07-05-06 ||, 10:30 AM

اختي نور..

لماح ما يقصد كلمة العيب بمعنى العيب.. وانما مب زين ولايجوز انج اتقارنين نفسج بالامريكان ولا بوش ولا حتى شارون..

.
.
تم حذف بعض الكلمات من قبل الشوق
يرجى من العضو فركوشه معاينة الرسايل الخاصه
وشكرا

فركوشه

07-05-06 ||, 10:55 AM

شرجاوي انا استغربت انه في وحده ابوها زلمه وعندها جواز الامارات..

وعندنا مدرس اجنبي .. مواطن..

دنيا .. قاموا الاجانب يحلون مكان المواطنين..

ذنـيـنـي

07-05-06 ||, 01:57 PM

الله يهديج اختيه الؤلؤ المكنون

خليتي النقاش بالكامل و ركزتي على كلمة طلعت من لمّاح بدون قصد للمعنى الي انتي فسرتي فيه كلامه

يعني انا اشوف انه كلمة "عيب" جدا عادية و نستخدمها في نقاشاتنا العادية بدون اي مشاكل

يوم كتب "عيب" قلتوا قلة ادب, و اذا قال "حرام" بتقولون اين الدليل من القرآن و السنة

بصراحة ما اشوف انه في داعي انه نهتم بالكلمات البسيطه الي ما بتزيد ولا بتنقص في الموضوع و نترك الموضوع الاساسي للنقاش

و اذا انتي تشوفين نفسج وايد متمكنه من اللغة و من اسلوبج في الكتابة,, فـ خلي في بالج انه مب كل حد يقدر يكتب بأسلوبج و مب كل حد متمكن "شراتج" من اللغة و مب كل حد يفسر الكلام حرفيا مثل ما انتي فسرتيه

تحياتي

شرجاوي

07-05-06 ||, 02:01 PM

الزلمات ( المواطنين ) ف تزايد مستمر ...

اخواني لماح و اللؤلؤ المكنون .. هدوا اعصابكم و خلكم كوول

ولد الشحوح

07-05-06 ||, 10:18 PM

إتفق العرب ألا يتقفوا ....
صراحة كلمة فخاطري ودي أقولها الناس تتطور وتتقدم ونحن ما زلنا فنزاعاتنا ومشاكلنا ...
وجدال قيس باللحى هل جائز تقصيرها أم أن ذاك محرم
نعم نتضارب على أمور سطحية ونترك الأساس ....هذا مقصدي من البيت إن الإسلام فيه أشياء وايد مهمة المفروض نتناقش فيها ونحن نتضارب فتطويل اللحى ....والحين الموضوع بصوب والنزاع بصوب ...؟!؟
أرجوووووووو إن اللي يبي يضارب او يثير مشكلة إنه لا يثيرها هني واقترح لبن دبي إنه يسوي واحة للي فــ خاطره يتضارب

ديج الفريج

07-05-06 ||, 10:38 PM

عيون الليل

07-05-06 ||, 10:54 PM

شرجاوي .،.،

الله يعينه ويعيـن أمثاله .،.، باجر لو هالانسان صرق ولا جتل ولا سوا اي شي غلط بيبونه وبيحاكمونه وبيظهرون عينه .،.،

بس الحيــن محد يفكر فيهم .،.، أتمنى انه تنحل مشكلته ومشاكل اخوانه بأسرع وقت .،.، وما انقول غير الله يعينهم

ولد الشحوح .،.، اقتـــراح حلــو لوول

السموحه

لمّــاح

07-05-06 ||, 11:38 PM

اخويه الشرجاوي .. مثل ماقلت لأنهم في تزايد مستمر الغو سالفة منح الجوازات الى اشعار آخر .. و مثل ماكتبت في ردي السابق إصدار الجوازات بيكون بالطريقة الي ذكرتها و عددتلك الاسباب كلها ..
نعم بعض القرارات يتضرر منها البعض لكنها للمصلحة العامة و بإذن الله بتتحسن الاوضاع و انا ان شاءالله بستفسر بطريقتي و بخبركم اذا في شي يديد :)

و عن الاعصاب، تراها هاديه مجرد سوء تفاهم ^_^

نجمة دبي

08-05-06 ||, 12:41 AM

بدايه الموضوع كان عن التجنيس وسحب الجوازات لابناء المواطنات ..
لكن عقب اشوف الموضوع انتقل لمكان بعيد وما يخصه في الموضوع الاساسي ..

واخويه لماح ما كان يقصد شي .. والكل شاهد على ذلك ..

واللي للحين ما فهم قصده .. يرد يقرا الموضوع فوق الـ 10 مرات .. عادي ما فيها شي :)

رغم ان اخويه لماح ما غلط .. لكن بادره طيبه منه انه اعتذر ..

نحن هنيه اخوه .. والاخوه ما يهددون بعض بهالاسلوب ..

اتمنى سوء التفاهم هذا يمر على خير ..

لي عوده لاناقش الموضوع الاساسي .. :)

نجــــــــــ دبي ــــــــمة

شرجاوي

08-05-06 ||, 09:01 AM

لماح .. ولد الخاله الزلمات المواطنين ف ازدياد فظيع هـــ ( الايام )

البارحه .. مجموعه من المواطنات المتزوجات من اجانب سارن ل جمعية حقوق النسان ف دبي للمطالبه بدعم الجمعيه لحل مشاكل ابنائهن بتجديد جوازاتهم و منحهم جنسية الدوله ( هم اولى من غيرهم )

الف شكر على مروركم الكريم

ولد الحكومة

08-05-06 ||, 09:36 AM

الله يعينهم الصراحه ، ويعيين الحكومة ؟؟؟

مشكله اللحينه .. لو اتغلط على هندي بس سار واشتكى عليك في جمعية حقوق الانسان ... :fa36: .

والسموووحه :puppyeyes:

حلم الطفوله

08-05-06 ||, 07:59 PM

أخوي لماح

كلامك وردك منطقي وواقعي جدا .... عيبني صراحه:yes:

ولد الشحوح

09-05-06 ||, 04:25 PM

في ناس عايشة من سنين وسنين فبلادنا ما حصلوا شي وناس من 15 سنة او اقل وحصلوا جواز وامتيازات يمكن المواطن العادي ما يحصلها او على قولتهم مواطن درجة ثانية ....

ناصر الخالدي

10-05-06 ||, 08:46 PM

أخي العزيز شرجاوي .......... في البداية أتمنى ان تكون بصحة جيدة وأما فيما يخص أبناء المواطنات فأنا أختصر مشاركتي بهذه العبارة (( متى تفتح ذراعها أوطاني ))

لمّــاح

11-05-06 ||, 02:05 AM

أخي العزيز ناصر الخالدي ..

الدولة تفتح ذراعيها، بل قلبها أيضا لتحتضن ذلك المواطن الذي عاش و مازال يعيش في الوطن و لأجل الوطن ..

أمــا الموضوع الي نتكلم عنه، عن انسانه تزوجت من أجنبي و بحكم القوانين المعمول بها في كل دول العالم فإنها تتبع زوجها ( وهذا امر محد يقدر ينكره ! ) .. ندخل في موضوع الأبناء فالقوانين و الشرع ينصان على ان الأبناء يتبعون الأب و هذا أيضا امر محد يقدر ينكره .. !

وعلى هذا كله، أمر الوالد القائد الشيخ زايد الله يرحمه بإصدار الجوازات لهن و لأبنائهن .. و هذه أيضا بادرة طيبه منه ..

و الخلاف الآن هو في ان ادارة الجوازات قامت بسحب جوازات المتجنسين ( بدون استثناء ) وذلك لإعادة هيكلة آلية إصدار الجوازات و ستقوم الإدارة بصرف الجوازات للمستحقين قانونياً وفق شروط ومعايير و تكلمت عن النسبة في ردودي السابقة ..

أبناء المتزوجات من الاجانب في الأصل يعتبرون أجانب بحكم انهم يتبعون الأب و الحل الوحيد أمامهم هو في انهم يصدرون جوازات من بلاد ابوهم .. تخيل يعني هالخلل في التركيبة .. الابو أجنبي و الأطفال مواطنين .. اذا فكرو يسيرون العمره مثلا هم عادي لكن الابو لازم يطلعله تأشيرة دخول و اذا ماسمحوله مابيقدرون يسافرون بحكم ان بإمكانهم يدخلون السعودية بدون تأشيره و هو لأ .. !

شرجاوي

11-05-06 ||, 02:45 PM

اخوي لماااح ... السالفه سالفة واسطه .. اذا الواحد قدر يوصل فوق جوازه بيتجدد و بيحصل الجنسيه وياه ... و اللي ما يقدر يوصل فوق شو يسوي ؟؟؟

لمّــاح

11-05-06 ||, 04:36 PM

مرحبا ...
اخويه يشهد الله اني مب ضد حصول هالفئة من الناس على الجواز .. يعني هالأمر انتهى شي صار و استوا و مكرمة الشيخ زايد مايت منه و الدرب، يت من احساسه بالمسئوليه تجاه بناته المواطنات ..

و انا أطمنك أن المشكلة بتنحل بإذن الله خصوصا بتوجيهات الشيخ خليفه بإنشاء الجمعية الاسرية الجديدة برئاسة الشيخه فاطمه .. و لاتقول لي واسطه لأن هالقرار يا من القيادة .. مب قرار مسؤول ولا مدير.. و الجوازات انسحبت عن جميع الفئات الي من ضمنها فئة المواطنات الي متزوجات من اجانب ..

و أنا كنت من اشد المعارضين للقرار الي اصدره علي الكعبي بوقف جميع المساعدات عن المواطنات .. عالأقل كان بإمكانه انه يتريا و يعطيهم مهلة لتحسين اوضاعهم بس الحمدلله على كل حال و أشكر الفريق ضاحي خلفان على البادره الطيبه الي قام بها .. أمر انهم يصرفون هالمساعدات من ميزانية الشرطة الين ماتنحل المشكلة !!

لكن أيضا مانقدر نلومهم تعرف ليش ؟؟ لأن كل الدول تتعامل مع الدول الاخرى بمبدأ المعاملة بالمثل ..

فرضا انته قررت انك تتزوج و تاخذ مثلا أردنيه أو لبنانيه .. تتوقع عيالك بياخذون الجنسية اللبنانيه ولا الحنسية الاماراتيه ؟؟
أكيد الجنسية الاماراتيه لأنهم يتبعونك .. ف في هاذي الحاله ابناء المواطنات يعتبرون وافدين لكن مواطنين شرعيين في دولة ابوهم ..

هالفئة من المواطنات كان المفروض انهن يفكرن في نتيجة هاذي الزيجة و التبعات و السلبيات الي بتترتب على هالنوع من انواع الزواج حرام يلتهون بعمارهن ..

مافي حد يرضى ان بنت بلاده تنهان و تلجأ لجمعية حقوق الانسان .. صح ان حقهن الحقيقي هو في حصولهن على جنسية الزوج لكن على هذا كله كان المفروض يفكرن عدل قبل لا يتخذن هالقرار ..

لو بتفكر فيها عدل و من الناحية القانونية .. بتشوف ان مالهن حق في هالمطلب كونهن يتبعن الزوج .. لكن على هذا كله مازلت اصر و اقولك يتمن بنات البلاد و اتمنى ان المشكلة تنحل اليوم قبل باجر ..

ولازم هالفئة من الناس ايكونن عبره لكل المواطنات عشان مايطيحن في نفس هالموقف .. و نفس الكلام موجه للرياييل لأنهم من فتره زادو عدد سنين منح الجواز للوافده المتزوجه من مواطن .. و صدقني ان الواسطه ماتمشي في هالسوالف .. !

شرجاوي

11-05-06 ||, 05:42 PM

ولد الخاله مافي شغله مافيها واسطه ... اذا تعرف فلان و علان يداومون فهالمكان او انهم واصلين والله بييبون لك اللي تباه .. شو تقول عن اثنين قدموا للحصول على جنسية الدوله في سنة 92 واحد منهم حصل الجنسيه بعد 3 سنوات و الثاني لين يومك هذا يتريا ,,,, بتقول مب واسطه ؟؟

و عن الجمعيه الاسريه .. متى ( بيكملون ) اللي كان يسويه الشيخ زايد ( الله يرحمه ) ؟؟

لمّــاح

11-05-06 ||, 06:28 PM

ولد الخاله .. يعني خليت ردي كله و علقت على جزء صغير .. و بخصوص الواسطه هذاك قبل .. الحين ماشي .. !

خل حد يقدم الحين حاله من حال الناس و أي غلطه تستوي بيكون المسؤول محاسب .. الشيخ محمد ماعنده لف و دوران .. !

اذا مب مقتنع من كلامي اســـأل اي مدير في أي دايره اذا يقدر يتوسطلك في شي مب قانوني، حتى الأراضي صعب اتحصل أرض بسرعة لازم اتمر على كذا لجنه عشان تحصل الموافقه، اما قبل كنت تقدر اتيب توقيع واحد و يخلصولك شغلك في ثواني معدوده ..

لاتقول هذا ضلم، بالعكس هذا هو عين الحق .. مايستوي انا اقدم على ارض و اصبر 10 سنين و غيري في شهرين تطلعله ارض بس لأنه يعرف فلان !! و نفس الكلام للجوازات و ابناء المواطنات ايضا يعتبرون وافدين .. صح ولا غلط ؟؟

جاوبني بس، مادري ليش كل ما اكتب هالجمله ماتردون عليه .. صح ولا غلط كلامي يوم اقولكم ان الأبناء يتبعون الأب و بما ان المواطنه خذت وافد هذا يعني ان عيالها وافدين بحكم انهم يتبعون الابو ..؟
و سؤال ثاني .. المعامله بالمثل .. يعني لو انته خذت لبنانيه ولا سوريه عيالك شو بتكون جنسيتهم ؟؟ مابيعطونهم الجواز اللبناني و هذا هو الصح .. لكن على هذا مازلنا نقول هاذي بنت البلاد ولازم نراعيها و والله العظيم اني في صفهم مب ضد هالفئه من المواطنات .. لكن ياخويه العقل زين و المفروض مايعقون عمرهم في هالمصايب و يقولون ليش تسووبنا جذه ؟؟
الله يعين بس .. و اسمحلي على اصراري في اعادة نفس الكلام لكن هذا هو الواقع ليش نتهرب منه و نسوي مشكلة من ماشي ..

تنينه

11-05-06 ||, 06:47 PM

جاوبني بس، مادري ليش كل ما اكتب هالجمله ماتردون عليه .. صح ولا غلط كلامي يوم اقولكم ان الأبناء يتبعون الأب و بما ان المواطنه خذت وافد هذا يعني ان عيالها وافدين بحكم انهم يتبعون الابو ..؟

السلام عليكم والرحمه ,,,

كــلامك أخوي لماح صحيح 100 % ,, وأنا أوافقك الراي ,, لأنه العيال شرات ما قلت يتبعون أسم ابوهم ,, من يومين في كلاس الجلوبال كانت المس تتناقش معانا عن هالقضيه وأنه المواطنه ما تقدر تتزوج غير مواطن ,, قلت لها مب ممنوع,, تقدر بس جوازها يعني بيتبع جواز ريلها وعيالها نفس الحاله ,, ترى نفس الشي يوم المواطن ياخذ وحده من برع البلاد نفس الشي يستوي بها ,, بس ما أعرف ليش البنات مب مقتنعين بهالشي ,, بس هذا هو عين العقل ويــمكن اللي اتسويه الحكومه وكل هالقوانين عسب أتكون عبره لغيرهم ,,

والسموحه

تنينه

شرجاوي

11-05-06 ||, 11:10 PM

الغالي انا قريت ردك كله ... و الاخ صريح كفى و وفى ... بس اذا العيال يتبعون الاب .. عيل ليش ما سحبوا الجنسيه من اللي حصلوها قبل ( ابناء المواطنات ) ؟؟؟

انا منقهر من الزلمات المواطنين كيف حصلوا الجنسيه .. فيهم عرق اماراتي ؟؟ ما بدش فالسياسه و حبوب اذا انت فهيم تراك بتفهم شو قصدي ;) ...

و السموووحه ( ولد الخاله )

لمّــاح

12-05-06 ||, 01:30 AM

شــرجاوي ..

الي ماسحبوا جوازاتهم على حد علمي لأنه عطوهم خلاصة قيد ..

نعم، انا ادري ان شي زلمات حصلو جوازات و مب زلمات بس، من واااااايد جنسيات ثانية .. لكن ارد و اقولك ان بعضهم انسحبت جوازاتهم !! و انا فاهم انته شو تقصد ..

في النهاية انا المعلومات الي عندي من مصدر موثوق والي قلته لك على ذمة الي خبرني.. و بإذن الله الامور بترجع مثل ماكانت و احسن :)

السموحه منك (اخويه) شـرجاوي و لاتحط في خاطرك من الي قلته..

شرجاوي

12-05-06 ||, 02:54 AM

احط ف خاطري منك ؟؟؟ لا يا ( أخوي ) و لا فكرت اني احط ف خاطري عسبة كلام

ان شاء الله الاوضاع تتحسن و من بؤك لـ باب السما و تسلم يالغالي على مشاركتك ( القيمه ) في نظري ( البقيه كذلك ) و تقبل تحياتي .. اخوك شرجاوي

انامل

12-05-06 ||, 07:36 PM

اخي الكريم
فعلا حسرة في القلب
اللي ما يستاهل يحصل الجنسية بكل سهولة
واللي يستاهل ينتظر وينتظر وينتظر او يحتضر بمعنى اصح
اخ لماح
الله يحفظ امثالك وان شاءالله نكون وتكون بلادنا دوم بخير بعون الله
ما اقول الا يارب احفظنا من شر الحاسدين والاغراب
شكرا اخي موضوع يستحق القراءة والمشاركة
كل الود
أنامل

شرجاوي

18-05-06 ||, 10:52 PM

مشكووره اختي على مرورج الكريم و الرد الطيب

كشكوشه

19-05-06 ||, 03:26 PM

الله يعينه ان شاء الله ...
الصراااااااحه ظلمووووووووه اربيعك .. يعني ماكان لازم يصير هالشي .. الله يخس بليسهم هم وقوانينهم اللي تاخذ ولا تييييب ...
الله يكون ف عووووونه ويسر له ان شاء الله ..

دموع قلم

21-05-06 ||, 12:55 PM

السـلام عليـكم ورحمة الله وبركــاته

مرحبـــا بـكم أخـوانـي..
عـدت لـكم على هـذا الموضـوع بشكـوى من السلطـات العلـيـا brgll: !!

قـريت المـوضـوع بكبـره من البـداية لآخـر رد, بس بعـد بسـألكم..
يعنـي البنـت المواطنـة إذا خـذت شـاب أجنبـي ( غيـر مواطـن ), يـاخذون عنهـا الجـواز وتستـوي
أجنبيـة شرات ريلهـا؟! يعنـي ماشي مصيـر لهـا غيـر هالمصيـر المحـزن, ومـاشي أمل الريـال
يـاخـذ الجنسيـة الإمـاراتيـة بـأي طـرق, أو على الأقـل البنـت اتـم مواطنـة :fa36: ؟؟!!!!!

والسمـوحـة..

شرجاوي

24-05-06 ||, 02:33 PM

اختي دموع قلم .. قبل الاجنبي اللي ياخذ المواطنه يحصل الجنسيه ( مب الكل .. يمكن 5 % او اقل اللي حصلوا ) و الحين بنشوف اليديد اللي بيطلع من الجمعيه الاسريه و ان شاء الله قراراتهم تكون في صالح المواطنات و ابنائهن

دموع قلم

24-05-06 ||, 05:23 PM

يــــــاااالله يــــا الرحمـن الرحيـــم..
عسـى القـرارات والإجـراءات تكـون فـي صـالح المـواطنـة وريلهـا وعيـالهــا

:sad:

لمّــاح

24-05-06 ||, 06:45 PM

عفواً عفواً ..

يعني انا مثلا .. اذا خذت امريكية بيعطوني الجواز الامريكي ؟؟

من سابع المستحيلات ..

و هالكلام هو نفسه الي ماشي عندنا ..

ختيه دموع قلم .. بالله عليج .. صح اتحسين اذا يانا واحد من برع و خذ مواطنه و عطوه الجواز .. ؟؟

المفروض العكس .. اذا المواطن خذ وافده يعطونها الجواز .. لأن الحرمة تتبع الريال .. هذا شي لاخلاف فيه من الناحية الدينية و من ناحية القوانين ..

لكن العكس ؟؟ بصراحة غلط .. !

عيل جان هالاجانب قصو على بنات البلاد بس عشان يحصلون الجواز ...

و اذا كنتو تتكلمون عن فئة البدون .. ترا بيعطونهم جوازات الحين .. خصوصا ان هناك عوايل مثلا البنت عندها جواز و ولد خالتها ماعنده .. و اذا خذته بينسحب جوازها المسكينه .. هالقضية قضية ثانيه و الحل موجود ..

لكن مايستوي انعمم و انقول المواطنه اذا خذت أجنبي يعطونه الجواز .. بتضيع البلاد بهالطرية .. !

محد ضربها على ايديها و قالها خذيلج أجنبي .. و بما انج خذتي هالأجنبي اتحملي نتايج قراراتج ولاتعقين اللوم على الحكومة .. !

خيال الروح

24-05-06 ||, 07:22 PM

الحرمة تتبع الريال

لازم الـوحـده تفكر قبـل ما تـاخذ واحد اجنبي ,, لانـه مستحيل يعطونه جواز

ولو عـطوه جـواز جـان شفتو الكـل ما خذين اجانب ,, :nono: (وبتخترب البـلاد)

محد ضربها على ايديها و قالها خذيلج أجنبي .. و بما انج خذتي هالأجنبي اتحملي نتايج قراراتج ولاتعقين اللوم على الحكومة .. !

وانا اييدك على هالكلام ,,

:

شرجاوي

25-05-06 ||, 05:12 AM

و اذا ما ياها الريل المواطن ؟؟؟ شو اتسوي ؟؟؟

اتمنى الاجابه على هالسؤال

دموع قلم

25-05-06 ||, 05:44 AM

انــزيــن..
نفـس سـؤال الأخ الشـرجـاوي,

أو..
إذا هالأجنبـي أفضـل من المواطـن, يعنـي إذا تقـدملهـا الأجنبـي وصـلـّـت الاستخـارة وارتـاحت لـه, ترفضـه.. ؟!

:kkk:

اللـي يسمعنـي يقول إنـي ضامنـة بـاخذ أجنبـي :laugh:..

لمّــاح

25-05-06 ||, 05:30 PM

مرحبا ..

هذا نصيب .. محد يقدر يقول انا باخذ فلانه أو مواطنه .. الاشيا هاذي بإيد الله ..

و إجابة سؤالكم بسيطة .. نفترض على سبيل المثال لا الحصر ياها خليجي .. من قطر بحكم ان وايد مواطنين عندهم اهل في قطر .. اذا وافقت عليه بينسحب جوازها و بيعطونها جواز قطر ... و انتهت القضية ..

نفس الكلام ينطبق لكل الجنسيات الثانية .. مثلا اذا ياها اردني بيسحبون جواز الامارات و بيعطونها جواز الاردن .. و اذا ياها اجنبي من فرنسا مثلا .. بيعطونها جواز فرنسا و بيسحبون جواز الامارات .... وهكذا !!

بس طبعا تتحمل نتايج هالقرار .. مايستوي تطالب بحقها كمواطنه لأنها قطرية الحين أو فرنسيه او اردنيه ... و مانقدر انقول لازم انعامل ريلها كأنه مواطن عادي ... ليش انعامله مثل باجي المواطنين ؟؟
مب ناقصين خلل في التركيبة السكانيه .. و على هذا كله .. اذا مواطن خذ اجنبية تتوقعون بيعطونه جواز و بيعتبونه مواطن و عندهم ؟؟

اوكي انا بسألكم و جاوبوني ... اذا انته طمعت في جواز فرنسا و خذت فرنسيه أو حبيت فرنسيه و شفتها ونعم البنت.. تتوقع بيعطونك جواز فرنسا ؟؟
مستحيل .. و نفس الكلام ينطبق عندنا نحن ..
و حتى لو كانت خليجيه .. لو خذت سعوديه تتوقع بيعطونك جواز السعوديه ؟؟

جاوبوني .. و فكرو فيها صح و من ناحية القوانين و الدين .. ! :boxed:

حلم الطفوله

25-05-06 ||, 05:43 PM

السلام عليكم

من وجهة نظري الشخصيه أعتقد الحياة مب فالتوه ! السالفه فيها قبايل:boxed: ....

وما أعتقد إنه الحرمه إلي اختارت ريال من جنسيه ثانيه ما فكرت بهالنقطه

شيء طبيعي الحرمه تتبع الريال مب الريال يتبعها ! وأكيد لعيال بيتبعون جنسية أبوهم !

دامها اختارت وقررت ...الشرع والدين واضحين بهالنقطه لعيال ينتسبون لجنسية الوالد

وبعدين يوم اختارته أكيد كانت تعرف جنسيته وتعرف النتائج إلي بتترتب على هذا الزواج !

وبعدين لو الكل سمحوله ياخذ جواز منيه والدرب ! ما بيتم حدود وفواصل بين الدول !

وبتضيع الأعراف والتقاليد ....لا تقولون ما بتضيع :kkk: ...أكيد بتضيع ...

كل جنسيه تختلف عن الثانيه وبيطبعون لعيال بطبايع والدينهم...

طبعا كلامي كان حول فكرة تجنيس زوج الزوجه بجنسية بلاد الزوجه

دموع قلم

25-05-06 ||, 05:47 PM

فهمــت عليـك أخـوي لمّــاح, والعقـل يقـول أن كـلامك صـح,
لكــن المشكلــة يـوم تشـوف حــد مـن أهــلك مـاخذة أجنبـي,
يتـم قلبـك يعـورك على حالهـا, وهـو اللي يخلـي العقـل ما يقتنـع.. !!

:shutup:

اللهـم احفـظ بنـاتنـا وأولادنـا..

لمّــاح

25-05-06 ||, 05:52 PM

عفــواً اختي دموع قلم ..

لكن هالشي بإرادتها و هي تدري و اتعرف شو نتايج هالنوع من الرتباط .. لكن بالمقابل مافي شي في هالدنيا غلط و مستحيل، بالعكس هي تقدر تكيف عمرها .. مثل ما نحن عندنا مميزات و دراسه ببلاش و مستشفيات حكومية ... الخ .. بلاد الزوج ينطبق عليها نفس الكلام .. كل دوله توفر هالخدمات لعيال بلادها ..

عمــوماً .. مابغي اتعمق اكثر في تفاصيل هالشي .. المهم اني بينت وجهة نضري و هذا هو هدفي من المشاركة في الموضوع ..

السموحه من الجميع و اشكر الاخت حلم الطفولة و الاخت خيال الروح على تعقيباتهم ..

دمتم بود :)

دموع قلم

25-05-06 ||, 06:05 PM

أختـي حلـم الطفـولـة..
إذا سالفـة القبايل أكيـد البنت فكـرت فيهـا, فـأنا أتكلـم عن حالـة البنـت إذا هـي مثـلا من قـوم الهـاشمـي
( بنفتـرض ), وعقـب خـذت واحـد من السعـودية مثـلا من نفـس القـوم, سواء كـانوا أهـل أو لا, فـ البنت
لازم تتبـع ريلهـا.. مجـرد تـوضيـح أن البنـت أكيـد فكـرت في هالنقطـة :)

أخـوي لمّــاح..
أشكـرك على التـوضيـح, بـس أكيـد مميـزات بـلادنـا أفضـل بـوايـد من مميـزات بـلادهـم,
لأن هـي ولـدت وتربـت وعـاشت واشتغلـت هنـا, فـ كيـف من يـوم وليـلة تغيـر مكـانهـا.. !!

أشكـركم على التـوضيـح, واقتنعـت بكـلامكم.. :yes: