موقف قديـم .، لكـنه يضايق

[عيون الليل]

الســلام عليــكم .،.،

صــار لي هذا الموقف من زمـان لـكنه بعده مطبـوع ف ذاكرتي وكـل ما أذكره اتحســف

الله يسلمكم كانت عندي صديقه قريبه مني وايـد وايـد .،.، ويوم كان يوم ميلادها .،.، رحت واتعنيت وخذت لها مجموعة هدايا .،.، الكيـس كان كبيـر نعم والكل كان يطالعني وانا شايلتنه .،.، وعطيتها الكيس وقلت لها كل عام وانتي بخيـر .،.، شكرتني وخذت الهديه وروحت .،.،

ف اليـوم التالي .،.، كنت واقفه ف طابور المدرسه وكانت هي يايه متأخره وشاله هذا الكيس الكبير .،.، استغربت ! ! !
يوم شفتها .،.، قالت لي امسكي هذا كيسج وهديتج وانا ما أقدر آخذهن .،.، قلت لها ليش ؟
أنا صديقتج ويوم عطيتج الهديه مابا منج شي غير الصداقه المخلصه .،.، قالت لي لا .،.، أهليه قالوا لي شو المناسبه تعطيج هذا كلـه .،.،
الصراحه انا جي كنت :shock:
مب فاهمه ليش !! انا مب يايبتلها ذهب انا يايبه هدايا كبيره صح لكن ما تتعدى المعقول
قلت لها أسمعي .،.، انا الي الحين اقولج اسمحيلي واستحي ارد الكيس ف أيديه جدام أهليه وانا الي امعنتنهم ويايه عسب نشتري الهديه .،.، لكن هاذي هديتج وكيفج .،.، وزعيها ع البنات
وزعلت منها وخذت ب خاطريه وايد .،.، انا هديتها بحسن نيه لكن هي ما اعرف شو نيتها .،.، ولين الحين متحسفه .،.، لانه ساعات انقدر أشخاص ما يستاهلون التقدير .،.،
ف هاك اليوم تمت متلومه اونها فيه لكن انا كنت زعلانه من خاطريه منها .،.، قالت لي شو اسوي فيهن .،.، جان اوقف واسأل المس .،.، قلت لها مس لو صار لج هالموقف شو بتسوين ! تمت حليلها المس اطالعني وحست باللي فيـه .،.، وما علقت ع شي عشان ما اتزعل اي وحده فينا .،.،
الهدايا وزعتهن ع البنات .،.، وتميت انا ماخذه بخاطريه عليها
الحين اشوفها أحيانا ف الجامعه .،.، واتذكر هالموقف .،.، البنت اتسلم وعادي .،.، لكــن انا ف بالي هالجمــله دائماً لما اشوفهــا

لا اتقــــدر اشــخاص ما يستحقــــون التقديـــر والعنـــاء والاحتـــرام منـــك

قصه قديمه ومن أكثر من 10 سنين .،.، لكنها ما زالت اتضايقني

حبيت أفضفض شوي :sadwalk:

[إسهر معي ليله]

يمكن أهلها ما يرضون بـ هالسوالف ولازم تطيعهم،،

بس في نفس الوقت هيه غلطانه يوم ردت الهدايا،، كان المفروض تتفاهم ويا أهلها وتبيّن لهم انه عيب تردهم،، !

عـ العموم،، مواقف جديمه تحصل ونتضايق منها،، بس مع ذلك حاولي تنسين اللي يضايقج، وبما انج لين احين تشوفينها فـ الجامعه شو رايج تقعدين معاها وتتكلمون عن السالفه مرة ثانية

يمكن بررت سبب اللي سوته،، خصوصاً انه على ايام المدارس،، او في ذاك السن الواحد فينا يسوي أشياء وهوه مب مفتكر انه ممكن غيره يتضايق او يسويها بسذاجه،، لكن يوم يكبر يفهم أكثر وبالتالي يمكن جوابها وأسبابها تخف عنج هـ الضيق

وعساج ما تشوفين أي ضيق ان شالله،، :yes:


_ _ _ _ _ _ _ _ E.M.L

[المزوحي]

صح ماعطيتها شي كبير مثلا ذهب .. لكن لأنه في فئة من الناس جيه .. فأهلها افتكروا إنه انت وحده من هالناس ولو نيتج العكس .. يمكن أسلوب أهلها كان ترهيب أوشي من هالقبيل اللي خلاها ترد الكيس عليج .. مادري أحسن ترده وإلا هي بنفسها تتصرف به من غير ماتحسين ...
والموقف خلاص استوى وهاي الحياة مواقف وعبر صدقيني ...
وانت بتاخذين موقف بأنه ماتعيدين الحركه حتى لو لج صديقة غيرها ..

[تنينه]

السلام عليكم ،،

عـــــزيـ عيون الليل ـــــزتــــي ،، مــواقـــف كثيره تمر فينا وتنحفر في أذهاننا ،، صعب علينا نسيانها او أن نتناساها ولكن مع الصبر ومرور الوقت ننساها لكن تمر فينا بعض المواقف التي تذكرنا بها ,,

جميل تبادل الهداايا بين الاصدقاء فالهدية تعبر عن معزتج وحبج لها ^^ ،، عندما أهديتي لصديقتك الهديه لم تردها لك بل تقبلتها وذهبت بها الى البيت ,, الذي حدث أن أهلها رفضو الهديه وربما شكو في موضوع الهديه بشكل عام ،، ربما تفكير والداها مختلف وذهب تفكيرهم بعيداً ,, اوافق الاخ اسهر معي ليله انها كانت المفروض تتفاهم ويا أهلها وتبين لهم أنه عيب أتردهم !! ,, يمكن رببيعتج تفاهمت مع أهلها وقالت لهم بس هم ما رضوه لانه شي اهالي تفكيرهم جي ( جلبناها عاميه :tounge: ) ,, وأكيد هي بعد متضايجه من اللي استوى بس موقف وصار مثل ما يقولون نكبر وننسى ,, وهي أتوقع تبى اترد لج ولمصادقتج عسب جي اتسلم عليج واتحاول اتسولف معاج ,, ليش ما أتردين لها وتنسين كل اللي صار ,, اعتقد يوم بتردين لها راح يتصلح كل شي وكل هالضيج بيروج عنج ,, (دكتوره نفسيه تنينه تتحسب عمرها :fa46: )


ربي يسعدج ويوفقج دوووم

تنينه

[عيون الليل]

إسهر معي ليله

صح كلامك .،.، بس لو انا مكانها بعطيها أي شخص .،.، حتى لو أني افرها ف الزباله اكرمتوا لكن مب اردها ع صديقتي
ما أحس انه لي مزاج لفتح هذا الموضوع لانها ممكن اتكون نسته .،.، انته اتعرف الناس تجرح عادي تنسـى لكن الي ينجرح الشخص هنيه المصيبه .،.، ما يقدر ينسـى
شكراً اخويه على إضافتك الكريمـه

المزوحي

بالفعـل يا المزوحي خذت موقف وقمت اشوف انه مب أي حد يستاهل انه نتعنى له .،.،
لكن ف نفس الوقت صادفت صديقات قمه ف الذوق .،.، ومثل ما قال رسولنا الكريم " تهادوا تحابوا"
ما أقول غير الله يسامحها .،.، بالفعـل أحرجتني يومها جدام الكل
شكراً اخويه على مرورك

تنينـه

عزيزتــي .،.، اهـلها ممكن يقولون لها رجعيـها بس هي المفروض توقف دقيقه واتفكر واتقول عيب عليه البنت ما غلطت ويايه ف شي .،.، وما اعتقد انه اقدر ايلس وياها واناقشها بشي فات عليه 10 سنين .،.، اتعرفيـــن انها أحرجتني وايد .،.، صح أني بعد فتره عادي كنت وياها .،.، لكن ما عادت صداقتنا مثل قبل .،.، وسنه بعد سنه .،.، صارت منقطعه والحين اشوفها ف الجامعه .،.، لكن انه نرجع صديقات مثل قبل ما اعتقد .،.، وتبين الصدق مب لازمتني صداقه مثل هاي .،.، وماشالله بدون مبالغه عندي صديقات وايد ويمكن 4 صديقات قريبات مني .،.، مب محتاجه اصادق وحده جرحتني واحرجتني
شكراً على إضافتج اختيه

[كـلـكـلـووش]

اخـتــي ..

مثــل ما انا بتــقبل ان شــخص يــاخذ مني هــديه بتقــبل انه يرفــضها ..
يعني انتي ما تــدرين كيــف تفكير اهلــها .. اهلها خايفيــن عليها و اللي يسمـعونها من النـاس هب شويـه ..

صح المفــروض ان ما تكلمـج بهالطريــقه .. بس هي هني كــانت في حيره .. ما تعرف ترضيــج ولا ترضي اهــلها ..

همممم انزين اسألي نفسج هالسؤال .. لو كنتي مكان هالبنيه .. شو بيكون موقفج ؟ بتعاندين اهلج ؟ و لا بتستسمحين من البنيه و بتقولين لها خذي الهدايا و ظروفي ما تسح اني اشلها ؟ اظن الثانيه .. لإن ارضاء الوالدين من ارضاء الله

ما عليه .. فكري فيها بجانب ايجابي .. و انتي سويتي اللي عليج .. و خليـج كووول ^_^

ســلام
أحمــد

[الجنيه]

السلام عليكم ورحمة الله وبركاته ...

سبحان الله أنا بعد صار لي نفس الموقف بالضبط ... بس العكس


أيامها كنت صف خامس ابتدائي .. كانت في صفنا بنت ناس كباريه بس محد يدانيها ولا يلعب وياها عاد أنا لوتيه كنت أم المجاملات يعني كانت تكسر بخاطري فأروح عندها وأكلمها وأسولف وياها عاد هي استوت لزقه ما اتفج عني ,,, مره ومن دون مقدمات شفتها يايه بيتنا ويايبه لي هديه طبعا كانت مغلفه بعد ما راحت بطلت العلبه الا انه فيها طقم ذهب جان انا استوي :puppyeyes: من الوناسه بس امايه قالت لي اشكريها على الهديه واستسمحي منها لأنج ما تقدرين تقبلينها طبعا انا :no0: قلت نو لا نهي مستحيل بس غصبا عني لازم اردها ما يستوي ..

بعد تفكير عميق اهتديت الى اني اخبر الاخصائيه الي كانت مثل ربيعتي وهي تصرفت فديتها اتصلت بام البنيه ورمستها وفهمتها الموضوع .. بعدها رحت وخذت لها دبوب صغنون وهديتها اياه ,,,,

صدق زعلت من خاطري على ايامها ما نعرف شي بس الحين يوم كبرت وعرفت الدنيا حسيت انه الي سويته صح واليوم هالبيت تعتبر من اعز واقرب الناس لي .. :kcl: جان اهديها طقم ذهب خخخ في عرسها ...


السموحه يعني طلعت الي في خاطري بس لليوم احس هالموقف حاز بخاطر ربيعتيه ودوم اسالها اذا للحين هي شاله بخاطرها عليه عسبه الي صار بس قالت لي عادي بردها لج في الافراح اونه يوم بتعرسين بييب لج طقم الماس قلت لها عاد ابيه من الشي الزين ( طراره وتتشرط ..)

الي بغيت اقوله انه مهما كبرنا ومهما مرت سنين على بعض الاحداث الا انها اتظل محفوره في الذاكره ...وصعب نسيانها ..

بس شي حلو

[عيون الليل]

كـلكـلووش

الهديه يا اخويه بسيطه .،.، كبيره ف الحجم لكنها ما تتعدى الـ 500 درهم .،.،
ولو أنا كنت ف نفس موقفهـــا .،.، صح برضي أهليه وانا أبداً ما عارضت أنها ترضي أهلـها .،.، لكن ما أجرح صديقتي صح ولا أنا غلطانه ؟
بآخذ الهديه وبعطيها أي حد .،.، وخلاص لا ازعل اهليه ولا ازعل البنيه .،.،:yes:
هو موقف أيضايق ويحرج لانه الي صار.، صار جدام البنات
شكراً أخويه على إضافتك ^_^

الجنيـه

الي سويتيه صح .،.، لكن هنيه البنت بالغت ف الهديه وايد .،.، ولا بعد كنتوا صغاااار .،.،
لـوول ضحكتيني يوم قالت لج امج ما يستوي تقبلينها وانتي اتحسفتي .،.،
والله يديم صداقتكم يا رب .،.،.،
ويالله عرسي عشان تيب لج العقد وعقب انا وانتي بنبيعه وبنتناصفه لكن المشكله الالماس اتطيح جيمته مب مثل الذهب الخالص .،.، قولي لها تيب لج عقد ذهب أفود لج " ولــي " :puppyeyes:
شكراً عزيزتي على مرورج الكريـم

[الجنيه]

ههههه ماشاء الله عليج اتعرفين انه الألماس اتطيح جيمته وأنا مثلج قلت لها ما ابا الماس ابا ذهب عشان اقدر ابيعه ههه

ولايهمج بعطيج الربع عاد لا تستوين طماعه واتطالبين بأكثر تراني بهون ولا بشاركج المهمه

[شمعة أمل]

غريبه .. انا ماجوف انه فيه شي غلط لو ربيعتي تعطني هديه .. بالعكس استانس واسوي حفله:fa34:

انا من النوعيه اذا احس اني زعلت حد اشتريه هديه ولا ورد
اذا تولهت على ربيعتي اشتريلها هديه
اذا احس اني مقصره في حق ربيعتي لاني وايد مشغوله وماعندي وقت حقها .. اشتريلها هديه:kcl:

مادري.. احس لو اشتريلها هديه مابتزعل علي وبتعرف اني انا مب ناستنها وبعدني افكر فيها .. اسوي هالشي اكثر من اني اتصل واراويها اني مانستيها لاني مرات يوم اكون مشغوله وسترسسد اقول كلام ماقصده ولا ارمس وانا مب حاسه ب عمري:doh: