نــصيحة .. تــقويم الأســنان

[المزوحي]

طبعا يدخل تقويم الأسنان من ضمن جمال الإبتسامة .. وإن كان مايضايجكم بسؤالي عن دكتور تقويم أسنان بشرط يكون في مدينة دبي .. وشو الأفضل من حيث نوع التقويم المستخدم للأسنان ..
طبعا أنا متردد في عمل تقويم لأسناني بالرغم إني أقدمت على الخطوة الأولى وهي إني أخذت موعد
عند دكتور ( مــا ) وعمل لي أشعة وقرر إنه يبدأ العلاج بتقويم غير مرئي ( شفاف ) وهو مكلف جدا
حيث يصل سعره مابين 25-30 ألف درهم إماراتي .. اللي ممكن أشتري فيهم سيارة صغيرة للبيت ..
مع إنه مافكرت أبخل على نفسي من أجل صحتي وجمالي .. وإلا شو رايكم ياهل الربع ؟؟ :look:

فالمطلوب يا أعزائي .. تقديم نصيحة أبداء راي ووو مساعدتي في البحث والسؤال عن دكتور تقويم
أسنان وشو الأفضل التقويم المعدني ( دقة جديمة ) اللي في الصورة واللي أغلب الناس ماتحب
منظره وإلا الشفاف الغير مرئي ومثل ماسمعت إنه يطول في مدة العلاج ووو مكلف .. لكن مايبين
إنه مركب تقويم ..

http://www.arabicsmile.com/smile.gif

[ذنـيـنـي]

ركب التقويم العادي أحسن,,

و ترى مرات يكون شكله اوكي,, على حسب ضروسك

حرام تسوي تقويم بـ 30 الف الا هو تقويم, بتحطه فترة و خلاص

الـ 30 الف تقدر تاخذ فيها رابتر و تزوده او تقدر تزود الباجيرو, بييبلك كت توربو>> طاع التفكير انته خخخخ :fa56:

انصحك بعياده في شارع الرقة اسمها عياده الدكتور ماجد العزاوي,,
شغله ممتاز و ايده خفيييييفه,, :fa42:

[المزوحي]

ذنـيـنـي

أمس اتلاقيت مع ولد اليران وشفته مركب تقويم ونشدته وين مسونه لأني أصلا بسوي ..
فقال أنا سرت شارع الرقة لكن ماخبرني عن اسم الدختر يمكن نفسه اللي تطريه ..
وبعد خبروني عن واحد في الغرير .. والحين بشوووف كذا مكان وآخر شي بقرر ..
وعن السعر بسير أركب ليتات زينون وبيسوووي وايد أمور وبشتري أسهم بعد :)

[تحفه]

في عياده اسمها طلس في جميرا في نفس شارع مركاتو .. أنصحك اتسير لها .. صراحه الدكتور وايد فنان وايده خفيفه يعني ما يعور ولاشي .. انا انصحك فيه

وعلى فكره شي دكتور وايد زين في ابراج الامارات .. يسوي تقويم شفاف .. و شغله تمااااااام .. وايد شاطر بعد انصحك فيه

[الحساس]

ياااحيك..

ومنو قالك ان التقويم شكله هب شي.....؟؟؟؟؟

مادريت باخر موضة هالعالم؟؟؟

الناس تركي تقيم بليا سبب ليييش لسبب واحد.. اونه نوع من الجمال!!! شفت عاد!!

الموهيم (على قوله ام خدود)

التقويم طال عمرك يختلف من انسان لانسان على حسب المشكله ..

ركبت تقويم 7 سنوات وكان تقويم ثابت هب متحرك .. (يعني خل ببالك شي تقويم ثابت ومتحرك)

ماانصحك تسوي التقويم بالاذات في العيادات الخاصه.. لسبب واحد.. ان الخدمه والنتايج الايجابيه هي نفسها الي بالمستشفيات الحكوميه...
والتقويم هب شي يديد عسب الواحد يبدع فيه!! من بدايات التسعينات وهو موجود بالبلاد!! ومعظم الدكاتره اما متخصصين فيه او ماخذين عنه كورس.. فحرام تدفع 30 الف والدوله موفرته لك ببلاش!!

بنسبه لعيادات الاسنان شار جميرا بكبره كله عيادات اسنان.. لكن احسد خبروني على اسم دكتور خاص والله ماحيده الحين..

ومثل ماقالت ام خدود بابراج الامارات شي عياده (اول من نوعها في الخليج او الشرق الاوسط بكبره) بانه يستخدم بعيادته اشياء تكنولوجيه تخليك ولا تحس ان الدكتور يعابل باسنانك.. ويابوا لقطات لهالعياده في اخبار الامارات من اشهر ..)

لا تهتم لرمسه العالم ان ليش حاط تقويم ولا شكلك ماحلوا به... الاهم انت تستفيد.. معظم الي فاتهم قطار التقويم وهم صغار يفكرون يسونه وهم كبار..
واسال الدكتور عن المده الي بياخذها للتقويم..

والاهم لا تنسى تصور نفسك بالتقويم ;)

[رحيل]

أحس اني داشة عرض ...ما عندي فكرة عن الموضوع..

[اخت اختي]

أنا أنصحك باللي في الأبراج أو العيادة الأمريكية إللي في شارع جميرا..
وأنا أنصحك بالاستخارة .. لأن ما شي استشارة أحسن من استشارة رب العالمين :)

[عفاريتووو]

ماانصحك تسوي التقويم بالاذات في العيادات الخاصه.. لسبب واحد.. ان الخدمه والنتايج الايجابيه هي نفسها الي بالمستشفيات الحكوميه...
والتقويم هب شي يديد عسب الواحد يبدع فيه!! من بدايات التسعينات وهو موجود بالبلاد!! ومعظم الدكاتره اما متخصصين فيه او ماخذين عنه كورس.. فحرام تدفع 30 الف والدوله موفرته لك ببلاش!!



انا بعد انصحك بالمستشفيات الحكومية .. بس اكيد مب عند اي حد :vampire:
لو تبا بالحكومة بعطيك اسم دكتور واييد واييد اوكي :fa42:

[شمعة أمل]

كنت مسويه تقويمي عند واحد الماني كان في أبراج الامارات فنان ماعليه كلام.. بس الحينه حوّل عنده فرع في الانترنت ستي ولا في هالمدينة الطبيه مادري شو يسمونه صوب وافي

انا كنت ماخذه تقويم عادي
وخواتي شفاف
بس امي خذت تقويم غير عنا .. يعني بدال مايركبونه جدام يركبونه ورا ضروسك .. ف محد يدري انك انت لابس تقويم..

[خيال الحب]

التقوويم اوكــي..
بس لاتنسى انه اول اسبووع ما بتشووف النوم>>>> عاااااااااااانيت من هالشي خخخ

وشفايفك بتتقطع...

مثل ما قالو الاخوان في بابراج الامارات

وفي عياده بالشارجه .. وايد يمدحونها


وبس

[ذنـيـنـي]

هيهيهيهئ

اشوووو هااا محد في الواحات ضروسه عدله,, خخخخخخخخ

حتى انا أبغي احط تقويم

[تحفه]

تعال شوف ربيعاتي .. يركبنه لأنه يحلي XP

عن نفسي بالعكس احسه يخلي الوحده تستوي كيوت

ذكرتوني افبنت خالي .. اتركب تقويم ( بس جي دلع ) يمكن صارفه عليه اكثر من 50 الف الحين .. خالي يتمصخر عليها يقولها يوم بيجلعونه عنج لا تفرينه خليه .. بنيمعهم بنسويهم عقد حق يوم عرسج :tounge:

[خيال الحب]

اخوي ذنيني انا التقويم ماكمل عندي 5 شهور خخخ

كنا رايحين لبنان وكنت قاعد اكسر اليوز بضروسي.. وغير ما ينكسر التقويم.. وطول الطريج<< كنا رايحين الارز وانا قاعد اقص هالتقويم بمقص الاظافر خخخخخخ

[العيناويه]

انااااااااااا اباااااااااااااااااا انااااااا اباااااااااا

[المزوحي]

أم خدود على طاري عيادات جميرا .. تراني اللي سرت له في جميرا .. وأونه أول دكتور عنده أمور متطورة في الشرق الأوسط بكبره .. وقال بيركب شفاف تكلفته 25-30 ألف درهم إماراتي ..
ومثل ماقلت إنه مب السعر شردني .. في أسباب ثانية منها إنه لون المشروبات تلصق بالتقويم ..
طيب شو عن عيادة مايكل والعيادة البريطانية ؟؟

[المزوحي]

الحساس .. أظن موظة .. لأنه من قلت بركب لاحظت وايدين حاطين تقويم ( يمكن صدفه ) هههه
لكن بقول إنه حربي العامري حاااط تقويم .. وسمعت بعد إنه في الدارس يحطوون بس موظه وشي ملون بعد ... عيل بسير أحط وبصور عمري ... لكن على طاري الحكومي .. فكرت بمستشفى راشد لكن
مشكلتهم إنه يأخرونك بالمواعيد مما بيأثر عليه من ناحية عدد السنوات والنتيجة بتبطي ..!!
يعني بدور عيادة خاصة لكن ماتكون مينونة .. : )

[المزوحي]

اخت اختي شكرا لج على النصيحة وحبيت أعرف وين العيادة الامريكية ؟؟

[المزوحي]

عفاريتووو عطيني بدوون ماتقولين بعطيك ( يالله بسرعه ) : )

[المزوحي]

خيال الحب في الشارجة احس في دكاتره أووكي بس ماحب أطب الشارجة ...

[خيال الحب]

عيل توكل على الله وركب الي في دبي

واحد من الشباب احيده مركب في دبي ب 12 الف

ومانصحك تركب الملون
احسه حق البنات خخخ .. كل يوم يركبون لوووووووون

ركب الشفاف .. او ركب هاا التقويم الي يحطونه ورا الضروووس

وخبرني اي عياده بتسير وكم اسعارهم لاني افكر احط تقويم مره ثانيه>>> ع الموضه خخخخ لووول سوالف

[دمعة شوق]

بصـراحه لو رحت للحكومـي بـيـذلونـك ذل ليـن ما يـركـبولك إيـاه
:fa55:
وربيه يوفقـك

،.،

بس الملـون بـعـد حلـو
:fa51:

[تحفه]

ما ادري والله .. ما عندي خبره في عيادات الاسنان .. بس الي اعرفهم طريتهم ..

على فكره يمدحون دكتور يشتغل في المستشفيات الحكوميه .. إسمه سيف الفلاسي او الشامسي ماذكر

بس يقولون إنّه وايد شاطر معنه توّه يديد

[الدلووووعة]

ياخويه انا شراتك متردده فأني احط تقويم ولا لاء

مرات اقول خلاص بحط واخر شي اغير راي لنه يعور

بس نصيحة لاتسير مستشفة حكومة يذلون ذل

عفكره في بنات يحطنه حق الدلع والله انا لو منهم ولا بفكر احدة حق الدلع
اتبهدل واتم احن من العوار بس عسب ادلع برايه بدلع فشي ثاني

بس انا يبالي بس اخاف احطة ^_^

شي عياده فبوظبي بس ماعرف شو اسمها نسيت المهم الكل يمدحة وعمظن انك تدفع 10 الف درهم

[المزوحي]

ربيعي سار عيادة في نايف لكن مابغي أسير لسبب الزحمة والمواقف .. وهو روحه مايلتزم بالمراجعة بسبب نفس المشكلة وإن الواحد مايلتزم بالمراجعة يتأخر في شل التقويم .. ملون مستحيل أحطه وشفاف مثل ماقلت لكم كنت بحطه وسعره 25 ألف .. والتقويم العادي صح يعور بس سمعت إنه مضمون أكثر .. عيل هذا اللي أباااه .. وحكومي شليته من بااالي خلاص ..
وصح هو يعور بس من بقى شي ترك شي !! وانا روحي ترددت لأنه ربيعي يقووول يعووور ..

[عفاريتووو]

اسمه دكتور سيف في مستشفى راشد
وايد زين و صدق يشتغل بضمير :fa42:

[المزوحي]

يستوي اطلبه هووو شخصيا .... بس تعالي اخاف من المواعيد ..!

[عفاريتووو]

هيه يستوي .. لا لا تخاف يمكن اول مرة يعطونك موعد بعيد .. بس بعدين حسب حالتك و ماذكر ان كانت تطول المواعيد وايد ..

واذا بغيت موعد جريب كلم الدكتور نفسه وما بيقصر

[أنشودة المطر]

السلام عليكم

الدكتور سيف

مثل ما قالت عفاريتووو تقدر تاخذ المواعيد من عنده ،،

إذا تبغي عيادة خاصة سمعت عن واحد زين في الكرامة أسمه د.سراج الدين يمدحونه

بس الصراحة أنا أنصحك بالحكومي

[الـيـاه]

سلااام


انا احين كملت تسع شهور حاطتنه في عيادة الدكتور طلس :fa42:
تقويمي عادي مب الشفاف وانصحك بهالدكتور لانه وايد اوكي وموول مايخليك تحس بالعوار

P= لكن ومابعد الـ لكن

قبل مايحطلك اياه :shutup: يوم بيحطلك الثمان لاستيكات مبين ضروسك اللي ورا
عسب عقب يقدر يركب قاعدة التقويم ( صدق بتتعذب من الاستيك ) شو يعور

ها من غير أول اسبوع من تركيب التقويم افففف الله لا اييبه لك ههه
بتم تاكل بروفين لين ما تلوع جبدك << حليله ازيغـّه :tounge: بس لا جد أهيئك

:blush: انصحك تسوي عنده بتحلوو هههه
هو في جميرا شارع الشاطيي صوب حديقة الحيوانات


وبس

.
.
.

[تحفه]

هي يستوي تطلبه شخصياً .. انا اعرف وايد ناس حولو من خاص و كانو يتعالجون برع حق اسنانهم يسافرون يومين ثلاث .. والحين صارو ايسيرون عنده ..

ويقولون إنّه وسيم :ghostface :tounge: :ghostface

[ولد الحكومة]

السلام عليكم
يمكن البنات هم ادرى وعندهم الخبر اليقيين ......
.
.
.
.
ولد الحكومة

[المزوحي]

عيل زاد الطلب على الدكتور ..... والحين يبالي أحط أسامي الدكاتره في ورقة وأسوي قرعة
وإلا أقووول الاستخارة أخير

[ولد الحكومة]

:woot: الله يعينك اخوي المزوجي ،،،، انا شراتك بعد يوم كنت بركب تقويم ما خليت حد وما استشرته وكل واحد ينعتني على دكتور .... الصراحه :wacko: دار راسي. ومن عقبهااا هونت :fa46: وأجلت الموضوع...................................

يعلى زين مافي الى تستخييييييييييير :fa42:


والسموحه عالمغثه :ohboy:

[المزوحي]

ولد الحكومة،، عيل بإمكانك الحين تاخذ فكرة .. يعني تجمع بين قبل والحين .. واستخير ..

[وعد]

انا سويت تقويم يوم كنت 15 سنه وكنت اكره نفسي يوم اروح موعد الاسنان
بس الصراحه نتايج التقويم وايد حلوة تعدل الشكل كله, بس اشوف 30 الف علي تقويم وايد :fa46:

الله يعينك وتحصل دكتور شاطر

[المزوحي]

وعد وصلني رقم دكتور بالمسج لا اعرف اسمه .. اللي عرفته إنه في شارع البنوك
( جريب من برجمان )

[ولد الحكومة]

بالتوفيق اخوي المزوجي :glare:

[المزوحي]

سرت عند دكتور راكش في الغرير .. سويت تصوير عنده لكن مادري شو السبب إنه صار له عشر أيام ومايرد عليه .. متردد يسوي لي تقويم ..!! مــستغرب
اتصلت به اليوم وقال تعال باجر بشرح لك .. الصراحة فكرت اسير عند واحد في الكرامة ...
شكلي إلا كل يوم عند دكتور اصور واسير ......

[حبوبه دبي]

انتـــه بعدك مـــا ركبت تقــويم !!!

:puppyeyes:

الفتــره اللــي طرحت المــوضـوع ســرت وركبـت فـي اسبــوعيـن ،،
اللــي تطــريه صـوب برجمــان ،،

مــاشالله عليــه فنــان وايده خفيــفه :yes:
وشكلــه فــاهم وشــاطـــر ،،

[المزوحي]

حبوبة دبي تراه هو مارد عليه .. كل مره اسير له .. يصور ويقول بجلع 4 من ضروسك لكن انته مشكلة .. قلت له الحين انا مشكلة ؟؟ بس هو يقول يباله شغل على أصول ومادري به ليش متردد ..
وآخر مره سرت له .. قال بفكر شو أسوي.. همم يفتكرني وحش ..
المهم .. عندي موعد باجر بشوف رده .. واحتمال اسير الكرامة ..
مبروك على التقويم


:bye2:

[حبوبه دبي]

هممم

داامه متــردد مــانصحـك اتسيـرله !! :no0:

اصلاا اللـي يقــولك بجلع كمــن ضــرس مــايعــرف !! شكلــك بيتغيــر عقــب اذا بيجلــع الاربع :puppyeyes:

انتــه ســـر صـوب برجمــان وشــوف شــو بيقــولك اول !!

اذا قــالك شــرات مــاقال هذاك كمــٌل عنده ،،

وخبــرنــاا عــااد بــاجـر شــو صــار لك

:fa35:

[المزوحي]

إن شاء الله ....

[عفاريتووو]

صدق المزوحي مب زين الاشعة وايد
لو يرضون يعطونك الاشعة زين
بعدين وياراسك اصبر ليش مستعيل عــ التقويم ,, صدقني السالفة عذاب :yes:

[مجموعة إنسان]

أخووووي المزوووحي !! التقويييم اللي بتركبه هجري وللا ميلاااادي ؟؟؟؟؟

[المزوحي]

حبوبة دبي .. سرت عنده وشرح شو بيسوي لي وخذت عنه الاشعة وقياس الضروس ..

عفاريتووو .. أدري إنه عذاب وأنا عاد يبالي سبب عسب انكسل ...

هواجيس مشتاق ... تقويو فارسي ...

[ريم العين]

ابا اسوي تقويم بس ضروسي حلوه اتدلع فالتقويم فالمدرسه هههههههههه

شو ركبولك التقويم ولا بعده؟

[المزوحي]

لا .. بعدني ..