قاموا الوافدين يتكبرون علينا!!! [الأرشيف]

اخت اختي

10-03-06 ||, 11:15 AM

السلام عليكم ورحمة الله وبركاته،

ألحينه الوافدين مب مثل أوّل.. اتحس يحترمون المواطن أوّل، يحترمون الأرض إللي يمشون عليها.. لكن ألحينه "طل!!!" :fa55:

وهذا الكلام مب من فراغ، استوالي كم من موقف:
مرة كنت في القرية السورية، وجفت واحد سوري (من إللي يبيعون) ياكل حب ويعقّه عالأرض.. فقلتله بكل أدب: لو سمحت ممكن ما اتعقّه عالأرض؟.. قاللي: بالله، وين كبّوا يعني؟ قلتله (وأنا منصدمه من الرد): في الزبالة.. قالي: بالله
جفتوا الوقاحة!!! بس أنا ما سكتت (وأتمنى كل مواطن ما يسكت).. اختي قالتلي أبلّغ عليه.. واتصلت بادارة القرية العالمية وما شاء الله ما قصروا... خلال دقايق وصل المفتش (جيه ازقرت، ارتحت يوم طلع مواطن) سرت وياه عند الريّال.. هنيه اتبريد الريال.. واتغير من اللعين إللي إنسان آخر.. كان يقول: حصل خير شو فيه عمي؟
في خاطري أنا أقول ألحينه حصل خير؟؟
المهم سحبوا بطاقته يومين وغرّموه.. يستاهل.. :fa44:

والبارحة زرت المعرض إللي في الريف مول وكنت عدّال ستاند يبيع قمصان.. المهم لبنانية واقفة هناك تبا تشتري قميص وما شي قياسها أو ما حصلته.. مب متأكدة المهم.. راعي المحل قالها: اشتري هالقميص.. (وهو ايأشر على قميص مكتوب عليه: proub 2 b emaraty) وبكل وقاحة قالت: هيدا إللي ناقص كمان..!! قلتلها: لو سمحتي اختي شو قلتي عن هالقميص؟ قالتلي: حلّي عني أنا لحالي طاير ديني.. قلتلها: علّج اطيرين إنتي ودينج.. المهم مادري شو تمت اتقول جان آخر شي قالتلي: كلي ***.. قلتلها: أمّج!! :fa44:
صدق قليلة أدب.. وكنت بشتكي عليها عند الشرطة بس المشكلة قالولي إن لازم أسير المركز وأوقع!! بس منو إللي بيخليني أسير؟؟!!
برايكم شو أسويبها؟؟ (خذت رقم تيلفونها)

المهم وشو رايكم بهالظاهرة التعبانة؟!!! :wacko:

ريم العين

10-03-06 ||, 11:23 AM

لو سووا جدامي جي بشلهم من الوجود

بس مب كل الوافدين في منهم حبوبين

الحساس

10-03-06 ||, 11:26 AM

والله شو اقولج الحال مايسر..

الي سويتيه صح طبعا ...
اذا كل شخص فينا اتبع هالاسلوب معاهم بينتبهون وماراح يعيدونها بس مثل مايقولن..

المال السايب يعلم السرقه.. واذا ماشي حد ينبههم بيستمرون على ها الشي وللابد..

بس فضول .. شقايل خذتي رقم تلفونها :p هي الي عطتج اياه بارادتها؟؟؟ شي غريب الصراحه

الكلمه الطيبه والابتسامه تنفع احيانا مع هالناس بدال الشده والعنف معاهم..

العجيبة

10-03-06 ||, 11:29 AM

هههه وانتي ليش تكلميهم من الأساس !

خلها تقول شو ما تبا ، نقص فيج اصبع ؟ لاااه ..
خليه يعق شو ما يبا دامه في جناحـه .. وانتـي مالج ؟! ولا شي ..

ومن راقب الناس مات همـا .. سيـري أي مكان ولا تشوفي حـد
شوفي دربـج وشو تبين تشترين !

القضية مب قضية وافدين أو لا .. وافـدين أو مواطنـيـن ترا في النوعيـن بنشوف الشين والزين ..

ويالله خيرهـا في غيـرها خيتـو .. تكبرين وتنسيين ..

اخت اختي

10-03-06 ||, 11:35 AM

تلسمين اختي ريم العين عالمرور..

اخت اختي

10-03-06 ||, 11:37 AM

اخويه الحساس.. كانت مخليه رقمها عند ربيعتي.. لأن كانت تبا قميص.. سمعتها اتقول: خليت رقمي معاج عشان القميص..
فخذت الرقم :devil:

مشكور عالمرور.. وأتمنى كل مواطن يدافع عن هالأرض الطيبة..

اخت اختي

10-03-06 ||, 11:39 AM

اختي العجيبة.. أنا إنسانة معروفة إن ما أقدر أسكت إذا سمعت إي شي ايهين دولتي!!!
وغلط غللي اتقولينا، المفروض كل مواطن ما يسكت عن حق دولته وحقه!!

المزوحي

10-03-06 ||, 12:09 PM

يمكن حد بيقووول لأنه المواطنين ينظرون للوافد بنظرة دونية .. وإن كان هالكلام صحيح
فأنته يالوافد عامل الشخص بالمثل على الأقل إن ماكنت تبغي تكون أحسن عنه ..
يعني مب كلهم وااااحد .. لكن أنا بشكل عااااااااام أعاني من الوافدين سواء كنت أسوووق
سيارتي .. يعني ماشي احترام الطريج وبيطوووف غصب لأني مواطن ولايحترم القانون ..
والششي الثاني يوم أسير اتسوووق مثلا او في الكووفي نظرتهم تقول اسكت ويشوفنك
بنظرة دونية ... حتى يوم نمشي مكان مايسوون درب لك حتى لو انته تمشي وعقب هو " ي "
فيدعمك وفوووق هذا كله مايعتذر ..
حتى يوم تسير البنك او تطلب من المطعم تكوون في " الكيو " يدزوونك ... أو يقوفون جدامك
مره كنت في كارفووور .. وكان دوري عسب ادفع ..يت وحده مستنه وحطت اغراضها جدامي
قلت لها لو سمحتي .. قالت انا مستعيله .. قلت لها مب شغلي .. كلنا مستعيلين مب بس انت ..
فردت تووقف وراء .. طبعا هاااا موقف من المواقف ...

مجموعة إنسان

10-03-06 ||, 12:13 PM

الله يعينج ..
زين سويتي في هذاك السوري ..والله يستاهل الخام ...
اذكر مره كنت ماخذ موتر ربيعي في دبي . (بيك أب ) مال العزبة . وكنت لابس تيشيرت وبنطلون ..
وانا ماشي الا اشوف موتر يلف علي من السيد الرابع واللا يطلع سوري مع ربعه وقاعد يظحك ..
والموتر ما شاء الله عليه مسلح أشووووف يرز جان انزله ..
تم يترجاني ويحلف علي انه غلطان بس المهم خاااااااااااااااااااااااا ااااااااف ..

تحفه

10-03-06 ||, 12:31 PM

مش كلهم لا تعممين !

المشكله في إن معظم الي يهاجرون من بلادهم لبلاد ثانيه ( مافيهم خير لبلادهم .. كيف تبينهم يبون الخير في بلاد ثانيه!! )

ولا تحكمين على شعب ولا بلاد من الي تجوفينه هني !! .. معظم الي تصير بسبتهم هالمواقف .. * مضطرين * يعني كيف تبين نفسياتهم تكون ؟ يوم انهم ما حصلو حق طبيعي في بلادهم لازم يحصلونه .. وحصلوه في بلاد غريبه عليهم ( كيف نفسياتهم بتكون ) ؟!!؟

بس شي وايد ناس انا اعرفهم والله اخلاق وادب وكلشي .. حتا مرات يوم ارمس وياهم .. يقولون لي انتي اول مواطنه جي ترمس ويانا والباجين يوم نظهر يطالعونا بنظره جنّهم مب إنس ( يبتعدون عنهم .. أنحرج ؟!!

انا والله مرات احس على كثر ما نحنا كريمين و مرحبانيين .. اطالع الفجوه العوده بينا وبين الاجانب .. لدرجة ان اساتذنا يستغربون منا وتحسينهم يستانسون يوم نشوفهم في مكان ونسلم عليهم ويعرفونا على عوايلهم .. احس انّ بما نحن استوينا دوله منفتحه إيونا الناس بحكم انواع اشغالهم وستثماراتهم .. لازم يعرفون كيف نحنا .. مب بس والله ماخذين عنا .. إنا نحن شعب نلبس ونكشخ ودوله فيها خيرات ويالسين شيوخنا يعلمونا ويحضرونا !!

ونا اشجعج اختيه على ردات فعلج ..

مشكورين على الموضوع ولو انه يناقش قضيه حساسه

تحفه

10-03-06 ||, 12:39 PM

مش كلهم لا تعممين !

المشكله في إن معظم الي يهاجرون من بلادهم لبلاد ثانيه ( مافيهم خير لبلادهم .. كيف تبينهم يبون الخير في بلاد ثانيه!! )

مثال : العراقيين وايد مب عايبتنهم النظره الي نحن ماخذينها عنهم ع سبـة البرتقاله !!

هاذاكي اليوم كنت ارمس وي بنت السفير العراقي (الي اغتيل ) .. وايد حازه في خاطرها سالفة شبابنا والعراقيات .. لدرجة اتقول انهم من يعرفون انها عراقيه .. يتحرونها تسوي هالسوالف عادي .. ومن هناك قوم البرتقاله عندهم مجتمع منحط !! عباره عن فرق غنائيه

والعراقيات اشرف ابوايد من هالـ ( شو اقول الحينه )

الموهيم

يعني لو مثلا هي مب فاهمه تركيبة معظم عقول الشباب الاماراتي الخايسه للاسف .. كانت بتتحرانا حيوانات اعتقد :fa52:

.. ف الحين .. نحتاج نكبّر عقولنا اكثر .. ونبتعد عن التفكير الغجري :ghostface

الموضوع يطرق لكثير من المواضيع .. اسمحولي اذا بحشركم برد ثاني :vampire:

اخت اختي

10-03-06 ||, 12:44 PM

اخويه المزوحي.. بصراحة لازم يخفوّن نسبة الوافدين..!!! مب حالة والله!!
مشكور عالمرور..

مشكور اخويه هواجيس عالمرور.. مشكور على هالموقف.. ما قصرت، زين اتسوي..
عيل أعرف وحدة كان يلف عليها روسي ويظحك هو و ربعه.. ويوم وصلوا عند الإشارة جان تنزله وتصفعه!! هه.. والشباب ورا جاهزين عشان إذا سوا شي بينزلونله!!

شمعة أمل

10-03-06 ||, 01:07 PM

مب كلهم جي .. بالعكس شي وايد طيبين ومحترمين .. واذا هم صدق جي انا بصراحه مالومهم ... عن نفسي يوم اتمشى في السوق اطالع الناس ولاحظت شي انه نسبه كبيره من المواطنين يعاملون الناس الى من جنسيات مختلفه جنهم أقل منهم! لكن ليش؟؟

أحيد في الصيف يوم كنت اشتغل.. معظمنا كنا مواطنين وشي وافدين .. الوافدين مول مايسولهم سالفه .. شي وحده فلسطينيه كنت عادي وياها يعني ماعملها غير عن المواطنات .. كلهم نفس الشي مجرد "زملاء عمل" .. ياربي كيف لصقت فيني كل يوم لانه انا كنت اسويلها سالفه والباقيين لا:Oo:

اخويه المزوحي.. بصراحة لازم يخفوّن نسبة الوافدين..!!! مب حالة والله!!
مشكور عالمرور..

!!

ولو خففو نسبة الوافدين منو بيشل أشغالهم؟؟ نحن بكل صراحه فينا خقه .. جد جفتي واحد مواطن يشتغل ويا الهنود يبني بيت ولا عماره؟؟؟ ولا زبال؟ ولا زراع؟؟
لولا الوافدين جان ماجفتي دبي مطوره مثل ما هي الحينه..

والسموحه

اخت اختي

10-03-06 ||, 01:28 PM

اخت اختي

10-03-06 ||, 01:30 PM

مشكورة اختي أم خدود عالمرور

شمعة أمل

10-03-06 ||, 01:44 PM

اسمحيلي اختي شمعة أمل بس كلامج غلط!!!
لو يرفعون معاش العامل جان المواطن اشتغل.. و وايد من الوافدين وبالأخص الهنود ما عندهم شغل.. ماخذين ويز زيارة ويتمون علّة عقلوبنا عقب!! كلامج غلط اختي.. نسبة قليلة من المواطنين إللي فيهم خقّة!!! مش نسبة كبيرة.. ولا الأغلبية يبغون يشتغلون!!

يبون يشتغلون بس مب أي شغله *مب كلهم بس اكثرهم*
والدليل قبل لابفتحون الفرع الثاني لمطعم أبويه تمو سنتــــــــــين يدورون مواطنين يشتغلون في المطعم من ناحية طباخ ل waiter ومحد طاع يشتغل عندهم وردهم للمدير كان "ماأتانزل أشتغل في مطعم"

ذنـيـنـي

10-03-06 ||, 01:50 PM

خلهم يتمون مكانهم محد قال لهم شي

لكن على الاقل,, الواحد لازم يحترم القوانين في الدولة الي هو عايش فيها,,

هاك اليوم كنت ويا واحد من الشباب الوافدين الي كانوا وياي في المدرسة و كنا في سيارتي
المهم الاخ استخدم الكلينكس و فتح الدريشة و عقه في الشارع,,
قلتله ليش توصخ الشارع ياخي,, قال عادي الا هي عيمان, ما يخالفون على الوصخ الي في الشارع :Oo:
قمت و رديت من أول لفه, و رديت عند الوصخ و قلتله انزل و شله, قال لا ما بنزل و ما ادري شو,,

قلتله والله ما بتحرك الا يوم بتشله ولا انك تنزل من سيارتي الحين,, قام الريال و نزل و شله و عقب تحركنا,, طبعا سوا عمره زعلان بس انا تغديته قبل ما يتعشاني و بوزت في ويهه قبل ما هو يسوي عمره زعلان و فهمته انه مهما يكون انته بتم غريب و لازم تحترم البلاد الي عايش فيها عشان يحترمونك و انا صدق كنت بنزله من سيارتي لو ما طاع يشله

بعطيكم مثال اخر,, لاحظت في الاونه الاخيرة ظاهرة استخدام كتف الطريق للخروج من الزحمة, أكيد بتقولون انه الشباب المواطنين , المتهورين, الي ما يعرفون اخلاق السواقة هم الي يطلعون, لكن اقولكم (( لا ))
اكثر من نصهم من الدول العربية, و بعض الدول الخليجية الي يشتهر شعبها بالفوضى و عدم الالتزام بالقواعد المرورية..

يعني مثلا يوم الاربعاء, الي هو أول امس كنت واقف عند الـلفة U-turn و واقف حالي حال كل الي يبغون يلفون, تفاجأت بشاب من جنسية عربية يحاول يدز عمره جدامي بالقوه ( بما معناه اني بطوف غصبا عنك )
انا ما سويتله سالفة لأنه هالاشكال ادعمهم و اكسر سيارتي و لا انه يسوي الي في باله و يطوف بدون رضاي
المهم الريال سوا عمره معصب و نزل الدريشة انه يبغي يضارب,, و يقولي ليش ما بتخليني أمشي :crazy:

قلتله و انته بأي حق تدخل جدامي,, قال اونه انا مستعيل و عندي اشغال مهمة, قلتله و الـ**** الي واقفين في السيد, ما عندهم اشغال, قال عندهم قلتله اوقف حالك حالهم,, طبعا سكت و ما قدر يرد لأنه لو رد علي والله لغير خريطه ويهه, خاصة انه اخويه و ولد خالي وياي و ما شاء الله عليهم كل واحد اكبر من الثاني في الحجم :fa38:

طبعا في النهاية طفت انا و الي وراي ما طوفه و ولا الي وراه :fa51:

الي يبغي يشوف الزلمات شو يسوون يسير كورنيش البحيرة في الشارجه و بيشوف العجب صوب سينما الماسة :fa52:

أحيد مرة ربيعي كان يتمشى بين البنايات و الظاهر انه طاف في احد الشوارع اكثر من مرة فتفاجأ بشباب زلمات يوقفونه و يقولون له شو عندك ليش تتمشى في فريجنا و اونهم يبغون يضربونه,, ربيعي ركب سيارته و سار عنهم و هم اونهم يبغون يلحقونه و تخيلوا لحقوه الين قبل الذيد بشوي عسب يضاربونه :wacko: ربيعي سجل ارقام سياييرهم و بلغ عليهم و في المركز اتهموا ربيعي بأنه متحرش بخواتهم و ربيعي أصلا مطوع و لحيته طويله و كندورته قصيرة :fa56:

ما نقدر نقول انه كلهم مب زينين,, لأنه يوجد الكثيييييييير منهم زينين و نذكر لكم المدرسين الي درسونا في المدارس و المهندسين و العاملين

لكن يوجد فئة جاحده منهم و ما يسوون اي اعتبار للقانون و النظام و يتحرون اعمارهم في بلادهم

اخت اختي

10-03-06 ||, 01:51 PM

بس مب كلهم!!! وايد ناس يبون يشتغلون.. عالعموم مشكورة عالمرور

اخت اختي

10-03-06 ||, 01:58 PM

هيه والله اخويه.. لوعوا بجبدنا!!! عالعموم مشكور اخويه ذنيني عالمرور

لمّــاح

10-03-06 ||, 02:16 PM

الـــسلام عــليكم ..

مــوضوعج حــــساس جـــدا، و فــي نفــس الوقت مايدل على انه كلامج صح او كلامي صــح لكن الواحد يكون حقــاني و يحكم على النـــاس بالــعقــل ..

أولا، المـــواطنين و الوافدين في النهـــاية هم بــشر، و مب الجــنسية هــي الي تحكم هل هالإنســـان هذا نذل أو خقاق أو غـــيره، شخصــية الإنســان و تركيبته و البيئة الي هو عـــايش فيها هي الي تحكم ..

يـــاما صـــادفنا وافــدين، محــترمين جــدا و خــدومــين، و العكس صحــيح، و نفس الكلام ينطبق على المواطنين ياما صــادفنا مواطنين محترمين و خدوميــن و يـــــاما و ياكثــرهم المـــواطنــين الـــي مــــافـــيهم خــــير حــتى لعـــيال بـــلادهم و هلهم !! :fa55:

و انــــا عــــن عمري، الغــلط مـــا اسكت عنه لو كان وافد ولا مـــواطن و ياما بهدلت أجـــانب و انجلـــيز في المراكز، أذكر مره واحد سكران كان يــسوق و بــغا يدعمني و يدعم كمن مــوتر و شرد، لحقته و وقفته و زقرتله الشـــرطه و سحــبوه و على هذا كله بهدلته زيـــاده في المركز و غــرموه بيزات و سجـــنوه، عقب يومين في الجريدة اشــوف اعلان من الســفارة البريطانية تحذر رعـــاياها من قــيادة المركبات و هم تحت تـــأثــير الكـــحول :fa56:
و مـــره امـــريكي، ســوالي حركة وصخه بإيــــده و شـــرد، بلغت عنه و يـــابوه المركز عندي شرشحته لـــين ما كــســر خـــاطري و عقب ودرته:fa51:

مـــب شــطاره انه الواحد يذل غــيره، لكن الي مايحترمني في بلادي مابحترمه، بالمقـــابل، وافدين و انجليز حتى اعرفهم محترمين بشـــكل ماتتخيلونه و مرابعنهم عــــادي، أكــبر مثـــال اربيعنا الالماني ( حتى اني عرفته على ذنيني و كلكوووش ) :unclesam:

و المــواطنين بعد، ساعات اييج مــواطن يدور راحته على حسـاب راحة النـــاس حتــى الشــــواب يطلــعون من عنده و دموع القهـــر على خدهم من الي يستويبهم !!

بالمختصر المفيــد، مب الجنــسية او البــلد الي ينتمى اليها الانسان هي الي تحدد هويته و شخصيته، إنــما كــل انسان له شخصيته المستقلة عن باجي النــاس، حتى الاخوان مستحيل يتشابهون، يمكن تحصلين اخو ملتزم و الثـــاني صـــايع ضــايع !!

و على فكرة، نحن الحمدلله شعب طــيب جــدا، و وايد أجـــانب يوم يعاشرونا فتره تتغير نضرتهم للعرب و لنا بشكل خـــاص و يحبونا بشكل غــريب، كـــأنها نعمه انعمها الله علينا .. الحمدلله :)

---

رد على تعــقيب الاخت شمعة أمــل، بالعكس هناك مواطنين يشتغلون في الوضايف الصــغيره هاذي لكن العدد قـــليل و الوضايف كثــيره، هــاذي اول نقــطه ..

ثانيــا المواطنين ابدا مافيهم خــقه، يمكن قبل هيه لكن الحــين الوعي زاد و الادراك و الحس الوطني و الغيره على الوطن هالاشيا كلها موجوده و شبابنا في الوقت الحـــالي ماسكين أهم المناصب في الدولة ..
مثــال بســيط، القـــائمـــين على ســوق دبــي المــالي (( الموظفين يعني في المقاصة و الإدارة مثل الموارد البشرية و ال IT و باجي الاقســام )) 90% منهم شــــباب من عــمرنـــا :)

السموحه عالمداخلة ^_^

المقاتل

10-03-06 ||, 02:19 PM

مرحبـــا :: .. انا ييــــــت .. ::

:fa56: دايركت بدش في الموضوع

:: .. :fa38: - بالنسبــه للوافـدين الموجوديــن لدينـا في الدولـه ، توجـد اقليـات فقـط بالفعل نحترمهم ونقـدّرهم وهم من يحترموننـا كمواطنين وكعرب .
ولكـن في نسبـه ملحوظـه من الوافـدين ، إلي ما نسكت عنهم وإلـي يستغلون طيبـة هل الامارات لمصلحتهم الشخصيـه قامت اتزيــــد بالفعـل :fa37: وعن نفسي لو شفت زلمـه ماخذ حقي لي اسلوبي الخاص .

:devil: بس بصراحه من بين الردود :sleepy: إلّي تثير أستغرابي حبيت أشير إلى نقـاط اناقشكم بهـا ، اذا كنّـا نحن المواطنين من أهل هذا الوطـن الغالي ونرا شيئـا ضد قانون هذا البلد والذي كما يطبـق علينا يجب أن يطبّـق عليهم ، فلمـا الصمـت في المقابـل ينهبون من خيرات وطننــا .. !!

:crosseyed مثل ما قالوا ( لفلوس تعمي النفوس ) والزلمـات يشوفون بيزاتكـم ( عندكم :fa56: أحلى ضحكـه ) ما عندكم أحلى ضـ *** ( الله يعزكم ) .

أمّـا النقطـة الاخرى .. يمكـن لأن الوافدين مصالحهم الشخصيــه ما تتعارض مع مصالحكم انتوا ، فعسب جذه اتشوفون منهم الحب والحنان :fa41: ، بس لما بتشتغــلون :fa44: وبكون مديركم وافـد ، ويوم بعاملكم هاييـــج المعاملــه ساعتها بتقولون شو هايييل الوافدين ماكلين خير لبلاد !!

:vampire: والنقطـة الأخيرة ، وإلي حبيت اوضحها لكـم ، إذا ما قللتوا من نسبة الوافدين ، عقب الامارات بتغدي مثل استراليا ، سكانها الاصلين فقـط نراهم في التلفاز وكيف كانوا يعيشون في الماضي ، وفي نفس الوقت :woot: بتشوفون مواطن ( 1 ) في السنه ( هيهيهيهي ) .

كلمــتي .. إلى من يشجعون من زيادة نسبة الوافديـن ، ويسكـتون عنهم ، ترا الدنيـا دوّاره ( إذا هب لكـ إنت ترا عيالك بينضرون ) :laugh: وكلـن يالس على كرسيـه اليوم باجر عيال عياله :sleepy: بيتمنون هذا الكرسي إلى يدهم العود الساذج يلس عليه .

:fa51: أخت أختي .. :fa42: أنتي كــده ولا تسكتين عن الغلـــط .. اتمنى لج التوفيق والفلاح .

الملهم

10-03-06 ||, 02:42 PM

الحينه الزلمات والهنود يتكبرون علينا ..
امنو باقي ....

صار دولتنا دولة متعددة الجنسيات .. وليست الامارات ^__^

اللهم احفظنا من المستقبل .. واعن شيوخنا عليهم

تحفه

10-03-06 ||, 03:14 PM

تعقيبا على كلامج على شمعة امل : بالعكس اشوف الشباب مستحيل يشتغلون شغلات الهنود ويحصلون نفس معاشهم ؟!!!؟

واصلا ما يباله كلام

الكلام كله يناقش ويحل عمره في العنوان ..

التكبر مرض ناتج عن احساس بالنقص .. ف الواحد يتكبر و يتصرف بشكل مب زين لانه يالس ينافق عمره عشان يرضي نفسيته ..

هي السالفه مب سالفة وافدين و مواطنين .. سالفة ( نفسياتهم )

شي مواطنين بعد جي و شي وافدين ..

بس الوافدين لهم عذرهم أقوى .. و المواطن ماله عذر

انتي روحج قلتي وافد ( يعني اساسا - بغض النضر عن اصالته وتربيته - ياي يستفيد ويروح ) مب مواطن ( يبني بلاده ) !!

المزوحي

10-03-06 ||, 03:17 PM

اسم الموضوع قاموا الوافدين يتكبرون علينا !!!
لكن اخونا الملهم تكلم عن نقطة وهي المسوؤل الوافد ..
بضيف نقطة وهي إنه مسوؤلي وااافد دووم يقول المواطنين ( كسالى ) ومايحبون يشتلغون
ولا يلتزمووون مع إنه الشي ينطبق عليه لكن الفرق بيني وبينه إنه هو يداوم بالخميس
( عسب أوفر تايم ) فالغير يشوفه إنه فعلا هو شغووول ...
ودايما يحط على المواطنين ورديت عليه مب كلهم نفس الشي

وحبيت أضيف ام خدود .. إنه مب قضية الوافد يحس إنه ياي من بلاده في بلادنا يحس بنقص ..
حتى نحن يوم نسافر عندهم يعالمونا بجفوة عسب نحن من الخليج ...

المقاتل

10-03-06 ||, 03:29 PM

قرموشة

10-03-06 ||, 04:03 PM

اممممممم ,, من رايي ,, انه الوافدين مب كلهم جييه ,, بس في منهم تصرفاتهم تقهر الصراحة ,,
وبعدين لا تسيرون بعيد ,, ياما شفت ناس ومن عيال البلاد بعد ,, يسوون هالحركات وما يهتمون ,,
ومثال ,,

كنت واقفه عند ستار مارت ايام الامتحانات ,, وحصلت واحد في سيارته.. فتح الباب ,, وحط جيس وفيه غرشه بيبسي.. وغلاف شفاف مال الساندويش ,, والصراحة استعيبت من الموقف ,,
يعني هذا واحد من البلاد وجييه ,, عيل الوافد شوو بيسوي ,
المهم ,,
المفروض الواحد ينقهر من هاي التصرفات بغض النظر اذا كانوا وافدين أو من عيال البلاد ,,

كل الود ,,
قرمــــــــ ـ ـ ــــــــوشة

تحفه

10-03-06 ||, 04:07 PM

:: .. ام خدود .. :: .. المعذره على المداخلــــه .. ::

بس الوافدين لهم عذرهم أقوى .. و المواطن ماله عذر ( لوافد شو عذره ؟؟ )

انتي روحج قلتي وافد ( يعني اساسا - بغض النضر عن اصالته وتربيته - ياي يستفيد ويروح ) مب مواطن ( يبني بلاده ) !!

:fa38: يعني إيي الوافـد لبلاد و ياخذ خيرها ويعطيها ما يعطيها ( بدل ما يستفيد وينفع ) يقطع أرزاق ناس .. :sleepy: و يبهدل الدنيـــا .. أصلا يا ناس .. المواطنين لهم عقول .. الوافدين ما يمتلكونها ( الوافدين يايين عسب يحطون سلـّم لكيفية الصعود والتطور فقـط < وهذا كان كلام زمان > ) .. وهم دامرينها دامرينها ورمستوا ولو ما رمستوا .

:fa38:

مشكلتي مشكله في العربي .. والله يوم اعبر يبالي يوم كامل لين ما اوضح انا بالضبط شو اقصد .. بنتحر :alien:

قصدي .. المواطن يوم يبني بلاده ويبني وطنه .. يحط في باله انه الاستثمار بيكون طويل الامد :fa56: ( مب طويل الامد .. اقصد يوم يسوي شي يحط في باله ان هذا حق عياله وعيال عياله وعيال عيال عياله ) .. ويعرف انها بلاده فبتالي بيحافظ عليها اكثر من الوافدين ( لأنهم يايين بالاساس عشان يفيدون عمارهم قبل لا يفيدون البلاد الي يايين لها ) وبالتالي معذورين اكثر من المواطنين اذا غلطوا ( طبعا مب قصدي معذورين يعني نعذرهم اذا سوو شي غلط .. *بل*:fa56: يعني لهم good reason بس المواطن ولد بلاده اذا غش و نشر الفساد فيها :fa56: * * ماله عذر

وبعدين الوافد ما قطع ارزاق الناس !! :fa54: .. منو الي يابه نحنا ولا هوه عشان تلومونهم؟ .. ترا الي يابوه منكم وفيكم شو بعد ؟!! ويابوهم عشان نستفيد .. بس كالعاده نحن طُلاب دلاليع :fa56: .. يراكضون ورانا ونحن نتافف منهم ( هاذا الـ fact life ) لو لاحضتوا

والسموحه

هيه صح اذا ما فهمتو شي بعد قولولي عشان اوضح :ghostface

تحفه

10-03-06 ||, 04:20 PM

ليش تحاسبونهم على هالـ actions ?
ترا عيالنا بعد يعقون الغراش و يكسرّون المدارس و ويتاخرون على دواماتهم و يسوون بلاوي؟ ليش ما تحاسبونهم ؟

والوافدين .. هم مب غلطانين يوم يتمادون لأن نحن الغلطانين وساكتين عنهم !!

فلو يتهم نشرات من قنصلياتهم وسفاراتهم بامر من حكومة الدوله بيلتزمون فيها ..

واذا عن طاري العمّال الي يسوون مشاكل و يسرقون ويسوون جرايم .. يالله يمعوا الشباب الي ترمسون عنهم * عشان يكونون مكانهم *

هاي حال الدنيا .. وخاصه مع العولمه الي صايره ..

صار اغلب الناس .. تعيش في بلاد مب بلادها .. وتحسونهم اذا ردو ما يحسون ان بلدهم الوطن بدلهم الحقيقي !!

ام خدود تدعوا الى السلام و المساواه ( المساواه بـ اعطاء المواطن والوافد حقهم ) .. وما تعاملون الناس على حسب الاعراق و الديانات و اللغات و الالوان والجنسيات :fa54: :fa54:

والسموحه :fa38:

(هاي خطبتي ليوم الجمعه ) :unclesam:

ناصر الخالدي

10-03-06 ||, 06:51 PM

في البداية تحية حب واحترام لكل من شارك في هذا الموضوع الحساس الذي عرضته أخت أختي ولكن .......الى متى ونحن نتكبر على هؤلاء الوافدين وكأنهم ليسوا بشر فهناك من يستخدم كلمة زلمات وهنود بقصد الإحتقار .........والحقيقة انهم يملكون الكثير ونحن لا نملك إلا القليل وانا لا اقول أنه لا يجب محاسبتهم بل على العكس تمامـًا يجب أن نحاسب ولكن من يحاسب ابن البلد ............

الحل في هذا الموضوع يكمن من المواطن نفسه فالوافد لولا المواطن ما دخل الى البلاد وغير ذلك تجار الإقامات وهذه مشكلة صعبة وخطرة ويجب إبادتها ثم الأولى نشر الوعي ومراقبة الجميع فالمواطن المخلص هو الذي يغار على بلده واعجبني ردة فعل اخت اختي تجاه ذلك الوافد السوري فهذه ردة فعل سليمة@@@@

ملاحظة أتمنى مناقشة الموضوع بكل انسانية وعدم الإنحياز والتجرد من العاطفة ومحاسبة المواطن قبل الوافد .......

اكثر الذين يتسكعون في الأسواق هم المواطنين والوافد يجمع المال

اكثر الذين لا يحترمون قوانين المرور هم المواطنون

اكثر الذين يمشون بالواسطات هم المواطنون

الوافد عندما يجد ابن البلد غير حريص ماذا يفعل ؟؟؟

أخيرًا ( لو لا التعاسة ما خرجت من بلدي )

المقاتل

10-03-06 ||, 06:52 PM

:nerd: يعني إلي فهمته من بعض الردود .. إنّـا نسكت إذا غلطـوا الزلمـات لأن شبابنا غلطوا .. لأن هالشي من المساواة .
بس إذا اشتكوا علينـــا .. لازم انعرف إن هذا من حقهم !!
بس إذا سرنا بلادهم لازم نحترمهم وبالمقابل إييّون لبلاد ويوصخونها ونحترمهم !!
:vampire: ولأن لمواطنين ياييبين الوافديـن .. لازم نعذرهم !!

نعم من المساواة معاملة الجميــع بالعدل .. !! عسب جذه 90 % من لمواطنين مديونين .. !!

دانة حتا

10-03-06 ||, 07:35 PM

والله قهـــــــــــــــــــــــ ــــــر:fa44:
لو انا شو بسوي ما بخلي شي عليهم
عاج انا ملسونه احترم اللي يحترمني بس:devil:
والوااافدين وانا طوووول مب رباعه:fa44:

تحفه

10-03-06 ||, 07:37 PM

هههههه يا الذكي انته جيف جي بعد .. جلبت الرمسه :laugh:

انا كنت افسر الي يصير .. بس عن الـ react لازم تتصرف شرات ما العضوه اخت اختي اتصرفت :fa42:

اخت اختي

10-03-06 ||, 08:01 PM

أنا شكر كل من شارك ولكن رايي وراي اخويه المقاتل واحد..

شمعة أمل

10-03-06 ||, 08:01 PM

اخت اختي

10-03-06 ||, 08:03 PM

اخويه المزوحي ليش ما تشتكي على مديرك عند إللي اكبر منه؟؟ مب من حقه جي يقول!!
مشكور اخويه لمّاح، ذنيني، والملهم.. رايي من رايكم

شمعة أمل

10-03-06 ||, 08:11 PM

[نعم من المساواة معاملة الجميــع بالعدل .. !! عسب جذه 90 % من لمواطنين مديونين .. !! [/CENTER]

لا تبالغ! شو 90% بسم الله علينا:crosseyed

بعدين المديونين منو؟؟؟
ناس ماكملو دراستهم لانه همهم اللعب.. والحينه يبون يشتغلون بس مابيحصلون غير راتب صغير ومايبوووون لازم 10ألاف وفوق
ناس همهم المظهر .. بليز سيرو جوفو صوب الشعبيات .. بيوت مكسره على الأخر بس السيايير ماشاءالله رنج سبورت، مرسيدس، فراري.. سير جوف تليفوناتهم كل مانزل تليفون يديد اشتروه .. ولا عن البنات ..لازم تفصل عباه من محل غالي عشان ربعها مايقولون عنها cheap لكنها ماتروم تدفع حق هالأشيا:fa52: ومايستوي تشتري ميك اب من اي مكان .. لازم ديور ولا شانيل!
ولا ناس مدمنين على شي أسمه الخمـــر والمخدرات
ولا ناس مدمنين على شي أسمه الأسهم:fa55:

الى يجهد في حياته .. الله مابيقصر معاه..

ألم ترى

10-03-06 ||, 09:25 PM

بســم اللـــه الرحمـــن الرحيـــم ..

خــل الــمواطــن يحتــرم نفســه اول عشــان يكــون قــدوه لغيـــره :sleepy: ..

الـــموضوع حســـاس وايــد وخــاصه اذا كــان فيــه جمــع فكــيف بتــكون نظــره الــوافد علينـــا :fa55: ..

شكـــر ع الطـــرح وفــي انتظـــار جديـــدك ..

الحساس

10-03-06 ||, 10:27 PM

بعدين المديونين منو؟؟؟
ناس ماكملو دراستهم لانه همهم اللعب.. والحينه يبون يشتغلون بس مابيحصلون غير راتب صغير ومايبوووون لازم 10ألاف وفوق
ناس همهم المظهر .. بليز سيرو جوفو صوب الشعبيات .. بيوت مكسره على الأخر بس السيايير ماشاءالله رنج سبورت، مرسيدس، فراري.. سير جوف تليفوناتهم كل مانزل تليفون يديد اشتروه .. ولا عن البنات ..لازم تفصل عباه من محل غالي عشان ربعها مايقولون عنها cheap لكنها ماتروم تدفع حق هالأشيا:fa52: ومايستوي تشتري ميك اب من اي مكان .. لازم ديور ولا شانيل!
ولا ناس مدمنين على شي أسمه الخمـــر والمخدرات
ولا ناس مدمنين على شي أسمه الأسهم:fa55:

الى يجهد في حياته .. الله مابيقصر معاه..

هذا واقع 100 % :fa42: يسلم هالرد

دانة حتا

10-03-06 ||, 11:16 PM

اممممممممممممم صح المفروض نكون قدوه
بس شي يرفع الضغط

اخت اختي

10-03-06 ||, 11:21 PM

بس مهما يكون.. الوافد لازم يحترم نفسه.. لأن دولتنا الحبيبة ما شي أطيب عنها.. والله جنها جمعية خيرية.. كل ما صار شي في دولة ثانية>> طرشنا معونات.. ناس تعبانين>> رحبنابهم في دولتنا.. حد نفواه من دولة>> تلقون دولتنا أوّل من رحب بالشخص.. هذا محتاج>> عطوه.. هذاك فقير>> عطوه

الحمدلله رب العالمين
الله يبارك ويزيد ويحفظ دولتنا إن شاء الله :)

لمّــاح

10-03-06 ||, 11:31 PM

السلام عــليكم ..

عفــوا اخويه المقاتل، لكني ما اوافقك الرأي ..

هل تقصد من كلامك انه الوافدين هم الي ضربو المواطن على إيـــده و قالوله سير اتسلف من البنك و طيح في دوامة الديون ؟؟

تــوني ادري !!

لا يــا حــبيبي، الي طايح في دوامة الديون ( هالنوع من الناس غير عن الي عندهم ديون عادية و يسددونها و هم مرتاحين، أنا اتكلم عن الي عندهم ديون و مايقدرون يسددونها ) هــو مثل ماقالت الاخت ام خدود الي فيه نقــص !!
ياخي ليش تتسلف يوم معاشك مايسمح، مد اريــولك على قــد الحـــافك و اجتهد و كمل دراستك لو تدرس مسائي و خلال سنــتين أو ثلاث بتكون وضيفتك مثل اي موضف جـامعي ثـــاني و بتستلم نفس راتبه و بتقدر تتسلف من البنك حزتها و تسدد و انته مرتاح ..

يا جمـــاعه، لاتخلون الغيض أو الغل الي في قلبكم يعمــيكم :)

ام خدود، كلامج صح 100% ..

المزوحي

10-03-06 ||, 11:35 PM

المسوؤل اللي اكبر عنه وافد بعد .. وكلامه نفس الشي عن المواطنين !!

ألم ترى

10-03-06 ||, 11:49 PM

بســم اللـــه الرحمـــن الرحيـــم
رد ع التعقــيب الأخيــر لأختــي الكريمـــة أخــت أختـــي
: : : : : :
دولتنــا ماتقصــر ومــاتقصــر واللـــه يخــلي شيــوخنــا ويبــارك بأعمــارهم
صــح دولتنـــا ماتقصـــر فالــدول المحتــاجه وخــاصه الخليـــج العــربي لكــن نحــن مــاننســى محنــت الــكويت عــام 90
وكيــف كــان الأستقبـــال مــن الشبــاب لبنــاتهم اللــي هــم اخواتنــا ؟
كــيف كــان وشــو اللـــي صـــار ذاك الــوقت ؟
كيـــف تبــونا نــكون قـــدوه لغيــرنــا ؟!
:fa55:
ما ننـــسى اللــي صــار بأخــوانتا العراقيــات مــن تكســع وتــحرش علانــيه مــن شبــاب الإمــارات
لمــا كــان احتــلال جمهــورية الــعراق مـن الصليــب فالشعــب شــردوه والطفــل قتلــوه والشيــخ عــذبوه
والبنــت حــدث ولا حــرج طبــعآ هنــا وهنــاك
:fa55:
شــو اللــي صــار فــ البـــوسنه ؟ شــو كــان يســوي جيشــنا هنــاك ؟
كــان يــدافع او بالأحــرى كــان يحمــي المسلميــن البوسنييــن لكــن الشبــاب اللــي هنــاك كــان العــكس فمــنهم يشــرب ومنــهم اعوذ باللـــه يلعــب بأعــراض النــاس
:fa55:
انــا مــا قصــد الكــل ولــكن القــله اللـــي يالســه تلعــب دور او تحمــل اســم دولــة الإمــارات العربيـــة المتحـــدة
ومـا تعــرف معنــاه او مــاعندهــا ضميــر غيــر انهــا تنتقـــد ان فــلان فيــه وعــلان مــا ادري بــلاه وللأســف هـــم
:fa55:
: : : : : :
عــذرآ فهــذا مــا زادتــه طريحتـــي

اخت اختي

11-03-06 ||, 08:10 AM

اسمحلي اخويه نحن مب ل هالدرجة!! أظني الإيجابيات أكثر بكثير من السلبيات!!

بن دبي

11-03-06 ||, 09:36 AM

السلام

اعتقد ان ردود الاعضاء خرجة عن صلب الموضوع !!!

كان الموضوع جميل بس خروج الاعضاء خرب الموضوع ابصراحة

بن دبي

المقاتل

11-03-06 ||, 09:38 AM

:fa56: ريلاكس ريلاكس .. شوي شوي .. :fa52: موضوع حساس صراحــه .

أحينــــه كل المواطنين يخربون الممتلكات المدرسيه ومن ممتلكات الحكومه ، قبل لا تظلمون لمواطنين بعد شوفوا عيال المزطّـة والزلمــات شو مسويّـن في المدارس ، ولعلمكم الخاص هب كل لمواطنين يخربون هاي الممتلكات ؟؟

لا حبيب قلبي لمّــاح :fa41: هل تقصد من كلامك انه الوافدين هم الي ضربو المواطن على إيـــده و قالوله سير اتسلف من البنك و طيح في دوامة الديون ؟؟

انا ما قصدت جذه ، بس لأسف اغلبية و اكثرية الوافدين ما يخّيرون لمواطنين ، يهفون ملاييين ويفلّون بلادهم وحق المواطن كالعاده :fa39: والمشكله إن السالفه ما توقف لهذا الحد ، :crazy: المشكله إن إلي صارق لفلوس و رجع وسكن في اغلى الشقق وعقب رد لبلاده على حساب منوه ، على حسابه ؟؟

:fa52: وغير النهب إلي يالس يحصل في البنوك الربويه ، على كيف كيفكـ وعيني عينك يصرقونك .. !! القضيه هب قضية المواطن إن يالس يسلف المشكله إن غيره يسلف على حسابه :fa36: !!

يا جمــاعة الخير ، لا تلوموني يوم ادافع عن عيال لبلاد وعن لمواطنين ، صراحه هالشي يحز في خاطري ، أشوف ناس تتكلم وتدافع عن الزلمـات وما تيي اتشوف الواقع المرير إلي يالس يحصل ، وانتوا تقولون الدنيـا بخير والناس كلها عايشه في نعمه ، لأسف واجزم هب كل لمواطنين ،لو الدنيا بخير ، جان ما شفتوا بين فتره وفتره مواطـــن تطلع صورته في الاخبار عايش في بيت سقفه طايح .

عيشوا الواقع ( المعذره إن خرجت عن نطاق الموضوع ) .. !!

رحيل

11-03-06 ||, 09:41 AM

صدقج والله ..أسميهــــــــــــــــم قوايه هالزلميتـــــــــــــــــ ـــــــــوا ..وانا من ناحيتـــــــــــــــــي ما أحب أحتك وياهم بس شو بنسوي وهم مازرين البلاد..؟؟

دانة حتا

11-03-06 ||, 10:45 AM

اخوي المقاتل مب كل المواطنين يخربوون
لكن بعد مب كل الواافدين والزلماتت خيااس
انا صح ما ادانيهم لكن في وافدين يحافظون اكثر عنا احنا المواطنين

وبعدين مب غلطتهم انهم مازرين البلاد الحين احنا عندنا مدرسة الاولاد مثلا ما فيها غير 3 او 5 مواطنين مدرسين اقصد..عيل منو بيدرس النااس لازم بنيب وافدين
ونفس الشي في اماكن وايد ..يعني احنا شرينا من حلالنا عله ولازم نتحملها

(وصلت لهالشي بعد تفكير عميق)

ألم ترى

11-03-06 ||, 01:46 PM

بسم الله الرحمن الرحيم ..

لكل شيء بداية وانا اللي قلته ماهو اللي بدايه لتعقيبي ..

عذرآ اخت اختي فالرد القبلي مش لئني اطلع برع الموضوع ولا لئني ابي اخالفج بالرأي ولكن كما قلته من قبل ..

ليعلم الجميع اني احترم شخص طارح الموضوع بأسلوبه وسرده وتعاونه الطيب :fa42: ..

سبحانك اللهم وبحمدك اشهد ان لا اله الا انت استغفرك واتوب ايك ..

أمواج

11-03-06 ||, 05:26 PM

أنــا ما أشووف الزلمــات فيهم شي . . بعالكس واايد طيبــين وحبووبين . .
وانا أحبهم . . واحب اسوي صداقــات وياهم . .

طير الحب

11-03-06 ||, 11:38 PM

السلام عليكم ورحمه الله وبركاته...

السلبيات موجودة في شريحة سواء من الوافدين او المواطنين...فنرجو النقاش بحيادية تامة.

ولد الحكومة

12-03-06 ||, 03:24 PM

أنــا ما أشووف الزلمــات فيهم شي . . بعالكس واايد طيبــين وحبووبين . .
وانا أحبهم . . واحب اسوي صداقــات وياهم . .

:sad: انا في هذا الشيء ما اتفق معااااج ، وين يو طيبين !!! الصراحه كلهم مثل بعض ، نفسيتهم خايسه وخاصه على المواطنين ، في نظري الاجانب أخير عنهم :fa44:

والسموحه اختي هاي وجهة نظري

ولد الحكومة

12-03-06 ||, 03:28 PM

المشكله شغلناهم ورزيناهم واخر شيء اتكبروا علينااااااا ............ والله مصخره ..........

شو نسوي العيب مب فيهم ، فينا احناااااا

مشكورة اختي عالموضوع

الـيـاه

13-03-06 ||, 02:25 AM

سـلااام

أنـا اشوف أن هالشي نسبـي ومـا ينطـبـق على كـل الوافـديـن !!

ماننسى بعـد أن لهـم فضـل عليـنا وعلى الدولـه وتربـيـة أجيــال , يعني بعد ماننكـر أن في بعـض الأماكـن تلاقيهـم متماديـن وايـد بخـصـوص هالمـوضـوع وساعـات والله انهـم يذلـونـه لانـه وافــد ويـبدون المواطـن جـدامـه :shutup: فـ هالشي طبـيـعـي بيـغـير نفسـيـته

فـي منهـم بالفعـل قــدروا انهـم > يثبتـون نفـسهـم ومانقــدر نلـومهـم
يعني انتو شوفـوا هالشي بمنـظـور ثانـي شـوي بتلقـون انهـم ملتهـيـن بعـمارهم وهاديـن اهلهـم وارضـهم لان ما لقــوا هـاك الـدعـم في بلادهــم ؟ :Oo:

فـ يوا عنا وكل املهم انهـم يحصلون على لقمة العـيـش وبعـضهـم يبا يوصـل لـ ارقى مستوى مطلوب
لانهـم يدورون المكـان اللـي ممكن يحـقـق امالهـم اللي ماقـدرت بلادهـم تحقـقهـا
فـ مب ذنبه أن كانت بلادك :fa41: المكـان اللـي ممكن يحقـقـله مبتـغـاه ( ولله الحمد )

يعني صـدق !! :glare:
في منهـم حاقـديـن عليـنا لكن كله بسبـة المعامـلة السيـئة لهـم
وفي منهـم امبونهـم جي حاقـديـن بسبـة نفـسيتـهـم التعـبانـه

بإختصار في (الزين) وفي (الشين) شراتـنا بالضبط وشـرات ما قلتـوا كـل واحـد وحسب نفسـيـته
والسالـفـة مـش سالـفـة مــواطــن و وافــد ابــد

والسموحــه

.
.
.

الـيـاه

13-03-06 ||, 02:43 AM

نسيت اقول شي ؟؟ بخصوص ردة فعلج

أول شـي حبيت اشـكـرج على اهـتـمامـج وهـا ان نـدل فـ يـدل على حـبجـ لها :fa35:

لكــن
نحن ( عيال زايــد ) واكـبر من إنـّا ننزل مـن شانـا على هالنـوع من الناس بألفـاظ مب زينـه
مهما كـان هالإنسـان سيىء لان في منهـم صـدق أدب واخـلاق فـ لاتشـوفين اللـي يسوونه هاذيـلا
صفـة لمجتمـعه وأصـله :rock: !!

فـ مجـرد اتصال واحـد لأحـد المسؤولـين يكفي إذا ما اكتفى بالنصيـحـه
بيغـرمـونـه وبيأدبـونـه :Oo: لـكـن إنـّا نراددهــم بأسلــوب مب زيــن مب حلــوه في حقـنا

لانـا نمثـل هالارض ونمثـل أطـباعـنا وشيـمنا فـ مب حلـوه ياخـذون فكره مب زينـه
وسمحيلي اختيه وتسلمـين ع موضـوعـج

.
.
.

الجنيه

13-03-06 ||, 11:20 PM

السلا م عليكم ورحمة الله وبركاته ...

الصراحه أعجبني تصرفج مع الموقف الأول الي صار بس الموقف الثاني صدقيني لو أنا محلج ويها ونعالي (عزكم الله )...

أنا مع الي يقول المفروض ما أنعمم على الوافدين كلهم.. عندي وايد ربيعات وافدات بس محترمات وقمه يعني الحمدلله لليوم ماشفت منهم شي أو تصرف خاطىء ..

بالنسبه لبعض الوافدين الي عايشين في البلاد ويا كلون من خيرها فتلقون الحسد ماكل قلوبهم وعامي بصيرتهم يحسون بغيره فيمشون على المثل الي يقول مال عمك ما يهمك فيسرحون ويمرحون في البلاد على حل شعرهم ,,,,,,

عيون الليل

14-03-06 ||, 09:08 PM

يا جماعة الخيـــر .،.، لا اتقولون رزيناهم وسويناهم !! لانهم هم بنفسهم رزوا عمارهم بتقولون لي كيف؟
بقوللكم .،.، قبــل كم سنــه اعتمادنـا الكلي كله عليـهم .،.،.، شبابنا ما كان يهمهم التعليم كثر ما ايهمهم المعاش ف الكل كان يتجه للجيش ويتركون التعليم .،.، ف الوافدين اثبتوا جدارتهم نعم .،.، واستحقوا ما وصلوا له .،.، الحيـــــن صحى شبابنا من نومه العميق وقاموا يهتمون بالدراسه ويشتغلون إي شغله وحتى لو المعاش ما يرزى .،.، هنيه نحن عرفنا قيمة نفسنا بس .،.،

إذاً نحن ما رزيناهم .،.، تعليمهم وصبرهم وشغلتهم لاي شغله هي الي رزتهم .،.، وبعديـــن في كل بلاد مقبـره .،.،.، في كل بلاد فيـها الصالح وفيها الطالح .،.،.، والوافدين الي يغلطون ف بلادنا تراهم هاييلا يكونون من ادنى المستويات في بلادهم وهذا الكلام خذته من كذا وافد ووافده .،.،. والانسـان الاصيـل ما ينكر .،.، نعم نحن فتحنا لهم بلادنا لــكن هما بعد اثبتوا جدارتهم .،.، وكلٍ ياخذ نصيبه وحصاد جهده

ف لا اتعممون وأنا اعرف كثيـر من الوافدين يعشقون الامارات وأهلـــها وهاييلا هم الناس الاصيليين

وبقوللكم شي ثاني .،.، ترا عيال بلادنا يغلطون كيف ما تبونهم هم يغلطون بعد .،.، القانون شرا ما تبونه يمشي على الوافد لا بد أولاً انه يمشي عليـنا .،.، مثل يوم انسيـر بلاد الغرب ونلتزم بقوانينهم ونربط الحزام ونحترم خطوط عبور المشاة

سووا جدام الزيـــن بيتبعونكم .،.،.، وسووا الشيـن بعد بيتبعونكم .،.، خلونا اولاً نحترم بلادنا وقوانينها وعقب نجبرهم على ذلك .،.،.،

أخت أختي .،.،. اجديتي فيــه هذا السوري .،.،.، ومشكــوره على هذا الموضوع الجميل جداً