شـــورايكــم... نشتريــها ؟؟

[شوق القلوب]

الســـلام عليـــكم...


ودي أشـــاوركم بهالسيـــاره..

http://www.toyotauae.com/arabic/images/prado/2006Model/ExteriorColours/white.jpg


Prado
. . .

حد ينصـــح بها..؟؟

وشو عيوبها و ميــزاتها..؟؟

. . .


وفي حد يقترح علي سياره فورويل.. يعني ما اتزيد جيمتها عن 130 ألف درهم بس تنفع للخطوط و للعوايل..؟؟

.
.

صح.. شو رايكم بالانفنيتي فورويل.. ( ما أعرف اساميهم .. ماعندي خبره في هالسوالف )
والـX5

وهالانواع من السيايير..

.
.

[شرجاوي]

الانفنتي مب مريحه ف يلستها ... البرادو احسن بواااايد و كفايه انها تويوتا .. و عندكم هوندا mrv ... احلى و اقوى من البرادو و سعرها معقول .. 100 الف او اقل مب اكثر

و الفورويلات الالمانيه ما تنفع للخطوط .. مثل الكايين و الاكس فايف و المرسدس ام ال

[إسهر معي ليله]

البرادو ما عليها كلام،، سيارة غاوية ومريحه وما فيها مشاكل واشوفها حق عايله من 6 او 7 اشخاص بالكثير،، لأنها مب وسيعة شرات النيسان أو الكروزر

تقدرون تزيدون عالـ 130 الف شويه،، وتاخذون الأرمادا،، كبيرة وفخمة وقوية و وسيعه واايد،، وفي نفس الوقت ارخص من اللي في فئتها،، لأنها امريكيه ويابانية في نفس الوقت

http://auto.consumerguide.com/images/autoreview/400x266/2005-Nissan-Armada-04809141990006.JPG

::
::

واذا عادي تاخذون سيارة امريكية،، اتريوا الجمس والشفر،، بينزلون قريب ان شالله

http://www.gminsidenews.com/naias/GMT900/Yukon/yukd6.jpg

http://www.gazeta.ru/files/408190/cheva1.jpg

::
::

ان شالله اكون فدتج

[شرجاوي]

اخوي اسهر معي ليله ... في شي عن الارمادا يمكن ما تعرفه .. 90 % قطع الغيار مب متوافره فالامارات ... اذا الموتر اخترب بيقولون لهم اتريوا شهر لين ما انييبلكم السامان .. و سيارات نيسان معروفه ب أعطالها المتكرره

[شوق القلوب]

شرجـــاوي

هـــوندا..! ممم.. ما ادري احس انه التيوتا بتكون احسن من الهوندا..!!
بس بشوف هاللي تقصدها..

.
.

EML

الله يسلمك.. احنا صح عايله بس ما نتعدى 3 أشخاص ، كنت اقصد العايله انه الدريول يسوقها مب نحن..
والبرادو.. النسيب عنده وحده.. بس عوده علينا..هاي تنفع للي عنده صغاريه ..

احنا كنا ناوين ع اللاند كروزر.. بس خساره نشتري وحده يديده الحين و عقب سنه ما ادري سنتين بيتغير شكلها نهائياً.. فقلنا ناخذ شي حلو ومريح لين ما انشوف الكروزر كيف بتكون..

صح.. الشيفر و الجيمس.. كم بتكون اسعارهم تقريباً؟؟
.
.

شرجاوي

صدق..!! مشكله عيل.. اصحابها بيتعطلون وايد اذا جي حالها..!!

[شمه]

يعني الهوندا احسن عن المورانو؟؟؟

لاني ناويه اخذ مورانو..!!

سوري طرحت استفســــار في موضوعج شوق القلوب..
بس حبيت استفيد..

[راعي الزعـامه]

البارادو احسن عن كل اللي ذكر
هوندا قطع غيارها نار
انفنتي والا X5 سعرهم غالي وعموما ما ينفعون للخطوط ..

شمه

المورانو افضل

[المزوحي]

مورانو لاباااس فيها شمه .. اما بالنسبة لسيارة فورييل أختي شوق القلوب وسيارة بهالقيمة فتويوتا برادو الأفضل ولو إنه شكليا وايدين مب داخله مزاجهم .. لكن سيارة عملية .. تكد وجيمتها فيها ..

[إسهر معي ليله]

:: شرجاوي ::

بالنسبة لقطع الغيار فـ مادري الصراحه،، بس يمكن هالشي كان اول ما نزلت السيارة،، لأنه اي سيارة اول ما تنزل فالسوق توصل قطع الغيار عقب بـ شهرين او ثلاث ،، اما انه على طول فـ مستحيل هالشي،،

:: شوق القلوب::

الشفر والجمس حالياً اسعارهم تبدا من 115 تقريباً،، بس الأشكال اليديده اذا نزلت يمكن تكون اغلى،، اعتقد تقدرين تتصلين الوكالة وتستفسرين لأنها قريب بتنزل واكيد فيه ناس بدوا يحجزون


:: شمه ::

المورانو اكيد احسن واصغر،، لأن الهوندا اللي يطرونها ما يخصها في المورانو،، عائلية وايد،، هاي صورة

http://automobiles.honda.com/images/banners/2006/pilot/exterior_gallery/large3.jpg

[شوق القلوب]

شمــه

خذي راحتج عزيزتي.. كلنا هنيه بنا نستفيد :bow:
.
.

عاشق قلم

الحين.. يعني المورانو أحسن من البرادو..؟؟
وشو سعر المورانو و البرادو.. و شو الفرق بينهم في المميزات..؟

.
.

المزوحي

والله احنا وايد مدحولنا البارادو.. انها زينه و ماتصرف بترول..!

.
.

EML

هممم...

يبالنا نتصل و نسأل.. و انسوي جوله ع الـوكالات..!

.
.

[شرجاوي]

اسعار قطع غيارالبرادو نار ... ضمان الهوندا احسن من التويوتا .. 3 سنوات بدون تحديد الكيلو ... و عن الارمادا واحد من ربعنا عنده انفنتي q56 و دقت مكينته ( نفس مكينة الارمادا ) .. يوم ودى الموتر قالوله ما عندنا بساتن هنه لازم تتريا لين ما انييبهن لك ,,, موتره لين الحين واقف من اسبوعين و السبب ان الوكاله ما تروم تدفع جيمة الشحن بالطياره و عدم توافر قطع الغيار

[شوق القلوب]

شرجـــاوي

انت امجرب الهوندا كـ سواقه ؟


وشو بعد فيها زين غير سالفه قطع الغيار الارخص ؟؟

[عيون الليل]

شوق القلوب .،.،

شو رايج بالمورانو ؟ البرادو ممكن يتغير شكلها بعد فتره لكن المورانو توها نازله ومناسبه لكم إذا كانت عايلتكم صغيره وبنظري أفخم .،.،

ماشي أحسن من انج اتسيرين الوكالات واتشوفين بعينج .،.،.،
هذا كـان رايي .،.،.،
والسموحـــه عزيزتي

[شرجاوي]

هيه جربتها .. صرفية البترول وايد اوكي .. السيتات ناعمه و مريحه و ماتعور الظهر عكس المورانو ... و سعرها وااااايد حلو بالنسبه للبرادو و المورانو ... انصحج بها

[عيون الليل]

عاد عن السيتات ما ادري .،.،
أحسن شي تسألين شخص عنده مورانو ويستخدمها بإستمرار .،.،
والهوندا الي طراها شرجاوي حلوه تراها

مثل ما قلت لج مالج الا اتسوين جوله ف الوكالات مثل ما سويت أنا ^_^

[نبراس الليل]

اقدر اقولك ان برادة سيارة جميلة جدا وعمليه ايضا

وانصحك بها

واما عن الانفينيتي هي سيارة جميلة وصرفيه البترول لابأس بها ملائمة

ودائما toyota الافضل لعدم وجود اعطال كثيرة بها و لوفرة قطع الغيار ورخصها

هذا مالدي من النصح في الخيار لكن لاتنسي صلاة الاستخارة فهي من أهم الأمور في قطع حبال الحيرة

ومشاورة الناس طبعا

مبروك مقدما وإن شاءالله تشوفون خيرها

[شرجاوي]

رخص قطع غيار التويوتا ؟؟؟ اول مره اسمع ان قطع غيار التويوتا رخيصه ...

[بحر الموده]

سلام عليكم ورحمة الله وبركاته

انا اشوف الميرا الهوندا فتك 3.5 قووويه والمورانوووو والارمادا والانفنيتى

اهم شىء الاستخاره .. ثانى شىء صحيح كلام اخوى الشرجاوى مثل ماتفضل وقطع غيار التويوتا نار

مب مثل قبل كل شىء تحووووووول والبرادوووو اذا كانت 6 سلندر زينه اماا 4 سلندر ماتنفع حق خطوط وتشرب بترول وايييييييييييييد

[شرجاوي]

ال6 سلندر اوكي ... و لكن قطع الغيار حدث ولا حرج ... السفايف الاماميه ب 680 درهم

[حبوبه دبي]

مـاشالله الشبــاب مــاقصــرووا ويــــااج :bow:

صلـــي الاستخــاااره وان شالله خيــر ،،

ومبــرووك مقدمــًااا

:yes:

[المزوحي]

عيل خلاص .. شوق القلوب .. سووا مثلي وخذوا متسوبيشي باجيرو .. اللي الأغلبية ذموها لي :kcl:
وآخر شي خذت باب واحد .. انتوا خذوا العودة وإن ماتبون رقم واحد خذوا رقم 2 والله يمكن سعر الأولى 124 تقريبا .. وأنا أقول احتمال يتغير شكلها الحول مب أكيد ... :yes:
والحين الجماعة بيردون عليه وبيقولون اسعارها نااااااااار والموتر خرابه :bye2:

[ألم ترى]

بسم الله الرحمن الرحيم
.
.
ها اشوف الخرده اضهرت
:harhar1:
الجماعه ماقصروا وخاصه الاخ شرجاوي شكله يعرف فهاي السوالف ماشاء الله عليه
عليج بصلاة الاستخاره
.
.
ربي يسعدكم ف الدارين

[خيال الحب]

,, السلام عليكم,,


تبين نصيحتي..

خذيلج برادو..

لانه ينفع للخطووووووووط..

وتانكي البترول ماله كبييييييييييييييييييييييي يييره

صح انه الفل ماله 200 وشي .. بس يتم ويااااااااااج اسبووع تقريــبا.. هاا لو كنتي تروحين فيه وترجعين ..


والمورانو... ممممممممم مادري مب عايبني شكلهااا


اختي شمه انصحج بالرنــج...

والانفينيتي حلووه بس صغيرررررررررره من داخل.. نحن عندنا وحده في البيت .. بس عاااايبتني وايد
شكلها كلاسيكي..


وعن الستيشن ...

قالو انه شكله بيتغير ع بداية السنه هو واللكزس ستيشن

وقيمة الستيشن حسب ما سمعت بيوصل 300 الف خيييييييييييييييييييييييب ه.. سعر مبالغ فيه وااااااايد,,

انا شفت كذا صورة عن الستيشن اليديد بس مادري اذا هو نفسه الي بينزل عندنا ولالا


هي صح.. تذكرت

في سياره يسمونها فيتاره خخخ ادريبكم بتضحكون

بس لو شفتي موديل 2006

الصرااااااااااحه عجييييييبه..

مواصفات تب واحلى من الراف بعد..

هاااا شو قررتي تشترين؟

[شرجاوي]

خذيلج كورولا سكان يمين الفل مالها 50 ربيه و بتمشيج 4 سنوات بالتانكي الواحد .. سعرها 4 آلاف

[المزوحي]

فيتارا شفتها مب لين هناك .. شكلها الخارجي مثل راف ... ولا تنسى خيال الحب يبونها للدريول ..
شو تشترون شو تشترون .. مابقول هايونداي فورييل ولا كيا .. يمكن تغلقون الموضوع ...

[شوق القلوب]

من جــريب يمدحون الـ Pathfinderمن نيسان..

شكلها تقريباً نفس الارمادا.. بس على أصغر..

http://us.autos1.yimg.com/img.autos.yahoo.com/aic/nissan_pathfinder_s4x2_2006_385x192.jpg

[قلوب دبي]

كتبت رد شطوله و اخر شيء بالغلط صكيت الصفحه اهي اهي اهي :(

عالعموم اولا السلام عليكم خخخخ

الله يسلمج ..

x5 ما تصلح للعايله لانها ضيقه من ورا و سعرها مرتفع فوق 250

الرنج وايد زين يلسته ملكيه و لكن نفس الشيء السعر مرتفع فوق 250

عندج الانفينيتي غاويه و وايد زينه عيبتني وعند اربيعي منها شوي غاليه ..

باثفندر زينه و لكن يمكن تضايقكم في اليلسه و خاصه عالخطوط ..

البرادوو زينه و لكن مواصفاتها شويه .

النيسان حلووو و ما عليه كلام ..

الكلوزر ( الاستيشن ) غاويه و لكن شكلها بيتغير ..

اللكزس فور ويل زينه و نفس الكلوزر و لكن سعرها شويه مبالغ فيه ..

الارمادا روعه ـ تعيبني وايد ، و اذا افكر اخذ للبيت بفكر في ارمادا و سعرها وسط لا هي بغاليه و لا هي برخيصه ..

مممم هاللي عندي وانا افضل ارمادا .. ^_^

[الحساس]

ماشاءالله ماقصروا بسرد المواصفات وحبيت ازيد بشي بسيط والي هو..

دامكم ناوين تاخذون موتر الخين على اساس بعد 5 سنوات تغيرون..

هذا يعني بتبيعون الموتر اليديد وبتاخذون غيره...

فمن المواتر الي ماينزل سعرها وايد هن التيوتا والنيسان... لانهن في اوساط السيارات المستعمله مطلوبات ...

والله يكتبلج الي فيه الحير ان شاءالله

[تحفه]

بيه .. شفينا شكلنا كلنا نبا نشتري سيايير يدد .. على فكره نحن بيتنا يفكرون يشترون يا ارمادا يا كادلاك من الكبار

طبعا ابويه يقول ارمادا عمليه اكثر وخواني يبون الكدلاك لانها احلى واريح بس يقولون مش عمليه دوم تخترب و دوم في الوكاله

فمادري ..

يالله .. مبروك مقدما ^.^

[شوق القلوب]

الحيـــن الكلوزر اليديد بينزل 2007 و لا 2008 ..؟؟؟؟

[لمّــاح]

مرحبا ..

بينزل في 2007، من كمن يوم مكلم مال الوكالة ..

و بخصوص الامريكي اليديد بينزل في غضون شهرين، على كلام مـدير وكالة ليبرتي الي في الشـارجه و عن اسعار الامريكي ما بتكون مرتفعه، يمكن اغلى عن اسعار هالموديل لكن مب وايد اتوقع بحد اقصى 10,000 ..
مب مثل المرسدس رفعو اسعارهم بشكل خيالي، تقريبا 100,000 اذا مب اكثر !!